لينك التسجيل الصوتي للمقالة علي Sound Cloud:
https://soundcloud.com/user-112011687-312727988/3hyg0a2z0axw?utm_source=clipboard&utm_medium=text&utm_campaign=social_sharing
موضوعنا النهاردة هو الرسم البياني اللي عندك في أول صورة .. الرسم البياني ده بيوريك حاجة واحدة هي إن أي مقاتلة أميريكية جديدة بتتصنع بتبقي أغلي مرتين و نص تقريباً من ثمن المقاتلة اللي بتحل محلها و بتطلع بره الخدمة و الرسم البياني ده معتمدين فيه علي قوة الدولار الأميريكي سنة 2017 عشان بس يدخلوا عامل التضخم في قيمة العملة في إعتبارهم .. عشان بس أبسطلك الموضوع أكتر .. تخيل معايا إن مثلاً عربية KIA CERATO موديل 2017 بتبقي أغلي مرتين و نص من أختها موديل 2016 و هكذا .. المشكلة إنك حاول مثلاً تتخيل إنك مسئول عن القوات الجوية المصرية حتلاقي نفسك عندك مشكلة كبيرة .. إنت عندك مصر بتمتلك أسطول محترم من مقاتلات F-16 فلما إحنا ربنا يفرجها علينا و يبقي معانا فلوس نشتري مقاتلات أميريكية أحدث و لتكن مثلاً F-15E Strike Eagle حتلاقي إن تكلفة المقاتلة الواحدة منها ضعفين ثمن المقاتلة F-16 .. هنا إنت مش حيبقي عندك خيار غير إنك بدل ما كنت ناوي تشتري 100 مقاتلة فإنت حتمشي أمورك ب50 مقاتلة بس.
الرسم البياني ده صادر عن مؤسسة علمية من اللي بيسموها في أميركا Think Tank و إتحط في تقرير إسمه Is the U.S. Military Getting Smaller or Older? يعني هل القوات المسلحة الأميريكية بتصغر في الحجم ولا بتكبر في السن؟ و عشان بس نبدأ نفهمك الرسم البياني ده بيقول إيه خلينا نمصمص فيه شوية:
- دلوقتي المقاتلة F-35A لو بصيت علي الرسم البياني حتلاقي إن تقريباً ثمن المقاتلة الواحدة 100 مليون دولار .. دلوقتي المقاتلة دي لو أخدت بالك إن فيه حرف A في أخر إسمها و دي عشان يميزوها عن باقي الموديلات بتاعة المقاتلة F-35 بإن النسخة أو الموديل ده مُصمم مخصوص للقوات الجوية الأميريكية و الأخوة في القوات الجوية الأميريكية قالوا إنهم عاملين الF-35A دي عشان تبدأ تحل محل أسطول مقاتلات F-16 عندهم .. لو بصيت علي الرسم البياني و دورت علي تكلفة المقاتلة F-16 الواحدة كام حتلاقيها ما بين 35 ل 40 مليون دولار .. شفت الفرق في السعر؟
- عندك المقاتلة F-35C و دي النسخة أو الموديل المُصمم مخصوص عشان يشتغل من علي متن حاملات الطائرات يعني اللي حيستخدم المقاتلات دي هو سلاح القوات البحرية الأميريكية .. هم أساساً قالوا إنهم حيشتروا الموديل ده من المقاتلة F-35 عشان يحل محل أسطول مقاتلات F/A-18C Hornet اللي قربت تطلع بره الخدمة .. المشكلة إن ثمن المقاتلة F-35C الواحدة 131.2 مليون دولار يعني ثمنها أعلي بنسبة تقريباً 100% من ثمن المقاتلة F/A-18C Hornet اللي المفروض جايه تحل محلها و ثمنها 65 مليون دولار بس.
- مش كده و بس .. عندك المقاتلة F-35B و دي مُصممة مخصوص عشان سلاح مشاة البحرية US Marine Corps و الموديل ده ميزته إنه فيه القدرة علي الإقلاع و الهبوط العمودي زيه زي أي طيارة هليكوبتر .. برده تلاقي إن ثمن المقاتلة F-35B الواحدة بيوصل 131.6 مليون دولار في حين إنها جايه عشان تحل محل أسطول مقاتلات AV-8B Harrier اللي ثمن الواحدة منهم 50 مليون دولار بس و تحل محل أسطول مقاتلات F/A-18 Hornet اللي ثمن الواحدة فيهم 60 مليون دولار.
