الحرب العالمية الأولي .. ألمانيا و النحس و مزيد من النحس و الكثير من العند.

لحرب العالمية الأولي من الحاجات اللي حصلت في تاريخ البشر اللي حتلاقي حاجات كتير مربوطة بيها بس محدش فاهم أوي هو إيه اللي حصل فيها؟ .. يعني مثلاً .. لما جيت حكيت قصة النكبة وإزاي إتقالت الكدبة إن الفلسطينيين باعوا أرضهم جبت سيرة الحرب دي كتير أوي بس مشرحتش هي تطلع إيه الحرب العالمية الأولي دي؟ .. زي برده لما إتكلمت عن إتفاقية سايكس-بيكو وإزاي حدود البلد اللي إنت عايش فيها إترسمت بسبب الإتفاقية دي و حكينا إن الإتفاقية قصتها مربوطة بالحرب العالمية الأولي ..  نفس الكلام لما حكيت إزاي الست الفاضلة (ماري كوري Marie Curie) قدمت للعالم إختراع أوضة الأشعة المقطعية المتنقلة وقت الحرب العالمية الأولي وبرده مجتش فرصة إني أشرح هي الحرب دي قامت بين مين؟ و ليه؟ .. الموقف ده حصل هو هو لما إتكلمت عن قصة ميلاد جراحات التجميل .. دي الأحداث اللي إحنا إتكلمت عنها بس ولقينا إن كل القصص و الحكايات دي حصلت وقت الحرب العالمية الأولي والنهاردة إحنا حنحاول مع بعض نفهم هو تطلع إيه البتاعة دي؟

مشكلة الحروب إنها زيها زي ما تبقي قاعد في بيتكوا مسحول في تسليمة عشان مديرك قالك متنامش إلا لما تبعتها و تسمع صوت ناس بتتعارك تحت في الشارع .. كون إن شوية ناس بيشتموا بعض و بيحدفوا علي بعض طوب و ماسكين عصيان مش ده الجانب المسلي في الموضوع .. انت لما بتطلع البلكونة تتفرج علي العركة انت أول سؤال بتسأله هو مين بيتعارك مع مين؟ .. السؤال اللي وراه غالبا بيكون ليه؟ .. وإنت بتتفرج علي خناقة إنت مش بتشغل وقتك إنك تحلل التيكنيك اللي واحد فيهم ماسك بيه العصاية و تقول لنفسك أصله لو كان ماسك حتة حديدة كانت قدرته علي المناورة حتبقي أفضل .. محدش بيشغل باله بالكلام ده .. إحنا عايزين نفهم هي العركة دي قامت ليه؟ .. صحيح الحرب ولعت يوم 28 يونيو 1914 بس إحنا مش جايين نحكي أحداث الحرب .. إحنا جايين نحكي الأحداث و نقول قصة الظروف اللي لما إترصت جنب بعضها ولعت الحرب اللي فعليا محدش كان متخيل إنها ممكن تحصل.

عايز تعرف مين السبب ورا أي خناقة في اوروبا؟ .. المانيا:

يوم 20 نوفمبر 1815 كان اليوم اللي أوروبا بصت لنفسها و أهلها صرخوا في وش بعض .. باااااااااااس بقي .. لأكتر من 12 سنة و دول أوروبا رافعين السلاح علي بعض تحت مسمي الحروب النابليونية Napoleonic Wars .. مش مشكلتي دلوقتي تفهم هي إيه الحروب النابليونية دي؟ و خلصت علي إيه؟ بس اللي انا عايزك تفهمه إن الأوروبيين من بعدها عملوا حاجة إسمها مسرح أوروبا The Concert of Europe ودي بإختصار هي إن الدول الأوروبية لو حصلت أي مشكلة بينهم حيقعدوا مع بعض قعدة عرب يشوفوا مين الغلطان و الموضوع يتحل في القعدة دي .. نظام كان لطيف وشغال زي الفل وكان السبب إن الدول الاوروبية الكبيرة سواء بتتكلم عن فرنسا أو إنجلترا أو روسيا أو حتي الإمبراطورية النمساوية المجرية مرفعوش السلاح في وش بعض .. لحد ما جت سنة 1871 ودي السنة اللي إتولدت فيها المانيا.

ميلاد ألمانيا هو تجسيد لحلم الوحدة العربية .. فكر فيها كده .. دول الخليج عندها بترول .. مصر عندها ناس بتفهم و متعلمة كويس .. السودان عندها أرض زراعية .. دول المغرب العربي عندها موارد طبيعية .. إضرب كل دول في الخلاط تلاقي نفسك قدام قوة عظمي .. نفس الكلام علي ألمانيا .. ألمانيا كانت شوية دول و ممالك مورهمش شغلة ولا مشغلة غير إنهم يضربوا بعض لحد ما في يوم و ليلة إتوحدوا تحت راية ألمانيا .. في يوم وليلة أوروبا إتولد في قلبها قوة عظمي .. في يوم و ليلة بقي عندك دولة أقوي من انجلترا .. أقوي من فرنسا .. أقوي من روسيا .. وحتي أقوي من الامبراطورية النمساوية المجرية .. و أكيد يعني تقدر تدوس علي وش الدولة العثمانية.

دلوقتي حاول تبص للعالم من وجهة نظر الدولة الألمانية اللي لسه مولودة دي .. إحنا دولة إقتصادياً نعتبر أكتر بلد معاها فلوس في العالم مش بس في أوروبا .. تعداد سكانا كبير نقدر نستخدمه في إننا نبني جيش حيبقي أقوي جيش في العالم .. جينا نعمل زي إنجلترا و فرنسا ما بيعملوا و يبقي لينا مستعمرات في أفريقيا أو في اسيا إتقالنا لا مينفعش .. ليه يا جدعان؟ .. قالك أصل الدول الإستعمارية الأوروبية اللي هم فرنسا و إنجلترا و حتي هولندا تاريخهم أكبر من تاريخك يا ألمانيا .. هو ده المبرر اللي إتقال بس المبرر الحقيقي هو بمنتهي البساطة الخوف .. الفرنساويين مثلاً بصوا للألمان وقالوا لنفسهم الناس دي لو دخلت في حرب معانا حيدوسوا علي وشنا وهم ملهمش مستعمرات يسرقوا مواردها الطبيعية .. تخيل لو ألمانيا ليها مستعمرات بره أوروبا .. تخيل لو ألمانيا إحتلت مصر مثلا و سيطرت علي قناة السويس .. انت متخيل الكابوس اللي حتعيشه أوروبا؟ .. تخيل برده غضب الألمان .. ليه يتقالنا ملكوش حق إنكوا يبقي ليكوا مستعمرات في العالم؟ .. هو انا مش متخيل إني بدافع عن حق دولة إن يبقي ليه طموحات إستعمارية بس هي دي مشكلة التاريخ إنك لازم تطلع مشاعرك و رأيك الشخصي وإنت بتتكلم فيه.

لأكتر من أربعين سنة من يوم ميلاد المانيا سنة 1871 وهي بتفرك .. بلد إقتصادياً و سياسياً و عسكرياً بتكبر كل يوم بس هي مش قادرة تتوسع .. بس برده لأكتر من أربعين سنة فضلت الدنيا هادية و شبه مستقرة .. ليه؟ .. عشان اللي بيحكم اوروبا كانوا ناس بتفهم .. فاكر The Concert of Europe؟ اللي هي قعدة العرب اللي الدول الأوروبية بتقعدها مع بعض عشان يحلوا مشاكلهم؟ .. القعدة دي كان بيحضرها ناس تقيلة أوي .. ناس فاهمة يعني إيه حكم و ناس بتعرف إزاي تراضي غيرها بكلمة حلوة أو بتنازل عشان بس النفوس تبقي صافية .. يهمني أوي إني أخص بالذكر هنا إتنين .. (أليكساندر الأول Alexander I) قيصر روسيا و (أوتو فون بسمارك Auto Von Bismarck) مستشار ألمانيا.

