صناديق الثروة السيادية وجولمان ساكس .. تعرف عصابة حماده وتوتو؟

لينك التسجيل الصوتي علي ساوند كلاود:
https://on.soundcloud.com/AL331

فيه كلمات معينة لما بتسمعها قلبك بينقبض .. بتحس إن فيه وراها مصيبة .. ومن ضمن الكلمات دي كلمة صندوق أو كلمة ضريبة .. اللي حتكلم عنه النهاردة هو الحاجة اللي إنت كل شوية تسمعها بتطلع من بق الرئيس (عبدالفتاح السيسي) وهي صندوق تحيا مصر .. هو بالصلاة علي النبي يعني إيه صندوق تحيا مصر ده؟ .. مهم تكون فاهم إن لما اسم دولة يتحط جنبه كلمة صندوق أو Fund فإنت بتتكلم عن حاجة في الإقتصاد اسمها صندوق ثروة سيادية Sovereign Wealth Fund .. يطلع إيه البتاع ده؟ .. خليني مجازاً أسميه صندوق تحيا المزاريطة عشان الناس بس الحساسة شوية من حتة تحيا مصر 3 مرات وكده.

تخيل معايا إن فيه دولة إسمها مزاريطة جابت كل تحويشة العمر بتاعتها وحطتها في شوال .. غالباً الصناديق من النوع ده بتتعمل لما تبقي دولة عندها مصدر طبيعي واحد ربنا أداهولها وإقتصادها كله معتمد عليه زي البترول مثلاً .. فلو المزاريطة دي دولة ربنا كرمها ببترول كتير وهي عايشة علي إستخراج البترول وتصديره فالمنطق بيقول إن حكومة المزاريطة مش عايزه يجي اليوم اللي سعر بيع برميل النفط يتخسف به الأرض وساعتها البلد كلها تفلس .. الحل إن حكومة المزاريطة بتجيب الفلوس الكتير زوربيح اللي هم جابوها من سنين بيع البترول يحطوها في صندوق تحيا المزاريطة بحيث يستثمروا الفلوس دي في مشروعات ملهاش علاقة بالبترول .. حاول تتخيل إن Sovereign Wealth Funds أو صناديق الثروة السيادية دي عامله زي شركات تشغيل الأموال بتاعة (الريان) و(أشرف السعد) بس علي مستوي أضخم وأكبر .. فيه ناس لسه مش فاهمه أوي صندوق تحيا مزاريطة بيشتغل إزاي فخليني أدخلك أكتر في الغويط.

سنة 2008 لما الأزمة المالية العالمية ضربت العالم بنوك أميركا صحيت الصبح لقيت نفسها مفلسة .. قطاع البنوك في أميركا كله كان حيروح في ستين داهية لولا Sovereign Wealth Funds بتاع دول تانية .. عندك مثلاً صندوق الثروة السيادية بتاع إمارة أبوظبي اللي حط من فلوسه 7.5 مليار دولار في بنك CitiBank الأميريكي عشان يبقي أكبر حامل للأسهم في البنك .. صندوق الثروة السيادية الصيني حط 5.6 مليار دولار في بنك مورجان ستانلي Morgan Stanley Bank وكمان حطوا 3 مليار دولار في بنك مجموعة بلاكستون Blackstone Group Bank .. من 2008 لحد دلوقتي بقي عندك علي مستوي العالم 78 صندوق من بتوع الثروة السيادية والغريبة إن 30% من الصناديق دي إتعمل في أخر 10 سنين بس .. عشان بس أحطك في الصورة .. سنة 2007 الصناديق دي كلها علي بعضها شاكب راكب كان محطوط فيها 3 ترليون دولار .. جري الشريط ل2019 والرقم نط ل8 ترليون دولار ودي فلوس كتير بغباوة وإتصرفت علي شركات كتير أغلبها جوه أميركا .. الفلوس دي إتحطت في حاجات كتير من أول إستثمارات في العربية اللي بالكهربا Model 3 بتاعة شركة Tesla لحد ما صندوق الثروة السيادية لأبوظبي إشتري حق إنتفاع عدادات الركنة بتاعة شوارع مدينة شيكاغو الأميريكية لمدة 57 سنة.

