لينك التسجيل الصوتي للمقالة علي Sound Cloud:
https://soundcloud.com/user-112011687-312727988/35a?si=87dd4107c14946a8b4fa1e1de5dec70a&utm_source=clipboard&utm_medium=text&utm_campaign=social_sharing
تقريباً أغلبنا لو إتحطت قدامه صورة لطيارة ميج MiG و جنبها صورة لطيارة سوخوي مش حيعرف يفرق بينهم .. زي ما إنت كده مش حتعرف تفرق بين كيا سيراتو 2018 و أختها 2019 لمجرد إن شكل الفانوس مختلف .. ده عادي و مش مطلوب منك كمواطن إنك تبقي عارف الفرق بينهم لإن دي مش شغلتك ولا شغلتي الحقيقة .. بس لما يتعرف إن مصر حتدفع 2 مليار دولار عشان تشتري 24 طيارة سوخوي-35 من روسيا فعلي الأقل نبقي فاهمين بس هي الفلوس دي كلها بتتدفع عشان إيه؟ .. سميه فضول .. سميه إننا بنحط مناخيرنا في حاجة متخصناش و إن إحنا كمدنيين شايفين إن غلط يبقي القاعدة إن المفروض ميبقاش لينا أي رأي في الحاجات دي .. براحتك .. المهم إنك تطلع من المقالة دي فاهم هي مصر قررت تشتري إيه بالضبط؟ و هو يعني إيه سوخوي-35؟ و إيه حكاية الكلام علي إن أميركا زعلانة مننا عشان إشترينا الطيارات دي؟
يخلينا نبدأ بالسؤال الأولاني .. هو إحنا أشترينا إيه؟
في مارس 2019 طلع جرنان روسي إسمه كوميرسانت Kommersant نشروا تقرير قالوا فيه إن مصر عايزه تشتري 24 طيارة Su-35 و حتدفع فيهم 2 مليار دولار و إن العقد أساساً إتمضي فعلياً في 2018 .. الإتفاق كان إن خلال سنة 2020 مصر حتستلم أول دفعة من الطيارات و ده حصل فعلاً و إستلمنا 5 طيارات .. صحيح كان المفروض نستلم أكتر بس بسبب جائحة فيروس كورونا و إن المصنع اللي بتتصنع فيه الطيارات و اللي إسمه متسمي علي إسم رائد الفضاء السوفيتي (يوري جاجارين Yuri Gagarin) في حتة إسمها كوموسموليسك أون أمور Komosmolsk-on-Amur كان شغال بنص طاقته فإحنا حنستلم خمس طيارات بس دلوقتي.
في مايو 2019 وكالة أنباء TASS الروسية أعلنت إن فعلاً خط الإنتاج بتاع مصنع جاجارين بدأ شغله علي إنتاج أول خمس طيارات .. لحد دلوقتي محدش عارف بالضبط العقد فيه إن مصر حتشتري كام طيارة .. الكلام علي إنهم ما بين 24 و 31 بس اللي إحنا متؤكدين منه إن مصر حتدفع 2 مليار دولار و إن التسليم حيكون ما بين 2020-2023 .. يوم 22 يوليو 2020 إتسربت صور علي النت لأول خمس طيارات إستلمتهم مصر و كان باين أوي إنها طالعه من المصنع بتاعها مدهونة بنفس اللون المموه بتاع طيارات MiG-29 Fulcrum اللي إستلمتها مصر من روسيا .. الطيارات إتصورت و هي في قاعدة نوفوسبيريسك Novosibirsk الروسية و هي بتتزود بالوقود .. علي فكرة المسافة من المصنع لحد قاعدة نوفوسبيريسك مش صغيرة دي معدية 2900 كيلومتر.
