لينك التسجيل الصوتي للمقالة علي Sound Cloud:
https://soundcloud.com/user-112011687-312727988/a-10-thunderbolt
لو أنا جيت سألتك مين أكتر طيارة مقاتلة لو شفتها تقول عليها فخر الصناعات العسكرية الأميريكية؟ .. مين الطيارة الأمريكاني اللي لو شفتها تلاقي نفسك بتسأل هو مين اللي كان عامل دماغ عناب اللي صمم التحفة الهندسية دي؟ .. فيه منكوا حيروح للمقاتلة F-16 Fighting Falcon واللي إتكلمنا عنها قبل كده .. فيه منكوا جايز يروح لأحدث طيارة تطلع من شركة لوكهيد مارتن Lockheed Martin اللي هي F-35 Lightening II واللي غطيناها في كذا مقالة قبل كده .. بس أنا النهاردة عايز أتكلم عن طيارة تانية خالص ودي يمكن أول مرة أجيب سيرتها .. أنا بتكلم عن A-10 Thunderbolt واللي الطيارين الأمريكان بيسموها الخنزيرة Warthog .. سبب إني عايز أتكلم عن الطيارة دي بالذات هي إنها فعلياً طيارة غريبة جداً .. السبب اللي هي اتعملت عشانه غريب .. تصميمها غريب .. حتي لما كل مرة يحبوا يطلعوها معاش يكتشفوا إن ملهاش بديل فيسيبوها .. وزارة الدفاع الأميريكية وافقت علي مشروع تطوير لأسطول الطيارات دي اللي لسه في الخدمة وهم حوالي 280 طيارة بحيث حتفضل مكملة ضمن ترسانة سلاح الجو الأميريكي لسنين وسنين قدام .. الطيارة دي خدمت في كل الحروب اللي دخلتها أميركا من بعد حرب فيتنام .. الأمريكان استخدموها في حرب البوسنة والهارسك وكل حروب الخليج وأخيراً في حرب أفغانستان .. قصة الطيارة دي فعلاً غريبة وتستحق تتحكي فخليك معايا.
سنة 1967 الناس بتوع وزارة الدفاع في أميركا سألوا نفسهم سؤال غريب أوي .. هو أنا لو عندي وحدة قتالية من المشاة بتوعي حظهم الأسود خلاهم يتعرضوا لكمين وبقوا متحاصرين من كل حتة ومحتاجين مساعدة عشان يخرجوا من المصيبة اللي هم فيها .. واحد من العساكر طلب بالراديو إن المدفعية تضرب أماكن العدو عشان يقدروا يهربوا بس إذ تكتشف إن مدي نيران المدفعية بتاعتك مش طايل أماكن العدو .. بسيطة إحنا نقول لطيار طيارة F-4 Phantom والنبي يا أخ وإنت راجع بس ياريت تضربلنا الكام عسكري اللي محاصرين رجالتنا فيرد الطيار معلش هو أنا حميز مين مع مين إزاي وأنا طاير علي الإرتفاع العالي أوي اللي أنا عليه ده؟ أنا مش شايف غير شوية شجر .. من غير توجيه ليزر أو يبقي معايا إحداثيات بمنتهي الدقة فأنا إحتمال كبير أقتل عساكرنا بالغلط .. طب خلاص إحنا نطلب من طيار طيارة هليكوبتر يروح يضربلنا العساكر اللي محاصرين رجالتنا فيرد طيار الهليكوبتر اه عشان واحد فيهم بصاروخ مضاد للطيارات من اللي بيتشالوا علي الكتف يوديني في ستين داهية .. بدأت تفهم المشكلة فين؟
إحنا عايزين طيارة نبعتها تلحق العساكر بتوعنا لما يتحاصروا بحيث الطيارة دي متطيرش علي إرتفاعات عالية أوي ومتطيرش بسرعة عالية برده .. طيارة تسليحها قوي أوي وفي نفس الوقت متقعش بسهولة .. ده كان جيل جديد من الطيارات متعملش قبل كده والأمريكان وقتها سموه Close Air Support أو CAS ومشروع تصنيع الطيارة دي إتسمي A-X Program.