والأن مع فقرة مين أكبر صندوق؟ .. أكبر صندوق ثروة سيادية طلع بتاع دولة النرويج واللي قيمته وصلت ترليون دولار .. الصندوق النرويجي ده له فلوس في أكتر من 2000 شركة علي مستوي العالم وكل سنة الفلوس دي أرباحها بتتلم كلها وتتوزع علي حسابات البنوك بتاعة أهل البلد .. بالورقة والقلم أي مواطن نرويجي هو مليونير .. الناس دي خدت فكرة الجمعيات اللي بنعملها بينا وطبقتها علي مستوي البلد كلها .. طب دي النرويج بلد أوروبية أهلها طيبين مبياكلوش من مال اليتيم .. المشكلة في الباقي .. أغلب صناديق الثروة السيادية مملوكة لدول أعضاء في منظمة الدول المصدرة للبترول اللي إسمهم الأوبيك OPEC  زي روسيا والسعودية وقطر والجزائر والكويت وأنجولا وسلطنة عمان وليبيا والإمارات وبسم الله ما شاء الله سمعة الدول دي سابقاها.

تعالي خد صندوق الإستثمارات العامة السعودي مثلاً حتلاقي إنه تحت سيطرة (محمد بن سلمان) .. صندوق الثروة السيادي التركي حتلاقيه تحت سيطرة ( رجب طيب أردوغان) شخصياً ونفس الكلام ينطبق علي روسيا .. السؤال دلوقتي: هل إنت تثق في ضمير أي واحد من الثلاثة سواء (بن سلمان) أو (أردوغان) أو (بوتين)؟  أنا شخصياً مثقش إني أسيب معاهم كيس شيبسي أبو خمسة جنيه .. النرويج عامله لما يكون جوزك ماشي جنب الحيط لدرجة إنه مش حاطط Password علي موبايله بس أي واحد من الثلاثة شبه إنك تكوني متجوزة واحد يمشي معاكي بموبايل بس هو معاه موبايل تاني خالص إنتي متعرفيش عنه حاجة .. بس مش هي دي المشكلة .. الصناديق دي فيها فلوس وفلوس كتير كمان والفلوس دي هم محتاجه اللي يشغلها وده اللي حيوديني للكلام علي البنوك وهنا الكلام حيحلو.

عشان أنا بنك أروح لصندوق ثروة سيادية لأي دولة فأنا بلعب عليك بحاجتين: أول حاجة إني أزغلل عنيك بخبراتي وأعرض عليك بورتفوليو جاحد يحسسك إني أعرف أجيبلك الفلوس من الهوا .. ثاني حاجة هي اللعب بالسمعة وخليني أخد الحاجتين دول بشوية تفصيل لإن مهم اوي إنك تفهم هي اللعبة دي بتتلعب إزاي؟

إزاي البنوك بتلعب لعبة الخبرة؟

حضرب ليك كذا مثال بالحكاية دي مش مثال واحد عشان تفهمه أوي .. ليبيا مثلاً .. سنة 2006 الحكومة الليبية أيام الله يرحمه (معمر القذافي) عملت صندوق ثروة سيادية حطوا فيه 60 مليار دولار وكانوا عايزين يشغلوهم .. جه (الريان) بتاع أميركا اللي هو بنك جولدمان ساكس وقالهم تشغيل الفلوس دي عليا .. هوبا الليبيين صحيوا علي إنهم خسروا 1.6 مليار دولار وفوق ده كله إضطروا يدفعوا للبنك 200 مليون دولار مصاريف الأتعاب .. الفكرة إن الناس بتوع جولدمان ساكس بياخدو فلوسك اللي إنت عايز تشغلها في أي مشروع يجيبلك فلوس وخلاص ويحطوها كإستثمارات في مشاريع نسبة المخاطرة فيها عالية أوي ولو خسرت فلوسك يقولك سوري هو السوق كده .. دي نفس الفكرة اللي كل البنوك بره بتلعب بيها .. لما الليبيين إكتشفوا الحقيقة المسئول الليبي اللي كان من قرايب (القذافي) خد بعضه وراح لمكتب جولدمان ساكس في العاصمة طرابلس إتخانق معاهم وشتمهم وطلعهم بره البلد .. لما ليبيا رفعت قضية دولية ضد البنك القضية إترفضت .. تدري ليش؟ .. عشان حكم المحكمة إتبني علي الحقيقة المرة بتاعة القانون لا يحمي المغفلين .. إنت كان المفروض تفضل فوق دماغ البنك وهو بيشغل فلوسك زي ما إنت بتقف فوق دماغ الصنايعي اللي بيوضبلك شقتك وإلا حتلاقيه مش بيخلص شغل وعمال ياخد منك فلوس ولو بيخلص حتلاقيه مش بيشتغل بما يرضي الله.

