تابعونا

البوم صور

أيسلندا .. رحلة المليون للإعتماد الكلي علي الطاقة المتجددة.

أيسلندا بلد تقدر تقف قدام العالم كله و تقول بكل فخر إنها من الدول اللي تتعد علي الصوابع اللي مبتحرقش بنزين .. بلد إقتصادها قائم بنسبة 100% علي الطاقة المتجددة .. بلد بتاكل خضار و فاكهة أورجانيك مفيهاش مبيدات .. بلد بتسحب ثاني أكسيد الكربون من الجو مش بترميه فيه .. تجربة تستحق إننا نقف قدامها في الألبوم ده و ننحني لها إحتراماً و نتعلم منها كتير أوي .. الألبوم ده فيه زتونة تجربة أيسلندا لبلد زي النسمة وجودها خفيف علي البيئة.

5 فبراير، 2023 695

فيه دول بيبقي اسمها علي مسمي .. أيسلندا من البلاد دي .. اسمها معناه أرض الثلج وهي فعلاً بلد ربنا خلقها غريبة جداً .. جغرافياً صعبة .. جوها منيل بستين نيلة .. بلد خسرت اللي وراها واللي قدامها في الأزمة المالية العالمية بتاعة سنة 2008 .. ورغم كل ده .. رغم كل المصايب دي كلها .. أيسلندا بلد تقدر تقف قدام العالم كله وتقول بكل فخر إنها من الدول اللي تتعد علي الصوابع اللي مبتحرقش بنزين .. بلد إقتصادها قائم بنسبة 100% علي الطاقة المتجددة .. بلد بتاكل خضار وفاكهة أورجانيك مفيهاش مبيدات .. بلد بتسحب ثاني أكسيد الكربون من الجو مش بترميه فيه .. تجربة تستحق إننا نقف قدامها في الألبوم ده وننحني لها إحتراماً ونتعلم منها كتير أوي .. الألبوم ده فيه زتونة تجربة أيسلندا وتحولها لبلد زي النسمة وجودها خفيف علي البيئة.

