تابعونا

افلام و مسلسلات

جيرارد باتلر .. إنت إيه اللي جرالك يا ضنايا؟

محدش كان متوقع إن فيلم 300 يكسر الدنيا كده .. ولا حتي شركة الإنتاج Warner Bros. اللي كان في الأول هي اللي حتنتج الفيلم بس سحبت فلوسها في شهر مارس قبل عرض الفيلم ب9 شهور لإنه كان المفروض يتعرض في ديسمبر 2006 و الشركة سحبت إيدها منه في مارس و ده خلي مخرج الفيلم (زاك سنايدر Zack Snyder) يدور علي أي شركة إنتاج لحد ما لقي شركة Legendary.

14 يناير، 2018 10.3 ألف

موضوعنا النهاردة اللي حنتكلم عنه هو الممثل الأسكتلندي (جيرارد  باتلر Gerard Butler) اللي يمكن إنت لو سمعت إسمه متعرفوش بس لو وريتك صورته حتقول اه ده بتاع فيلم 300 .. حقيقي إن العالم كله عرف (جيرارد  باتلر) مش بإنه ممثل كويس ولا إن شكله حلو .. إحنا محبناش (جيرارد  باتلر) لإنه خلانا نعيط من أداءه الرائع  زي مثلاً أدء (أل باتشينو Al Pacino) في فيلم Scent of a Woman أو بسبب حلاوته الأوفر زي (توم كروز Tom Cruise) .. إحنا حبينا (جيرارد  باتلر) بسبب الفورمة و السكس باكس اللي كان عاملها في فيلم 300 .. خش علي Google دلوقتي و إكتب إسم (جيرارد  باتلر) حتلاقي أول نتائج تظهرلك هي صور فيلم 300 و غالباً دي الصور الوحيدة اللي حتظهرلك رغم إنه كممثل عمل أفلام كتير غير 300 بس إحنا خلاص لزق في مخنا إن (جيرارد  باتلر) ده يبقي بتاع فيلم 300 .. أحدث أفلام  (جيرارد  باتلر) اللي نزلت السينمات كان فيلم Geostorm من إخراج (دين ديفلن Dean Devlin) و ده فيلم من أفلام الكوارث و اللي الحقيقة إن فيه حاجات غلط كتير فشخ في الفيلم ده .. واحدة منهم إن كان له 3 مواعيد عرض مختلفة .. واحدة منهم إنه كان له إتنين مخرجين كل واحد فيهم صوره بشكل مختلف و ده خلاه فيلم مكلف جداً جداً .. حاجة ثالثة إن الفيلم فشل بشكل رهيب في شباك التذاكر .. بس لو إنت شفت الفيلم حتلاقي نفسك بتسأل نفسك سؤال واحد .. هو إيه اللي حصل ل (جيرارد  باتلر)؟ و ده اللي حنتكلم عنه النهاردة هو إيه اللي حصل لCareer بتاعته؟

مين ينسي فورمة الساحل اللي كان عاملها (جيرارد باتلر Gerard Butler) في فيلم 300؟

أحياناً تحس إن (جيرارد  باتلر) بيتعمد إنه يبوظ الCareer بتاعته .. مجرد بصة سريعة علي الأفلام اللي عملها تحس إنك بتقرأ كتاب كيف تدمر حياتك الفنية في 10 خطوات .. بدايته خالص كانت مشجعة أوي لما سنة 1997 عمل أول دور سينمائي له في فيلم Mrs. Brown مع الممثلة القديرة (جودي دينش Judi Dench) و الممثل (بيلي كونولي Billy Connolly) و في نفس السنة كان له دور بسيط أوي فيلم Tomorrow Never Dies من سلسلة أفلام James Bond .. سنة 1998 كان له دور صغير برده في فيلم Tale of The Mummy و بعد كده جاله دور بطولة في الفيلم اللي لازم يتنسي Dracula 2000 .. بإختصار إنت بتتكلم عن ممثل ناشيء بيمسك في الأدوار اللي بتجيله و بيعمل اللي عليه و بيكمل في سكته زيه زي غيره من الممثلين اللي عايزين يبقي ليهم إسم.

بداية النقلة الكبيرة في حياة (جيرارد  باتلر) كانت سنة 2002 في فيلم Reign of Fire و صحيح هو مكنش البطل و صحيح إن كان صعب أوي إن أي ممثل يسحب السجادة من تحت البطلين بتوع الفيلم (كريستيان بايل Christian Bale) و (ماثيو ماكونهي Mathew McConaughy) بس علي الأقل كان فيلم كبير و ناس كتير شافته و بدأ شكل (جيرارد  باتلر) يتعرف .. سنة 2003 جاله دور مهم أوي في فيلم Tomb Raider: The Cradle of Life اللي هو ده دور محجوز لممثل يكون بريطاني بيحاول إنه يقف الند بالند قدام (أنجلينا جولي Angelina Jolie) و اللي قام به الممثل (دانييل كريج Daniel Craig) في الجزء الأول من فيلم Tomb Raider .. بعد كده جه في سكته فيلم The Phantom of The Opera و فيلم Timeline و فيلم 300.

