اللي حنتكلم عنه النهاردة هو قصة حياة رجل اسمه (أدريان كارتون دوفارت Adrian Carton de Wiart) والحقيقة كان نفسي أشوفه في يوم من الأيام بس هو للأسف مات سنة 1963 يعني من أكتر من ستين سنة .. الرجل ده لما أجي بس أحكيلك ملخص سريع عن حياته .. أو بلاش دي .. خليني أنقلك أول فقرة من صفحة الرجل ده علي ويكيبيديا وصدقني أظن إنك مش حتلاقي وصف لحياة بني أدم يصدمك ويضحكك في وقت واحد أكتر من ده .. جاهز .. هو كان ضابط في القوات المسلحة البريطانية وحصل علي وسام صليب فيكتوريا اللي هو أعلي تكريم ممكن ياخده ضابط في العسكرية البريطانية اللي هو حاجة زي نجمة سيناء عندنا في مصر .. شارك في حرب البوير و الحرب العالمية الأولي والحرب العالمية الثانية .. اتضرب بالرصاص في وشه وراسه ومعدته وأنكل رجله وودانه .. ربنا نجاه من خمس حوادث سقوط طيارة .. هرب من معسكر أسري حرب .. قطع صوابع ايده بنفسه لما الدكتور رفض يبترها .. بس يمكن الجملة اللي بتلخص حياته هي لما وصف تجربته في الحرب العالمية الأولي في الكتاب اللي هو كتبه عن حياته وكان عنوانه Happy Odyssey أو الأوديسا السعيدة إنه وخليني أنقل كلامه نصاً .. الصراحة أنا استمتعت بالحرب.
المرحلة الأولي من حياته .. لن أعيش في جلباب أبي:
(أدريان) من الناس اللي اتولدت وفي بقها معلقة دهب .. هو اتولد يوم 5 مايو 1880 وبغض النظر إنه اتولد في يوم عيد سلسلة أفلام Star Wars اللي تقريباً محدش في مصر بيتفرج عليها غيري فهو كمان اتولد لعيلة ارستقراطية في بلجيكا .. ابوه كان محامي بلجيكي وأمه كانت أيرلندية .. لما أمه اتوفت وهو عنده 6 سنين أبوه خد العيلة كلها وجه عاش في القاهرة هنا .. وهو في مصر أبوه اتجوز تاني وتقريباً مراه أبوه كانت عايزه تخلص منه عشان تستفرد بابوه فاقنعت ابوه إنه يسفره بريطانيا عشان يخش مدرسة داخلية في مدينة برمنجهام .. عارفها انت بتاعة (توماس فوكين شيلبي) دي .. الواد اتخرج من المدرسة ولما بقي عنده 19 سنة دخل جامعة أكسفورد .. لحد هنا هو كان ماشي علي نفس الخط اللي ابوه كان عايزه .. اتعلم كويس عشان تخش كلية الحقوق عشان تطلع محامي عشان تمسك شغل أبوك .. لحد هنا هي قصة مهروسة ومحفوظة وشفناها في مية فيلم عربي بس زي ما إنت متوقع أنا مكنتش جبت سيرة الرجل لو كان مشي في نفس السكة اللي أبوه كان عايزه يمشيها.
وهو لسه في أولي جامعة ويوم 11 أكتوبر 1899 بتولع حرب البوير الثانية ودي حرب حنتكلم عنها بالتفصيل لما نحكي قصة التفرقة العنصرية في جنوب أفريقيا أو الأبارتهايد Apartheid إن شاء الله .. خليني أقولك كملخص سريع إن دي حرب كانت بين بريطانيا ضد مستعمرات البيض (اللي هم الناس اللي بشرتهم لونها أبيض يعني) في جنوب أفريقيا .. لما الحرب قامت والخبر وصل بريطانيا دي كانت اللحظة اللي (أدريان) قرر فيها إن كار الدحيحة ده مش كاره .. زي ما كده وإنت لسه صغير تحضر فرح فيه رقاصة ويمكن لأول مرة في حياتك تكتشف إن فيه حاجات في الدنيا أحلي من لعب البلاي ستيشن .. المهم .. (أدريان) بيقدم كمتطوع في القوات المسلحة البريطانية .. لإنه كان لسه في أولي جامعة فلسه قاصر ولإنه زي ما قلتلك بلجيكي الجنسية مش بريطاني فهو زور بطاقته علي إنه بني أدم بريطاني عنده 25 سنة تحت اسم مستعار ولإن وقتها وده تريند حتشوفه مع المؤسسة العسكرية البريطانية إن مش فارق معاهم أوي الورق طالما إنت بتقولهم ودوني الجبهة .. يدوبك بيعدي فترة معسكر التدريب وفي أول طلعة ليه بره المعسكر القوة بتاعته بتتعرض لكمين وبيتضرب طلقتين واحدة في معدته والتانية في فخده .. ودي كانت أول مرة يتضرب فيها بالنار .. عد معايا بقي من دلوقتي الإصابات بتاعته عشان العداد بدأ.
