كانت فيه زمان رواية إسمها The Hunt for Red October كتبها واحد إسمه (توم كلانسي Tom Clancy) إتعملت فيلم بنفس الإسم والحقيقة إن الفيلم تحفة ويستحق إنك تتفرج عليه .. المهم إن أحداث الرواية دي بتدور حول قبطان غواصة نووية سوفيتية إسمه (ماركو رامييس Marco Ramies) قرر يهرب لأميركا بالغواصة بتاعته وطبعاً السوفييت أول ما عرفوا جريوا وراه وكانت مطاردة في المحيط الأطلنطي ما بين غواصة وأسطول .. المشكلة إن الأمريكان صحيوا الصبح لقوا إن الأسطول السوفيتي كله بيتحرك وبيجري جاي عليهم وبشكل طبيعي جداً الأسطول الأميريكي هو كمان أتحرك وبقي عندك مهرجان السفن الحربية للجميع في قلب المحيط الأطلنطي .. في الرواية كانت فيه جملة قالها قبطان حاملة طيارات أمريكاني إن وسط الفوضي دي أكيد فيه عسكري أو ضابط أو حتي قبطان حيغلط والغلطة حتكون السبب اللي حتقوم عليه الحرب العالمية الثالثة .. خلاصة الفكرة إن لما يبقي عندك دولتين عمالين يحشدوا قواتهم المسلحة بشكل مبالغ فيه علي طول حدودهم مع بعض فمش حتفرق هي اللعبة السياسية إيه .. مش حتفرق إذا كان رئيس الدولة الأولانية عايز يلوي دراع رئيس الدولة الثانية .. وسط الفوضي وتوتر الأعصاب ده حتتضرب طلقة مش مقصودة وكل حاجة حتولع .. ليه أنا بقول المقدمة الطويلة دي؟ .. عشان اللي (توم كلانسي) كان خايف منه في روايته بيحصل هو هو في الواقع بس بين أوكرانيا وروسيا.
الموضوع بإختصار شديد إن القوات المسلحة الروسية نشرت علي طول حدودها مع أوكرانيا حوالي 100,000 مقاتل والمشكلة إن محدش فاهم هم الروس عملوا كده ليه؟ .. إيه اللي يخليك تحرك الكم ده من عساكرك؟ .. تكاليف نقلهم لوحدها خزعبلية لإن العساكر دي عايزه تاكل وتشرب وتخش الحمام ومعداتهم حتحتاج يتعملها صيانات ولو حد فيهم تعب حيحتاج يتعالج وحاجة في منتهي النكد يعني .. عشان بس أبقي واضح معاك محدش عارف هم الروس عايزين إيه .. نقول كمان .. محدش عارف هو إيه اللي حيحصل .. اللي حنحاول نعمله سوا النهاردة إننا نشرح وجهتين النظر: ليه الغزو الروسي لأوكرانيا قرب؟ وليه اللي بيحصل ده كله تهويش؟
وجة النظر الأولي: ليه الغزو الروسي لأوكرانيا بقي فاضل عليه تكة؟
في أي خناقة في الدنيا حتلاقي فيه البني أدم اللي أنا بسميه شرارة اللي عايز الدنيا تولع .. النوع ده من البني أدمين مبيستريحش نفسياً غير لما يخربها ويقعد علي تلها والشخص ده في الخناقة بين روسيا وأوكرانيا يبقي رئيس بيلاروسيا (أليكساندر لوكاشينكو Aleksandr Lukashenko) والشخصية بنت الوس#% دي حنتكلم عنها كمان شوية بس حاول تتخيل إن الخناقات بين الدول عاملة زي الطبيخ له مقادير ولو المقادير كلها إتجمعت مع بعض فالخناقة بتولع .. وجود حد زي (لوكاشينكو) ده مجرد جزء من مكونات كتير بسم الله ما شاء الله كلها جاهزة في الخناقة بين أوكرانيا وروسيا .. عندك إن العلاقة بين أوكرانيا وروسيا طويلة وبقالها سنين وطول عمر أوكرانيا جزء من التراب الروسي ومستقلتش إلا بعد إنهيار الإتحاد السوفيتي وده بيبقي جزء مهم من المقادير إن الروس شايفين إن الأوكرانيين دول مينفعش يبقي عندهم دولة مستقلة أصلاً والمفروض يبقوا جزء من بلدنا اللي هو نفس إحساس الصينيين تجاه تايوان .. نقطة تانية إن زي ما الصينيين عندهم إحساس إنهم لو حبوا يغزوا تايوان فالموضوع حيخلص في ساعة ونص فبرده الروس عندهم إقتناع إنهم لو حبوا يعني يقدروا يدوسوا علي وش الأوكرانيين .. يبقي في رأيي أهم إتنين مقادير في الخناقة دي .. الأولاني هو الفلوس والثاني هو إن محدش فاضي لأوكرانيا ودول محتاجين شوية شرح.
