مانسا موسي .. حكاية أغني أغنياء التاريخ الأغرب من الخيال .. الجزء الأول.

مشكلة مالي و أفريقيا عموما بالنسبة لينا كعرب و كمصريين هي إننا منعرفش عنها حاجة .. إحنا مبنسمعش سيرة الدول الأفريقية عموما إلا لو كنا حنلاعبها ماتش كرة قدم بس غير كده مش مهم في نظرنا الفرق بين مالي و كينيا و زيمبابوي .. كلها دول عايش فيها ناس سمر و خلاص .. بس مجرد إنك تدوس شوية في تاريخ الدول دي حتلاقي إنه مليان حكايات و علاقات ربطت تاريخنا كعرب و كمسلمين بيهم بس للإسف الإستعمار الأوروبي لما جه قطع العلاقات دي و خلاك شايفهم زي ما إنت شايفهم دلوقتي .. ناس سمر و خلاص .. قصة النهاردة عن أغني أغنياء التاريخ .. رجل أغني من (قارون) و أغني من (بيل جايتس) بتاع شركة مايكروسوفت و (جيف بيزوس) بتاع شركة أمازون و اللي صدق أو لا تصدق يبقي أسمر و أفريقي و من مالي .. من غير ما أطول عليك زيادة عن اللزوم خلينا نخش في الحكاية علي طول.

الفصل الأول .. الخناقة بين غانا و مالي:

سنة 700 ميلادي مكنش فيه حاجة شاغله بال العرب و المسلمين وقتها قد تطورات الفتح الإسلامي لبلاد المغرب العربي .. زي ما حكينا في قصة فتح الأندلس في السنة دي كان (موسي بن نصير) وصل بقواته للجزائر و كانت الخناقة بين العرب و بين البربر مولعة بحيث محدش فيهم خد باله من اللي بيحصل تحت شوية .. جنوب الجزائر فيه حاجة إسمها الصحراء الكبري و لو عديتها حتلاقي نفسك وسط دول بتتسمي دول جنوب الصحراء و اللي واحدة منهم كان إسمها بقي علي كل لسان اللي هي مملكة غانا .. زي ما بتتعلم في أي كتاب تاريخ للمبتدئين عشان دولة ما إسمها يبدأ يتعرف فده بيحصل بحاجة من إتنين .. يا البلد عندها جيش عمال يدوس علي وش أي حد .. أو إن البلد دي معاها فلوس كتير و كتير أوي كمان .. غانا كانت الحالة الثانية .. غانا ربنا كرمها بشوية مناجم دهب زي الفل بحيث كانت بتتاجر مع زباين أهمهم البربر اللي بعد هزيمتهم من (موسي بن نصير) فالزبون المهم بقي الدولة الأموية عشان تاخد منهم ملح و بهارات و طبعاً متنساش الضرائب اللي بتتفرض علي التجار اللي بيعدوا علي أرضها.

اللون الأخضر ده يبقي مملكة غانا و اللون الأحمر يبقي دولة غانا اللي إنت عارفها دلوقتي.

سنين بتعدي و ثروة غانا عمالة تزيد و مع الوقت جيرانها بقوا بيبصوا للفلوس اللي بتدخلهم و بيقولوا لنفسهم طب ما إحنا أولي .. شوية و دولة المرابطين في المغرب نفذت هجوم كاسح ضد مملكة غانا وهو صحيح الهجوم فشل في إنه يحقق المطلوب منه إنه يخلي غانا جزء من الدولة الإسلامية بس في نفس الوقت الهجوم خلي المملكة أضعف من إنها مش بس تحمي نفسها ضد أي تدخل خارجي إنما كمان أضعف من إنها تحافظ علي وحدتها .. شوية و المملكة بقت تتقسم لحتت كل حتة عايزة إستقلالها لحد ما جت موجة جفاف خسفت بالمملكة الأرض و إتقسمت ل12 جزء و من ضمن الأجزاء دي كان حتة إسمها ماندينكا و اللي إتولد فيها أمير إسمه (سونجادا).