فيه شركتين قدموا تصميمين لطيارتين بحيث يحققوا Requirement أو اللي سلاح الجو الأمريكاني طلبه والشركتين دول كانوا نورثروب Northrop وقدمت تصميم طيارة سمتها A-9 والشركة التانية كانت فاير تشايلد Fairchild واللي قدمت تصميم طيارة سموها A-10 .. اتعملت لجنة تقييم وإختاروا A-10 واللي أول طيارة منها اتسلمت لسلاح الجو كانت سنة 1974 .. هنا دلوقتي بقي نيجي نسأل: هو بالصلاة علي النبي إيه اللي خلي A-10 تكسب؟ .. السر كله في إن المهندس اللي صممها (بيير سبراي Pierre Sprey) قدر من بدري أوي يفهم هي قيادة سلاح الجو الأمريكاني عايزة إيه؟ .. هم عايزين طيارة زي الطيارة شتوكا Ju-87 Stuka الألمانية اللي الألمان استخدموها في الحرب العالمية الثانية وإنت شخصياً شفتها قبل كده .. أيوه شفتها في فيلم Dunkirk اللي كانت عماله تقصف العساكر الإنجليز وهم قاعدين علي الشط مستنيين فرج ربنا.
اللي إنت شفته في فيلم Dunkirk هو طيارة بتطير بسرعات عالية أوي بالنسبة لزمانها وصوتها عالي أوفر بتشيل كام قنبلة ومدفعين رشاش بتنزل علي إرتفاع منخفض عشان تصطاد أهداف أرضية سواء بقي عساكر مستنيين الفرج أو سفن أو مراكب أو حتي دبابات ومدافع .. ده اللي إنت شفته في الفيلم اللي بيحكي جزء من الحرب العالمية الثانية لما كانت ألمانيا بتدوس علي وش أوروبا كلها .. فيه وش تاني بقي من القصة لما الألمان خسروا معركة ستالينجراد و بدأوا ينسحبوا لبلدهم .. في المرحلة دي من الحرب كانت دبابات T-34 الروسي هي اللي بتدوس علي وش الألمان وكان لازم الألمان يلاقوا حل واللي فكروا فيه هو ليه لا نجيب الطيارة شتوكا بتاعتنا ونشيل المدفعين الرشاش اللي عليها نحط مكانهم مدفعين رشاش مضادين للطيارات بيضربوا طلقات عيار 37 مليمتر متصنعه من كربيد التنجستين بتقدر تخترق دروع برج الدبابة والمحرك .. يحكي أن كان فيه طيار ألماني أسطوري إسمه (هانز أولريك روديل Hans-Ulrich Rudel) قدر يدمر 519 دبابة T-34 روسية وهو بيطير بالنسخة المعدلة من الطيارة شتوكا بس في نفس الوقت فيه برده وش تالت للحكاية .. إذا كان الطيار ده قدر يدمر 519 دبابة فهو برده أُجبر إنه يهبط بطيارته 32 مرة عشان إتضربت ومبقاش ينفع يطير بيها.
المشكلة كانت إن طيارات شتوكا عجلات الإقلاع والهبوط بتاعتها بتفضل ثابتة في مكانها مش بتتحرك بميكانيزم بحيث تخش جوه جسم الطيارة زي ما بيحصل في الطيارات الحديثة والعجل لما يبقي مدلدل كده من جسم الطيارة بيخسف بقدراتها علي المناورة الأرض لإن Aerodynamics بتاعتها بتبقي زي الزفت .. كمان طيارات شتوكا مكانتش سريعة أوي وأقصي سرعة ليها كانت 400 كيلومتر في الساعة فكان سهل علي المدافع المضادة للطيارات إنها تصطادها .. الألمان لما استخدموا شتوكا ضد الفرنسيين والبولنديين اللي مكنش عندهم قوات دفاع جوي فعلياً داسوا علي وشهم .. بس لما واجهوا بيها الأمريكان الدنيا إختلفت شوية .. حتي في معركة بريطانيا وده الإسم بتاع معارك الإشتباكات الجوية بين الطيارين الألمان والإنجليز فوق سماء بريطانيا فالطيارين الإنجليز كانوا بيخافوا جداً من شتوكا لإن قدراتها يمكن كانت أقوي من قدرات الطيارة سبيتفاير Spitfire اللي تعتبر أحسن طيارة مقاتلة تحت إيد الإنجليز في الحرب واللي إنت برده شفتها في فيلم Dunkirk.