أولاً نقطة الفلوس .. في السبع سنين اللي فاتوا حصلت حاجات كتير الحقيقة بين روسيا وأوكرانيا يمكن إحنا منعرفش عنها حاجة بسبب إن التغطية الإعلامية للي بيحصل هناك مش مكثفة أوي .. إنك تحتل بلد بالجملة موضوع مكلف فشخ وزي ما أنا قلت من شوية إن الروس من جواهم مقتنعين إن أوكرانيا دي حتة من أرضهم وحياخدوها يعني حياخدوها فهم قالوا لنفسهم طب ما ناخدها بالقطاعي أهو تبقي أرخص شوية .. الموضوع بدأ بإحتلالهم لشبه جزيرة القرم Crimea في إبريل 2014 .. وقتها اللي كان بيحكم أوكرانيا رئيس شخشيخة في إيد الروس إسمه (فيكتور يانكوفيتش Viktor Yanukovych) قامت ضده مظاهرات شعبية تقدر تسميها النسخة الأوكراني من ثورة يناير والرجل تنحي عن الرئاسة .. شوية وطلعت تقارير قالت إن الروس كانوا عاملين خطة (فيكتور يانكوفيتش) كان موافق عليه بتقول إن أوكرانيا حتتقسم شرق وغرب بحيث شرق أوكرانيا اللي هو له حدود طويلة مع روسيا وعايش فيه ناس كتير بتتكلم روسي مش أوكراني حتتسمي روسيا الجديدة أو نوفوروسيا Novorossiya ودي الخطة اللي بتتطبق دلوقتي بس علي نار هادية ودلوقتي الكلام علي حتة إسمها إقليم دونباس Donbas.
اللي حصل إن يدوبك بعد الروس خدوا شبه جزيرة القرم فيه مسلحين موالين لروسيا سيطروا علي مدينتين في شرق أوكرانيا اللي هو دونيتسك Donetsk ولوهانسك Luhansk ودول مناطق أولاً يدوبك فرده كعب من الأراضي الروسية وثانياً عايش فيها ناس بتتكلم روسي .. معني كلامي عشان متوهش إن زي ما الروس خدوا شبه جزيرة القرم وضع يد فلو حصل وفعلاً تدخلوا عسكرياً في أوكرانيا فهم حياخدوا إقليم دونباس بس بحيث قواتهم البرية تقف عند نهر الدنيبر .. حط كمان في إعتبارك المساحة .. أوكرانيا هي ثاني أكبر دولة في أوروبا من حيث المساحة بعد روسيا .. أوكرانيا كمساحة هي أكبر من ألمانيا ومن بولندا ومن فرنسا وبالتالي مش منطقي إنك عسكرياً تحتل البلد كلها بس إنت تقدر تقسمها حتت .. إنت خدت شبه جزيرة القرم ودلوقتي الدور علي علي الدونباس .. شوية وحيجي دور العاصمة كييف.
ثانياً نقطة إن محدش حيسمي علي أوكرانيا .. الروس عندهم يقين إن ساعة الجد محدش حيقف ورا أوكرانيا .. فكك من الشعارات اللي بتترفع من الإتحاد الأوروبي وأميركا .. أوكرانيا مش عضوة في حلف شمال الأطلنطي NATO وبالتالي مفيش أي مبرر يخليهم يتدخلوا في حالة إن الروس غزوا أوكرانيا .. وبعدين لو الأمريكان كانوا عاملين إعتبار لمصير أوكرانيا كانوا عملوا حاجة بعد إحتلال روسيا لشبه جزيرة القرم سنة 2014 .. صحيح إن الأوكرانيين بياخدوا سلاح أمريكاني من ضمنه مثلا صواريخ جافلين Javelin المضادة للدبابات بس أكتر من كده مفيش.