(جيرارد باتلر) في فيلم The Phantom of the Opera.

محدش كان متوقع إن فيلم 300 يكسر الدنيا كده .. ولا حتي شركة الإنتاج Warner Bros اللي كان في الأول هي اللي حتنتج الفيلم بس سحبت فلوسها في شهر مارس قبل عرض الفيلم ب9 شهور لإنه كان المفروض يتعرض في ديسمبر 2006 و الشركة سحبت إيدها منه في مارس و ده خلي مخرج الفيلم (زاك سنايدر Zack Snyder) يدور علي أي شركة إنتاج لحد ما لقي شركة Legendary .. لما الفيلم إتعرض و جاب 70 مليون دولار في أول إسبوع من عرضه و أرباحه علي مستوي العالم عدت ال456 مليون دولار فده خلي (زاك سنايدر) يبقي هو الإبن المدلل بتاع شركة Warner Bros و الأهم إنه نقل (جيرارد  باتلر) لواحد من أهم نجوم هوليوود .. جري الشريط من سنة 2006 لحد دلوقتي و حط قدامك الأفلام اللي عملها (جيرارد  باتلر):

  • فيلم Shattered سنة 2007
  • فيلم P.S. I Love You سنة 2007
  • فيلم Nim’s Land سنة 2008
  • فيلم RocknRolla سنة 2008
  • فيلم The Ugly Truth سنة 2009
  • فيلم Gamer سنة 2009
  • فيلم Law Abiding Citizen سنة 2009
  • فيلم The Bounty Hunter سنة 2010
  • فيلم Coriolanus سنة 2011
  • فيلم Machine Gun Preacher سنة 2011
  • فيلم Chasing Mavericks سنة 2012
  • فيلم Playing for Keeps سنة 2012
  • فيلم Movie 43 سنة 2013
  • فيلم Olympus Has Fallen سنة 2013
  • فيلم Gods of Egypt سنة 2016
  • فيلم London Has Fallen سنة 2016
  • فيلم A Family Man سنة 2016
  • فيلم Geostorm سنة 2016
  • فيلم Den of Thieves سنة 2018.
  • فيلم Hunter Killer سنة 2018.
  • فيلم How to Train Your Dragon: The Hidden World سنة 2019.
  • فيلم Angel has Fallen سنة 2019.

إنت بتتكلم عن 22 فيلم  و لو قلنا فكك من Geostorm يبقي بتتكلم عن 21 فيلم منهم 5 أفلام تشويق Thrillers و 4 أفلام رومانسية كوميدية و فيلمين دراما ماخذوين عن قصص حقيقية و فيلم رياضي و فيلم مستوحي من روايات (وليام شكسبير William Shakespeare) و 5 أفلام أكشن .. من ضمن الأفلام دي كلها فيلمين بس من ال3 أفلام اكشن اللي هو عملهم سمعوا مع الناس و ياريتهم كانوا فيلمين حلوين اللي هم Olympus Has Fallen و London Has Fallen لدرجة إن إتعمل الجزء الثالث بتاعهم Angel Has Fallen.

فيلم Olympus Has Fallen يمكن أنجح أفلام (جيرارد باتلر) لحد دلوقتي.

مشكلة (جيرارد  باتلر) الكبيرة  هي حاجتين:

  • أول مشكلة هي سنه .. الرجل ده عنده دلوقتي 45 سنة و لما قرر إنه يمثل و يسيب شغلته الأساسية كمحامي كان عنده 27 سنة يعني هو دخل الشغلانة متأخر .. ده معناه إن فيه سنين كتيرة من عمره راحت ملحقش فيها إنه يزود من مهاراته كممثل و يمكن أهم Skill بتبقي في إيد أي ممثل هي قدرته علي إنه يتكلم بكذا لهجة و لكنة .. خد عندك مثال فيلم Gods of Egypt .. الفيلم ده كان حيفشل أيا كان إيه اللي ممكن يحصل بس الفكرة إنك لما تعمل شخصية الإله ست إله الشر عند قدماء المصريين فاللي يعمل الشخصية ممثل أسكتلندي بيتكلم بلكنة أسكتلندية واضحة أوي فإنت أكيد إخترت الممثل الغلط للدور .. مثال تاني هو فيلم P.S. I Love You اللي حاول يتكلم فيه بلكنة أيرلندية بس برده معرفش يعملها أوي.
فيلم Gods of Egypt واحد من السقطات الكتير في الCareer بتاعة (جيرارد باتلر).
  • تاني مشكلة هي إختياراته الغلط في غلط خصوصاً الأفلام الرومانسية اللي عملها و اللي منجحتش لا تجارياً ولا فنياً زي P.S. I Love You و The Ugly Truth قدام الممثلة (كاثرين هايجل Katherine Heigl) و فيلم The Bounty Hunter قدام الممثلة (جنيفر أينستون Jennifer Aniston).

