لينك التسجيل الصوتي للمقالة علي Sound Cloud:
https://soundcloud.com/user-112011687-312727988/y3ojzf7mzamy
هو إحنا مش حيطلع لينا أي مصلحة من القمر ده؟ .. هو سؤال غريب انا عارف .. سؤال ميطلعش إلا من حد أهم حاجة عنده الفلوس .. حد تقريباً بيشمشم ورا أي حاجة تتباع عشان يكسب .. بإختصار ده سؤال يطلع من حد زي الرئيس الأميريكي (دونالد ترامب Donald Trump) اللي في إبريل 2020 مضي قرار رئاسي بيدي للشركات الأميريكية حق التنقيب عن أي حاجة تجيب فلوس في القمر .. قبل ما الحماس ياخدك و تتحمق أوي و تقول هو القرار ده صح ولا غلط فانت محتاج الأول يتحط قدامك كل المعلومات و الحقائق عشان في الأخر خالص بعد ما تفهم كل اللي حيتقال في المقالة دي تبقي بحق ربنا عارف تقول رأيك بهدوووووووء علي رأي (عماد أديب) .. فيه حاجتين لازم تبقي فاهمهم كويس أوي .. أول حاجة إن الحكاية دي ليها جانب قانوني و ده الجزء الممل من القصة .. و في نفس الوقت ليها جانب هندسي و ده الجزء اللي مسلي أوي الصراحة.
هل قانوناً من حق أي شركة إنها تنقب عن أي حاجة بره الكرة الأرضية؟
عشان بس تبقي فاهم السؤال .. اللي انا عايز أشرحه هل في يوم من الأيام ممكن نلاقي شركة المقاولون العرب بتاعة أميركا رايحه تبني طريق سريع ولا كوبري علي القمر و نعيش بقي جو فيلم Avatar؟ .. الحقيقة إن إجابة السؤال ده من الناحية القانونية محدش عارفها أوي .. سنة 1967 المفروض إن أميركا مضت علي معاهدة إسمها The Outer Space Treaty يعني معاهدة الفضاء الخارجي و المعاهدة دي إتمضت وقت ما الحرب الباردة كانت مولعة بين أميركا و الإتحاد السوفيتي و المعاهدة دي بتقول الأتي .. مينفعش إن دولة زي أميركا تيجي تقول إن الحتة دي من القمر تبعي و حاخدها وضع يد .. بس في نفس الوقت ممكن أي شركة تروح تسترزق من القمر عادي .. جري الشريط لحد سنة 2015 و إذا بالرئيس الأميريكي وقتها (باراك أوباما Barrack Obama) بيمضي علي قانون U.S. Commercial Space Launch Competitiveness Act يعني قانون تنافسية الإطلاق الفضائي التجاري و اللي بيقول بمنتهي البساطة إن ممكن شركة أميريكية تروح القمر أو أي كوكب تجيب شوية رملة و تجيبهم الأرض تبيعهم.
هي سهلة كده إننا نروح القمر ننقب عن معادن عشان نبيعها علي الأرض؟
أوعي تفتكر إن التنقيب عن أي حاجة في أي حتة بره كوكب الأرض دي حاجة سهلة و تتعمل عادي كده .. لا خالص .. ده حوار وتفاصيل و مشاكل يتكتب فيها كتب مش مقالات بس انت محتاج تفهم أصل الحكاية علي الأقل و أصل الحكاية إن فيه خناقة بين فريقين حول الإجابة عن السؤال اللي سألته في الأول خالص .. إزاي نجيب أي مصلحة من القمر أو من أي كوكب تاني زي المريخ مثلاً؟
الفريق الأولاني ده أول واحد إتكلم عن وجهة النظر بتاعته كان رجل إسمه (فيرنر فون براون Werner von Braun) .. لمعلوماتك العامة يعني .. الرجل ده كان ماسك مشروع الصواريخ في القوات المسلحة الألمانية وقت الحرب العالمية الثانية .. يعني الرجل ده كان المسئول عن تصميم و تصنيع و تفجير صواريخ V-1 و V-2 الألمانية اللي إترمت فوق دماغ الإنجليز في الحرب العالمية الثانية .. لما خلاص ألمانيا خسرت الحرب و الأمريكان و السوفييت دخلوا برلين فالمخابرات الأميريكية عرفت تخطف .. أو بلاش تخطف عشان دي كلمة صعبة أوي .. خليها عرفت تهرب (فون براون) بره ألمانيا لإن السوفييت هم كمان كانوا عايزينه و ودوه أميركا .. و هو في أميركا بعد ما كان ماسك مشروع صواريخ بتفرقع فوق دماغ الناس بقي ماسك مشروع الصاروخ الفضائي زحل خمسة Saturn V و ده الصاروخ اللي رواد الفضاء بتوع NASA طلعوا بيه القمر .. بعد ما لفينا شوية في CV بتاع (فون براون) خلينا نفهم الرجل ده كانت وجهة نظره إيه في موضوع التنقيب في الفضاء .. الرجل ده كان بيقول إن القمر و الكواكب مينفعش يتسابوا كده .. الصح إن البشر يبعتوا ناس للكواكب دي عشان ينقبوا عن خير ربنا كله و ده معناه بالضرورة إن لازم البشر يفكروا إنهم يبنوا مستعمرات بره الأرض سواء بقي علي القمر أو المريخ .. أيوه .. (فون براون) من الخمسينات و هو بيقول نفس البق الحمضان اللي (إيلون ماسك Elon Musk) مصدع نفوخنا بيه ف(إيلون ماسك) مش سابق زمانه ولا هو أبوالعريف اللي جاب التايهة زي ما بتشوف في الإنترنت بس ما علينا دلوقتي.