هنا يجي دور الكلام عن شرارة .. الشخصية الوس$% اللي عايز يشوفها بتولع .. (أليكساندر لوكاشينكو) .. عشان بس أوريك إزاي الرجل ده وسخ فعايزك تعرف إنه جاب لاجئين من سوريا بطيارات هو دفع ثمنها جابهم عنده بيلاروسيا وقالهم إنه حيسربهم علي ليتوانيا .. إشمعني يعني؟ .. دلوقتي ليتوانيا ليها حدود مشتركة مع بولندا وبولندا عضوة في الإتحاد الأوروبي فلما اللاجئين دول يمشوا جوه ليتوانيا لحد حدودها مع بولندا فهو كده خزوق الإتحاد الاوروبي لإن الأوروبيين اليومين دول فيهم عيب غريب جداً إن اللاجئين بالنسبة ليهم زي الصراصير بالنسبة للبنات متفهمش إيه اللي بيحصلهم لما يشوفوهم .. (لوكاشينكو) عارف ده كويس .. هو فعلياً حول اللاجئين لسلاح في إيده عشان مش بس يرخم علي الأوروبيين وينكد عليهم عيشتهم ده كمان عشان يلوي دراعهم وده يوريك إنك بتتعامل مع بني أدم معندوش مشكلة يستخدم معاناة اللاجئين كسلاح في إيده عشان هو شخصية وس%^.
وجهة النظر الثانية: ليه كل ده مجرد تهويش؟
عشان تفهم وجهة النظر دي حاول تتخيل إن ده جزء من خطة الخداع الإستراتيجي بتاعة الروس اللي شبه اللي كان الرئيس (محمد أنور السادات) الله يرحمه بيستخدمها ضد الإسرائيليين قبل حرب أكتوبر 1973 .. في إبريل 2021 هم عملوا كده برده لما حشدوا قواتهم البرية علي طول حدودهم مع أوكرانيا .. ليه بيعملوا كده؟ .. مجرد إنك تقول للأوكرانيين العو جه العو حضر .. هل فيه تفسير تاني غير ده .. أصل ليه علي حسب كلام التقارير اللي طالعه من المخابرات الأوكرانية تنشر 40,000 مقاتل في شبه جزيرة القرم وزيهم علي طول حدودك مع الدونباس .. فيه كذا معلومة لما تحطهم جنب بعض حتبدأ تقول لنفسك أها عشان كده:
- معلومة رقم واحد .. في فبراير 2021 الرئيس الأوكراني (فلاديمير زيلينسكي Vladimir Zelensky) قرر فرض عقوبات إقتصادية علي شغل رجل إسمه (فيكتور ميدفيدتشوك Viktor Medvedchuk) .. يطلع مين ده؟ .. ده يبقي رجل أعمال معاه فلوس كتير فشخ ويعتبر من صحاب الرئيس الروسي (فلاديمير بوتين Vladimir Putin) .. عايزك تعرف إن رجال الأعمال القريبين من (بوتين) بيتقال عليهم في الإعلام إسم دلع كده اللي هو أوليجارك Oligarch.
- معلومة رقم إثنين .. فيه 3 محطات تليفيزيونية جوه أوكرانيا معروفة بولاءها لروسيا طلع قرار من الحكومة الأوكرانية إن المحطات دي تتقفل.
- معلومة رقم ثلاثة .. بعد ما الروس خدوا شبه جزيرة القرم في 2014 إتمضي إتفاق سلام في 2015 إتسمي إتفاقية مينسك .. الإتفاقية دي غريبة في حاجات كتير غير إن محدش إحترمها سواء الأوكرانيين أو الروس بس هي فيها نقطة قاتلة الحقيقة وهي إنها مقالتش هو مين حيشرف علي الإنتخابات المحلية اللي حتتعمل في دونيتسك ولوهانسك وبفكرك إن دول المنطقتين في شرق أوكرانيا اللي خدتهم روسيا بالعافية .. عشان برده تبقي عارف إن فيه حكمة ورا إن الإتفاقية متجيبش سيرة النقطة دي وهي إن الروس عندهم فلسفة غريبة شوية إسمها Near Abroad اللي هي البعيد عنك قريب والقريب منك بعيد .. دلوقتي الروس عندهم عادة كده إن كل ما بلد من الدول اللي كانت زمان جزء من الإتحاد السوفيتي وإستقلت يتعمل فيها إنتخابات فالروس يقولوا إحنا حنبعتلكوا قوات عسكرية عشان تأمن الإنتخابات وبعد ما الإنتخابات ما بتخلص القوات دي مبترجعش روسيا تاني وبتفضل قاعدة في البلد زي ما تكون قوة إحتلال .. الكلام ده حصل في مولدوفا وحصل في أوسيتيا الجنوبية.
- معلومة رقم أربعة .. من أول يوم والرئيس الأميريكي الجديد (جو بايدن Joe Biden) عامل فيها مية رجل في بعض قصاد (بوتين) مع إن كيس الشيتوس اللي قبليه كان بيموت فيه .. تقدر تقول إن ده موقف كويس يحصل عشان زي ما تقول كده (بوتين) بيدبح القطة ل(بايدن).
