لينك التسجيل الصوتي للمقالة علي Sound Cloud:
https://soundcloud.com/user-112011687-312727988/aramco-m4a
الإتجاه اللي السعودية ماشية عليه دلوقتي (إقتصادياً علي الأقل) هو إنها تبطل تعتمد علي عائدات النفط .. الفكر ده بيقوده ولي العهد السعودي (محمد بن سلمان) اللي يعتبر الحاكم الفعلي للسعودية دلوقتي .. الأخ ده فكرته بسيطة جداً وهي إن سنة 2019 إن شاء الله حيطرح جزء من أسهم شركة أرامكو Aramco السعودية للنفط للإكتتاب العام في البورصة أو زي ما بيسموه IPO اللي هي إختصار Initial Public Offering .. الفلوس اللي حتدخل السعودية من بيع الأسهم حيتم إسثثمارها في مشاريع ملهاش علاقة بالبترول خالص زي التكنولوجيا والسياحة والصحة والتعدين .. (محمد بن سلمان) الفكرة اللي بيبيعها عن رؤيته للإقتصاد السعودي اللي هو بيسميها Saudi Arabia 2.0 وهي إقتصاد مبني علي حاجات وتكنولوجيا جديدة لانج ملهاش علاقة بالبترول زي الطاقة المتجددة Renewable Energy والذكاء الصناعي Artificial Intelligence بحيث إن زي ما قال وزير المالية السعودي (محمد الجدعان) في مايو 2017 إن السعودية عايزه إن لما تيجي سنة 2030 ميبقاش هاممها حتي إن سعر بيع برميل النفط يوصل صفر.
الحقيقة إن فيه ناس شايفه إن اللي بيحلم به (محمد بن سلمان) ده إسمه أحلام يقظة أو زي ما بيقول (الكبير أوي) كلها أحلام وأماني .. النهاردة عائدات البترول لوحدها بتمثل 87% من إجمالي الفلوس اللي بتدخل للإقتصاد السعودي يعني حتي لو السعوديين عايزين بسرعة يبطلوا يعتمدوا علي بيع البترول فهم مش حيقدروا يعملوا ده.
بس فيه مشكلة صغيرة .. دلوقتي السعوديين بيقولوا إن قيمة الأسهم اللي هم طارحينها للبيع في Aramco حوالي 2 ترليون دولار وده رقم خزعبلي وعشان حد زي مثلاً تحالف من شركتي إيكسون موبيل Exxon Mobil مع بريتيش بيتروليوم British Petroleum يوافقوا إنهم يدفعوا مبلغ زي ده فلازم Aramco تديهم دليل واضح علي إن إحتياطي النفط السعودي كبير وضخم ويستاهل الإستثمار فيه وده بيحط السعوديين قدام سؤال يبان غبي بس هو منطقي أوي .. طب إذا كان إحتياطي النفط بتاعكوا كبير أوي كده ليه عايزين تبيعوا حصة من Aramco عشان تستثمروا الفلوس اللي حتيجي من البيع في مشاريع ملهاش علاقة بالبترول؟ طب ما الأفضل إنكوا تستثمروا فلوسكوا في الإحتياطي النفطي بتاعكوا والأرباح اللي بتيجي تحطوها في المشاريع التانية براحتكوا .. السؤال من ناحية تانية .. ليه تبيع شركتك عشان تمول مشروع إنت عايز تعمله بدل ما إنت ممكن تستفيد بشركتك والفلوس اللي حتجيلك إستثمرها في المشروع بتاعك؟
السؤال ده عبرت عنه واحدة إسمها (هيليما كروفت Helima Croft) شغالة مديرة إدارة إستراتيجية السلع في مؤسسة RBC Capital Markets اللي بتقول إن فيه تناقض واضح ما بين إنك تقول إن شركة Aramco بتعمل اللي تقدر عليه عشان تثبت إن الإحتياطي النفطي السعودي لسه بخيره لإنهم عارفين إن السعودية متقدرش تنهي إعتمادها علي عائدات بيع النفط في يوم و ليلة وما بين إنها تمشي ورا كلام (محمد بن سلمان) اللي عايز يشوف الإقتصاد السعودي مبني علي ما يسمي High Tech. Industry اللي هي الصناعات المتطورة اللي ملهاش علاقة بحاجة إسمها بترول .. السؤال اللي بيطرح نفسه دلوقتي أظن هو إيه موقف Aramco من الرؤية الإقتصادية الجديدة بتاعة (محمد بن سلمان)؟ .. اللي هو يعني أرامكو دي حتشتغل في إيه يعني بالصلاة علي النبي؟
الرد علي السؤال ده جزء من إجابته هو مصنع بتروكيماويات صدارة السعودي .. المصنع ده عبارة فعلياً عن متاهة من الأنابيب والخزانات والأفران علي مساحة تعتبر 3 أضعاف مساحة إمارة موناكو الفرنسية ومبني بكمية حديد تسليح تكفي إنك تبني كوبري الجولدن جيت Golden Gate Bridge في ولاية سان فرانسيسكو الأميريكية مرتين .. المشروع ده إتكلف 20 مليار دولار وهو عبارة عن Joint-Venture أو شراكة بين Aramco وبين شركة Dow Chemicals الأميريكية وخلص في شهر سبتمبر 2017 وده يعتبر أكبر مصنع بتروكيماويات يتبني علي مرحلة واحدة في التاريخ .. بس سيبك من كل ده .. أهم نقطة وأهم حاجة في المشروع ده إنه إعلان من شركة Aramco إنها خلاص مبقاش كل همها هو إنتاج وتكرير النفط وإنها بدأت توسع وتنوع من شغلها عشان تقدر تحقق الرؤية اللي إتحطت للإقتصاد السعودي .. مصنع الصدارة للبتروكيماويات بياخد البترول والغاز الطبيعي عشان يطلع منتجات كيماوية متنوعة بتستخدم في حاجات كتير أوي بداية من مستحضرات التجميل لحد قطع غيار العربيات وهي دي النقطة اللي Aramco عايزه توصلها للناس إنهم مش بس شركة بترول إنما كمان شركة تقدر توسع من نشاطها عشان تتماشي مع الرؤية الجديدة للإقتصاد السعودي.
