الزي العسكري النازي .. السر ورا إنه لحد دلوقتي الأشيك في التاريخ.

الزي العسكري عامل زي بدلة الفرح كده .. حضرتك صورتك و إنت متصور ببدلة الفرح غالباً يعني بتبقي أنظف صورة إنت إتصورتها في حياتك لأسباب كتير الحقيقة .. دي بتكون المرة الوحيدة اللي إنت دفعت فيها أكتر من 100 جنيه عند الحلاق .. البدلة دي بتكون أغلي بدلة إنت إشتريتها في حياتك .. ده بالنسبة للمعني المادي للصورة .. المعني المعنوي كمان مهم لإن الصورة دي جواها مشاعر كتير ليك كرجل زي مثلاً إنها بتعبر عن اليوم اللي إتقدمت لأهل مراتك .. بتعبر عن الشحططة اللي إنت شفتها عشان تجيب شقتك و توضبها .. صورة الفرح بتمثل حاجات كتير أوي للرجل زيها زي الزي العسكري .. ده بيمثل هويتك و عقيدتك .. بتعبر عن السنين اللي إنت قضيتها في الكلية العسكرية .. لو دخلت حرب لا قدر الله بتعبر عن الرعب اللي إنت شفته .. زمايلك اللي أستشهدوا .. بتعبر عن جمال إحساس النصر و مرارة إحساس الهزيمة .. الزي العسكري مش مجرد قميص و بنطلون .. ده قصة.

كل دولة بتحب زيها العسكري يكون بيعبر عنها وعن هويتها .. هو لازم يبقي شيك بس في نفس الوقت يبقي عملي و مش مكلف .. لو دخلت عملت سيرش علي النت عن أحلي زي عسكري في العالم دلوقتي في الزمن اللي إحنا فيه ده حتلاقي من ضمن نتايج البحث بتاعك حيطلعلك كلام و صور عن الزي العسكري النازي .. ليه متفهمش .. إزاي زي عسكري بتاع نظام حكم إنتهي من أكتر من 75 سنة لسه فيه ناس كتير بتعتبره أشيك زي عسكري في تاريخ البني أدمين؟ .. عشان كده مقالة النهاردة حنحاول فيها نجاوب علي سؤالين:

• إيه هو التطور الطبيعي للزي العسكري الألماني؟
• ليه الزي العسكري لقوات العاصفة بالذات علق مع الناس اوي؟

إيه هي مراحل تطور الزي العسكري الألماني؟

ده السؤال اللي إحنا حنحاول سوا نفهمه النهاردة بس زي أي قصة لازم نبدأ من حتة و الحتة اللي حنبدأ منها هي السنة اللي فيها ألمانيا بقت ألمانيا اللي هي 1871 .. سنة 1871 فيه بني أدم فشيخ إسمه (أوتو فون بسمارك Otto Von Bismarck) قدر يهزم الفرنساويين و يوحد الولايات الألمانية اللي كانت كلها بتتكلم تقريباً نفس اللغة بس كل ولاية عايشة بدماغها و مع نفسها تحت مظلة دولة واحدة اللي هي الإمبراطورية الألمانية .. الفكرة كلها زي ما قلتلك إن الولايات دي كل واحدة كانت مع نفسها و بالتالي لما الألمان بقي عندهم قوات مسلحة موحدة فالزي الرسمي للقوات دي كان زي ما يكون الريد كاربت بتاع مهرجان الجونة كده .. كل شوية عساكر من ولاية ما لابسين زي مختلف عن العساكر اللي جايين من ولاية تانية .. بس يمكن اللي كان موحد بينهم كلهم هو الخوذة بتاعتهم اللي كان فيها زي ما يكون سن مدبب كده لفوق .. الإنجليز بيسموا الخوذة دي Pickle Helmet وده جاي من التسمية الألمانية ليها Pickelhaube .. فضل الفاشون وييك كده مستمر من سنة 1871 لحد سنة 1910 لما القوات المسلحة الألمانية إختارت إن يبقي اللون الرمادي هو اللون الرسمي للزي العسكري هنا إنت محتاج تستهدي بالله في نفسك كده و تبقي فاهم هو ليه ده حصل.