الروس في الحرب العالمية الثانية لما شافوا شتوكا قالوا لنفسهم إحنا لازم نعمل واحدة زيها .. هو إحنا يعني ناقصين إيد ولا رجل .. النسخة الروسي من شتوكا كان اسمها أليوشين إتنين Ilyushin Il-2 واللي ليها اسم دلع هو شتورموفيك Sturmovik يعني العاصفة .. المهم إن الطيارة دي دخلت الخدمة سنة 1941 لما الحرب العالمية الثانية كانت مولعة وكانت مهمة جداً للروس لدرجة إن (جوزيف ستالين Joseph Stalin) زعيم الإتحاد السوفيتي وقتها قال عليها إنها مهمة للقوات المسلحة زي المياه والعيش كده .. الروس لما عملوا الطيارة دي مخلوهاش تقدر تشيل تسليح تقيل .. يدوبك مدفعين رشاش وقنبلتين .. بس هم خلوها مدرعة طايرة في الجو .. هم جابوا ألواح من الصلب وعملوا الشاسيه بتاعها شبه البانيو كده بحيث حطوا فيها المحرك وكابينة الطيار وخزان الوقود والريدياتير بتاع المياه والزيت .. لما تفكر فيها تلاقي إن الروس برده كان عندهم وجهة نظر .. معلش يعني أنا لما أروح أهاجم مطار ألماني مثلاً وألاقي إن بيحميه مدافع مضادة للطيارات بتضرب عليا 8000 طلقة في الثانية وعشان وقتها الطيارين مكنش معاهم قنابل موجهة بالليزر فكان لازم ينزل بطيارته علي إرتفاع منخفض وبقدرة قادر يتفادي الكم ده من الطلقات عشان ينشن علي الهدف بتاعه .. فإنت مش بس محتاج الطيارة بتاعتك تبقي محمية كويس إنما كمان محتاجين تبقوا طيارات كتير أوي .. عشان كده الطيارة دي إتصنع منها 36,000 نسخة وبكده تبقي أكتر طيارة حربية إتصنعت في التاريخ .. مش كده وبس .. إنت محتاج كمان تطير علي إرتفاعات منخفضة أوي واللي الطيارين الروس سموها Shaving Flight أو طيران الحلاقة لإنك بتطير زي ما تكون بتحلق دقنك بتطير علي إرتفاع منخفض أوي عشان تصطاد الهدف بتاعك من غير ما الرادارات بتاعته تلقطك.
نرجع تاني للطيارة A-10 .. السر كله في هو إنت كمهندس وإنت بتصمم الطيارة بتبقي عايز إيه؟ هل عايزها تطير بسرعة؟ عايزها تشيل تسليح كتير؟ .. في حالة A-10 هي إتصممت بحيث تجمع مميزات شتوكا وأليوشين .. متقعش بسهولة واللي المهندسين بيسموها Survivability .. حتي لو الطيارة إتضربت .. حتي لو حتة من الجناحين وقعت .. إياكش حتي تولع وهي طايرة .. هي إتصممت عشان الطيار يقدر يرجع بيها للمطار بتاعه من غير ما الطيارة تقع وعشان ده يحصل حاول تتخيل إن الطيارة دي زيها زي العربية الفولفو Volvo السويدي كده اللي هو أهم حاجة فيها هي الأمان وتاني حاجة فيها هي الأمان و ثالث حاجة فيها هي برده الأمان:
- لو حتتكلم عن Aerodynamics فدي طيارة بتقدر تنفذ مناورات جوية معقدة جداً وهي شايلة أقصي حمولة تسليح ليها وبتطير بسرعات بتوصل 555 كيلومتر في الساعة علي إرتفاع ممكن ينزل ل150 متر من سطح الأرض ودي أرقام مفيش طيارة بتوصلها حتي شتوكا وأليوشين اللي A-10 إتبنت علي حسهم.
