لينك التسجيل الصوتي علي ساوند كلاود:
https://on.soundcloud.com/gqxuN
اللي ححكيه النهاردة هي قصة واحدة ست مش ببالغ لو قلت إن لما كان بيتقال اسمها في شوارع روما واللي وقتها كانت الإمبراطورية الرومانية هي القوة العظمي الأولي في العالم كان فيه رجاله بشنبات قلبهم بيقع بين رجليهم من بس إن اسمها اتقال .. (زنوبيا) دي ست تقريباً إنت أول مرة تسمع اسمها .. يمكن أنا مستعد أراهن بالخمسين جنيه اللي في جيبي إن ولا واحد فيكوا سمع اسمها قبل كده والحقيقة أنا مش مستغرب لإن (زنوبيا) كانت بتحكم بلد إلي حد كبير ملهاش تاريخ معروف .. وثانياً هي خسرت وزي ما إحنا عارفين التاريخ بيكتبه المُنتصر ومفيش مُنتصر حيقول إن فيه واحدة ست فشختني حتي لو أنا قدرت أنتصر عليها في النهاية .. أظن دلوقتي إنت فيه أسئلة كتير في دماغك يمكن أهمها هي مين (زنوبيا) دي بالصلاة علي سيدنا النبي؟ وكانت بتحكم إيه؟ وإيه حكاية خناقتها مع روما؟ وعشان كده خليني أبدأ معاك القصة من أولها.
الإمبراطورية الرومانية كانت قوة عظمي وعشان أوريك بس قد إيه هي كانت قوة عظمي ففيه مثل شعبي بيتقال وإنت ممكن تكون سمعت عنه هو إن كل الطرق تؤدي إلي روما .. عارف المثل ده قصته إيه؟ .. الرومان عشان يربطوا مملكتهم ببعضها عملوا شبكة طرق محترمة أوي لدرجة إن لو أنا في الإسكندرية وحبيت أروح روما فأنا مش محتاج خريطة ولا حد معايا يكون عارف السكة ولا حتي Google Maps .. أنا بس محتاج بالحمار بتاعي أمسك أول الطريق السريع و أمشي مع البهايم والحمير والجمال اللي ماشية فيه معايا وحلاقي نفسي وصلت روما .. شبكة طرق محصلش إن حضارة تانية عرفت تعمل واحدة زيها .. بس زي أي كيان كبير بيجي عليه الوقت إنه يضعف ويقدم .. زي ما بنقول جمعية ودايرة .. سنة 260 بعد الميلاد كانت فعلاً سنة سودا علي دماغ الرومان .. فكك من إن البلد كان فيها أزمة إقتصادية وسياسية .. أي بلد في الدنيا فيها المشاكل دي .. المصيبة إن حدود الإمبراطورية مبقتش أمنة زي زمان .. الإمبراطورية الجالية Gallia اللي هي دلوقتي إنت عارفها باسم فرنسا وكانت تحت إيد الرومان بدأت تخش في تمرد مفتوح .. إمبراطورية الفرس في السنة دي دخلوا في مواجهة مفتوحة مع الرومان إنتهت بهزيمة الرومان .. ودي مش المشكلة .. المشكلة إن في المعارك دي ضد الفرس إتأسر الإمبراطور الروماني (فاليريان) .. وسط كل الهري ده كانت فيه واحدة اسمها (زنوبيا) بتاكل فشار وبتشرب بيبسي وبتتفرج علي الإمبراطورية الرومانية وهي بتفك من بعضها حتة حتة.
