لينك التسجيل الصوتي للمقالة علي Sound Cloud:
https://soundcloud.com/user-112011687-312727988/1a-3
أحيانا كتير في تاريخ البني أدمين فيه كوارث بتحصل وناس بتموت لمجرد إن فيه بني أدم سأل نفسه السؤال اللي (رمضان مبروك ابوالعالمين حموده) سأله لنفسه .. هو يجري حاجة لو عملت المصيبة دي؟ والنبي ما يجرا حاجة .. الكارثة اللي حتكلم عنها النهاردة هي أزمة الصواريخ الكوبية .. والبني أدم اللي سأل نفسه السؤال الوجودي ده كان رئيس الحزب الشيوعي السوفيتي أو اللي تقدر تقول عليه رئيس الإتحاد السوفيتي (نيكيتا خروشوف Nikita Khrushchev) .. الكلام ده كان في إبريل 1962 .. اللي حصل إن (خروشوف) كان قاعد بيتمشي علي شط فيلته اللي علي البحر الأسود .. قدامه علي الناحية الثانية من الشط كان ساحل تركيا .. قبلها بكام يوم المخابرات السوفيتية KGB سلمت تقرير ل(خروشوف) قالوله إن الأمريكان اللي كان رئيسهم وقتها اسمه (جون اف كينيدي John F. Kennedy) نشروا بطاريات صواريخ جوبيتر اللي بتقدر تشيل رؤوس نووية في تركيا .. بناء علي تقرير KGB اللي خلي (خروشوف) بطنه تقلب إن الصواريخ دي تقدر تضرب أي مدينة روسية خلال دقايق .. بما فيها العاصمة موسكو .. في لحظة صفا وجودي (خروشوف) سأل نفسه هو يجري حاجة لو انا عملت نفس الحركة بس في كوبا؟
مهم تفهم أوي المنطق ورا اللي عمله (خروشوف) لإن خلينا نكون صرحاء مع بعض إن الرجل كان له وجهة نظر برده .. دلوقتي الأمريكان حيتكشفوا الصواريخ .. هم مش عبط ولا هبل .. الفكرة إنهم لما يكتشفوها وبعد ما يزعقولهم شوية حيضطروا يقعدوا معاه عشان يتفاوضوا وفي المفاوضات هو ممكن يطلب كذا حاجة .. ممكن يطلب إن في مقابل إنه يشيل صواريخه من كوبا الأمريكان ينسحبوا من غرب برلين لإن زي ما حكينا في مقالة الجسر الجوي لإنقاذ برلين فموقع برلين الجغرافي بيخليها جوه النص الشرقي من ألمانيا يعني نظرياً هي تحت ايده بس المدينة مقسومة نصين والنص الغربي تحت إيد الأمريكان .. ممكن يطلب إن في مقابل إنه يشيل صواريخه من كوبا فالأمريكان هم كمان يشيلوا صواريخهم من تركيا .. أيا كان اللي حيطلبه فالأكيد يعني إنه حيبقي طلب لازم يتنفذ هو إن أميركا توعده إنها عمرها ما حتفكر تغزو كوبا دي تاني خالص أبداً ..اللعبة دي كلها معتمدة علي إن الأمريكان يعرفوا إن السوفييت نشروا صواريخهم في كوبا بعد ما الصواريخ تكون وصلت واتركبت فعلاً .. لو الصواريخ اتلقطت قبل كده فالماتش خلص والأمريكان كسبوا.
المرحلة الأولي .. السوفييت محتاجين يقنعوا الكوبيين الأول:
السوفييت بعتوا قائد سلاح الصواريخ بتاعهم علي إنه مهندس زراعي لكوبا عشان يقعد مع الاتنين اللي فعلياً بيحكموا البلد .. (فيديل كاسترو Fidel Castro) و(تشيه جيفارا Chi Guevara) .. العرض السوفيتي كان إنهم حينشروا صواريخ نووية متوسطة المدي في كوبا .. (كاسترو) وجهة نظره كانت مختلفة شوية .. أولاً كوبا مش محتاجة أسلحة نووية .. ثانياً لو الأمريكان عرفوا إن الصواريخ اتركبت فكل اللي حيفكروا فيه إن السوفييت بمجرد ما يركبوها حيضربوها عليهم لإن مش حيجي في بالهم إن السوفييت ركبوا الصواريخ دي لمجرد إنهم يجبروا الأمريكان يتفاوضوا معاهم علي إنهم يشيلوا صواريخهم من تركيا .. ثالثاً وده الأهم يعني هو مش عايز يبان إنه عروسة ماريونيت في إيد السوفييت .. هو عايز يبان قدام العالم إنه حليف ليهم .. (كاسترو) خد (جيفارا) علي جنب عشان يتناقشوا يقبلوا ولا يرفضوا العرض السوفيتي .. يُقال إن (جيفارا) كان خايف بس (كاسترو) قال لنفسه يعني هو إيه اللي حيحصل أسوأ من اللي إحنا فيه؟ .. الأمريكان حيغزونا تاني؟ .. ما هم جربوا أولاني وفشلوا .. (كاسترو) طلع لقائد سلاح الصواريخ السوفيتية وبلغه إنه موافق علي إن (خروشوف) ينشر صواريخه النووية في كوبا.
