الإستمرارية هي من أكتر الحاجات اللي الناس بتتكلم عنها بس مش حتلاقي حد يعرف يقولك هي بتتعمل إزاي .. كلنا عارفين إن (كريستيانو رونالدو Cristiano Ronaldo) خلاص حفر إسمه ضمن عظماء كرة القدم في تاريخها .. الرجل أهو كاسر الخمسة وثلاثين بس بطل جيله وكل موسم تحسه بيلعبه أكنه أول موسم ليه .. السؤال هو بيعمل ده إزاي؟ .. طب ده بني أدم أومال لو بنتكلم عن حاجة من صنع البشر إزاي تفهم السر ورا استمراريتها .. خد مثلاً العربية الفيات 128 اللي كتير مننا لسه عنده لحد دلوقتي وشغاله زي الفل من الستينات .. إيه اللي يخلي حاجة عمرها الإفتراضي المفروض ميعديش العشرين سنة تفضل مكملة السنين دي كلها ومتقولش لا؟ .. هل السر هو التصميم الهندسي اللي ميخرش المياه؟ .. شطارة صنايعي عارف هو بيعمل إيه؟ .. ظروف تشغيل حنينة علي المكنة؟ .. ولا يمكن هو مجرد حظ؟ .. النهاردة إحنا جايين نتكلم عن الطيارة F-16 اللي تعتبر العمود الفقري لسلاح الجو المصري وعايزين نفهم إزاي طيارة اللي هي في الأخر زيها زي العربية زيها زي الثلاجة زيها زي الغسالة صحيح سلعة معمرة بس في الأخر ليها عمر إفتراضي قدرت إنها تستمر في السوق فوق الخمسين سنة ويتباع منها فوق 4,600 نسخة علي مستوي العالم؟ .. عملتوها إزاي دي يا كفرة؟ .. صدقني لو قلتلك إنك وإنت بتقرأ الكلام ده إحتمال كبير في دولة ما في العالم حتلاقي طيارة F-16 بتخمس في السما لإن صحيح الطيارة دي دخلت الخدمة في القوات الجوية الأميريكية سنة 1978 بس هي بتخدم في سلاح الجو بتاع 25 بلد من النرويج لتشيلي ومن المغرب لسنغافورة .. عايزك تعرف إن سنة 2023 وبعد ما الطيارة فضلت تخدم لأكتر من 45 سنة لسه لحد دلوقتي فيه 800 نسخة منها في الخدمة حالياً في سلاح الجو الأميريكي .. تاني .. إزاي؟
عايزك تعرف إن العوامل المشتركة بين F-16 وبين (كريستيانو رونالدو) مش بس إنهم مكملين في الوقت اللي محدش توقع إن ده ممكن يحصل بعد سنين كتير من الشغل .. زي ما بداية معرفتنا بإسم (رونالدو) كانت وقت ما السير (أليكس فيرجسون Alex Ferguson) جابه من سبورتينج لشبونة عشان يبقي جناح مانشستر يونايتد وكلنا شفنا فيه الوريث الشرعي للتي شيرت رقم 7 اللي كان بيلبسه (ديفيد بيكهام David Beckham) بس في نفس الوقت نظرتنا ليه علي الأقل في البدايات كانت إنه لاعيب إستعراضي واقف علي خط التماس عشان يرقص الباك الشمال ويرفع كور عرضية وشكراً .. شوية وبقي بيخش جوه منطقة الجزاء كمهاجم إضافي .. شوية وبقي أخصائي ضربات حرة .. لقيناه بينط يجيب جوان براسه ولا أكنه بيلعب كرة سلة .. كبر شوية في السن وبقي رأس حربة صريح .. مع كل موسم جديد بيلعبه هو بيكتشف في نفسه إضافة زي ما إحنا لما بنتفرج بنلاحظ فيه إنه بدأ ينضج ويعقل وبقي لاعيب كرة قدم متكامل .. ده نفس اللي حصل مع الطيارة F-16 .. هي إتصممت عشان تبقي طيارة خفيفة سريعة ليها قدرة عالية علي المناورة عشان تخش في الحاجة اللي الطيارين بيسموها خناقة الكلاب أو Dogfighting اللي هو الإشتباكات الجوية بين الطيارات .. شوية ولقينا إنها تنفع تنفذ غارات جوية ضد أهداف أرضية زي ما حصل لما الإسرائليين ضربوا بيها المفاعل النووي العراقي .. حبة كمان وبقت بتشيل صواريخ مضادة للسفن .. ومفيش مانع إنها تنفذ عمليات إستطلاع .. بداية من 2015 والطيارة دي بقت أكتر طيارة في الخدمة علي مستوي العالم بحيث فيه منها دلوقتي فوق 2,000 طيارة في الخدمة.