إذن خلينا نفهم إجابة السؤال الثاني .. يعني إيه سوخوي-35؟
إسمها بالكامل Su-35SE Super Flanker و هي أساساً كانت متصنعة علي إن روسيا تصدرها بس الطيارة طلعت فشيخة لدرجة إن سلاح الجو الروسي شبط فيها .. في أغسطس 2009 سلاح الجو الروسي طلب يشتري منها 48 طيارة و أخر واحدة أستلموها في 2015 .. أول بلد تشتري الطيارة دي كانت الصين اللي في 2015 مضت عقد علي إنها حتشتري 24 طيارة و كلهم أتسلموا فعلاً لسلاح الجو الصيني في 2018 بس مهم تفهم نقطة .. الطيارة دي فشيخة .. انا مش بقول كده عشان أبان بقول إن الناس اللي ماسكة وزارة الدفاع أو سلاح الجو في مصر دي ناس بتفهم .. انا بقول كده عشان دي حقيقة .. صدقني لو قلتلك إن الطيارة دي هي (أليسون بيكر Alison Becker) حارس المرمي بتاع ليفربول .. من قبل ما يجي ليفربول كانوا مبياخدوش بطولات بس لما جه طاقة القدر إتفتحت ليهم.
سلاح الجو المصري لسنين و هو نفسه يبقي تحت إيده ما يسمي High End Air Superiority Fighter اللي هي الطيارة اللي بتعمل كل حاجة و بتدوس علي وش أي حد .. إعتراض جوي ماشي .. قصف أهداف أرضية وماله .. إشتباكات جوية و Dogfighting شغال .. و مش بس بتعمل الوظايف دي إنما كمان قليل لما تلاقي طيارة بتعمل نفس الوظايف أحسن منها .. من السبعينات أيام الرئيس (أنور السادات) الله يرحمه و مصر نفسها يبقي تحت إيدها طيارة بالمواصفات دي .. طلبنا من الأمريكان يدونا طيارات F-15 Eagle و رفضوا مع إنهم باعوها لإسرائيل و السعودية .. حتي لما أميركا تكرمت و إدتنا طيارات F-16 Falcon إدتهالنا بس مش معاها صواريخ جو- جو AIM-120 رغم إن تاني هي باعت الصواريخ دي للسعودية و إسرائيل .. ده معناه إن لسنين و إحنا سلاح الجو بتاعنا معندوش غير طيارات خفيفة زي F-16 مداها مش كبير أوي و حتي تسليحها مش زي تسليح نفس طيارات F-16 اللي عند إسرائيل .. عشان أبسطهالك خالص تخيل إن سلاح الجو المصري عنده أجانص عربيات و العمود الفقري بتاع العربيات اللي عندنا هي طيارات هيونداي فيرنا .. صحيح هي سريعة فشخ و بشوية تعديلات بسيطة بتبقي فهد بيجري في الطريق بس إحنا نفسنا يبقي عندنا BMW M5.
هي طيارة تعتبر الجزء الثاني أو التطوير بتاع الطيارة Su-27 Flanker .. هي طيارة بتتصنف علي إنها جيل رابع Plus Plus أو Fourth Generation ++ و دي مش غلطة مطبعية هي فعلاً بتتسمي كده لإن فيها كل قدرات مقاتلات الجيل الرابع و فوقيها كمان أنظمة تشويش علي الرادار و حرب أليكترونية صعب تلاقيها في طيارة مقاتلة .. الأمريكان خايفين منها جداً لدرجة إنهم فعلياً شايفين إن مفيش طيارة عندهم تقدر تتفوق عليها إلا F-22 Raptor .. كتير من الطيارين الأمريكان رأيهم إن سواء الطيارة F/A-18E/F Super Hornet اللي بتخدم علي حاملات الطائرات أو حتي الطيارة F-15C حيطلع ميتينهم قصاد قدرة Su-35 علي المناورة .. الحاجة الوحيدة اللي ممكن توقف Su-35 عند حدها هي طيارة من طيارات الجيل الخامس اللي ليها القدرة علي التخفي علي الرادار أو Stealth و مش أي طيارة كمان .. F-22 Raptor بس اللي تقدر لإنها طيارة إتصممت عشان Dogfighting أو الإشتباكات الجوية .. طب و F-35؟ .. بص هي فيه مشكلة في الحتة دي بالذات و ده حيخلينا نتكلم شوية عن إمكانيات سوخوي-35.
