كنت قلت قبل كده إن صناعة الأفلام زي عمايل الأكل بالضبط .. بتقعد تحضر في مقادير كتير و لازم كل حاجة تمشي صح عشان في الأخر صينية المكرونة بالبشاميل تطلع من الفرن وشها من فوق بني بس مش محروق و اللحمة مستوية و الجبنة تبقي سايحة .. الأفلام نفس الفكرة برده .. مقاديرها كتير و لازم كل حاجة تبقي بحساب عشان في الأخر تقعد ساعة و نص قدام فيلم مش عارف إيه اللي حيحصل بعد كده؟ .. بس خليني أزود حتة إن عمايل سلاسل الأفلام بالذات عامله زي عمايل الكيكة كده .. في الأكل لو حاجة باظت بتعرف تلحقها .. لقيت الصلصة عادبة بتزود ملح .. الجبنة مساحتش بتسيب الصينية في الفرن شوية .. الكيك مش كده .. لو الكيكة باظت فهي خلاص باظت و بتترمي .. سلاسل الأفلام نفس الفكرة .. إنت بتشتغل علي الجزء الثاني أو الثالث من الفيلم .. بتحضر كل مقاديرك من سيناريو و ممثلين و مخرج و مؤثرات خاصة و بتشتغل .. لو حاجة باظت فالفيلم بيبوظ و متحاولش تصلح حاجة لإنك فعلياً حتعك الدنيا أكتر و مفيش مثال صارخ علي ده قد فيلم Terminator: Dark Fate الجزء السادس من سلسلة أفلام Terminator.
الفيلم ده بالذات حكايته بتخليك تحس فعلاً إنك قدام واحدة ست حبت تعمل كيكة و دخلت علي النت شافت الطريقة و حضرت المقادير زي ما الفيديو علي YouTube قال بالضبط بس برده الكيكة طلعت بايظة .. الفيلم ده إتعمل و كان الTarget المحطوط إن ده يبقي بداية إحياء سلسلة Terminator لإن السلسلة كانت ماتت و جه الوقت إنها تعيش تاني .. المشكلة تبان صعبة بس حلها كان إلي حد ما سهل .. دلوقتي إنت عندك سلسلة بدأت بأول جزء اللي هو Terminator و فعلياً كسر الدنيا .. عملت الجزء الثاني Terminator 2: Judgment Day سنة 1991 و كان أحلي من الجزء الأولاني مع إن دي حاجة صعبة فشخ .. سنة 2003 عملتوا الجزء الثالث Terminator: Rise of the Machines بميزانية وصلت 200 مليون دولار و ده كان رقم خزعبلي وقتها و في أول Weekend من عرضه الفيلم جاب 44 مليون دولار و أرباحه الكلية علي مستوي العالم وصلت 433 مليون دولار اللي هو نجاح مش بطال بس مش هو الحاجة الواو يعني.
سنة 2009 إتعملت محاولة لإحياء السلسلة من الصفر في فيلم Terminator: Salvation من إخراج واحد علي قد حاله يعني إسمه (ماك جي McG) .. الفيلم ده فكرته زي ما قلتلك إن إحنا حنبدأ من الصفر .. مش حنجيب أي ممثل من اللي عملوا أي دور قبل كده في السلسلة و أبطال الفيلم حيكونوا (كريستيان بايل Christian Bale) اللي كان لسه عامل The Dark Knight و معاه (سام وورثينجتون Sam Worthington) اللي كان لسه عامل Avatar يعني علي الورق الفيلم ده حيكسر الدنيا بس أرباحه في أول Weekend من عرضه كانت 42 مليون دولار و جاب في شباك التذاكر العالمي 371 مليون دولار اللي هو برده مش النجاح اللي إحنا متوقعينه .. سنة 2015 عملتوا الجزء الخامس Terminator: Genisys اللي هو عنوان أهبل لفيلم أهبل و قصة هابلة .. الفيلم ده جاب جوه أميركا يدوبك 89 مليون دولار بس أرباحه في شباك التذاكر العالمي وصلت 440 مليون دولار جزء كبير منها جاي من 113 مليون دولار اللي جابهم من الصين و اللي في رأيي السبب فيهم هو إن بطلة الفيلم كانت (إيميليا كلارك Emilia Clark) بطلة مسلسل Game of Thrones اللي وقتها لو كنت تسأل أي حد ماشي في الشارع سمعت عن فيلم Terminator قبل كده؟حيقولك لا بس لو سألته سمعت عن (كاليسي) حيقولك أه يا عم أم التنانين هو فيه حد ميعرفهاش.
