لينك التسجيل الصوتي للمقالة علي Sound Cloud:
https://soundcloud.com/user-112011687-312727988/j5zp4qklamnd?si=619b54d3e4b24e6c86ba31743da06cf4
بص الكام جملة الجايين دول .. يوم 16 يوليو 2018 اللي فات ضمن فعاليات مؤتمر فارنبورو الجوي Farbnborough Air Show وزير الدفاع الإنجليزي (جافين وليامسون Gavin Williamson) أعلن إن بلده ومعاها فرنسا وألمانيا حيشتغلوا مع بعض علي إنتاج طيارة مقاتلة من الجيل السادس .. الوزير وقف وهو بيعلن المشروع وجنبه موديل أو ماكيت للطيارة الجديدة واللي اسمها (تيمبيست Tempest) وقال وصدره منفوخ أوي إن الطيارة دي إن شاء الله حتبدأ تخش الخدمة بداية من 2030 وإنت طالع .. هو الكلام ده لحد دلوقتي كفاية أوي إني أحطه في بوست علي Facebook وأسيب الناس تهبد وتقول رأيها براحتها في الكومنتات بس أنا كده ببقي بعمل جريمة في حقك وفي حق نفسي .. الكلام اللي إتقال ده لازم يتشرحلك لإن ده كلام صحيح قليل بس جواه حاجات كتير ويبان سهل مع إنه حقيقة مش خيال .. بداية إنك تبدأ تفهم هو فيه إيه إني أجاوب معاك علي كذا سؤال:
- إيه المعلومات المتاحة عن الطيارة تيمبيست؟
- يعني إيه طيارة جيل سادس؟
- إيه هي المشاكل اللي ممكن تواجه مشروع معقد ومنيل بستين نيلة زي ده؟
خلينا نبدأ بالسؤال الأولاني .. إيه هي المعلومات المؤكدة عن مشروع الطيارة تيمبيست؟
المشروع زي ما قلتلك داخل فيه 3 دول اللي هم إنجلترا وفرنسا وألمانيا .. المعلومة الأولانية اللي إحنا عارفينها هي إن الإتفاق إن خلال سنة 2020 الدول الثلاثة حتحط فلوس في تطوير الفكرة بتاعة الطيارة اللي هو بمنتهي البساطة يرسمولها سكيتش كده ويحطوا من الأول خالص هم ناويين يعملوا إيه؟ وإيه طموحاتهم اللي جايين يحققوها في الطيارة؟ .. اللي إحنا نعرفه إن الإنجليز مسميين المشروع فريق تيبميست Team Tempest وإنهم حطوا 2.6 مليار دولار كاش حيتصرفوا في المرحلة الأولانية .. ثاني معلومة وهي إننا مبدأياً كده عارفين مين الشركات الكبيرة اللي حتحط إيدها في المشروع .. الشركة اللي شايله المشروع واللي حيتحط اسمها علي اللوح هي BAE Systems الإنجليزية .. وزي ما أجي أكلمك عن أي عربية وتلاقي أول معلومة بقولها هي العربية دي موتورها كام سي سي فبرده لازم تعرف إن أهم معلومة عن الطيارة تيبميست إن حيبقي فيها محركين مش محرك واحد والموتور حتعمله شركة رولز رويس Rolls Royce الإنجليزية برده .. الSoftware بتاع الطيارة حتعمله شركة MBDA ودي شركة أوروبي مقرها في فرنسا .. شركة ليوناردو Leonardo الإيطالية هي اللي حتعمل الحساسات Sensors وأنظمة الملاحة الجوية Avionics.
الTimeline بتاع المشروع حيمشي كالأتي .. المرحلة الأولي من 2020 لحد 2025 ودي حتبقي عشان التصميم يخلص وتتحدد كل الطلبات أو Requirements بتاعة الطيارة بحيث المرحلة دي حتخلص زي ما قلتلك سنة 2025 بإن يتعمل نموذج أولي أو Prototype .. المرحلة الثانية من 2025 لحد 2035 وفي المرحلة دي كل مشاكل التصميم حتتحل وحتبدأ خطوط الإنتاج بتاعة الطيارة تشتغل .. المرحلة الثالثة بداية من 2035 إن طيارات تيمبيست اللي تطلع من خط الإنتاج تخش الخدمة وتبدأ تحل محل أسطول طيارات إيوروفايتر تايفوون Eurofighter Typhoon اللي في سلاح الجو البريطاني.