مشكلة (سونجادا) إنه إتولد و مكنش بيعرف يمشي و ده في مجتمع زي مجتمع غانا في الوقت ده كفيل إنه يخلي الواد الصغير و أمه مادة خصبة للقلش و التريقة .. فين و فين لما (سونجادا) بقي عنده 7 سنين بقي بيعرف يمشي .. سنين المعاناة اللي الواد ده شافها عشان يمشي علي رجله علمته من صغره إنه ميبقاش عيل متدلع مستني حد يفصصله السمك مع الرز .. مع الوقت سمعته في البلاط الملكي خلت ناس كتير تتوقع إن لما أبوه الملك يموت فالواد (سونجادا) ده حيمسك هو وراه .. المشكلة كانت إن الملك متجوز إتنين و كل واحدة هو مخلف منها ولاد .. أم (سونجادا) بمجرد ما جوزها مات عرفت إن غانا مش مكان أمن لابنها و خدته هو و أخواته و هربت بره غانا علي مملكة مالي جارة غانا .. إذا كان الواد وهو لسه صغير خلي الناس كلها تتكلم عنه في غانا فملك مالي إعتبره إبنه و خلاه النائب بتاعه و لما كان بيسافر أو بيبقي عيان بيسيبه يحكم مالي بالنيابة عنه .. ثقة كبيرة إتحطت في شاب صغير يدوبك عنده 18 سنة توريك قد إيه (سونجادا) لو كان فضل في غانا و حكم بعد وفاة والده كان وضع غانا إتغير خصوصاً مع اللي حصل فيها .. مراة ملك غانا الثانية اللي كانت فاكرة نفسها (شجرة الدر) بتاعة عصرها فشلت في إنها توصل حد من عيالها للعرش و اللي إستولي علي الكرسي كان واحد إسمه (سوماورو كانتي) كان بيخوف الناس بإنه بيقول علي نفسه إنه معاه الحزام الأسود في السحر .. إذا كان هو بيقول علي نفسه ساحر بس في الحقيقة الرجل ده كان مفتري.

(سوماورو كانتي) في أوضة نومه كان معلق رؤوس 9 ملوك من حكام الممالك ال12 اللي كانوا بيمثلوا مملكة غانا و اللي قتلهم عشان يستولي هو علي الحكم .. (سموماورو كانتي) كان بيلبس شبشب مصنوع من جلد ناس هو قتلهم كان بيسخلهم بعد وفاتهم .. تخيل رجل دي تبقي إختياراته الشخصية في الموضة و الديكور حيحكم بلد إزاي .. كم الدمار و الدم و الضحايا اللي هو كان السبب فيهم خلي أهل مملكة ماندينكا اللي زي ما قلتلك تبقي جزء من مملكة غانا القديمة و اللي إتولد فيها (سونجادا) يبعتوله جوابات يطلبوا منه إنه يجي يلحقهم.

الحسبة كانت بسيطة بالنسبة لشخص فاهم هو بيعمل إيه زي (سونجادا) .. دلوقتي ملك مالي وافق يديله نص جيشه بس حتي القوات دي متجيش حاجة قصاد القوات اللي بتحارب تحت إيد (سوماورو كانتي) .. طب و الحل؟ .. هو لازم بطريقة ما يقنع الممالك التانية إنها تنضم ليه في ثورة شعبية ضد (سوماورو كانتي) .. الميكس بين الكراهية اللي في قلوبهم ضد حاكم ديكتاتور معندوش رحمة مع شخصية (سونجادا) اللي هم عارفينه كويس و زود عليهم عامل إن البشر عموماً ممكن يتوحدوا علي قضية لو إدتلهم الأمل إنهم ممكن ينجحوا خلي (سونجادا) يجمع جيش بدأ يزحف علي مملكة غانا سنة 1234.

