لينك التسجيل الصوتي للمقالة علي Sound Cloud:
https://soundcloud.com/user-112011687-312727988/ctni7iucj5bl?si=ea4a2dc054ac4e5793004aa4fa884e90
المظاهر هي أهم حاجة في السياسة زي ما في الشغل أهم حاجة إنك يبان إنك بتشتغل مش إنك تبقي شاطر في شغلك .. الدرس ده مهم جداً تتعلمه والسياسيين الشاطرين هم اللي بيعرفوا يستخدموه لمصلحتهم .. الكلام ده مهم تبقي فاهمه من دلوقتي لإن المظاهر هي اللي بتخكم الخناقة حول تايوان .. قدام الناس إن التوتر عمال يزيد بين أميركا والصين بسبب تايوان .. المظاهر هي اللي بتحكم الخناقة بين الصين وتايوان وخليني أديلك مثال بسيط بده .. من ضمن الحملات الدعائية لأحدث أفلام سلسلة Fast & Furious اللي هو F9 طلع (جون سينا John Cena) واحد من أبطال الفيلم قال إن تايوان حتبقي أول بلد في العالم يتعرض فيها الفيلم ..عارف إيه اللي حصل بعد كده؟ الصين هددت بإن الفيلم مش حيتعرض عندها .. إيه اللي حصل بعد كده؟ شركة الإنتاج خلت (سينا) يعمل فيديو يعتذر فيه للحكومة الصينية علي إنه وصف تايوان بإنها بلد والغريبة إنه في الفيديو إتكلم باللغة الصينية مش بالإنجليزي .. مش بس كده .. عارف فيلم Top Gun: Maverick اللي حينزل السنة دي إن شاء الله واللي يبقي الجزء الثاني من فيلم Top Gun؟ في الجزء الأول (توم كروز Tom Cruise) كان بيلبس جاكت جلد عليه علم تايوان فعشان شركة باراماونت متزعلش الصين شالت علم تايوان من علي الجاكيت .. ومش بس صناعة الأفلام .. يٌحكي أن شركة GAP اللي بتصنع تي شيرتات وسويت شيرتات عملت تي شيرت عليه علم الصين بس من غير تايوان فالحكومة الصينية زعلت وده خلي GAP تطلع إعتذار رسمي .. حتي في الأوليمبياد أو الأوليمبيكيات علي رأي (اللمبي) تايوان بتشارك في الدورات الأوليميبية من الثمانينات تحت مسمي Chinese Taipei أو تايبيه الصينية عشان ميزعلوش الصين .. شوف رغم كل ده برجع وأقولك إن دي مظاهر.
أنا شخصيا كتبت قبل كده مقالة عن إحتمالية إن تقوم حرب بين أميركا والصين بسبب تايوان وقلت إن غالباً حيكون السبب هو صناعة أشباه الموصلات Semiconductors المتقدمة جداً عند تايوان ممثلة في شركة TSMC بس النهاردة عايزين نستهدي بالله في نفسنا ونتكلم بشوية عقل عن الموضوع اللي كتر فيه الهبد الصراحة وخلينا نبدأ بإننا نحاول نجاوب علي كذا سؤال:
- إيه هي تاريخ الخناقة دي بين الصين وتايوان؟
- إيه السبب ورا التصعيد المفاجيء بين الصين وتايوان في الفترة الأخيرة؟
- إيه اللي يخليني أقول إن مش مستحيل بس صعب جداً الصين تقرر تغزو تايوان؟
خلينا نبدأ بالسؤال الأولاني .. إيه التاريخ ورا الخناقة؟
زي ما الحضارة الفرعونية أعقد وأطول من إني أتكلم عنها في مقالة واحدة فبرده لازم أوضحلك من دلوقتي إن مستحيل وببقي بضحك عليك لو قلتلك إني أقدر أشرحلك تفاصيل الخناقة دي في مقالة بس خلينا نتفق إن ده الملخص اللي يخليك قادر تفهم هو مين بيتعارك مع مين؟ وليه؟ .. مبدأياً دي مش قصة خناقة طرفها إتنين .. إنما ثلاثة .. صحيح الصين وتايوان هم الأبطال الأساسيين بس أميركا بتخش في النص .. صحيح هي علاقة ثلاثية بس دي مش ثريسوم .. لا دي شبه العلاقات التوكسيك اللي بتشوفها في المسلسلات التركي كده .. وعشان تاريخ العلاقة دي معقد حبتين فخلينا نحطهم في شوية نقط ورا بعض بالترتيب التاريخي للأحداث:
- تايوان كانت جزيرة تقدر تقول ملطشة بين الإستعمار الأجنبي .. شوية الهولنديين يحتلوها .. شوية الإسبان .. لحد ما بقت تحت سيطرة أسرة (تشينج) الصينية اللي فضلت تحكمها لأكثر من 200 سنة وده إتغير سنة 1895.