اللي قدامك ده يبقي واحدة من أكبر محطات إنتاج الكهرباء في أيسلندا ولو إنت مستغرب إزاي يعني محطة كهرباء وهي فاضية كده فدي محطة بتنتج كهرباء بس بحاجة اسمها  Geothermal Energy ودي ترجمتها للعربي معناها الطاقة الحرارية الجوفية .. طبعاً مش فاهم .. أيسلندا ربنا خلقها جزيرة في المحيط الأطلنطي محشورة بين صفيحتين تكتونيين كبار أوي اللي هم أوراسيا وأميركا الشمالية .. الفكرة إن القشرة الأرضية اللي هي الطبقة الخارجية لكوكب الأرض بتتكون من حاجة اسمها صفائح تكتونية تقدر تشبهها بإنك جبت مراتب البيت كله رصيتها جنب بعض علي الأرض .. إنت مش مخيط المراتب دي في بعض وبناء عليه فيه فراغات بينهم .. الفراغات اللي بينهم دي هي اللي بتطلع منها البراكين .. أهي أيسلندا بقي تبقي جزيرة بركانية وده معناه إنك تقدر تجيب شوية مياه تمشيهم في مواسير وتنزلهم تحت الأرض يسخنوا شوية وبعد كده تطلعهم تاني تستفيد بالحرارة بتاعتهم وهي دي الGeothermal Energy .. أيسلندا كل سنة بتنتج 575 ميجاوات كهرباء بالطريقة دي.
صورة تانية لمحطة Geothermal Energy بس المرة دي باين فيها شكل المواسير اللي بتنزل في أبيار لتحت الأرض عشان تسخن وبعد كده تطلع .. طبيعي ومنطقي إن توليد الكهرباء نفسه ينتج عنه شوية غاز ثاني أكسيد كربون بس الفكرة إن أخواتك في كوكب أيسلندا الشقيق بياخدوا الغاز ده يا إما يحقنوه تاني لباطن الأرض أو ياخدوه يستفيدوا بيه في صناعات تانية .. يعني مثلاً .. سنة 2020 تم حقن 50,000 طن غاز ثاني أكسيد كربون تاني لباطن الأرض بحيث الغاز ده بيتفاعل مع حجر البازلت اللي مدفون في الأرض واللي ربنا خلقه من أكتر المواد اللي ليها القدرة إنها تمص غاز ثاني أكسيد الكربون زي ما السفنجة بتقدر تمتص المياه.
الصورة دي متاخدة من محطة هيليشوي Hellisheioi أكبر محطة Geothermal في أيسلندا وثالث أكبر محطة علي مستوي العالم والحقيقة أرقام المحطة دي مرعبة .. دي بتقدر تنتج 303 ميجاوات كهرباء .. بتقدر تنتج 400 ميجاوات طاقة حرارية كافية إنها توفر 87% من إحتياجات بيوت أيسلندا كلها من المياه السخنة .. خلال الفترة من 1990 لحد سنة 2014 قدرة أيسلندا من Geothermal Energy زادات بنسبة 1700% ودي مش غلطة مطبعية.
القبة اللي قدامك دي بتتسمي Geodesic ودي تقدر وظيفتها إنها تخبي الحفرة اللي محفورة في الأرض عشان ننزل منها المواسير اللي فيها مياه عشان تسخن .. ليه بنحتاج نخبي الحفر دي؟ .. الحفر دي بيكون عمقها ما بين 2000-3000 متر فطبيعي إنك تغطيها.
ده شكل القبة Geodesic من جوه .. غير إنك بس بتنزل ماسورة مياه باردة من ناحية تطلع سخنة من الناحية الثانية فإنت برده بتحقن غاز ثاني أكسيد كربون تاني جوه الأرض .. ده بيتم إنك بتجيب مياه مالحة دايب فيها غاز ثاني أكسيد كربون وبتحقنها تحت الأرض علي أعماق بتوصل 500 متر عشان في العمق ده وبسبب سخونية باطن الأرض غاز ثاني أكسيد الكربون بيتفاعل في لحظة مع البازلت.
فيه ناس بتسافر أيسلندا مش عشان تزور متاحف أو معابد إنما عشان تنزل تضرب غطس في البتاع ده .. هم بيسموه اللاجون الأزرق Blue Lagoon وده حمام سباحة عمومي معمول ورا محطة Geothermal Energy .. دلوقتي المياه بتطلع من تحت الأرض مولعة بتعدي علي تربينة عشان تولد كهرباء وبعد كده بتعدي علي مبادل حراري Heat Exchanger وبعد كده بتترمي في اللاجون ده .. بسبب إن المياه دي ربنا خلقها فيها نسبة سيليكا عالية أوي فأولاً لونها بيبقي فيروزي زي ما إنت شايف وثانياً مش بتقدر تتسرب تاني لتحت الأرض فبتخلق شكل البحيرة.
الصورة دي لواحدة من الأفكار المطرقعة اللي عملها الأيسلنديين .. ده اسمه مصنع (جورج أولاه George Olah) لإنتاج الميثانول عملته شركة اسمها Carbon Recycling International .. المصنع ده هو أول مصنع يتعمل في العالم عشان يمصوا ثاني أكسيد الكربون من الجو ويستخدموه لإنتاج الميثانول.
