لينك التسجيل الصوتي للمقالة علي Sound Cloud:
https://soundcloud.com/user-112011687-312727988/watchmen?utm_source=clipboard&utm_medium=text&utm_campaign=social_sharing
مفيش سلسلة قصص مصورة تقرأها و تعملك دماغ منها و تحس إنك ماسك بين إيديك حاجة نظيفة زي سلسلة Watchmen .. مفيش سلسلة قصص مصورة الشخصيات بتاعتها بالتعقيد و العمق ده .. مع كامل إحترامي للناس اللي بتحب Batman و شايفه إن الخناقة بينه و بين الجوكر دي أروع ما إتكتب في القصص المصورة بس إنت محتاج تحط كل ده علي جنب و إنت بتبص لشخصية زي دكتور مانهاتن Doctor Manhattan اللي كان بني أدم طبيعي إسمه دكتور (جون أوستيرمان Jon Osterman) لحد ما عمل في نفسه تجربة علمية خلت لونه أزرق بينور في الظلمة و قدراته مخلياه سوبرمان و (ثانوس Thanos) مضروبين في الخلاط مع بعض .. سلسلة Watchmen دي كانت 12 جزء عن مجموعة من الأبطال الخارقين اللي القدر بيحطهم قصاد نهاية الكون بإنفجار نووي .. لما السلسلة دي نزلت في السوق كانت صدمة لكل اللي قروها .. في الوقت اللي القصص المصورة بتاعة مارفيل Marvel مليانة شخصيات مسلية زي Spider Man و Iron Man فإنت لما بتتكلم عن Watchmen فإنت بتتكلم عن سلسلة قصص مصورة كلها عنف و دم و كأبة و ناس بتموت .. اللي هو بإختصار قصة حزينة مليانة نكد.
ده خلي سلسلة Watchmen في رأي ناس كتير أفضل شغل إتعمل في القصص المصورة في التاريخ .. نقطة تفوق Watchmen كانت تفاصيلها و إنها مليانة أوي .. في الوقت اللي مثلاً سلسلة زي Batman مركزة أوي علي مدينة زي جوثام تلاقي إن Watchmen شاملة الكون كله و بتتكلم عن الصراع بين الإشتراكية و الرأسمالية و يعني إيه ردع نووي؟ .. كلام كبير أوي علي قصص مصورة موجهة للأطفال .. يمكن عشان كده ناس كتير كانت شايفة إن السلسلة دي مينفعش تتعمل فيلم .. ده كان رأي مخرج يعتبر في رأي الناس انه مجنون زي (تيري جليام Terry Gilliam) .. إزاي تاخد قصص مصورة واخدة جايزة هيوجو Hugo للأدب و دي حاجة محصلتش قبل كده ولا بعد كده و تعملها فيلم؟
سنة 2009 السلسلة إتعملت فيلم أخرجه (زاك سنايدر Zack Snyder) يعني من حوالي 10 سنين بس اللي حتكلم عنه النهاردة هو قصة المعافرة لحد ما الفيلم ده إتعمل و عشان تفهم ليه الخناقة المولعة دلوقتي لما HBO القناة اللي قدمت لينا مسلسل Game of Thrones حتعمل Watchmen مسلسل.
كان يا مكان كان فيه كاتب بريطاني إسمه (ألان موور Alan Moore) كان شايف إن صحيح فترة الثمانينات كانت مليانة بقصص مصورة موجهة للأطفال بس جه الوقت إننا نبدأ نجذب ليها الفئات العمرية الأكبر شوية بإننا نبدأ ندخل الموت و الإكتئاب بحيث إن الأحداث متبقاش وردي أوي كده .. هو فعلياً جرب الطريقة دي لما أعاد إحياء سلسلة قصص مصورة إسمها The Saga of the Swamp Thing و نشرتها DC Comics .. الرجل ده كانت فكرته الجديدة إنه يجيب كل الشخصيات اللي ملهاش لازمة و محدش بيستخدمها في القصص المصورة بتاعة DC Comics و يبدأ يلمها مع بعضها في عالم جديد بحيث إن العالم ده يبقي كئيب شوية قريب في تفاصيله من الواقع اللي إحنا عايشين فيه بحيث القصة تبقي مليانة موت و نكد و إن علي أخر الأحداث نص الأبطال يكونوا ماتوا .. بإختصار شديد هو كان عايز يعمل النسخة الComic Book من Game of Thrones بس من غير مشاهد الجنس.
