القدرة علي الإنكار واحدة من أكتر الحاجات الوسخة اللي إتعلمها البشر من إبليس .. من النكت اللي سمعتها في مرة والحقيقة مش فاكر سمعتها فين بس يوم القيامة إبليس حيقابل (فرعون) اللي حيقوله إنت السبب إن أنا في النار .. لولا إنك وسوستلي مكنتش رفضت أؤمن بإله (موسي) .. إبليس بيبص لفرعون وبيقوله وأنا مالي .. أنا أخري معاك قلتلك تعصي ربنا بس إنت اللي طلعت قدام الناس قلتلهم أنا ربكم الأعلي .. يا رجل ده أنا أتكسف أقولها .. وهي دي الفكرة .. ما يسمي بDeniability أو القدرة علي الإنكار .. إنك تقتل القتيل وتمشي في جنازته .. أبشع الجرايم تتم باسمك وبمباركة منك بس مفيش دليل مادي يربطك بشكل مباشر ولو حد سألك تقول وأنا مالي .. نفس الConcept بيحترفه الحكام .. الخليفة الأموي (عبدالملك بن مروان) كان كل ما يتسأل إنت إزاي سايب (الحجاج بن يوسف الثقفي) يرتكب الجرايم دي كلها يقول وأنا مالي أنا مقولتلوش يعمل كده .. الملك (هنري الثاني Henry II) ملك إنجلترا كان معروف إنه مخنوق أوي من واحد اسمه (توماس بيكيت Thomas Becket) تقدر تقول إنه كان ما يعادل شيخ الأزهر في إنجلترا كده وفي مرة في قعدة بليل (هنري الثاني) قال للي حوليه يا سلام لو أصحي الصبح علي خبر إن (توماس بيكيت) مات .. تاني يوم كان إتقتل .. محدش قال إن (هنري الثاني) بنفسه هو اللي مسك السكينة وقتل (توماس بيكيت) بس في نفس الوقت إنت عارف إن الجريمة دي تمت بموافقته .. نفس الكلام حصل مع (جمال خاشقجي) .. محدش قال إن (محمد بن سلمان) بنفسه اللي قتله بس كلنا عارفين إن اللي حصل ده عمره ما كان حيتم من غير موافقته.
فكرة القدرة علي الإنكار في عصرنا الحديث بقي ماسكها أجهزة المخابرات والمؤسسة الأمنية عموماً .. من أول فضيحة ووترجيت في أميركا لإغتيال الأميرة (ديانا) في إنجلترا للي بيحصل عندنا هنا في مصر .. مش حتفرق إذا كنت عايش في دولة ديموقراطية أو ديكتاتورية في الشرق أو في الغرب إسلامية أو علمانية .. بتبقي حاجة حلوة إن الحاكم يبقي تحت إيده ناس معدومة الضمير مصيرها جهنم وبئس المصير مستعدة تقتل النفس التي حرم الله قتلها إلا بالحق لمجرد إن ده اللي عايزه الزعيم .. وده بيتم من غير ما الزعيم يتحمل أي مسئولية .. قصة النهاردة عن ناس دي شغلتها وهم فاجنر جروب Wagner Group واللي يمكن تكون سمعت اسمهم قبل كده ولو دي أول مرة يعدي الاسم عليك فأنا بحذرك من دلوقتي إن أحداث القصة دي حتحرق دمك وحتضايق .. اللهم قد أنذرت اللهم فأشهد.
