لو عايز تفهم طبيعة الThreesome اللي بين أميركا وإيران والسعودية إنت محتاج تتفرج علي فيلم قديم حبتين إسمه ثيلما ولويز Thelma & Louise من بطولة إتنين ممثلات اللي هم (سوزان ساراندن Susan Sarandon) و(جينا ديفيز Geena Davis) ومن إخراج العبقري (ريدلي سكوت Ridley Scott) اللي قدملنا أفلام زي Gladiator و Kingdom of Heaven .. هو فيلم إتعرض سنة 1991 فهو فيلم إلي حد ما قديم بس لو إنت متفرجتش عليه فخليني أقولك قصته بسرعة أوي .. الفيلم بيحكي عن إتنين بنات صحاب قرروا إنهم يكسروا روتين حياتهم ويروحوا رحلة صيد سوا وهما في الرحلة واحدة فيهم بتتعرض لجريمة إغتصاب فصاحبتها قتلت المُغتصب والإتنين لإنهم عارفين إن في وقتها البوليس والمجتمع مش حيصدقهم ومش حيقتنع إن البنتين أبرياء وإن واحدة فيهم كانت حتُغتصب فقرروا إنهم يهربوا من البوليس .. في أخر الفيلم خالص البنتين لما حسوا إنهم حيتمسكوا ركبوا عربيتهم ونطوا من فوق سلسلة جبال جراند كانيون Grand Canyon وكأنهم بيقولوا للدنيا كلها يلعن ميتينكوا كلكوا .. طبعاً فيه منكوا دلوقتي بيهرش في رأسه وبيسأل هو العبيط ده قصده إيه؟ وإيه العلاقة بين الفيلم وبين أميركا وإيران والسعودية؟ .. خليني أفهمك أنا قصدي إيه بإني أسألك .. لو إنت مسكت شريط العلاقة بين أميركا وإيران والسعودية في ال10 سنين اللي فاتوا حتشوف إيه؟
حتشوف (باراك أوباما Barack Obama) وشلته وهم بيقولوا لنفسهم دلوقتي السعوديين في اللالا لاند وعمرهم ما حيقودوا العالم العربي لإنهم مينفعوش يقودوا العالم العربي .. السعوديين عمرهم ما حيعرفوا يعملوا إجماع عربي عشان يقدموا حل للقضية الفلسطينية وحتي داخلياً السعوديين مش عارفين يعملوا أي إصلاحات لا سياسية ولا إقتصادية ولا أي نيلة خالص في عيشتهم .. ده خلي (أوباما) واللي حوليه يقولوا لنفسهم هو يجري حاجة لو بدل ما إحنا شايفين السعودية إنها حليفتنا الأساسية في الخليج وإننا بنعتبرها إبننا اللي مخلفناهوش نروح نطلب القرب من الإيرانيين؟ .. هنا إنت محتاج تفهم كويس أوي ليه الأمريكان فكروا في الإقتراح ده وعشان تفهم ده حاول تحط نفسك مكان (أوباما) .. دلوقتي أنا عايز أخلي الإيرانيين يتخلوا عن حلمهم إن يبقي عندهم سلاح نووي .. إيران دولة عندها حضارة قديمة فلما تيجي تتكلم معاهم بتحس إنك بتتكلم مع ناس بتفهم مش زي السعوديين اللي لاغيين مخهم .. في الوقت اللي السعودية وقتها مكنتش بتسمح لستاتها إنهم يسوقوا عربياتهم كانت الست الإيرانية واخدة وضعها في بلدها .. فوق ده كله إن إيران فيها طبقة متوسطة مش شايفه إن أميركا شيطان أكبر زي ما أئمة الشيعة بتوع إيران بيقولوا .. حط كل ده جنب بعضه حتقدر تفهم ليه الأمريكان أو خليني أكون دقيق وأقول (أوباما) سعي عشان يمضي الإتفاق النووي مع إيران.