طبعاً اللي ماسك DC Comics وقتها (ديك جيوردانو Dick Giordano) معجبتوش فكرة إنك تقتلي شخصيات كانت موجودة قبل كده في القصص بتاعة DC Comics لإن إفرض إحتجناها بعدين .. هو قاله أنا مستعد أسيبك تجرب فكرتك بس إعملها بشخصيات جديدة من خيالك .. و من هنا إتولدت Watchmen .. سلسلة من 12 جزء كتبها (ألان موور) و رسمها (ديف جيبونز Dave Gibbons) و الأجزاء ال12 إتنشروا في الفترة من 1986 لحد 1987 بس لما إتنشرت علي بعضها في كتاب واحد سنة 1987 مفيش حد في أميركا مكنش بيتكلم عنها .. نجاح السلسلة تجسد في إن (ألان موور) خد جايزة Hugo للأدب.
من أول ما السلسلة بدأت تتنشر في السوق و الناس تتكلم عنها و المنتجين بتوع السينما بقوا بيحوموا زي الدبان اللي بيتلم علي الأكل عشان ياخدو حق تحويلها لفيلم .. سنة 1986 خد الحق ده إتنين منتجين شركاء الي هم (لورينس جوردون Lowrence Gordon) و (جويل سيلفر Joel Silver) و راحوا لشركة20th Century Fox عشان تساهم في الإنتاج و تتولي هي التوزيع .. كده بقي عندنا المنتجين و دول علي فكرة اللي بعد كده أنتجوا فيلم The Matrix .. الخطوة اللي وراها هي السيناريو .. الإتنين راحوا ل(ألان موور) و عرضوا عليه إنه يكتب السيناريو بنفسه بس هو رفض لإنه كان شايف إن السلسلة دسمة أوي في تفاصيلها لدرجة إنك مينفعش تختزلها و تقصها لفيلم مدته ساعتين.
الإتنين المنتجين ميأسوش و راحوا جابوا سيناريست تاني إسمه (سام هام Sam Hamm) و هو اللي كتب السيناريو بتاع فيلمي Batman و Batman Returns فده رجل إلي حد كبير فاهم يعني إيه تاخد قصص مصورة تحولها لسيناريو فيلم .. سنة كاملة و الرجل بيكتب في السيناريو لحد ما خلصه في 128 ورقة و لعب شوية في النهاية بتاعة القصص و دخّل حتة السفر عبر الزمن يعني تقدر تقول حط التاتش بتاعته بس مخربش الدنيا و الكلام ده كان سنة 1988 .. تيجي سنة 1991 و شركة 20th Century Fox تقولك أنا غيرت رأيي و مش حعمل الفيلم ده .. (لورينس جوردون) و (جويل سيلفر) قالوا مش مهم حنلاقي شركة إنتاج تانية أكيد.
في الوقت ده سلسلة Watchmen كانت مكسرة الدنيا فبمجرد ما إتعرف إن شركة 20th Century Fox رمت المشروع جت شركة Warner Bros و قالتلهم أنا رقبتي سدادة .. و مش كده و بس .. دي كانت جايبه مخرج كمان حيموت و يعمل الفيلم اللي هو (تيري جليام) و ده رجل أقسملك بالله مجنون و عايزك بس تتفرج علي أفلامه زي Monty Python و Time Bandits و إنت حتفهم قصدي .. بسم الله الرحمن الرحيم كده (تيري جليام) مسك السيناريو اللي كتبه (سام هام) و قالك لا معلش أنا ليا تصور تاني خالص و جاب سيناريست تاني إسمه (تشارلز مكيون Charles McKeown) عشان يكتب سيناريو جديد .. السيناريو الجديد معجبش (تيري جليام) قام راميه في الزبالة و جاب سيناريست تالت إسمه (وارين سكارين Warren Skaaren) اللي كل اللي هو عمله إنه جاب السيناريو بتاع (سام هام) الأولاني خالص خده هو هو و حط إسمه عليه بحيث إن قصة الفيلم كلها حتكون حول إزاي إن دكتور مانهاتن Doctor Manhattan حيرجع بالزمن عشان يوقف التجربة العلمية اللي إدتله القدرات الخاصة دي.
المشكلة إن الرؤية دي تقريباً خلت باقي الشخصيات اللي في القصة فعلياً ملهمش لازمة .. و علي فكرة المشروع كان حيتنفذ فعلاً و كان اللي حيقوم بدور دكتور مانهاتن Doctor Manhattan الممثل (أرنولد شوارزنيجر Arnold Schwarzenegger) بس كل ده إنهار لما ملقوش ميزانية .. شركة Warner Bros إشترطت إن الإتنين المنتجين (لورينس جوردون) و (جويل سيلفر) يحطوا من جيبهم 25 مليون دولار لتمويله و لما لقوا إن فلوسهم متكفيش المشروع كله إتلغي .. في نوفمبر 2000 المخرج (تيري جليام) طلع شتم شركة Warner Bros و شتم الإتنين المنتجين و في وصلة ردح ختمها بإن أساساً سلسلة Watchmen دي أعقد من إنها تتعمل فيلم.