إنت بتتكلم عن طيارة بتعرف تعمل كذا حاجة كويس وده السبب إن الطيارة دي هي أكتر سلاح الأوكرانيين شوية وحيبوسوا إيد الغرب إنه يديه ليها عشان تدافع عن نفسها ضد الغزو الروسي لأراضيهم وحالياً وإنت بتقرأ الكلام ده فيه طيارين أوكرانيين بيتمرنوا علي الطيران بيها في الدانمرك والمفروض إن أوكرانيا تستلم أول شحنة طيارات F-16 في صيف 2024 .. دي طيارة رغم إنها بتطير بقالها أكتر من خمسين سنة إلا إن لسه لحد دلوقتي فيه دول عايزة تشتريها وأخرهم كانت سلوفاكيا وده اللي النهاردة عايزين نفهمه .. ليه الطيارة F-16 هي (كريستيانو رونالدو) بتاعة الطيارات المقاتلة؟
سبب رقم واحد .. الأمريكان أتخزوقوا جامد في حرب فيتنام:
في الستينات وفي الوقت اللي المصريين كانوا بيحاولوا يفهموا هو الرئيس (جمال عبدالناصر) الله يرحمه عايز يعمل إيه بالضبط بفكرة القومية العربية كان الأخوة في سلاح الجو الأمريكاني بيفكروا في هبداية الموسم .. المستقبل في المعارك الجوية حيكون للإختراع الفشيخ اللي إسمه صواريخ الجو-جو أو Air-to-Air Missiles .. الفكرة إن في Dogfighting كان زمان الناس كلها مقتنعة إن عشان طيارة توقع أي طيارة تانية لازم يبقي ليها قدرة عالية علي المناورة ويكون متركب فيها مدفع رشاش فيه عدد طلقات ولا عدد الدعوات اللي إحنا كمصريين بندعيها عليه وإنت عارف هو مين كويس .. جم الأمريكان قالك لا يا جدعان ده فكر المدرسة القديمة .. الجديد بقي إننا نعمل طيارة موتورها فشيخ عشان هم تخيلوا إن عشان تعمل طيارة سريعة إنك تركب موتور جاحد ويكون متركب فيها صواريخ عشان تصطاد بيها الطيارات التانية وخليني أقولك إن الفكر ده إترجم في الطيارة الفانتوم F-4 Phantom II اللي مكنش متركب فيها مدافع رشاشة .. هوبا قامت حرب فيتنام واللي فيها دخلت الطيارة الفانتوم في مواجهة ضد الطيارات اللي كانت تحت إيد سلاح الجو الفيتنامي الشمالي واللي كانت أغلبها إن لم يكن كلها طيارات تصنيع الإتحاد السوفيتي وكلها طيارات قديمة تعتبر هي هي الطيارات اللي كوريا الشمالية أستخدمتها ضد سلاح الجو الأميريكي في الحرب الكورية سنة 1950 .. طبعاً لك أن تتخيل إن حرب فيتنام اللي قامت سنة 1965 استخدم فيها فيتنامين الشماليين طيارات كانت تعتبر حلوة لما نزلت السوق سنة 1950 فالأمريكان تخيلوا إن الطيارة الفانتوم حتمسح بكرامة الطيارات السوفيتية دي الأرض .. صح؟ .. ما ده المنطق برده.
معاك إن بحسبة الورقة والقلم إن عدد طيارات الميج MiG السوفيتية اللي كانت تحت إيد الفيتناميين الشماليين كانت بتقع بمعدل أعلي من الفانتوم بس الفرق مكانش كبير .. ده أكنك تتفرج علي ماتش بين مانشستر سيتي بجلالة قدره بيلاعب فرقة أسمنت أسيوط وتلاقي الماتش خلص 4-3 .. هو صحيح السيتي كسب بس محدش كان متوقع إنه يخش فيه 3 جوان .. الحل اللي لجأ ليه سلاح الجو الأميريكي إنه يمشي في سكتين في وقت واحد:
- السكة الأولانية إنهم بدأوا يقولوا لنفسهم إن الطيارين بتوعنا لازم يتعلموا مباديء Dogfighting علي أصولها بحيث زي ما بنقول كده يجيبوا أخر إمكانيات الطيارات الفانتوم وده حصل بإنهم بدأوا مشروع مدرسة توب جن Top Gun بحيث الهدف كان إنهم يزودوا الحاجة اللي بتتسمي Kill-to-Lose-Ratio اللي هي بمنتهي البساطة يخلوا عدد الطيارات الفانتوم اللي بتقع في الإشتباكات الجوية تكون أقل بكتير من عدد طيارات MiG اللي بتقع .. اللي هو بمعني أخر بدل ما ماتش السيتي وأسمنت أسيوط يخلص 4-3 خلوه يخلص 4-1.