الفريق الثاني أكتر حد بيعبر عنه هو الفيزيائي الأميريكي (جيرارد كيه أونيل Gerard K. O’Neill) اللي عرض فكرته في كتاب مهم أوي نشر سنة 1976 إسمه The High Frontier أو الجبهة العليا و الرجل ده بيقول إن الصح إننا صحيح نستفيد من خير الكواكب و القمر بس مينفعش بأي حال من الأحوال إننا نستعمرهم .. إحنا ممكن نبني محطات فضاء تفضل تدور حول القمر مثلاً و فرق التنقيب تنزل تشتغل و تجيب اللي هي عايزاه و تطلع .. لكن إن بشر يستعمروا الكواكب دي فكرة فاشلة .. إذا كان (إيلون ماسك) مع الفريق الأولاني فحتلاقي إن المنافس الأول بتاعه (جيف بيزوس Jeff Bezos) و اللي غير إنه بيملك شركة Amazon إلا إنه كمان بيملك شركة إسمها Blue Origin بتاعة تصنيع صواريخ برده زي ما SpaceX بتاعة (إيلون ماسك).
هي المشكلة مش إن ناس ليها وجهات نظر .. مش عيب إن يبقي عندك فريقين كل واحد فيهم بدماغ .. المشكلة إن الجهة اللي المفروض تقرر إيه اللي حيمشي هي أساساً مش عارفه تعمل إيه و انا هنا بتكلم عن NASA .. دي جهة المفروض هي اللي في إيدها مفاتيح اللعبة بس بتغير رأيها زي شخصية (محمد علي باشا) في فيلم الحرب العالمية الثالثة و اللي جسدها الممثل (بيومي فؤاد) .. شوية تقولك اه (إيلون ماسك) عنده حق ويلا نبعت رواد فضاء للمريخ .. شوية تانيين و يقولك لا يلا نبعت محطة فضاء تدور حول القمر اللي هو مشروع أرتميس Artemis اللي المفروض يعني بيقول إن NASA حتبعت رواد فضاء للقمر علي سنة 2024 .. فعلياً NASA مش عارفه هي عايزة إيه و يمكن أكتر حاجة تثبت ده هو لما تيجي تسألهم طب أنتوا شايفين نستفيد من القمر إزاي؟
في الأول قالوا إحنا نشوف إيه الحاجة اللي علي القمر بس نادرة علي الأرض و بتجيب فلوس حلوة .. الحاجات دي بتتحط تحت إسم REM و دي إختصار Rare Elements on Earth يعني العناصر النادرة علي الأرض .. قالك جميل كده إحنا ممكن ننقب عن السليكون اللي يعتبر أهم REM و اللي مطلوب كتير عشان بيتصنع منه الخلايا الشمسية و الأجهزة الطبية و Smartphones خصوصاً إن 90% من مخزون العالم من REM موجود في الصين و المصيبة إن الصين بتقول إن الإحتياطي بتاعها يدوبك يكفي الإنتاج العالمي لمدة 15-20 سنة بالكتير .. زود علي REM كمان Helium-3 و ده الوقود المثالي للمفاعلات النووية الإندماجية .. شوية و قالوا طب إستهدوا بالله بس كده .. طب ما نشوف إيه اللي علي القمر ينفع نستفيد بيه في الفضاء من غير ما نحتاج نبعته الأرض عشان يتباع؟ .. الناس دي بتتكلم عن الأكسجين بالمناسبة .. القمر 42% من كتلته أكسجين .. جميل .. أكتر فلوس NASA بتدفعها في أي رحلة فضاء هي تانكات الأكسجين عشان رواد الفضاء يتنفسوا و كمان في الأكسجين المسال اللي بيستخدموه كوقود للصواريخ .. طب إحنا لو نقبنا عن الأكسجين اللي محبوس في رملة القمر مش كده حنوفر فلوس كتير؟ .. طب والهيدروجين نجيبه منين؟ .. قالك بسيطة ساعتها ممكن نشحنه من الأرض في تانكات .. جت ناس قالت طب ما نستفيد من الهيدروجين اللي علي القمر؟ .. ده معناه إن لازم ننقب عن الهيدروجين المحبوس في الثلج في القطبين بتوع القمر .. انت شفت الناس بتوع NASA بيلفوا حول نفسهم إزاي؟ .. بس واضح كده إن فيه إجماع دلوقتي علي إحنا رايحين فين .. إحنا رايحين القمر ندور علي الثلج .. جميل .. ثلج يعني مياه .. مياه يعني أكسجين و هيدروجين .. يعني وقود ببلاش .. و ده يفسرلك ليه كل المسبارات Probes و مركبات الفضاء اللي NASA بعتتها للقمر راحت تدور علي حاجة واحدة .. ثلج.
