لينك التسجيل الصوتي للمقالة علي Sound Cloud:
https://soundcloud.com/user-112011687-312727988/supreme?si=63bb9cf9ec6e4793aee965a2fbcf0ab5
الموضة اللي واكله دماغ الناس بره هي حاجة بيسموها ستريت ووير Streetwear عشان تفهم يعني إيه Streetwear حاول تتخيل إنك فتحت دولاب هدومك و قررت تلبس بنطلون قماش ليكرا لونه أزرق علي تي – شيرت كورة بتاع ريال مدريد مثلاً بس يكون الإحتياطي البينك ده لو عارفه و فوقهم كرافتة و عليهم بليزر بني و لبست شراب أبيض و صندل و ختمت الLook بتاعك بطاقية و نظارة شمس .. أهو العك ده إسمه Streetwear .. إنك تجيب لبس ملوش علاقة ببعضه و تقرر تنزل بيه الشارع .. فيه ماركات كتير دايسة في موضة Streetwear بس يمكن أهم و أكبر ماركة فيهم هي سوبريم Supreme و دي ملهاش علاقة ببيتزا سوبر سوبريم و عليها إضافة جبنة كيري مش موتزاريلا لإن دي غلطة مشهورة أوي بيقع فيها أكيلة البيتزا .. جرب كده تطلب إضافة جبنة كيري مش موتزريلا و إدعيلي بس مش ده موضوعنا دلوقتي .. لما حضرتك تقرر تشتري جزمة ماركة CAT فانت بتدفع دم قلبك بس بتبقي عارف إنك جايب جزمة تنفع تشتغل عربية جيب 4X4 بعد الظهر بتمشي بيها في المياة و الطينة و الشحم من غير ما تقول لا .. لو حضرتك رحت إشتريت كوتشي Running من Adidas فإنت بتدفع دم قلبك برده بس بتبقي عارف إنك جايب كوتشي حيحسسك إنك عداء أوليمبي و ينسيك إنك فعلياً شحرت من أول خمس دقايق جري .. كل ماركة بتروج لنفسها بناء علي أكتر حاجة هي بتقدمهالك .. Supreme بتبيعلك حاجة إسمها هايب Hype و دي كلمة ملهاش معني أوي بس أقرب تشبيه ليها هي أغاني المهرجانات.
إنت بتسمع الأغنية من دول و إنت قادر تفهم نص كلامها و مينفعش تسمع 4 أغاني مهرجانات ورا بعض و إلا إنت بتخاطر إن يجيلك إلتهاب في الطبلة الأذنية و في نفس الوقت مينفعش تمشي في الشارع تقول قدام حد إنك بتكره الأغاني دي عشان حتبقي أووووه مااااي جااااد سو سيرياس خالص يعني مش كول إيه ده .. هو ده ملخص Supreme .. دي شركة بتبيع هدوم بيلبسها ممثلين و مغنيين لمجرد إنهم يبانوا كووول .. شركة صحيح إن ملهاش إلا 11 محل بيع لمنتجاتها حول العالم إلا إن قيمتها السوقية وصلت مليار دولار .. زي ما أهم جزء في أغنية أي مهرجان هو صوت (فيجو الدخلاوي) و هو بيجعر بصوته و كأن كده خلاص الأغنية خدت ختم النسر من مدام عفاف في الدور الرابع فبرده منتجات Supreme بتاخد اللوجو المشهور أوي بتاعهم .. مستطيل أحمر مكتوب فيه كلمة Supreme بالأبيض .. لو لبست اللوجو ده فإنت خلاص كده يا معلم بقيت ماشي مع الHype.