أوكرانيا .. بداية ميلاد الفكرة:
يُحكي أن كان فيه رجل اسمه (ديميتري أوتكين Dmitri Utkin) .. ده كان ضابط في القوات الخاصة الروسية ومن ضمن اللي شاركوا في حرب الشيشان وبسبب ده إنضم للمخابرات الحربية الروسية اللي بيسموها GRU .. فيه أجهزة مخابرات لما بتنضم ليها وبتبقي فرد من قوة العمليات بتاعتها وربنا يكرمك وبتبقي ما يسمي بضابط حالة أو Case Officer بيدولك اسم مستعار بتتعرف بيه جوه مؤسسة المخابرات .. المهم إن الاسم المستعار بتاع (ديميتري أوتكين) في المخابرات الحربية الروسية كان (فاجنر Wagner) .. فيه إشاعة محدش عارف هي دي حقيقية ولا لا إن (ديميتري أوتكين) إختار اسم (فاجنر) لإنه علي اسم (ريكارد فاجنر Richard Wagner) المؤلف الموسيقي اللي كان أكتر موسيقار (أدولف هتلر) بيحب يسمع الموسيقي بتاعته .. زي ما قلت دي إشاعة محدش عارف مدي مصداقيتها .. سنة 2014 (ديميتري أوتكين) كان من ضمن الفريق جوه GRU اللي كانت شغلته التنسيق مع المخابرات العامة الروسية FSB ومع القوات المسلحة عشان يلاقوا طريقة إزاي روسيا تاخد شبه جزيرة القرم أو Crimea من أوكرانيا وضع يد .. لو مش فاهم ده معناه إيه مش مشكلة حفهمك.
علاقة روسيا وأوكرانيا شبه أوي علاقة مصر والسودان .. زي ما زمان السودان كانت حتة من مصر فبرده أوكرانيا كانت حتة من روسيا .. و برده زي ما شبه جزيرة القرم منطقة متنازع عليها بين روسيا وأوكرانيا فبرده حلايب وشلاتين فيه خناقة بينا وبين السودان عليها .. اللي عايزك تتخيله إن لنفترض إن طلع حكم قضائي دولي بإن حلايب وشلاتين جزء من التراب السوداني بس في نفس الوقت إحنا مش عاجبنا الكلام ده .. حلو .. بس في نفس الوقت برده أي تدخل عسكري مباشر عشان مصر ترجع حلايب وشلاتين بقوة السلاح حيخلي شكلنا وحش قدام الناس .. طب والحل؟ .. دلوقتي حلايب وشلاتين صحيح بناء علي حكم المحكمة تبع السودان بس عايش فيها مصريين كتير .. جميل .. تعالي إنت هات عناصر مسلحة لبسها اللبس المموه بتاع الجيش بس متخيلهمش يحطوا علم مصر علي الزي العسكري بتاعهم ولا يشيلوا أي ورق أو بطايق أو كارنيهات تلمح لا من قريب ولا من بعيد إن المسلحين دول مصريين وإبعت العناصر دي لحلايب وشلاتين خليها تسيطر علي الأرض .. اللي حصل إن (ديميتري أوتكين) عرض الفكرة دي وعجبت الناس وإتكلف إنه يبقي هو قائد العملية دي .. بنفسه هو اللي إختار عناصر القوات دي من ضمن الأفرع الرئيسية للقوات المسلحة الروسية بحيث يكونوا من أصل أوكراني وأهلهم إتولدوا أو جم من إقليمي دونيتسك ولوهانسك أو حتي شبه جزيرة القرم نفسها .. هو اللي سماهم مجموعة فاجنر وزي ما قلتلك هو خد الاسم من الاسم المستعار بتاعه جوه GRU.
نجاح فاجنر جروب في أوكرانيا والكلام ده كان سنة 2014 بفكرك كان أولاً وأخيراً بيتبصله جوه مؤسسة المخابرات الروسية علي إنه مهمة ونجحت و شكراً علي كده .. تدخل روسيا في شبه جزيرة القرم سنة 2014 كان متخططله من الأول إنه يكون عملية مخابراتية عسكرية مشتركة متكملش أكتر من سنة .. الخطة كانت إن لما تيجي سنة 2015 حيتم حل الوحدة بتاعة فاجنر دي دي وكل واحد يروح لحاله بس الحرب الأهلية السورية غيرت كلت حاجة.