من أول مجس كليمنتاين Clementine Probe لحد مركبة Lunar Reconnaissance Orbiter .. اللي NASA بقت متؤكدة منه إن فيه ثلج علي القمر .. اللي هم مش عارفين يحددوه أوي هو الثلج ده قد إيه؟ و عشان كده NASA دفعت فلوس لشركات عشان تبعت مركبات فضاء للقمر عشان يجاوبوا علي السؤال ده بالذات .. هو القمر عليه ثلج قد إيه؟ .. أول مركبة حتطلع السنة الجاية إسمها Commercial Lunar Payload Services أو CLPS و وراها مركبة تانية إسمها Moon Ranger .. بس يمكن أهم مركبة حتتبعت القمر عشان الحكاية دي حتكون المركبة VIPER و دي إختصار Volatile Investigating Polar Exploration Rover و حتتطلع إن شاء الله سنة 2022 عشان تحدد أنسب مكان فيه أكبر كمية ثلج علي القمر .. ليه عايزين يحددوا المكان ده بالذات؟ .. عشان دي حتبقي منطقة عمليات مشروع أرتميس و اللي زي ما قلنا حتبقي أول مهمة إرسال رواد فضاء للقمر تعملها NASA.
طب انا حمشي مع بتوع NASA للأخر .. لقينا الثلج علي القمر .. حنستفيد منه إزاي بقي؟
أول طريقة إسمها التنقيب الحراري Thermal Mining و هي من إسمها باين إن إحنا حنجيب رملة القمر نسخنها عند درجات حرارة عالية عشان نحول الثلج الممزوج بالرملة مرة واحدة من صورته الصلبة للصورة الغازية .. يعني إحنا زي ما تقول كده حنعمل Skip لمرحلة الصورة السائلة .. البخار أو الغاز ده حيتحط في تانكات و حنفكه لعناصره الأولية اللي هم الأكسجين و الهيدروجين .. عشان بس تعرف إزاي بتشتغل كمهندس فإحنا عارفين إن هم حاجة في الهندسة هي الفلوس .. فيه فريق جوه NASA بيقوده واحد إسمه (جورج ساورس George Sowers) نشروا Paper حسبوا فيها هم بالصلاة علي النبي حيحتاجوا معمل قد إيه عشان الحكاية دي فلقوا إن إحنا محتاجين خزان سعته 26 طن بينتج 1,100 طن في السنة بتكلفة إجمالية 2.5 مليار دولار .. هو الحقيقة رقم مش بطال كتكاليف .. و حتي إنك تنتج 1,100 طن هيدورجين و أكسجين في السنة تعتبر إنتاجية حلوة جداً بس هي فيه مشكلة صغيرة .. الطريقة دي بتحتاج حرارة عالية أوي و حرارة عالية يعني إستهلاك طاقة عالي .. عالي أوي .. المعمل ده حيستهلك 2.8 ميجاوات طاقة .. كتير انا عارف.
