لينك التسجيل الصوتي للمقالة علي Sound Cloud:
https://soundcloud.com/user-112011687-312727988/v-22-osprey
حاملة الطائرات مش بتمشي لوحدها في المياه .. أي حاملة طائرات بتكون ماشية حوليها أهلها و عشيرتها و عزوتها اللي بيتسموا كلهم علي بعض Strike Group أو مجموعه قتال .. الStrike Group دول بيبقوا مدمرات و فرقاطات و كاسحات ألغام و سفن إنقاذ و غواصات و ليلة كبيرة أوي سعادتك .. طبيعي إن فرح العمدة ده و هو في المياه يحتاج إن يتبعتله أي حاجة .. قطع غيار .. أكل .. أدوية .. بريد .. زيارة من حد مهم في البلد .. زمان و زمان ده اللي هو قبل سنة 2000 لما كان الأمريكان يحبوا يبعتوا أي حاجة لStrike Group كانوا بيحطوا الحاجات دي كلها علي طيارة بنت ناس أوي اسمها C-2A Greyhound و إسم Greyhound ده أو الكلب الرمادي ملوش علاقة بإسم الفيلم بتاع (توم هانكس Tom Hanks) خلي بالك .. الأمريكان عشان بيدوا لأي حاجة بيعملوها إسم دلع و لازم يبقي من 3 حروف إنجليزي فكانوا بيسموا الحكاية دي Carrier Onboard Delivery و إختصاراً بتبقي COD.
المهم إن زي ما حضرتك شايف الطيارة C-2A Greyhound دي طيارة كبيرة بمروحتين يعني عشان تقلع و تهبط محتاجة مدرج إقلاع و هبوط و عشان كده كانت بتنزل علي حاملة الطائرات و لو فيه حاجة محتاجة تروح لأي سفينة من سفن Strike Group كانت بتتحط علي طيارة هلكوبتر و بتروح للسفينة اللي محتاجه الحاجة دي .. جميل أوي الكلام .. ده كان System بياخد وقت و بتستخدم فيه طيارات كتير بس شغال و الناس بتوع القوات البحرية محدش فيهم كان معترض لحد ما جت سنة 2000 و زي أي ست بيت مصرية أصيلة بصت علي حيطان الشقة بتاعتها و فضلت تزن فوق دماغ جوزها إحنا لازم ندي البيت وش نظافة عشان لما حد من إخواتي يزورني ميتريقوش عليا .. الرجل عارف إنه حيدفع دم قلبه بس كله يهون في سبيل إن مراته تنزل من علي ودانه بزنها و هنا يجي دور الكلام عن الطيارة V-22 Osprey.
بداية من سنة 2000 و الناس بتوع القوات البحرية الأميريكية كانوا عايزين يطلعوا الطيارة C-2A Greyhound بره الخدمة لإن دي طيارة شغالة بقالها أكتر من 50 سنة .. التارجيت كان الأتي .. إحنا عايزين طيارة بتقدر تشيل نفس حمولة C-2A Greyhound يعني طيارة يا بتشيل 26 راكب يا بتقدر تشيل حمولة 4.5 طن .. الحلول المقترحة كانوا الأتي:
- الحل الأولاني و ده اللي قالوه الناس بتوع القوات البحرية إن شركة نورثروب جرومان Northrop Gruumman عملت طيارة إستطلاع حلوة أوي إسمها E-2D و الطيارة دي تبقي بنت عم C-2A Greyhound .. إيه الفكرة برده؟ .. إحنا نجيب الطيارة E-2D دي زي ما هي كده نفضيها من كل الأجهزة اللي فيها و نخليها طيارة نقل بتعمل نفس الوظيفة بتاعة C-2A Greyhound .. ده حل الناس الغلابة اللي عايزه تمشي حالها باللي موجود.
- الحل الثاني و ده اللي قالته شركة لوكهيد مارتن Lockheed Martin و دي الشركة اللي بتصنع الطيارة F-35 و اللي قات إن فيه طيارة قديمة برده قربت تطلع معاش إسمها S-3 Viking كانوا بيستخدموها في عمليات صيد الغواصات فممكن ناخدها نعدل فيها و نستخدمها كبديل للطيارة C-2A Greyhound .. ده حل الناس اللي بتهبد عشان تجري ورا أي سبوبة و خلاص.