(اليكساندر الاول) كان النسخة القديمة بتاعة (فلاديمير بوتين) .. الرجل القوي اللي عارف مصلحة بلده و بيسعي إنه يخليها قوة عظمي في العالم بس في نفس الوقت حساس أوي للنقد و المعارضة .. (أليكساندر الأول) هو اللي أنهي العبودية و عمل إصلاحات جبارة في النظام القضائي و بني نظام تعليمي هو الأساس اللي فضلت روسيا مكملة عليه لحد دلوقتي .. وفي نفس الوقت هو الحاكم اللي القبور مليانة بمعارضيه اللي إتعدموا لمجرد إنهم نطقوا بكلمة لا .. قصاده كان (أوتو فون بسمارك) .. أسطورة بكل ما تحمله الكلمة من معني .. الرجل اللي كان لو إنت يعني شايف نفسك حريقة سجاير و شايف نفسك جامد زحليقة فأحب أقولك ان (بسمارك) كان بيشرب 3 سيجار مش سجاير .. سيجار .. في وقت واحد .. ده رجل لما بيصحي الصبح بيفطر بإزازة ويسكي .. ده الرجل اللي عرف يفرمل رغبة بلده المانيا في التوسع بإنه حط لنفسه هدف والهدف ده إنه بأي حال من الأحوال و تحت أي ظرف ميخليش فرنسا و روسيا يبقوا حبايب .. ليه؟ .. روسيا علي يمين ألمانيا و فرنسا علي شمالها .. لو إتفقوا مع بعض عليها فألمانيا حتشيل أوبح.

ده كان زمان .. لأربعين سنة بعد ميلاد ألمانيا زي ما قلتلك فضلت الدنيا هادية بسبب شغل ناس زي (أليكساندر الأول) و (أوتو فون بسمارك) بس الوضع إختلف بداية من سنة 1900 .. دي الفترة اللي القدر إبتلي بيها أوروبا بإتنين حكموا أقوي دولتين في العالم وقتها .. (أليكساندر الثاني) جه بعد أبوه يمسك روسيا .. و القيصر (فيلهالم الثاني) جه مسك ألمانيا و أول قرار خده كان إنه يقلش (أوتو فون بسمارك) .. وزي ما إتكلمت شوية عن الإتنين اللي بسببهم الدنيا كانت هادية فلازم نتكلم شوية عن الناس اللي بسببهم الدنيا باظت .. باظت خاااااالص.

اذا كان (أليكساندر الأول) بيحسبها كأنه واحد من مواليد برج العذراء فابنه (نيكولاي الثاني) عشوائي بشكل مستفز .. إذا كان (أليكساندر الأول) مش بيحب يتقاله لا ف(نيكولاي الثاني) كان مسلم ودانه للراهب (جريجوري راسبوتين) اللي إتقال عليه أساطير وده مش وقتها دلوقتي .. إذا كان (نيكولاي الأول) كان أستاذ في فن جبر الخواطر فإبنه (نيكولاي الثاني) مكنش فارق معاه مشاعر حد لدرجة إن في حفلة تنصيبه قيصر روسيا إتقتل 1300 بني ادم في حادثة دهس سببها إن اللي نظموا الحفلة معملوش حسابهم علي إنهم يوفروا أكل و شرب كتير للناس اللي حتيجي تتفرج فالناس جريت علي البوفية و فيه ناس ماتت .. الغريبة إن (نيكولاي الثاني) كمل مراسم تنصيبه عادي جدا ولا كأن حاجة حصلت ..  سنة 1905 روسيا خسرت حربها ضد اليابان ودي كانت المرة الاولانية اللي دولة أوروبية تخسر أي حرب تدخلها ضد دولة مش أوروبية في التاريخ الحديث .. هزيمة عملت صدمة للمجتمع شبه تأثير نكسة يونيو علينا في مصر .. هزيمة كانت السبب في ثورة أجبرت (نيكولاي الثاني) انه يمضي علي إتفاق يؤسس مجلس الشعب ويرضي إن روسيا تتحول لملكية دستورية زي بريطانيا دلوقتي كده .. طبعا (نيكولاي الثاني) رجع في كلامه و فعليا روسيا كانت بتغلي من جواها.

مشكلة (فيلهلم الثاني) إنه كان عايز يعيش الدور .. فيه مشهد عاجبني أوي من مسلسل Game of Thrones لما (تايوين لانيستر Tywin Lannister) بيقول لحفيده الملك (جيوفري Geoffrey) إن لما ملك يفضل يقول للناس إنه هو الملك و يفضل يكررها كتير ففعليا ده معناه إن الملك ده لا يستحق إنه يتقال عليه ملك .. شخصية الملك اللي بحق و حقيقي هي اللي بتخلي الناس تحترمه من غير ما يحتاج يفكرهم إنه هو الملك .. هو إتولد بعيب خلقي بإن إيده مش بتنمو زي باقي جسمه وده خلي أمه تبقي خايفة عليه لدرجة إنها كانت شبه قافله عليه أوضته .. ده خلاه كبر بقي رجل فعليا مش واثق في نفسه .. رجل عنده هسهس إن الناس مش شايفاني رجل فانا لازم أثبتلهم إني رجل بأني أعترض و خلاص .. يعني مثلاً .. لأكتر من عشرين سنة ألمانيا بعد ميلادها مشيت علي سياسات (بسمارك) اللي هي نفرمل رغبتنا في التوسع و نفضل مخليين فرنسا متخانقة مع روسيا .. جه (فيلهلم الثاني) قالك زي (محمد صبحي) في مسرحية كارمن اللي هو لا بقي معلش انا ليا تصور تاني خالص عن سياساتنا الخارجية .. (فليهلم الثاني) مشي (بسمارك) .. أنهي تحالفه مع (روسيا) .. داس جامد في سياسة التوسعات و انه يخلي لألمانيا مستعمرات حول العالم .. (فيلهلم الثاني) فعليا رفع يافطة لن أعيش في جلباب (بسمارك) و بكده هو مش بس كسر The Concert of Europe إنما كمان حط أوروبا علي قطر المواجهة اللي بقت شبه حتمية .. الحرب جاية جاية.

ده في الوقت اللي الإمبراطورية النمساوية المجرية اللي كانت وقتها من القوي العظمي في العالم كان ماسكها رجل إسمه (فرانسيس جوزيف Francis Joseph) سنة 1911 كان عنده 81 سنة وده رقم كبير وقتها و بسبب سنه و مشاكله الصحية فهو كان سايب الحكم لوزير خارجيته (ليوبولد بيرتهولد Leopold Berchtold) وده كان رجل غلبان .. كونك رجل غلبان ده في حد ذاته مش عيبه .. المشكلة كانت إنه كان رجل غلبان في وقت اللي كانوا حولية شوية ناس مهووسة بالسلطة و الحكم و يتعملها تعظيم سلام في الرايحة و الجاية .. ده في الوقت اللي الامبراطورية النمساوية المجرية بصت للي بيحصل للدولة العثمانية وقالت لنفسها أحية يا أبو سوسو أحية .. الدولة العثمانية اللي كانت القوة العظمي الاولي في العالم اذا بيها اتقصقص ريشها وبقت يدوبك تركيا و الشام و شبه الجزيرة العربية و شكرا علي كده .. الخوف كان زي البرد بياكل في عظم اوروبا .. كله خايف من كله .. وضع محتاج بس شرارة صغيرة و يولع .. يولع ايه ده حينفجر .. وسط كل ده بتيجي الشرارة .. شرارة اسمها (غافريلو برنسيب Gavrilo Princip).