- أعلي فرق في السعر بين مقاتلتين واحدة المفروض تحل محل التانية هو الفرق بين المقاتلة F-22 Raptor و اللي كان المفروض إنها تحل محل المقاتلة F-15 Eagle .. دلوقتي ثمن المقاتلة F-22 Raptor الواحدة بيوصل 250 مليون دولار في حين إن ثمن المقاتلة F-15 Eagle حوالي 65 مليون دولار.
- أقل فرق سعر بين مقاتلتين واحدة المفروض تحل محل الثانية هو الفرق بين المقاتلة F-15 Eagle برده و بين المقاتلة F-111 Aaerdvark و رغم إن المقاتلة F-15 Eagle أحدث بكتير و أقوي و جت عشان تبقي هي العمود الفقري للقوات الجوية الأميريكية إلا إن ثمنها هو كان نفس تقريباً المقاتلة F-111 Aaerdvark الأقدم منها و الإتنين تكلفة الواحدة فيهم 80 مليون دولار.
طب إحنا استفدنا ايه من كل ده؟ اللي إستفدته إنك لو ناوي تشتري مقاتلات أميريكية حديثة فإعمل حسابك إنك مش حتقدر تشتري عدد كبير منهم لإن النسخ الحديثة أغلي بكتير من النسخ الأقدم .. طب السؤال الأهم: هل العدد القليل من المقاتلات اللي حشتريه حيكفيني؟ يعني هل إمكانيات المقاتلات الحديثة عالية أوي لدرجة إني فعلاً مش محتاج أشتري عدد كبير منها؟
هنا يجي بقي دور المثل اللي بيقول اللي معهوش ميلزموش .. إنت لو ناوي تروح تشتري من أميركا مقاتلات جيل خامس اللي هي F-22 Raptor أو F-35 أقولك اه أنا موافق علي الكلام ده لإن قدراتهم أعلي ضعفين أو 3 أضعاف من قدرات المقاتلات الأقدم منهم .. فكرة إنهم عندهم خاصية Stealth اللي هي التخفي من الرادار و القدرة علي الطيران بسرعات أعلي من سرعة الصوت و إنهم بيقدروا يتبادلوا مع بعض المعلومات فده بيخلي لو عندك مقاتلتين بس F-35 يقدروا يحلوا محل سرب كامل من مقاتلات F-16 و كمان يقدروا يستمروا ما بين 10 ل20 سنة زيادة في الخدمة .. كمان فيه نقطة مهم إنك تكون عارفها و مستوعبها كويس و هي إن قدرات المقاتلات بتتحسن يوم عن يوم .. حاول تتخيل إن المقاتلات زيهم زي الموبايلات .. هل تفتكر إمكانيات iPhone 8 مش حتبقي أعلي من إمكانيات iPhone 5S مثلاً؟
خليني أديلك مثال واضح بقد إيه إمكانيات المقاتلات بتتطور يوم عن يوم:
أيام الحرب العالمية الثانية أميركا عشان تدمر مثلاً خط سكة حديد خلف خطوط العدو جوه ألمانيا النازية كانوا بيضطروا يبعتوا غارة مكونة من 100 قاذفة B-17 و إحتمال كبير القاذفات كلها رغم عددهم ولا واحدة فيهم توصل لهدفها و لو وصلوا إحتمال ولا واحدة فيهم ترمي قنبلة صح .. في الستينات لنفترض عندك نفس السيناريو فأميركا ممكن تبعت 4 مقاتلات F-4 Phantom و الأربع مقاتلات يقدروا يوصلوا للهدف و يدمروه .. في السبعينات أميركا كان ممكن تبعت مقاتلة واحدة بس F-117 و تروح تضرب الهدف و ترجع .. علي سنة 2020 و عليك خير أميركا تقدر تبعت مقاتلة واحدة F-35 و اللي ساعتها حتبقي أقدم مقاتلة في الخدمة وقتها و إحتمالات نجاحها في مهمتها حتبقي عالية أوي و علي فكرة لو بصيت علي الرسم البياني حتلاقي إن ثمن المقاتلة F-35 هو نفسه ثمن المقاتلة F-117.
