لينك التسجيل الصوتي للمقالة علي Sound Cloud:
https://soundcloud.com/user-112011687-312727988/d2vgoutod5zf?si=ea4a2dc054ac4e5793004aa4fa884e90
أي حد لعب Call of Duty أو Medal of Honor عارف الإسم ده كويس أوي .. هيكلر أند كوخ Heckler & Koch .. إختصاراً بتتسمي H&K و صدقني دي مش براند هدوم زي H&M .. زي ما ألمانيا بلد معروفة في العربيات بإنها البلد اللي قدمت للعالم المرسيديس و الBMW .. فهي معروفة برده في سوق السلاح بإنها بلد شركة Heckler & Koch .. دي الشركة اللي صنعت البندقية الألية HK416 اللي إتضربت منها الطلقات اللي قتلت (أسامة بن لادن) الله يرحمه .. دي الشركة اللي صنعت البندقية الألية G3 اللي تبقي ثاني أكتر بندقية ألية إتصنعت في تاريخ البني أدمين بعد البندقية الكلاشينكوف AK-47 .. هي برده الشركة اللي عطتنا البندقية حفيدة G3 و إسمها G36 و دي تبقي البندقية اللي (توم كروز Tom Cruise) وقع بيها الطيارة بدون طيار من فوق الكوبري في فيلم Mission Impossible 3 .. بإختصار شديد شركة Heckler & Koch هي الميرسيدس بتاعة البنادق الألية .. هي أكتر شركة سلاح بتعرف تصنع بنادق ألية و مسدسات الناس كلها بتشكر فيها .. و في نفس الوقت هي الشركة اللي الألمان نفسهم بكرة الصبح تروح في ستين ألف داهية تاخدها .. علي فكرة علاقة الألمان بالشركة دي كانت زي الفل .. يعني عندك مثلاً سنة 2008 المستشارة الألمانية (أنجيلا ميركيل Angela Merkel) وافقت إن الشركة تفتح مصنع في المملكة العربية السعودية عشان السعوديين ياخدوا رخصة تصنيع بنادق G36 .. هي برده نفس (أنجيلا ميركل) اللي عايزة تجيب ضرف الشركة .. ليه كفا الله الشر؟ .. ده اللي إحنا محتاجين نفهمه سوا براحة .. عايزين سوا نفهم إزاي شركة سلاح كان بيتقال إن البنادق الألية اللي هي بتصنعها مسئولة عن موت بني أدم كل 13 دقيقة تتحول لشركة بتهتم أوي هي بتبيع سلاحها لمين؟ و شركة ضميرها ناقح عليها أوي لدرجة إنها قلبت علي جمعية خيرية زي صناع الحياة .. إزاي ده حصل؟
أول حاجة تفهمها .. الشركة دي عملها النازيين و العالم مش مخليهم ينسوا ده:
البداية كانت سنة 1811 .. وقتها كان فيه رجل إسمه (فريديريش الأول Friedrich I) بيحكم حته إسمها فويرتيمبيرج Wuerttemberg جه قالك أنا عايز أبني مصنع سلاح في أرض كانت عليها شوية غابات إسمها أوبيرن دورف Oberndorf .. جري الشريط 60 سنة كان فيه إتنين إخوات (بول ماوسر Paul Mauser) و (فيلهلم ماوسر Wilhelm Mauser) حطوا إيدهم علي المصنع و بقي بتاعهم .. المصنع ده بقي بيعمل بنادق أشهرها كانت بندقية إسمها ماوسر Mauser علي إسم الإتنين إخوات اللي عملوه .. وقت الحرب العالمية الثانية المصنع ده وصل بيه الحال إنه كان بينتج 70,000 بندقية في الشهر .. صحيح إن الإنتاج الفشيخ ده كان بيتحقق عن طريق إن المصنع كان تحت إيده أسري حرب و كتير من اليهود المعتقلين اللي بيجبروا علي إنهم يشتغلوا فيه بس مش دي القضية دلوقتي .. القضية إن ألمانيا خسرت الحرب و منطقة أوبيرن دورف كانت ضمن ألمانيا الغربية و مش بس كده .. كانت ضمن الجزء من ألمانيا الغربية اللي تحت إيد الفرنساويين.