- الحل الثالث و ده اللي قاله الناس بتوع سلاح مشاة البحرية US Marines و اللي زي الست المصرية الأصيلة قالوا إيه القرف ده .. Vikings إيه و Game of Thrones إيه .. أنا عايزه حاجة سيكسي .. أنا عايزه V-22 Osprey من تصنيع شركتي بوينج Boeing و بيل Bell.
كمبدأ و فكرة عامة أو Concept فالطيارة V-22 Osprey دي متطلعش غير من نفوخ مهندس لسه ساحب نفس من سيجارة حشيش معتبرة .. الفكرة هي إنك ليه لا تجيب أي طيارة بمروحتين زي C-2A Greyhound مثلاً و بدل ما المروحتين بتوعها أفقي بس تخليهم بيلفوا 90 درجة بحيث ينفع المروحتين يبقوا رأسي في حالة الإقلاع و الهبوط .. لكن و الطيارة طايرة في الجو المروحتين يلفوا 90 درجة و يبقوا أفقي؟ .. فكرة متطلعش غير من واحد محشش .. كفكرة برده إنت كده وفرت فلوس كتير .. إنت بقي عندك طيارة واحدة بتهبط علي حاملة الطائرات و هي هي نفس الطيارة برده اللي بتطلع تطير توصل البضاعة للسفن بتاعة Strike Group .. إنك تستبدل كذا طيارة بطيارة واحدة دي ميزة حلوة أوي .. و مش بس كده .. الطيارة V-22 Osprey بتطير أسرع و أطول من أجدعها طيارة هليكوبتر في الخدمة.
خد عندك الطيارة الهليكوبتر الأسطورية بلاك هوك UH-60 Blackhawk .. الطيارة Blackhawk أخرها معاك تطير بسرعة ما بين 274-320 كيلومتر في الساعة و أخرها برده تطير مسافة 560 كيلومتر .. دي أرقام محترمة جداً بس لما تيجي تقارنها بإمكانيات الطيارة V-22 Osprey بتلاقي إنها بتقدر تطير بسرعة 560 كيلومتر في الساعة و بتقدر تتزود بنزين في الجو .. زي ما قلتلك دي طيارة كConcept فهي حلوة أوي بس زي ما الرجل اللي مراته بتزن فوق دماغه عشان يدي الشقة وش نظافة بيكون عارف .. أكيد الخازوق في الفلوس.
سعر الطيارة الواحدة ما بين 70-100 مليون دولار .. علي فكرة لما الطيارة دي إتقالت فكرتها زمان و كانت لسه تصميماتها بتترسم إتقال إن الطيارة الواحدة حتكلف أخرها يعني 24 مليون دولار .. بس شوف يا أخي حتي دي مش مشكلة .. مش عيب أدفع فلوس كتير في الأول عشان أخد حاجة نظيفة بتوفرلي بعدين و أقدر أعتمد عليها و أنا مغمض .. المشكلة إن V-22 Osprey لا هي بتوفرلك فلوس بعد كده ولا هي يعتمد عليها .. ساعة الطيران الواحدة للطيارة دي تكلفتها 11,000 دولار و الفلوس دي أغلبها بيروح للصيانة .. ده تقريباً نفس ثمن ساعة الطيران بتاعة الطيارة F-35 Lightening II .. ده تقريباً برده 3 أضعاف تكلفة ساعة الطيران بتاعة الطيارة Blackhawk .. يعني أنا دافع دم قلبي عشان أشتري طيارة و كل ما أروح بيها للميكانيكي حفضل أدفع فلوس برده .. ده أنا لو معايا عربية رينو مش حيتعمل فيا كده .. مش بس كده .. الطيارة بيتركبلها محركين لقوا إن و هي بتهبط عمود زي أي طيارة هليكوبتر علي حاملة الطائرات فالمحركات دي بتطلع كمية حرارة بتبوظ الأرضيات بتاعة مدرج الإقلاع و الهبوط بتاع حاملة الطائرات .. ده برده بفلوس .. كل ده قصاد إن الطيارة C-2A Greyhound الواحدة تكلفتها كانت يدوبك 40 مليون دولار .. يا بلاش.