بسبب أصابته سفروه تاني انجلترا عشان وهو في لندن بيتعالج بيكتشف إن أبوه عرف إنه ساب الكلية وراح الجهادية وحتي هو اتعرف إنه كان مزور بطاقته .. بعد خناقة لرب السما أبوه اقتنع إن ابنه خلاص أفيونة أدرينالين الحرب اتمكنت منه ووافق إن ابنه يسيب كلية الحقوق وينضم للقوات المسلحة عشان يرجع تاني جنوب أفريقيا سنة 1901 .. وهو هناك خدوه سلاح الخيالة واترقي لرتبة عريف ويدوبك هي 24 ساعة وكانوا سحبوا منه الترقية عشان اتخانق مع رقيب .. مش دي القضية .. القضية إن بعدها بشوية اترقي بقي ملازم أول ودي معلومة مهمة تعرفها في الحروب وهي إن الترقيات بتكون عشوائية جدأ وداخل فيها عوامل كتير زي المحسوبية أو إن صادف إن اللي المفروض يترقي مات أو اتصاب فلازم يلاقوا حد مكانه أو يمكن إنت اتحطيت في موقف خلاك تطلع السوبرهيرو اللي جواك فالأكبر منك شافوك تنفع عبد أسود شطور فقرروا يرقوك .. هي الحروب كده ماشية بفكرة الفوضي الخلاقة ويمكن عشان كده (أدريان) عجبه جو الحروب .. مش بس أدرينالين الأكشن .. إنما الفوضي اللي بتمشي معاها .. بعد ما حرب البوير خلصت اتنقل للهند .. الحقيقة إن وقتها مكنتش فيه حرب في الهند فالدنيا كانت هادية بس عشان (أدريان) يسلي وقته كان بيحب ياخد حصانه ويطلع يصطاد خنازير برية .. في واحدة من طلعاته دي وقع من علي حصانه وحصانه وقع عليه وكسر كام ضلع وانكل رجله .. أصابه رقم اتنين.
المرحلة الثانية .. المدعكة العالمية الأولي:
سنة 1907 (أدريان) بياخد الجنسية البريطانية .. بعد كده بيتجوز بنت من العيلة المالكة النمساوية اسمها (فريدريكي ماريا كارولين هينرييت روزا سابين فرانشيسكا فوجر فون بابينهاوزن) ومعلش ده اسمها اللي أطول من الليلة السودا وعلي فكرة هو بيخلف من الأميرة دي بنتين.. شوية واتبعت للصومال عشان يشارك في قمع الثورة اللي قام بيها (محمد بن عبدالله) ضد الاستعمار البريطاني وهو هناك في غارة من الغارات اتضرب بالنار 3 مرات في وشه .. الطلقة الأولانية طيرت حتة من ودنه الشمال .. الطلقة الثانية فقعتله عينه الشمال والثالثة كملت عليها .. إصابة رقم ثلاثة.