الإتفاق بين السوفييت والكوبيين كان كالأتي .. إحنا قدام الناس حنقول إن عشان الأمريكان حاولوا يغزوكوا قبل كده في عملية خليج الخنازير وعشان انتوا حلفاء لينا فاحنا مش حنسيبكوا كده لوحدكوا انما حنديكوا شويه سلاح تدافعوا بيه عن نفسكوا وحنسلفكوا كمان شويه عساكر وضباط من عندنا عشان ندربكوا عليه .. قدام الناس محدش حيعرف ان من ضمن السلاح اللي احنا باعتينه حيبقي فيه صواريخ متوسطه المدي .. دورنا احنا إننا نخبي الصواريخ دي ضمن شحنة السلاح اللي حنبعتها ليكوا.
المرحلة الثانية .. إزاي تنقل فرح العمدة ده من روسيا لكوبا من غير ما تتكشف؟
العملية بدأت يوم 25 أغسطس من ميناء سيفاستوبول Sevastapol الروسي باباحار أول سفينة تجارية لكوبا بس جواها شايله حمولة الصواريخ متوسطة المدي .. دي كانت سفينة من وسط 85 سفينة .. العساكر السوفييت اللي حيروحوا كوبا اتبعتوا يا علي إنهم أطقم السفن التجارية أو علي إنهم سياح مسافرين يقضوا أجازة هناك .. في سبتمبر 1962 فرح العمدة وصل كوبا .. مش بس الصواريخ .. عندك 42,000 عسكري .. طيارات هليكوبتر حتلاقي .. قاذفات جوية موجود .. لانشات بحرية وماله ..مدافع مضادة للطيارات مش حنقول لا .. طيارات مقاتلة قال يعني جت عليهم .. وطبعاً صواريخ متوسطة المدي قادرة علي إنها تشيل رؤوس نووية .. زي ما قلتلك (خروشوف) كان قايل للأمريكان إنه حيبعت لكوبا قوات وكان الاتفاق إن القوات دي لمجرد إن كوبا تعرف تدافع عن نفسها مش أكتر .. السؤال اللي تقريباً محدش في روسيا سأله لنفسه هو انتوا ازاي اقنعتوا نفسكوا انكوا تقدروا تنقلوا الناس والمعدات دي كلها لكوبا وإن الأمريكان مش حيكونوا حاطين مناخيرهم في العملية؟ .. ازاي اقنعتوا نفسكوا إن الأمريكان مش حيبقوا صاحيين ومش بيناموا الليل عشان يتطمنوا إن نوعية السلاح اللي انتوا باعتينه لكوبا ده ميكونش فيه صواريخ بعيدة المدي؟ .. خلاص ثقتكوا في نفسكوا جامدة أوي للدرجة دي؟
الساعة 11:50 ظهر يوم 16 أكتوبر الرئيس الأميريكي (جون كينيدي) قابل ناس من وكالة المخابرات المركزية CIA ومعاهم صور طيارات استطلاع U-2 من فوق كوبا .. واحد من ضباط المخابرات شرحله إن من ضمن الصور لقوا إن السوفييت بعتوا لكوبا صواريخ متوسطة المدي ليها القدرة إنها تطير1700 كيلومتر .. ده معناه إن الصواريخ دي تقدر تضرب العاصمة الأميريكية واشنطن في أقل من 13 دقيقة .. (كينيدي) كان شوية وحيطلع صوت من مناخيره .. الرجل كان عنده مشكلتين .. أول مشكلة وهي مشكلة داخلية وهي إن انتخابات التجديد النصفي للكونجرس قربت والمعارضة الجمهورية استغلت حكاية إن السوفييت بعتوا قوات لكوبا عشان يوصفوا (كينيدي) قدام الأمريكان علي إنه رئيس ضعيف خلي السوفييت علي بعد خطوتين من السواحل الأميريكية فلو الإعلام والمعارضة شموا خبر إن الروس ضحكوا عليه وبعتوا صواريخ متوسطة المدي فكده تقريباً (كينيدي) خسر الانتخابات الرئاسية الجايه كمان .. المشكلة الثانية دي غريبة شوية .. في مكالمة التليفون بينه وبين (خروشوف) اللي (خروشوف) حكاله فيها إيه بالضبط نوعية السلاح اللي روسيا حتبعتها لكوبا هو قاله إن لو حصل وعرفت أنكوا بعتوا صواريخ نووية لكوبا فعليا الطلاق لطربقها فوق دماغكوا ودماغ (كاسترو) .. (كينيدي) جاتله الشجاعة إنه يحلف علي الطلاق مش لسبب غير إنه عمره ما تخيل إن (خروشوف) حيكون بالغباء ده؟ .. هو عمره ما تخيل إن (خروشوف) حيسأل نفسه السؤال الوجودي بتاع هو يجري حاجة لو عملت المصيبة دي؟ والنبي ما يجرا حاجة.