بعد كده (جويل سيلفر) شال إيده من الموضوع بس (لورينس جوردون) كمل عشان يلاقي شركة إنتاج مستعدة تخش معاه و سنة 2001 قابل الناس بتوع شركة Paramount و هم اللي جابوله سيناريست جامد أوي إسمه (ديفيد هايتر David Hayter) هو اللي كتب السيناريو بتاع فيلم X-Men عشان يكتب سيناريو الفيلم و قعد سنة كاملة يكتبه و لما سلمه و (ألان موور) قراه قال عنه إن لو هو شخصياً حب يكتب السيناريو للروايات مكنش حيتكبه أحسن من (ديفيد هايتر) .. كده بقي عندنا السيناريو .. شركة Universal كمان جابت (لويد ليفاين Lloyd Levin) عشان ينتج الفيلم مع العلم إن الرجل ده قبل كده أنتج Boogie Nights و Lara Croft: Tomb Raider .. سنة 2004 شركة Paramount خدت المشروع من شركة Universal .. كده بقي عندنا السيناريو و المنتجين و فاضل المخرج .. كان الإختيار رايح ل(دارين أرنوفوسكي Darren Aronofsky) اللي كان لسه مخلص فيلم Requiem for a Dream و كان خلاص حيستلم إخراج Watchmen بس في نفس الوقت جاله فيلم The Fountain اللي كان هو حيموت و يخرجه و زي ما بيجيلك إتنين Offer مع بعض و بتختار واحد فيهم فهو كمان إختار يعمل The Fountain .. شركة Paramount قالته في داهية و جابت مكانه (بول جريينجراس Paul Greengrass) اللي كان لسه مخلص فيلم The Bourne Supremacy و ده نفس المخرج اللي عمل The Bourne Ultimatum و Captain Philips .. حتي الممثلين كانوا إختاروهم (جود لو Jude Law) كان حيعمل دور دكتور مانهاتن و (هيلاري سوانك Hillary Swank) حتعمل دور Silk Spectre .. سنة 2005 التصوير كان بدأ و الWebsite بتاع الفيلم إتعمل فجأة كل حاجة باظت .. شركة Paramount حصلت فيها خناقة كبيرة جوه مجلس الإدارة و إتفكت لكذا حتة و قالوا إن مشروع مكلف زي فيلم Watchmen مش وقته.
في ديسمبر 2005 بعد معافرة و شحتفة أخيراً مشروع Watchmen راح للشركة اللي حتنتجه Warner Bros بعد ما كانت رفضت تعمله زمان .. بمجرد ما مسكوا المشروع إختاروا (زاك سنايدر) عشان يخرجه لإنه عجبهم أوي شغله في فيلم 300 اللي هو كمان متاخد عن سلسلة قصص مصورة كتبها (فرانك ميلر Frank Miller) .. (زاك سنايدر) خد السيناريو بتاع (ديفيد هايتر) اللي بس بفكرك إنه أحسن سيناريو إتكتب و عدل فيه شوية .. الميزانية اللي إتحطت كانت 100 مليون دولار مع إنها زادت في التصوير ل120 مليون دولار .. يمكن التاتش بتاعة (زاك سنايدر) إنه زود حتة التعليق الصوتي زي ما هو إستخدمها في فيلم 300 إن فيه ممثل بيحكي أحداث معينة عشان يزود كمية المعلومات اللي إنت كمشاهد بتاخدها في وقت تصوير أقل .. التصوير بدأ من سبتمبر 2007 لحد فبراير 2008 و يوم 23 فبراير 2009 كان العرض الرسمي للفيلم .. بعد صبر سنين أخيراً الناس بقي قدامها فيلم Watchmen تتفرج عليه .. السؤال دلوقتي هو الفيلم كان زي ما هم عايزين؟