- معلومة رقم خمسة .. معرفش إنت سمعت الإسم ده ولا لا قبل كده اللي هو (أليكسي نفالني Alexei Navalny) .. ده يبقي الإخوان المسلمين بتاعة (بوتين) .. ده أبرز معارض ليه وهو صحيح مسجون بس له شعبيته في الشارع و(بوتين) برده مش سهل هو عارف إن أكتر حاجة بتنسي الناس صوت المعارضة هو الحس الوطني تحت شعار تحيا روسيا 3 مرات.
وبعدين لو سألت الروس نفسهم حيقولولك إن الغزو العسكري ده للعيال التوتو دلوقتي فيه تريند جديد إسمه Hybrid Warfare اللي هي الحرب اللي متفهملهاش ملة .. حاول تفكر فيها كده .. الروس لما دخلوا شبه جزيرة القرم في 2014 قامت إشتباكات كتير بينهم وبين الأوكرانيين .. في 2015 إتمضي إتفاق وقف إطلاق نار وعملية تبادل أسري .. من 2014 لحد دلوقتي إتقتل 13,000 بني أدم .. في 2021 بس الأوكرانيين خسروا 26 مقاتل .. في 2020 مات ليهم 50 .. الروس مات ليهم 20 في 2021 بس .. حاول تبص للأرقام دي وتسأل نفسك هل دي أرقام منطقية؟ .. إحنا في حادثة طريق واحدة بيموت عندنا قد الرقم ده اللي مات في سنة فهل ده يقولك إن روسيا بتفكر تغزو أوكرانيا.
خليني أختم معاك بالسؤال الإفتراضي بتاع طب إفرض الفاس وقعت في الراس والكابوس اللي (توم كلانسي) كان مرعوب منه إتحقق فعلاً فإيه اللي حيحصل؟ .. الروس ليهم طريقة غريبة شوية في تقسيم قواتهم البرية بحيث إذا كان عندنا في الجيش المصري فيه فصيلة وكتيبة ولواء فهم الوحدة اللي بتتكون منها القوات البرية بتاعتهم بتتسمي Battalion Tactical Group وإختصاراً بتتسمي BTG أو مجموعة كتيبة قتال تكتيكية .. عشان تستوعبها كتير هم قسموا الجيش بتاعهم لوحدات صغيرة بحيث الBTG الواحدة بتضم جواها قوات برية ودبابات ومدرعات ومدفعية وأنظمة دفاع جوي بحيث هم وإنت بتقرأ كلامي ده حوالي 100 مجموعة متوزعين علي بيلاروسيا وشبه جزيرة القرم وجوه الأراضي الروسية .. الفكرة إن إجمالي تعداد القوات المسلحة الأوكرانية هم تقريباً نفس عدد القوات اللي روسيا دلوقتي نشراهم علي حدودها مع أوكرانيا .. المشكلة إن القوات الأوكرانية متوزعة علي كل مساحة البلد اللي برجع أفكرك إنها تاني أكبر بلد في أوروبا من حيث المساحة بعد روسيا.
السؤال دلوقتي لنفترض إن بكره الصبح الروس دخلوا أوكرانيا وبكره الصبح برده (بايدن) قرر يشرب بيريل ويسترجل ويقف قصاد (بوتين) فإنت بتتكلم عن قوات أميريكية في أوروبا قد إيه؟ .. إذا كان الروس ليهم 100 مجموعة كتيبة قتال تكتيكية مستعدة للحرب بكره الصبح فالأمريكان ليهم في أوروبا قوات برية تقريبا قد عدد الأفراد بتوع 12 مجموعة قتال تكتيكية بس .. المصيبة مش في كده .. المصيبة إن القوات دي متوزعة من إيطاليا لحد دول البلقان .. بمعني أخر .. عمر ما القوات البرية الأميريكية في أوروبا حيجيلها أمر بإنها تتحرك عشان تلحق أوكرانيا لإن ببساطة بحسبة رجل لرجل فالقوات دي حيتداس علي وشها.
المصادر:
- مقالة بعنوان Is Russia preparing to invade Ukraine? نشرت في مجلة Foreign Policy وده لينك المقالة الأصلية:
https://foreignpolicy.com/2021/11/19/is-russia-preparing-to-invade-ukraine/ - مقالة بعنوان Is Russia going to war with Ukraine and other questions نشرت علي موقع هيئة الإذاعة البريطانية BBC وده لينك المقالة الأصلية:
https://www.bbc.com/news/world-europe-56720589 - مقالة بعنوان Is Russia planning a January invasion of Ukraine? نشرت في مجلة Popular Mechanics وده لينك المقالة الأصلية:
https://www.popularmechanics.com/military/a38324581/russia-planning-invasion-of-ukraine/