- إذا كانت أي طيارة مقاتلة في الدنيا بيتركبلها المحركين بتوعها تحت شاسيه بتاعها بين الجناحين فإنت تلاقي إن A-10 شكلها غريب حبتين بإن إتركبلها محركين TF-43 Non-Afterburner Turbofan ورا الجناحين وده سببه حاجتين .. أول حاجة إنك تقلل Infrared Signature أو البصمة الحرارية للطيارة بحيث تصعب شوية علي أنظمة الرادارات المعادية إنها تلقطها .. ثاني حاجة إن حتي لو الطيارة اتضربت بصاروخ مضاد للطيارات محمول علي الكتف زي سام سبعة أو SA-7 Grail فعشان المحركين ورا بيبقي صعب شوية علي العسكري إنه ينشن فيهم وبالتالي حتي لو الطيارة اتضربت فالمحركين بتوعها إلي حد ما حيفضلوا سلام.
- الطيار فعلياً مش بيبقي قاعد في كابينة قيادة قد ما هو بيبقي قاعد في بانيو زي البانيو بتاع حمام بيتكوا بحيث البانيو ده بيبقي معمول من مادة تيتانيوم ودي مادة قوية لدرجة إني لو جبت مدفع رشاش مضاد للطيارات زي ZSU-23-4 السوفيتي اللي بيستخدم طلقات عيار 23 مليمتر وضربته علي كابينة الطيار فالطلقات مش حتقدر تخترقها .. مش كده وبس .. المحركين بتوع الطيارة هم كمان محطوطين جوه علبة من تيتانيوم.
- الطياره متصممة بحيث تقدر تعمل بيها اللي إنت عايزه طالما إنت مش بتطير بسرعة أعلي من سرعة الصوت .. قدرتها علي المناورة أوووووفر وبتقدر تطير علي إرتفاعات واطية جداً من الأرض .. كمان هي مش بتحتاج مدرج إقلاع وهبوط طويل زي أي طيارة مقاتلة عادية.
- اهم ميزة فيها هي تسليحها .. الجناحين بتوع الطيارة عليهم 11 نقطة تثبيت أو Headpoint تقدر ترص عليهم اللي إنت عايزه .. أجهزة تشويش علي الرادار ماشي .. خزانات بنزين إضافيه ماشي .. قنابل وصواريخ ماشي .. أي طيارة A-10 تقدر ترص عليها مثلاً أربع قنابل وزن الواحدة فيهم 900 كيلوجرام ومعاهم 6 صواريخ AGM-65 Maverick ودي صواريخ جو- أرض وده معناه إنك مثلاً لو حابب تضرب أنظمة الرادارات والدفاع الجوي لأي دولة تانية فطيارات A-10 تعتبر مثالية لغارة زي دي.
- يمكن السلاح اللي فعلاً بيخلي A-10 في حتة تانية خالص بعيد عن أي طيارة مقاتلة إنت سمعت عنها قبل كده هو مدفع رشاش جامد زحليقة متركب في مقدمة الطيارة إسمه GAU-8/A .. ده مدفع رشاش بيتصنف من فئة مدافع جاتلينج Gatling وده مدفع رشاش زي أي مدفع رشاش إنت شفته بس بدل ما هو فيه ماسورة إطلاق رصاص واحدة فمتركب فيه 7 مواسير بيفضلوا يلفوا طول ما إنت ضاغط علي الزناد .. المدفع ده بيقدر يضرب 4,200 طلقة خارقة للدروع في الدقيقة .. ده معناه إن لو عندك طابور دبابات أو مدرعات ماشي فطيارة A-10 واحدة لو طارت علي إرتفاع منخفض وفتحت نار مدفعها الرشاش عليهم ففعلياً إنت حتخرتق الدبابات دي وحتخليها شبه المصفاة من كتر الخرام اللي فيها .. مش مصدقني أنا عارف.
أول مرة الطيارات دي تستخدم في ميدان معارك كانت في حرب الخليج الثانية سنة 1991 اللي إنت عارفها بإسم حرب تحرير الكويت .. دي كانت أول مرة الأمريكان يستخدموا الطيارات دي وكان الهدف من استخدامها هي تدمير سلاح المدرعات العراقي .. يا تري النتيجة كانت إيه؟ .. خلال الحرب أُستخدمت 132 طيارة A-10 نفذوا 7,983 مهمة قتالية دمروا فيها 987 دبابة عراقية و 926 مدفع ميداني و 1,355 مركبة مدرعة و 10 طيارات كانوا راكنين علي أرضية مطار وكمان دمروا طيارتين هليكوبتر عراقيين كانوا طايرين ووقعوا بسبب المدفع الرشاش الجامد تنين اللي في مقدمة A-10.