أول ما الفرنساويين حطوا إيدهم علي المصنع قاموا فاكين خطوط الإنتاج بتاعته و شحنوها علي قطر و بعتوها علي مدينة ألساز Alsace في فرنسا .. في ليلة ما القطر ده كان حيتحرك من أوبيرن دورف فيه 3 مهندسين ألمان من اللي كانوا شغالين في المصنع اللي هم (إيدموند هيكلر Edmund Heckler) و (ثيودور كوخ Theodor Koch) و (أليكس سايدل Alex Seidel) إتسللوا للقطر و سرقوا شوية مكن زي المخرطة و الفريزة و كام طقم عدة و خبوهم تحت شوية قش في الغابة اللي جنب المصنع .. فين و فين من 1945 لحد 1955 لما حكومة ألمانيا الغربية شالت الحظر علي بيزنس تصنيع السلاح كان الإتنين (إيدموند هيكلر) و (ثيودور كوخ) راحوا المكان اللي خبوا فيه المكن و طلعوه و بدأوا يشتغلوا تحت إسم شركة هيلكر أند كوخ .. سنة 1960 كانت الشركة بتورد بنادق G3 عشان تخش الخدمة في القوات المسلحة الألمانية .. سنة 1997 بدأوا يوردوا حفيدتها G36 و القوات المسلحة الألمانية إستلمت منهم 180,000 بندقية .. شركة Heckler & Koch رغم كل التاريخ اللي أنا حكيته ده تظل شركة صغيرة .. شركة شغال فيها يدوبك 950 موظف مقرها مش واو أوي يعني في أوبيرن دورف Oberndorf اللي هي دلوقتي في ضواحي مدينة شتوتجارت.
ثاني حاجة تفهمها .. الحكومة الألمانية عندها هسهس إسمه إن G36 بايظة:
بعد الحرب العالمية الثانية ألمانيا إتقسمت نصين تقريباً عكس بعض في كل حاجة .. في السياسة و الإقتصاد و ده بشكل ما سمع معاهم في القوات المسلحة .. النص الغربي من ألمانيا و اللي كان تحت إيد الأمريكان و الإنجليز و الفرنساويين إقتصاده قدر يقف علي رجله بسرعة زي ما حكينا في مقالة المعجزة الإقتصادية الألمانية .. النص الشرقي من ألمانيا كان تحت إيد الإتحاد السوفيتي و الحقيقة اللي محتاجة تبقي في دماغك دلوقتي هي إن الروس مكانوش طايقين الألمان .. صحيح إن الروس كانوا وقتها هم اللي بيحكموا نص الألمان علي الأقل بس عشان مكانوش بيطيقوهم فده إنعكس إن سياسات الروس في ألمانيا الشرقية كانت تقدر تقول معمولة تفصيل عشان ألمانيا الشرقية متقومش تاني تقف علي رجلها .. أرجع و أقولك إن السياسة و الإقتصاد بيكون ليهم تأثير مباشر علي القوات المسلحة لأي بلد.
لما ألمانيا الغربية بقي ليها جيشها المستقل و سموه بونديز-فير Bundeswehr و اللي طبعاً إتسأل السؤال اللي أي جيش في الدنيا بيتسأله يا تري يا هل تري البندقية الألية الأساسية بتاعتكوا حتبقي إيه؟ .. الألمان عشان هي دي العقلية الألمانية يا إبراهيم قالك إحنا حنختار البندقية الألمانية G3 اللي عاملاها الشركة الألمانية Heckler & Koch و الكلام ده كان سنة 1961 .. لو بتسأل نفسك إشمعني البندقية دي بالذات؟ فده راجع لسببين: السبب الأول إن البندقية دي تصميمها إتبني علي تصميم بندقية إسباني إسمها CETME و البندقية دي تقدر تقول نسخة طبق الأصل من البندقية الألمانية النازية STuG 45 .. بمعني أخر .. ألمانيا الغربية حبت تبني بندقيتها الأساسية علي تصميم بندقية إتصنعت في الحقبة النازية بس عشان ده حيبقي شكله وحش قدام الناس فقالك يا جماعة إحنا ناقلين تصميمها من بندقية إسباني يعني Not a Big Deal .. السبب الثاني هو إن فعلاً البندقية G3 كانت بندقية فشيخة .. بندقية مش بتعطل .. بندقية بتستخدم طلقة عيار 7.62 مليمتر و دي طلقة تقيلة .. بندقية خزنتها فيها 20 طلقة بس و يمكن ده كان أهم عيب فيها.