رأي الناس في فيلم Watchmen كان حاجتين: الحاجة الأولانية إنه متصور حلو أوي و دي ميزة في شغل (زاك سنايدر) و اللي لما تتفرج علي أفلامه زي 300 و Man of Steel حتلاقي إن المشاهد خصوصاً مشاهد الأكشن متصورة حلو أوي .. ثاني حاجة و دي برده حاجة مميزة في شغل (زاك سنايدر) إن مفيش قصة و مفيش حوار و مفيش حبكة و مفيش صدمة .. طول الفيلم ناس بترغي في كلام ملوش معني بس الأكشن شكله حلو .. خلال أول إسبوعين بس من عرضه إيرادات الفيلم قلت بنسبة 67% .. صحيح الناس اللي قريت القصص المصورة كويس خدت بالها إن (زاك سنايدر) محطتش التاتش بتاعته تقريباً .. إنت تقدر تقول إنه خد القصص زي ما هي عملها فيلم تقريباً نفس اللي هو عمله مع القصص المصورة بتاعة 300 بس يمكن الفرق إن إذا كان مش كتير اللي قرروا القصص المصورة بتاعة 300 اللي كتبها (فرانك ميلر) بس فيه ملايين كانوا قروا سلسلة Watchmen .. عشان أقربهالك حاول تتخيل إن سلسلة Watchmen دي شبه سلسلة ما وراء الطبيعة لدكتور (أحمد خالد توفيق) الله يرحمه .. زي ما الكلام بيتقال إن Netflix حتعملها مسلسل و ساعتها المسلسل ده حيتحط تحت الميكروسكوب لإن الناس اللي إتعلقت بالروايات و أنا منهم مش حنرحم فريق المسلسل لو طلعولنا حاجة مش علي المستوي .. و ده نفس الإتهام اللي إتقال ل(زاك سنايدر) .. إنت جاي تعمل فيلم عشان بس يتقال عليك إنك عملت فيلم و تحلل الفلوس اللي إنت أخدتها بس طلعلتنا فيلم من غير لا لون ولا طعم ولا ريحة.
و بنفس الإسلوب المستفز اللي (زاك سنايدر) إتعامل معانا به بعد ما قلنا عليه نفس البقين الحمضانين دول لما شفنا فيلم Dawn of Justice لقيناه نزلنا النسخة الأصلية من الفيلم و اللي ناس كتير شافتها و إتبسطت بيها .. طب بدل ما هي مشكلتك في المونتاج طب ما تجيب حد بتاع مونتاج كويس يقفلك الفيلم لكن متحرقش دمنا في السينما و في الأخر تقولنا أصل أنا لسه حنزلكوا النسخة قبل المونتاج و حتعجبوا أوي .. اللي خلي فعلاً ناس كتير تسب و تلعن في (زاك سنايدر) هو كلامه اللي قاله بعد ما الفيلم إتعرض .. هو قال إنه مكنش عايز يعمل الفيلم و مكنش شايف إن سلسلة Watchmen تنفع تتعمل فيلم أصلاً بس هو قال إنه يا عيني ضحي عشانا و قرر إنه هو اللي يعمله عشان بس المشروع ميقعش في إيد حد زي (تيري جليام) و يبوظه .. قال يعني إسم النبي حارسك اللي طلعلتلنا Lord of the Rings.
أساساً سبب إني قررت أتكلم عن Watchmen هو مش إني أجيب سيرة (زاك سنايدر) قد ما إني عايز أبشركوا إن رغم كل المصايب دي كلها اللي حصلت لأي حد يفكر إنه يحول Watchmen لفيلم إذا بواحد إسمه (دايمون لينديلوف Damon Lindelof) يقرر إنه ياخد الRisk و ينتج السلسلة كمسلسل تليفيزيوني حيتعرض علي قناة HBO و دي نفس القناة اللي جابتلنا صداع من كتر العظمة طول سبع سنين من عرض Game of Thrones و جابتلنا سكتة دماغية من الحلقة الأخيرة في الموسم الثامن .. الحاجة اللي ممكن تطمنا شوية هي إن (دايمون لينديلوف) هو نفس البني أدم اللي أنتج مسلسل LOST و لو إنت من جيل الألفينات متعرفش إيه هو LOST فإنت فايتك كفاح أجيال .. الميزة في مسلسل Watchmen الجديد هو إن إسمه Watchmen و فيه شخصيات من Watchmen بس هو ملوش أي علاقة لا من قريب ولا من بعيد بWatchmen .. بص هو أنا مش فاهم و مش حعرف أفهمك بس أدينا مستنيين عرض المسلسل يمكن نفهم.
المصدر:
مقالة بعنوان Watchmen at 10: The Fascinating Story of how the ‘Unfilmable” Comic Book Series Finally Made it to the Big Screen .. نشرت في جريدة The Independent البريطانية و ده لينك المقالة الأصلية:
https://www.independent.co.uk/arts-entertainment/films/features/watchmen-10-anniversary-zack-snyder-terry-gilliam-darren-aronofsky-paul-greengrass-a8792791.html