نيجي بقي لحتة إنه لا يعتمد عليها .. مفيش طيارة كانت عاملة مشاكل في مرحلة Research and Development أو R&D إختصاراً زي الطيارة دي .. ما بين 1991 لحد 2000 فيه أربع طيارات وقعوا أدوا لوفاة 30 شخص .. في 9 شهور بس خلال الفترة من ديسمبر 2016 لحد سبتمبر 2017 فيه 3 طيارات V-22 Osprey وقعوا في حوادث أدت لوفاة 3 بني أدمين .. زود عليهم طيارة كمان وقعت في اليمن في عملية عسكرية للقوات الخاصة في يناير 2017 و الأمريكان لقوا إن بما إنهم مش حيعرفوا يرجعوا الطيارة فضربوا المكان اللي هي وقعت فيه بغارة جوية عشان يدمروها خالص .. يا مؤمن ده حتي سكان جزيرة أوكيناوا في اليابان اللي عندهم قاعدة عسكرية أميريكية كبيرة فيها سرب طيارات V-22 Osprey قدموا شكوي عشان الطيارات دي تتشال من القاعدة عشان صوتها عالي أوفر و مرواحها قوية لدرجة إنها لما بتطير فوق البيوت بتبقي عامله زي الإعصار .. كل ده كوم و المشكلة اللي جايه دي كوم تاني.
زي ما حكينا قبل كده في كلامنا الكتير بشكل مستفز عن مشروع الطيارة F-35 فالمفروض إن الطيارة دي ليها 3 نسخ منهم النسخة F-35C اللي حتشتغل من علي متن حاملات الطائرات .. أكتر حاجة بتحتاج يتعملها صيانة أو يمكن تتشال و يتركب مكانها واحدة تانية هي الموتور .. موتور الطيارة F-35C إسمه F135 Turbofan و ده موتور كبير حجماً بشكل فشيخ لدرجة إنهم لما جم يحطوه جوه الطيارة V-22 Osprey عشان ينقلوه من حتة لحتة معرفوش يحطوه جوه الطيارة .. هي صحيح الطيارة V-22 Osprey بتشيل حمولة أكبر من C-2A Greyhound لما تيجي تبصلها كوزن بس المساحة الفاضية جواها أقل .. الحل اللي شافوه إن إحنا نقسم الموتور نصين بحيث نص يتحط جوه الطيارة V-22 Osprey و النص الثاني يتعلق بكابلات من بره و هي طايرة و الحل ده إتجرب فعلياً سنة 2015 بس طبعاً ده مشاكله كتير .. إفرض لو حاجة حصلت و الكابل إتقطع ساعتها إنت حتخسر موتور طيارة F-35C كامل .. ده معناه برده إن نقل المحركات دي مينفعش يتعمل في ظروف جوية مش مناسبة.
طب إيه رأيك بقي إحنا مش حنخلي الطيارة V-22 Osprey تشيل المواتير بتاعة F-35C .. إحنا حنخلي الطيارة دي زي فيلم Transformers: Dark of the Moon تشيل عناصر قوات خاصة عشان تنزل بيهم خلف خطوط العدو و هم متصورين و شكلهم يجنن و صداع من كتر عظمة العساكر الأمريكان .. جميل أوي .. فيه طيارة هليكوبتر بمروحتين معروفة أوي إسمها تشينوك أو CH-46 .. الطيارة دي بتقدر تشيل 15 فرد قوات خاصة بكامل تسليحهم مسافة 255 كيلومتر .. قالك إن الطيارة V-22 Osprey بتقدر تشيل 24 فرد قوات خاصة مسافة 375 كيلومتر .. مش بقولك صداع من كتر العظمة .. بس خلي بالك لقوا إن فيه مشكلة غريبة جداً .. قالك إن الطيارة دي أسرع بكتير من إنك تخلي جنبها طيارات هليكوبتر AH-1Z مقاتلة عشان تحميها .. و في نفس ذات الوقت هي أبطأ من إنك تطلع جنبها طيارات مقاتلة F/A-18 Super Hornet .. ده معناه إيه؟ .. معناه إن فرقة القوات الخاصة اللي إنت باعتها رايحة من غير أي غطاء جوي و من غير ما تحميهم أي طيارات مقاتلة.
طب إيه رأيك بقي إن الطيارة V-22 Osprey لما توصل بالسلامة و تنزل القوات اللي هي شايلاهم فحتلاقي فيه مشكلة تانية أغرب .. الطيارة المروحتين بتوعها جامدين جداً لدرجة إنها لو جت تهبط في بيئة صحراوية أو فيها تراب كتير فلا الطيار ولا العساكر اللي فيها حيشوفوا حاجة .. الطيار في المواقف اللي زي دي بيعتمد بشكل كامل علي شاشات بالأشعة تحت الحمرا .. يكفي أقولك إن لما الأمريكان جربوا الطيارة دي في العراق في 2007 إكتشفوا إنهم محتاجين الأول يبعتوا طيارات إستطلاع عشان تشوف أنهي مكان مناسب أكتر لهبوط الطيارة V-22 Osprey .. إنت متخيل الصداع؟ .. لا مش صداع من كتر العظمة .. صداع من كتر الهم.
