لينك التسجيل الصوتي علي ساوند كلاود:
https://on.soundcloud.com/7ue8bhG9xRpqHvZN8
برنامج المعونة العسكرية الأميريكية لمصر ده من المواضيع الحساسة والصعبة واللي لازم لما نيجي نفتحها نتكلم بالشوكة والسكينة .. مش بسبب الخوف .. إنما بسبب المصداقية .. أنا عشان أقدملك معلومة موثوق فيها فيما يتعلق بالقوات المسلحة المصرية فالموضوع مش سهل ومحتاج تركز أوي وإنت بتجيب المعلومات بتاعتك .. والأهم من كده كمان إنك تقيم وتفهم المعلومات دي صح .. زي ما حضرتك عارف الهبد كتير في الحتة دي بالذات .. اللي حتكلم عنه النهاردة هو محاولة لفهم البعبع اللي اسمه المعونة العسكرية الأميريكية لمصر .. تطلع إيه البتاعة دي؟ .. عشان تخرج من المقالة وإنت فاهم رأسك من رجليك فأنا محتاج أجاوب معاك علي كذا سؤال:
- إزاي برنامج المعونة العسكرية الأميريكية لمصر بدأ؟
- هو برنامج المعونة العسكرية ده بيمشي إزاي؟
- مصر استفادت إيه من البرنامج ده؟
- هل صفقات السلاح اللي بتعملها مصر مع روسيا ممكن تبوظ برنامج المعونة العسكرية لمصر أو لا؟
خلينا نبدأ مع حلاوة البدايات .. إزاي برنامج المعونة العسكرية الأميريكية لمصر بدأ؟
مبدأياً الأمريكان بيسموا برنامج المعونة العسكرية بتاعهم FMF وده إختصار Foreign Military Financing أو التمويل العسكري الأجنبي وده الاسم اللي من هنا ورايح حنسمي بيه المعونة العسكرية الأميريكية لمصر .. الحكاية بدأت سنة 1975 بعد حرب أكتوبر ما خلصت لما الرئيس الأميريكي وقتها (ريتشارد نيكسون Richard Nixon) طلب من الكونجرس إنه يدي مصر 250 مليون دولار كمنحة إقتصادية .. بعد توقيع إتفاقية كامب ديفيد سنة 1979 مصر بدأت تستلم مساعدات عسكرية من أميركا علي شكل منح لا تُرد وقانوناً وعلي الورق المنح دي لا علاقة لها ببنود إتفاقية السلام .. شوية والمنح دي بدأت تخش تحت برنامج FMF.
برنامج FMF ده بيشمل دول كتير بس علاقة البرنامج ده بمصر بدأت سنة 1979 لما مصر استلمت 1.5 مليار دولار مرة واحدة وده كان وقتها رقم خزعبلي .. سنة 1981 المبلغ ده إتخسف بيه الأرض بقي 550 مليون دولار بس لكن بداية من سنة 1987 مصر كل سنة بتاخد 1.3 مليار دولار .. عشان الناس اللي فاشلة في الحساب فالبرنامج ده من ساعة ما إتعمل لحد السنة المالية بتاعة 2019 مصر خدت منه 41 مليار دولار .. وبرده عشان تبقي في الصورة .. ال1.3 مليار دولار نصيب مصر من برنامج FMF يعتبروا 25% من ميزانية البرنامج كل سنة .. ده كده حجم البرنامج .. نيجي بقي لسببه .. قدام الناس لو سألت أي مسئول أمريكاني في وزارة الخارجية مثلاً عن هو ليه مصر بتستلم الفلوس دي كلها من أميركا كل سنة فغالباً الإجابة حتكون عشان خاطر مصر حليف استراتيجي وإنها أساس الأمن والإستقرار في المنطقة والكلام اللي بيبقي حلو جداً تكتبه في موضوع التعبير .. بس الحقيقة مش كده.
