لينك التسجيل الصوتي للمقالة علي Sound Cloud:
https://soundcloud.com/user-112011687-312727988/35a-1?si=2a29e0a098c4411e8050c73a3a359976
واحدة من أكتر المواضيع اللي أنا شخصياً إتكلمت عنها كتير أوي هي الطيارة المقاتلة F-35 و رغم إن صوتي إتنبح كلام عنها إلا إن لسه برده ناس كتير لحد دلوقتي مش فاهمة إيه دي و بتعمل إيه؟ و حتي اللي عارف مين هي F-35 تقريباً ميعرفش غير شوية معلومات أغلبها هبد بس يمكن المعلومة اللي عندنا كلنا إن دي الطيارة اللي (سوري في الكلمة) فشيخة اللي إتصورت في معركة الكوبري في فيلم Live Free or Die Hard .. النهاردة ححاول إني إلي حد كبير أوصلك زتونة حوار الطيارة F-35 من غير ما أخش في تفاصيل فنية كتير ممكن تخليك تتوه وسطها .. النهاردة ححاول أجاوب علي 3 أسئلة رئيسية: إيه هي الطيارة F-35؟ .. سعر الطيارة الواحدة كام؟ .. و إيه هي مشاكلها؟
خليني أبدأ بالسؤال الأول و هو إيه هي الطيارة F-35؟
دي تبقي أغلي سلاح بيتصنع في العالم دلوقتي .. هي أكتر سلاح أميركا صرفت عليه فلوس في تاريخها .. ده السلاح اللي خلت الشركة اللي صنعتها لوكهيد مارتن Lockheed Martin تاكل الشهد .. عايزك تعرف إن 25% من صافي أرباح الشركة حالياً جاي بسبب بيع الطيارة دي .. دي طيارة مقاتلة زيها زي أي طيارة مقاتلة عادية بس الفرق إن الطيارة دي حتبقي هي العمود الفقري للقوات الجوية الأميريكية .. بلغة الكورة فالطيارة دي هي الإسماعيلي بالنسبة للأهلي من غير إسماعيلي مكنش حيبقي فيه حد يلعب في الأهلي .. بلغة الأكل فالطيارة دي هي البصل بالنسبة للطبيخ مينفعش تعمل أي حاجة من غير ما تفرم بصلاية كبيرة و تحمرها في شوية سمنة .. لو بصيت علي F-35 كأرقام حتلاقيها طيارة عادية جداً:
- أقصي سرعة ليها 1.6 ماخ يعني 1.6 ضعف سرعة الصوت قصاد إن مثلاً طيارة قديمة زي F-16 الأمريكاني أقصي سرعة ليها بتوصل 2 ماخ مستريح .. حط ده قصاد الطيارة MiG-29 Fulcrum الروسية اللي أقصي سرعة ليها 2.25 ماخ و حتلاقي نفسك بدأت تستغرب.
- أقصي مدي طيران ليها 2,200 كيلومتر .. حط ده قصاد ال4,220 كيلومتر أقصي مدي طيران لF-16 و حيبدأ إستغرابك يتحول لإندهاش.
- الF-35 بتشيل صواريخ تقليدية و كمان صواريخ نووية و دي ميزة حتلاقيها في كل طيارات الجيل الرابع زي F-16 و F-15 .. هنا فيه منكوا حيقول لنفسه الله الله الله أومال الأمريكان صارفين دم قلبهم عليها ليه مادام هي طيارة عادية و يمكن أقل من العادية كده؟
الإجابة بمنتهي البساطة هي كلمة واحدة .. Stealth أو التخفي من الرادار .. سواء F-35 أو F-22 Raptor فدي زي ما بتتسمي طيارات الجيل الخامس و دي الفرق بينها و بين طيارات الجيل الرابع هو قدرتها علي التخفي عن الرادار .. غير كده كلها شكليات .. نقطة تانية و هي ليها علاقة بالفلوس شوية و هي إن إذا كان مصر سلاح الجو اللي هو واحد من الأفرع الرئيسية للقوات المسلحة هو بس اللي عنده طيارات فالدنيا مش كده أوي بالنسبة للأمريكان .. الأمريكان عندهم سلاح جو بيسموه Air Force و ده عنده طيارات بتطير من مطارات زي عندنا في مصر بالضبط .. أميركا عندها حاملات طائرات