اغتيال الدوق (فرانز فيرديناند) .. ده ايه النحس ده يا ربي؟

يوم 28 يونيو 1914 الأرشيدوق (فرانز فيرديناند) ولي عهد الامبراطورية النمساوية المجرية و مراته حيزوروا مدينة ساراييفو .. ده كان المانشيت اللي إتنشر في كل الصحف و الجرايد الأوروبية .. لحد دلوقتي إنت غالبا وإنت بتقرأ الخبر ده ماسك فنجان القهوة ولو إنت بتدخن حاطط السيجارة في الطفاية أصلك مش (بسمارك) حتمسك الفنجان و السيجارة و الموبايل في يد واحدة .. المهم .. غالبا إنت مش فاهم أوي أو مش مستوعب فين المشكلة في الخبر ده .. في الحالة دي خليني أوريك إزي إن الحرب اللي مات فيها فوق العشرة مليون بني ادم ولعت بسبب النحس .. مش نحس عادي .. نحس من العيار التقيل .. نحس شبه اللي منتخب اليد بتاعنا شافه في ماتش دور الثمانية قصاد الدانمرك .. نحس من اللي بيحصل في العمر مرة.

الحكاية بدأت بجواز (فرانز فيرديناند) من مراته (صوفي) .. مبدأيا كده ابوه و امه مكانوش راضيين علي الجوازة دي .. أبوه (فرانسيس جوزيف) اللي جبت سيرته من شوية كان رجل كبير في السن .. فوق الثمانين سنة .. رجل عاش حياته كلها علي الأصول .. و الأصول إن ولي عهد الإمبراطورية مينفعش يتجوز بنت مش من عيلة كبيرة .. عيلة كبيرة أوي .. عيلة ملكية .. صحيح (صوفي) كانت كونتيسة بس مقارنة بأميرات أوروبا فانت كانك بتقارن بين (ياسمين صبري) و الخدامة بتاعتها .. إسال اي حد متجوز جوازة أهله مش راضيين عنها وحيقولك إن حياته عبارة عن فيلم رعب .. كمية توتر و نرفزة و حرقة دم مش طبيعية .. مش حتفرق إذا كنت غني أو فقير .. مش حتفرق إذا كنت أمير أو موظف .. قلبة وش أمك لما تشوف مراتك و نكد مراتك لما ترجعوا البيت كفيل إنه يكرهك في عيشتك .. عشان كده (فرانز) كان ما بيصدق تيجي رحلة بره البلد ياخد فيها مراته و يهرب ولو مؤقتا من حياتهم اللي كلها توتر .. سفرية ساراييفو جت في وقتها .. المبرر الرسمي للسفرية ان ولي العهد راح يحضر ينفسه مناورات عسكرية .. صحيح ساراييفو هي مدينة صغيرة تبقي عاصمة أقليم كوسوفو اللي وقتها كان جزء من حتة أكبر إسمها صربيا و اللي كلهم كانوا تحت سيطرة الإمبراطورية بس مش مهم .. أهي خروجة بره القصر الملكي وده في حد ذاته حاجة كويسة.

من شوية برده قلتلك إن الإمبراطورية النمساوية المجرية كانت عايشة في حالة خوف مزمن .. الناس دي شايفه بعنيها الدولة العثمانية وهي بتفك من بعضها زي كيس اللحمة اللي الست والدتك طلعته من الفريزر يوم الجمعة الصبح .. وفي نفس الوقت الإمبراطورية دي مش كيان واحد .. إسمها نفسه يوريك ده .. النمسا و المجر دولتين صحيح جنب بعض بس ملهمش علاقة ببعض .. دولة تحت ايدها اقاليم تانية نفسها تبقي مستقلة و حاسة ان هويتها بتتسرق منها في كل يوم هم بيفضلوا فيه تحت سيطرة الامبراطورية .. من ضمن الاقاليم دي كانت صربيا .. الصرب كانوا بيحلموا باليوم اللي يطلعوا منه من تحت سيطرة الإمبراطورية النمساوية المجرية و صادف إن زيارة الأرشيدوق (فرانز فيرديناند) تبقي في يوم 28 يونيو وده اليوم اللي الصرب بيحيوا فيه ذكري معركة كوسوفو اللي إنتصروا فيها علي العثمانيين.

يعني بتتكلم عن يوم الصرب شايفينه إنه يوم بيعبر عن هويتهم .. يوم هم شايفينه أهم يوم في تاريخهم .. اليوم اللي هم قدروا فيه يقفوا قصاد القوة العظمي الأولي في العالم .. اليوم اللي لما بيفتكروه بيقولوا لنفسهم إحنا نقدر نستقل .. في نفس اليوم ده يقرر ولي عهد الإمبراطورية اللي بتسيطر علي بلدهم يزورهم .. من وجهة نظرهم هم بيقولوا يا بجاحتك يا أخي .. من وجهة نظرهم هم بيقولوا إنت لازم تتربي إنت و عيلتك .. بس من وجهة نظر (فرانز) هو مكنش شايف كده .. هو أصلا مكنش في دماغه كل ده .. هو كان جاي يقضي يومين حلوين مع مراته وغير كده شكليات .. كان ممكن لو إختار يزور ساراييفو في يوم تاني مكنش حصل اللي حصل .. بس هو النحس يا سادة .. وعلي فكرة .. النحس لسه مخلصش.

زمان إجراءات حماية الشخصيات العامة مكنتش زي دلوقتي .. لك أن تتخيل إن المسار بتاع موكب الأرشيدوق إتنشر في الجرايد .. الناس كانت عارفه هو حيعدي منين إمتي .. صحيح الموكب كان متأمن بس كله راكب عربيات مكشوفة من غير سقف .. الأرشيدوق و مراته في عربية في النص .. قدامهم عربيتين  و وراهم عربيتين .. أهل ساراييفو إترصصوا علي الأرصفة يتفرجوا علي الموكب .. مش حتفرق إذا كنت بتكره الحاكم أو نفسك يغور في ستين داهية بس بمجرد ما تشوفه في الشارع حتلاقي نفسك عايز تروح تتفرج و يمكن تتصور معاه كمان .. هي طبيعة البشر كده .. وسط الناس اللي بتتفرج علي الموكب وهو معدي كانوا ستة .. الستة أعضاء في تنظيم إسمه صربيا الشابة Young Serbia وده تنظيم ده تحت مظلة تنظيم أكبر إسمه الإيد السودا Black Hand .. الستة إتوزعوا علي طول المسار بتاع الموكب .. اللي يلاقي الفرصة قدامه يستغلها.

إتنين من الستة إترعبوا من الفكرة و مقدروش يعملوا حاجة .. الثالث مسك مسدسه بس كان رومانسي حبتين لما شاف (صوفي) قعدة جنب جوزها صعبت عليه ومعرفش يدوس علي الزناد .. الرابع مسك مسدسه فعلا و نشن علي الارشيدوق بس الطلقة إتحشرت ومسدسه مضربش .. الخامس كان معاه قنبلة يدوية رماها علي العربية بتاعة الارشيدوق اللي لما شافها قدر يوطي بسرعة فالقنبلة طارت من فوق دماغة نزلت علي الرصيف التاني و إنفجرت و أصابت أكتر من 20 بني ادم من اللي كانوا بيتفرجوا .. الخامس ده من الخوف جري و نط من فوق الكوبري عشان ينزل في المياه و يهرب بس الخطة كانت محطوطة بمنتهي الغباء إنه معملش حسابه إن الأهوسة كانت مقفولة و عمق المياه مكنش كبير يودبك نص متر .. الواد نط من هنا و كسر رجله من هنا .. يسكت؟ .. لا إزاي .. كان عارف إنه حيتمسك قام مطلع من جيبه حباية سم سيانيد اللي بتشوفه في الأفلام ضباط المخابرات و الجواسيس بيحطوه في بقهم عشان ينتحروا و ميتقبضش عليهم .. أتاري عشان مكنش معاهم فلوس فجابوا شريط سيانيد منتهي الصلاحية .. العساكر نزلوا النهر يقبضوا علي الخامس لقوه نايم علي الارض عمال يرجع و ماسك بطنه و تقريبا بيترجاهم يموتوه عشان المغص كان بيقطع مصارينه.