تاني .. زي ما في سنة 700 العالم العربي مكنش فايق إنه يشغل باله باللي بيحصل في غانا فبرده الأحداث بتاعة سنة 1235 مكنتش سامحة إن حد يقول لنفسه هو إيه اللي بيحصل جنوب الصحراء الكبري .. في الوقت اللي المغول فيه بيدوسوا علي وش أي حد .. في الوقت اللي الإمبراطورية الرومانية المقدسة كانت بتتخانق مع بابا الفاتيكان .. في الوقت اللي الحملات الصليبية كانت صداع زمن في دماغ الدول الإسلامية .. في الوقت اللي كل الأحداث دي بتحصل فيه .. (سونجادا) الشاب الصغير اللي لسه عنده 18 سنة قدر يهزم قوات الملك الساحر (سوماورو كانتي) و يبقي ملك أو مانسا علي 12 مملكة بيكونوا مع بعض مملكة غانا و زود عليهم كمان مملكة مالي اللي لما الملك بتاعها مات ف(سونجادا) فتح المملكتين علي بعض زي ما يكونوا شقتين في دور واحد عشان تبقي دولة تحت إيدها 4 مناجم ذهب .. (سونجادا) أمه كانت داعياله عشان يمسك مملكة بالموارد دي .. دولة لا مركزية عبارة عن تحالف فيدرالي من 12 دولة .. دولة حركة التجارة فيها مبتقفش .. فلوس الضرائب اللي كانت بتجيله خلت (سونجادا) يبقي عنده أول جيش نظامي في أفريقيا جنوب الصحراء الكبري وظيفته إنه يأمن طرق التجارة .. عشرين سنة من النغنغة و النعنشة إنتهت بوفاة (سونجادا) إما غرقاً أو عن طريق الغلط في رحلة صيد علي حسب إنت حتصدق مين من المراجع التاريخية بس المهم إن بعد وفاته الدنيا باظت بسبب نفس زفت البدعة اللي خربت تاريخ البشر .. الحكم الوراثي.

خريطة مملكة مالي .. بيفصلها عن الدول الإسلامية الصحراء الكبري و علي شمالها فيه المحيط الأطلنطي.

وفق العادات و التقاليد المالية فإن بعد وفاة الحاكم يجي وراه إبنه الشرعي .. المشكلة إن إبنه كان صغير في السن فاللي جه مكان (سونجادا) كان واحد من عياله اللي هو تبناهم .. الحق يتقال الرجل كان فلة شمعة منورة .. عمل شوية إصلاحات كويسة و كمان هو اللي دخل الإسلام لمالي و كان أول حاكم في تاريخ مالي يروح يؤدي مناسك الحج كنوع من أنواع تقوية العلاقات بين مالي و بين الدول الإسلامية في المغرب العربي .. المشكلة إن الرجل مكنش بيخلف و ده خلاه يتبني ولاد قادة الجيش بتاعه علي أمل إن الخطوة دي تخليهم مينقلبوش عليه .. لما الرجل مات إتنين من عياله بالتبني دخلوا في حرب أهلية ضد بعض.

بعد سنين من الدم اللي ملوش أي داعي ملوك ال12 مملكة اللي بيشكلوا مملكة مالي إتفقوا علي حاجة غريبة جداً .. الملك هم اللي حيختاروه .. يكون شخص دوره إنه يدير الليلة .. مفيش حد حينفرد بالسلطة .. خلال السنين دي العلاقات التجارية بين مالي و بين ولاية المغرب العربي كانت بتخليهم ياكلوا الشهد .. الفلوس جريت في إيد مملكة مالي و ده خلاهم يقدروا يضموا السنغال لمملكتهم و بقت بتضم غانا و مالي و السنغال .. شوية و أهل مالي متفهمش ليه قلبوا علي الفايكنيج .. الناس دي بقي عندها هسهس إسمه نبني سفن نبعتها تستكتشف دول تانية .. من ضمن الناس دي كان واحد من اللي حكموا المملكة و كان إسمه مانسا (أبوبكاري كايتا الثاني) و متنساش إن مانسا ده يبقي اللقب بتاعه إنه الملك و اللي قاد بنفسه رحلة من 2000 سفينة لإستكشاف العالم .. متحاولش تسأل هم يا تري إكتشفوا إيه لإن مفيش حد عارف .. مفيش حد من اللي طلعوا في الرحلة دي رجع تاني مالي ولا حد يعرف هم راحوا فين.

الفصل الثاني .. مانسا (موسي) و المال و البنون:

لما (أبوبكاري كايتا الثاني) سافر في رحلته دي هو طبعاً مكنش عامل حسابه إنه مش حيرجع تاني و بناء عليه الإتفاق كان كالأتي .. خلال سنة اللي حيمسك البلد مؤقتاً هو النائب بتاعه (موسي كايتا) و لو حصل و الملك مرجعش ف(موسي كايتا) حيبقي هو المانسا الجديد و حيبقي إسمه المانسا (موسي كيتا الأول) و ده اللي حصل فعلاً سنة 1313 .. أرجع تاني و أفكرك إن مانسا (موسي) التاريخ مش بيفتكرله غير إنه أغني بني أدم مشي علي وجه الأرض و متحاولش تعمل سيرش عشان تقيم هو بفلوس دلوقتي ثروة الرجل ده قد إيه لإن فلوسه مينفعش تتقاس بثروة بني أدمين إنما بالناتج الوطني الإجمالي GDP بتاع دول كاملة بس حاول تفهم نقطة و هي إن طموح مانسا (موسي) كان بسيط علي فكرة .. الرجل ده كان عايز إسمه و إسم بلده يتعرف في كل حتة .. حاول تتخيل إن اللي كان عايز يعمله مانسا (موسي) هو هو اللي كانت بتحلم بيه دولة قطر مثلاً .. قطر من أغني دول العالم بس هي كانت عايزه إسمها يبقي علي كل لسان فسألوا نفسهم هو إيه أكتر حاجة الناس بتتكلم عنها فلقوا إن الحاجة دي تبقي كرة القدم .. قالك بسيطة يبقي ننظم كأس عالم و نشتري نادي و نجيب أكبر أسامي لاعيبة كرة القدم تلعب في النادي ده .. الفكرة في Exposure .. إنت عايز تتعرف فبتشوف الناس بتحب إيه و بتقرر تتفوق فيه .. فهمت الكونسيبت؟

كرة القدم بتاعة الوقت اللي مانسا (موسي) كان بيحكم فيه مالي هو الإسلام .. مهم تفهم نقطة وهي إن صحيح مالي معاها فلوس بس العالم الإسلامي هو كمان معاه فلوس .. صحيح مش زي مالي بس برده العالم الإسلامي وقتها مكنش فقير مادياً بس مالي كانت زي ما هي غنية مادياً بس هي كانت فقيرة علمياً .. مانسا (موسي) كان فاهم وضع بلده كويس أوي .. الفلوس اللي بلده فرحانة بيها دي جت بسبب التجارة مع الدول الإسلامية و الدول الإسلامية وافقت إنها تتاجر مع مالي عشان مالي هي كمان بلد إسلامية .. مالي عرفت تحافظ علي الفلوس اللي بتدخلها دي كلها عشان هي إستلفت نفس طرق الإدارة اللي كانت متبعة في الدول الإسلامية .. خدت بالك أنا كررت كلمة إسلامية في الفقرة دي كام مرة؟ .. اللعبة مش الفلوس .. اللعبة هي الإسلام .. مانسا (موسي) كان فاهم كويس إن عشان أهل مالي مبيتكلموش عربي و عشان هم جغرافياً بعاد عن الدولة الإسلامية فالمسلمين شايفينهم مسلمين نص نص أو مسلمين بالإسم بس .. عشان مالي يبقي ليها إسمها و تتحط في نفس المكانة بتاعة مكة المكرمة و دمشق و القاهرة و الأندلس لازم المسلمين يشوفوا أهل مالي علي إنهم مسلمين زي ما الكتاب بيقول .. طب ده إزاي يحصل؟ .. بسيطة يلا نحج السنة دي.

سنة 1324 يعني بعد 17 سنة من توليه الحكم مانسا (موسي) راح يحج بس الهدف من الرحلة كان إنه يقول للناس كلها العو جه العو حضر .. مفيش بني أدم راح يحج بالشكل ده لا قبل كده ولا بعد كده .. دي رحلة حج هدفها إن اللي ميعرفش يعرف إن فيه بلد مسلمة إسمها مالي و من مصلحة الدول الإسلامية كلها إنهم يتسابقوا علي مين اللي ينول شرف إنه يتقال عليه حليف لمملكة مالي .. اللي حقوله ليك دلوقتي ده حصل فعلاً و رغم إنك ممكن تشوفه إنه مبالغة لإن مستحيل حاجة زي دي تحصل بس صدقني حصل .. جاهز تتصدم؟