و دي تبقي تبع قيادة القوات البحرية و حاملات الطائرات دي عليها طيارات بيطير عليها طيارين بس الطيارين دول هم كمان تبع قيادة القوات البحرية مش تبع سلاح الجو .. الأمريكان عندهم فرع تالت من الأفرع الرئيسية للقوات المسلحة بتاعتهم عنده طيارات خاصة بيه اللي هو سلاح مشاة البحرية Marine Corps .. في أميركا القوات الجوية بتطلب طيارات معينة بمواصفات معينة زي F-16 و F-15 .. القوات البحرية بتطلب طيارات بمواصفات تانية خالص زي F/A-18 Super hornet .. و كمان مشاة البحرية بيطلبوا طيارات بمواصفات تالتة تختلف خالص عن المواصفات اللي بتطلبها سواء القوات الجوية أو البحرية زي مثلاً طيارة AV-8B Harrier .. السؤال بقي .. ليه لا تعمل طيارة واحدة بتعملها شركة واحدة و بتطلع من مصنع واحد بس ليها 3 نسخ تطلع علي حسب هي رايحة لمين؟ .. ده الفكر اللي إتعملت علي أساسه F-35 و عشان كده إسم المشروع بتاعها Joint Strike Fighter يعني مشروع الطيارة المشتركة .. طيارات F-35 اللي بتتصنع بتطلع ب3 نماذج:
- النموذج الأول إسمه F-35A و دي طيارة بميكانيزم إقلاع و هبوط هو هو اللي حتلاقيه في أي طيارة مقاتلة تانية و دي أكتر نوع حيتصنع و حيتباع من ضمن النماذج الثلاثة و ده النموذج اللي حتستلمه القوات الجوية الأميريكية.
- النموذج الثاني إسمه F-35B و ده ميزته إنه مش محتاج مدرج إقلاع طويل و ليها القدرة علي الإقلاع و الهبوط بشكل عمودي زيها زي الطيارة الهليكوبتر عشان كده النموذج ده ناس بتحب توصفه Short-Takeoff-and-Vertical-Landing اللي هو إختصاراً بيقولوا عليه STVAL عشان لو شفت الإسم ده تبقي عارفه .. النموذج ده حتستلمه قوات مشاة البحرية و إتعملت عشان تحل محل إسطول طيارات AV-8B Harrier و الدول اللي طلبت إنها تشتري النموذج ده بالذات هم اليابان و بريطانيا.
- النموذج الثالث F-35C و ده النموذج اللي حيشتغل علي متن حاملات الطائرات و أغلب الطيارات اللي حتتصنع من النموذج ده حتروح لقيادة القوات البحرية الأميريكية.
صحيح أكتر شركة بيرتبط إسمها بالطيارة F-35 هي لوكهيد مارتن Lockheed Martin بس ده مش معناه إن كل حاجة في الطيارة الشركة دي هي اللي عاملاها .. حاول تتخيل إن أي طيارة مقاتلة عامله شبه Laptop .. صحيح فيه ماركة عليه سواء HP أو Sony بس الLaptop جواه مكونات عاملاها شركات تانية زي مثلاً ما Processor ممكن شركة Intel هي اللي تكون عاملاه و كارتة الشاشة تبقي من تصنيع nVidia .. الموتور بتاع F-35 عملته شركة برات أند ويتني Pratt & Whitney و دي شركة مملوكة لشركة تانية إسمها United Technologies .. الشاسيه و الأجهزة الكهربية الخاصة بالملاحة اللي بتتسمي Avionics صنعتها شركة نورثروب جرومان Northrop Grumman و هي خدت الشغلانة دي من الباطن من شركة Lockheed Martin .. أنظمة الوقود و الحفاظ علي حياة الطيار صنعتها شركة تالتة إسمها بي إيه إي سيستمز BAE Systems البريطانية .. و مش بس دول .. فيه أجزاء تانية في الطيارة إتصنعت و إتصممت علي ايد شركات أسترالية و كندية و دانمركية و إيطالية و هولندية و تركية و إسرائيلية و يابانية كمان.