- السكة الثانية إنهم بدأوا بينهم وبين نفسهم يفهموا إن تصميم الفانتوم كان فيه حاجة غلط .. معاك إن فكرة إن الطيارة المقاتلة يتركبلها موتورين مش موتور واحد حلوة .. معاك إن تكنولوجيا صواريخ الجو-جو كانت لسه مولودة وفيه شغل كتير حيتعمل عشان تتطور .. بس ده لا يمنع إنك محتاج تعمل طيارة تقيلة وقوية وموتورها فشيخ بس لازم يكون ليها قدرة عالية علي المناورة والأهم يتركبلها مدفع رشاش تدافع بيه عن نفسها ومن هنا إتولدت فكرة الطيارة F-15 Eagle من تصنيع شركة ماكدونيل دوجلاس McDonnell Douglas.
بس فضلت فيه مشكلة .. التفوق العددي .. الإتحاد السوفيتي كان بيصنع طيارات بنفس المعدل اللي إنت بتسب وتلعن فيه للاعيبة منتخب مصر قصاد إن تكلفة تصنيع الطيارة F-15 Eagle مكنتش قليلة فإنت محتاج طيارة سريعة .. ليها قدرة عالية علي المناورة .. بس الأهم إنها تكون رخيصة عشان تصنع منها مش حقول المئات إنما الألاف من النسخ لإن الطيارات دي مش بس حتطير ضمن القوات الجوية الأميريكية إنما حتخدم في سلاح الجو بتاع كتير من دول حلف شمال الأطلنطي NATO اللي حيكون هدفها هو صد أي غارة جوية كبيرة تقوم بيها القوات الجوية السوفيتية في حالة إن الفأس وقعت في الرأس والحرب العالمية الثالثة قامت .. ومش بس كده .. يتركبلها صواريخ جو-جو ومدفع رشاش .. بإختصار إنت عايز تعمل طيارة أخت F-15 بس عامله دايت .. سنة 1973 إتقدم 5 تصميمات صفصفوا علي إتنين .. الأولاني إتسمي YF-16 من تصميم شركة جينرال دايناميكس General Dynamics اللي بعد كده استحوذت عليها شركة لوكهييد مارتن Lockheed Martin اللي بتصنع الطيارة F-35 Lightening II .. الثاني إتسمي YF-17 من تصميم شركة نورثروب جرومان Northrop Grumman.
سبب رقم إتنين .. الأفكار المطرقعة في التصميم:
دي طيارة متصممة أولاً وأخيراً عشان Dogfighting وبناء عليه كل حاجة فيها إتصممت وإتبنت عشان خاطر ده:
- بص لقمرة القيادة مثلاً .. إنت حتلاحظ إن الطيارة F-16 قمرة القيادة بتاعتها غريبة شوية إنها واخدة شكل البيضة وتلاقي إن كرسي الطيار طالع لفوق شوية زي ما يكون إنت واقف في البلكونة بتاعة بيتكوا عشان تكشف الشارع كله .. نفس الفكرة .. الطيار في F-16 عايزينه يبقي كاشف سماء المعركة كلها من كرسيه وعلي فكرة دي لوحدها مش إفتكاسة جديدة لإن أغلب الطيارات المقاتلة قبل إختراع صواريخ الجو-جو كانت بتتصمم كده ويمكن أخر طيارة الأمريكان يعملوها فيها كرسي الطيار عالي كده قبل F-16 كانت الطيارة F-86 Sabre اللي كانت في الخدمة وقت الحرب الكورية سنة 1950.