طبعا بمجرد ما القنبلة إنفجرت الحرس بتوع الأرشيدوق لفوا و رجعوا تاني لمقر الحكومة في ساراييفو .. وسط كل ده محدش خد باله من السادس .. السادس كان شاب يدوبك مجابش 20 سنة إسمه (غافريلو برنسيب Gavrilo Princip) .. (برنسيب) في اللحظة دي كان عامل زي ما تكون بتحب واحدة و رحت تتقدملها بس أبوها رفضك .. بتنزل من البيت وإنت في ودانك موسيقي التتر بتاع مسلسل المال و البنون .. دمعتك علي خدك .. بتمشي في الشارع حاسس إن كل احلامك و طموحاتك إتدمرت .. لحد ما تلاقي فيه ريحة أكل في مناخيرك .. بتبص تلاقي إنك عديت قصاد شاورما سمسمة .. بتقول لنفسك سندويتش شاورما لحمة عليها طحينة زيادة حيرفع روحي المعنوية .. (برنسيب) عمل كده .. راح المطعم اللي هو بيحبه .. طلب السندويتش اللي هو بيحبه .. وقعد ساكت علي الكرسي علي الرصيف بتاع المطعم ياكل السندويتش بتاعه في هدوء .. هو عارف إنه محتاج يختفي كام يوم عشان أكيد الدنيا حتبقي مقلوبة بس مش دلوقتي .. دلوقتي معاد الساندويتش .. يخلص الساندويتش وبعد كده يحلها الحلال.

ده في الوقت اللي في مقر الحكومة في ساراييفو كانت فيه خناقة .. الحاكم بتاع المدينة كان رأيه إن الزيارة بتاعة الأرشيدوق تكمل زي ما كان متخططلها .. (فرانز) كان بيقوله انت أهبل يا جدع انت .. عايزني أروح أزور متاحف و البلد بتولع .. في اللحظة دي مراته (صوفي) قالت فكرة حلوة الصراحة .. ليه لا هي و جوزها يروحوا المستشفي بتاعة المدينة يتطمنوا علي الجرحي بتوع إنفجار القنبلة؟ .. الفكرة عجبت (فرانز) جدا و فعلا خد مراته و ركبوا العربية و طلعوا علي المستشفي .. بس هي كانت فيه مشكلة صغيرة .. مكنش فيه وقتها Google Maps .. السواق بتاع (فرانز) كان السواق الخصوصي بتاعه .. الرجل ده يقدر يمشي في شوارع فيينا عاصمة النمسا وهو مغمض .. بس هو فعليا ميعرفش حاجة في شوارع ساراييفو .. يمكن وقتها (فرانز) كان شايف إن دي صدفة دمها خفيف .. فرصة إنه يقضي كام دقيقة زيادة مع مراته ماسك ايدها و بيتفرجوا علي شوارع ساراييفو .. السواق بتاعه مشي غلط و دخل شارع لاجل إن النحس يكمل إسمه (فرانسيس جوزيف) متسمي علي إسم إمبراطور الإمبراطورية النمساوية المجرية و اللي لاجل الصدف يعني يبقي عم (فرانز) .. السواق دخل الشارع بس لقي نفسه قدام حيطة سد .. السواق بص لواحد ماشي في الشارع و بيسأله الا قولي يا استاذ اروح المستشفي ازاي؟ .. اهو السواق وقف قدام (برنسيب) .. انت متخيل النحس؟ .. (برنسيب) مكنش مصدق نفس وهو قدام عربية الأرشيدوق و السواق بتاعه تايه مش عارف يروح المستشفي إزاي؟ .. (برنسيب) ساب الساندويتش و مسك مسدسه .. قام من علي كرسيه و مشي ناحية العربية ضرب طلقتين .. واحدة علي (فرانز) و الثانية علي (صوفي) .. الإتنين ماتوا متأثرين بجراحهم بعد أقل من ساعة.

مفاوضات الصباح و المساء .. مزيد من النحس:

أسوأ حاجة في الدنيا لما الرجل مننا ميبقاش عارف هو عايز إيه؟ .. إنت بتشوفها في نرفزة الستات لما واحدة فيهم تسأل جوزها عايز تاكل إيه فيقولها أي حاجة .. هي فعلا حاجة تعصب إنك تبقي رجل شحط بشنبات و متبقاش عارف إنت عايز تتنيل تاكل إيه؟ .. تقريبا الناس بتوع الإمبراطورية النمساوية المجرية كانوا كده برده .. ولي العهد بتاعهم إتقتل في الشارع .. صحيح اللي قتله مقبوض عليه بس هم مش عارفين هم عايزين إيه؟ .. عايزين ياخدوا بتار (فرانز) و مراته بس ازاي؟ .. حتحاربوا صربيا؟ .. طب إيه الهدف من الحرب دي؟ .. هل عايزين تحتلوا صربيا عسكرياً؟ .. مش عارفين .. طب إيه اللي يرضيكوا؟ .. برده مش عارفين .. يوم 5 يوليو 1914 راح وفد من الإمبراطورية يزور القيصر (فيلهلم الثاني) بتاع ألمانيا .. الرجل سالهم سؤال بسيط .. طلباتكوا إيه؟ .. الإنتقام .. طب إزاي؟ .. حنحارب .. طب إيه الهدف من الحرب دي؟ .. لسه مش عارفين .. من زهقه (فيلهلم الثاني) قالهم بصوا عشان انا صدعت منكوا و مفييش دماغ للهري بتاعكوا ده .. ألمانيا في ظهركوا أيا كان إنتوا حتقرروا إيه بس إنجزوا بالله عليكوا .. خدوا قراركوا بسرعة .. عايزين تدخلوا صربيا بالقوة ماشي .. عايزين تفرضوا حصار إقتصادي عليهم ماشي .. المهم تنجزوا.

الفكرة إن الألمان عارفين إن طول ما إحنا لسه في الأربعين محدش حيتكلم .. الناس كلها حتقدر رد فعل الإمبراطورية النمساوية المجرية أيا كانت درجة قسوته .. محدش حيلومهم ولا حيعتب عليهم .. وحتي لو الروس قالوا إحنا مش حنسيب أصدقاءنا الصرب ملطشة في إيد الإمبراطورية النمساوية المجرية فلو هم سمعوا كلام القيصر (فيليهم الثاني) و خلصوا اللي هم عايزينه في الإنجاز فهم حياخدوا حقهم من الصرب قبل ما الروس يلحقوا يحركوا عسكري واحد .. زي ما انت شايف الوضع متأزم .. زي ما انت شايف الدنيا ممكن تفرقع في أي لحظة .. تفتكر القيصر (فيلهلم الثاني) يعمل إيه؟ .. الباشا قرر ياخد أجازة 3 أسابيع في جزيرة معزولة وزي ما تقول كده قفل موبايله و طفي دماغه .. الحرب العالمية حتقوم و البرنس راح يستجم .. لو دمك بدأ يتحرق أصبر لإن لسه فيه بلاوي جاية في السكة.

