الحروب طول عمرها زيها زي أي سلعة في الدنيا محتاجة اللي يسوقلها .. الماركيتينج مهم في الحروب .. في تاريخنا مثلاً حتلاقي إن عشان الرئيس (جمال عبدالناصر) الله يرحمه يبعت قوات لليمن باع لينا فكرة إن القوات دي رايحة عشان تحمي القومية العربية .. عشان الرئيس (محمد حسني مبارك) الله يرحمه يبعت قوات للكويت وقت حرب الخليج الثانية هو باع لينا فكرة إن القوات دي رايحة تنفذ كلام ربنا في سورة الحجرات لما قال “وإن طائفتان من المؤمنين اقتتلوا فأصلحوا بينهما فإن بغت إحداهما علي الاخري فقاتلوا التي تبغي حتي تفيء إلي أمر الله فإن فاءت فأصلحوا بينهما بالعدل وأقسطوا إن الله يحب المقسطين” .. طبعاً هم نسوا يكملوا إن الآية القرآنية دي كانت موجهة لينا كمسلمين مش موجهة للأمريكان بس ما علينا مش قضيتنا دلوقتي .. اللي أنا عايز أقوله إن عشان تبعت رجالتك يموتوا في أي حرب لازم تبيع الحرب دي لشعبك ولازم تبيعها صح عشان الشعب يقتنع .. اللي أنا عايز أتكلم عنه النهاردة هو إزاي مؤسسة الرئاسة الأمريكية بتبيع لشعبها حرب أوكرانيا .. بمعني أخر .. إيه اللي يخليني أنا كمواطن أمريكي بسيط أقبل إن فلوس الضرائب بتاعتي تتصرف في السلاح اللي بيروح أوكرانيا؟
يمكن عشان المواطن الأمريكاني البسيط مش مثقف بطبعه أو يمكن عشان الأمريكان مش شاغلين دماغهم أوي باللي بيحصل في الدنيا طالما أكلهم وشربهم وبنزينهم وخمرتهم مكفياهم فحتلاقي إن المبرر ورا مشاركة أميركا في أي حرب هو هو مبيتغيرش أيا كانت الحرب دي فين وضد مين .. الماركتينيج دايما بيبقي واحد سواء هم باعتين عساكرهم فييتنام أو العراق أو ليبيا أو سوريا أو أفغانستان ودلوقتي أوكرانيا وهو إن دي حرب لحماية الديموقراطية والحرية وحقوق الإنسان وبناء عليه اللي عملته روسيا ده اعتداء واضح وصريح علي القيم الأمريكية .. طبعاً بعد شوية كلنا بنكتشف إن كل ده طلع فنكوش وغالباً بيطلع الناس اللي الأمريكان رايحين يحاربوا معاهم ولاد كلب أكتر من الناس اللي الأمريكان رايحين يحاربوا ضدهم وده اللي بيخلي الغزو الروسي لأوكرانيا حالة خاصة شوية تستحق إننا نقف قدامها ونتكلم عنها بشوية هدوء لإن فيه كلام كتير علي إن الرئيس الأوكراني (فلوديمير زيلينسكي Volodymyr Zelenskyy) واحدة واحدة بقي بيقلب علي النسخة الأوكراني من (صدام حسين) الله يرحمه لإنه مثلاً طلع قرار بحل 11 حزب سياسي وشوف يا أخي سبحان الله يعني كلها أحزاب شايفة إن يمكن مصحلة أوكرانيا كانت ولازالت إنها تقرب من روسيا مش من الغرب.