- في السنة دي تايوان بقت تحت سيطرة الإمبراطورية اليابانية واللي إعتبرت تايوان مش حقول حتة هي محتلياها قد ما إعتبرتها جزء من التراب الياباني لحد ما الحرب العالمية الثانية خلصت.
- لحد الحرب العالمية الثانية أميركا والصين كانوا حبايب ومتحالفين مع بعض ضد الإمبراطورية اليابانية وعشان كده لما الحرب خلصت أميركا قررت ترجع تايوان تاني للصين بس هوبا الحرب الأهلية الصينية قامت بين الحكومة القومية بقيادة (شيانج كاي شيك) ضد الشيوعيين بقيادة (ماو تسي تونج).
- سنة 1949 (ماو تسي تونج) بينتصر في الحرب الأهلية وده كان السبب في كذا حاجة إن أولا (شيانج كاي شيك) ومعاه 2 مليون عسكري هربوا من الصين وراحوا قعدوا في تايوان وده كان معناه إن وقتها الصين كان ليها حكومتين واحدة في بكين والثانية في تايبيه وإن ثانياً وصول (ماو) للحكم كان بداية إن أميركا تعمل بلوك للصين لإن الغرب وقتها كان عايز حكومة (شيك) هي اللي تبقي الممثل الرسمي للشعب الصيني .. ليه؟ .. أظن واضحة عشان (ماو تسي تونج) شيوعي لدرجة إن إسم تايوان وقتها عند الغرب هو الصين الحرة Free China.
- فترة حكم (شيانج كاي شيك) لتايوان كانت فترة سودا إتسمت في تاريخها بالرعب الأبيض White Terror .. الرجل ده أقرب تشبيه ليه هو في فيلم الناظر صلاح الدين اللي هو أي حد حيعترض أو يفكر يعترض أو من جواه يبقي معارض بس من بره بيحبني ححبسه هو وأهله وأهل اللي واقف جنبه .. يُحكي أن من ضمن المواقف اللي مش حقول بتضحك بس فعلاً توريك قد إيه (شيانج كاي شيك) كان مريض نفسي إنه مره سجن رسام كاريكاتير 9 سنين عشان ترجم رواية مصورة من سلسلة (باباي) اللي هو اللي بياكل سبانخ عارفه بطريقة هو شافها مسيئة ليه .. إنت متخيل؟
- سنة 1975 (شيانج كاي شيك) بيموت ومتفهمش إيه اللي حصل بمجرد ما البعبع راح البلد كلها شمت نفسها .. خلال 10 سنين بس تايوان كانت تحولت من بلد قمعية ديكتاتورية لواحدة من الدول الديموقراطية القليلة علي مستوي العالم.
- سنة 1979 وفي وقت ما الحرب الباردة كانت مولعة أميركا شالت البلوك علي الصين لما الرئيس (ريتشارد نيكسون Richard Nixon) مش بس قرر يطبع العلاقات بين أميركا والصين ومش بس راح بنفسه زار بكين إنما في السنة دي أعلن إعتراف أميركا بالحكومة الصينية ولغي إعتراف أميركا بحكومة تايوان.
- بس متفتكرش إن اللي عمله (نيكسون) ده معناه إن أميركا باعت تايوان عشان تشتري الصين .. في نفس السنة اللي هي 1979 بيتكتب قانون في أميركا إسمه Taiwan Relations Act وده القانون اللي بيحكم العلاقات الأميريكية التايوانية واللي بيقول إن أي حاجة ممكن تؤثر علي مستقبل تايوان بطريقة غير سلمية سواء بقي مقاطعة أو حصار إقتصادي أو أي تهديد مسلح للساحل الغربي للمحيط الهاديء فأميركا حتعتبره تهديد واضح وصريح لأمنها القومي .. مش كده وبس .. القانون بيقول إن أميركا بتحتفط لنفسها بحق المقاومة والرد لأي محاولة خارجية لإجبار تايوان تعمل أي حاجة ضد مصلحة شعبها.