زمان الجيوش مكانتش حاجة واحدة .. كان عندك خيالة و مشاة و رماه و ناس بتاعة منجنيق و حتي المشاة أنواع فيه منها الخفيفة و التقيلة و حاجة نكد يعني .. عشان إنت كقائد ميداني تبقي فاهم هو مين بيعمل إيه فكان مفيد جداً إن كل سلاح يبقي له لون معين .. يعني لو الفرسان بتوعك لابسين أحمر و المشاة لابسين أزرق فإنت حتقدر تتابع مين فيهم بيتقدم و مين فيهم بياخد فوق دماغه .. الوضع ده بدأ يختلف و إنت داخل علي الحرب العالمية الأولي .. في الوقت ده الناس بتاعة الحروب اللي بيسموا نفسهم خبراء عسكريين كانوا شايفين إن مستقبل الحروب هو الخنادق .. حيبقي عندك جيشين قدام بعض و كل جيش حافر خندق مستخبي وراه و كل كام يوم العساكر بتوع جيش يروحوا يهاجموا العساكر بتاعة الجيش الثاني علي أمل إنهم يسيطروا علي الخندق بتاعهم .. في النوع ده من الحروب إنت مبقتش محتاج إن كل تشكيل قتالي يبقي لابس زي عسكري بلون مميز .. لو عساكرك كلهم لابسين نفس اللون فده مش حيخلي صعب عليك كقائد ميداني إنك تتابع سير المعركة .. نقطة تانية مهمة وهي الفلوس .. كون إن عساكرك كلهم لابسين نفس الزي بنفس اللون فده سهل جداً من عملية التصنيع و كمان قلل من تكاليف التعبئة العامة للقوات المسلحة.

الحرب نفسها خلت الألمان يتعلموا كذا حاجة و يعدلوا شوية كمان في زيهم العسكري .. سنة 1915 يعني بعد سنة بس من بداية الحرب إتشالت كل العلامات المميزة للزي العسكري للضباط بحيث إنت فعلياً بقي صعب عليك تميز هو اللي هناك ده عسكري ولا ضابط ألماني .. شوية وبقوا يشيلوا أي إكسسوارات ملهاش لازمة في الزي العسكري .. سنة 1916 يعني بعد سنتين بس من الحرب طلع قرار بإن خلاص Pickelhaub حتطلع بره الخدمة و حل محلها الخوذة اللي فضلت في الخدمة لحد الحرب العالمية الثانية  و إسمها ستالهيلم Stahlhelm.

سنة 1918 الحرب العالمية الأولي خلصت وده كان معناه كذا حاجة .. القوات المسلحة الألمانية كعدد إتخسف بيها الأرض لإن بعد ما كان تعدادها بالملايين بقت يدوبك حوالي 100,000 مقاتل بس .. من 1918 لحد 1928 ألمانيا كان حالها يصعب علي الكافر .. البلد مفيهاش فلوس .. إقتصادها واقع .. بتدفع تعويضات بالملايين .. ده خلي الإهتمام بالزي العسكري مبقاش علي رأس أولويات البلد اللي هو فكرة اللي عندكوا إلبسوه بس كل ده بدأ يتغير مع ظهور النازية .. فيه نقطة مهم تفهمها إن (أدولف هتلر) كان مؤمن جداً بأهمية المظاهر .. صحيح في بداية حكمه بدأ مشروع ضخم جداً لإعادة تسليح القوات المسلحة الألمانية بس في نفس الوقت هو كان شايف إن لازم العسكري الألماني مش بس يبقي شكله حلو ده كمان الناس لازم تشوفه سيكسي خصوصاً قوات SS.

تطلع إيه قوات SS دي؟ و ليه لبسها كان مميز؟

دي إختصار Schutzstaffel يعني سرب الحماية بالألماني و خلي بالك ده مش معناه إن SS تبقي النسخة بتاعة الصاعقة في القوات المسلحة النازية .. فكرة SS في بدايتها خالص كانوا مجرد البلطجية بتوع الحزب النازي و اللي كان جزء من شغلهم هو تأمين حياة (هتلر) .. لما (هتلر) بقي مستشار ألمانيا هو فضل عنده هسهس إن في أي لحظة ممكن القوات المسلحة تنقلب عليا و بالتالي واحدة واحدة قوات SS بقوا تقدر تقول كده الحرس الجمهوري بتاع (هتلر) واللي بما إنهم الحرس الشخصي ل(هتلر) فهم لازم يبقوا مميزين .. لبسهم كان مميز جداً باللون الأسود .. شعارهم كان فشيخ بالجمجمة و حرفي الإس اللي مرسومين زي رمز الشرارة الكهربية.