انت حتبدأ تسمع وتشوف السعوديين وهم بيعملوا Marketing أو تسويق لشركة Aramco بشكل مختلف بداية من دلوقتي .. الكلام مش حيبقي علي إنها أكبر شركة بترول في العالم .. الكلام حيبقي علي إن Aramco هي زيها زي السعودية بتعيش مرحلة تحول .. زي ما الإقتصاد السعودي عايز ينوع من أنشطته فAramco هي كمان عايزة تشتغل في حاجات تانية غير البترول .. السعوديين عايزين يبيعوا فكرة إن Aramco شريك في مرحلة الإقلاع عن إدمان البترول مش عائق قدام المرحلة دي .. الحقيقة إن الكلام ده مبني علي شخصية شركة Aramco .. أي شركة في الدنيا ليها شخصية خصوصاً لو شركة كبيرة .. دي شركة إتأسست سنة 1933 وإتعملت بحيث تبقي شريك لشركة Oil Standard الأميريكية .. في الوقت اللي المملكة نسبة الأمية فيها كانت كاسحة كانت شركة Aramco بتدور علي الشباب السعودي المؤهل رغم ندرته عشان تعينه معاها .. في الوقت اللي السعودية كانت مجتمع قبلي مبني علي إحترام كلام الكبير كانت شركة Aramco مبنية علي أساس الكفاءات وترقية الأجدر .. في الوقت اللي السعودية بيتطبق فيها الفكر الوهابي وإن مينفعش يبقي فيه إختلاط بين الرجال والستات ومينفعش الستات تسوق ومينفعش تسافر إلا بمحرم كانت Aramco بتعين ستات عادي جداً وبيشتغلوا مع رجالة عادي جداً .. اللي بيحاول يعمله (محمد بن سلمان) إنه يخلي السعودية كلها زي Aramco بنفس الفكر وبنفس طريقة الشغل .. بس مش ده التحدي اللي بيواجه Aramco دلوقتي.
شركة Aramco قدامها سؤالين هي محتاجة تجاوب عليهم ولازم يلاقوا إجابة قبل ما الوقت يسرقهم:
- هو إحنا قدامنا كام سنة حيفضل فيهم البترول هو الدم اللي عايش عليه الإقتصاد العالمي؟
- هي Aramco تقدر تستغل الكام سنة الجايين دول إزاي عشان تقدر تستفيد قدر الإمكان من إحتياطي النفط اللي عندها؟
إنت لما بتتكلم عن Aramco فإنت بتتكلم عن شركة شغالة بقالها 80 سنة في مجال التنقيب عن البترول وخلال ال80 سنة دول قدرت إنها تنتج 145 مليار برميل ولو صدقت كلامهم فهم لسه عندهم إحتياطي نفطي حوالي 260 مليار برميل بترول وده رقم كفيل إنه يسد إحتياجات العالم كله من البترول لمدة 7 سنين .. ده غير إنهم بيقولوا إن عندهم كمان إحتياطي نفطي بس لسه مفيش تأكيد بإنه موجود فعلاً أو لا بحوالي 400 مليار برميل بترول .. بإختصار Aramco عندها بترول تبيعه يكفيها علي الأقل عشرين سنة بس السؤال دلوقتي هو يا تري يا هل تري لمدة كمان كام سنة حتلاقي حد يشتريه؟ .. زمان كان السؤال هو إحنا قدامنا كام سنة كبشر عشان نلاقي إن مخزون الأرض من البترول خلص؟ .. بس دلوقتي السؤال بقي هو إحنا كبشر قدامنا كام سنة عشان نكتشف إننا خلاص مبقيناش محتاجين ننقب عن البترول لإن كل إحتياجاتنا من الطاقة بنقدر نوفرها من الطاقة المتجددة Renewable Energy؟ .. فيه ناس بتقول إن البترول قدامه لحد سنة 2030 وحيبقي ملوش أي ستين لازمة حتي لو كان السعودية عندها إحتياطي عبارة عن محيطات من البترول لإن في اللحظة اللي العربيات اللي شغالة بالكهرباء Electric Vehicles أو EV تبدأ تنتشر فإنت تقدر تقول علي البترول يا رحمن يا رحيم .. ناس تانية بتقول إن لا لسه البترول قدامه وقت عن كده كمان .. أيا كان إحنا وصلنا لمرحلة إننا كبشر بقينا متؤكدين إن اليوم اللي إحنا منبقاش محتاجين فيه للبترول جاي جاي و ساعتها السؤال حيكون هو لو اليوم ده جه Aramco حتشتغل في إيه؟