سفروه تالت لبريطانيا عشان يتعالج في الوقت اللي الحرب العالمية الأولي كانت مولعه .. لما طلع من المستشفي كان عايز يتبعت علي الجبهة بس الدكتور بتاعه قاله بص إنت مش حتروح الجبهة الا لما تلبس عين صناعية .. عشان ينزله من علي ودانه قاله وماله .. يدوبك خد ورقة الموافقة علي الترحيل للجبهة قام واخد تاكسي لمحطة القطر وهو في التاكسي رمي العين الصناعية وحط مكانها Eye Patch اللي هي رقعة العين أو الغطا الاسود اللي بيتحط علي العين اللي كان بيلبسها القراصنة واللي اتشهر بيها طول حياته بعد كده .. المهم .. في فبراير 1915 المعلم أبو عين واحدة بيوصل للجبهة الغربية في فرنسا عشان ينضم لفيلق الخيالة الرابع .. في إبريل بيدوق أول طعم لضرب النار ويدوبك مع أول دانة وحياتك بتيجي قذيفة تفرقع جنبه فشظايا القذيفة بتخبط في ايده وتكسرله ساعة إيده .. شوف الفقر .. الخبطة بتطيرله نص كف إيده ومش بيفضل غير صباعين متعلقين بكف الايد يدوبك بشوية جلد .. بيسحبوه علي المستشفي الميداني وهناك (أدريان) بيمارس عادته إنه يتخانق مع الدكاترة .. الدكتور اللي كان ماسك حالته مكنش راضي يقطعله الصباعين اللي فاضلين يقوم (أدريان) بنفسه ماسك صباعينه فاصلهم عن كف ايده ورميهم علي الأرض وده مخلاش قدام الدكتور حل غير إنه يبترله كف إيده كله .. إصابة رقم أربعة.
كان المفروض إنه يترحل علي بريطانيا كمصاب حرب بس هو خلاص أفيونة الأدرينالين بتاعة الحروب عششت في دماغه .. ويمكن كمان وقتها وسط الخساير الغير منطقية في الأرواح اللي كانت بتتعرض ليها القوات البريطانية في الحرب فهم مكنش عندهم مانع إن أي حد عايز يروح الجبهة يبعتوه .. حتي لو كان أعور بأيد واحدة .. (أدريان) بيتبعت للجبهة تاني عشان يشارك في معركة السوم اللي تعتبر واحدة من أبشع المعارك في تاريخ البني أدمين الحديث .. سنة 1916 كانت فعلاً سنة سودا في الحرب .. تحس وقتها إن (أدريان) زي ما يكون بيتحدي نفسه إنه يموت .. في حصار الأنجليز لقرية اسمها لابواسيل La Boisselle في فرنسا كانوا المفروض فيه 3 وحدات قتالية مختلفة تحاول تخش القرية اللي كانت تحت سيطرة الألمان .. سبحان الله يشاء ربنا إن ال3 قادة بتوع ال3 وحدات يتقتلوا كلهم في وقت واحد .. في الوقت اللي مكنش فيه راديو ولا اتصالات تليفونية تقدر تستخدمها عشان تنسق العمليات بين ال3 وحدات ف(أدريان) عين نفسه مش بس قائد للوحدات الثلاثة إنما كمان مسئول الاتصالات ما بينهم .. بقي يا عيني يجري بين الوحدات الثلاثة اللي متوزعين في أماكن مختلفة من القرية عشان ينسق ما بينهم تحركاتهم ويديهم أوامرهم لصد هجوم الألمان علي القرية .. بسبب رغبته إنه يعيش دور وولفرين فهو حصل علي صليب فيكتوريا اللي قلتلك في البداية إنه يعتبر نجمة سينا بتاع بريطانيا.
خلال السنين اللي فاضلة من الحرب (أدريان) بقي شبه مصاصين الدماء اللي كل ما تضربهم بالنار يبتسمولك ويقولولك ياختي كميلة .. اتضرب في راسه بطلقة قناصة Headshot صريحة ومماتش .. اتضرب بالنار في أنكل رجله .. أتضرب في وركه .. أتضرب في رجله .. أتضرب في ودنه تاني .. أصابات رقم خمسة وستة وسبعة وثمانية .. في كل مرة يخش المستشفي يتخانق مع الدكاترة ويطلع يروح الجبهة تاني .. ملخص تجربة (أدريان) في الحرب العالمية الأولي هو قالها في كتابه اللي حكي فيه قصة حياته .. بصراحة أنا اتبسطت بالحرب دي.