سوريا .. الله ده الموضوع بيجيب فلوس حلوة كمان:
من اليوم الأول للثورة السورية والتارجيت أو خلينا نقول الحاجة اللي عاجلاً أم أجلاً الروس حيلاقوا نفسهم مضطرين يعملوها هي إنهم يبعتوا قوات علي الأرض في سوريا .. الروس عايزين يفضلوا حاطين إيدهم علي القاعدة البحرية بتاعتهم في مدينة طرطوس السورية لإن دي القاعدة البحرية الوحيدة ليهم في البحر المتوسط و(بشار الأسد) مستعد يقدم ده للروس وبالتالي بأي حال من الأحوال لازم تخلي (بشار) يفضل قاعد علي الكرسي .. قدام الناس برده شكلها حيبقي وحش لو (بوتين) قرر يبعت قوات برية .. صحيح هو له طيارات بس الطيار ده طاير في السما شاشي وإنت متدراشي بس العسكري علي الأرض سهل يتقتل .. زود علي كده إن طول عمر الروس وهم كل ما يحبوا يبينوا قدام العالم إن الأمريكان وحشين يفكروهم إنهم إحتلوا العراق وأفغانستان من غير وجه حق فاللي بنعمله في الناس مش عايزينه يطلع علينا .. طب والحل؟ .. قيادة الأركان المشتركة بتاعة القوات المسلحة الروسية تفتق ذهنها لفكرة هو معلش مش فاجنر جروب دول عملوا الواجب وزيادة في أوكرانيا؟ .. طب ما نبعتهم سوريا.
سنة 2015 طلع قرار بإن (ديميتري أوتكين) يلم رجالته تاني وإختاروله قاعدة عسكرية لتدريب العناصر بتاعته يدوبك فردة كعب من القاعدة العسكرية الروسية في حتة اسمها مولكينو Mol’kino جنوب روسيا عشان يبدأ يبعتهم ينفذوا مهمات في سوريا .. لحد دلوقتي الطريقة اللي مجموعة فاجنر كانت ماشية بيها تقريبا نسخة بالكربون من الطريقة اللي شركات الأمن الأمريكاني شغاله بيها .. أفراد فاجنر جروب بيتم إختيارهم من العناصر السابقين من القوات المسلحة الروسية وخصوصاً القوات الخاصة .. لحد الوقت ده العملية ووجود فاجنر جروب كان سري لإنه لحد دلوقتي كان بيتشاف علي إنه عملية مخابراتية مشتركة بين GRU اللي هي المخابرات الحربية و FSB اللي هي المخابرات العامة بس فضلت نقطة .. أوكرانيا كانت جارة لروسيا فكان سهل تبعت عناصر مجموعة فاجنر ليها ومش حيكلفك حاجة .. بس سوريا بعيدة .. إنت أولاً محتاج تدفع مرتبات الناس اللي حتروح .. محتاج توفرلهم سلاح وذخيرة وأكل وشرب وعلاج .. محتاج توفرلهم طيارات توديهم وتجيبهم .. محتاج قاعدة عسكرية مخصوص ليهم جوه سوريا ومش قاعدة واحدة دول كذا واحدة .. كل ده بفلوس .. فلوس كتير .. أوي.