لو سمعت كلام واحد زي (أمين ناصر) الCEO أو المدير التنفيذي بتاع Aramco فالرجل ده مش قلقان وتقدر تقول إن علي قلبه مراوح .. مراوح إيه قول علي قلبه تكييف مركزي .. هو معتمد علي إن التقديرات بتاعة Aramco بتقول إن لسه الطلب علي البترول حيفضل يزيد لحد سنة 2050 بسبب إرتفاع عدد السكان ومستوي المعيشة في الدول المتقدمة .. صحيح هم شايفين إن سوق الEV بينمو بشكل سريع بس أغلب التقديرات بتقول إن حتي لحد سنة 2040 فحصة الEV من سوق العربيات في العالم مش حتتجاوز ال20% .. (أمين ناصر) مش قلقان نهائي وهو بيؤكد ده بإنك لو بصيت علي الإستراتيحية اللي Aramco حتشتغل بيها في السنين الجاية حتلاقي نفسك قدام ناس مش قلقانه قد ما إنت قدام ناس معندهاش مشكلة تشتغل في أي حاجة تجيب فلوس:
- المنطق بيقول إن لو Aramco شايفة إن خلال كام سنة البترول مش حيبقي له قيمة أوي زي ما بيتسمي في الإقتصاد Stranded Asset يعني رأس مال لا قيمة له فالأولي إنها تضخ كميات ضخمة في السوق بحيث سعر بيع برميل النفط يقع أوي و يبقي رخيص و بالتالي بالنسبة لدول أوروبا مثلاً حيبقي أرخصلها إنها تشتري بترول من السعودية عن إنها تضخ مليارات في إستثمارات في مجال الRenewable Energy .. الحقيقة إن اللي بتعمله Aramco دلوقتي هو العكس .. هم شغالين علي إنهم يخلوا الPower Stations أو محطات إنتاج الكهرباء السعودية تبقي شغاله بالغاز الطبيعي مش البترول بحيث كل البترول اللي بتنتجه Aramco يروح للتصدير و الفلوس اللي بتيجي من بيع البترول Aramco تحطها كإسثتمارات عشان يطوروا و يلاقوا حقول بترول جديدة.
- السكة التانية اللي Aramco شغالة فيها هي إنها تخش في مجال تكرير البترول .. اللي بيحصل إن Aramco بتشتري حصص في أسهم شركات تكرير بترول شغالة جوه السعودية و بره و ده بيخليها تقدر تلاقي زباين يشتروا البترول الخام بتاعها من الدول اللي لسه إقتصادها بينمو بمعدل سريع زي الصين و الهند و أندونيسيا .. ناس كتير مش فاهمة إن لحد اللحظة اللي إنت بتقرأ فيها الكلام ده مش أكتر من 12% من إجمالي إنتاج البترول الخام في العالم بيخش في صناعة البتروكيماويات و الكلام علي إن النسبة دي علي الأقل حتتاضعف في الفترة من 2016 لحد 2040 و Aramco ناوية يبقي ليها حصة محترمة من إنتاج البتروكيماويات علي مستوي العالم.
- فيه اتفاق إتعمل بين Aramco و بين شركة Saudi Basic Industries و الأتنين دول أكبر شركتين مملوكين للدولة في السعودية علي إنهم يخشوا مع بعض في مشروع بتكلفة 20 مليار دولار عشان يعملوا مصنع يقدر يحول البترول الخام لبتروكيماويات علي مرحلة واحدة .. المشروع ده حيقدر إنك تديله كل يوم 400,000 برميل بترول خام عشان ينتجلك سنوياً 9 مليون طن بتروكيماويات و أغلب الأراء بتقول إن المصنع ده حيتعمل في منطقة إسمها الجُبيل و دي جنب مصنع الصدارة اللي إتكلمنا عنه.
المصدر:
- مقالة بعنوان Saudi Aramco plans for life after oil .. نشرت في مجلة Financial Times وده لينك المقالة الأصلية:
https://www.ft.com/content/e46162ca-d9a6-11e7-a039-c64b1c09b482