خد مثال تاني .. في حالة إنك مسمعتش قبل كده إسم SoftBank فده يا سيدي يبقي بنك إستثماري ياباني أسسه بني ادم أسمه (ماسايوشي سون Masayoshi Son) .. البنك ده شغال في حاجات كتير وحاطط فلوسه في شركات كتير .. هم ماسكين شركات بتقدم خدمات الإنترنت في اليابان .. حاطين فلوسهم في شركات إنتاج كهرباء بالطاقة الشمسية في الهند .. البنك ده له حصة محترمة من أسهم شركة Sprint Corp في البورصة .. البنك ده عمل صندوق تمويل إسمه صندوق تمويل رؤية Vision Fund .. الصندوق ده محطوط فيه 100 مليار دولار عشان يستخدموا الفلوس دي كإستثمارات مباشرة في شركات شغاله في أي حاجة ليها علاقة بالتكنولوجيا .. سبب إني عايز أتكلم عن الصندوق ده بالذات هو إنك لما تيجي تبص يا تري مين اللي حاطط فلوسه في الصندوق ده تكتشف إن من ال100 مليار دولار اللي فيه منهم 45 مليار دولار حاططهم صندوق الإستثمارات العامة السعودي Public Investment Fund أو PIF كإختصار  .. طب خد التقيلة بقي .. صندوق الإستثمارات العامة السعودي ده ناوي يحط فلوس كمان في صندوق تمويل تاني تبع SoftBank برده .. خليني أبدأ معاك من الأول وأفهمك هي العلاقة بين السعودية والبنك ده بدأت إزاي؟

الموضوع كله بدأ في سبتمبر 2016 لما (محمد بن سلمان) كان بيزور طوكيو اللي هي عاصمة اليابان وهناك قابل (ماسايوشي سون) .. في الإجتماع اللي قعد 45 دقيقة ده الأخ (ماسايوشي سون) اللي بالمناسبة يعتبر مليادير عرض علي (محمد بن سلمان) إن ليه لا السعودية تحط فلوسها في أكبر صندوق تمويل للشركات التكنولوجية اللي لسه صغيرة أو اللي زي ما بتتسمي Startups .. لما الإجتماع ده خلص (ماسايوشي سون) كان فرحان بنفسه أوي إنه قدر يقنع (محمد بن سلمان) يدفع 45 مليار دولار في 45 دقيقة وطلع عليها نكتة إنه أقنع (بن سلمان) يدفع مليار دولار في كل دقيقة .. من وجهة نظر (محمد بن سلمان) إن هو اللي المستفيد .. هو عامل حاجة إسمها Vision 2030 إنه يبدأ يخلي الإقتصاد السعودي يبطل يعتمد أوي علي الفلوس اللي بتيجي من بيع البترول بس عشان يعمل كده لازم يجيب مستثمرين أجانب يحطوا فلوسهم عنده وعشان ده يحصل لازم يبان قدام العالم كله إن السعودية ماشيه بحق وحقيقي في الموضوع وأحسن طريقة لده إن السعودية نفسها تبدأ تضخ فلوس كإستثمارات مباشرة في شركات شغالة في أي حاجة غير البترول .. الفلوس اللي حتتحط دي فلوس صندوق الإستثمارات العامة اللي هو أساساً تحت سيطرة (محمد بن سلمان) .. اللي هو حاجة ماشية بالمثل الشعبي زيتنا في دقيقنا.

مهم تكون فاهم إزاي صندوق تمويل زي Vision Fund ده بيشتغل؟ .. أنا صحيح قايلك إن صندوق الإستثمارات العامة السعودي حيحط في الصندوق ده 45 مليار دولار بس هو مش بيديهم لSoftBank كاش ومقدم .. الموضوع مش بيمشي كده .. الموضوع بيمشي إن الناس بتوع SoftBank بيبقوا عاملين زي مخرج السينما اللي بيدور علي سيناريوهات كويسة وممثلين كويسين وبمجرد ما يلاقيهم بيروح للمنتج يقولوا أنا جاهز إديني الفلوس عشان أشتغل .. بتيجي مثلاً شركة زي أوبر Uber عايزه تعمل Business معين فبتروح تتفق مع SoftBank وبمجرد ما الإتفاق يتمضي فSoftBank بيروح لصندوق الإستثمارات العامة يقوله مثلاً هات مليار دولار من ال45 مليار اللي إنت قلت حتديهوملي .. المشكلة كلها إن إحتمال شركات كتير مترضاش تاخد فلوس من Vision Fund ده لإنهم عارفين إن الفلوس دي جايه من السعودية وحيقولوا للسعوديين الله الغني يا حاج بسبب تورط (محمد بن سلمان) في قتل (جمال خاشوقجي).