أي شركة بيبقي ليها Business Model أو طريقة بتبيع بيها منتجاتها .. بالنسبة لSupreme هم ماشيين بمبدأ Drop Culture .. بيطلعوا علي الموقع بتاعهم يقولوا إن خلال فترة معينة من الشهر الفلاني حينزل موديلات جديدة من شنط حريمي و كوتشيهات و تي- شيرتات مثلاً .. الموديلات الجديدة حتنزل بكميات محددة عشان تتباع سواء Online أو في ال11 فرع بتوع البيع .. طبعاً بمجرد ما الموديلات الجديدة بتنزل بتخلص في ساعتها و ده شيء متوقع بس اللي بيبقي فعلاً منظر تستحق إنك تقف قدامه و تضرب كف علي كف هو الطوابير .. ولا طوابير العيش عندنا في مصر .. بعد شوية الشركة بتقول إن الموديلات دي حتنزل السوق تاني بس المرة دي حتنزل في كل الأسواق و المحلات اللي عايزة تبيع منتجات Supreme .. الموجة الثانية من الموديلات اللي بتنزل السوق بتتسمي سوبريميام Supremium بس بتنزل بأسعار عالية فشخ .. جاكت بسوستة و ظنط مثلاً بس عليه ماركة Supreme لو جبته في الموجة الأولانية بتشتريه ب300 دولار و لو جبته في الموجة الثانية بتدفع فيه 1,677 دولار يعني زيادة في السعر 463% .. و مش بس الهدوم .. Supreme شركة بتعشق الفلوس لدرجة إنها ممكن تنزلك مثلاً عتلة زي اللي عند أي حداد أو ميكانيكي بس مكتوب عليها اللوجو بتاعهم و في الموجة الأولي بتتباع ب32 دولار و في الموجة الثانية بتتباع ب360 دولار .. إنت محتاج تفهم كم الفلوس اللي بتخش لSupreme بسبب ثقافة Drop Culture دي .. فيه موقع شبه سوق كده إسمه Stock X بيتباع عليه الموجة الثانية من منتجات Supreme لما بتنزل السوق و الموقع ده لوحده بيجيب 3 مليون دولار في الإسبوع من بيع منتجات الماركة بنت الوس&^ دي بس يعني بتتكلم عن 150 مليون دولار أرباح صافية من بيع منتجات شركة واحدة علي موقع واحد .. هنا أنا محتاج أعرفك علي الرجل اللي بني كل ده .. (عبدالغفور البرعي) بتاع الStreetwear اللي هو (جيمس جيبيا James Jebbia).
سنة 1994 الرجل ده كان عنده محل هدوم صغير كده في كاليفورنيا إسمه Supreme و في الوقت ده كانت منتشرة أوي في أميركا رياضه الباتنياج أو Skating .. الشباب اللي كانو بيلعبوا اللعبة دي عشان يبقي ليهم شكلهم المميز و يبانوا كأنهم موجة جديدة منتشرة في المجتمع بقي بيلبسوا لبس غريب أوي .. تلاقي الواحد من دول لابس بنطلون جينز رخيص ماركة ليفايز Levi’s بس عليه مثلاً جاكت غالي فشخ من ماركة لويس فيتون Louis Vuitton أو جوتشي Gucci .. ده بالضبط زي الإهانة لوداني اللي عملتها فرقه كايروكي لما جابت أغنية كان لك معايا بتاعة أام كلثوم) في أغنية تحسها صاحبي لما يكون مكتئب بس عمال يفضفضلي .. الهري اللي كايروكي مسميينه راب ده مينفعش بأي حال من الأحوال إنك تحطه مع (أم كلثوم) في أغنية واحدة .. بس دي كانت الموضة و ده اللي الناس أقبلت عليه و ده اللي (جيمس جيبيا) فهمه .. لنفترض إني من الناس اللي بتغني مهرجانات و لنفترض إن أنا مثلاً يعني (حمو بيكا) لا قدر الله .. أنا عايز لما أتصور و أنزل علي سوشيال ميديا عايز أبان إني كوول بس في نفس الوقت معنديش مشكلة أدفع فلوس كتير عشان ألبس ماركات غالية .. المشكلة إن الماركات الغالية مش بتعمل الهدوم الكووول اللي الناس اللي بيسمعوني عايزين يشوفوني لابسها .. Supreme ماركة مبنية علي السرقة و دي حاجة إنت محتاج تفهمها .. انا حجيب جاكت منزلاه مثلاً ماركة جوتشي Gucci بس حضيف عليه إسمي بالفونط العريض و أبيعه علي إن Supreme هي اللي صممته .. عشان انا كواحد عايز أبان كوول يبقي معايا جاكت أولاً غالي .. ثانياً شكله أهبل و ده عز الطلب ..و عليه اللوجو بتاع Supreme .. هو إحنا عايزين إيه أكتر من كده .. يا مؤمن ده حتي اللوجو بتاعهم سارقينه.