الموكب اللي سافر مع مانسا (موسي) من مالي لحد مكة المكرمة و رجع كان بيتكون من 60,000 بني أدم و ده رقم حقيقي مش غلطة .. الموكب ده لو إنت قاعد في البلكونة بتاعة بيتكوا بتتفرج عليه و هو بيعدي فإنت حتحتاج يوم كامل عشان تجيبه من أوله لأخره.
مقدمة الموكب كان من 500 سفير وظيفتهم إنهم يبلغوا أهل البلد اللي الموكب حيعدي عليها إن المانسا بيه موسي باشا حيعدي و كلهم لابسين دهب في دهب و ماسكين عصيان من الدهب .. الخدم بتوع مانسا (موسي) اللي سافروا معاه وصلوا 12,000 خادم كلهم لابسين أنظف من أجدعها أمير ولا ملك من الدول الإسلامية اللي هو عدي عليها في رحلة الحج دي.
القافلة كان معاها 600 جمل كل جمل كان شايل حمولة 130 كيلوجرام من تراب الدهب .. كل ده كانوا الحاشية بتاعة مانسا (موسي) لوحده .. لسه مراته بقي .. الست راحت تحج معاه و خدت معاها 500 خادمة .. و طبعاً كل الناس دي كلها محتاجة تاكل و تشرب فكان فيه جمال شايلة أكل و شرب يكفي المولد ده كله.

خط سير رحلة الحج الأسطورية لمانسا (موسي) من مالي مرورا بالقاهرة لحد مكة المكرمة.

دي مش كل القصة .. فاكر لما قلتلك إن عشان مانسا (موسي) يحقق هدفه بإن إسم مالي يبقي علي كل لسان لازم يكسب الدول الإسلامية في لعبتها .. فعلياً الرجل ده كان بيتبرع بمليارات في شكل كياس من الدهب بيديها للفقراء و المحتاجين .. يقال إنه كان بيبني مسجد كل يوم جمعة .. أطول مدة قضاها في رحلته كانت في القاهرة .. يقال إنه قضي شهور يتمشي في شوارع القاهرة يشتري في هدايا و حاجات ملهاش لازمة بأسعار خرافية .. مانسا (موسي) صرف كمية ذهب بتتقدر بمليارات في الكام شهر اللي قضاهم هنا في مصر لدرجة إنه كان السبب في إنهيار الإقتصاد بتاع البلد لإنه ملي السوق بالذهب و مبقاش فيه فقير ماشي في الشارع .. الإقتصاد المصري إحتاج سنين عشان يتعدل حاله تاني بعد ما مانسا (موسي) رجع بلده بس الأهم إن اللي كان عايزه مانسا (موسي) حصل.

هو راح يحج إمتي؟ سنة 1324 .. فلما سنة 1375 بتوع الخرائط الأوروبيين يرسموا خريطة العالم و يبقي فيها مكان و إسم مملكة مالي و يبقي رمز المملكة هو تجسيد لمانسا (موسي) وهو قاعد علي الارض ماسك في إيده قطعة ذهب يبقي كده اللي هو عايزه حصل .. لسنين و سنين حكاية اللي حصل لما مانسا (موسي) راح يحج مش بس فضلت عايشة في مصر إنما وصلت لأوروبا.

الصورة دي تجسد كل اللي كان عايزه مانسا (موسي) إن إسم بلده يتعرف .. دي خريطة أفريقيا زي ما رسامين الخرايط في أوروبا سنة 1375 رسموها و فيها مكان مالي و اللي رمزها كان مانسا (موسي) قاعد و ماسك في إيده قطعة من الذهب.

بلاش دي .. مانسا (موسي) و هو راجع من الحج خد معاه وهو راجع مهندسين و فنانين و قضاة و علماء من الدول الإسلامية اللي هو زارها عشان الناس دي تبقي هي الأساس اللي عليه مملكة مالي تحط نفسها في نفس المكانة بتاعة القاهرة أو قرطبة أو دمشق و يمكن حتي بغداد و من ضمن المعالم الأثرية اللي إتبنت في عهد مانسا (موسي) و لسه عايشة لحد دلوقتي مسجد تمباكتو الكبير اللي يعتبر تحفة معمارية فعلاً تستحق إنها تتشاف لو إنت غاوي سفر .. أقف كده ثانية و حاول تفكر في الجملة دي .. وصل الحال في عهد مانسا (موسي) إن أهل مالي كانوا بيقولوا علي بلدهم إن الملح بيجي من الشمال و الذهب بيجي من الجنوب بس العلم بيجي من تمباكتو .. تمباكتو اللي تاني بفكرك إنها كانت مدينة أفريقية جنوب الصحراء الكبري كانت فيها صناعة نسخ كتب يمكن متفرقش حاجة عن اللي كانت موجودة في بغداد و الأندلس .. كل المجد العلمي ده محدش سمع عنه حاجة ولا يعرف عنه حاجة.