المرحلة الثالثة .. التسخين للمدعكة العالمية الثانية:
لما الحرب العالمية الأولي خلصت سنة 1918 متتخيلش إن (أدريان) بقي قاعد كده من غير لا شغلة ولا مشغلة .. يمكن بسبب الطريقة الكارثية اللي الدول المنتصرة في الحرب العالمية الأولي تعاملت بيها مع ألمانيا ومع كل الدول المنهزمة الحقيقة فده خلي العالم يعيش فترة منيلة بستين نيلة خلال الحربين الأولي والثانية .. سنة 1919 (أدريان) بيتعين ملحق عسكري في سفارة بريطانيا في بولندا .. للعلم بالشيء بس .. الدحيحة منكوا يعني في التاريخ حيبقوا عارفين إن بولندا دي هي اللي حتكون الشرارة اللي حتولع الحرب العالمية الثانية سنة 1939 بس اللي كتير منكوا ميعرفهوش إن بداية من 1919 ولمدة سنتين بولندا اتخانقت مع الأتحاد السوفيتي ومع تشيكوسلوفاكيا وأوكرانيا وليثوانيا .. بسبب دوره كملحق عسكري فهو بقي قريب جداً من القائد العام للقوات المسلحة البولندية فيلدمارشال (جوزيف بيلسودسكي Joseph Pilsudski) .. خلال السنتين دول (أدريان) قضاها كعب داير علي الجبهات الأربعة وخلال السنتين دول المعلم وقعت بيه مش بس طيارة واحدة .. دول طيارتين .. وطلع منها زي القرد ابن الايه .. سنة 1923 (أدريان) بيطلع علي المعاش برتبة ميجور جنرال اللي هي تعادل فريق أول عندنا وقرر إنه يقضي بقية حياته في بولندا .. يازين ما اختار.
سنة 1939 الدنيا بتولع .. (أدريان) بيسيب كل حياته في بولندا وبيهرب بره البلد عن طريق رومانيا ومنها لبريطانيا .. في أبريل 1940 بيقدم تاني إنه يتطوع في القوات المسلحة .. تاني .. وسط الخساير المنيلة اللي كانت بتتعرض ليها بريطانيا في الحرب فهم مكنش عندهم مشكلة يقبلوا أي حد عايز يتطوع حتي لو كان عجوز عنده ستين سنة وأعور وبأيد واحدة .. الرجل بيعينوه إنه يمسك وحدة قتالية دورها إنها تروح النرويج عشان تشارك في مقاومة الغزو النازي .. وهو رايح طيارته بتقع ودي تالت حادثة طيارة يعيشها وبيطلع منها زي الشعرة من العجين .. بيفضل يلعب الكلب الحيران مع النازيين في غابات النرويج لحد ما الأسطول البريطاني بيعرف ينقذه هو ورجالته ويرجعهم تاني بريطانيا.
في أبريل 1941 (وينستون تشرشل) اللي كان رئيس وزراء بريطانيا في الحرب العالمية الثانية عين (أدريان) قائد لوحدة عسكرية سرية دورها إنها تروح يوغوسلافيا عشان تتكلم مع (جوزيف بروز تيتو) اللي بغض النظر عن إن فيه شارع باسمه في القاهرة فالرجل ده كان زعيم المقاومة اليوغوسلافية ضد النازيين .. المشكلة مش في كده .. المشكلة إن طيارته وهي رايحه وقعت قدام سواحل ليبيا .. حادثة الطيارة رقم أربعة .. الطيارة وقعت في المياه بس هو قدر يعوم وهو شايل واحد كان معاه علي الطيارة مع إنك بتتكلم عن رجل عدي الستين سنة وأعور وبإيد واحدة .. المهم .. بيوصل سواحل ليبيا عشان يلاقي الطليان مستنيينه .. الطليان عرفوا هو مين وقررا يرحلوه علي سجن أسري حرب مخصوص للضباط الأنجليز اللي رتبهم عالية واللي بيتم أسرهم في شمال أفريقيا والسجن ده قريب من مدينة فلورنسا في إيطاليا.
