أفلام DC Comics .. جريمة لا تغتفر في حق السينما.

موضوعنا النهارده حيبقي حاجة إسمها DC Cinematic Universe وده يبقي العالم السينمائي اللي قائم حول شخصيات كرتونية ظهرت في سلسلة القصص المصورة Comic Books اللي نشرتها شركة DC Comics و اللي تحولت لسلسلة أفلام .. أشهر السلاسل دي هي سلسلة Batman .. المفروض إن مع بداية عرض فيلم Batman Begins اللي أخرجه (كريستوفر نولان Christopher Nolan) و النجاح الكبير للفيلم فالشركة المنتجة Warner Bros كانت عايزه (كريستوفر نولان) يكمل في السلسلة دي و فعلاً هم عملوا التحفتين السينمائيتين The Dark Knight و The Dark Knight Rises وكانت شركة Warner Bros متخيله إن وقع تحت إيدها منجم دهب .. لحد ما ظهر رجل إسمه (جوس ويدون Joss Whedon) .. أظن السؤال دلوقتي هو يطلع مين الأخ ده؟

بتحب مسلسل Angel؟ كنت بتحب مسلسل Buffy: The Vampire Slayer؟ ده الرجل اللي كان ورا المسلسلين دول .. بدأت تنبهر؟ ..الرجل ده هو اللي أخرج و كتب و أنتج فيلم The Avengers سنة 2012 و اللي ظهر في نفس سنة عرض فيلم The Dark Knight Rises وبعد كده هو اللي أخرج و كتب و أنتج برده الجزء الثاني The Avengers: Age of Ultron سنة 2015 .. هو اللي كان ورا مسلسل Agents of S.H.I.E.L.D اللي بيتذاع حالياً علي قناة ABC .. (جوس ويدون) هو السبب إن شركة Warner Bros لقت نفسها قدام مشكلة كبيرة أوي و هي المنافسة مع شركة Marvel و اللي في يوم و ليةه بقت تنتج سلاسل أفلام عن عالم كامل من الSuperheroes سموه Marvel Cinematic Universe و إختصاراً بيسموه MCU .. هنا شركة Warner Bros قالت لنفسها هو إحنا ناقصين إيد ولا رجل .. الشركة لقت نفسها محتاجه يبقي عندها مشروع شبه MCU بس زي ما شركة Marvel كان عندها (جوس ويدون) هو اللي يمسك المشروع بتاعها فWarner Bros كانت محتاجه حد هو كمان اللي يمسك المشروع بتاعها واللي سموه DC Cinematic Universe.

(جوس ويدون Joss Whedon) الرجل اللي كان ورا مشروع فيلم The Avengers و كان أخر شغل له مع سلسلة أفلام Marvel كان فيلم The Avengers: Age of Ultron.

طبيعي إن دماغك تروح إن طب ما عندكوا (كريستوفر نولان) خلوه هو اللي يمسك المشروع .. الحقيقة إنك بتفهم لإن فعلاً Warner Bros كانت عايزاه هو اللي يمسك المشروع ده بس متفهمش إيه اللي حصل .. فجأة بدل ما (كريستوفر نولان) كان هو اللي المفروض يخرج أول فيلم يطلع ضمن مشروع DC Cinematic Universe و اللي هو Man of Steel قرروا يجيبوا (زاك سنايدر Zack Snyder) اللي إتعرف أوي بفيلمه 300 عشان يبقي هو المخرج وده عطي (كريستوفر نولان) الفرصة إنه يتفرغ لفيلمه أو خلينا نقول تحفته الفنية Interstellar.

للأسف فيلم The Avengers: Age of Ultron منجحش النجاح اللي كان (جوس ويدون) مستنيه فهو من نفسه قرر يتنحي عن إنه يبقي هو المسئول عن مشروع MCU .. بس النجاح الكبير اللي حققه فيلم Captain America: The Winter Soldier و سلسلة Iron Man خلت شركة Marvel تقول لنفسها إيه يعني .. لما (جوس ويدون) يقول عايز أمشي هو الخسران .. في الوقت ده كان (زاك سنايدر) بيدمر كل حاجة في DC Cinematic Universe .. فيلمه الأول Man of Steel كان كويس بس مش كويس أوي يعني .. و بدل ما Warner Bros تعمل زي ما Marvel عملت وتمشيه زي ما Marvel قبلت بإستقالة (جوس ويدون) تلاقيهم قالوله مش مشكلة خالص يا حبيبي .. خد فيلم Batman V Superman: Dawn of Justice بوظه هو كمان زي ما انت عايز .. يا تري يسكتوا لحد كده؟ .. لا قالوله انت مش بوظت Batman V Superman: Dawn of Justice خد كمان Suicide Squad إبقي انت المنتج المنفذ بتاعه و أخربه هو كمان.

(زاك سنايدر) المخرج اللي بوظلنا كل حاجة حلوة في سلسلة أفلام DC Comics.