بعد حرب الخليج الثانية ما خلصت قيادة سلاح الجو الأميريكي كانت عايزة تخلص من A-10 علي أساس حاجتين:
- أول حاجة ان الطيارة دي مينفعش تروح تضرب بيها دول عندها منظومة دفاع جوي محترمة في حين أن طيارة تانية زي F-16 Fighting Falcon بتقدر تعمل نفس الدور بتاع A-10 وأقدر أبعتها تضرب أي هدف أيا كانت منظومة الدفاع الجوي بتاعته.
- تاني نقطة وهي ان الفلوس اللي بتتصرف علي صيانة وتسليح وتدريب أسراب A-10 اللي في الخدمة ممكن لو طلعت الطيارة دي بره الخدمة استخدمها في برامج تسليح أفيد وأهم زي وقتها كانت F-15 Eagle ودلوقتي F-35 Lightening II مثلاً.
بس نجاح الطيارة الرائع في حرب الخليج الثانية خلي ليها أنصار ومساندين جوه الكونجرس واللي رفضوا خالص فكرة إنها تطلع معاش دلوقتي .. وسبحان الله قيادة سلاح الجو اللي كانت حتموت وتطلع A-10 معاش سنة 1999 استخدموها تاني في حرب البوسنة والهارسك .. بعد هجمات 11 سبتمبر استخدموها في العراق وأفغانستان .. بداية من 2014 وسرب طيارات A-10 اللي قاعد في قاعدة أنجرليك التركية عمال يشن غارات ضد أهداف تابعة لداعش .. سنة 2018 الأمريكان أضطروا يرجعوا سرب طيارات A-10 تاني لأفغانستان بعد كانوا سحبوها .. من فترة الكونجرس وافق علي تمويل مشروع لتطوير الجناحات بتاعة 280 طيارة A-10 اللي في الخدمة بحيث حتفضل طايرة معانا حبه حلوين.
ويبقي السؤال .. هل الطيارة دي مفيدة في الزمن اللي إحنا فيه ده؟ .. متنساش إن الطيارة دي إتصممت سنة 1967 يعني من أيام نكسة يونيو .. الحقيقة إن الإجابة هي علي حسب إنت ناوي تضرب مين؟ .. لو إنت ناوي تضرب أهداف معندهاش أنظمة دفاع جوي زي مثلاً داعش أو القاعدة أو طالبان فالطيارة دي مثالية ليك .. لو كنت ناوي تضرب بيها مثلاً الصين أو روسيا فإفتكر إني قلتلك بلاش .. لوحدها A-10 متقدرش تعمل ده .. فيه حل إنك تطير معاها سرب طيارات بدون طيار Drones وإتكلمنا عن الموضوع ده قبل كده عشان Drones دي كل واحدة فيهم تكون شايلة قنبلة ومتبرمجة إنها تجري علي منصة صواريخ مضادة للطيارت تفجرها .. بمجرد ما منظومة الدفاع الجوي وقعت فالطيارة A-10 تقدر تنفذ مهمتها زي الفل.
المصادر:
- مقالة بعنوان Could the A-10 Warthog be America’s best made military weapon ever? نشرت في مجلة The National Interest وده لينك المقالة الأصلية:
ttps://nationalinterest.org/blog/buzz/could-10-warthog-be-americas-best-made-military-weapon-ever-108241 - مقالة بعنوان A-10 Thunderbolt II نشرت علي موقع Military.com وده لينك المقالة الأصلية:
/www.military.com/equipment/a-10-thunderbolt-ii - مقالة بعنوان The A-10 Warthog: the plane Russia would have begged for in World War II نشرت في مجلة The National Interest وده لينك المقالة الأصلية:
https://nationalinterest.org/blog/buzz/10-warthog-plane-russia-would-have-begged-world-war-ii-57197