فيه فنانة إسمها (باربارا كروجر Barbara Kruger) أنا مهما حاولت أشرحلك فنها فالأفضل إنك تبص علي الصور .. خش علي Google دلوقتي و إكتب إسمها و إنت حتتصدم .. اللي حصل إن الأخ (جيمس جيبيا) إختار اللوجو بتاع Supreme نسخة طبق الأصل من شغل الست دي .. نفس الفونت بتاع الخط .. نفس الحجم بتاع البوكس .. هو عمل زي أي طالب في الكلية إتزنق في تسليم ريبورت فقعد يعمل Copy & Paste من علي النت .. حتي لما (باربارا كروجر) رفعت عليهم قضية كان دفاع (جيمس جيبيا) عن نفسه هو نفس جملة شخصية الهرم اللي قدمها الله يرحمه (نجاح الموجي) .. حصل بس حنكر .. و لإن ربنا مش بيسيب حق حد و إن من حفر حفرة لأخيه وقع فيها فزي ما Supreme كانت بتسرق شغل الناس و تنسبه لنفسها فناس تانية بقت بتسرق اللوجو بتاع Supreme و تحطه علي أي حاجة و دي النقطة اللي فاشخة (جيمس جيبيا) في أفكاره
حاول تبصلها من وجهة نظره هو .. دلوقتي الصينيين بقوا بيعملوا أي حاجة سواء تي- شيرتات أو كوتيشهات أو شنط أو حتي Cover موبايلات و يلزقوا عليها اللوجو بتاع Supreme و ينزلوها تتباع .. يا مؤمن ده في مؤتمر مشتريات صيني المنظمين بتوع المؤتمر جابوا ممثل نيجيري أسمر عشان يمثل قدام الناس إن هو (جيمس جيبيا) و يدوله جايزة كأنهم بيكرموه علي شغل Supreme في السوق الصيني .. بس ده في حد ذاته بيدمر المبدأ اللي Supreme قامت عليه .. أي منتج سواء كان كوتشي Supreme بيتباع ب3000 جنيه أو كيلو جبنة براميلي من البقال اللي تحت بيتكوا سعره في السوق بيحكمه قاعدة العرض و الطلب .. طول ما المنتج متوفر في السوق سعره بيقل .. بمجرد ما المنتج يبقي شاحح في السوق الطلب عليه بيزيد و بالتالي سعره بينط .. Supreme لما بتنزلك شوية منتجات في الموجة الأولي بأعداد محدودة و بتتباع في أماكن تتعد علي الصوابع هو بيخلق Hype أو بيديك إحساس إن فيه منتج الناس كلها عايزة تشتريه بس شاحح في السوق فإنت مش بيبقي عندك أي مشكلة تدفع بس عشان تبان قدام الناس إنك معاك الحاجة اللي مش مع أي حد .. اللي بتعمله الصين إنها بتغرق السوق بمنتجات Fake مكتوب عليها اللوجو بتاع Supreme فكده المبدأ اللي الشركة قامت عليه إتفشخ.
تاني .. اللي Supreme كماركة زيها زي ماركات هدوم كتير من اللي بتبيع ما يسمي بStreetwear قايمة عليه إنها لو زودت العرض يعني المنتجات بتاعتها بقت متوفرة في السوق فبشكل أوتوماتيكي الطلب علي المنتجات دي بيقل .. عارف ده عامل زي إيه .. زي الجبنة الموتزاريلا السايحة في الأكل .. كل المطاعم بقت بتغرق الأكل اللي بتقدمه بالجبنة السايحة لدرجة إن الناس نفسها جزعت و بمبقتش تطلب مهرجان الجبنة السايحة للجميع ده .. الحل إنك تقلل العرض .. إنك تخلي المنتج قليل في السوق و ده بيخلي الطلب عليه فشيخ .. عشان كده تلاقيهم عارضين تي- شيرت ولا جاكت بزونط ميتلبسش أصلاً و شكله وحش بس سعره بيعدي 5000 جنيه .. عارف إن فيه منكوا دلوقتي ناس بتسأل هو ده بجد؟ .. هل فيه ناس هابله أوي للدرجة دي؟ .. هو ده زي المثل اللي بيقول يابا علمني أبقي مهم قاله تعالي في الهايفة و إتصدر؟