- من سنة 1979 لحد الفترة الثانية من حكم الرئيس الأميريكي (باراك أوباما Barack Obama) كان الأمريكان والصينيين مش حقول حبايب بس شركاء بيحترموا بعض لحد ما فجأة كده ومن غير لا إحم ولا دستور الصين بقت بتعتبر نفسها عدو لأميركا .. ده خلي السياسة الخارجية الأميريكية نفسها تتغير واللي الإدارة بتاعة (أوباما) سمتها سياسة التوجه إلي أسيا أو Pivot toward Asia لإن متنساش دي الفترة بتاعة الحرب علي الإرهاب .. دي الفترة بتاعة تصعيد العمليات العسكرية في العراق وأفغانستان و الشرق الأوسط وده اللي كان الأمريكان مركزين عليه بس بسبب التغيير اللي حصل في السياسة الخارجية الصينية فده بشكل طبيعي جداً سمع مع الأمريكان نفسهم.
- طبعاً كلنا عارفين إن (دونالد ترامب Donald Trump) كان بيعتبر الصين تهديد واضح وصريح للأمن القومي الأميريكي وحتي لما مشي و جه مكانه (جو بايدن Joe Biden) كمل علي نفس التريند .. من الأقوال المأثورة لجدو (بايدن) إنه قال: “خلال فترة رئاستي مش حيحصل إن الصين تحقق هدفها وتبقي هي القوة العظمي الأولي في العالم ولا حتبقي أغني دولة في العالم ولا أقوي دولة في العالم”.
هنا يجي دور السؤال الثاني .. إشمعني دلوقتي؟
حرجعك تاني لحتة المظاهر .. خليك فاهم إن أي خبر علي سوشيال ميديا لتوتر حصل بين الصين وتايوان حيكون معاه الجملة دي .. طيارات من سلاح الجو الصيني إنتهكت المجال الجوي التايواني .. في شهر واحد بس 150 طيارة صينية إنتهكت المجال الجوي التايواني .. أقف بقي هنا .. اللي بيكون بيكتب الخبر تقريباً مش بيبقي واخد باله إن فيه حاجتين شبه بعض بس هم مختلفين خالص عن بعض .. الحاجة الأولانية هي المجال الجوي Air Space لأي دولة .. الحاجة الثانية هي منطقة عمليات الدفاع الجوي Air Defense Identification Zone و إختصاراً بتتسمي ADIZ .. اللي بيحصل إن كل بلد نظام الدفاع الجوي بتاعها مش بس بيغطي المجال الجوي بتاعها إنما كمان بيخش شوية جوه المجال الجوي للدول اللي جنبها بحيث لو مثلاً يعني سلاح الجو الإسرائيلي حب يوجه لمصر ضربة جوية فالدفاع الجوي المصري يقدر يلقط الطيارات دي وهي لسه طايره فوق سماء قطاع غزة مش لازم يخشوا يطيروا فوق سيناء عشان نلقطهم .. جميل .. مضيق تايوان اللي هو الممر البحري اللي بيربط بين الصين وتايوان بيغطيه أربع ADIZ لأربع دول مختلفة اللي هم الصين وتايوان وكوريا الجنوبية واليابان .. الحقيقة إن منطقة عمليات الدفاع الجوي لتايوان كبيرة فشخ لدرجة إنها بتغطي مناطق جوه الصين نفسها .. فيه مطارات عسكرية جوه الصين لو طيارة بس ركنت علي مدرج الإقلاع بتاعها فهي وفق تعريف ADIZ إنتهكت المجال الجوي التايواني.
في نفس الوقت الأمريكان برده مش ملايكة .. إنت كل شوية حتلاقي طيارات مقاتلة أميريكية بتنفذ طلعات جوية فوق مضيق تايوان تحت ما يسمي مناورات حرية الملاحة Freedom of Navigation Exercises وصدقني لو قلتلك إن الصينيين بيبصوا للطلعات الجوية دي علي إنها إنتهاك للمجال الجوي بتاعهم برده .. أو لما في مايو 2021 أميركا نفذت أكبر مناورة عسكرية ليها في المحيط الهاديء من وقت الحرب العالمية الثانية .. برده الصينيين كانوا بيبصوا ده إنه إستفزاز ليهم.
