ألبوم صور .. المشاريع اللي بتتعمل بقروض صينية حول العالم.

من فترة إتكلمت عن إزاي القروض اللي بتديها الصين لأفريقيا عشان تعمل بيها مشاريع بنية تحتية أو Infrastructure بتخلي القروض دي زي ما تكون كلبش في رقبة دول أفريقيا و بيخليها زي المدمن اللي بقي مستعد يعمل أي حاجة عشان ياخد جرعة المخدرات من الديلر بتاعه .. النهارده ححاول أطلع بيك شوية بره أفريقيا و نبص بصه علي العالم كله .. عايزين نشوف إزاي الصين بتشتري نفوذ بإنها بتدي لدول العالم فلوس عشان تبني مشروعات بنية تحتية بس بشروط و نظام متصمم مخصوص عشان الدول متقدرش تسدد الفلوس اللي عليها و بالتالي تبقي مجرد لعبة في إيد الصين .. عشان بس تبدأ تتحط في الصورة فانت بتتكلم عن أكثر من 600 مشروع حول العالم .. و لإن فعلاً الرقم ده ضخم أوي فخليني أحطلك شوية نقط ورا بعضها عشان بس أبسطلك شويه الأمور:

بتتكلم عن أكثر من 41 مشروع في قطاع البترول و الغاز الطبيعي سواء بقي بتتكلم عن خطوط أنابيب أو محطات تكرير و معالجة.
بتتكلم عن حوالي 203 مشروع بيتحطوا تحت بند الطرق و الكباري و السكك الحديد.
بتتكلم عن حوالي 199 محطة إنتاج كهرباء سواء بقي شغالة بالفحم أو الغاز الطبيعي أو الطاقه النووية أو حتي الطاقة المتجددة.

ده بيحطك قدام حقيقة إن القروض الصيني دي لقت طريقها لأكتر من 112 دولة .. صحيح إن فيه منهم كتير بياخدوا القروض دي بناء علي مبادرة OBOR اللي هي One Belt One Road ودي انا إتكلمت عنها قبل كده بس فيه دول تانية بره المبادرة دي بدأت تاخد قروض من الصين.

واحد من أكتر الإتهامات اللي بتتقال للسياسة دي حاجتين: أول حاجة هي إن الصين لما تيجي مثلاً تمول مشروع زي بناء طريق و ليكن زي محور روض الفرج عندنا في مصر فهي بتقول إن اللي شركة الإستشارات اللي تصمم المشروع تبقي صيني .. و شركة المقاولات اللي تنفذ المشروع هي كمان صيني .. العمال اللي حيشتغلوا في المشروع حيتجابوا من الصين .. المواد الخام اللي حيتعمل منها المشروع برده حتتجاب من الصين .. في الأخر بتلاقي نفسك قدام واقع إن المشروع ده مجابش أي فايدة لينا .. إحنا مشلغناش أي حد و موفرناش أي فرصة عمل لأي شاب في مصر و في الأخر إسمنا عملنا مشروع عملاق .. دي نقطة .. النقطة الثانية و هي إن لما الصين بتعمل مشروع بره فأخر حاجة هم بيشغلوا بالهم بيها هي المعايير البيئية مع إن الحكومة الصينية دلوقتي بتدقق أوي في الموضوع ده.

نقطة تانية برده غريبة أوي و هي إن إذا كانت الدول الغربية أو المؤسسات المالية الغربية عموماً مش بتحب تحط فلوسها في بلد فيها مشاكل زي فنزويلا أو نيجيريا أو زيمبابوي بحجة إن لو انا إديت فلوس لحكومة أي بلد فيهم ففي أي لحظة معرض إن يحصل إنقلاب عسكري و حلاقي فلوسي راحت عليا .. الصين علي الناحية التانية معندهاش أي مشكلة إنها تخش بتقلها مع الدول اللي زي دي .. اللي انا مش قادر أفهمه هو إن بالنظر إلي إن الدول اللي زي دي مشاكلها كتير فانت برده بتحط نفسك في خطر إن فيه مليون حاجة تحصل غلط .. خد مثلاً عندك بلد زي الإكوادور .. دي بلد إستلفت من الصين مليار دولار عشان تصرفهم علي أساسات محطة تكرير نفطي بتكلفة 12 مليار دولار بحيث إن كان المفروض المشروع ده يخلص من 2013 و إحنا دلوقتي في 2019 ومفيش جديد.

فيه بلد في أسيا إسمها كامبوديا .. البلد دي فيها 7 سدود كلهم علي بعض بيتنتجوا حوالي 50% من إجمالي الكهرباء اللي بتطلعها البلد .. اللي في الصورة ده إسمه سد كامتشاي Kamchay Dam يبقي رابع أكبر سد من السبع سدود وده إرتفاعه لوحده معدي ال108 متر .. بس يمكن أهم معلومة عن السد ده إنه إتبني بتمويل صيني.

الميناء اللي عندك في الصورة ده إسمه هامبانتوتا Hambantota .. فكك من إسمه .. الميناء ده في دولة إسمها سريلانكا إستلفت مليار دولار من الصين عشان تبنيه و لما معرفتش تسدد إضطرت إنها تديه للصين بحق إنتفاع مدته 99 سنة يعني تقريباً باعته للصين ببلاش.

اللي عندك في الصورة ده يبقي محطة إنتاج كهرباء بالفحم إسمها ميدوبي Medupi إتبنت في جنوب أفريقيا بتمويل صيني قيمته 1.5 مليار دولار .. الحقيقة إن مش دي المشكلة .. المشكلة إن دي واحدة من 36 محطة إنتاج كهرباء بالفحم إتبنوا حول العالم بتمويل صيني و ال36 محطة دول لوحدهم بيطلعوا كمية ملوثات للبيئة قد اللي بتطلعها دولة كاملة زي إسبانيا.

ستاد الأبطال الوطني في زامبيا بيقدر يستوعب 50,000 متفرج و إتبني بتمويل صيني قيمته 94 مليون دولار .. ده مجرد مشروع من ضمن أكتر من 600 مشروع حول العالم إتبنوا بتمويل صيني.

الدول المتلونة بالأحمر دي الدول الأعضاء في مبادرة OBOR و النقاط الحمرا دي مشاريع إتعملت بتمويل صيني .. زي ما انت شايف فيه مشاريع إتعملت في دول بره المبادرة.

شوية أمثلة من مشاريع السدود اللي إتبنت حول العالم بتمويل صيني.

الصين مركزه علي مشاريع بناء الموانيء في دول باكستان و سريلانكا و ماليزيا ويمكن الصين مركزه أوي علي باكستان اللي من كتر الفلوس اللي هي بتستلفها من الصين مبقتش عارفه تسدد إزاي؟

الخطوط الحمراء دي بس شبكة الطرق اللي الصين بتمول بناءها في باكستان.

مشروع محطة إنتاج كهرباء بالفحم في كامبوديا بينتج 945 ميجاوات كهربا.

موقع إنشاء محطة تكرير البترول في الإكوادور و زي ما انت شايف حطوا الاأاسات وكان الله بالسر عليم علي كده.

المصدر:
مقالة بعنوان The world built by China .. نشرت في جريدة The New York Times الأميريكية وده لينك المقالة الأصلية:
https://www.nytimes.com/interactive/2018/11/18/world/asia/world-built-by-china.html