المحركات و مدي الطيران:
زيها زي كتير من الطيارات في فئتها فهي فيها محركين Sturn/UFA AL-31F 117S Turbofan و الموتور ده إشتغل علي تطويره 3 شركات اللي هم سوخوي Sukhoi و ساترن Saturn و UMPO و المحركين بيدوا للطيارة سرعة قصوي بتوصل 2,390 كيلومتر في الساعة أو 2.25 ماخ .. هي صحيح الطيارة دي إتصممت و أختبرت علي إنها تقدر تشيل خزانات وقود خارجية إلا إن لسبب ما الطيارة دي عمرها ما طارت بيهم فعلاً .. علي حسب سرعة الطيارة فهي تقدر تطير ما بين 3,600-4,200 كيلومتر مستريح علي تانك بنزين بيشيل 14,350 كيلوجرام و دي مسافات محترمة جداً تقدر تزودها لو ركبتلها خزانات وقود خارجية و ليها إمكانية إنها تتزود بالوقود في الجو كمان .. زود علي كده إنها بتقدر تطير لحد إرتفاع 18,000 متر و لو انت فاهم شوية في الطيارات فالرقم ده خزعبلي.
فيه إفتكاسة طلعت لأول مرة مع الطيارة F-22 Raptor إسمها Thrust-Vectoring Engines و دي عبارة عن ألواح معدن بتتحط ورا حول الشكمان و بتطلع و بتنزل عشان تدي Power أكتر للموتور .. بسبب الإفتكاسة دي فالطيارة Su-35 بتقدر تطير بسرعات أعلي من سرعة الصوت لمسافات طويلة اللي بتتسمي Superconic Cruise من غير ما تشغل Afterburner يعني من غير ما تحرق بنزين زيادة .. الإفتكاسة دي أول مرة تتعمل كانت زي ما قلت في طيارة F-22 Raptor و الروس خدوا الفكرة هي هي طبقوها في Su-35.
كومبيوتر الطيارة:
زي أي عربية حتلاقي حاجة إسمها كومبيوتر العربية و الكومبيوتر ده بياخد قراياته من كذا حساس Sensor متوزعين في حتت مختلفة .. في حالة الطيارة Su-35 فانت محتاج تبقي عارف وظيفة 3 حساسات لإن دول اللي بيخلوا الطيارة في حتة تانية خالص:
- أهم حساس في الطيارة هو الرادار بتاعها .. إسمه N135 Irbis PESA من تصنيع شركة إسمها طويل فشخ بس إختصاراً معلش حنسميه NIIP و يكفي أقولك إن فيه كلام إن الرادار ده بيلقط طيارات F-35I Adir و دي تبقي النسخة اللي إستلمتها إسرائيل من طيارات F-35 Lightening II.
- ثاني حساس هو اللي الطيار بيستخدمه عشان يصطاد الأهداف المعادية و ده بيكون نظام بحث و تدمير بيشتغل بالأشعة تحت الحمراء إسمه OLS-35 IRST.
- ثالث حساس و أخطر واحد هو نظام التشويش علي الرادار و الحرب الأليكترونية و ده فعلاً أخطر حاجة في الطيارة لإن لو انا حتي طيار F-35 بدور عليك فانت ممكن تشوش عليا و لو لقطتك و ضربت عليك صاروخ AIM-120 AMRAAM اللي هو أهم صاروخ جو- جو في أي طيارة أميريكية و بيتوجه بالرادار فانت تقدر تشوش عليه برده.
التسليح:
تسليح الطيارة دي من أهم مميزاتها .. هي متصممة عشان يبقي فيها 12 نقطة تثبيت Hardpoints و ده معناه إنها نظرياً بتقدر تشيل 12 صاروخ .. انت متخيل الرقم؟
- الصواريخ من ضمنها صواريخ جو- جو بعيدة المدي R-27 .. من ضمنها صواريخ جو- جو متوسطه المدي l R-77 .. من ضمنها صواريخ جو- جو قصيرة المدي R-73E.
- لضرب الأهداف الأرضية فانت عندك حل من إتنين .. يا صواريخ جو- أرض زي Kh-29 أو القنابل الموجهة يا بالليزر يا بGPS.
- لو ناوي تطلعها تصطاد سفن فهي بتشيل صواريخ مضادة للسفن زي Kh-31A و مش بس ده .. هي بتقدر تشيل صواريخ مضادة للسفن بعيدة المدي زي Kh-59MK و كاليبر Kalibr.
- السلاح الأساسي للطيارة في حالة Dogfighting هو مدفع رشاش 30 مليمتر إسمه GSh-30-1 من تصنيع شركة Gryazev-Shipunov و بيكون فيها 150 طلقة.