دلوقتي جه وقت إننا نفهم يعني إيه طيارة جيل سادس؟
عشان بس نبقي متفقين من دلوقتي .. لو أنا جيت قلتلك إن الطيارة الفلانية تبقي جيل خامس Fifth Generation فده ملوش إلا معني واحد وهو إن الطيارة دي ليها القدرة علي التخفي من الرادار أو Stealth زي الطيارتين F-22 Raptor و F-35 Lightening II .. لكن .. إني أقولك إن الطيارة الفلانية جيل سادس Sixth Generation فده معناه إن مش بس الطيارة ليها القدرة علي التخفي من الرادار إنما كمان فيها شوية أوبشنز تحسسك إني بتكلم عن طيارة من اللي بتشوفهم في سلسلة أفلام Star Wars .. الأوبشنز دي لما أرصهالك حاول أولاً إنك متتخضش وحاول متتريقش لإن الميكس بتاع الأوبشنز ده مفيش حد فكر إنه يحطه كلهم مع بعض في طيارة واحدة والله أعلم ده ينفع يتعمل أصلاً ولا لا:
- أول حاجة إن الطيارة دي Optionally-Manned يعني ينفع تطير كطيارة بدون طيار او Drone وخلال الإعلان عن المشروع إتقال صراحة إن أيوه ده معناه إن المهندسين اللي ماسكين المشروع محتاجين يشتغلوا علي فكرة إزاي يحموا الطيارة من الهاكرز؟ ودي حاجة مٌبشرة إن الناس اللي ماسكه المشروع مستوعبين هم بيقولوا إيه.
- الطيارة المحرك بتاعها بيطلع كمية كهرباء أكبر من اللي الأجهزة والحساسات اللي فيها محتاجاه وبالتالي الطاقة الكهربية الزيادة دي حيبدأوا يستخدموها في نوع جديد لانج من الأسلحة بيتسمي Directed Energy Weapons .. لو إنت متخيل إن أنا بتكلم عن الليزر اللي حيوقع الطيارات وجو Star Wars بحق وحقيقي فأحب أقولك متفرحش أوي كده .. غالباً التكنولوجيا اللي حتبقي متاحة في الطيارة تيمبيست إنك تستغل الكهرباء الزيادة إنهم يدوها لجهاز تشويش علي Sensors أو الرادارات بتاعة الطيارات المعادية .. بمعني أخر الطيارة تيمبيست حتبقي مقاتلة وكمان طيارة حرب أليكترونية.
- لأول مرة برده الطيارة دي حيتركب فيها صواريخ أسرع من الصوت Hypersonic Missiles ودي الصواريخ اللي بتطير بسرعات بتوصل 5 أضعاف سرعة الصوت وده معناه إن الصواريخ دي شبه مستحيل إن الصواريخ المضادة للصواريخ توقعها.
- أخيراً ودي إفتكاسة حلوة أوي إن الطيار حيقدر يطير معاه أسراب من الطيارات بدون طيار Drones الصغيرة اللي هي حاجة زي KUB-AUV الروسي .. طبعاً عشان طيار يقدر يسيطر علي فرح العمدة ده بيخليك تقول لنفسك ياختاااااااي معني كده إن حيخش معاكوا تكنولوجيا Artificial Intelligence و Machine Learning .. اللي هو إنت عايز تقولهم إننا لسه معرفناش نضمن تكنولوجيا العربيات اللي بتسوق نفسها Self-Driving Vehicles عشان تيجي تقولي يبقي عندنا سرب طيارات بدون طيار شغال بتكنولوجيا AI.