الحقيقة اللي حضرتك لازم تبقي فاهمها كويس هو إن الفلوس دي مصر بتاخدها قصاد 3 حاجات ملهمش رابع .. أول حاجة إن إحنا نفضل محترمين بنود إتفاقية السلام بينا وبين إسرائيل اللي إتمضت سنة 1979 .. ثاني حاجة إننا نفضل نسمح للقوات المسلحة الأميريكية إنها تستخدم المجال الجوي بتاعنا في إنتقالاتهم وتحركاتهم يعني عندك مثلاً في حرب الخليج الثانية الطيران الأميريكاني عدي من فوق المجال الجوي بتاعنا 200,000 مرة .. ثالث حاجة وده الأهم إننا نسمح للقوات البحرية الأميريكية إنها تحرك السفن بتاعتها في قناة السويس زي ما حصل سنة 1997 لما أميركا وقتها كانت متخانقة مع العراق وإحنا سمحنا بعبور حاملة الطائرات الأميريكية جورج واشنطن إنها تعدي من قناة السويس رغم إننا كنا عارفين إن حاملة الطائرات دي مش رايحة تعمل رحله صيد في دهب هي كانت رايحة تضرب العراق .. غير كده الأمريكان ملهمش حاجة عندنا .. غير كده مفيش أي مبرر لأميركا إنها تقطع برنامج FMF لمصر .. لا تقولي بقي حقوق إنسان ولا نشر الديموقراطية ولا إنتخابات حرة نزيهة ولا أي حاجة من الكلام اللي ميأكلش عيش ده.
دي كانت حلاوة البدايات .. تعالي بقي نتكلم عن خوازيق النهايات .. سنة 2013 بعد الإطاحة بحكم الرئيس (محمد مرسي) الله يرحمه إدارة الرئيس الأميريكي (باراك أوباما) جمدت المساعدات العسكرية لمصر .. الغريبة كانت المبرر اللي هم قالوه .. يعني المنطق بيقول إن أكيد أنتوا إخترتوا سنة 2013 بالذات عشان تجمدوا فيها المساعدات العسكرية بتاعتكوا بسبب فض إعتصام رابعة العدوية والناس اللي ماتت فيه .. لا مش ده المبرر اللي إتقال .. المبرر اللي إتقال إن والله الأسلحة اللي مصر بتاخدها من أميركا بالذات دبابات M-1 و طيارات F-16 مش مناسبة أوي لطبيعة العمليات اللي بتنفذها القوات المسلحة المصرية لمكافحة الإرهاب في سيناء .. اللي هو لا تخرج قبل أن تقول سبحان الله .. سنة 2015 (أوباما) بلغ الرئيس المصري الجديد (عبدالفتاح السيسي) إن الأسلحة اللي كانت مصر المفروض تستلمها وإتجمدت زي طيارات F-16 وصواريخ هاربون Harpoon المضادة للسفن ومعدات دبابات M-1 حترجع تاني مصر تستلمها بداية من السنة المالية 2018.
لكن .. خلي بالك بقي من اللي جاي .. أي سلاح جديد تطلبه مصر من أميركا لازم يكون بيندرج تحت واحدة من أربع فئات أميركا قالت إنها شايفة إنهم الفئات الأربعة اللي مصر محتاجاها دلوقتي … الأربع فئات هم: مكافحة الارهاب وحماية الحدود البرية وحماية الحدود البحرية وأمن سيناء .. ده معناه الأتي .. مصر مش حينفع تشتري من أميركا تاني أي حاجة تخص دبابات M-1 ولا طيارات F-16 .. السلاح الجديد اللي مصر حتشتريه لازم زي ما قلتلك يندرج تحت واحدة من الفئات الأربعة والسلاح ده حيتدفع ثمنه ضمن برنامج FMF .. أي فلوس فاضلة من نصيب مصر في برنامج FMF حتروح في صيانة الأسلحة اللي مصر خلاص إشترتها واستلمتها من أميركا في السنين اللي فاتت بما فيها دابابات M-1 وطيارات F-16.