كل الأرقام و أسامي الصواريخ اللي شبه أسامي الأدوية دي معناها إيه؟ .. معناها إن الطيارة Su-35 تعتبر تهديد صريح لإمكانيات F-35 .. متنساش إن F-35 متصممتش عشان تبقي طيارة إشتباك جوي .. لا هي سريعة و لا ليها نفس القدرة علي المناورة زي F-22 Raptor .. ده معناه إن طيار بيفهم معاه Su-35 ممكن يطير علي إرتفاع عالي أوي و يستغل سرعة طيارته إنه يوقع F-35 .. فكر فيها كده .. لو انت طيار F-35 إمكانيات طيارتك بتخليك تطير بسرعة 0.9 ماخ و علي إرتفاع 9000 متر فوق سطح البحر .. جميل .. لو انا طيار Su-35 بقدر أطير علي إرتفاع يوصل 18,000 متر يعني ضعف أقصي إرتفاع انت ممكن توصله و كمان بطير بسرعة 1.5 ماخ يعني تقريباً ضعف سرعتك .. زود علي كده إن أنظمة التشويش علي الرادار بتاعتها جامد أوي.
وده حيودينا لأخر سؤال .. هل فعلاً أميركا زعلانة عشان الصفقة دي تمت؟
شوف .. اللي حصل إن بعد شهر واحد من نشر التقرير في جرنان كوميرسانت يعني بتتكلم في مايو 2019 وزير الخارجية الأميريكي (مايك بومبيو Mike Pompeo) كان قاعد في جلسة إستماع قدام لجنة الدفاع و الأمن القومي في الكونجرس عشان يسألوه عن الصفقة دي .. المشكلة إن فيه قانون في أميركا إسمه غريب شوية هو Countering America’s Adversaries Through Sanctions Act و إختصاراً بيتسمي CAATSA و القانون بيقول إن مينفعش بلد بتستلم مساعدات عسكرية زي مصر ضمن برنامج المعونة العسكرية و في نفس الوقت تروح تشتري سلاح من بلد زي روسيا اللي أميركا بتعتبرها تهديد للأمن القومي بتاعها .. (مايك بومبيو) في جسلة الإستماع دي قال إنه أتكلم مع القيادة المصرية و فهمهم إن لو الصفقة دي تمت فهو مش حيقدر مينفذش قانون CAATSA و بالتالي مصر معرضة إنها يتفرض عليها عقوبات إقتصادية .. في جلسة الإستماع برده (مايك بومبيو) قال إن القيادة المصرية قالتله إنها فاهمة كويس الكلام ده و إنهم حيدرسوا الموضوع و يردوا عليه.
بعدها نبرة الإدارة الأميريكية فضلت تعلي و تعلي لدرجة إن وزير الدفاع (مارك إيسبر Mark Esper) جاب سيرة إنتهاكات حقوق الإنسان في مصر إلا إن بقدرة قادر المياه بترجع لمجاريها في مايو 2020 لما أميركا وافقت علي تطوير أسطول طيارات الهليكوبتر AH-64 Apache اللي عند مصر و ده خلي ناس كتير تقول أكيد إحنا وصلنا مع الأمريكان لإتفاق من تحت الطرابيزة إننا نقدر نشتري الطيارات السوخوي بس الله أعلم تفاصيل الإتفاق ده إيه.
خلال الفترة من 2015 لحد دلوقتي يعني بتتكلم عن خمس سنين بس سلاح الجو المصري لوحده إشتري الأتي .. 46 طيارة MiG-29M و أختها MiG-29M2 أم كرسيين و الإتنين بيتصنفوا علي إنهم طيارات متعددة المهام .. 24 طيارة رافال Rafale من تصنيع شركة داسولت Dasault الفرنسية مقابل 6.8 مليار دولار .. و دلوقتي 24 طيارة Su-35SE .. اه نسيت أقولك .. كان فيه كلام في مايو 2020 إن مصر كانت حتشتري 24 طيارة إيوروفايتر تايفوون Eurofighter Typhoon بس صدقني لو قلتلك كل ده بلح .. أسهل حاجة في الدنيا إني أقارن إمكانيات الطيارات المقاتلة زي ما انت بتقارن إمكانيات الموبايلات علي GSM Arena بس ده مش معناه إن اللي بنعمله ده لو معني.