لحد دلوقتي جميل بس إيه اللي إحنا نعرفه برده عن الطيارة كقدرات وإمكانيات؟ .. بص هي المعلومات المتاحة مش كتير بس إنت تقدر تبني إستنتاجات بناء علي المعلومات اللي قدامنا .. يعني مثلاً .. لو بصيت علي الموديل بتاع الطيارة تيمبيست اللي وزير الدفاع الإنجليزي كان واقف جنبه وهو بيعلن بداية المشروع حتلاحظ حاجة وهي إن التصميم الخارجي علي الأقل للطيارة شبه F-22 Raptor أكتر من إنه شبه F-35 Lightening II .. عارف ده معناه إيه؟ .. معناه إن المهندسين الأوروبيين اللي شغالين علي المشروع بصوا لمشاكل مشروع الطيارة F-35 وقالوا إن إحنا مش حنقع في نفس الأخطاء وخلي بالك إن أنا عارف إن كلامي الجاي دلوقتي فيه ناس ممكن تختلف معاه وده طبيعي خصوصاً إننا بنتكلم عن تصميمات هندسية والهندسة مش القران الكريم اللي هو قواعد ثابتة نازله من عند ربنا.
تصميم الطيارة F-35 إتحط علي أساس إن أهم حاجة هي Stealth وغير كده شكليات .. الطيارة مش بتستحمل تطير Supersonic فترات طويلة .. مش مهم .. المهم إنها لما بتطير Subsonic يعني أقل من سرعة الصوت مفيش رادار بيعرف يلقطها .. الطيارة بطنها مش بتشيل صواريخ وقنابل كتير عشان حجم الطيارة مش كبير .. مش مهم .. المهم إن لما القنابل دي تتحط جوه بطن الطيارة ويتقفل عليها فالطيارة مش بتتلقط بالرادار .. الطيارة معندهاش قدرة عالية أوي علي المناورة .. مش مهم .. المهم إن الطيارة طول ما هي في Stealth Mode تقدر تصطاد الطيارات المعادية قبل ما الطيارات المعادية اللي صحيح أسرع ومناورتها أعلي تقدر تلقطها .. طب الطيارة مدي الطيران بتاعها قليل عشان زي ما قلت حجمها مش كبير وبالتالي تانك البنزين بتاعها مش كبير .. مش مهم .. المهم إن تانك البنزين جوه بطن الطيارة ومش بيخليها تفقد خاصية Stealth .. المهندسين اللي شغالين علي مشروع الطيارة تيمبيست قالوا إن إحنا حنحل كل المشاكل دي .. الطيارة فيها محركين مش محرك واحد عشان تطير Supersonic براحتها .. الطيارة كحجم أكبر بكتير من F-35 وبالتالي تقدر تشيل أسلحة أكتر وتانك البنزين بتاعها أكبر .. المساحة الزيادة في بطن الطيارة حتخلي الأوروبيين يقدروا يرصوا فيها صواريخ مينفعش تتحط في F-35 لمجرد إن مفيهاش مكان يكفي زي صواريخ ميتيور Meteor الجو- جو بعيدة المدي وصواريخ كروز SPEAR-3 .. كونها أكبر وأسرع و تصميمها الخارجي شبه F-22 Raptor فده مخلينا نقول إن قدرتها علي المناورة حتبقي علي الأقل أحسن بكتير من F-35.