- دي طيارة بموتور واحد مش موتورين زي F-15 وكمان خزان البنزين بتاعها مش كبير زي F-15 والفكرة كلها زي ما قلتلك إنك عايز تعمل طيارة ليها قدرة فشيخة علي المناورة فأي وزن زايد ملوش لازمة أو ممكن نستغني عنه شيله .. فكرة إن عندك طيارة خفيفة ومتركب ليها موتور جامد فإنت عملت حاجة بيسموها في هندسة الطيران Thrust-to-Weight-Ratio اللي هي النسبة بين قوة الدفاع للوزن .. بمعني أخر إنت عملت طيارة شبة الموتوسيكل وزنه خفيف فلما تركبله موتور عفي شوية حتلاقيه بيجري بسرعة يمكن أسرع من أجدعها عربية سيدان.
- بص لكرسي الطيار حتلاقيه مايل لورا شوية تقريباً شبه كرسي الحلاق وهو بيحلق دقنك .. إيه الفكرة ورا التصميم الغريب ده؟ .. دلوقتي الطيارة دي إتصممت عشان تستحمل حاجة بيسموها 9G يعني تسع أضعاف قوة الجاذبية الأرضية .. بمعني تخيل إن حضرتك اللي طاير بالطيارة دي وإنت مثلاً وزنك 60 كيلوجرام فإنت لما بتطير وتجيب أخر الطيارة إنت ممكن تحس إن وزنك بقي 540 كيلوجرام .. ومش إنت لوحدك .. إنت والطيارة .. كل ما رقم G زاد كل ما الإجهادات علي الطيارة وعلي الطيار بقت أعلي .. عايز أقولك مثلاً إن الطيارة الفانتوم أخرها تستحمل 7G وبعد كده جسم الطيارة حيفك من بعضه فهم لقوا إنك لما ترجع كرسي الطيار لورا شوية فإنت بكده بتخفف الضغط علي جسم الطيار.
- دي كانت أول مرة الناس تشوف فكرة بحق ربنا يعني نقلت هندسة الطيران سنين لقدام وهي تكنولوجيا Fly-by-Wire .. زمان كان فيه دراع تحكم Control Stick كانت بتتركب بين رجلين الطيار وهو اللي بيستخدمها عشان يحود بيها اللي هو بمعني أخر دراع التحكم ده هو الدريكسيون بتاع الطيارة .. زمان برده عشان الطيار يحود يمين فهو مش بس بيروح بدراع التحكم يمين إنما لازم يضبط إتجاه الدفة اللي هي البتاعة الرأسية اللي في ديل الطيارة عشان الطيارة وهي بتحود يمين متنزلش لتحت وتفقد إرتفاع فالطيار كان بإيده بيعمل كذا خطوة عشان بس يحود يمين .. تكنولوجيا Fly-by-Wire خلتك تشيل Control Stick دي خالص وتركب مكانها Joystick شبه دراع الأتاري اللي كنا بنلعب بيه زمان ومبقاش بيتحط بين رجلين الطيار إنما بقي بيتحط علي يمينه أو شماله بحيث بتركب كومبيوتر مع Joystick دي وكل اللي حضرتك مطلوب تعمله إنك تحرك Joystick يمين عشان الكومبيوتر يفهم هو إنت عايز تهبب إيه وبعد كده هو بيحركلك أي حاجة إنت محتاجها تتحرك عشان الطيارة تحود من غير تفقد إرتفاعها .. بمعني أخر فكرة Fly-by-Wire أقرب تشبيه ليها هي فكرة Power Steering في العربيات اللي هو بصباع إيدك بلفة صغيرة ممكن تخلي العربية تحود ومش محتاج تعتل بإيديك الإتنين عشان تحود زي ما كان بيحصل في العربيات اللادا أو الفيات 128 القديمة .. فكرة Fly-by-Wire بقت مستخدمة دلوقتي في كل الطيارات المقاتلة وكمان في الطيارات المدنية زي Boeing 777 أو Airbus A320.
إنت قصاد طيارة لما إتصممت كنا متخيلين إنها حتشتغل جنب F-15 Eagle بس إكتشفنا إن عشان هي متصممة إنها تستحمل 9G فجسم الطيارة يقدر كمان يستحمل يشيل صواريخ وخزان بنزين خارجي .. بقت تستحمل يتركبلها رادار عفي .. فجأة بقيت قصاد طيارة صحيح بدأت بتصور معين بس مع الوقت إكتشفنا إنها قلبت علي (كريستيانو رونالدو) بتعمل كذا حاجة وبقت شغالة لوحدها زي الفل .. الحقيقة إن حتي إسم الطيارة إتغير بسبب الظروف .. الطيارة دي لما إتصممت كانت متسمية Fighting Falcon أو الصقر المقاتل بس لما نزلت السوق في السبعينات كان فيه مسلسل خيال علمي مكسر الدنيا إسمه Battlestar Galactica كانت فيه سفينة فضائية شكلها شبه F-16 أوي إسمها Colonial Viper أو الأفعي الاستعمارية فالطيارين الأمريكان بقوا بيسموها فايبر Viperومن ساعتها وإسم الطيارة إتغير.