هنا يجي دور السؤال الثاني .. هو بالصلاة علي النبي بعد المولد ده كله سعر الطيارة كام بقي؟
فاتورة مشروع F-35 كله علي بعضه واقف علي الأمريكان بحوالي 400 مليار دولار و ده رقم سوري في الكلمة فشيخ .. ده معناه إن سعر الطيارة F-35A الواحدة بيوصل 89.2 مليون دولار و إن كانت شركة Lockheed Martin بتقول إن السعر حينزل ل80 مليون دولار علي سنة 2020 و عليكوا خير .. شايفها صفقة حلوة إنت صح؟ أصل 90 مليون سعر حلو في طيارة تعتبر أحدث طيارة مقاتلة في العالم مش كده؟ .. خد دي بقي .. سعر الطيارة F-35B بيوصل 115.5 مليون دولار و سعر الطيارة F-35C بيوصل 107.7 مليون دولار و إن كان تاني لازم اقول إن شركة Lockheed Martin بتقول إن لما خطوط الإنتاج بتاعة الطيارات تشتغل علي أخرها فسعر الطيارة حيبدأ يقل .. طيب ده سعر الطيارة لوحده .. إيه بقي سعر الصيانة و التشغيل؟ .. أسطول طيارات F-35 كله علي بعضه حيقف علي الأمريكان ب 1.45 ترليون دولار ثمن الصيانة و التشغيل بس .. ده لو حبيت تترجمه بفلوس للطيارة الواحدة فعايزك تعرف إن الطيارة F-35A مثلاً ساعة الطيران بتاعتها بتكلف 44,000 دولار و ده في رأيي سفه و تبذير أوفر الصراحة خصوصاً لو قارنت ثمن ساعة الطيران دي بساعة الطيران بتاعة الطيارة F-16 اللي مش بتعدي 19,000 دولار .. لحد اللحظة اللي انت بتقرأ فيها المقالة دي إتمضي عقد بيع 3100 طيارة F-35 المفروض إنهم يتسلموا قبل سنة 2035 و لحد اللحظة دي اللي إتسلم منهم سواء لأميركا أو لدول تانية يدوبك 355 طيارة.
أنا عارف كويس أوي إن فيه ناس كتير مستكترة الفلوس دي كلها .. تخيل بقي صدمة الأمريكان نفسهم من بعزقة الفلوس دي .. في أكتوبر 2001 لما وزارة الدفاع الأميريكية كانت بتقارن بين مناقصتي شركتي Lockheed Martin و بوينج Boeing علي مين فيهم يكسب عقد مشروع الطيارة F-35 كان الكلام علي إن المشروع كله علي بعضه مش حيتكلف أكتر من 200 مليار دولار و إن ده معناه إن سعر الطيارة الواحدة حيتراوح ما بين 40 أو 50 مليون دولار .. دلوقتي ميزانية المشروع نطت ل400 مليار دولار و أرخص نوع من الطيارات دي وصل سعره 90 مليون دولار .. مش كده وبس .. وقتها و بفكرك إن الكلام ده في أكتوبر 2001 كانت وزارة الدفاع الأميريكية متخيلة إن الطيارة الجديدة حتخش الخدمة مع مشاة البحرية في 2010 و مع القوات الجوية في 2011 و مع القوات البحرية في 2012 .. اللي هو يخليك تقول لنفسك ليه يا زمن مسبتناش أبرياء .. اللي حصل فعلاً غير كده خالص .. الطيارة F-35B دخلت الخدمة مع مشاة البحرية في 2015 .. الطيارة F-35A دخلت الخدمة مع القوات الجوية في 2016 و الطيارة F-35C دخلت الخدمة مع القوات البحرية في 2019 .. و إن كانت دول تانية إستلمت الطيارة دي زي إسرائيل و إيطاليا و بريطانيا و الدول دي أعلنت إن الطيارات اللي هم إستلموها جاهزة تخش الخدمة .. أول بلد في العالم تستخدم F-35 في مهام قتالية كانت إسرائيل و ده حصل في مايو 2018 و وراها علي طول في سبتمبر 2018 كان فيه سرب F-35B تبع سلاح مشاة البحرية بيستخدمها في غارة جوية فوق أفغانستان.