يسكت .. طب يهدي .. أبداً .. أربع مرات يحاول يهرب من السجن .. في المرة الخامسة قرر يعمل فيها قصة فيلم Shawshank Redemption ويحفر نفق طوله معدي 18 متر .. بعد سبع شهور من الحفر (أدريان) ومعاه خمس مساجين بيهربوا في مارس 1943 .. 8 أيام كاملة بيلعبوا الكلب الحيران تاني بس المرة دي مع الطليان لحد ما اتقبض عليهم ورجعوا تاني السجن .. يوم 25 يوليو 1943 بيحصل الانقلاب العسكري علي الديكتاتور الطلياني (بينيتو موسوليني) عشان العسكر يرجعوا تاني حكم الملك اللي هو سبحان الله خلف خلاف اللي حصل عندنا في مصر في ثورة يوليو .. الطليان في الوقت ده كانوا بيلعبوا علي الوينجين .. قدام الناس هم لسه واقفين مع النازيين .. بس في السر هم كانوا بيتكلموا مع الإنجليز علي اتفاق وقف اطلاق نار .. في النوع ده من المفاوضات لازم يبقي فيه اتنين يتكلموا باسم البلدين .. سبحان الله اسم (أدريان كارتون دوفارت) بيظهر كمرشح مثالي .. ليه؟ .. كده كده هو لازم يخرج من السجن عشان خاطر اعاقته .. كده كده رتبته كبيرة فهو يقدر يتكلم باسم الانجليز .. يوم 16 أغسطس 1943 بيركب طيارة في السر للعاصمة البرتغالية لشبونة ومعاه الجنرال (كاستليانو) اللي المفروض أنه مبعوث الملك الإيطالي (فيكتور عمانويل الثالث) اللي هو كمان له ميدان باسمه بس عندنا في اسكندرية .. بمجرد ما المفاوضات بين الطليان والانجليز نجحت (أدريان) رجع تاني أنجلترا يوم 28 أغسطس.
المرحلة الرابعة .. الصين حلوة:
يدوبك هو شهر واحد بس (أدريان) قعده في بريطانيا لحد ما جاله تليفون إن (تشرشل) عايز يبعته الصين عشان يتكلم مع القائد القومي الصيني (شيانج كاي شيك) اللي زي ما حكينا عنه في قصة تايوان مع الصين إنه كان هو اللي ماسك في رقبة (ماو تسي تونج) في الحرب الأهلية الصينية .. المهم إن (أدريان) راح الصين في الفترة اللي كانت الصين تحت الاحتلال الياباني في السنين الأخيرة من الحرب وكان وقتها القوميين والشيوعيين بيحاربوا مع بعض ضد عدو مشترك اللي هو المحتل الياباني وكان دوره إنه يبقي مستشار عسكري للقوميين الصينيين مش أكتر .. (أدريان) بيفضل في الصين لحد سنة 1947 وهناك ربنا نجاه من حادثة سقوط الطيارة رقم خمسة وبيرجع تاني بريطانيا يقضي حياته في أيرلندا بلد أمه في هدوء لحد ما بيموت يوم 5 يونيو 1963.
سميه زي ما تسميه .. محظوظ .. مجنون .. ماشيه معاه ببركة دعاء الوالدين .. أسطورة .. برص مش عايز يموت .. بس الحق يتقال هي قصة ممكن عقلك يعجز إنه يقبل أنها حقيقية .. تحت كل ده حتلاقي حقيقة إن (أدريان كارتون دوفارت) هو عسكري .. هو صحيح معاه رتبة بس هو عسكري .. مش فارق معاه يموت أو يعيش .. مش فارق معاه ترميله إيه في سكته يعطله .. هو عايز يعمل حاجة معينة بيعرف إيه الخطوات وبيعملها .. جت جت مجتش أهلا وسهلاً .. ده علي فكرة النقيض تماماً من العقلية اللي طاغية علي فئة الجنرالات في القوات المسلحة لأغلب دول العالم وخصوصاً بريطانيا .. حتي عندنا في مصر .. الضابط من دول يعلق نسر ودبورة يقولك يا أرض اتهدي ما عليكي قدي .. (أدريان) رتبته فريق أول وبيحفر نفق 18 متر بايد واحدة .. عادي جداً .. يمكن السبب ورا إن مفيش حد سمع عن (أدريان) قبل كده إنه صحيح جنرال بس برتبة عسكري .. مش حتلاقي التاريخ حافظ اسمه بانه القائد المنتصر في معركة معينة .. يمكن عشان هو كان مكانه دايماً مع العساكر فالتاريخ نسيه لإن التاريخ مش بيفتكر العساكر.
المصادر:
- فيديو بعنوان Adrian Carton de Wiart: The Most Badass Soldier of All Time and a Real Life Action Hero نشرت علي YouTube وده لينك الفيديو:
Adrian Carton de Wiart: The Most Badass Soldier of All Time and a Real Life Action Hero - مقالة بعنوان Adrian Carton de Wiart: The Unkillable Soldier نشرت في موقع هيئة الإذاعة البريطانية BBC وده لينك المقالة الأصلية:
Adrian Carton de Wiart: The unkillable soldier – BBC News