لما (كينيدي) سأل ضباط المخابرات بتوعه إمتي الصواريخ دي حتبقي جاهزة كانت إجابتهم إن والله لحد دلوقتي الرؤوس النووية نفسها لسه السوفييت مبعتوهاش كوبا بس بمجرد ما الرؤوس النووية دي توصل فالمهندسين السوفييت قدامهم ساعات يدوبك يركبوا الرؤوس النووية دي والصواريخ تبقي جاهزة للإطلاق .. هنا المستشارين بتوع (كينيدي) اتقسموا نصين:
- وزير دفاعه (روبيرت ماكنمارا Robert McNamara) كانت وجهة نظره إن عشان نضرب الصواريخ دي بغارة جوية فإحنا لازم نعمل ده قبل ما الرؤوس النووية تتركب .. حلو .. بما إن لسه الرؤوس النووية متركبتش فإحنا قدامنا وقت إننا نتفاوض مع السوفييت.
- رؤساء قيادات الأركان بتاعة القوات المسلحة قالوا إن مش من مصلحتنا نستني لو حنضرب نضرب دلوقتي وياريت كمان يا ريس توافق علي عملية غزو بري عشان نخلص من (كاسترو) ده بشكل نهائي الله يكرمك.
في نفس اليوم الساعة 6:30 بليل (كينيدي) طلب اجتماع كبير شوية حضره 14 بني أدم .. 9 من مجلس الأمن القومي و5 من الخبراء اللي ممكن يكون رأيهم مفيد .. اجتماع بالشكل ده كان أول مرة يحصل وبعد كده الاجتماعات دي بقت أساسية وأي رئيس من بعد (كينيدي) بقي يطلبها وبقت تتسمي EXCOMM ودي اختصار Executive Committee of the National Security Council يعني اللجنة التنفيذية لمجس الأمن القومي .. المهم إن في الاجتماع ده الناس اللي حولين (كينيدي) كانوا مقسومين نصين:
- القيادة العسكرية قالت إن الغارات الجوية لوحدها مش حتجيب نتيجة .. لو دمرنا منصات الصواريخ السوفيتية فبسهولة أوي (خروشوف) حيبعت صواريخ تاني وتالت ورابع .. زود علي كده إن السوفييت بعتوا لكوبا طيارات قاذفة فممكن الطيارات دي تضرب ولاية فلوريدا القريبة أوي من كوبا كرد علي الغارات الجوية الأميريكية علي كوبا .. طب والحل؟ .. أكتر من 100 غارة جوية ضد القوات السوفيتية في كوبا وبعد كده غزو بري .. علي فكرة .. الرأي ده كان عاجب أوي (روبيرت كينيدي Robert Kennedy) أخو (جون كوينيدي) واللي كان ماسك منصب النائب العام.