بعد ما (دونالد ترامب) بقي الرئيس فضلت القيود المفروضة علي طبيعة السلاح اللي بتشتريه مصر من أميركا ضمن برنامج FMF واللي حطها (أوباما) .. لحد دلوقتي مصر بيتقالها لو حتشتري أي سلاح جديد لازم يبقي ضمن الفئات الأربعة .. الغريبة إن إحنا بقالنا فترة طويلة مش بنشتري سلاح جديد من أميركا .. في مايو 2019 وزارة الخارجية الأميريكية قالت في تقريرها اللي بتقدمه للكونجرس الأميريكي بخصوص برنامج FMF إن مصر طلبت إن مليار دولار من الفلوس اللي إحنا بناخدها تروح في صيانة الأسلحه القديمة اللي مصر إشترتها من أميركا .. ده الحقيقة بيخليني أسأل سؤال أنا مش عارف إجابته فخليني أسأله وخلاص .. دلوقتي أكبر تهديد للأمن القومي المصري حالياً هو الجماعات الإرهابية في سيناء .. ولإن إني أقول إن الإرهاب في سيناء هو أكبر تهديد للأمن القومي المصري دي حاجة كبيرة ومينفعش تتقال بالساهل فخليني أحطلك شوية إحصائيات توريك ده .. تنظيم داعش في شبه جزيرة سيناء لوحده أعلن مسئوليته عن أكتر من 1000 هجوم إرهابي تسببوا في استشهاد علي الأقل 627 عسكري مصري و 437 مدني من أهل سيناء .. بناء علي أرقام الحكومة المصرية فمن مايو 2018 لحد دلوقتي مات حوالي 7,097 بني أدم والناس دي ماتت بشكل أو بأخر بسبب العمليات الإرهابية في سيناء .. 95% من الناس اللي ماتت دي كلها في محافظة شمال سيناء .. أظن كل ده كفيل إنه يثبت رأيي بإن الإرهاب في سيناء هو أكبر تهديد للأمن القومي بتاعنا .. السؤال دلوقتي .. ليه إحنا مٌصرين إن فلوس FMF تروح في صيانة الأسلحة القديمة ومش في شراء أسلحة جديدة ممكن تدي لعساكرنا في سيناء أفضلية تكتيكية تخليهم يحسموا الحرب دي لصالحهم؟ .. متقفش قدام السؤال ده كتير عشان قدامنا حاجات تانية عايزين نتكلم عنها.
دلوقتي دور إنك تفهم هو برنامج المعونة ده بيمشي إزاي؟
عارف حكاية مدام (عفاف) اللي في الدور الرابع .. أهي دي بالضبط حكاية برنامج المعونة .. لما أحكيلك حكاية قصة حياة أي سلاح تطلبه مصر بيجي إزاي من برنامج FMF حتحس فعلياً إنك داخل مصلحة حكومية أو شئون الطلبة في الكلية بتخلص ورق .. لنفترض مثلاً إن سلاح الجو عايز طيارة F-16 فقيادة سلاح الجو بتبعت حاجة بيسموها Letter of Request أو LOR وده جواب طلب بيتبعت لهيئة التسليح التابعة لوزاره الدفاع .. هيئة التسليح بتبعت الجواب ده لمكتب التعاون العسكري Office of Military Cooperation أو OMC وده ملحق بالسفارة الأميريكية في القاهرة .. مكتب التعاون العسكري بيبعت الجواب لوزارة الخارجية الأميريكية وبتتشكل لجنة من ناس من وزارة الخارجية ومن حاجة اسمها وكالة تعاون الأمن الدفاعي Defense Security Cooperation Agency أو DSCA .. اللجنة دي بتوافق أو بترفض الطلب .. لنفترض إن الطلب إتوافق عليه ساعتها مكتب التعاون العسكري OMC بيبعت جواب لهيئة التسليح يبلغهم بإن الطلب إتوافق عليه وفي نفس الوقت بيبعتوا جواب لمكتب المشتريات المصري Egyptian Procurement Office وده مقره في العاصمة الأميريكية واشنطن يبلغوهم إن الطلب إتوافق عليه .. طبعاً إنت دلوقتي بتقول هييييييييييه خلصنا .. لا لسه إنت كده خلصت نص السكة .. لسه بقي النص الثاني.