دي كانت المرحلة اللي (بوتين) بقي عنده علم باللي بيحصل .. ضباط GRU اللي بفكرك إنها المخابرات الحربية الروسية اللي ماسكين العملية كانوا محتاجين أولاً حد يمول العملية وثانياً يقنع (بوتين) بإن العملية دي تستاهل المخاطرة وعشان كده هم جندوا واحد اسمه (يفيجيني بريجوزين Yevgney Prigozhin) .. يطلع مين بقي الأخ ده؟ .. ده واحد من رجال الأعمال اللي معاهم فلوس بسبب البيزنس اللي هو بيعمله مع (بوتين) والشلة دي من رجال الأعمال اللي ثروتهم جت بسبب شغلهم مع (بوتين) بيتسموا أوليجاركس Oligarchs .. المهم إن فلوسه جت من شغل المطاعم ويُقال إن في الألفينات الرجل ده كان بيدفع ملايين عشان يعمل حفلات ل(بوتين) لدرجة إنه طلع عليه اسم طباخ (بوتين) .. بس يمكن علاقة (يفيجيني) ب(بوتين) بقت قوية أوي بعد ما في سنة 2013 هو أسس حاجة اسمها وكالة أبحاث الإنترنت Internet Research Agency أو IRA إختصاراً .. هي تبان من اسمها إنها كيان محترم بس هي مش كده .. كل اللي هو عمله إنه جاب شوية هاكرز عشان يعملوا أكونتات مزيفة علي كل مواقع السوشيال ميديا بحيث الأكونتات دي ميبقاش ليها شغلة ولا مشغلة غير إنهم ينكدوا علي المعارضين بتوع (بوتين) عيشتهم .. أيوه .. (يفيجني بريجوزين) هو اللي إخترع ما يسمي باللجان الاليكترونية .. الفكرة عجبت (بوتين) لدرجة إن السمعة اللي بقت متاخدة عنه إن هو ده الرجل اللي (بوتين) مبيفرضلوش طلب وعشان كده GRU راحتله عشان يقنع (بوتين) بإنه يوافق علي إرسال مجموعة فاجنر لسوريا.
مهم تبقي فاهم العلاقة المريبة اللي مجموعة فاجنر عايشة بسببها .. (يفيجني بريجوزين) مهواش ضابط سابق ومعندوش أي خبرة في مجال التجسس والعمليات الخاصة بس الناس اللي ماسكة GRU و FSB علي قلبهم زي العسل إنه يبقي هو اللي محطوط اسمه علي الورق الرسمي ويبقي هو واجهة المشروع خصوصاً إن هو اللي بيدفع .. (يفيجني بريجوزين) مبسوط بده لإن مع كل نجاح تحققه مجموعة فاجنر (اللي هو نجاح هو معملش فيه حاجة) بيجري ل(بوتين) يقوله إيه رأيك فيا يا ريس و(بوتين) يطبطب عليه ويقوله عفارم يا (يفيجني) يا ريت كل رجالتي زيك .. حتي (بوتين) مبسوط إن بقي عنده كيان مسلح بيعمل كل الشغل الوسخ اللي قواته المسلحة والمخابرات بتاعته متقدرش تعمله قدام الناس ولو حاجة باظت يقدر يقول أنا مليش دعوة.
بداية إن الروس يكتشفوا إن الموضوع جايب همه كان في سنة 2017 .. هم كان بقالهم سنتين باعتين عناصر مجموعة فاجنر هناك بس دي السنة اللي (بشار الأسد) وافق إنه يتحمل هو تكاليف وجودهم في بلده .. مش كده وبس .. (بشار الأسد) وافق يدي (يفيجني بريجوزين) ربع أرباح مبيعات البترول والغاز الطبيعي من حقول النفط والغاز الطبيعي اللي جوه الأراضي اللي عناصر فاجنر جروب مسيطرين عليها .. دي كانت بداية إن مشروع فاجنر جروب يبدأ يمول نفسه بنفسه .. ده بقي أسلوب شغل فاجنر جروب في أي حتة يروحوا يشتغلوا فيها .. في أفريقيا الوسطي خدوا حصة من أرباح مناجم الألماس وفي السودان كانوا بياخدوا نسبة من أرباح مناجم الذهب زي ما حنشوف كمان شوية .. المهم .. شوية وبدأت المشاكل تظهر .. هي مش مشاكل قد ما هي شغل نسوان الصراحة.