ألمانيا الشرقية علي الناحية الثانية قواتها المسلحة إتسمت جيش الشعب الوطني Nationale Volksarmee .. حتلاحظ إن سواء الألمان الشرقيين أو الغربيين بشكل أو بأخر كانوا متأثرين أوي بالتراث النازي .. يعني فكرة إنك تسمي قواتك المسلحة جيش الشعب زي ما الألمان سموا شركة العربيات بتاعتهم عربية الشعب Volkswagen اللي دلوقتي بقت شركة فولكسفاجين العملاقة .. المهم .. القوات المسلحة بتاعة ألمانيا الشرقية لما إتسألت هي بالصلاة علي النبي البندقية الألية الأساسية بتاعتكوا حتبقي إيه كان رد الروس إن معلش يعني معندناش بنات للجواز .. اللي هو مفيش حاجة إسمها ألمانيا تصنع بندقية ألية خاصة بيها زي G3 بتاعة ألمانيا الغربية .. أنتوا تشيلوا نسخة تصنيع محلي من بندقية كلاشينكوف إتسمت ماشينين-بيستولي كلاشينكوف Maschinenpistole Kalashnikov و إختصاراً بتتسمي MPi-K .. الصراحة إن الروس كلوا الشهد من البندقية دي .. مصانع السلاح في ألمانيا الشرقية صنعت ما بين 1.5-2 مليون بندقية تقريباً كلهم إتصدروا.
سنة 1990 لما ألمانيا إتوحدت و نفس السؤال إتسأل للقوات المسلحة الألمانية الجديدة اللي إحتفظت بإسم بونديز-فير Bundeswehr .. يا تري البندقية الألية الأساسية بتاعتكوا حتبقي إيه؟ و من هنا إتولدت بندقية G36 من تصنيع الشركة اللي زهقت من كتابة إسمها Heckler & Koch و اللي دخلت الخدمة في القوات المسلحة الألمانية سنة 1995 .. علي الورق البندقية دي كانت فشيخة .. علي الورق البندقية دي تعتبر معجزة هندسية ألمانية بتتحط في نفس البرواز جنب العربية Mercedes SLR McLaren مثلاً أو العربية BMW M5:
- هي كانت بتستخدم طلقة عيار 5.56 مليمتر و ده كان نفس عيار طلقات البنادق الألية اللي بتستخدمها الدول الأعضاء في حلف شمال الأطلسي NATO زي مثلاً البنادق الأمريكاني M-16 و M-4 Carbine.
- البندقية كانت بتستخدم خزنة ذخيرة فيها 30 طلقة و بكده هي حلت مشكلة البندقية G3 اللي كانت خزنتها بتشيل عشرين طلقة بس.
- البندقية فيها مقبض تشيلها منه زي شنطة السفر .. فيه ناس بتشوف دي أوبشن زيادة مع إني مش فاهم ليه؟ .. المقبض ده فيه 3 أماكن تحط عليه عدسات تكبير و شعاع ليز و شوية إكسسوارات لطيفة.
- فوهة البندقية متركب فيها حاجة إسمها Muzzle Flash Hider عشان بليل في الظلمة الطلقات و هي خارجة متطلعش نار تفضح مكان العسكري اللي بيضرب نار.
- البندقية الماسورة بتاعتها طولها كان حوالي 100 سنتيمتر .. وزنها حوالي 3.5 كيلوجرام .. بتضرب 750 طلقة في الدقيقة .. الطلقة بتطلع من البندقية بسرعة 850 متر في الثانية.
العساكر الألمان كانوا طايرين بالبندقية .. هي بصراحة كان شكلها شيك أوي و سيكسي و محدش كان بيشتكي منها .. هو أساساً القوات المسلحة الألمانية مكانتش بتتسحل في أي حتة .. الدستور بيمنعها إنها تطلع بره بلدها .. الألمان من بعد الحرب العالمية الثانية و هم الأتيتود بتاعهم تجاه العالم هو إياكش تولعوا كلكوا بجاز لحد ما حصلت هجمات 11 سبتمبر 2001 .. إنت مش متخيل إزاي اليوم ده غيّر حاجات كتير في الدنيا .. بالنسبة للألمان مثلاً اليوم ده هو اللي قلب سياساتهم من إياكش تولعوا كلكوا بجاز لمرحلة جديدة من هو لم علينا عبيدك يا رب .. الألمان كانوا في ديل الأمريكان .. الأمريكان يخشوا أفغانستان و الألمان معاهم .. يروحوا العراق و الألمان في ظهرهم .. طبعاً العساكر الألمان بيروحوا و معاهم البندقية اللي كانوا طايرين بيها في السما و دي كانت بداية المشكلة.