أخيراً إيه المشاكل اللي ممكن تخلي مشروع زي ده يلبس في الحيط؟
أكبر غلطة ممكن تعملها في حياتك هي إنك تتجوز للسبب الغلط وإنك تصنع سلاح للسبب الغلط .. الإتنين بتدفع فيهم دم قلبك وبتاخد علي قفاك في الأخر .. فيه ناس بتقول إن مشكلة مشروع الطيارة تيبميست إنك تقدر تقول إن هي الطريقة اللي إنجلترا بتصالح بيها أوروبا علي خروجها من الإتحاد الأوروبي ضمن عملية بريكزيت Brexit وخليني أفهمك ليه أنا في رأيي إن ده غلطة .. في وسط الخناقة بتاعة بريكزيت قبل ما يٌعلن رسمياً إنفصال إنجلترا عن الإتحاد الأوروبي أعلنت فرنسا وألمانيا ممثلين في شركتي إيرباص Airbus وداسولت ديفينس Dassault Defense إنهم حيشتغلوا مع بعض علي مشروع طيارة جيل سادس برده اسمها Future Combat Air System أو FCAS إختصاراً والإعلان ده مجابش سيرة إن شركات إنجليزي حتخش في المشروع .. جميل .. تيجي تبص علي المواصفات بتاعة الطيارة FCAS وبتاعة الطيارة تيمبيست تلاقيهم متاخدين Copy و Paste من بعض .. طب ليه شغل الحريم ده؟ .. ما الدول الثلاثة يدمجوا المشروعين سوا ويبقي مشروع واحد وتخش معاهم شركة ساب Saab السويدية اللي بتصنع الطيارة Gripen ودي من الطيارات المحترمة جداً والدول الأربعة توفر علي نفسها مصاريف ملهاش لازمة وإنهم لو اشتغلوا مع بعض فممكن المشروع ينجح .. هل ده حيحصل؟ .. معرفش .. بس اللي أقدر أوعدك به إن فيه خازوق حيطلع في النص إسمه TF-X Stealth Fighter .. تطلع ايه دي كمان؟
زي ما كتير منكوا عارفين فبعد ما تركيا إستثمرت 175 مليون دولار في مشروع الطيارة F-35 علي أساس إنها حتشتري منها 120 طيارة الدنيا باظت بعد ما الكونجرس الأميريكي رفض يدي الطيارات لتركيا عشان هي إشترت منظومة الدفاع الجوي S-400 من روسيا .. اللي ناس كتير متعرفوش إن من 2013 وتركيا عايزة تعمل طيارة Stealth تصنيع محلي وسموا الطيارة دي TF-X .. بدأت تفهم أنا رايح فين أنا عارف .. في الأول الأتراك إتكلموا مع الكوريين الجنوبيين اللي هم كمان وقتها كانوا شغالين علي مشروع طيارة مقاتلة جيل خامس بس الكوريين رفضوا يشتغلوا مع الأتراك مش لسبب غير إن الكوريين كانوا عايزين يشتغلوا لوحدهم ومش عايزين شركاء .. طبيعي إنك تسأل معلش هو ليه الأتراك كانوا عايزين يعملوا طيارة جيل خامس تصنيع محلي وهم كانوا عاملين حسابهم إنهم يستلموا طيارات F-35 من أميركا؟ .. الأتراك كانوا عارفين إن F-35 مش معمولة عشان الإشتباكات الجوية و Dogfighting .. هم كانوا عارفين إنهم عايزين طيارة صحيح Stealth بس إمكانياتها شبه F-22 Raptor.
اللي حصل إن شركة TAI التركية ودي إختصار Turkish Aerospace Industries مضت عقد مع شركة BAE Systems الإنجليزية عشان تساعد تركيا تصنع الطيارة TF-X .. العقد إتمضي في يناير 2017 واللي مضاه كان الرئيس التركي (رجب طيب أردوغان) مع رئيسة وزراء إنجلترا وقتها (تيريسا ماي Theresa May) والعقد بيقول إن تركيا حتدفع 137 مليون دولار كدفعة أولية .. في فبراير 2018 أعلنت الحكومة التركية إنها خصصت 1.2 مليار دولار و 3,200 مهندس وفني عشان المشروع .. حلو طموح الأتراك .. تبص علي المواصفات بتاعة الطيارة تلاقيها هي هي بتاعة الطيارتين FCAS و Tempest .. الثلاث طيارات بمحركين .. الثلاث طيارات Stealth وتصميمهم مخليهم طيارات بتعرف تخش إشتباكات جوية .. الثلاثة تسليحهم بيكون في بطن الطيارة عشان يحافظ علي خاصية التخفي من الرادار .. الإتفاق بين TAI وبين BAE Systems إن علي سنة 2023 حيكونوا عملوا الPrototype بتاع الطيارة .. سنة 2029 خط الإنتاج بتاع تصنيع 250 طيارة TF-X حيشتغل عشان أول طيارة تطلع من المصنع تخش الخدمة سنة 2031 عشان واحدة واحدة تركيا تطلع أسطولها من 245 طيارة F-16 Fighting Falcon بره الخدمة .. هي المشكلة إن زي ما إنت عارف فرنسا متخانقة مع تركيا بسبب ليبيا فهل حنشوف إن فرنسا تساوم إنجلترا ما بين إن BAE Systems تكمل شغلها مع تركيا أو بين إن إنجلترا تنسي خالص مشروع تيمبيست بتاعها ده وفرنسا وألمانيا يكملوا لوحدهم في مشروع FCAS؟ .. أبقي بفتي لو قلتلك إن عندي إجابة.