شوف يا إبني .. أوعي تقول لمراتك أو أي بنت عموماُ إنها تخنت .. أوعي تقول لمهندس إنه فيه حتة هو مش فاهمها حتي لو في جراحة المخ والأعصاب اللي هي أساساً مش شغلته بس مش مهم لإن معروفة إن المهندسين بيفهموا في كل حاجة .. وأوعي تقول لضابط جيش إنه مش شايف شغله .. ضباط الجيش بيتعفرتوا من إنك تلمح ولو من بعيد إنه مقصر أو مش شغال زي ما الكتاب ما بيقول .. مجرد إن GRU اللي بفكرك إنها المخابرات الحربية الروسية تبعت مرتزقة حتي لو كانوا ضباط وعساكر سابقين في القوات المسلحة لسوريا فده ملوش غير معني واحد (من وجهة نظر المؤسسة العسكرية الروسية علي الأقل) إن المخابرات شايفة الجيش مش شايف شغله .. وجود فاجنر جروب في سوريا لوحده خلق خناقات وغيرة ومشاكل وحوارات وشغل نسوان بين (يفيجني بريجوزين) و (سيرجي شويجو Sergei Shoigu) وزير الدفاع الروسي وقتها .. لو مثلاً العناصر بتوع فاجنر إحتاجوا ذخيرة يا متجيش يا تتأخر .. لو فيه مثلاً صفقة توريد إياكش حتي كراتين بيبسي للناس بتاعة فاجنر جروب في سوريا (سيرجي شويجو) بنفسه اللي يقرر إن الصفقة متروحش لأي شركة تحت إيد (يفيجني بريجوزين) اللي هو أساساً بني ثروته من شغل المطاعم وعنده شركات بتورد مستلزمات المطاعم من أكل وشرب.
كل طرف كان مستني التاني يغلط .. (سيرجي شويجو) كان يا عيني حيموت والناس بتاعة فاجنر جروب تعك الدنيا .. من طرفه هو بينكد علي (يفيجني بريجوزين) بكل اللي يقدر عليه .. علي الناحية الثانية (يفيجني) معروف عنه إنه بخيل حبتين وكل ما حنفية الفلوس اللي بتجيله من وزارة الدفاع تقفل يقوم هو كمان قافل حنفية المرتبات والزيادات اللي بتروح لرجالته .. يوم 7 فبراير 2018 اليوم اللي كان مستنيه (سيرجي شويجو) جه .. فيه نظرية مفيش أي دليل مادي عليها إن (سيرجي شويجو) فضل يلف الحبل حول رقبة (يفيجني) لحد ما خلي (يفيجني) يائس مش عارف يعمل إيه .. فيه ماسورة مصاريف مكسورة وخاربة بيت (يفيجني) وهو محتاج أي مصدر دخل .. أي قرشين يستر بيهم نفسه .. يٌقال إن (سيرجي شويجو) سرب معلومة غلط ل(يفيجني) إن فيه حقل بترول اسمه كونوكو Conoco في محافظة دير الزور في سوريا محدش بيحميه فلو رجالة فاجنر جروب سيطروا عليه فبناء علي الإتفاق اللي إتعمل مع (بشار الأسد) فهم يقدروا ياخدوا فلوس تصدير البترول اللي بتطلع من الحقل ده .. فكرة الأرباح وشنط الفلوس خلت ريق (يفيجني) يجري بس اللي مكنش هو يعرفه إن الحقل ده كان تحت حماية القوات الخاصة الأمريكية في سوريا .. يوم 7 فبراير 2018 إتقتل 200 فرد من عناصر مجموعة فاجنر في هجوم فاشل علي الحقل ده علي إيد عناصر القوات الخاصة الأمريكان اللي بيحموه وكانت حرفياً فضيحة .. منظر (يفيجني) بقي زي الزفت .. يٌقال إنه فضل يلف علي الناس بتوع الكريملين ومؤسسة المخابرات والقوات المسلحة عشان يحلفلهم علي الإنجيل إن شغل البهايم اللي حصل ده مش حيتكرر تاني ويُقال برده إنه إعتذر ل(بوتين) كتير كل ده و(سيرجي شويجو) بيضحك ضحكة شريرة متقطعة علي جنب.