مينفعش نتكلم عن SS من غير ما نجيب سيرة (هينريك هيملرHenrich Himmler) .. (هيملر) كان الدراع اليمين ل(هتلر) وهو كان القائد بتاع SS .. الغريبة في (هيملر) حاجة إنه كان عنده عقدة نقص غريبة شوية .. هو مكنش عسكري سابق .. لا هو مهندس ولا هو مخترع .. هو وصل للي هو وصله ده بحاجة واحدة بس وهي التطبيل .. هو كان بيقول أمين لكل حاجة يقولها (هتلر) .. لو (هتلر) أعلن نفسه نبي ف(هملر) حيكون أول واحد يؤمن بيه .. بس في نفس الوقت ده كان بيخليه يتعرض لتنمر و تهزيق من كل الناس الكبيرة اللي حول (هتلر) اللي كانوا بيشوفوا (هملر) علي حقيقته وهو إنه رجل ملوش شخصية .. ده خلاه يهتم جداً إن زي ما تقول يثبت رجولته قدام الناس عن طريق شكل و الجرايم اللي بيرتكبها رجالته .. عشان تفهم قصدي فإنت محتاج تفهم إن (هملر) قسم القوات دي ل3 حاجات:

• ما يسمي General SS أو قوات العاصفة العامة ودول كان دورهم عامل زي بتوع المباحث دلوقتي كده اللي هو بيشمشموا علي أي حد معارض للفكر النازي أو بيفكر يعارض الفكر النازي.
• ما يسمي Armed SS أو قوات العاصفة المسلحة ودول الحقيقة صداع في رأس أي حد بيفكر يفهم هي القوات المسلحة النازية كانت بتمشي إزاي .. إنت ممكن تلاقي وحدة مدرعات تابعة للقوات البرية عادي جداً بس بيحارب جنبهم قوات مشاة لابسة زي مميز بيها و عليه شعار SS بس لا معاهم دبابات ولا أي حاجة خالص .. مجرد عساكر مستبيعه معندهاش مشكلة تموت في سبيل الرايخ الثالث بس في نفس الوقت معندهمش مشكلة يقتلوا أي أسير أو يغتصبوا أي ست أو يعدموا أي طفل أو رجل كبير في السن .. الناس دي هي اللي جابت السمعة اللي زي الزفت للقوات المسلحة النازية في الحرب العالمية الثانية.
• ما يسمي Death Head Units أو وحدات الموت ودول الناس اللي كانت مسئولة عن إدارة معتقلات اليهود و الغجر و أسري الحرب ومن ضمنهم معتقل أشويتز.

التصميم الجاحد:

إن التصميم بتاع الزي العسكري لقوات SS كان كويس و هنا لازم من دلوقتي نقول حاجة و هي إن فيه هبداية عابرة للقارات ناس كتير مقتنعة بيها وهي إن مصمم الأزياء (هيوجو بوس Hugo Boss ) هو اللي صمم الزي العسكري النازي .. اللي حصل إن مصانع (هيوجو بوس) هي اللي صنعته بس اللي صممه كان مصمم ألماني محدش فاكره إسمه (كارل ديبيتش Karl Diebitsch) ومعاه رسام إسمه (والتر هيك Walter Heck) .. (هيوجو بوس) مات سنة 1948 يعني بعد ما الحرب العالمية الثانية خلصت بسنتين و إبنه خد الشركة و إبنه هو اللي بني الشركة من أول و جديد بعيد خالص عن التاريخ الأسود للشركة بس خلي بالك من نقطة .. بلاش تتخيل إن (هيوجو بوس) كان نازي تقيل .. بلاش تفتكر إن كل ما (هتلر) شخصياً يحب يفصل بدلة فيقوله تعالي يا واد يا (هيوجو) فصلهالي .. (هيوجو بوس) في مرحلة ما بعد الحرب العالمية الثانية إتحقق معاه وفي دوره في الفترة النازية و لقوا إن هو كان غلبان يعني مقارنة بعتاولة الحرب و إن كان الرجل فعلاً دفع غرامة مش عشان هو كان عضو في الحزب النازي إنما عشان كان مشغل عنده 150 معتقل في المصانع بتاعته.