الحقيقة اه .. سنة 1899 فيه واحد إسمه (ثوريستين فيبلين Thorstein Veblen) إخترع مصطلح جديد في الإقتصاد إسمه Conspicuous Consumption .. فكك من الإسم الإنجليزي بتاعه .. لو حابب تترجمه للعربي فهو فعلاً المثل اللي بيقول يابا علمني أبقي مهم قاله تعالي في الهايفة و إتصدر .. الرجل ده حط الأساس اللي شركة زي Supreme شغالة عليه إن فيه ناس تافهة و معاها فلوس مستعدة تدفع دم قلبها عشان تتمنظر قدام الناس بحاجات هم ميقدروش يدفعوا ثمنها .. فاكر المبدأ بتاع العرض و الطلب؟ .. كل ما المعروض من سلعة يقل سعرها بيزيد .. كل ما المنتج بقي شاحح في السوق سعره بينط جامد .. اللي قاله (ثوريستين فيبلين) إن مثل يابا علمني أبقي مهم قاله تعالي في الهايفة و إتصدر بيخلي إن فيه حالة خاصة أوي إن لما الهيافة تتمكن من الناس فتلاقي رغم إن منتج المعروض منه عمال يزيد إلا ان سعره هو كمان بيزيد .. ده إنت بتشوفه بنفسك في المنتجات الغالية اللي ملهاش لازمة زي ساعات روليكس أو الشنط الحريمي ماركة جوتشي .. هنا إنت محتاج تفهم نقطة و هي إن بداية النهاية لSupreme بدأت فعلياً و إن الشركة في طريقها لمزبلة التاريخ بس ده مش سببه إن الناس بطلت تبقي تافهة و مش سببه سرقة الصينيين لمنتجاتهم .. السبب هو الطفاسة.
يقال إن فيه شركة كبيرة إسمها كارلايل جروب Carlyle Group دفعت 500 مليون دولار عشان تسيطر علي 50% من أسهم Supreme .. لحد دلوقتي إنت ممكن تقول ملناش دعوة يا (محيي) .. دي ناس معاها مليارات و اللي معاه قرش و محيره يجيب حمام و يطيره .. بس لما تبدأ تعرف شوية عن Carlyle Group حتبدأ تفهم هي ليه دي حتبقي بداية النهاية لSupreme .. شركة Carlyle Group دي شركة شغلتها إنها تدير بيزنس شركات تانية .. هم معاهم شغل بيتقدر ب212 مليار دولار في أكتر من 200 شركة .. هم ليهم فلوس في شركات زي ماكدونالدز McDonald’s و دانكن دوناتس Dunkin Donuts .. و في نفس الوقت هم ليهم فلوس في شركة إسمها BAE Systems و دي شركة أسلحة إنجليزية و من ضمن الشركات الأوروبية اللي بتصنع المقاتلة تايفون Typhoon اللي السعودية بتستخدمها في ضرب اليمن .. اللي خلي شركة زي Carlyle Group حاطه فلوسها في شركات الأكل و السلاح إنها تقرر تحط فلوسها في Supreme هو إنهم عايزين ينقلوا الشركة من مرحلة لما العرض يقل السعر يزيد و يدخلوها لمرحلة المنتجات اللي (ثوريستين فيبلين) إتكلم عنها و هي إن لما العرض يزيد السعر كمان يزيد .. هم حياخدوا المبدأ اللي (جيمس جيبيا) حاطه لشركته و يرموه في الزبالة و يبدأوا يشتغلوا بمبدأ جديد و هو إزاي نكبر بالبيزنس بتاعنا بأسرع وقت ممكن حتي لو كان البيزنس بتاعنا لسه مش جاهز أوي للنطة دي.
قرار التوسع و الطفاسة بتاعة Carlyle Group حيكون بداية النهاية لSupreme كماركة .. هم بنوا نفسهم علي إنهم شركة بتعرض منتجات عددها محدود عشان اللي تبقي معاهم يتعدوا علي الصوابع و يكونوا مستعدين يدفعوا دم قلبهم .. لكن لما ألاقي السوق مليان ببضاعة من بتاعة Supreme انا إيه اللي يخليني أدفع عشان أجيبها؟ .. بالنسبة لCarlyle Group فالناس دي معاها مليارات مش حيحسوا بحاجة .. إنهيار Supreme بالنسبة للناس دي حيبقي زي شكة الدبوس .. الدور و الباقي عليك يا أهبل يا اللي دفعت دم قلبك في تي- شيرت و كمان كام سنة مش حيبقي له قيمة.
المصدر:
حلقة من برنامج Patriot Act with Hassan Minhaj بيتذاع علي قناة Netflix و ده لينك الحلقة علي YouTube لو حابب تتفرج عليها:
http://://www.youtube.com/watch?v=RKl_Y3EA7Sc&t=585s