طب هل السعر و التأخير في معاد التسليم كانت هي بس مشاكل F-35؟
الحقيقة لا لإن الناس اللي معترضه علي مشروع الطيارة دي لو إدتلهم الفرصة ممكن يملولك كتب حول مشاكل الطيارة .. يا سيدي فكك خالص من السعر و من تأخير معاد التسليم .. لنفترض إن يا سيدي الأمريكان ماشيين بمبدأ إتقل تاخد حاجة نظيفة .. المشكلة إنهم لحد دلوقتي مخدوش حاجة نظيفة .. النموذج F-35B لحد دلوقتي فيه مشاكل محدش عارف يحلها .. برنامج الأعطال اللي إنت مثلاً لو معاك عربية رحت تكشف علي مشاكلها في التوكيل فالمهندس بتاع الصيانة بيخليه يقرأ إيه هي الSensors أو الحساسات اللي فيها مشكلة تلاقي إن البرنامج ده في F-35 إسمه Automatic Logistics Information System لحد دلوقتي فيه مشاكل فأنا كمهندس صيانة بيطلع عيني و عين اللي خلفوني عشان أكشف علي Sensors بتاعة الطيارة .. قطع الغيار بتاعة الطيارة غالية و مش متوفرة ولا كأنك إشتريت عربية Ferrari و محتاس في قطع غيارها .. مشاكل لحد دلوقتي متحلتش بخصوص كرسي الإطلاق بتاع الطيار و شاشة العرض اللي في الخوذة بتاعته .. المدفع الرشاش الأساسي بتاع الطيارة لحد دلوقتي فيه مشاكل .. مش بس كده .. فيه ناس شايفة إن الطيارة دي مينفعش تخش الخدمة دلوقتي .. ليه يا عم الحاج؟ .. سنة 2015 إتعملت مناورة عشان يشوفوا قدرات F-35 علي المواجهات الجوية المباشرة أو Dogfighting و الطيارة خسرت المواجهة قصاد طيارة F-16 .. طبعاً كل ما تجيب سيرة المناورة دي لأي حد في وزارة الدفاع يقولك يا حبيبي أساساً الطيارة مش متصممه عشان تخش في Dogfight و إن مينفعش تحكم علي قدراتها في النقطة دي .. قلنا ماشي ما علينا .. في الوقت ده كانت فيه خناقة لرب السما جوه المؤسسة العسكرية الأميريكية بخصوص طيارة إسمها A-10 و دي طيارة شكلها غريب بس بتستخدم عشان تدي غطاء جوي للقوات البرية علي الأرض .. جت ناس قالت إن قدرات F-35 بتخليها تقدر تتفوق علي A-10 و تطلعها بره الخدمة خصوصاً إن طيارات A-10 دي قديمة أوي و قطع غيارها بقت مكلفة .. قالوا بسيطة تعالوا نعمل مناورة نشوف مين فيهم أحسن .. لحد دلوقتي محدش عارف نتيجة المواجهة دي إيه بس اللي أقدر أقوله ليك إن بعدها طلع قرار من وزارة الدفاع بمد فترة خدمة طيارات A-10 لمدة 10 سنين .. أظن الرسالة وصلت.
نقطة تانية و هي إن في الأول خالص أنا قلتلك إن مدي طيران F-35 ميجيش حاجة جنب مدي طيران طيارة أسطورية زي F-16 .. جم قالوا طب دلوقتي الصين و روسيا شغالين بقالهم سنين علي تطوير منظومة صواريخ بعيدة المدي بتاعتهم اللي حتستخدم ضد حاملات الطائرات و ده معناه إن عشان تستخدم حاملة طائرات لضرب الصين مثلاً فانت بقيت مضطر إنك تبعدها أكتر عن السواحل الصينية .. ده معناه إنك محتاج طيارات F-35C اللي حتشتغل من علي حاملات الطائرات يبقي ليها مدي طيران أكبر و ده مش موجود .. نقطه تالتة و هي إن فكرة Stealth كلها إن حضرتك بترص القنابل و الصواريخ اللي الطيارة بتشيلها في أوضة مقفولة جوه الشاسيه بتاع الطيارة بحيث إن مينفعش ترص القنابل و الصواريخ علي الجناحين زي ما كنت بتعمل في مقاتلات الجيل الرابع .. ده بيحطك قدام واقع جديد .. طيارة F-16 قديمة تقدر تشيل علي الأقل ضعف التسليح بتاع طيارة F-35 مستريح .. خد دي بقي .. إذا كانت شركة Boeing خسرت المناقصة قصاد شركة Lockheed Martin في 2001 بس هي دلوقتي شايفه بعنيها عيوب و مشاكل F-35 و دلوقتي بتقول إنها حتنزل نسخ معدلة من مقاتلات جيل رابع من تصنيعها زي F-15 Strike Eagle و F/A-18 Super Hornet عشان تتفادي مشاكل و عيوب F-35.
دي مش كل قصة F-35 بس تقدر تقول إن ده ملخص سريع أوي فيه زتونة الموضوع بحيث إنك لو بعد كده إتقال الموضوع قدامك يبقي عندك خلفية عن هل اللي بيتكلم ده بيقول كلام صح ولا بيهبد عليك.
المصدر:
مقالة بعنوان What is the F-35 Fighter and How Much Does it Cost? .. نشرت في مجلة Investor’s Business Daily و ده لينك المقالة الأصلية:
http://w.investors.com/research/f35-fighter/