أفريقيا .. سموزي الفلوس والسٌلطة والنفوذ:
زي ما قلتلك كل ما (بوتين) يحب يعمل واجب مع حد يبعتله مجموعة فاجنر .. سنة 2015 بعتهم سوريا عشان يحاربوا مع قوات الرئيس السوري (بشار الأسد) ضد شعبه .. سنة 2016 بعتهم ليبيا عشان يحاربوا ضمن قوات (خليفة حفتر) اللي كان تحت إيده 1000 مقاتل منهم لما زحف علي العاصمة الليبية طرابلس سنة 2019 .. سنة 2017 بعتهم جمهورية أفريقيا الوسطي عشان يحموا مناجم الألماس .. وإتبعتوا برده السودان عشان يأمنوا مناجم الذهب .. سنة 2021 لما فرنسا أعلنت إنسحابها من مالي (بوتين) بعت 1000 مقاتل من عناصر من مجموعة فاجنر هناك عشان تأمن الحكومة المالية ضد هجمات قبيلة الطوارق هناك واللي بيتقال عليهم قدام الناس إنهم إرهابيين إسلاميين بس ده مش حقيقي بناء علي طلب من الكولونيل (أسيمي جويتا Assimi Goita) اللي وصل للكرسي أصلاً في مالي بإنقلاب عسكري سنة 2020 .. يقال إن الكولونيل (إبراهيم تراوري) اللي وصل للكرسي في بوركينا فاسو بإنقلاب عسكري دموي إتصل ب(بوتين) وطلب منه يبعتله عناصر من مجموعة فاجنر عشان يفضل قاعد علي الكرسي .. زي ما إنت شايف وجود فاجنر جروب في أفريقيا يمكن باستناء ليبيا كانت فكرته إن (بوتين) حابب يعمل دور واجب مع الحكام الأفارقة .. السمعة اللي أخدتها في أفريقيا هي الأتي .. إحنا مش بس نقدر نحمي الزعيم ونضمن إنه يفضل قاعد بقوة السلاح وننصحه في أي حاجة يحتاجها إنما حتي لو حب يخش إنتخابات ففكرة اللجان الأليكترونية اللي (يفيجني) إخترعها زي ما قلتلك بقت سلاح فشيخ في إيده ومغري لإي ديكتاتور أفريقي عايز يتبت في الكرسي بإيديه وسنانه .. من موزمبيق لمدغشقر لجنوب أفريقيا .. يبعتوا 500 مرتزق لأفريقيا الوسطي وحوالي 100 للسودان.
ممكن يكون في الأول المبرر ورا إنشاء فاجنر جروب كان إن الكريملين عموماً و(بوتين) خصوصاً يبقي عنده القدرة إنه ينكر بس دلوقتي الموضوع إختلف شوية .. الناس دي إتبعتت لسوريا وإتبعتت لدول أفريقيا عشان يقوموا بدور مش دورهم .. المفروض إن التاسكات اللي عناصر فاجنر جروب بيقوموا بيها خصوصاً في أفريقيا من إختصاص وزارة الخارجية والمخابرات العامة FSB بس المؤسسات دي فخدت ومبقتش توجع دماغها إنها تقوم بشغلها .. فيه ناس بتقول إن عشان فاجنر جروب بقت بتصرف علي نفسها من العقود اللي بيمضوها مع قادة دول أفريقيا لإستغلال موارد بلادهم فبقي بالنسبة للروس أرخصلهم إنهم يبعتوا فاجنر جروب لبوركينا فاسو مثلاً من إنهم يبعتوا فريق مشترك من السلك الدبلوماسي وضباط المخابرات ويدفع مرتبات وإنتقالات وبدلات وإقامة وحنفية فلوس مفتوحة .. اللي أنا وإنت والناس كلها عارفاه يمكن باستثناء إتنين علي حدود المغرب وموريتانيا إن السباق دلوقتي بين القوي العظمي هو علي مين يقدر يحط إيده علي أفريقيا .. الصين بتبعزق فلوس ومسلفة دول أفريقيا كلها مليارات عشان في الأخر تتحكم في مصير القارة عن طريق الديون .. الأتراك بيحاولوا يبيعوا تكنولوجيا .. بس الروس عندهم إيه يقدموه؟ .. الحل من وجهة نظر (بوتين) إنه يوجب مع حكام القارة وده الدور اللي بتلعبه فاجنر جروب دلوقتي.