حاول تتخيل نفسك مصمم أزياء شوية و تسأل نفسك إزاي أصمم زي عسكري الرجاله تحس إنه حلو عليها و الستات تكراش علي أي رجل لابسه .. خلينا نبدأ باللون .. إيه أكتر لون الرجاله بتحب تلبسه؟ .. شطور الأسود .. لسبب ما الرجاله بتشوف اللون الأسود سيكسي جداً .. فيه غموض كده و ده خلاه اللون المناسب إنه يكون الزي الرسمي لقوات SS .. علي فكرة فيه ناس شايفه إن السبب في إختيار اللون الأسود هو إعجاب (هتلر) شخصياً بالقسيسين الجيزويت اللي بيلبسوا روب لونه أسود بس انا تقديري الشخصي يعني إن ده مش السبب ورا إختيار (كارل ديبيتش) و (والتر هيك) للون الأسود .. نيجي للسؤال اللي وراه .. الإكسسوارات.

واحد من الحاجات اللي دايماً بتتنسي عن الرجاله هي إننا تافهين .. يعني مثلاً .. الناس شافت إن (كارل ديبيتش) و (والتر هيك) إختاروا الجمجمة عشان تبقي رمز قوات SS و قالك باااس ده رمز للمنظمات السرية اللي عايزه تحكم العالم و الكلام الفاضي ده .. محدش خد باله إن (كارل ديبيتش) و (والتر هيك) الإثنين كانوا عساكر في القوات المسلحة الألمانية وقت الحرب العالمية الأولي و زي أي عسكري بتقف قدام أبطال الحرب من الجنرالات و بتقول لنفسك أنا عايز أبقي زي دول .. من ضمن أبطال ألمانيا في الحرب دي كان جنرال إسمه (أوجست فون ماكينسين August Von Mackensen) .. الرجل ده كان بيلبس طاقية عليها رمز الجمجمة و تحتيها العظمتين اللي إنت بتشوفهم في صناديق الكهرباء في الشارع .. (كارل ديبيتش) و (والتر هيك) قالوا إن الجمجمة دي هي الإكسسوار اللي هم بيدوروا عليه لكن السؤال دلوقتي هو الإكسسوار ده بيرمز لإيه؟

بعد ما العالم صحي علي خبر جرايم التحرش و الإغتصاب اللي إرتكبها المنتج السينمائي الأميريكي (هارفي واينستين Harvey Weinstein) ففي حفلة الجولدن جلوب اللي إتعملت بعد الفضيحة علي طول كل ممثلات هوليوود إتفقوا إنهم يلبسوا فساتين سودا كنوع من أنواع التضامن يعني مع ضحايا التحرش الجنسي .. الإكسسوار في الملابس بالذات بيبعت رسالة معينة .. بالنسبة للزي النازي فالجمجمة مش بترمز للموت زي ما ناس كتير شايفه قد ما هي بترمز بإن الموت مش فارق معاك .. إيمانك بقضيتك بيخليك مستعد تقتل و تتقتل عشانها .. حتي رمز النازية اللي هو الصليب المعقوف أو Swastika قصة إزاي بقي رمز النازية توريك قد إيه النازيين كانوا عباقرة جداً وفي نفس الوقت كسالي جداً.

الصليب المعقوف زيه زي الهلال أو الصليب أو نجمة داوود كان زمان رمز للديانات الهندية و كتير من الهنود زمان كانوا بيعتبروه وشه حلو اللي هو زي ما إنت كده تجيب لبنتك سلسلة عليها أية الكرسي عشان تحميها من الحسد مثلاً .. كل اللي (كارل ديبيتش) و (والتر هيك) خدوه و حطوه عليه التاتش بتاعتهم إنهم خلوه يلف العكس و هوبا بقي الشعار بتاع الرايخ الثالث .. العلم بتاع ألمانيا النازية لوحده يعتبر درس لأي مهندس ديكور في أهمية التناقض في الألوان Contrast .. السواستيكا السودا جوه دايرة بيضا في بحر من الأحمر الدموي و بقي عندك علم سيكسي فشخ .. حط العلم ده زي ما يكون شارة الكابتن اللي بيلبسها لاعيبه الكورة علي زي الSS اللي لونه أسود و بقي عندك يونيفورم شكله حلو  مليان Contrast و سهل يتلقط بالعين.