الوفد بتاع الإمبراطورية النمساوية المجرية رجع بلده تاني من ألمانيا و في إيدهم قرار ألمانيا إنها في ظهرهم أيا كان القرار اللي حتاخدوه بس تقريبا الوفد نسي يبلغ القيادة السياسية هناك إن الألمان شددوا أوي علي حتة إنهم لازم ينجزوا دي .. تقريباً هم سقطوا الحتة دي لإن فيه وقت كتير أوي راح في الهري بتاع هي الحرب اللي إنتوا ناويين تعلنوها علي صربيا دي هدفها إيه؟ .. حاول تفتكر إن الإمبراطورية النمساوية المجرية من إسمها فهي مملكة من نصين .. نص مجري و نص نمساوي .. النص المجري كان رأيه إن حرب إيه اللي انت جاي تقول عليها؟ .. وبعدين أكيد يعني فيه حل سلمي يرضي جميع الأطراف .. صح؟ .. المجريين مخدوش بالهم إن إخواتهم النمساويين كانوا كلهم عايزين يشربوا من دم الصرب يمكن لسبب بسيط جداً .. الأرشيدوق (فرانز فيرديناند) كان أكتر حد في الأسرة المالكة للإمبراطورية اللي كان واقف في صف الصرب .. وفي الاخر قتلوه .. قتلوا الوحيد اللي كان بيدافع عنهم و عن حقوقهم .. تفتكر الصرب عايزين حل سلمي أصلا؟

المجريين بصراحة مكنش عندهم رد علي النقطة دي .. النمساويين عندهم حق .. بس المجريين قالوا لو عايزين الحرب ماشي بس بشرط .. ميبقاش هدفنا هو إحتلال صربيا .. إحنا نروح نرنهم العلقة التمام و نروح .. مفيش إحتلال .. النمساويين قالوا أمين ..  حرب من غير إحتلال .. حط الحتة دي علي جنب بس دلوقتي عشان حنحتاجها بعدين .. الإخوة بتوع الإمبراطورية النمساوية المجرية قعدوا يكتبوا البيان اللي حيتبعت لصربيا .. البيان اللي حتتحط فيه شروطهم .. هم كانوا عشر شروط اللي طبعا حتكون مش منطقية ومش مقبولة عشان الصرب يرفضوها و يبقي كده من حق الإمبراطورية النمساوية المجرية تدي الصرب العلقة اللي هي نفسها فيها .. من ضمن الشروط إن الصرب يدوا للسلطات النمساوية المجرية الحق في إنهم يحققوا في جريمة إغتيال الأرشيدوق زي ما هم عايزين .. حاول تتخيل مثلاً إن أمير سعودي إتقتل هنا في مصر فتيجي السعودية تقول إنها حتبعت فريق تحقيق من عندها وإن وزارة الداخلية بتاعتنا ملهاش علاقة بالموضوع .. طبعا طلب زي ده حيترفض .. الصرب حيقولوا زي ما إحنا حنقول .. إحنا هلافيت مثلا يعني علي رأي عنبة؟ .. البيان كان حيقول إن الصرب قدامهم 48 ساعة يوافقوا علي كل الطلبات .. وإلا الحرب .. و البيان بيتكتب إتقالهم استنووووووا .. فيه كلام علي إن السفير بتاعنا بيتفاوض مع السفير بتاع روسيا في صربيا و الإتنين ممكن يوصلوا لإتفاق .. الفكرة زي ما قلتلك إن الروس حبايب الصرب .. الإمبراطورية النمساوية المجرية بعتت للسفير بتاعها قالتله وحياة أبوك انجز .. إحنا كنا مع الألمان يوم 5 يوليو ودلوقتي بقينا 10 يوليو و معملناش حاجة.

يوم 10 يوليو 1914 السفير بتاع الإمبراطورية النمساوية المجرية قعد مع السفير بتاع روسيا في صربيا و إتفقوا علي كل التفاصيل .. إتفاق أخيرا حيبعد خطر الحرب عن أوروبا .. الإتفاق خلص وجه وقت الإحتفال .. الإتنين ولعوا سيجارتين و شربوا كاسين .. وهوووبا من غير لا إحم ولا دستور السفير الروسي في صربيا يقع من طوله .. الباشمهندس جاتله أزمة قلبية مفاجئة ومات .. شوفت النحس؟

الكلام اللي إتقال إن سفير الإمبراطورية النمساوية المجرية هو اللي سمم السفير الروسي .. اه والله الصرب طلعوا الإشاعة دي .. طبعا من غير سفير ليهم في صربيا فالروس تقريبا مكنش ليهم حد علي الأرض يتكلم بإسمهم بس مش دي المشكلة الوحيدة .. المشكلة إن الإخوة بتوع الإمبراطورية النمساوية المجرية قالوا لنفسهم ياريتنا كنا بعتنا البيان بتاعنا و خلصنا بدل العطلة دي .. لسه حيبعتوا الجواب اللي تقدر تسميه إعلان الحرب علي صربيا إتقالهم استنووووووا .. إتعرف إن الرئيس الفرنساوي رايح زيارة رسمية لروسيا .. طب وايه المشكلة؟ .. الروس حبايب الصرب .. وزي ما قلتلك لما جه القيصر (فيلهلم الثاني) مسك الحكم في ألمانيا رمي سياسات (بسمارك) في الزبالة اللي كانت مبنية علي إن مينفعش الروس و الفرنساويين يبقوا حبايب .. دولقتي الوضع إختلف .. الروس و الفرنساويين بقوا صحاب .. فلو الإمبراطورية النمساوية المجرية بعتت الجواب وأعلنت الحرب علي صربيا وكان الرئيس الفرنساوي في روسيا مع القيصر (نيكولاي الثاني) فممكن الإتنين يتفقوا مع بعض وينسقوا حيتصرفوا إزاي؟ .. الإخوة بتوع الإمبراطورية النمساوية المجرية إستنوا لحد ما الزيارة خلصت .. يوم 23 يوليو 1914 إتبعت الجواب اللي كان المفروض يتبعت يوم 5 يوليو .. البيان اللي بيقول يا الصرب يوافقوا علي طلباتنا خلال 48 ساعة .. أو الحرب.

هنا غالبا بيجي الوقت إننا نتكلم شوية عن واحد انا عارف كويس إنك مسمتعش إسمه قبل كده .. (سيرجي سازانوف Sergei Sazonov) .. هو يبقي وزير خارجية روسيا وقت الازمة دي و يوم 24 يوليو تقريبا كان أهم يوم في حياته:

• الصبح هو صحي علي خبر إن الإمبراطورية النمساوية المجرية بعتت البيان التحذيري لصربيا .. الرجل قرأ البيان وبمجرد ما قراه هو فهم دماغ النمساويين .. هم عايزين الحرب .. محدش عاقل حيرضي بالشروط اللي هم حاطينها دي .. هو عارف إن الصرب حيرفضوا و ساعتها النمساويين حيبقي معاهم المبرر القانوني لإعلان الحرب .. الرجل طلب يعمل إجتماع عاجل للحكومة الروسية .. في الإجتماع ده إتفقوا علي 3 حاجات ..أول حاجة إن الروس حيبعتوا للإمبراطورية النمساوية المجرية يقولولهم إن مهلة 48 ساعة دي مش كفاية و أكيد الصرب حيحتاجوا وقت يفكروا .. ثاني حاجة إن الروس برده بعتوا للصرب قالولهم متحاولوش تنشفوا دماغكوا وماينوا للنمساويين و وافقوا علي شروطهم .. في حالة إن كل الحلول الدبلوماسية فشلت فوزارة الدفاع أعلنت تعبئة جزئية للقوات المسلحة وده كان القرار اللي أولا ملوش أي ستين لازمة دلوقتي و ثانيا خرب الدنيا فوق دماغ الكل زي ما حتشوف كمان شوية.
• الظهر (سيرجي سازانوف) قعد مع السفير الفرنساوي و السفير الإنجليزي لروسيا .. الفرنساويين قالوا إحنا في ظهركوا في أي حاجة تطلبوها .. الإنجليز قالوا قلبي معاك يا (سيمبا) بس إحنا بصراحة كده مش ناويين نوسخ إيدينا في الخناقة دي.
• بعد الظهر إتعمل إجتماع تاني للحكومة الروسية وفي الإجتماع ده (سيرجي سازانوف) بلغهم بإن الفرنساويين في ظهرنا .. هنا قرار الحكومة كان بما إن الفرنساويين معانا فخلي الحلول الدبلوماسية تفشل ولا يهمنا .. إحنا حنقف في ظهر صربيا حتي لو ده معناه الحرب.
• بليل السفير الألماني في روسيا راح قابل (سيرجي سازانوف) .. السفير الألماني كان شوية و حيترجاه روسيا تتراجع عن قرار التعبئة الجزئية للقوات المسلحة .. يقال إن الإتنين شدوا مع بعض وفي وسط الزعيق السفير الألماني قاله إن لو الممالك الأوروبية موقفتش جنب بعضها في الأزمة دي فقول علينا يا رحمن يا رحيم وده في رأيي أكتر توقع ثبت صحته أنا قريت عنه في حياتي .. خلال خمس سنين بس من القعدة دي كل الممالك الأوروبية وقعت .. الدولة العثمانية .. الإمبراطورية الألمانية .. الإمبراطورية النمساوية المجرية .. الإمبراطورية الروسية .. في وسط الزعيق (سيرجي سازانوف) قال الحاجة اللي لو السفير الألماني كان فاهم معناها كويس مكنتش الحرب العالمية الأولي قامت أصلا .. (سيرجي) قال للسفير الألماني لو الإمبراطورية النمساوية المجرية إحتلت صربيا إحنا حنخش الحرب .. أقف بقي هنا .. فاكر لما قلتلك إن النص المجري من الإمبراطورية وافق علي الحرب بشرط إن الإمبراطورية متحتلش صربيا و النمساويين قالوا أمين؟ .. أهو لو كان النمساويين قالوا للألمان هم ناويين يعملوا إيه وكانت المعلومة دي في دماغ السفير الألماني في روسيا كان زمانه قالها ل(سيرجي) اللي كان حيقول مقولتش كده ليه من الصبح يا رجل .. وكان الروس سابوا النمساويين يرنوا الصرب علقة و ياخدوا بعضهم و يمشوا .. إنه النحس يا سادة.