معارك الطيران أعقد من إنك تحسمها بباورات الطيارات .. فيه حاجة إسمها تكتيكات .. فيه حاجة إسمها مهارة طيار .. فيه حاجة إسمها سرعة صيانة و حل أعطال .. فيه حاجة إسمها حنوفر بنزين الطيارات إزاي .. عايزك تعرف إن كتير من المناورات الجوية سواء اللي إتعملت بحق وحقيقي أو كمحاكاة Simulations عشان يعرفوا مين أحسن ما بين Su-35 أو F-15C لقوا حاجة غريبة جداً إن تقريباً الإتنين نسخة طبق الأصل من بعض .. نفس الإمكانيات .. حتي صواريخهم سواء AIM-9X الأمريكاني أو R-73 الروسي شبه بعض .. ده خلي إن أغلب نتايج المناورات إنتهت بما يسمي Mutual Kill يعني الإتنين طيارين وقعوا بعض .. ده حقيقي .. اللي حيحسم أي مواجهة جوية بين Su-35 و أي طيارة أمريكاني مش أنهي طيارة أحسن من التانية .. اللي حيحسمها هو أنهي طيار أشطر و أنهي طيار أمه دعياله لإن الحظ بيلعب دور كبير جداً في Dogfighting .. حاول تتخيل إن الإشتباك الجوي عامل زي لعب البلاي ستيشن .. انت ممكن تختار فرقة باوراتها جامدة و تعمل خطة حلوة و في الأخر تخسر عشان بتشوط في العارضة و صاحبك جاب فيك جون من هجمة مرتدة.
عشان أختم معاك فأحب أقولك إن طيارة سوخوي-35 هي أحدث و أقوي طيارة في سلاح الجو الروسي و حتفضل كده لحد ما الروس يدخلوا الطيارة PAK-FA الخدمة و اللي حتكون أول طيارة جيل خامس تصنعها روسيا .. الطيارة دي تقدر تقف الند بالند ضد أجدعها طيارة مقاتلة في السوق سواء بتتكلم عن الرافال أو F-15 Eagle .. و زي ما قلت فيه ناس بتقول إن إمكانياتها تؤهلها إنك تقف قصاد طيارات الجيل الخامس الأمريكاني زي F-22 Raptor و F-35.
المصادر:
- مقالة بعنوان Su-35 production for Egypt begins نشرت في موقع Defense and Security Monitor و ده لينك المقالة الأصلية:
https://dsm.forecastinternational.com/wordpress/2020/05/18/egyptian-su-35-production-begins/ - مقالة بعنوان Here are the first photos of Egypt’s new Su-35 “Super Flanker” نشرت في موقع The Drive و ده لينك المقالة الأصلية:
https://www.thedrive.com/the-war-zone/35055/here-are-the-first-photos-of-egypts-new-su-35-super-flankers - مقالة بعنوان Why the Su-35 in Egypt’s hands is bad for America نشرت في موقع Military Watch Magazine و ده لينك المقالة الأصلية:
https://militarywatchmagazine.com/article/why-the-su-35-in-egypt-s-hands-is-bad-for-america - مقالة بعنوان Su-35 Flanker-E multirole fighter نشرت في موقع Air Force Technology و ده لينك المقالة الأصلية:
https://www.airforce-technology.com/projects/su-35/ - مقالة بعنوان Killer in the sky: Russia’s deadly Su-35 fighter نشرت في مجلة The National Interest و ده لينك المقالة الأصلية:
https://nationalinterest.org/feature/the-russian-bear-roars-the-sky-beware-the-deadly-su-35-11799 - مقالة بعنوان America’s F-15 Eagle vs. Russia’s Su-35 Fighter: Who wins? نشرت في مجلة The National Interest و ده لينك المقالة الأصلية:
https://nationalinterest.org/blog/the-buzz/americas-f-15-eagle-vs-russias-su-35-fighter-who-wins-13815 - مقالة بعنوان Is the Su-35 Flanker-E Russia’s best fighter yet? نشرت في مجلة The National Interest و ده لينك المقالة الأصلية:
https://nationalinterest.org/blog/buzz/su-35-flanker-e-russias-best-fighter-yet-87536