محدش عارف بالضبط (زنوبيا) اتولدت فين .. فيه ناس بتقول إن أصلها إغريقي اللي هو اليونان يعني وفيه ناس هبدت الهبدة التمام بإنها تبقي قريبة (كليوباترا السابعة) وفيه ناس بتقول إن أصلها من شبه الجزيرة العربية .. ولإن محدش عارف الحقيقة فين فخليني أنا أهبد وأقول تعالوا نفترض إنها إتولدت في شبه الجزيرة العربية .. بس زي ما بعدين إحنا عرفنا إن أهلها سافروا من جوه شبه الجزيرة العربية لحد تدمر أو بالميرا زي ما إنت ممكن تكون عارف اسمها ودي بلد في سوريا دلوقتي وهناك إتعلمت كويس أوي .. إحنا متؤكدين إنها كانت علي الأقل بتتكلم أربع لغات هم اللاتيني والإغريقي و السيراكية واللغة المصرية القديمة .. البنت كانت موسوعة معلومات عامة ماشية علي الأرض .. إتجوزت رجل من أصل عربي برده بس هاجر من جوه شبه الجزيرة العربية وراح قعد في تدمر اسمه (سبتيموس أذينه) وزي ما إنت شايف هو اسمه الأول روماني واسمه الثاني عربي .. ولإنه وهو عايش في تدمر خد الجنسية الرومانية والرومان إختاروه عشان يبقي هو حاكم تدمر وبالتالي (زنوبيا) بقت ملكة تدمر أو Palmyra أو بالميرا في سوريا دلوقتي واللي يمكن إنت تكون سمعت عنها في الأخبار لما عناصر تابعة لداعش بدأت تدمر الأثار اللي الموجودة في المدينة دي وبتحكي تاريخها ومجدها .. تدمر مش بعيد عن دمشق علي فكرة يدوبك ساعة بالعربية .. بس الفكرة إن تدمر دي مش مدينة قديمة .. تدمر مدينة بدأ الناس تعرفها لما الرومان دخلوا الشام وإختاروا المدينة عشان تبقي عاصمة ولاية الشام ولإن موقعها علي طريق التجارة بين الشرق والغرب فحاول تتخيل إن تدمر دي كانت دبي بتاعة زمان.
زي ما قلتلك سنة 260 الفرس هزموا الرومان وأسرو الإمبراطور الروماني (فاليريان) .. سنة 263 حاولوا ياخدوا تدمر بس (سبتيموس أذينه) قدر يدافع عن مملكته وأجبر الفرس علي الانسحاب .. قدام الناس (سبتيموس أذينه) كان بيقول إنه خدام روما .. بس كلنا كنا عارفين إن دماغه إنه يبقي هو ملك الشرق .. هو كان عارف إن الرومان بقوا أضعف من إنهم يحافظوا علي الشرق ودي كانت فرصته .. ابن (فاليريان) واللي مسك وراه كان اسمه (جالينوس) واللي كان عارف الحقيقة دي وعارف إنه هو محتاج (سبتيموس أذينه) مش (سبتيموس أذينه) هو اللي محتاجه ويمكن عشان كده هو اداله لقب حاكم الشرق كله وده شبه إعتراف منه بإن تدمر مملكة مستقلة وإن كانت قدام الناس بس هي ولاية تابعة للإمبراطورية الرومانية.
سنة 267 تخيل الرومان إنهم خلصوا من أكبر خازوق خدوه في حياتهم لما أُغتيل (سبتيموس أذينه) علي إيد ناس قرايبه كانوا طمعانين في الحكم .. كتير جوه روما تخيلوا إن خلاص كده هم وانزاح .. محدش كان متخيل إن (زنوبيا) حتطلعلهم في الحلم تقولهم سربرايز ماذرفاكرز .. إذا كان جوزها كان ماشي بمبدأ كل التورتة حتة حتة ف(زنوبيا) كانت ماشية بمبدأ خير البر عاجله .. أول حاجة عملتها إنها استغلت إن ابنها (فابالاثوس) لسه قاصر فأعلنت نفسها وصية عليه وبالتالي بقت هي اللي بتحكم .. تاني حاجة عملتها إنها أعدمت كل من كان له يد في إغتيال جوزها .. تالت حاجة بقي إنها استفزت الإمبراطور (جالينوس) وجالها عشان ياخد منها تدمر بس خد علي قفاه جامد فسواء هو أو اللي جه وراه (كلاوديوس جوثيكوس) مكنش عندهم حل غير إنهم يعترفوا باستقلال تدمر .. مهم تكون فاهم إن فعلياً محدش كان عارف ياخد من (زنوبيا) لا حق ولا باطل .. مش بس الرومان .. الفرس حاولوا يتشطروا عليها وخدوا بالألم علي وشهم .. الدول المجاورة ليها حاولت تستغل إنها واحدة ست أرملة مكسورة الجناح و كلهم إتعلم عليهم .. هي وصلت للحكم سنة 267 و لما جت سنة 269 كان تحت إيدها سوريا كلها وتركيا كلها .. بعد كده بدأت تفكر في إنها تاخد مصر .. مصر مخدتش في إيدها كتير وسنة 269 برده كانت خدت الإسكندرية وسنة 270 كانت مصر كلها بقت في إيدها .. في المرحلة دي مفيش حد بقي عارف إزاي يوقف (زنوبيا).