الأيام الأخيرة قبل ضرب أول طلقة .. العند اللي يولد الكفر:

في نفس يوم 24 يوليو 1914 برده إتعمل إجتماع للقيادة السياسية الصربية في العاصمة بلجراد .. لحد نص الليل تقريباً كان فيه شبه إجماع في الإجتماع ده لإن لا يكلف الله نفسا إلا وسعها .. إحنا حنوافق علي كل شروط النمساويين و أمرنا لله .. لسه حيمضوا علي الورقة إتقالهم إستنووووووا .. الروس أعلنوا التعبئة الجزئية لقواتهم المسلحة .. ده القرار اللي طلع من الحكومة الروسية في نفس اليوم الصبح لو تفتكر .. رد الصرب كان ضربة معلم .. هم وافقوا علي تسعة من العشر شروط بتوع الإمبراطورية النمساوية المجرية .. الشرط الوحيد اللي إترفض هو إن البوليس النمساوي هو اللي يحقق في جريمة إغتيال الأرشيدوق (فرانز) وده كان متوقع زي ما قلنا .. بس الفكرة في الNote اللي إتكتبت في أخر الرد .. الخازوق اللي إنت بتسيبه في أخر الإيميل بتاع الشغل عشان تلبس الإستشاري في الحيط .. الخازوق كان إن لو إنتوا يا نمساويين زعلانين ومش عاجبكوا ردنا فإحنا موافقين نعمل قعدة عرب زي ما اللي كانت بتتعمل أيام The Council of Europe لو تفتكر.

هنا حيظهر دور بني ادم انا جبت سيرته في الأول اللي هو (ليوبولد بيرتهولد Leopold Berchtold) .. ده في حالة إنك نسيت يبقي وزير خارجية الإمبراطورية النمساوية المجرية .. ده الدراع اليمين للإمبراطور (فرانسيس جوزيف) اللي زي ما قلتلك كان عدي الثمانين سنة وبعد إغتيال الأرشيدوق (فرانز فيرديناند) ولي العهد ف(بيرتهولد) بقي فعليا أهم بني ادم في الإمبراطورية .. زي ما قلتلك ده رجل غلبان وده في حد ذاته مش عيب .. المشكلة إن الغلابة لما بيتحطوا في مراكز سلطة بيتداس علي وشهم إلا إذا هم قرروا يبقوا ديابة .. (بيرتهولد) عشان كان لسه غلبان فهو بكل حسن نية راح إتكلم مع الألمان يسألهم إيه رأيكوا في الرد بتاع الصرب؟ .. لحد دلوقتي القيصر (فيلهلم الثاني) مكنش لسه رجع من أجازته وزي ما تقول كد ه لسه قافل تليفونه ف(بيرتهولد) ملقاش حد يتكلم معاه غير وزير الخارجية الألماني (ثيوبولد فون بيتمان هولويج Theobald von Bethmann-Hollweg) و القائد العام للقوات المسلحة الألمانية (هيلموت فون مولتكي Helmuth von Moltke) .. الإتنين مسحوا بكرامة (بيرتهولد) الأرض .. يا مهزأ إنت كنت واخد كلمة من القيصر بتاعنا يوم 5 يوليو و قالك بعظمة لسانه بالله عليك إنجز .. النهاردة إحنا بقينا 25 يوليو ولسه مأعلنتوش الحرب علي صربيا .. تعاطف أوروبا معاكوا قرب يخلص .. رد الصرب عليكوا خلي منظركوا وحش قدام الناس .. دلوقتي الصرب بقوا هم اللي عندهم حق .. إنجزوا يا شوية بط بلدي.

(بيرتهولد) ملقاش حل غير إنه يرجع تاني النمسا يتكلم يمكن لأول مرة مع قائد القوات المسلحة بتاعة الإمبراطورية النمساوية المجرية (كونراد فون هوتسيندورف Conrad von Hotzendorf) وده يوريك قد إيه الحقيقة حجم الفشل اللي كانت فيه القيادة السياسية لدولة كبيرة زي النمسا و المجر .. يعني انت من يوم 5 يوليو وانت مقرر إنك حتحارب صربيا ودلوقتي بقينا يوم 25 يوليو ومحدش فكر يرفع سماعة التليفون يكلم قيادة الجيش يبلغهم .. رد (كونراد فون هوتسيندورف) هو نفس ردك لما يجيلك مدير المشروع يقولك يا هندسة عايزين التسليمة بكرة .. تسليمة ايه يا عنيا اللي انت جاي تقول عليها؟ .. انت عشان تعلن التعبئة العامة للجيش و تنقلهم للجبهة و تحط خطة للحرب و أبقي عارف انا ححرك أنهي كتيبة؟ إمتي؟ و ليه؟ و إزاي؟ محتاج علي الأقل خالص 3 اسابيع .. ده معناه إني مش حبقي جاهز إلا علي يوم 14 اغسطس .. وبعدين تعالي هنا يا مهزأ انت .. انت جايلي دلوقتي تقولي إحنا داخلين حرب ضد صربيا و روسيا سبقتنا و أعلنت التعبئة العامة لجيشها؟ .. انت عبيط يلا؟ .. اسمع بودني خبر إن الروس لغوا قرار إعلان التعبئة بتاعهم و ساعتها نبقي نتكلم في موضوع الحرب ضد صربيا ده.

(بيرتهولد) رجل من كتر ما إتهزق قرر إنه ميبقاش غلبان خلاص .. معلش يعني هم العساكر دول فاكرين إن حوار يعني موضوع التعبئة العامة ده؟ .. هو يجري حاجة لو أعلنت الحرب علي صربيا من غير ما أعلن التعئبة العامة؟ .. من وجهة نظره إن لو هو أعلن الحرب دلوقتي فالصرب حيخافوا و حيوافقوا علي الشرط العاشر من شروط الإمبراطورية النمساوية المجرية .. بمعني اخر .. انا حعلن الحرب عشان الحرب متقومش .. انت متخيل المنطق؟ .. اللي عمله (بيرتهولد)  إنه زي ما انت بتتزنق في تسليمة مش عارف تخلصها فبتبعت التسليمة القديمة علي إنها الجديدة وعبل ما الكلاينت يفهم الغلطة و يرد عليك بميل تكون إنت خلصت شغلك و بعتله التسليمة الصح و تقوله يقطعني شكلي بعتلك تسليمة غلط خد الشغل الصح أهو .. في حالة إنك دخلت الجيش أو دخلت أي كلية عسكرية فإنت غالبا بتسمع الكلام ده و بتقول لنفسك انا مرارتي مش مستحملة .. يعني إيه تعلن حرب من غير ما الجيش يكون جاهز يعني مش فاهم انا؟ .. طب أفرض الموضوع قلب بجد و الروس قواتهم إتقدمت جوه الأراضي بتاعتنا .. لا إحنا جيشنا استدعي .. ولا مجهزين الأكل ولا الشرب ولا السلاح و لا المواصلات ولا الخطة ولا أي حاجة خالص.