- بقية الناس اللي حاضرين قالوا طب افرض يا فالح مش كل بطاريات الصواريخ السوفيتية اتدمرت في الغارات .. افرض فضل مهندس سوفيتي واحد شاف زمايله ماتوا فقرر ينتقم .. افرض لو المهندس الوحيد اللي فاضل عمل فيها (ويل سميث Will Smith) في I’m Legend وفرقعنا كلنا معاه؟ .. حاجة كمان .. طب هو معلش العساكر اللي حيموتوا دول مش سوفييت؟ .. هو مش السوفييت حيعتبروا قتلنا ليهم كإنه إعلان حرب؟ .. طب هو حيحصل حاجة يعني لو استنينا أو حتي لو سبنا الروس يبنوا بطاريات الصواريخ دي في كوبا؟ .. طب ما السوفييت عندهم صواريخ عابرة للقارات تقدر تضرب المدن بتاعتنا .. حتفرق أوي إذا كانوا ضربونا من كوبا ولا من روسيا؟
وسط الخناقة دي اتحطت 3 خطوات عشان الأزمة دي تعدي علي خير:
- الخطوة الأولي هي الحل الدبلوماسي إننا نتكلم مع السوفييت علي أمل إن النفوس تهدي والمياه ترجع لمجاريها ودي حتبقي مهمة وزارة الخارجية ومن دلوقتي يبدأوا يحطوا سيناريوهات هو إحنا ممكن نقدم إيه للسوفييت عشان يشيلوا صواريخهم من كوبا؟ ونتكلم مع مين بالضبط يكون حنين وطلباته مش مبالغ فيها؟
- الخطوة الثانية هي فرض حصار بحري حول كوبا عشان نوصل لحاجتين .. الحاجة الأولانية هي إننا نمنع روسيا إنها توصل أي أسلحة إضافية لكوبا .. الحاجة الثانية إننا في مقابل رفع الحصار نطلب من السوفييت إنهم يشيلوا الصواريخ بتاعتهم .. دي حتبقي وظيفة القوات البحرية ودورهم إنهم يبدأوا يحطوا خطة حنحاصر كوبا ازاي؟ وبكام سفينة؟ وإيه أنواعها؟
- الخطوة الثالثة هي إن القوات المسلحة تبدأ تشتغل علي خطط الغارات الجوية والغزو البري .. إيه الأهداف اللي حيتم ضربها؟ .. الطيارات حتطلع منين؟ .. الغزو البري حيبدأ منين؟ وامتي؟ وازاي؟ .. الميزة اللي حتسهل الخطوة دي كتير هي إن سلاح مشاة البحرية US Marine Corps أو المارينز كان المفروض إن بكره اللي هو 17 أكتوبر الساعة 2 العصر حيبدأوا مناورة عسكرية مع 40 قطعة بحرية كأنهم بيتمرنوا علي غزو افتراضي لكوبا .. القوات دي حتروح المناورة بتاعتها وهم ولا عندهم أي فكرة إن في أي وقت المناورة ممكن تبقي غزو بحق وحقيقي.
ده في الوقت اللي دماغ (كينيدي) كانت بتسرح في نقطة وهي ليه؟ .. ليه (خروشوف) يعمل كده؟ .. كل ده عشان انا نشرت صواريخ في تركيا؟ .. انا كان ممكن أسيبه يعمل اللي هو عايزه في كوبا لولا إني في مكالمتي في التليفون معاه حلفتله بالطلاق إن لو هو بعت أسلحة نووية لكوبا حطربق الدنيا فوق دماغه ودماغ كاسترو .. كان لازم يعني الجلالة تاخدني أوي .. أصل انا لو كبرت دماغي (خروشوف) حيعتبر ده ضعف مني وحيبدأ يبعت أسلحته النووية في كل حتة .. مصر تاخد .. سوريا تاخد .. ويبقي مهرجان النووي للجميع .. من يوم 16 أكتوبر لحد 18 أكتوبر والأمريكان كل طرف شغال في الخطوات بتاعته .. الخارجية بتحاول تتكلم مع السوفييت .. القوات البحرية رايحه تفرض حصارها علي كوبا .. قيادة الأركان بتحط خطط الغزو لحد ما في يوم 19 أكتوبر الأمريكان اتحطوا قدام واقع جديد أسود .. الساعة 9:45 مساء يوم 19 أكتوبر المخابرات الأميريكية سلمت (كينيدي) تقرير قالت فيه إن طيارة استطلاع U-2 صورت بطاريتين صواريخ سوفيتية خلاص بقوا جاهزين في كوبا .. مش بس كده .. CIA قالت إن السوفييت بقوا ناشرين كذا بطارية إطلاق صواريخ متوسطة المدي تقدر تضرب أي حتة جوه أميركا .. التقرير ده خلي قيادة القوات المسلحة الأميريكية في ايدها إنها تلوي دراع (كينيدي) .. الوقت بيجري والكلام مش حيجيب نتيجة مع السوفييت .. إنها الحرب .. إنها إرادة الرب .. حتي لما (كينيدي) قالهم إنه لو ضرب كوبا فالسوفييت حيضربوا برلين ولو ده حصل فمش حيبقي فيه مفر من الحرب النووية بين السوفييت والأمريكان بس فضلت قيادة القوات المسلحة مصره علي رأيها .. صواريخنا حتدمر الإتحاد السوفيتي قبل ما يلحقوا يدمرونا .. الحصار البحري ده للعيال التوتو .. إنما إحنا بنقلبها مسلسل تشيرنوبل.