زي ما (كليوباترا) جالها (أغسطس قيصر) فبرده (زنوبيا) جالها (لوشيوس دوميتيوس أوريليانوس) .. الرجل ده جه الحكم سنة 270 ومقعدش أكتر من أربع سنين في الحكم بس تقدر تقول إن حكمة بالنسبة للرومان كان عامل زي ما يكون حد تعبان خالص وجه الدكتور كتبله حقنة كورتيزون فوقته .. هي معالجتش حاجة بس فوقته .. الرجل ده كان حقنة الكورتيزون اللي ربنا بعتها للرومان عشان يفوقهم .. هو كان جنرال جاي من المؤسسة العسكرية وعمره ما عرف يعمل حاجة في حياته غير إنه يقود شوية عساكر في معركة .. خلال الأربع سنين بتوعه قدر إنه يحمي بلده من غزو كاسح عملته إمبراطورية جاليا .. قدر يستعيد نفوذ وسلطة روما علي إسبانيا وإيطاليا وبريطانيا .. سنة 271 (زنوبيا) استفزت روما لما أعلنت إن ابنها هو قيصر اللي من حقه يحكم الإمبراطورية كلها .. هنا (لوشيوس دوميتيوس أوريليانوس) مبقاش عنده حل غير إنه يخلي (زنوبيا) تخرس .. من وجهة نظره هي بتمثل أكبر تهديد لبلده .. سيبك من إنها عايزه تستقل .. كل الولايات اللي تحت إيد روما عايزه تستقل مش دي القضية .. القضية إنها عايزه تاخد مكان روما .. الأسوأ من كده إنها ست .. اللي يعصب وينرفز إنها واخده (كليوباترا) Role Model ليها .. بعد اللي عملته (كليوباترا) في روما مستحيل إمبراطور روما يسكت علي إهانة واحدة ست للإمبراطورية .. سنة 272 (لوشيوس دوميتيوس أوريليانوس) خد قواته وبدأ يزحف من أسيا الصغري اللي هي تركيا بإتجاه تدمر .. المواجهة بينه وبين (زنوبيا) كانت في أنطاكية واللي إنتهت بهزيمة جيش (زنوبيا) اللي كان حوالي 70,000 مقاتل .. ده مخلاش قدامها حل غير إنها تنسحب للعاصمة تدمر وتستني حصار الرومان ليها.
هي كانت متخيله إن حصون المدينة تقدر تحميها ويمكن هي حاولت تعمل فيها (جوزيه مورينيو Jose Mourinho) وتستفز (لوشيوس دوميتيوس أوريليانوس) بإنها بعتتله رسالة تقوله فيها كلمتين زي السم في جنابه:
“من (زنوبيا) ملكة الشرق ل(أوريليان أوغسطس) .. إنت بتطالب بإني استسلم زي ما تكون نسيت إن (كليوباترا) كان أهون عليها تموت علي إنها تعيش مهزومة حتي لو كانت ملكة”
الجواب استفز (لوشيوس دوميتيوس أوريليانوس) لإن اسم (كليوباترا) كان بيجيب حرقان و مشطشط للرومان كلهم وبعدها قرر إنه يكثف من محاولات رجالته إنهم يسيطروا علي المدينة وفعلاً المدينة وقعت في إيده وقدر إنه يمسك (زنوبيا) وهي بتهرب رايحة علي العراق ومن بعد كده بقي محدش عارف إيه اللي حصل .. فيه ناس قالت إنها فضّلت تعمل نفس اللي عملته (كليوباترا) بإنها إنتحرت قبل ما تتأسر .. ناس تانيه قالت إن (لوشيوس دوميتيوس أوريليانوس) مقدرش يأمر بقتلها فخدها معاه روما وهناك أجبروه تحت ضغط سياسي إنها تتعدم .. فيها ناس تانية قالت إن فعلاً (لوشيوس دوميتيوس أوريليانوس) خدها معاه روما وهناك إتجوزت رجل روماني محدش عارف هو مين .. أيا كان اللي حصل ل(زنوبيا) .. دي ست خسارة إننا منكونش عارفين هي مين أو هي عملت إيه خصوصاً زي ما قلت في العنوان .. دي الست اللي هزت عرش روما.
المصدر:
- مقالة بعنوان Zenobia, the rebel queen who took on Rome .. نشرت في مجلة National Geographic وده لينك المقالة الأصلية:
https://www.nationalgeographic.com/history/magazine/2017/11-12/history-queen-zenobia-defied-rome/