الخطوة اللي بعد كده إن وكالة تعاون الأمن الدفاعي DSCA بتشوف هي الصفقة دي مين حيبقي مشترك فيها من جوه أميركا يعني مثلاً لازم القوات الجوية الأميريكية توافق ويشوفوا الطيارة دي من تصنيع مين والصواريخ اللي عليها من تصنيع مين .. كل الشركات والجهات دي بيقعدوا مع DSCA وبيكتبوا سوا جواب قبول Letter of Acceptance أو LOA وعلي حسب الصفقة لو هي كبيرة لازم الجواب ده يروح الكونجرس يتوافق عليه ودي لوحدها ليلة كبيرة .. لنفترض إن الصفقة مش محتاجة موافقة الكونجرس ساعتها جواب LOA ده بيروح لوزاره المالية الأميريكية عشان يشوفوا هي الصفقة ثمنها كام لإن ثمن الصفقة بيكون هو المكتوب في LOA وبيتخصم المبلغ ده من حساب الإحتياطي النقدي بتاع الحكومة الأميريكية والمبلغ ده بيتحول لحساب مصر في برنامج FMS اللي هو Foreign Military Sales لإن المبلغ ده هو اللي حيروح لشركات السلاح اللي حتورده لمصر ولفي بينا يا دنيا .. عارف إن الموضوع يبان روتيني بشكل مستفز بس لأسباب كتير ممكن نبقي نتكلم عنها بعدين النظام ده حلو جداً لينا.
هنا يجي معاد السؤال الثاني .. مصر استفادت ايه؟
مصر استفادت كتير الحقيقة من برنامج المعونة العسكرية الأميريكية ويمكن أكتر حاجتين خدناهم هم التسليح والتدريب ودول اللي إحنا محتاجين نتكلم عنهم بشوية تفصيل.
النقلة النوعية بحق وحقيقي لبرنامج المعونة العسكرية الأميريكية لمصر كانت سنة 2009 .. في السنة دي الأمريكان بدأوا برنامج جديد يبقي ابن عم FMF سموه FMS وده إختصار Foreign Military Sales أو مبيعات الأسلحة الأجنبية .. بص يا ريس .. في السنة دي الأمريكان عرضوا علينا إنهم يدولنا بما يعادل 9.5 مليار دولار أسلحة حيتقسموا علي 18 صفقة سلاح منفصلين .. الحسبة كانت إن من 2009 لحد دلوقتي مصر المفروض تاخد في إيدها 13 مليار دولار من برنامج FMF فالفلوس دي حيتدفع بيها فلوس السلاح اللي إحنا حنستلمه علي حس برنامج FMS والباقي حيروح في صيانتها وتسلحيها وتدريب قواتنا عليهم .. زي ما قلتلك هم المفروض 18 صفقة سلاح منفصلين بس أغلب الفلوس راحت في 3 صفقات .. صفقة سنه 2009 عشان نشتري 24 طيارة F-16 بقيمة 3.2 مليار دولار .. صفقة سنه 2011 عشان نشتري معدات للإنتاج المشترك لدبابات M1A1 Abrams بقيمة 1.3 مليار دولار .. صفقة كمان سنة 2013 لشراء 10 طيارات هليكوبتر أباتشي Apache ثمنهم مليار دولار .. دي الصفقات التقيلة لكن فيه صفقات صغيرة .. يعني مثلاً في 2018 إشترينا من الأمريكان شحنة دانات مدافع دبابات عيار 120 مليمتر دافعين فيها 200 مليون دولار .. في نفس السنة برده فيه 554 مليون دولار راحوا في عقود صيانة قطع بحرية استلمناها من أميركا في السنين اللي فاتت زي فرقاطات طراز Oliver Hazard Perry Class واللي بيسموها FFG-7 ولانشات خفر سواحل وكاسحات ألغام.