إنت رايح فين انا لسه مخلصتش .. عارف لما تبقي سايق عربية طلمبة المياه بتاعتها مش شغالة .. بتلاقي كل ما بتقف في إشارة عداد الحرارة بيعلي معاك أوي و العربية مش بتبرد إلا لو جريت بيها علي طريق مفتوح .. أهي دي برده من مشاكل المروحتين بتوع V-22 Osprey .. لإنها لو طارت علي إرتفاع ثابت و مش بتتحرك لقدام فالمحركين بيسخنوا أوي و مش بيبردوا إلا لو الطيار خلي المروحتين يلفوا 90 درجة و طار بيها كأنها طيارة عادية عشان الهواء و هو بيطير يبرد المحركين .. ده السبب في إن الطيارة دي مينفعش تستخدمها في إنك تحط فيها عناصر قوات خاصة و تقولهم إنزلوا بحبال لأرض المعركة .. مش بس عشان المحركات بتسخن .. لا .. عشان المرواح كمان .. بتوع القوات الخاصة بيسموا V-22 Osprey أسانسير الموت Elevator of Death عشان الحبال اللي بتنزل منها بتفضل تطير يمين و شمال فلو و انت نازل مش حاطط عينك في وسط راسك حتقع علي نفوخك .. و عشان كده لحد دلوقتي الأمريكان مش بيستخدموا الطيارات دي في عمليات إنزال لقوات خاصة بالحبال.
من الأخر ده معناه إنك دافع دم قلبك في طيارة انت مينفعش تستخدمها في نقل قوات خاصة خلف خطوط العدو .. مينفعش تستخدمها في عمليات البحث و الإنقاذ .. مينفعش تستخدمها في أي حاجة غير إنك تحط عليها بضاعة عشان تنقلها من نقطة A لنقطة B .. ده معناه إنك دافع فلوس عشان يبقي معاك عربية دودج Dodge و إذ تكتشف إنك لما جيت تجربها إن دي إمكانيات توك توك.
شوف يا أخي رغم كل المشاكل دي كلها فالقوات المسلحة الأميريكية في يونيو 2018 مضت عقد مع شركة بوينج Boeing عشان تشتري 48 طيارة V-22 Osprey عشان تحل محل الطيارة C-2A Greyhound .. الناس بتوع القوات البحرية علي مدي 3 سنين اللي هم 2018 و 2019 و 2020 حيشتروا 3 طيارات كل سنة يعني بتتكلم في الأخر عن 12 طيارة .. دول الناس الغلابة زي ما قلت .. الإخوة بتوع مشاة البحرية طالبين 360 طيارة .. ست بيت نكدية زي ما الكتاب بيقول .. و الإخوة بتوع قيادة القوات الخاصة طالبين 50 طيارة .. ده معناه إن شاكب راكب انت بتتكلم عن 458 طيارة حيتصنعوا .. الطيارة دي دخلت الخدمة فعلاً و شاركت في عمليات في العراق و أفغانستان .. إسرائيل قالت إنها عايزه تشتري شوية منها .. ليه محدش عارف؟ .. الحقيقة إن مشروع الطيارة دي هو أكبر دليل علي إن الطيارات زيها زي العربيات .. ممكن عربية إمكانياتها تبقي حلوة جداً بس لما تشتريها تكتشف إنك خدت أحلي خازوق في حياتك.
المصادر:
- مقالة بعنوان Check this funny looking helicopter out: The Navy thinks it could be very special نشرت في مجلة The National Interest و ده لينك المقالة الأصلية:
https://nationalinterest.org/blog/buzz/check-funny-looking-helicopter-out-navy-thinks-it-could-be-very-special-149076 - مقالة بعنوان Stupid move: Navy will buy V-22 Ospreys to replace its C-2 Greyhounds نشرت في موقع Jalopnik و ده لينك المقالة الأصلية:
https://jalopnik.com/stupid-move-navy-will-buy-v-22-ospreys-to-replace-its-1679559201 - مقالة بعنوان Your periodic reminder that the V-22 is a piece of junk نشرت علي موقع War is Boring و ده لينك المقالة الأصلية:
https://warisboring.com/your-periodic-reminder-that-the-v-22-is-a-piece-of-junk/