فجأة شركة Warner Bros فاقت علي المصيبة اللي (زاك سنايدر) عملها بس الحمد لله ربنا بعتلهم فيلم Wonder Woman .. الأراء الأولية للنقاد السينمائيين اللي شافوا فيلم Wonder Woman بتقول إنه أحسن فيلم يتعمل لDC Cinematic Universe وده خلي فيه إحساس كده إنهم شكلهم حيخلوا دور النساء في السلسلة الي حد ما كبير .. تقدر تقول إنها كانت حركة عشان يخلوا البنات تحب تتفرج علي الأفلام بتاعتهم .. في شهر مارس اللي فات إتقال إن (جوس ويدون) حيعمل فيلم مستقل بذاته عن شخصية Batgirl ودي شخصية ضمن الشخصيات بتاعة DC Comics بحيث إنه هو اللي حيكتب و يخرج وينتج الفيلم .. بدأت الناس تقول لنفسها الله الله الله هي الشخصيات النسائية هي اللي حتقوم DC Cinematic Universe ولا إيه؟

اللي حصل إن بنت المخرج (زاك سنايدر) الله يرحمها إنتحرت وده خلاه ياخد قرار إنه يسيب فيلم Justice League اللي كان شغال عليه حالياً .. شركة Warner Bros أعلنت إنها تعاقدت مع (جوس ويدون) عشان كمان مش بس يشتغل علي فيلم Batgirl إنما كمان يكمل فيلم Justice League .. ده في الوقت اللي وسط الكلام علي إن النقاد حبوا أوي فيلم Wonder Woman و إن ده بيخلي منطقي جداً إن شركة Warner Bros تبدأ تعمل حملة دعاية كبيرة للفيلم إذا بيهم ساكتين ولا بيروجوا ليه و زي ما يكونوا بيتبرأوا من الفيلم .. طب ليه يا جدعان؟ .. أغلب الظن إن شركة Warner Bros بعد ما الحمد لله قدرت تخلص من (زاك سنايدر) و الحمد لله برده لقوا مخرج كويس أو ده اللي هم متخيلنه زي (جوس ويدون) فهم إقتنعوا إنهم يقدروا يخلوا فيلم Justice League هو نقطة الإنقلاب بتاعتهم اللي تبدأ تخلي الناس تقول إن مشروع DC Cinematic Universe بدأ يبقي له شكل و طعم و ريحة.

فيلم Wonder Woman واللي إلي حد كبير يعتبر أحسن فيلم يتعمل في سلسلة أفلام DC Comics كلها.

ناس كتير متعرفش إن (جوس ويدون) مش مجرد مخرج كويس إنما يمكن أهم ميزة فيه إنه بيعرف يحكي قصص و الأهم إنه ممكن يديك رأيه و يساعدك من غير ما يطلب إن الدنيا كلها تعرف إنه واقف جنبك .. بمعني .. هو كان من ضمن الفريق اللي كتب السيناريو بتاع فيلم Thor: The Dark World و كان من ضمن الناس اللي إشتغلت مع المخرج (تيم جان Tim Gunn) في فيلمه Guardians of The Galaxy و محدش عرف أي حاجة عن مساهماته دي و لا هو شخصياً حب يظهر نفسه قدام الناس .. لمدة 5 سنين كاملة هو إشتغل ككاتب قصص مصورة و هو اللي عمل سلسلة The Astonishing X-Men وده خلاه من أكتر الناس اللي بتعرف تحكي قصص لإن دي شغلته ويمكن ده السبب اللي بيخليه الشخص المثالي إنه يصلح المصايب اللي (زاك سنايدر) عملها.

مشكلة (زاك سنايدر) إنه بيعرف يصور بس مبيعرفش يحكي .. بص علي الأفلام اللي عملها .. 300 و Sucker Punch و Man of Steel و Batman V Superman .. تلاقيها كلها أفلام متصورة حلو أوي بس مفيهاش قصة .. وده بيخلي دور (جوس ويدون) إنه يبدأ يخلي فيلم Justice League هو البداية الحقيقية لما يسمي DC Cinematic Universe خصوصاً إنك في الفيلم ده حتشوف شخصيات جديده لانج زي Aquaman و The Flash و Cyborg .. بس بلاش تتخيل إن مهمة (جوس ويدون) حتبقي سهلة وده سببه التوقيت .. المشكلة إن (زاك سنايدر) فعلاً خلص تصوير 90% من مشاهد فيلم Justice League يعني (جوس ويدون) حيستلم المشروع وهو في مرحلة الPost Production و أخره إنه يصور كام مشهد إضافي .. فإذا كان فيه ناس كتير متفاءلة فانا كمان والله فرحان بس في نفس الوقت مش متوقع كتير من (جوس ويدون).

المصدر:

مقالة بعنوان Joss Whedon is Exactly What’s Needed to Fix The DC Universe نشرت علي Website إسمه Complex.com وده لينك المقالة الأصلية:
http://www.complex.com/pop-culture/2017/05/joss-whedon-is-exactly-whats-needed-to-fix-dc-universe