مهم برده تكون مستوعب نقطة وهي إن 1.3 مليار دولار كل سنة دول تقريباً 20% من الميزانية العسكرية المصرية .. ده معناه إن مع الوقت تسليح القوات المسلحة بتاعتنا غصب عننا بقي معتمد بشكل كبير علي أميركا .. حتي لو إنت مؤخراً حاولت تنوع من مصادر سلاحك بس برده حتفضل أميركا هي النامبر وان .. المشكلة دي إنت حتشوفها بعنيك واضحة وضوح الشمس لما تبص علي سلاحي المدرعات والجو المصريين.
تعالي نمسك سلاح المدرعات مثلاً:
- من أصل 2,480 دبابة ميدان تحت إيد سلاح المدرعات المصري فيه منهم 2,280 تصنيع أمريكاني .. منهم 1,130 دبابة من عيلة M-1 و 1,150 دبابة من طراز M-60 الأقدم شوية .. يعني 92% من دباباتنا أمريكاني .. إعتماد مصر علي الدبابات الأمريكاني عامل زي إعتماد الأهلي علي لاعيبه الإسماعيلي كده .. في حالة إنك بتسأل عن ال200 دبابة الباقيين فهم من طراز T-62 الروسي وعلي فكرة عندنا في المخازن كم محترم من دبابات T-54 الأقدم شوية كمان.
- المشكلة دي مش حتحس بيها أوي في حتة المركبات المدرعة أو APC ودي إختصار Armored Personnel Carrier .. مصر تحت إيدها 4,700 مركبة مدرعة منهم 2000 مركبة طراز M-113 الأمريكاني .. تحت إيدنا كمان 1,250 مدرعة روسي من طرازي BTR-50 و BTR-60 .. عندنا 250 مدرعة إسباني BMR-600 .. وفوقيهم كمان 300 مدرعة فهد-30 ومعاهم 650 مدرعة وليد ودول تصنيع محلي وإتعملوا علي قطع كتير ألماني من ضمنهم المحركات.
بالنسبة لسلاح الجو فبرده نسبة الطيارات الأمريكاني فيه مش قليلة:
- من أصل 375 طيارة مقاتلة في سلاح الجو المصري منهم 238 طيارة من طراز F-16 .. الباقي يا إما طيارات ميراج Mirage فرنساوي أو ميج MIG روسي .. بس برده أكتر من 63% من طياراتك المقاتلة جايين من بلد واحدة.
- الغالبية العظمي من طيارات النقل التابعة لسلاح الجو هي نسخ مختلفة من طراز C-130 الأمريكاني برده.
- سلاح الجو المصري تحت إيده 57 طيارة هليكوبتر هجومية منهم 45 طيارة أباتشي Apache وال12 الباقيين من طراز KA-52 Hokum الروسي.
قد يقول قائل إن التدريب اللي خدته القوات المسلحة المصرية علي حس FMF ده أهم من السلاح .. أصحاب الرأي ده بيقولوا إن برامج التدريب بين العساكر المصريين والأمريكان بدأت سنة 1980 بالنسخة الأولي من مناورات النجم الساطع .. خلال الفترة من 2009 لحد 2018 فيه 7,108 ضابط مصري خد تدريب علي إيد الأمريكان وأغلبيتهم زي ما قلتلك كانوا علي حس برامج FMF و FMS ويمكن أهم برنامج تدريب هو IMET ودي إختصار International Military Education and Training وده البرنامج اللي علي حسه فيه ضباط مصريين كتير بيروحوا ياخدوا دورات تدريبية في أميركا .. مصاريف برنامج IMET كل سنة بتتراوح ما بين 200,000 دولار ل2 مليون دولار بمتوسط 1.3 مليون دولار في السنة.
هنا يجي دور السؤال الأخير .. هل صفقات السلاح الي بتعملها مصر مع دول تانية أهمها روسيا ممكن تبوظ برنامج المعونة العسكرية الأميريكية لمصر؟
الحقيقة إن إجابة السؤال ده مينفعش تكون بشكل واضح وصريح يا اه يا لا لان الدنيا أعقد من كده شوية .. زي ما شرحتلك من شوية فالتسليح المصري بيعتمد بشكل ممكن تقول عليه مش صح علي مصدر واحد اللي هو أميركا .. إنت فعلياً محتاج تنوع من مصادر سلاحك بس إنت محتاج تستوعب 3 نقاط مهمين أوي في الحتة دي بالذات .. الصيانة والسعر والعقوبات.