مشكلة تانية خاصة بمشروع الطيارة Tempest وهي إن زي ما شرحتلك Timeline بتاع المشروع إنك بدأت في 2020 والمفروض إن أول طيارة تطلع من المصنع وتخش الخدمة تكون في 2035 .. هل تفتكر 15 سنة مدة كافية إنك تعمل مشروع بالتعقيد ده وبالتكاليف دي كلها؟ .. بمناسبة التكاليف .. هل تعلم إن إنجلترا ماضية عقد علي إنها حتشتري 48 طيارة F-35B من اللي بتطير رأسي عشان يحطوها علي حاملة الطائرات بتاعتهم الملكة إليزابيث HMS Queen Elizabeth؟ .. طب هل تعلم إن كان فيه كلام إن إنجلترا حتشتري 90 طيارة F-35A عشان يدوها لسلاح الجو؟ .. يعني إنت عايز تقولي إن إنجلترا معاها فلوس كتير فشخ أوي يعني عشان تشتري العدد ده من طيارات F-35 و كمان تساهم في تطوير و تصنيع الطيارة تيمبيست؟ .. أنتوا مجانين؟ .. فيه ناس حترد هو انت واخد بالك من حجم الطيارة تيمبيست؟ .. انت مش واخد بالك إن حجمها أكبر من إنها تقدر تقلع و تهبط عمودي زيها زي F-35B و بالتالي هي مينفعش تخدم علي حاملة الطائرات الملكة إليزابيث؟ .. يعني مفيش أي علاقة بين إن إنجلترا تروح تشتري طيارات F-35B و في نفس الوقت تمشي في سكة الطيارة تيمبيست.
أنا عايز أختم بإني أقولك إن فيه حاجات كتير لسه مش واضحة .. هل مشروع تيمبيست حيكمل؟ الله أعلم .. طب مشروع FCAS؟ الله أعلم برده .. طب مشروع TF-X؟ أقسملك بالله برده الله أعلم .. فيه إحتمال إن إنجلترا و ألمانيا و فرنسا و السويد يشتغلوا مع بعض و لو ده حصل فتركيا حتتخزوق تاني مرة في أقل من 3 سنين .. و فيه إحتمال إن الإنجليز ينشفوا دماغهم .. و ممكن المشاريع دي كلها تترمي في الزبالة .. الأيام اللي جايه دي حتبقي غريبة جداً.
المصادر:
- مقالة بعنوان Britain’s Tempest fighter is going to leave the F-35 far behind نشرت في مجلة The National Interest و ده لينك المقالة الأصلية:
https://nationalinterest.org/blog/reboot/britains-tempest-fighter-going-leave-f-35-far-behind-159606 - مقالة بعنوان Enter the Tempest نشرت في الموقع الرسمي لمعهد RUSI للدراسات العسكرية و ده لينك المقالة الأصلية:
https://rusi.org/publication/rusi-defence-systems/enter-tempest - مقالة بعنوان Will Germany and France develop Europe’s first stealth fighter? نشرت في مجلة The National Interest و ده لينك المقالة الأصلية:
https://nationalinterest.org/blog/the-buzz/will-germany-france-develop-europes-first-stealth-fighter-25695 - مقالة بعنوان Is Turkey getting ready to build its very own stealth fighter? نشرت في مجلة The National Interest و ده لينك المقالة الأصلية:
https://nationalinterest.org/blog/the-buzz/turkey-getting-ready-build-its-very-own-stealth-fighter-25960