مش مصدقني صح؟ .. أصلك أكيد بتقول هو فيه حد يقول للرزق لا؟ .. طيب إيه رأيك إن لما Vision Fund ده إتعمل فيه شركة إسمها Improbable Worlds Ltd خدت من Vision Fund ده 502 مليون دولار كتمويل وكان فيه كلام إن الصندوق حيحط فلوس تانية في الشركة .. لكن بعد مقتل (جمال) الله يرحمه بقي فيه تخوف جوه الشركة إن الموظفين بتوعها نفسهم يتمردوا ويقدموا إستقالات جماعية لإنهم شافوا بنفسهم زمايلهم في شركة Alphabet Inc ودي شركة شغاله في حاجة إسمها Cloud Computing فكرتها بمنتهي البساطة إن بدل ما إنت بتعمل Save لشغلك علي الHard Drive في الكومبيوتر بتاعك أو علي سيرفر الشركة فإنت حتعمل Save لشغلك علي Cloud في الإنترنت مع العلم إن شركة Alphabet Inc دي مملوكة لشركة Google بس مش ده المهم .. المهم إن الشركة دي رفضت تاخد مشروع بقيمة 10 مليار دولار إسمه مشروع JEDI تبع وزارة الدفاع الأميريكية لإن الموظفين هددوا إن لو الشركة قبلت العقد هم حيقدموا إستقالات ويمشوا لإنهم شايفين إن شغلهم كمهندسين مينفعش يروح لناس شغلتها هي القتل .. أنا كمهندس برمجة مش حكتب Code عشان في الأخر طيار مقاتل يستخدمه عشان يقصف به بيت عايش فيه مدنيين .. طب سيبك من الناس اللي ضميرها ناقح عليها وخليني أخدك للناس اللي بايعه ضميرها خالص.

نيجي بقي لإزاي البنوك بتلعب لعبة السمعة؟

هنا أنا عايز أخدك في رحلة لماليزيا .. زي ما حصل مع ليبيا فالماليزيين برده عملوا صندوق ثروة سيادية وكانوا عايزين يشغلوه .. بس إذا كان عندنا إتسمي صندوق تحيا مصر فالماليزيين سموه 1 Malaysia Development Berhad أو 1MDB إختصاراً .. مش IMDB خلي بالك .. إذا كان SoftBank إتبني علي فكر رجل واحد إلي حد ما فاهم هو بيعمل إيه زي (ماسايوشي سون) فصندوق 1MDB ده كان نتاج دماغ بني أدم عنده 27 سنة بيعرف يرسم نفسه قدام الناس إسمه (جو لو Jho Low) بقدرة قادر وبطريقة الله أعلم حصلت إزاي عرف يقابل رئيس الوزراء الماليزي (نجيب رزاق) ويقنعه إنه يعمل 1MDB .. ولإنه بيعرف يتكلم كويس فهو قدر يقنع ناس كتير إنها تحط فلوسها في الصندوق ده علي وعد إنه حيستخدم الفلوس دي كإسثمارات في البنية التحتية .. هوبا الناس بتوع ماليزيا خدوا أحلي خازوق في حياتهم لما عرفوا إن (جو لو) سرق من الصندوق ده 4.5 مليار دولار.

القصة مسلية جداً .. عشان بس أديلك مثال لحجم السفه اللي هو كان فيه .. في عيد ميلاده ال31 جاب (ساي Sigh) بتاع جانجام ستايل و(فاريل Pharell) بتاع أغنية Happy و(جايمي فوكس Jaimie Foxx) اللي غني مع (كانيي ويست Kanye West) أغنية Gold Digger لو تفتكروها و(لوداكريس Ludacres) بتاع أغنية Act a Fool بتاعة زمان أوي دي .. مش كده وبس .. جاب (بريتني سبيرز Britney Spears) عشان بس تعمل ساربرايز ماذرفاكرز وتطلع من كيكة عيد ميلاده .. فاكرني خلصت .. هو صرف ملايين علي طيارة خاصة ويخت وأسس شركة إنتاج سينمائي هي اللي أنتجت فيلم The Wolf of Wall Street .. دلوقتي الناس اللي ليها في الأفلام الأجنبي بتموت علي نفسها من الضحك .. هنا يجي دور جولدمان ساكس.