اللي نقدر نلخص به المقالة دي هو إن دلوقتي العالم وصل لمرحلة إنك عشان تصنع مقاتلة جديدة فثمنها حيبقي ضعف ثمن المقاتلة الأقدم اللي إنت ناوي تطلعها بره الخدمة بس إمكانيات المقاتلة الجديدة حتبقي ضعف إمكانيات المقاتلة الأقدم .. طب إيه المشكلة في كده؟
إنت في دولة زي مصر ممكن متحسش بالمشكلة دي .. حتي لو إنت في دولة زي السعودية برده مش حتحس بالمشكلة ولا حتي لو كنت في دولة زي إسرائيل .. اللي حيحس بالمشكلة هي أميركا أو روسيا أو حتي الصين و كمان الدول الأوروبية اللي هي دول بتصنع طيارات مقاتلة لإن دلوقتي الإتجاه الجديد مع السياسات التقشفية اللي ماشيه في العالم كله إن القوات المسلحة الأميريكية حتبدأ تصغر من حجم أفرعها الرئيسية و في نفس الوقت إنتشار القوات المسلحة الأميريكية في العالم بيزيد و مهامهم مش بتقل .. القوات الجوية الأميريكية لوحدها ليها وجود في شرق أوروبا و سوريا و ليبيا و اليمن و العراق و دول البلطيق و الدول الإسكندنافية و بحر الصين الجنوبي و شبه الجزيرة الكورية و شرق البحر المتوسط و القارة الأفريقية .. فلما إنت يبقي ليك وجود في كل الأماكن دي و عندك عدد مقاتلات محدود فإنت يا إما حتهلك المقاتلات بتاعتك من كتر الإستخدام أو حتفضل تبعت في أطقم الطيران بتوعك كل يوم في مكان و برده حتهلكهم من كتر الشغل و المهمات اللي مش بتخلص يا إما حتكبر دماغك خالص و تقول لنفسك ليه أتعب نفسي و أنتشر في كل حتة في العالم.
ده يخليك تسأل طب هو موضوع تقليل حجم القوات الجوية الأميريكية ده حيكمل لحد إمتي؟ و مهم أوي إنك تسأل السؤال ده لإن أخر مرة واحد سأل نفسه السؤال ده كان (نورمان أوجستين Norman Augustine) و ده كان قائد القوات البرية الأميريكية و اللي سنة 1984 توقع إن بحلول سنة 2054 سعر المقاتلات حيعلي أوي لدرجة إن ميزانية القوات المسلحة الأميريكية كلها علي بعضها يدوبك تكفي يشتروا مقاتلة واحدة في السنة .. الرجل ده توقع إن لو ده حصل فعلاً ساعتها القوات الجوية حتاخد المقاتلة دي 3 أيام و نص في الأسبوع و القوات البحرية تاخدها ال3 أيام و نص الباقيين و فيه سنة بتبقي السنة الكبيسة و ساعتها القوات البحرية و الجوية حياخدوها 3 أيام و يوم كامل حيبقي لسلاح مشاة البحرية .. لو حاولت تطبق نفس التوقع بتاع (نورمان أوجستين) علي دلوقتي فحتلاقي إن القوات المسلحة الأميريكية بقت قدام وضع إن مثلاً المقاتلة F-35A الواحدة تقضي يومين في أوروبا و يومين في أسيا و 3 أيام في الشرق الأوسط.
أخر حاجة حتكلم فيها هو إحنا كعرب و كمصريين هل عشان نشتري سلاح حديث لازم ندفع أكتر؟ .. يعني مينفعش نوصل لمرحلة إننا نشتري سلاح بإمكانيات أعلي بنفس سعر السلاح القديم؟ .. الحاجة الوحيدة اللي بتديك الإمكانية دي هي الطائرات بدون طيار Drones لإن حجمها صغير و بالتالي أسهل في تطويرها و ده بيخلي ثمن تطويرها إلي حد كبير قليل .. الأهم إن الDrones مش محتاجة طيار مقاتل تصرف عليه ملايين في تعليمه و تدريبه و حمايته .. لو إحنا كعرب فضلنا نشتري مقاتلات أحدث كل ما أميركا تنتج حاجة و متجهناش إننا يبقي عندنا التكنولوجيا بتاعتنا في تصنيع وتطوير Drones فحالنا حيبقي زي ما (نورمان أوجستين) توقع بإننا يدوبك بفلوسنا نشتري مقاتلة واحدة كل سنة.
المصدر:
مقالة بعنوان This Chart Explains How Crazy-Expensive Fighter Jets Have Gotten نشرت في Website إسمه Popular Mechanics و ده لينك المقالة الأصلية:
http://www.popularmechanics.com/military/weapons/news/a25678/the-cost-of-new-fighters-keeps-going-up-up-up/