المشكلة زي ما هي باينة عندك سلسلة و مش عارفين نحييها .. الحل زي ما قلتلك بسيط .. إعمل جزء جديد بحيث إنك تفترض إن أحداث الجزئين الثالث و الرابع و الخامس ولا كأنهم حصلوا .. تعامل كأن الأفلام دي ولا كأنها إتعملت لإن خلينا نكون صرحاء مع بعض الأفلام الثلاثة فعلياً إتنسوا من ذاكرة أغلب الناس اللي بتتفرج علي أفلام أجنبي .. علي فكرة الحكاية دي إتطبقت هي هي بحذافيرها في فيلم Halloween اللي نزل أول السنة دي .. شخصية (مايكل مايرز Michael Myers) القاتل المجنون إتقتل في كذا فيلم من السلسلة الغريبة دي بس المنتجين قالك إحنا حنتعامل ولا كأن الأجزاء اللي مكانها مزبلة التاريخ دي إتعملت و حنعمل جزء جديد لاحم في ديل الجزء الأولاني خالص .. هوبا بقي عندك فيلم جديد جاب 255 مليون دولار في شباك التذاكر العالمي .. إذن الحكاية متجربة و حتنجح إن شاء الله .. مش كده و بس .. إحنا حنجيب بطل السلسلة (أرنولد شوارزنيجر Arnold Schwarzenegger) اللي لسبب ما خليناه يعمل الجزء الثالث و الخامس و حنرجعه تاني في دور T-800 .. طب خد التقيلة بقي .. حنرجع (ليندا هاميلتون Linda Hamilton) بطلة الجزئين الأول و الثاني و اللي قررت إنها تقعد في البيت تبطل تمثيل و حنرجعها مخصوص عشان تعيد إحياء دورها (ساره كونور Sara Connor) .. لو إنت فاكر إني خلصت فلسه .. إحنا حنجيب المخرج (جيمس كاميرون James Cameron) اللي أخرج الجزئين الأول و الثاني و بالمرة يعني لو إنت متعرفش مين هو (جيمس كاميرون) فالرجل ده الCV بتاعه فيه أفلام زي Titanic و Avatar و نخليه هو المنتج المنفذ للفيلم الجديد و المخرج حيكون (تيم ميلر Tim Miller) اللي أخرج فيلم Deadpool و تحت إيده ميزانية 185مليون دولار .. المقادير دي كلها كفيلة إنها تعمل أحلي كيكة .. إنت هيأت كل الظروف إن يتعمل فيلم يكسر الدنيا .. ها بقي الفيلم جاب كام مليون؟
رغم إن أسوأ التوقعات و أكتر الأراء تشاؤماً يعني قالت إن خلال الWeekend الأولاني من عرض الفيلم فهو حيجيب ما بين 30-40 مليون دولار في شباك التذاكر الأميريكي بس الفيلم مجابش غير 29 مليون دولار بس .. عشان أحطك في الصورة فأكتر 3 أفلام مصروف عليهم السنة دي مجابوش فلوس كانوا John Wick: Chapter 3- Parabellum و اللي جاب في أول Weekend من عرضه 56 مليون دولار .. وراه فيلم Godzilla: King of Monsters و اللي جاب 47 مليون دولار .. فيلم X-Men: Dark Phoenix و اللي جاب 32 مليون دولار .. يا مؤمن ده حتي Terminator: Dark Fate جاب فلوس أقل من Men in Black: International .. إنت متخيل يا مان؟ .. أظن السؤال دلوقتي هو ليه؟ .. ليه Terminator: Dark Fate فشل رغم إنه فيلم إتحطتله كل عوامل النجاح؟ .. إزاي فيلم إتحطله ميزانية 185 مليون دولار يوصل به الحال إنه لو مجابش في شباك التذاكر العالمي علي الأقل 480 مليون دولار فإنت بتتكلم عن خساير لشركات الإنتاج بتاعته اللي هم Paramount و Skydance و Disney بتتقدر بما بين 110-130 مليون دولار .. إيه اللي حصل غلط؟
