الشغل مينفعش حد يتفه أو يقلل منه .. دي قاعدة إتعلمتها من مدير ليا .. تقدر تتناقش فيه .. تطوره أو حتي تطلع فيه مشاكل .. إنما تتفه منه أو تقلل منه لا .. المقدمة دي لازم تتقال لإن اللي حنتكلم عنه النهاردة هو أساساً موضوع لوحده كده مثير للجدل و هو مشروع صناعة السلاح التركية .. الأرقام لوحدها لما تحطها قدامك كفيلة إنك لو ناوي تتريق أو تقلل من شغل الناس دي فياريت متعملش كده .. خلال العشرين سنة اللي فاتوا حجم مبيعات السلاح التركية نطت 10 أضعاف .. معدل نمو بيزنس صناعة السلاح التركي زاد خلال العشرين سنة دول بنسبة 1200% و دي مش غلطة مطبعية .. سنة 2002 مبيعات شركات السلاح التركية سواء داخلية أو خارجية كانت حوالي مليار دولار منهم 248 مليون دولار جايين من تصدير السلاح لدول تانية.. سنة 2021 مبيعات شركات السلاح التركية بقت 10.1 مليار دولار منهم 3.2 مليار دولار جت من تصدير السلاح .. الرقم ده مهم لسبب و هو إن في نفس السنة اللي هي 2021 تركيا أستوردت سلاح بقيمة 2.6 مليار دولار يعني الناس دي بقت بتبيع سلاح أكتر ما بتستورد .. الحقيقة إن سنة 2021 كانت استثنائية لقطاع صناعة السلاح التركي لإن في السنة دي شركات السلاح التركية مضت عقود بيع سلاح وصلت قيمتها 8.5 مليار دولار .. بتتكلم عن قطاع شغال فيه 75,000 موظف .. الأهم إن ده قطاع بيصرف كل سنة 1.6 مليار دولار تحت بند البحث و التطوير اللي إنت عارفها باسمها السيكسي أوي Research & Development أو R&D اللي هو لو شركة مصرية عملت إدارة سمتها R&D مشغلة فيهم إتنين موظفين حتلاقيهم عاملين فرح علي السوشيال ميديا.
نجم الليلة دي كلها و أكتر حاجة بتجيب فلوس بتبيعها تركيا هي الطيارات بدون طيار أو Drones و أخص بالذكر هنا الحقيقة الطيارة بيرقدار تي بي 2 أو Byraktar TB2 .. دي طيارة بتنتجها شركة إسمها بيكار Baykar و ليها زباينها في السوق بس يمكن اللي خلي اسم الطيارة دي بالذات علي كل لسان هو إن الأوكرانيين طايرين بيها .. عايزك تبقي عارف إن من قبل الغزو الروسي لأوكرانيا يوم 24 فبراير 2022 و الأوكرانيين شاريين الطيارة دي .. في مايو 2022 أوكرانيا استلمت 12 طيارة TB2 زيادة و بعدها طلبت تستلم 24 طيارة كمان .. دي طيارة إتباع منها 96 نسخة لزباين حول العالم منهم بولندا اللي هي مش بس دولة أوروبية إنما كمان عضوة في حلف شمال الأطلنطي .. من ضمن زباين الطيارة برده دول أسيوية زي قيرغيستان و طاجيكستان .. بالمناسبة قيرغستان و طاجيكستان مش بيطيقوا بعض و فيه كلام علي إن زي ما يكون فيه سباق تسلح بينهم بس ده ممنعش الأتراك إنهم يبيعوا الطيارة للبلدين .. دول تانية في أسيا برده زي كازاخستان مضت عقد تصنيع مشترك لطيارة بدون طيار تركي بس مش TB2 إنما طيارة أقدم شوية هي Anka و دي طيارة من تصنيع شركة TAI أو Turkish Aerospace Industries و علي فكرة الشركة دي متصنفة علي إنها الشركة رقم 67 ضمن أقوي 100 شركة سلاح في العالم.