المرحلة الثالثة .. السوفييت بيكتشفوا إنهم اتقفشوا.
يوم 22 أكتوبر الساعة 10 مساءاً المخابرات السوفيتية أو KGB بتسلم تقريرها ل(خروشوف) والحقيقة إنه كان تقرير غريب جداً .. أعضاء الكونجرس فجأة اتطلب منهم يركبوا طيارات عسكرية ويطيروا علي العاصمة واشنطن .. فيه مناورة عسكرية كبيرة بتحصل قدام سواحل كوبا .. وزارة الدفاع الأميريكية قررت تجلي كل المدنيين اللي في قاعدة جوانتانامو ودي قاعدة عسكرية أميريكية جوه كوبا .. مش بس كده .. التليفيزيون الأميريكي أعلن إن الرئيس (كينيدي) حيطلع يقول بيان عاجل للأمة الساعة 2 صباح يوم 23 أكتوبر يعني بعد 4 ساعات من وقت ما (خروشوف) كان بيقرأ التقرير .. فوق ده كله إن التقرير قاله إن السفارة الأميريكية بلغت وزارة الخارجية السوفيتية إن نص خطاب (كينيدي) حيكون وصل ليهم الساعة 1 الصبح يعني قبل ساعة كاملة من بث الخطاب مباشر للناس .. (خروشوف) قرأ الكلام ده ومبقاش في دماغه غير فكرة واحدة .. أحيه يا أبو سوسو أحيه إحنا إتقفشنا .. هو طلب يعمل اجتماع عاجل لحاجة اسمها بريزيديوم Presidium أو الهيئة الرئاسية للحزب الشيوعي وتقدر تسميمهم مجلس الأمن القومي .. في الاجتماع ده (خروشوف) بلغهم إن إحنا إتقفشنا .. الأمريكان اكتشفوا إن إحنا بنحط صواريخ نووية في كوبا وده معناه إن في أي لحظة الغزو الأميريكي لكوبا حيحصل .. في الاجتماع ده الناس بدأت تحط Options قدام (خروشوف):
- هو ممكن يعلن اتفاقية دفاع مشترك بين الإتحاد السوفيتي وكوبا .. ده معناه إن الضباط الكوبيين من حقهم إنهم يستخدموا الصواريخ النووية دي وهم اللي يضربوها علي أميركا في حالة إنهم تعرضوا لغزو أميريكي.
- هو ممكن كمان يدي الضباط السوفييت بتوعه في كوبا الحق إنهم يستخدموا الصواريخ النووية قصيرة المدي واللي مثلاً لو اتضربت علي الأسطول الأميريكي اللي جاي يغزو كوبا فهي ممكن تغرق الأسطول كله .. الحل ده اترفض من وزير الدفاع (روديون مولونوفسكي Rodion Malinovsky) واللي وجهة نظره هو معلش يعني العساكر بتوعنا في كوبا يعرفوا إيه أو خبرتهم إيه عشان نحط في ايدهم مسئولية زي دي؟ .. هو يجري حاجة لو استنينا نسمع كلام (كينيدي)؟ .. مش يمكن إحنا فاهمين غلط وإن لسه الأمريكان مقفشوناش؟ .. خلينا نستهدي بالله ونشوف الرجل حيقول إيه.
المصادر:
- فيديو بعنوان Cuban Missile Crises-The Failed Checkmate-Extra History Part 1 نشرت علي YouTube و ده لينك الفيديو:
https://www.youtube.com/watch?v=xqJBibhR07w - فيديو بعنوان Cuban Missile Crises-Eyeball for Eyeball-Extra History Part 2 نشرت علي YouTube و ده لينك الفيديو:
/www.youtube.com/watch?v=QQT4Dt82Kz0 - فيديو بعنوان Cuban Missile Crises-Black Saturday-Extra History Part 3 نشر علي YouTube و ده لينك الفيديو:
//www.youtube.com/watch?v=-Ox9wIZeZYg