للناس اللي لحد دلوقتي مش فاهمة أوي ومش مستوعبة هو الإتفاق النووي الإيراني ده عبارة عن إيه فالإتفاق ده بمنتهي البساطة بيقول إن إيران حتنسي خالص إنها تسعي عشان تعمل سلاح نووي لمدة 15 سنة في مقابل إن العقوبات الإقتصادية اللي الغرب فرضها علي الإقتصاد الإيراني تتشال .. المنطق بتاع (أوباما) كان لو الإتفاق النووي ده إتطبق فده معناه إنه حيخلي الإيرانيين يتنازلوا عن حلم السلاح النووي ولما العقوبات دي تتشال فكده الإقتصاد الإيراني حيتفتح شوية علي العالم وده في حد ذاته حيخلي الطبقة المتوسطة اللي بفكرك إنها إلي حد كبير مش مقتنعة بإن أميركا وحشة الفلوس تجري في إيدها ولو ده حصل فنفوذ الحرس الثوري الإيراني ونفوذ المؤسسة الدينية في إيران حيبدأ يقل .. بإختصار الإتفاق ده حيخلي الإيرانيين يقولوا لنفسهم طب ما أميركا حلوة أهي أصل هو فيه حد يقول للفلوس لا؟ .. السؤال دلوقتي هل (أوباما) كان عنده حق؟
مبدأياً الإتفاق النووي خلي الإيرانيين يحطوا حلم القنبلة النووية الإيرانية في الدرج فدي حاجة حلوة للأمريكان والسعوديين والإسرائيليين .. بس لما الفلوس جريت في إيد الإيرانيين أغلب الفلوس دي راح للحرس الثوري الإيراني اللي مسيطر علي قطاعات كتير جوه الإقتصاد زيه زي مثلاً المؤسسة العسكرية في مصر فلما ده حصل الحرس الثوري خد الفلوس وإستخدمها عشان يوسع من نفوذه خصوصاً في الدول العربية اللي إيران مسيطرة عليها اللي هي العراق والبحرين وسوريا واليمن ودي حاجة وحشة للأمريكان والسعوديين والإسرائيليين .. وبعد كده جالنا كيس الشيتوس الحجم العائلي اللي إسمه (دونالد ترامب Donald Trump).
(ترامب) لما جه سأل نفسه هو (أوباما) كان بيعمل إيه وعمل عكسه .. (أوباما) مضي الإتفاق النووي مع إيران قام هو جاي لاغيه .. (أوباما) شال العقوبات الإقتصادية من علي إيران قام هو جه ورجعها كلها تاني تقريباً لا وزود عليها كمان .. (أوباما) كان مرخم علي السعوديين علي أساس إن مفيش منهم رجا يقوم جاي هو بايعلهم سلاح ب110 مليار دولار وبقي حبيب (محمد بن سلمان) .. هنا إنت محتاج تاخد نفس عميق وتحاول تفكر كإنك أمريكاني .. إنت تقدر تفهم هو (أوباما) كان بيفكر في إيه لما قرر إنه يتصالح مع إيران بس في نفس الوقت ثبت إن حساباته كانت غلط لإنه كان محتاج إنه يعمل تحالف مش حقول دولي بس علي الأقل يلم الدول العربية كلها مع بعضها عشان تقف قصاد إيران وتمنعها من إنها تحاول تمد نفوذها في المنطقة وده محصلش .. وفي نفس ذات الوقت (ترامب) إنت تقدر تفهم هو لما قرر ياخد السعوديين في حضنه هو كان بيفكر في إيه لإنه شاف (محمد بن سلمان) زبون لقطة .. ده واحد معندوش مشكلة يدفع دم قلبه عشان يشتري سلاح أميريكي وفي نفس الوقت عايز يحول بلده لحاجة شبه دبي وإنت تقدر تشوف ده بنفسك إن نفوذ الشيوخ السلفيين في السعودية بقي زيه شخصية (أووفه) في إعلان EG Bank اللي هو محدش عاملك حساب .. بس زيه زي (أوباما) تلاقي إن حسابات (ترامب) فيها حاجة غلط لإنه كان المفروض يفرمل (محمد بن سلمان).
(محمد بن سلمان) شخصية مطيورة ولو إنت مش مصري ومش فاهم يعني إيه شخصية مطيورة فهو شخص مبيشغلش مخه قبل ما يتصرف .. هو تقريباً لاغي مخه .. عشان تتعامل مع شخصية زي دي إتحطت في مكان سلطة فإنت لازم تفرمله بإن يبقي عندك سفير شخصيته قوية وتبقي إنت شخصياً رئيس حمش في نفسك .. اللي حصل بين (ترامب) وبين (محمد بن سلمان) إنه أولاً سابه من غير حتي سفير أميريكي في الرياض لمدة سنتين والوحيد اللي كان مرسال بينهم كان (جاريد كوشنر Jared Kushner) وده في حالة إنك متعرفهوش يبقي جوز بنت (ترامب) ومدير مكتبه ومستشاره الشخصي وحاجات كتير كده مع إنه في رأيي مينفعش يمسك كاشير في فرع كنتاكي.