بالنسبة لحتة الصيانة .. شراء السلاح عشان أبسطهولك عامل زي شراء العربيات في مصر .. هو إنت قبل ما تشتري عربية إيه أهم سؤال بتسأله لنفسك .. هي العربية دي قطع غيارها متوفرة؟ ولو باظت حعرف ألاقي ميكانيكي يعرف يصلحها؟ .. ده السبب إن مش كل الناس بتروح تشتري العربيات الأمريكاني وده السبب اللي بيخلي ناس كتير تقلق من شراء العربيات الألماني .. نفس الكلام عن السلاح .. إنت بتشتري سلاح وعايز معاه تتفق علي عقود الصيانة وقطع الغيار والتدريب والتطوير .. فعلي إيدك اليمين كل ما كان مصدر سلاحك واحد فالتفاوض علي الحاجات دي بيبقي أسهل .. بس علي إيدك الشمال إنك تعتمد علي مصدر واحد دايماً بيحطك قدام السيناريو الأسود بتاع طب إفرض أنتوا الإتنين إتخانقتوا في يوم من الأيام ما ساعتها ممكن الأمريكان يقولولك طب يا حلو بقي شوف مين حيصينلك السلاح اللي إنت جايبه مني.
نيجي بقي للسعر .. ميزة برنامج FMF إنك فعلياً بتاخد سلاح ومبتدفعش ثمنه .. علي رأي المثل أبو بلاش كتر منه .. بس لو جيت تبص مثلاً لصفقات السلاح اللي عملتها مصر مع فرنسا وأجهز معايا تقول أحييييه بصوت عالي شوية .. إحنا حنشتري منهم 4 سفن كورفيت Corvette .. حنشتري منهم فرقاطة .. معاهم كمان حاملتي طيارات هليكوبتر من طراز ميسترال Mistral الواحدة فيهم بتقدر تشيل 16 طيارة هليكوبتر و 13 دبابة .. فوق ده كله فيه 24 طيارة رافال Rafale .. كل ده إنت حتدفع ثمن السلاح نفسه .. حتدفع ثمن الصيانات بتاعته .. حتدفع ثمن الذخيرة والتدريب .. دي الصفقات اللي مع فرنسا بس .. لو حابب نتكلم عن السلاح اللي حنشتريه من روسيا فإحنا عايزينهم يطورولنا أسطول مقاتلات MIG-29 اللي عندنا .. عايزين نشتري منهم 46 طيارة هليكوبتر KA-52 .. عايزين منظومة الدفاع الجوي S-300 .. وفوق ده كله عايزين 20 طيارة سوخوي-35 ودي لوحدها حندفع فيها 2 مليار دولار والطيارة دي بالذات هي اللي حتوديني للنقطة الثالثة .. العقوبات.
سنة 2017 الكونجرس الأميريكي عمل قانون اسمه CAATSA ودي إختصار Countering America’s Adversaries Through Sanctions Act يعني قانون مقاومة أعداء أميركا عن طريق العقوبات والقانون ده بيقول إن مينفعش دولة تبقي حليفة لأميركا وبتستلم مساعدات عسكرية منها وفي نفس الوقت تروح تشتري سلاح روسي .. في إبريل 2019 وزير الخارجية الأميريكي (مايك بومبيو Mike Pompeo) يا عيني إتسلخ في جلسة استماع في الكونجرس بخصوص صفقة شراء طيارات سوخوي-35 دي بالذات وإتسأل هل شراء مصر للطيارات دي يعتبر خرق لقانون CAATSA وفي الجلسة الوزير قال للكونجرس إن لو الصفقة تمت فمصر حتتعرض لعقوبات إقتصادية .. في نوفمبر 2019 وزير الدفاع الأميريكي (مارك إيسبر Mark Esper) كتب جواب لوزير الدفاع المصري المشير (محمد أحمد زكي) والجواب ده ماضي عليه كمان (مايك بومبيو) عشان يطلبوا منه يلغي صفقة طيارات السوخوي-35 وإلا مصر مهددة بوقف برنامج المعونة العسكرية ليها وفعلاً الصفقة إتلغت.