الدعاية و الإعلان:

إن النازيين نفسهم كانوا فاهمين أهمية الدعاية كويس أوي فتلاقيهم دايماً يعملوا عروض عسكرية فيها عساكر عاملين فورمة الساحل و بالتالي البدلة العسكرية بتبقي سيكسي أوي عليهم و الأهم إنهم بيجيبوا مخرجين سينما فاهمين شغلهم يصوروهم في العروض العسكرية دي .. و زي ما مكنش ينفع نتكلم عن SS من غير ما نجيب سيرة (هملر) فبرده مينفعش نتكلم عن الدعاية من غير ما نتكلم عن وزير الدعاية (جوزيف جوبلز Joseph Goebbels) .. ده تقدر تقول عليه (صفوت الشريف) بتاع النازيين .. الرجل اللي كان شعاره في الدنيا إن الدعاية بتفقد معناها بمجرد ما إنت كمواطن تفهم إننا بنضحك عليك .. عشان التاريخ مبيفتكرش غير الرجاله فإنت للأسف متخيل إن (جوبلز) ده يبقي هو الشخص العبقري اللي قدر يخلي بلد كاملة تقتنع بإن (هتلر) هو أمل ألمانيا لغد أفضل بس أنا عايزك تبقي عارف إن (جوبلز) مجرد خد اللقطة من العبقري اللي بحق و حقيقي .. لا مش (هتلر) .. واحدة إسمها (ليني رايفينستول Leni Riefenstahl).

دي مخرجة سينما ودي معلومة رقم واحد .. سنة 1932 هي حضرت إيفينت نظمه الحزب النازي في بدايته خالص وفي الإيفينت دي هي شافت (هتلر) بيتكلم و متفهمش إيه اللي حصلها .. (ليني) راحت الإيفينت وهي عايزه تعرف هم مين النازيين دول و طلعت من الإيفينت عايزه تلاقي أول يهودي قدامها عشان تقتله و تشرب من دمه .. شوية و قابلت (هتلر) و دماغهم فعلياً كانت تقدر تقول عليها A Match Made in Heaven .. دورها كانت إزاي تنقل أفكار النازية علي الشاشة من غير ما إنت كمشاهد تحس إنك مش بتتفرج علي فيلم سينما إنما بتتفرج علي إعلان .. الست دي عملت أفلام أساميها مميزة و حاول تلاحظ ده .. فيلم زي Victory of the Faith يعني نصر الإيمان .. فيلم زي Triumph of the Will يعني إنتصار الإرادة .. خدت بالك من الأسامي؟ .. الأفلام بتاعتها كانت متصممة عشان تقنع الألمان اللي عايشين في ألمانيا إن (هتلر) هو أمل الأمة لمستقبل أفضل و في نفس الوقت تقنع الألمان اللي عايشين بره ألمانيا يرجعوا بلدهم عشان يخدموا في القوات المسلحة لإن (هتلر) هو أمل الأمة لمستقبل أفضل.

أفلام هوليوود:

 ثالث سبب و يمكن أهم سبب هو الأفلام الأمريكاني .. مفيش فيلم حلو من غير ما يبقي فيه شرير جاحد و المشكلة إن كل ما هوليوود تعطل في شرير يقولك طب ما نجيب ممثل درامي جامد تنين و نخليه يبقي شخصية من النازيين و نلبسه لبس شيك يخليك متعلق بيه كل ما تشوفه علي الشاشة .. فيه مسلسل إسمه The Man in the High Castle هو أساساً قصته إن لنفترض إن دول المحور كسبت الحرب و ألمانيا و اليابان إحتلوا أميركا و قسموها بينهم فإنت طول الفيلم قدامك عساكر و ضباط نازيين بالزي النازي .. شخصية زي (هانز لاندا Hans Landa) في فيلم Inglorious Bastards اللي قدمها الممثل (كريستوف والز Christoph Waltz) .. و أمثلة كتير جداً خلت الفكرة اللي تتزرع في دماغك إن النازيين دول ناس ولاد كلب بس شيك أوي الصراحة.

انا عايز أختم إني أقولك إن (هتلر) كان شايف نفسه فنان في جسد سياسي و ده يفسرلك إهتمامه بالImage إن لازم يبقي شكلنا حلو و شيك .. حتي الناس اللي كان دورها تضخيم دوره و رسمه في صورة منقذ الأمة هم كمان كانوا مقتنعين جداً بده .. يمكن كانوا ملكيين أكتر من الملك.

المصدر:

فيديو بعنوان Why were the Nazis so stylish?// Secret History Revealed نشر علي YouTube وده لينك الفيديو لو حبيت تتفرج عليه:
https://www.youtube.com/watch?v=60FM9WjkXtA