يوم 28 يوليو 1914 كان يوم تاريخي .. ده اليوم اللي الإمبراطورية النمساوية المجرية أعلنت الحرب علي صربيا .. ده اليوم اللي أخيرا القيصر (فيلهلم الثاني) رجع من أجازته .. الرجل مشي يوم 5 يوليو وهو بيقول للنمساويين إنجزوا و رجع يوم 28 يوليو لقي إن الحرب أعلنت و إن الصرب ردوا علي البيان النمساوي بطريقة خلت النمساويين شكلهم زي الزفت قدام الناس .. فعليا الإمبراطورية النمساوية المجرية ضاع من إيدها المبرر الأخلاقي للحرب .. أصلك لو إتسالت ليه أعلنت الحرب حتقول ايه؟ .. ما الصرب وافقوا علي تسعة من شروطك العشرة و قالولك لو لسه زعلان من رفضنا للشرط العاشر تعالي نقعد قعدة عرب مع باقي الدول الأوروبية و نشوف إيه يرضيك و يرضينا .. بس النمساويين أساسا رافضين فكرة قعدة العرب دي .. هم عارفين ان موقفهم ضعيف بعد التأخير ده كله .. لو كانوا سمعوا كلام الألمان من بدري و أنجزوا حالهم مكنش زمان الوضع بقي زفت كده .. هنا (فيلهلهم الثاني) هبد هبداية عابرة للقارات .. أقفوا عند بلجراد.

الفكرة إن مدينة بلجراد اللي هي عاصمة صربيا يدوبك فردة كعب من الحدود بين النمسا و صربيا .. إيه المشكلة إن الجيش النمساوي يخش بلجراد يحتلها و يقف علي كده .. واحد انت أحتليت العاصمة فكأنك كسبت الحرب .. إتنين انت مش حتحتاج وقت كبير عشان تخش المدينة وبكده إنت تكون سبقت الروس اللي زي ما قلتلك أعلنوا التعبئة العامة لقواتهم المسلحة يوم 24 يوليو .. تلاتة وده المهم إن بمجرد ما تقول قدام الناس إنك مش ناوي تتقدم أكتر من كده جوه الأراضي الصربية فانت كأنك بتقول للعالم انا جاي أعلم الصرب الأدب بس مش جاي أحتل أرضهم .. حل الي حد ما منطقي من وجهة نظر (فيلهلم الثاني) بس محتاج يتنفذ و بسرعة.

الإقتراح إتكتب و إتختم و طلع من مكتب (فيلهلم الثاني) لوزير خارجيته (ثيوبولد فون بيتمان هولويج) اللي إسمه طويل و مستفز فإحنا حنسميه للتسهيل (بيتمان) .. وزير الخارجية قرأ الكلام و مقتنعش بيه .. طبيعي و مقبول .. في زمانا دلوقتي لو ده حصل وزير الخارجية بيرفع سماعة التليفون يكلم الرئيس يحاول يفهم منه أكتر وجهة نظره و يحاول يقنعه بالعكس .. لكن عشان إحنا في زمن مفيهوش تليفونات و الأهم إننا في زمن الهبيدة فيه كتير ما شاء الله ف(بيتمان) إدي الورقة اللي فيها الإقتراح بتاع أقفوا عند بلجراد لضابط مخابرات الماني وبلغه يوصله للقيادة السياسية بتاعة الإمبراطورية النمساوية المجرية .. لكن .. خلي بالك بقي من الحتة دي .. عشان (بيتمان) أصلا مكنتش عاجباه الفكرة فهو قال لضابط المخابرات حاول متضغطش اوي علي النمساويين .. ومتقولش إن القيصر بيقترح عليكوا الحل ده .. قولهم إن دي مجرد فكرة جاية من ألمانيا .. وافقوا أهلا وسهلا .. موافقوش متقاوحش معاهم.

في نفس اليوم اللي هو 28 يوليو بتوصل إشاعة ل(سيرجي سازانوف) وزير الخارجية الروسي و الإشاعة دي محدش عارف أصلها إيه إن النمساويين بيضربوا بلجراد بالمدافع .. طبعا ده مكنش حقيقي .. زي ما حكيلتلك من شوية فالجنرال (كونراد فون هوتسيندورف) القائد العام للقوات المسلحة النمساوية قال لوزير الخارجية بتاعه إن الجيش مش حيبقي جاهز إلا يوم 14 أغسطس .. بس طبعا (سيرجي سازانوف) مكنش عنده علم بالحكاية دي .. (سيرجي سازانوف) راح لقائد القوات المسلحة الروسية (نيكولاي يانوشكوفيتش Nikolai Yanushkevich) و خده من إيده يقابلوا قيصر روسيا (نيكولاي الثاني) وبلغوه بالخبر اللي جالهم .. النمساويين بيضربوا بلجراد بالمدافع .. وهم قاعدين بيطلع القيصر (نيكولاي الثاني) بقرارإعلان التعبئة العامة .. روسيا حتعلن الحرب علي الإمبراطورية النمساوية المجرية.

يوم 28 يوليو بالليل فكرة إن الحرب حتقوم خلت القيصر (نيكولاي الثاني) مش عارف ينام .. إنت بتتكلم عن حرب حيموت فيها ملايين .. (نيكولاي) قرر إنه يبعت تيليجرام ل(فيلهلم الثاني) قيصر ألمانيا .. الإتنين كانوا صحاب زمان علي فكرة .. في التليجرام (نيكولاي) إترجاه إنه يقنع النمساويين إنهم ميضربوش الصرب .. (فيلهلهم) كان صاحي وجاله التيليجرام .. زي أي إتنين حبيبة متخانقين و سهرانين طول الليل مش عارفين يناموا و واحد فيهم بيضعف ويبعت رسالة واتس للثاني .. رسالة إعتذار أو عتاب بتقلب لاكتر من ساعة شات و أكثر من مكالمة تليفون بتستمر طول الليل لوش الفجر .. أخر الليل (نيكولاي) رفع سماعة التليفون وكلم قائد القوات المسلحة بتاعته (نيكولاي يانوشكوفيتش) .. إلغي قرار التعبئة العامة يا (نيكولاي) .. طب يا فندم يهديك يرضيك .. إلغي الأمر يا (نيكولاي) .. لو إنت فاكر إن ربنا سترها و النحس إتفك .. ده انت طلعت غلبان أوي.

يوم 30 يوليو الصبح الخبر كان إتعرف .. قيصر روسيا لغي التعبئة العامة .. (سيرجي سازانوف) اللي لسبب لا يعلمه إلا الله كان عايز الدنيا تولع راح خبط علي باب بيت رئيس مجلس الشعب اللي الروس بيسموه مجلس الدوما خده من إيده و راحوا خبطوا علي باب بطريرك الكنيسة الأرثوذوكسية اللي هو تقدر تقول إنه شيخ الأزهر عندنا في مصر و خدوا بعضهم و راحوا يقابلوا القيصر .. إجتماع تقدر تقول عنوانه هو إيه اللي انت هببته ده يا قيصر الغبرة انت؟ .. ساعات من الهري .. ساعات من الخناق .. نحارب .. لا مش حنحارب .. نقف جنب صحابنا الصرب .. لا نسيبهم ياخدوا فوق دماغهم من النمساويين .. القيصر (نيكولاي الثاني) خد بعضه و وقف قدام الشباك .. يمكن بيهرب .. يمكن بيحاول يهدأ .. بس وهو واقف جه برده متفهمش منين واحد من المساعدين بتوعه وقف جنبه و قاله .. جلالتك كلنا عارفين إن القرار صعب عليك .. كلمة عابرة قالها موظف يمكن محدش فينا حيهتم إنه يعرف إسمه ولا يعرف منصبه حتي بس كانت صعبة أوي علي القيصر .. كلمة خلته يصرخ من جواه .. لا بقي .. انا في الشدة شديد .. وفي القوة قوي .. أوي أوي .. انا مش مجرد شاب أهبل بريالة مش مسئول عن تصرفاته .. وزي ما الإعلان اللي ملوش معني اللي بيقول انت تقدر القيصر بصلهم و قالهم .. إنها الحرب.