مشكلة رقم واحد كانت السيناريو .. معلش يعني هو يعني إيه فيلم يكتبله السيناريو بتاعه 6 بني أدمين؟ .. ده السبب إنك و إنت بتتفرج علي Terminator: Dark Fate إنت مش شايف حاجة جديدة .. كل ده إنت شفته قبل كده .. مشكلة رقم إتنين هي إن معروف إن المخرج هو صاحب القرار و المنتج دوره إنه يوفر للمخرج اللي هو محتاجه .. ده لو إنت عايز تعمل فيلم كويس .. حاول تفكر فيها علي إن المخرج هو المدير الفني للفرقة و المنتج هو رئيس النادي .. لو الفرقه كسبت فالمدير الفني/المخرج حيتقاله ياااه ده إنت (بيب جوارديولا Pep Guardiola) زمانك و لو الفرقة خسرت حيتقاله إنت تقرق إيه إنت عن كابتن (رضا عبدالعال)؟ .. المشكلة إن (جيمس كاميرون) كان بيتعامل علي إنه هو مخرج الفيلم مش المنتج و (تيم ميلر) مش عارف يعمل الفيلم اللي هو شايفه .. تالت نقطة بقي هي اللي خلافيه شويه .. لسبب ما الجمهور مش بيحب يتفرج علي فيلم أبطاله ستات .. الفكرة بتاعة Terminator: Dark Fate إن مصير الكون قايم علي إن شخصية (ساره كونور) اللي بتقدمها (ليندا هاميلتون) و معاها الشخصيتين الجداد في السلسلة اللي هم (جرايس Grace) اللي بتقدمها الممثلة (ماكنزي دايفيز Mackemzie Davis) و شخصية (داني راموس Danny Ramos) اللي بتقدمها الممثلة (ناتاليا رييس Natalia Reyes) .. تلات ستات مصير العالم واقف عليهم .. و لسبب ما معشر الجمهور بيشوف الكلام ده يقولك باس باس وسع كده إيه فكر الفيمينيست اللي أنتوا فيه ده الستات أساساً مكانهم المطبخ .. نفس الحكاية إتكررت مع إعادة إحياء فيلم Charlie’s Angel اللي برده إتمسح بكرامته الأرض في شباك التذاكر .. في رأي كمان بيقول إن السلاسل القديمة زي Terminator و حتي Die Hard اللي بدأت في الثمانينات خلاص أبطالها كبروا و جيل الألفينات مبقاش بيعتبرهم ناس تستحق أروح أتفرج عليهم في السينما .. خد مثلاً فيلم Rambo: Last Blood و فيلم Alien: Covenant اللي فشلوا خالص يعني في شباك التذاكر .. دي أجزاء من سلاسل قديمة إحنا جيلنا دلوقتي خلاص مبقاش متعلق بيها أوي .. يا رجل ده حتي (أرنولد شوارزنيجر) معملش فيلم ناجح بقاله سنين.
في رأيي الشخصي إن المشكلة هي إن المنتجين بتوع Terminator: Dark Fate حسبوها غلط .. عشان تعيد إحياء السلسلة إنت مش محتاج تصرف ملايين .. مش محتاج تجيب كاست فشيخ ولا إنك حتي ترجع (جيمس كاميرون) .. إنت كنت محتاج تتفرج علي فيلم زي Logan و إنت حتفهم إيه اللي إنت محتاج تعمله .. قبل فيلم Logan لو كنت قلت لأي حد إن فيه فيلم X-Men جديد نازل فيه شخصية (وولفرين Wolverine) كنت حتقول لنفسك يييييييييه هي الناس دي مبتزهقش .. بس الفيلم كان عنيف .. السيناريو بتاعه جاحد .. متمثل صح جداً .. مش معمول بميزانية كبيرة .. فلما جاب 600 مليون دولار في شباك التذاكر العالمي و بقي تاني أنجح فيلم من سلسلة X-Men كلها فإنت كان الأولي تعمل حاجة زيه .. أنا عارف إني هزقت فيلم Joker في مقالة قبل كده بس الحق يتقال إن الفيلم تجارياً نجح جداً .. ده فيلم للكبار فقط قدر يجيب في شباك التذاكر العالمي أكتر من 900 مليون دولار .. بس نقول إيه البعدا مبيفهموش.
لازم سلسلة Terminator تتساب تموت بقي في سلام جنب إخواتها من سلاسل X-Men و Predator و Alien .. كفاية عك و هبد بقي أرجوكوا .. الفكرة لا هي في الصرف الكتير ولا في إنك تجيب ممثلين نجوم شباك .. الفكرة إنك تعمل فيلم صادق .. عنيف .. صادم .. مش بتكاليف عالية بس يبقي فيه روح .. لإن الروح هي اللي بتنجح الأفلام مش الصرف .. زي ما عمايل الأكل أهم حاجة فيها النفس.
المصدر:
مقالة بعنوان Dark Fate: How the Terminator franchise was finally terminated نشرت في جريدة The Guardian و ده لينك المقالة الأصلية:
//www.theguardian.com/film/2019/nov/05/darkest-fate-how-the-terminator-franchise-was-finally-terminated