تبقي مشكلة الكلام عن فاجنر جروب هو فكرة إن في غياب المعلومة المؤكدة مش بيبقي قدامنا غير الهبد .. إحنا مش قادرين نفهم أوي أو نستوعب مستوي شغل الناس دي وده سببه إن أولاً مفيش معلومة مؤكدة وثانياً إن المخابرات الروسية شاطرة أوي في حتة Disinformation أو False Flag اللي هو ببساطة برميلك شوية معلومات غلط ولإن مفيش غيرهم فإنت بتصدقهم .. بمعني .. الكلام اللي الروس عايزينك تبقي عارفه إن مجموعة فاجنر دي تبقي شركة أمن خاصة Private Military Company وإختصاراً بيتقال عليهم PMC زيها زي شركة بلاك ووتر Black Water اللي اسمها إتغير بقي أكاديمي Academi بس ده مش حقيقي .. بلاك ووتر كان ليها Scope of Work أو طبيعة شغل الناس كلها عارفاها .. لنفترض إن مثلاً في العراق إنت محتاج تأمن تحركات السفير الأميريكي في بغداد بس إنت معندكش ناس ضمن القوات المسلحة الأميريكية عشان تأمنلك السفير .. طب والحل؟ .. وزارة الخارجية الأميريكية بتروح تمضي عقد مع شركة بلاك ووتر اللي هي شركة قطاع خاص عشان ناس شغالين في الشركة هم اللي يتولوا تأمين السفير .. الناس دي بتتحاسب بالساعة ومينفعش مثلاً تقولهم طب وأنتوا فاضيين كده روحوا أقبضولي علي عناصر من داعش .. فاجنر جروب مش كده .. فاجنر جروب تقدر تقول عليها فرع مش رسمي من المؤسسة العسكرية الروسية عشان تعمل الشغل اللي سوري في الكلمة وسخ اللي مينفعش يبان قدام الناس إن بيقوم بيه عسكري روسي لابس زي عسكري متخيط عليه علم روسيا.
اللي عايز أختم بيه إنك تبقي فاهم كويس أوي هو الكيان اللي اسمه فاجنر جروب ده إزاي وسخ .. الروس بيقولوا عليها PMC بس هي أساساً مش شركة .. هي مش متسجلة في الشهر العقاري .. ملهاش أسهم في البورصة .. ملهاش وجود أصلاً في الورق الرسمي و ده بيخليهم يرتكبوا جرائم محدش عارف يثبتها عليهم .. في مالي هم متهمين بعلي الأقل إرتكاب 6 مجازر ضد مدنيين .. في الغزو الروسي لأوكرانيا قواتهم إرتبط اسمها بمذابح جماعية كتير .. في ليبيا كانوا كل ما يببقوا فاضيين يلغموا شارع أو يفخخوا بيوت .. متعتهم في الخراب .. الناس دي ليها علي الأقل 5000 مقاتل متوزعين في أفريقيا وهو يبان رقم قليل بس اللي حيخليك تتحط في الصورة إن القوات المسلحة الأميريكية ليها في أفريقيا كلها شاكب راكب 6000 عسكري بس.
المصادر:
- مقالة بعنوان What is Russia’s Wagner Group of mercenaries in Ukraine? نشرت في موقع هيئة الإذاعة البريطانية BBC و ده لينك المقالة الأصلية:
https://www.bbc.com/news/world-60947877 - مقالة بعنوان Putin’s not-so-secret mercenaries: Patronage, geopolitics, and the Wagner Group نشرت علي موقع معهد كارنيجي للدراسات و ده لينك المقالة الأصلية:
https://carnegieendowment.org/2019/07/08/putin-s-not-so-secret-mercenaries-patronage-geopolitics-and-wagner-group-pub-79442 - مقالة بعنوان Russian mercenaries project the Kremlin’s power far from its troubles in Ukraine نشرت في جريدة Wall Street Journal و ده لينك المقالة الأصلية:
https://www.wsj.com/articles/russia-wagner-group-mercenaries-mali-west-africa-11661099199