اللي حصل مع (محمد بن سلمان) هو هو بنفس تفاصيله اللي حصل بين (أوباما) والإيرانيين .. زي ما الإيرانيين خدوا الفلوس اللي جاتلهم لما العقوبات الإقتصادية إتشالت وإستخدموها عشان يفتروا علي خلق الله .. (محمد بن سلمان) هو كمان إفتري علي خلق الله .. دخل في حرب ملهاش أي ستين لازمة مع اليمن .. إتعارك مع قطر متفهمش بسبب إيه .. يا راجل ده خطف (سعد الحريري) رئيس وزراء لبنان لما راح زيارة للرياض وفي الأخر زعلان إن (تميم) مرضاش يروح يحضر القمة العربية .. ما هو خايف منك يا أهبل .. (محمد بن سلمان) شخصية مش متزنة والله .. الصبح يسمح للستات السعوديات بالسواقة وبالليل يعتقل الناشطات السياسيات السعوديات اللي كانوا بيطالبوا بإن الستات يبقي ليها حق السواقة .. وأخيراً وليس أخراً في مسلسل الهطل بتاعة جريمة قتل (جمال خاشقجشي).
عشان أرجعك تاني للتشبيه بتاع Thelma & Louise .. زي ما البنتين في أخر الفيلم في لحظة طيش خدوا العربية بتاعتهم ونطوا بيها من فوق الجبل فالسعودية وإيران هم كمان بسبب تصرفاتهم اللي أقل ما توصف به إنها تصرفات عيال صغيرة خدوا العربية ونطوا بيها من فوق الجبل .. بس يمكن عشان السعوديين سُنة والإيرانيين شيعة وغالباً عمرهم ما حيركبوا عربية واحدة سوا فكل واحد فيهم خد عربيته لوحده ونط بيها .. أنا عارف إنك مش قادر تستوعب التشبيه فخليني أديلك أمثلة عشان أوريك قد إيه أنا عندي حق.
أنا قلتلك إن (محمد بن سلمان) خطف (سعد الحريري) صح .. الإيرانيين بقي قتلوا أبوه (رفيق الحريري) الله يرحمه بعبوة ناسفة في بيروت لمجرد إنهم كانوا خايفين يرجع يمسك رئاسة الوزراء تاني .. كلنا عارفين إن السعوديين قتلوا (جمال خاشقشجي) بأمر من (محمد بن سلمان) صح؟ .. أهو الدانمرك إتهمت المخابرات الإيرانية إنها بعتت فريق عشان يغتال ناشط سياسي إيراني هربان عندها وفرنسا طردت شوية دبلوماسيين إيرانيين ثبت تورطهم في عملية كانت حتقوم بيها المخابرات الإيرانية برده لتفجير عبوة ناسفة جوه مظاهرة سلمية ضد النظام الإيراني في قلب باريس .. صدقني مش حتفرق إنت سُني أو شيعي لإن الغباء مش بيميز .. السعوديين والإيرانيين زي ما يكونوا بيغشوا من نفس كتاب الغباء .. سواء (محمد بن سلمان) أو شلة المؤسسة الدينية والحرس الثوري الإيراني واخدين بلدهم وبينطوا بيها من فوق الجبل .. محدش قال إن أميركا حلوة بس في نفس الوقت إحنا شعوب بيحكمنا شوية مهاطيل مش عايزين حاجة في حياتهم غير إنهم يفضلوا طول حياتهم في الكرسي.
المصدر:
- مقالة بعنوان Iran & Saudi Arabia, Thelma & Louise .. إيران والسعودية زيهم زي (ثيلما) و(لويز) .. نشرت في جريدة The New York Times الأميريكية وده لينك المقالة الأصلية:
http://imes.com/2018/11/06/opinion/iran-saudi-arabia-thelma-louise.html