أما بقي السؤال الثالث والمهم .. ليه الصين صعب تفكر في غزو تايوان؟
السبب في منتهي البساطة هو كلمة واحدة .. الفلوس .. لو إنت فعلاً شايف إن عاجلاً أم أجلاً الصين حتغزو تايوان إسمحلي أسألك كذا سؤال .. إيه اللي يخليك تفكر تغزو بلد من سنة 1991 لحد سنة 2020 وهي حاطة عندك إستثمارات بقيمة 188.5 مليار دولار وعشان بس أحطك في الصورة الرقم ده أكبر من إجمالي الإستثمارات اللي حاطاها الصين في أميركا؟ .. يعني لو الصين إتخانقت مع تايوان الإقتصاد الصيني حيتعور جامد لإن فلوس الإستثمارات مش بس التايوانية إنما الأميريكية كمان حتتسحب من الصين .. إيه اللي يخليك تفكر أساساً تغزو بلد التجارة بينكوا وبين بعض بتتقدر ب149.2 مليار دولار؟ .. إيه اللي يخليك تغزو بلد المواطنين بتوعك في السنة بيزورها 2.68 مليون مرة؟ .. في مرة (دينج جاو بينج Deng Xiao Ping) وده واحد من اللي حكموا الصين وصف العلاقة بين بلده وبين تايوان بإن حتفرق معاك في إيه لون قطتك طالما هي شاطرة في صيد الفيران .. فهمت هو عايز يقولك إيه؟ .. حتستفيد إيه الصين لما تغزو أهم زبون ليها؟
الصينيين عارفين إن محاولة منهم لغزو تايوان حتخلي أميركا تخش بتقلها في الخناقة فإيه اللي يخليك تتعارك مع بلد عندها 10 رؤوس نووية قصاد كل رأس نووي عندك؟ .. إيه اللي يخليك تخاطر إنك تتعارك مع بلد إنت شخصياً حاطط عندهم إستثمارات بتتقدر ب145 مليار دولار؟ .. إيه اللي يخليك تزعل منك أميركا وهي حاطة عندك إستثمارات مباشرة قيمتها عدت الترليون دولار؟ .. حاول تفهم ده معناه إيه إن لو الصين إقتصادها وقع فأميركا حتتعور جامد بس لو أميركا إقتصادها وقع فالصين حتتفشخ .. حقاً وصدقاً ودي حاجة غريبة إنك تسمعها أنا عارف إن مستقبل الإقتصاد الصيني علي الأقل علي المدي القصير معتمد علي إن الإقتصاد الأميريكي يفضل ناجح وماسك نفسه .. و أرجوك كمان مرة بلاش تتخيل إن لو بكره الصبح الصين حبت تغزو تايوان فالدنيا حتمشي معاهم زي السكينة في الجاتوه لإن ده مش حقيقي .. نسبة فشل القوات الصينية في عبور مضيق تايوان وإحتلال الجزيرة كبيرة مش صغيرة ولو ده حصل فالمستقبل السياسي للرئيس الصيني (جي جينبينج Xi Jinping) إنتهي .. حاول تبصلها إن قدامك شغلانة معروضة عليك نسبة نجاحها 50-50 بس لو نجحت حتاكل من وراها الشهد ولو فشلت حتترمي في السجن .. يا تري إنت حتبقي مستعد تاخد الريسك؟
حتي يا سيدي لو كل ده إترمي في الزبالة .. حتي لو الصين قالتلك أنا حاخد الريسك وحعبر مضيق تايوان وحضمها ليا تاني .. هل تفتكر الدنيا سهلة؟ .. أقرب مثال إنت ممكن تفهمه لصعوبة الحل العسكري هو حرب أكتوبر 1973 وخليني أفهمك ده معناه إيه:
- الصداع الأولاني اللي كان في دماغ الفريق (سعد الدين الشاذلي) الله يرحمه رئيس أركان حرب القوات المسلحة المصرية وهو بيحط خطة العبور كانت إزاي عساكرنا يعدوا قناة السويس .. في حالتنا كان الموضوع نسبياً سهل لإن عرض قناة السويس مكنش كبير (180-220) متر بس قصاد إن مضيق تايوان أضيق حتة فيه عرضها 128 كيلومتر .. إذا كان (الشاذلي) حلها بقوارب العساكر يجدفوا عشان يعدوا الناحية التانية من القناة فأكيد حل القوارب ده مش حينفع عشان الصين توصل قواتها للساحل بتاع تايوان.
- الصداع الثاني اللي كان في دماغ الفريق (الشاذلي) هو النقاط الحصينة اللي علي طول خط بارليف نفسه واللي تقدر تصطاد قواتنا وهي بتعبر .. في حالة تايوان فدفاعاتها معتمدة بشكل أساسي علي صواريخ مضادة للسفن إسمها هاربون Harpoon يعني الحربة اللي الصيادين اللي بيصطادوا بيها الحيتان .. الصواريخ اللي تحت إيد تايوان حالياً مداها 100 كيلومتر .. عارف إني لسه قايلك أضيق حتة في المضيق عرضها 128 كيلومتر بس الأمريكان باعوا لتايوان نسخ أحدث من صواريخ هاربون مداها 320 كيلومتر يعني فعلياً التايوانيين يقدروا يصطادوا السفن الصينية وهي لسه في الميناء بتاعها.