خلينا نتفق إن الغزو الروسي نفسه لأوكرانيا غلط وجريمة حرب ومكنش ينفع يحصل .. بس في نفس الوقت لازم برده نتفق إن الغزو ده عمره ما كان حصل لولا الاستفزاز الغربي لروسيا بإنهم عرضوا فكرة إن ليه لا أوكرانيا تنضم لحلف شمال الأطلسي اللي انت عارفه باسم نايتو NATO وقبليها إن الغرب شارك في الانقلاب السلمي اللي حصل في أوكرانيا سنة 2014 لما تمت الإطاحة بالرئيس الأوكراني المنتخب (فيكتور يانكوفيتش Viktor Yanukovych) اللي كان من الناس اللي بتحب تمسك العصاية من النص .. هو مستعد إن بلده يبقي ليها بيزنس مع الإتحاد الأوروبي بس ده مش معناه إن بلده تطلب الطلاق من روسيا .. بمعني أخر .. الحرب دي مش حتخلص إلا بعد اتفاق سلمي يقول نصاً إن أوكرانيا مش حتنضم لحلف شمال الأطلسي والأهم إن الأوكرانيين من أصول روسية اللي عايشين في شرق البلد يبقي ليهم حق الحكم الذاتي .. غير كده نزيف الدم والفلوس مش حيخلص والروس مش حيسكتوا غير وأوكرانيا دي عبارة عن كوم تراب .. علي الناحية الثانية الأمريكان باصين للحرب دي بطريقة مختلفة شوية .. الأمريكان عايزين حاجتين ملهمش ثالث:
- إن قطاع شركات التسليح أو ما يسمي Military Industrial Complex يعمل فلوس حلوة من السلاح اللي بيروح لأوكرانيا وده شيء متفق عليه من قطبي السياسة الأمريكية اللي هم الحزبين الديموقراطي اللي بينتمي ليه الرئيس جدو (جو بايدن Joe Biden) والحزب الجمهوري اللي بيسيطر علي البرلمان تحت زعامة (ميتش ماكونيل Mitch McConnell) اللي بنفسه اعترف إن سياسة إرسال سلاح لأوكرانيا بالنسبة لأميركا هي حل أرخص وأفضل بكتير من إرسال قوات برية .. طب انتوا ناويين تصرفوا كام؟ قالك 150 مليار دولار .. اللي هو عايز تقولهم يا لهوي وكده أرخصلكوا؟ .. السلاح اللي بيروح أوكرانيا ده المفروض إنه سلاح كان محطوط عشان خاطر القوات المسلحة الأمريكية تستخدمه فلما انت تبعته أوكرانيا وتقوم ضاخخ فلوس في قطاع شركات التسليح عشان تعوض السلاح اللي راح ده بسلاح جديد في إيد العساكر الأمريكان يبقي الشركات حتستفيد والقوات المسلحة الأمريكية حتستفيد.
- طول ما الحرب دي مكملة فروسيا بتنزف فلوس ولإن أميركا أغني من روسيا فمع كل يوم الحرب دي بتكمل انهيار الاقتصاد الروسي بيقرب أكتر .. بمعني أخر .. تولع أوكرانيا باللي فيها .. متنساش كمان إن الطريقة دي مقصودة عشان الأمريكان يقولوا للصين ده حيبقي مصيركوا لو قررتوا تقربوا من تايوان .. الأمريكان قاصدين يبقوا زي شخصية (جابر الشرقاوي) اللي قدمها الفنان (سامي سرحان) الله يرحمه في فيلم فول الصين العظيم وهم بيشاوروا علي روسيا وبيقولوا للصينيين متبقوش عبط زي الناس دي .. انتوا مش حمل انكوا تعيشوا في عزلة اقتصادية وانكوا تخسروا نص الاحتياطي النقدي الأجنبي بتاعكوا في سنة.
في نفس الوقت انت في الماركيتينج بتتعلم إن أول ما الزبون يفوق ويفهم إن البضاعة بايظة فانت مينفعش تكمل دعاية خلاص لإن ده حيضر سمعتك في السوق .. بمجرد ما الناس تفهم إن الحرب فنكوش بتلاقي إن الإعلام الأمريكي من نفسه بدأ يبطل يتكلم عنها لحد ما الناس تنسي إن ليها عساكر هناك أصلاً .. ده اللي حصل في العراق وأفغانستان لإن فيه أمريكان كتير اتصدموا لما شافوا قواتهم وهي بتنسحب من العاصمة كابول بعد سيطرة طالبان عليها مش لإن طالبان سيطرت علي العاصمة .. لا خالص .. الصدمة جت إن الأمريكان مكانوش عارفين أصلاً إن ليهم عساكر لسه في أفغانستان .. اللي بيحصل دلوقتي إن الكلام علي أوكرانيا حيبدأ يقل عشان يحل محله موضوع جديد .. الصين .. انهيار روسيا من وجهة نظر الأمريكان بقي مسألة وقت مش أكتر طول ما الحرب مكملة فده بيخليهم يحضروا نفسهم للسبوبة الجديدة والمرة دي حتبقي سبوبة كبيرة حتجيبلهم قرشين حلوين أوي.