حاول تتتخيل إن جولدمان ساكس عامله زي (مروان حامد) .. مفيش فيلم حتسمع إن أخرجه (مروان حامد) إلا ولازم يبقي فيه شواذ متفهمش  ليه .. برده إسم جولدمان ساكس إرتبط بالفلوس الحرام .. بمجرد ما جولدمان ساكس شموا ريحة إن فيه فلوس إتحطت في 1MDB جريوا إتكلموا مع (جو لو) و(نجيب رزاق) .. الإتنين اللي من جولدمان ساكس اللي إتكلموا معاهم كانوا (روجر إنج Roger Ing) و(تيم لايسنر Tim Leissner) .. بص الموضوع مشي إزاي .. سنة 2012 الناس بتوع جولدمان ساكس وبتوع 1MDB حاولوا يقنعوا مستثمرين إنهم يحطوا فلوسهم في الصندوق بحيث إن الفلوس دي حتتحط في مشاريع بناء محطات إنتاج كهرباء حتتبني في ماليزيا .. المشكلة إن محدش كان عارف مين هي 1MDB أصلاً؟ وكتير من المستثمرين الأجانب نفضولهم .. الحل إن بتوع جولدمان ساكس جابوا شهادة حاطين فيها إسمهم وإسم صندوق الثروة السيادية بتاع أبوظبي اللي إسمه IPIC بإنهم بيشهدوا بإن الناس بتوع 1MDB ناس طموحه وبتاعة شغل .. مجرد ما المستثمرين الأجانب شافوا شهادة محطوط فيها إسم جولدمان ساكس وإسم IPIC ريقهم جري وحطوا فلوسهم.

خلال سنة واحدة صندوق 1MDB جاب 6.5 مليار دولار .. بس بدل ما الفلوس كلها تروح لبناء محطات الكهرباء اللي حصل إن (جو لو) خد منهم 1.5 مليار دولار حطهم في شركة مزيفة بحيث يدفع منها أتعاب وإكراميات كل الناس اللي ساهمت بإن الصفقة تتعمل .. مش كده وبس .. من ضمن ال6.5 مليار دولار إتاخد منهم 600 مليون دولار أتعاب بنك جولدمان ساكس وده رغم كبير كبير ومبالغ فيه أوي.

 لو قلتلك إنها أكبر فضيحة مالية في التاريخ فأنا مش ببالغ .. برلمان ماليزيا أطاح بحكومة (نجيب رزاق) والنيابة قبضت عليه وبيتحاكم ورافعه قضية علي بنك جولدمان ساكس وضد إتنين موظفين فيه اللي هم (روجر إنج) و(تيم لايسنر) بتهمة سرقة مليارات الدولارات من البلد و(جو لو) حالياً هربان محدش عارف هو فين .. من ناحيتهم البنك بيقول والنعمة ما عملت حاجة .. بس حتي لو إنت مش عارف تاخد صف مين سواء الحكومة الماليزية ولا البنك الأميريكي فعايزك تعرف إن الحكومة الأميريكية حالياً بتحقق في شغل البنك .. مش كده وبس .. وزارة العدل الأميريكية بتقول إن أي إتفاق بين البنك وبين الوزارة علي دفع أي غرامة لازم يتمضي معاه ورقة بإن البنك يعترف إنه غلطان ودي حتبقي المرة الأولي في ال150 سنة اللي البنك فضل شغال فيهم إن الحكومة الأميريكية تجبره يعترف بإنه غلطان .. علي فكرة .. ده نفس البنك اللي أمة سيدنا محمد كلها إتهمته بإنه كان من أسباب الأزمة المالية العالمية في 2008 وبرده البنك طلع منها زي الشعرة من العجين.

الحكومة الأميريكية قبضت علي (روجر إنج) و(تيم لايسنر) وحققت معاهم بس الأولاني قالك أنا بريء ومعملتش حاجة غلط .. الجديد بإن التاني إعترف بإنه فعلاً دفع رشاوي وساعد (جو لو) يسرق فلوس من صندوق 1MDB .. البنك رد بإن (تيم لايسنر) هو اللي حرامي مش إحنا .. أظن اللي عايز أقوله ليك هو أول ما تسمع كلمة صندوق ثروة سيادية إبدأ إقلق خصوصاً لو الإسم ده سمعت معاه إسم جولدمان ساكس.

المصادر:

• مقالة بعنوان Explaining SoftBank’s Close Ties with Saudi Arabia .. نشرت في مجلة Bloomberg وده لينك المقالة الأصلية:
  ps://www.bloomberg.com/news/articles/2018-10-21/explaining-softbank-s-close-ties-with-saudi-arabia-quicktake
•  حلقة من برنامج Patriot Act with Hassan Minhaj إتذاعت علي قناة Netflix وده لينك الحلقة علي YouTube:
  /www.youtube.com/watch?v=KmZZfWdlEFY&t=619s