في إبريل 2010 حصلت حادثة محدش كان عامل حسابه عليها لما 32 جندي مظلات ألماني لقوا نفسهم في كمين عمله ليهم عناصر تنظيم طالبان في أفغانستان .. بعد معركة إستمرت أكتر من 9 ساعات إتقتل فيها 3 عساكر طلع قرار من قائد الوحدة بالإنسحاب .. إتقال وقتها إن سبب قرار الإنسحاب إن كذا بندقية G36 من اللي كانت مع العساكر الألمان من كتر ضرب النار سخنت و مبقتش بتضرب .. الحادثة دي حصلت إمتي؟ .. إبريل 2010 .. فين و فين في فبراير 2015 بيطلع تقرير من وزارة الدفاع الألمانية ممضي من وزيرة الدفاع (أورسولا فون دير ليين Ursula von der Leyen) بإن بندقية G36 فيها مشكلة حقيقية و هي إن لو أنا عسكري و فضلت دايس علي الزناد بضرب نار أوتوماتيك و فضيت خزنة كاملة قمت شايلها و مركب خزنة تانية و فضلت برده دايس علي الزناد و فضيت الخزنة الثانية .. يعني أنا في أقل من نص دقيقة ضربت 60 طلقة فماسورة البندقية بتسخن لدرجة إنها بتتعوج .. لما ده بيحصل فأنا لو بضرب نار علي هدف بعيد عني مسافة 218 متر فبلاقي إن الطلقة بتحدف 50 سنتيمتر عن النشان بتاعي .. لو الهدف اللي بضربه بعد شوية بقي علي بعد 546 متر فالطلقة لما بتطلع بتحدف 52 سنتميتر .. نسبة الError دي مقبولة و تعدي لو إنت بتتكلم عن مدفع رشاش متعدد لكن بندقية ألية في إيد عناصر قوات خاصة مثلاً فالكلام ده مش مقبول.
وزارة الدفاع الألمانية رفعت قضية علي الشركة بس القاضي طلع الشركة براءة .. ليه بقي؟ .. القاضي قالك إن شركة Heckler & Koch مش هي المسئولة عن عيوب G36 عشان المواصفات أو Specifications اللي طلبتها وزارة الدفاع و اللي بناء عليها البندقية إتعملت متقالش فيها إن البندقية مطلوب منها إنها تستحمل ضرب نار متواصل .. متنساش إن وقتها القوات المسلحة الألمانية كانت ماشية بسياسة البط يقوم يغطس و يعوم و هات يا لعب .. دي مكانتش قوات مسلحة ليها عساكر في كذا حتة في العالم و بتشارك في مهام قتالية .. و عشان تعرف برده كمهندس أهمية Specs عشان الغلطات فيها بتودي في داهية .. بعد قرار المحكمة وزيرة الدفاع (أورسولا فون دير ليين) قالت في سبتمبر 2015 إن البندقية G36 ملهاش مكان في مستقبل القوات المسلحة الألمانية و إن من دلوقتي لحد سنة 2019 البندقية G36 حتبدأ تخرج بره الخدمة واحدة واحدة عشان إن شاء الله سنة 2020 فيه بندقية جديدة حتبقي هي البندقية الألية الأساسية للعساكر الألمان .. فيه بندقيتين كانوا بينافسوا بعض علي الشغلانة دي .. بندقية HK433 من تصنيع Heckler & Koch و بندقية MK556 من تصنيع شركة هاينيلHaenel الألمانية برده.