عندنا في مصر بقينا بنتريق علي كلمة عقلية Mentality اللي هو منك لله يا (محمد صلاح) بس الحق يتقال إن Mentality بتاعة الأمريكان بقي بيحركها الإنفاق العسكري .. الناس دي من سنة 1945 ودي السنة اللي خلصت فيها الحرب العالمية الثانية وهم بيصرفوا سنوياً 45-90% من ميزانيتهم علي الإنفاق العسكري بشكل أو بأخر .. الإمبراطورية البريطانية قامت علي أسطول جامد تنين بيربط مستعمرات الإمبراطورية ببعضها .. الإمبراطورية الأمريكية قائمة علي قوات مسلحة جاحدة تقدر تمد ايدها علي أي حد بحيث إن تهون أي حاجة قصاد الإنفاق العسكري .. كنا اتكلمنا قبل كده عن أزمة سقف الديون بتاعتهم وقلنا إن الحاجة الوحيدة اللي الجمهوريين والديموقراطيين اتفقوا عليها إن إحنا ممكن نتقشف في أي مصاريف إلا الإنفاق العسكري .. مش مشكلة التأمين الصحي ومش مشكلة البنية التحتية .. المهم العساكر .. مش مهم إن المواطنين ميلاقوش أكل ومش مهم إن الديون تبقي متلتلة علينا .. المهم الجيش .. المشكلة إن الناس دي مقتنعة بحق وحقيقي باللي هم بيعملوه .. تاني .. الأمريكان مقتنعين بإن الاقتصاد الروسي حينهار وإن العزلة الاقتصادية اللي فيها روسيا دلوقتي حتمسح بكرامة الروبيل اللي هو عملة روسيا الأرض ورغم كده تيجي تبص علي معدلات التضخم بتاعة أميركا تلاقيها أعلي من اللي في روسيا اللي هو لا تخرج قبل أن تقول سبحان الله.
التاريخ مش بيعيد نفسه إحنا اللي أغبياء .. سنة 1989 لما الإتحاد السوفيتي إنهار وقتها الرئيس السوفيتي (ميخائيل جورباتشوف Mikhail Gorbachev) جاله وعد من وزير الخارجية الأمريكي (جيمس بايكر James Baker) ومن وزير خارجية ألمانيا الغربية (ديتيريش جينشير Dietrich Genscher) إن والإنجيل حلف شمال الأطلسي مش حيتوسع بره حدود ألمانيا الموحدة وإن الدول اللي كانت زمان جزء من الإمبراطورية السوفيتية حتفضل تحت نفوذ روسيا .. وقتها الناس صدقت إن خلاص كده يا جدعان مبقاش فيه داعي إن القوتين العظمتين الكبار في العالم يصرفوا مليارات علي إنفاقهم العسكري .. أميركا و روسيا حيعيشوا في تبات ونبات .. بس محدش كان عامل حساب Military Industrial Complex .. الناس دي فضلت تفرك وتضغط وتزن عشان دلوقتي حلف شمال الأطلسي يضم دول زي بولندا والمجر وجمهورية التشيك وبلغاريا وأستونيا ولاتفيا وليثوانيا ورومانيا وسلوفاكيا وسلوفينيا وألبانيا وكرواتيا ومونتينيجرو وشمال مقدونيا اللي هي دول كانت يا إما جزء من الإتحاد السوفيتي يا تحت نفوذه .. الحرب بيزنس ولإنه بيزنس فلازم يتعمله ماركتينج وفي الأخر إحنا اللي بندفع الثمن.
المصدر:
- مقالة بعنوان They lied about Afghanistan, They lied about Iraq. Now they’re lying about Ukraine. نشرت في موقع Salon وده لينك المقالة الأصلية:
https://www.salon.com/2023/07/08/they-lied-about-afghanistan-they-lied-about-iraq-now-theyre-lying-about-ukraine/