الحل المنطقي اللي NASA فكرت فيه هو الطاقة النووية .. سنة 2018 المهندسين بتوع NASA إشتغلوا مع الناس بتوع معمل لوس ألموس الوطني Los Almos National Laboratory و عملوا مع بعض مفاعل نووي صغير سموه KRUSTY و دي إختصار Kilowatt Reactor Using Sterling Technology و المفاعل النووي ده جربوه عشان يدي أقصي Power لمدة 28 ساعة متواصلة .. بس هي الأزمة مش في كده .. الأزمة إن مفاعل KRUSTY بيستخدم كوقود يورانيوم عالي التخصيب إسمه Y-12 .. الأزمة إن الميكس بين رحلات الفضاء و يورانيوم عالي التخصيب دي مش لطيفة بالنسبة لناس كتير لإن فعلياً انت عايز رواد الفضاء يسافروا القمر و معاهم قنبلة نووية .. يمكن الحل المناسب إنك بدل ما تستخدم يورانيوم عالي التخصيب فانت حتستخدم يورانيوم خفيف التخصيب و فيه شركات كتير شغالة في بيزنس تصنيع مفاعلات نووية أمنة منها شركة إسمها UltraSafe Nuclear Corp .. بس تظل المشكلة هي إن ناس كتير مش راضية بفكرة إننا نطلع الفضاء بأي حاجة إسمها فيه كلمة نووي.
ثاني طريقة و دي الطريقة اللي داخله دماغ وكالة الفضاء الأوروبية ESA و اللي مفيهاش كلمة نووي بس فيها حبة كيمياء حلوين إسمها Molten Salt Electrolysis System .. فكك من الإسم .. حضرتك حتجيب رملة القمر حتحطها في حلة ومعاها ملح كلوريد كالسيوم بس مسال و حتسخن الحلة دي .. الفرق بين الطريقة دي و الطريقة بتاعة Thermal Mining إنك مش محتاج درجة حرارة عالية أوي عشان تحول الرملة من الحالة الصلبة للغازية مرة واحدة .. في الطريقة دي انت بتسخن الحلة لدرجة حرارة 950 درجة مئوية .. ساعتها لما بتمرر تيار كهربي بتلاقي إن الأكسجين بيسيب الرملة و تقدر تمتصه في تانكات .. طب أزيدك من الشعر بيت .. الطريقة دي بتخلي رملة القمر تتحول لمادة صلبة تقدر تستفيد بيها.
طريقة ثالثة هي الطاقة الشمسية .. زي ما إحنا علي الأرض بيبقي عندنا مركزات شمسية بنقدر نركز بيها أشعة الشمس علي المياه عشان تغلي فانت برده علي القمر محتاج 5 مركزات شمسية علي الأقل عشان تعكس ضوء الشمس علي المناطق اللي فيها ثلج عشان يسيح .. هي مشكلة الطريقة بس إنك حتفصل إزاي المياه اللي حتسيح عن رملة القمر.
لحد هنا و دي كانت مرحلة الأمل في بكره .. نيجي بقي لمرحلة النكد .. عشان NASA تعمل أي حاجة من أحلام اليقظة اللي انا إتكلمت عنها دلوقتي دي لازم مش بس إنها تبعت رواد فضاء للقمر إنما كمان تبعت معدات .. أسهل طريقة هي إنك تبعت معدات معمولة ب3D Printers مش معدات متصنعة من الصلب أو أي معدن تاني و دي حاجة ممكن نبقي نتكلم عنها بعدين .. محتاجين يبعتوا تانكات تخزين سواء بقي عشان تنقب عن الهيدروجين أو الأكسجين أو حتي الهليوم-3 .. محتاجين يبعتوا روبوتات تنقيب .. و فوق ده كله محتاجين يعملوا محطة فضاء كاملة يا إما علي سطح القمر أو تلف حول القمر .. لك أن تتخيل يا مؤمن إننا لو فضلنا نشيل كل سنة طن من رملة القمر فإحنا محتاجين 220 مليون سنة عشان يتقال إننا سحبنا من رملة القمر ما يعادل 1% بس من كتلته .. يدينا و يديكم طولة العمر.
المصادر:
مقالة بعنوان Digging up Regolith: Why mining the moon seems more possible than ever نشرت في مجلة Popular Mechanics و ده لينك المقالة الأصلية:
https://www.popularmechanics.com/space/moon-mars/a32253706/history-moon-mining/
مقالة بعنوان Trump makes it official: The US will mine the moon نشرت في مجلة Popular Mechanics و ده لينك المقالة الأصلية:
https://www.popularmechanics.com/space/a32082958/trump-moon-mining-asteroids/
مقالة بعنوان The lunar gold rush: How moon mining could work نشرت في موقع وكالة NASA و ده لينك المقالة الأصلية:
https://www.jpl.nasa.gov/infographics/infographic.view.php?id=11272