- ثالث صداع هو محاولة الإجابة علي السؤال بتاع إنت حتبقي محتاج كام عسكري عشان تسيطر علي خط بارليف؟ .. الفريق الشاذلي حسبها بإنه محتاج حوالي 32,000 مقاتل .. الأمريكان لما جم يخططوا لعملية الإنزال البرمائي في نورماندي في الحرب العالمية الثانية قالوا إنهم محتاجين 156,000 مقاتل .. ناس كتير بتقول إن عشان الصين تقدر تسيطر علي ساحل تايوان فهم محتاجين حوالي مليون مقاتل .. رقم كبير أنا عارف بس إنت لازم تعمل حسابك إن الطبيعة الجغرافية الجبلية لساحل تايوان حتخلي الخساير اللي حتتعرضلها القوات المسلحة الصينية مش قليلة بس صدقني مش هي دي المشكلة .. الصين عندها مليون مقاتل تقدر توفرهم عادي جداً هي المشكلة إنت حتوديهم تايوان إزاي؟ .. أرجعك لأول نقطة القوارب مش حتنفع .. الصين حتحتاج مدرعات نقل جنود برمائية بحيث الواحدة فيهم تقدر تشيل 1000 عسكري .. الخبر الحلو لو إنت قاعد في مدرجات الصين الشعبية إن فعلاً عندهم مدرعة إسمها Type 075 بتقدر تشيل العدد ده .. الخبر اللي مش حلو إن الصين لحد يناير 2021 مكنش عندها غير 3 منهم بس.
- رابع صداع كان هو إحنا قدامنا قد إيه وقت لحد ما أميركا تيجي جري عشان تلحق إسرائيل؟ .. في حالة الصين فالأمريكان ليهم وجود عسكري في اليابان وكوريا الجنوبية وجزيرة جوام .. غالباً الأمريكان حيبقوا عارفين الحرب حتقوم إمتي من مجرد مراقبتهم لتحركات القوات المسلحة الصينية.
أنا بس حابب أختم كلامي بنقطتين .. أول نقطة هي إنك لو إستهديت بالله وفكرت شوية حتلاحظ حاجة غريبة جداً وهي إن الصين بقالها سنين مضربتش طلقة علي حد .. تايوان إستقلت سنة 1949ومن وقتها والصين مضربتش حتي صاروخ من بتوع العيد دول عشان تخوف بيه التايوانيين .. من سنة 1841 وهونج كونج كانت تحت سيطرة بريطانيا والبريطانيين مكانوش حتي حاطين فيها حامية عسكرية ورغم كده الصين عمرها ما فكرت تضرب طلقة عليها عشان ترجعها .. نفس الكلام علي مدينة ماكاو اللي من سنة 1557 وهي كانت تحت سيطرة البرتغاليين .. سواء هونج كونج أو ماكاو رجعوا لحضن الصين بحاجتين .. الوقت والفلوس .. الكلام اللي كل شوية يقوله (جي) إنه حيرجع تايوان تاني للحضن الدافي بتاع الصين الأم دي إسطوانة مشروخة بنسمعها من أيام (ماو تسي تونج) .. كلام ملوش إلا هدف واحد بس هو المظاهر .. بمناسبة المظاهر .. أميركا محتاجة عدو عشان تبرر قدام شعبها المصاريف الخزعبلية اللي هي بتصرفها علي التسليح .. زمان كان عندهم الإتحاد السوفيتي .. شوية وجه الأرهاب الإسلامي .. دلوقتي جه وقت التنين الصيني .. مش معني كده إن السلاح اللي أميركا بتشتريه وبتصنعه حتستخدمه فعلاً ضد الصين .. لا خالص .. هي بس الفكرة في المظاهر .. لازم يبقي لينا عدو نخوف بيه العيال الصغيرة.
المصدر:
- مقالة بعنوان Taiwan is not about China نشرت في مجلة The American Conservative وده لينك المقالة الأصلية:
https://www.theamericanconservative.com/articles/taiwan-is-not-about-china/ - حلقة من برنامج Last Week Tonight with John Oliver وده لينك الحلقة لو حبيت تتفرج عليها:
https://www.youtube.com/watch?v=9Y18-07g39g