ده في الوقت اللي (بيرتهولد) اللي بفكرك إنه دلوقتي فعليا اللي في إيده كل حاجة في الإمبراطورية النمساوية المجرية كان بيقرأ الورقة اللي جياله من القيصر (فيلهلم الثاني) بس هو متخيل إنها إقتراح جاي من ألمانيا اللي بتقول خش صربيا بس أقف عند بلجراد .. هنا انت محتاج تفهم حركة كش ملك اللي إتعملت لما قيصر روسيا قرر إنه يدوس في قرار التعبئة العامة ده:

زمان وقت القصة اللي بنحكيها إنتصار أو هزيمة الجيش بيعتمد بشكل انت لا تتخيله علي توقيت إعلان التعبئة العامة .. كلمة تعبئة عامة أو General Mobilization هي إنك تقول لكل ضباط و عساكر الجيش إتجمعولي في مكان معين حنقولكوا عليه .. كل ضابط متحضرله الحاجات اللي هو حيعملها .. أكل و تسليح و بنزين العساكر كلهم جاهز .. ده كمية شغل بياخد أسابيع و اللي بيتأخر فيه بيخسر الحرب .. مش مهم تسليحك إيه؟ وعدد جيشك كام؟ .. لو عساكرك راحت ميدان المعركة متأخر أو راحت من غير ما يبقي معاها سلاحها و أكلها و شربها فهم حيخسروا .. لما (نيكولاي الثاني) أعلن التعبئة العامة و لما لغي القرار رجع أكده تاني فكده روسيا خلاص قالت انا ححارب .. ده حط النمساوين في خانة اليك .. هم كمان لازم يعلنوا التعبئة العامة وإلا روسيا حتدوس علي وشهم لإن زي ما قلتلك اللي بيعلن التعبئة العامة الاول و بيقدر ينقل جيشه بتسليحه و أكله وشربه للجبهة الاول تقدر تقول إنه كسب الحرب .. لما النمساويين يعلنوا التعبئة فلازم الألمان كمان يعلنوها عشان النمساويين يبقوا صحابهم .. ولو الألمان أعلنوا التعبئة يبقي لازم الفرنساويين كمان يعلونها .. كل الدول دي أعلنت التعبئة حيبقي من رابع المستحيلات إن الحرب متقومش .. خلال فات الأوان علي رأي الست (أم كلثوم) .. ده يفسرلك الطريقة اللي ألمانيا أعلنت بيها الحرب علي روسيا .. اللي حصل إن السفير الألماني في روسيا راح زار (سيرجي سازانوف) وزير الخارجية و إترجاه إنه يلغي قرار التعبئة العامة للقوات المسلحة الروسية .. إترجاه يمكن 3 مرات منها مرة السفير ركع علي رجله قدامه و هو بيعيط إن الحرب دي حيموت فيها ملايين بس (سيرجي) ولا إتهز .. السفير قام و طلع ورقة من جيبه و إداها ل(سيرجي) وقاله يؤسفني أبلغك إن بلدي بتعلن الحرب علي بلدك .. مش لسبب غير إن قطر التعبئة العامة إتحرك و القطر ده مش بيقف في محطات.

أنا بس حابب أختم باني أتكلم شوية عن البني ادمين .. مهم بالنسبة لي إنك لما تبص علي التاريخ تبقي فاهم إن اللي عمله هم بني ادمين زيهم زيك .. ناس يمكن متفرقش كتير عنك .. خد عندك قيصر روسيا (نيكولاي الثاني) مثلاً .. ده رجل رمي بلده كلها في التهلكة .. ده الرجل اللي بسببه الثورة البلشفية قامت و روسيا بقي إسمها الاتحاد السوفيتي .. كل ده بسبب إنه مكنش عايز يحكم اصلاً .. هو كان شغال شغلانة مش عاجباه ومش بيحبها وده خلاه مش مؤهل ليها .. هو فعليا ميفرقش كتير عن أي شاب مضطر يشتغل شغلانة هو مش بيحبها لمجرد إنه مجبر يشتغلها .. وشوف الإجبار ده وإنه بيعمل حاجة هو كارها عمل مصايب إزاي .. خد عندك إمبراطور الإمبراطورية النمساوية المجرية (فرانسيس جوزيف) .. زي ما قلتلك في أحداث الحكاية الرجل ده كان عدي الثمانين سنة .. رجل بنته ماتت وهي صغيرة .. إبنه إنتحر عشان كان بيحب واحدة بس هو رفض يوافق علي الجوازة .. مراته إتقتلت وهي بتتفسح في أوروبا .. حتي ولي عهده اللي هو أساسا مكنش طايقه إتقتل .. ده يوريك انك قدام رجل مش باقي علي حاجة .. رجل لو يمكن قعدته مع دكتور نفسي حيقولك إنه مصاب بدرجة متقدمة جداً من الاكتئاب  .. رجل محتاج يتعالج مش يحكم .. كان ممكن (فرانسيس جوزيف) ينقذ ملايين لو كان تدخل و قال فككوا من وجع القلب و اللي مات مات .. بس إنت قدام رجل مبقاش فارق معاه لدرجة إنه فعليا بقي عادي إن الدنيا تولع  .. يكفي إني أقولك إن (فرانسيس جوزيف) مكنش في دماغه أصلا إنه يقرأ بيان إعلان الحرب اللي كان فيه العشر شروط اللي حطتها بلده لصربيا عشان تقبلهم كلهم أو إن الحرب تولع.

المصادر:

فيديو بعنوان World War I: The Seminal Tragedy – The Concert of Europe – Extra History – #1 نشر علي YouTube وده لينك الفيديو:
https://www.youtube.com/watch?v=S-wSL4WqUws&list=PLhyKYa0YJ_5Aq7g4bil7bnGi0A8gTsawu&index=5.

فيديو بعنوان World War I: The Seminal Tragedy-One Fateful Day in June-Extra History- #2 نشر علي YouTube وده لينك الفيديو:
https://www.youtube.com/watch?v=kyCmh9G1fpo&list=PLhyKYa0YJ_5Aq7g4bil7bnGi0A8gTsawu&index=6

فيديو بعنوان World War I: The Seminal Tragedy-The July Crises-Extra History-#3 نشر علي YouTube وده لينك الفيديو:
https://youtube.com/watch?v=zroZqvr4whk&feature=share&fbclid=IwAR0kFzu3Ga36tYTH-WFKxsyN1ivUlMlCsFsI06snC0RhQ4GBsUMskq0gkvc

فيديو بعنوان World War I-The Seminal Tragedy-The Final Act-Extra History-#4 نشر علي YouTube وده لينك الفيديو:
https://youtube.com/watch?v=WukYrrTH3ms&feature=share&fbclid=IwAR35nHjfrN4u5d-JkzEZsx7d4tISMOG8HTFyqsEoEuiZ8AHlpzw-Gp-Ko14

فيديو بعنوان World War I-The Seminal Tragedy-Lies-Extra History نشر علي YouTube وده لينك الفيديو:
https://youtube.com/watch?v=aiKGPAMIWKs&feature=share&fbclid=IwAR3m55kLqBTZj0GEKVMFeGhjQ6sDZ2BZq4GCknTSTGPCuHh6eCdPBXWC7Bo