سبب رقم ثلاثة .. لو كان الحظ رجلاً لأخدته بالحضن وبوسته:
بس شوف كل الإبداع الهندسي ده ميمنعش إن فيه سبب تالت وهو الحظ .. يوم 20 يناير 1974 كان فيه طيار إسمه (فيل أويسترايكر Phil Oestricher) كان بيستعد إنه يطلع علي نسخة YF-16 اللي هي النسخة الأولانية خالص اللي كانت من تصميم شركة General Dynamics من قاعدة إيدوارز الجوية Edwards Air Base ضمن مراحل التجارب الأولية للطيارة .. اللي كان المفروض الأخ (فيل) يعمله كان بسيط جداً .. هو حيسوق الطيارة أكنها عربية يمشي بيها علي مدرج الإقلاع اللي الطيارين بيسموه Taxi Ride بحيث مش المطلوب منه إنه يطير بالطيارة .. يسوقها بس .. حلو .. تاني .. مش المطلوب منه إنه يطير بيها .. أساساً كان متخطط للطيارة YF-16 إنها تطير أول طلعة جوية ليها في فبراير يعني لسه شهر .. لسه (فيل) بيدوس بنزين قامت الطيارة كانت حتتقلب منه وجناحها الشمال خبط في أرضية مدرج الإقلاع .. (فيل) كان قدامه حل من إتنين .. يا ينط من الطيارة بالمقعد القاذف لإن كان واضح إن القصور الذاتي حيخلي جناح الطيارة يخبط تاني بس المرة دي خبطة حتبقي أقوي في الأسفلت وممكن الطيارة كلها تنفجر .. يا يدوس بنزين زيادة ويطير بالطيارة قبل ما تخبط تاني في أرضية الأسفلت عشان زي ما قلتلك ممكن تنفجر .. (فيل) قرر يدوس بنزين مش إنه ينقذ نفسه ويمكن عشان كده فئة طيارين الإختبارات Test Pilots دي فئة ناس بتحسها عندهم قابلية عالية للإنتحار متفهمش ليه .. المهم .. (فيل) داس بنزين والطيارة YF-16 طارت لمدة 6 دقايق في أول طلعة جوية ليها قبل شهر من المعاد اللي كان محطوطلها وده كان واحد من الأسباب اللي خلي سلاح الجو الأميريكي يختارها وميختارش YF-17 .. شوية حظ .. قرار لحظي من طيار مش خايف يموت كانوا السبب ورا ميلاد أسطورة F-16 مع إنه لو كان إختار يمشي ورا غريزة حب البقاء كان ممكن منشوفش النموذج YF-16 بيتم إختيارة وكنا حنكون قصاد تاريخ تاني خالص غير اللي إحنا عشناه.
حالياً محطوط خطة طويلة عريضة إن أسطول طيارات F-16 اللي في الخدمة سواء في سلاح الجو الأميريكي أو في دول حلف شمال الأطلنطي يتم استبداله بطيارات F-35 اللي الواحدة فيهم ثمنها بيعدي 100 مليون دولار قصاد إن الطيارة F-16 ثمنها ميجيش تلت المبلغ ده .. وشوف يا أخي .. رغم كل الدعاية اللي الأمريكان كلوا بيها دماغنا عن إن إزاي F-35 طيارة مجابتهاش ولادة وإن تكنولوجيا Stealth هي المستقبل أنا أهو وإنت أهو لما تيجي سنة 2056 يدينا ويديك طولة العمر حتكون الطيارة F-35 وصلت 50 سنة في الخدمة وأراهنك بالخمسين جنيه اللي في جيبي إن حتي وقتها حتلاقي فيه طيارات F-16 لسه في الخدمة في حتة ما من العالم.
المصادر:
- مقالة بعنوان The F-16 at 50: Why it’s still in demand نشرت في موقع هيئة الإذاعة البريطانية BBC وده لينك المقالة الأصلية:
https://www.bbc.com/future/article/20240119-the-f-16-at-50-why-its-still-in-demand