أنا بس حابب أختم إني أحاول أوريك الصورة من الناحية الثانية .. إنت لحد دلوقتي شبعت أرقام وإحصائيات بس إنت محتاج دلوقتي تفهم هم الأمريكان شايفين المعونة العسكرية بتاعتهم لينا إزاي؟ .. هل المفروض إنهم يزودوها ولا الأحسن إنهم يقللوها؟ .. الأمريكان نفسهم مقسومين نصين:
- علي إيدك اليمين ناس بتقول موقع مصر الجغرافي وإلتزامها بمباديء إتفاقية السلام وإنها واقفة في ظهر أميركا وقت ما أميركا تحتاج فدول يخلوا أميركا لازم تزود من حصة مصر من برنامج FMF .. زود علي كده إن مصر ياما بعتت قوات عشان تسندهم .. إحنا بعتنا قوات لزائير (اللي هي دلوقتي الكونغو الديموقراطية) سنة 1977 .. بعتنا قوات للمغرب سنة 1979 وقت ما كانت متعاركة مع الجزائر اللي كان ماسكها الإسلاميين .. بعتنا قوات للسودان سنة 1983 عشان نحميها من التدخل العسكري الليبي فيها .. بعتنا للقوات للكويت سنة 1990 .. بعتنا قوات للبوسنة والهارسك سنة 1994 .. في كل المرات دي أميركا كانت محتاجة يبقي معاها بلد قواتها المسلحة بتتكلم عربي ومسلمة وكمان كفاءتها القتالية عالية وفي كل مرة كنا بنقول للأمريكان رقبتنا سداده.
- علي إيدك الشمال ناس بتقول هي مصر بتقدم إيه أصلاً لأميركا؟ لو علي السلام مع إسرائيل لو حصل والله أعلم هل ده ممكن يحصل بعد كده ولا لا وجت حكومة إسلامية فحتلاقيهم بيهددوا بإلغاء إتفاقية السلام .. زود علي كده إن مصر ليها مواقف سياسية غريبة زي وقوفها مع (خليفه حفتر) في ليبيا أو مع الحكومة العسكرية الإنتقالية في السودان.
وجهتين النظر ليهم أصوات مسموعة في الكونجرس ويمكن عشان كده إنت ممكن تكون أخدت بالك إن لسنين وسنين حصة مصر من FMF مزادتش .. بس في نفس الوقت إحنا لازم يبقي لينا وجهة نظر .. برنامج المعونة العسكرية الأميريكية لمصر ناس كتير شايفاه كويس ومفيد وأنا مقدر جداً وجهة النظر دي و مستوعبها بس في نفس الوقت الناس دي كل ما تفكر تنوع مصادر سلاحك وتفكر تشتري سلاح من روسيا تحسهم بيلووا دراعنا .. الأمريكان متخيلين إنهم بيمنوا علينا لما بيدونا السلاح بس هم محتاجين يفهموا إنهم بياخدوا حاجات قصاد السلاح ده .. إحنا مش بناخد السلاح ده ببلاش فياريت يتكلموا معانا بإسلوب أحسن من كده شوية.
المصادر:
- تقرير بعنوان U.S. Security Assistance to Egypt: Examining the Return of Investment نشره Center for International Policy وت
- قدر تقرأ النسخة PDF من التقرير في اللينك ده:
https://static.wixstatic.com/ugd/3ba8a1_f394aa90478b48ea8d5840fb7ff2aee7.pdf - تقرير بعنوان U.S. Security Assistance to Egypt: Military Aid and Legislative Conditionality نشره مركز أبحاث DCAF وده لينك التقرير النسخة PDF علي الينك ده:
https://www.researchgate.net/publication/330244877_US_Security_Assistance_to_Egypt_Military_Aid_and_Legislative_Conditionality