ثالث حاجة إن أزمة G36 دي مجرد تلاكيك .. المشكلة في الفضيحة اللي حصلت في المكسيك:
خلينا نسأل سؤال يبان غريب أوي .. هو لو الحكومة الألمانية قالت إن ممنوع بأي شكل من الأشكال إن شركات السلاح الألمانية تبيع سلاح لأربع ولايات مكسيكية منهم 3 ولايات معروفين بإنهم الباطنية بتاعة المكسيك اللي هم تشيباس Chipas و تيجوانا Chihuahua و جيريرو Guerrero .. الفكرة إن المكسيك زيها زي أميركا دولة فيدرالية فكل ولاية ماشية بدماغها .. الفكرة برده إن قرار الحكومة ده طلع بسبب الفساد اللي بقي في كل حتة في الولايات الأربعة دول .. رغم كل ده يصحي العالم علي مصيية حصلت في المكسيك يوم 26 سبتمبر 2014 لما ضباط بوليس فاسدين و معاهم تجار مخدرات هجموا علي جامعة مدينة إيجوالا Iguala اللي جوه ولاية جريريو Guerrero و قتلوا 6 بني أدمين و خطفوا 43 طالب من جوه الحرم الجامعي .. الصحفيين اللي غطوا الجريمة دي شافوا صور كاميرات المراقبة و لقوا إن 6 من الخاطفين كانوا شايلين بنادق G36 .. بشوية تدوير كمان الصحفيين عرفوا يوصلوا إن البنادق دي كانت ضمن شحنة 1000 بندقية G36 طلعت من ألمانيا في 2007 بعد ما خدت موافقة من الحكومة الألمانية يوم 21 سبتمبر 2007 .. بس خلي بالك .. الحكومة الألمانية وافقت علي إن البنادق دي تروح لوحدات البوليس المكسيكي في أربع ولايات اللي هم دورانجو Durango و نويفا ليون Nueva Leon و سينورا Sonora و أجواسكالينتيس Aguascalientes .. ده معناه عشان أنا عارف إنك تهت مني إن ضباط البوليس الفاسدين اللي إقتحموا الكلية كانوا بيخدموا في ولاية مكسيكية عليها حظر إنها تستلم بنادق تصنيع ألماني .. السؤال دلوقتي .. إزاي بنادق خدت موافقة إنها تروح ولايات معليهاش حظر تروح لعناصر بوليس و تجار مخدرات في ولاية عليها حظر؟ لا و كمان تستخدم في جريمة إختطاف زي دي؟
الأنيل إن الشركة طلعت بعدها قالت إنها مشت إتنين موظفين كبار فيها لإنهم هم اللي باعوا البنادق دي لعصابات المخدرات المكسيكية من غير علم حد يبقي مين الغلطان؟ .. تاني .. الحكومة الألمانية رفعت قضية علي الشركة و اللي لبسها كان الإتنين موظفين اللي الشركة مشتهم .. قرار المحكمة جاب إحباط للألمان ولا الإحباط اللي جالنا لما شفنا شكل العساس في مسلسل ما وراء الطبيعة .. المتهم الأولاني خد سنة و عشر شهور حبس مع إيقاف التنفيذ و غرامة 80,000 يورو .. المتهم الثاني إتحبس فعلاً سنة و خمس شهور بس طلع في مقابل إنه يقضي 250 ساعة من الخدمة المجتمعية .. الشركة نفسها إتحكم عليها بغرامة 4.2 مليون دولار.
زي ما قلتلك إن أحياناً حادثة أو قرار أو حاجة بتحصل في الدنيا فبتكون هي السبب إن حاجات كتير بتتغير وراها .. ده حصل بعد هجمات 11 سبتمبر مثلاً .. لولا إن بسبب الهجمات دي ألمانيا بعتت قوات لأفغانستان مكنش حد سمع خبر عن عيوب البندقية G36 .. برده فضيحة المكسيك خلت الشركة تمشي في سكة تانية خالص محصلش قبل كده في التاريخ إن شركة سلاح مشيت فيها .. بداية من مارس 2016 و الشركة بقت ماشية علي مبدأ إن إحنا مش حنبيع سلاح لأي بلد إلا إذا كانت البلد دي بتحقق 3 شروط:
- إنها تكون عضو في حلف شمال الأطلسي NATO أو دولة حليفة ليه زي مثلاً اليابان أو أستراليا أو نيوزيلاندا أو سويسرا.
- إنها تكون دولة جايبة سكور عالي في مؤشر الشفافية العالمية ضد الفساد Transparency International’s Corruption Index
- إنها تكون دولة جايبة سكور عالي في مؤشر الديموقراطية اللي بتحطة وحدة المخابرات اللي جوه مؤسسة Economist الإخبارية.