بس خلي بالك .. إذا كانت الطيارات بدون طيار هي أكتر سلاح تركي بيتباع فخليك عارف إن أفريقيا هي أكبر زبون لشركات السلاح التركي .. سنة 2020 مبيعات السلاح التركي لأفريقيا كانت 83 مليون دولار .. جري الشريط سنة واحدة بس و كانت مبيعات السلاح التركي لأفريقيا وصلت 288 مليون دولار .. المدرعات التركي عليها الطلب الصراحة .. الأتراك بايعين مدرعات ل14 بلد أفريقي اللي هم بوركينا فاسو و الجزائر و تشاد و المغرب و غانا و كينيا و مالي و موريتانيا و نيجيريا و النيجر و السنغال و الصومال و رواندا و أوغندا .. تاني فيه دول مش طايقة بعض زي المغرب و الجزائر و الأتراك بيبيعوا سلاح للبلدين عادي جداً .. أكتر مدرعتين تركي بيتباعوا واحدة إسمها يوروك Yoruk و واحدة إسمها يدجر يلسن Ejder Yalcin و المدرعتين من تصنيع شركة واحدة إسمها نورول ماكينا Nurol Makina و اللي كمان المجر بقت من زباينها و عايزك تعرف إن المجر زيها زي بولندا عضوة في حلف شمال الأطلنطي.
صحيح الأتراك بيحاولوا يسيبوا برده بصمتهم في بيزنس تصنيع القطع الحربية بس الحق يتقال هم مش جامدين أوي في الحتة دي .. النقطة الكويسة في البيزنس ده حققوها في نوفمبر 2020 لما إتفقوا مع أوكرانيا إنها تعملها فرقاطة من طراز أدا Ada-Class Corvette و فعلاً الترسانة البحرية التركية أوكيان OKEAN بدأت تشتغل عليها سنة 2021 و التسليم كان المفروض يبقي 2023 بس طبعاً ظروف الغزو الروسي لأوكرانيا بوظت كل حاجة .. الحتة برده اللي الأتراك عايزين يبقي ليهم اسم فيها هي تصنيع الطيارات الهليكوبتر .. سنة 2018 باكستان طلبت تشتري 30 طيارة هليكوبتر T129 من تصنيع شركة TAI اللي هي واخدة رخصة تصنيعها من شركة أوجستا ويستلاند AgustaWestland و دي شركة إيطالي إنجليزي مقابل 1.5 مليار دولار عشان تحل محل أسطول طيارات AH-1F Cobra اللي قديم و عشان بس أوريك قد إيه هو قديم فعايزك تعرف إن الباكستانيين اشتروها من الأمريكان في الثمانينات بس فيه مشكلة .. طيارات T129 بتستخدم موتور اسمه LHTEC T800-4A داخل في تصنيعه قطع من أمريكا و إنجلترا لإن الموتور ده إشتغل عليه شركة هانيويل Honeywell الأمريكاني و رولز رويس Rolls-Royce الإنجليزي و ده مخلي الأنجليز و الأمريكان ليهم حق إنهم لازم يوافقوا الأول علي أي صفقة بيع للطيارات دي.
الفكرة إن لو تفتكر أيام المشكلة اللي كانت بين الأمريكان و الأتراك عشان كانوا عايزين ياخدوا طيارات F-35 Lightening II و كمان يشتروا بطاريات دفاع جوي S-400 من روسيا فالأمريكان قالوا للأتراك يا دي يا دي .. كمحاولة من الأمريكان إنهم يضغطوا علي الأتراك قالولهم طب إحنا لمدة سنتين مش حنبيعلكوا أي حتة سلاح و الكلام ده كان في أغسطس 2020 .. شوية و الأمريكان و الأتراك وصلوا لإتفاق إن الأتراك مش عايزين الطيارة F-35 في مقابل إن الأمريكان يخلوا الأتراك يبيعوا الطيارة T129 لأي حد عايزها و في مايو 2021 إتعرف إن الفلبين حتشتري 6 طيارات و استلمت فعلاً أول طيارتين في مارس 2022 و الباقي حتاخدهم في 2023 .. في يوليو 2022 شركة TAI مضت عقد مع نيجيريا عشان تشتري الطيارات دي .. و مش بس الطيارات الهليكوبتر .. شركة TAI بتصنع طيارة تدريب اسمها Hurkus HYEU باعوا منها إتنين لنيجيريا و فيه كلام إنهم بيتكلموا مع تشاد و مع النيجر و مع ماليزيا عشان يبيعولهم الطيارات دي.
المصادر:
- مقالة بعنوان Turkey’s defense industry eyes export expansion as government navigates geopolitical stage نشرت في مجلة Defense News و ده لينك المقالة الأصلية:
https://www.defensenews.com/top-100/2022/08/08/turkeys-defense-industry-eyes-export-expansion-as-government-navigates-geopolitical-stage/