الصورة دي وراها حكاية غريبة شوية إن أيسلندا لما فكرت تبقي بلد صديقة للبيئة إكتشفت حاجة وهي إن زي ما قلنا في الأول ربنا خلق أيسلندا لا جغرافيتها ولا جوها ينفعوا تبقي بلد زراعية وده معناه إن طبيعي ومنطقي إن إحتياجات البلد من الخضار والفاكهة تبقي مستوردة من بره .. المشكلة إن الخضار والفاكهة دي عشان يوصلوا أيسلندا بيتحطوا في طيارات أو سفن والإتنين بيحرقوا بنزين فاللي وفرناه بإيدينا اليمين صرفناه بالشمال .. طب والحل؟ .. أيسلندا بلد داست جامد أوي في تكنولوجيا الصوب الزراعية .. 75% من إحتياجات البلد من الطاطم و 90% من الخيار بيتزرعوا محلياً في صوب زراعية وهم مكملين في السكة دي عشان ميستورودوش أي خضار أو فاكهة من بره.
الصورة دي مهمة أوي .. دي تبقي صوبة زراعية لإنتاج الطاطم .. معلومة رقم واحد دي طماطم أورجانيك .. معلومة رقم إتنين إن عملية البناء الضوئي اللي ربنا خلق بيها النباتات عشان تنمو معتمدة علي غاز ثاني أكسيد الكربون اللي هو أساساً بيجي عن طريق مواسير من محطة Geothermal Energy جنب المزرعة .. معلومة رقم ثلاثة إن بيبقي فيه برنامج كومبيوتر هو اللي بيتحكم في معدل الإضاءة والري ودرجة الحرارة في أي صوبة زراعية.
سعي أيسلندا إنها تحقق الإكتفاء الذاتي من المحاصيل الزراعية خلاها تلجأ لحلول غريبة جداً زي ما يسمي المزارع الرأسية Vertical Farming زي اللي عندك في الصورة دي وعملتها شركة اسمها فاكسا Vaxa في العاصمة ريكيافيك.
ما هو مش معني إننا بلد عايزة تبقي صديقة للبيئة إن الناس متاكلش لحمة ومتشربش لبن .. بس في نفس الوقت مشكلة الثروة الحيوانية هو إن البقر والجواميس زي ما تقول كده يعني بتطلق ريح فيه نسبة غاز ميثان عالية حبتين .. الأيسلنديين قالوا بسيطة .. كل المزارع بتاع المواشي في البلد حتتعمل من الخشب اللي ربنا خلقه بيقدر يمتص غاز ثاني أكسيد الكربون.
من حوالي 1000 سنة إيسلندا مكنش فيها شجرة توحد ربنا  لأسباب كتير الحقيقة من ضمنها إن حضارة الفايكينج خلصت علي الشجر عشان يبنوا بيه بيوت وسفن وعشان يحرقوه كوقود بس ده بدأ يتغير من حوالي 60 سنة لما شوية مواطنين بدأوا مشروع لتشجير البلد رغم الطقس المنيل بستين نيلة اللي عايشة فيه أيسلندا .. لك أن تتخيل إن الأيسلنديين حاطين لنفسهم تارجيت إن خلال الخمسين سنة الجاية 5% من مساحة البلد تكون متغطية بالشجر.
دي مزرعة سمكية وزي ما إنت شايف هي بتتكون من 4 أحواض نسخة بالكربون من بعض بحيث الطريقة دي في التصميم بيسموها Modular Design اللي هو تعمل حاجة شبه المكعبات اللي العيال الصغيرة بتلعب وتقدر تكتر منها أو تقلل زي ما إنت عايز .. الModule الواحدة عبارة عن 4 خزانات متوصلين ببعض بحيث كل خزان بيبقي أوطي من الخزان اللي قبله ب1.2 متر عشان المياه تجري في الخزانات بالجاذبية الأرضية .. المياه اللي عايش في السمك بيدفوها عن طريق خط جايلهم من محطة Geothermal Energy جنبهم.
مزرعة سمكية تانية بس المرة دي جوه البحر .. الناس دي عندها هسهس مسيطر علي دماغهم إنهم مش عايزين يعملوا حاجة تضر البيئة لمجرد إنهم عايزين ياكلوا و يشربوا.

المصادر:

مهندس ميكانيكا بحب الصحافه و الكتابه .. مؤمن بان من حق كل بني ادم انه يعرف الحقيقه ورا الخبر .. رسالتي انك تفهم حقيقه اللي بيحصل عشان لما تقرر رايك تكون فاهم انت بتقرر علي اي اساس

اترك تعليق

بريدك الالكتروني لن ينشر. يجب ملئ الخانات بعلامة *

من فضلك ادخل التعليق!

من فضلك ادخل الأسم!

من فضلك ادخل البريد الالكتروني!من فضلك ادخل بريد الكتروني صحيح!