أي دولة بتحقق الشروط دي بتتسمي دولة خضرا أو Green Country و دي الدول اللي شركة Heckler & Koch حتبيعلها سلاح .. إذا كانت زمان الحكومة الألمانية كانت بتحاول تفضح الشركة علي إنها شغالة في السوق السودا بسبب فضيحة المكسيك فمن بعد ما الشركة طلعت أعلنت إستراتيجيتها الجديدة فالحكومة الألمانية هي اللي بقي شكلها وحش .. بسبب حركة كش ملك اللي عملتها الشركة طلع قرار من الحكومة الألمانية إنها هي كمان مش حتبيع سلاح لا للمملكة العربية السعودية ولا مصر ولا الإمارات العربية المتحدة و لا سلطنة عمان و لا حتي لتركيا اللي هي عضوة في NATO ولا لأي دولة أفريقية .. تحس إن الشركة و الحكومة بيعلوا علي بعض و ده اللي حيويدينا لأخر حلقة في المسلسل المسلي ده بإن زي ما قلتلك السنة دي اللي هي 2020 المفروض إن وزارة الدفاع الألمانية تختار مين هي البندقية اللي حتحيل محل G36 كبندقية أساسية للعساكر الألمان؟
عايزك تعرف إن العقد ده كان حيبقي فشيخ .. إنت بتتكلم عن عقد بقيمة 250 مليون يورو لتوريد 120,000 بندقية .. الخيارات اللي كانوا قدام الحكومة الألمانية كانوا بندقيتين من تصنيع Heckler & Koch اللي هم HK416 و HK433 قصاد بندقية إسمها MK556 من تصنيع شركة هاينيل Haenel .. .. حزر فزر إختاروا مين؟ .. إختاروا البندقية اللي من تصنيع شركة هاينيل Haenel .. ده رغم إن مثلاً البندقية HK416 هي البندقية الرسمية لسلاح مشاة البحرية الأميريكية US Marines .. الحكومة الألمانية كانت متخيلة إنها بكده بتضرب مثل لإزاي هي حكومة بتخاف ربنا و حكومة ماشية علي السراط المستقيم لحد ما إتعرفت معلومة إن شركة Haenel اللي صحيح ألمانية و مقرها في ألمانيا إلا إن أكبر مساهم فيها هو صندوق الثروة السيادية لأبوظبي EDGE Group .. حالياً شركة Heckler & Koch في وضع ما يعلم بيه إلا ربنا .. الشركة حالياً مديونة بحوالي 237 مليون يورو .. صحيح هي لسه واقفة علي رجلها بسبب شغلها في السوق الأمريكاني سواء من بيع السلاح للمدنيين أو القوات المسلحة الأميريكية بس إنها تخسر العقد بتاع القوات المسلحة الألمانية ده كان ضربة كبيرة ليهم .. دي كانت قصة شركة Heckler & Koch و اللي أكيد لسه مخلصتش و حيبقي ليها تكملات بعد كده في أحداثها و حنبقي نغطيها إن شاء الله.
المصادر:
- مقالة بعنوان Germany turns on its top gunmaker نشرت علي موقع وكالة رويترز و ده لينك المقالة الأصلية:
https://www.reuters.com/article/us-germany-guns-insight/germany-turns-on-its-top-gunmaker-idUSKBN0NX1DM20150512
- مقالة بعنوان Heckler & Koch’s VP9: Better than a Glock or Sig Sauer? نشرت في مجلة The National Interest و ده لينك المقالة الأصلية:
https://nationalinterest.org/blog/reboot/heckler-koch%E2%80%99s-vp9-better-glock-or-sig-sauer-171341 - مقالة بعنوان The Heckler & Koch G36 rifle: Wonder weapon or paper tiger? نشرت في مجلة The National Interest و ده لينك المقالة الأصلية:
https://nationalinterest.org/blog/buzz/heckler-and-koch-g36-rifle-wonder-weapon-or-paper-tiger-33366 - مقالة بعنوان Heckler & Koch quietly becomes world’s most ethical gunmaker نشرت علي موقع وكالة Deutsche Welle و ده لينك المقالة الأصلية:
https://www.dw.com/en/heckler-koch-quietly-becomes-worlds-most-ethical-gunmaker/a-40316221 - مقالة بعنوان Heckler & Koch fined for illegal gun sales to Mexico نشرت علي موقع هيئه الإذاعة البريطانية BBC و ده لينك المقالة الأصلية:
https://www.bbc.com/news/world-europe-47316445 - مقالة بعنوان Case 43: Where did the German rifles come from? نشرت في موقع جريدة SWR الألمانية و ده لينك المقالة الأصلية:
https://www.swr.de/toedliche-exporte/mexiko/g-36-gewehre-und-der-fall-ayotzinapa/-/id=15907640/did=16206980/nid=15907640/sdr4np/index.html - مقالة بعنوان Germany’s Heckler & Koch losses out in bid for Bundeswehr assault rifle نشرت في موقع وكالة Deutsche Welle و ده لينك المقالة الأصلية:
https://www.dw.com/en/germanys-heckler-koch-loses-out-in-bid-for-bundeswehr-assault-rifle/a-54936432