مش معني كلامي إن (جيرارد  باتلر) ممثل وحش .. هو في حياته الفنية كلها عمل 27 فيلم حققوا أرباح علي مستوي العالم وصلت 3.4 مليار دولار بس خلينا نكون منصفين إن 30% من الفلوس دي يعني بتتكلم عن حوالي 1.1 مليار دولار جم من أرباح سلسلة أفلام How to Train Your Dragon اللي هو أساساً فيلم كرتون بس مش دي القضية دلوقتي .. القضية إن ده مش الCV ولا الCareer بتاع حد عايز يبقي نجم شباك ماشي علي خطة إنه يختار الأفلام اللي تفضل تنقله لقدام .. عشان تفهم أنا قصدي إيه خليني أديلك مثالين:

  • المثال الأول هو الممثل (ويل سميث Will Smith) اللي سنة 2007 عمل Interview مع مجلة Time حكي فيها إنه إزاي في بداية الCareer بتاعته قعد مع مدير أعماله و بدأوا يدرسوا مين هم أنجح الأفلام في العالم وقتها و لقوا إن من ضمن أهم 10 أفلام حققت نجاح كبير في تاريخ السينما وقتها لقوا إن ال10 أفلام الحاجات المشتركة اللي بينهم إن كلهم معمولين بمؤثرات بصرية مكلفة Visual Effects .. فيه 9 أفلام من ال10 معمولين بVisual Effects و فيها كمان فكرة كائنات فضائية  .. فيه 8 من ال10 أفلام فيهم Visual Effects و كائنات فضائية و قصة حب و من هنا (ويل سميث) بدأ يحط لنفسه خطة .. أنا محتاج أعمل فيلم خيال علمي فيه مخلوقات فضائية و أقوم لاحم وراه فيلم رومانسي .. ده إترجم إنه عمل أفلام زي Independence Day و Men in Black و وراهم فيلم رومانسي زي Hitch.
  • المثال التاني هو ممثل زي (راسل كرو Russell  Crowe) .. ده برده ممثل مش أمور أوي زيه زي (جيرارد  باتلر) و بيتكلم بلكنة واضحة أوي اللي هي اللكنة الأسترالي  برده زي (جيرارد  باتلر) .. بدأ حياته بيعمل أفلام ملهاش لازمة زي Virtuosity و The Quick and The Dead زيه زي (جيرارد  باتلر) .. بعد كده عمل أفلام هادفة ليها معني مع مخرجين كبار زي L.A. Confidential و The Insider .. بعد كده النقلة كانت فيلم تاريخي حقق نجاح كبير اللي هو Gladiator يعني سبحان الله كأنك بتتكلم عن نفس البني أدم زيه زي (جيرارد  باتلر) .. بعد كده بدأ يشتغل مع مخرجين هو بيرتاح معاهم عشان يعملوا أفلام هادفة برده زي التعاون بينه و بين المخرج (رون هاورد Ron Howard) في أفلام A Beautiful Mind و Cinderella Man و الشغل اللي بينه و بين المخرج (ريدلي سكوت Ridley Scott) في أفلام A Good Year و American Gangster و  Body of Lies و Robin Hood  ..  صحيح إن الCareer بتاعة (راسل كرو) مش ماشية زي الأول بس لمدة 10 سنين كاملة كان يعتبر من أهم ممثلي هوليوود .. ليه؟ .. عشان كان بيختار صح .. مش ماشي علي خطة منهجية زي (ويل سميث) بس بينقي أدواره .. حتي لما قرر يعمل فيلم غنائي عمل فيلم Les Miserable اللي يعتبر من أهم الأفلام الغنائية في تاريخ السينما.
فيلم Geostorm و أخر هبدات (جيرارد باتلر).

تحس إن (جيرارد  باتلر) لا عارف يخطط لCareer بتاعته زي  (ويل سميث) ولا عارف ينقي أدواره زي (راسل كرو) .. هو محتاج يلاقي مخرج يحيي فيه الممثل الكويس تاني .. ناس كتير متعرفش مخرج زي (شاين بلايك Shane Black) اللي فعلاً هو اللي أحيا الCareer بتاعة (روبيرت داوني جونيور Robert Downy Jr) لما أختاره في فيلم Kiss Kiss Bang Bang و اللي بسببه أختير إنه يعمل دور (توني ستارك Tony Stark) في فيلم Iron Man .. نفس المخرج (شاين بلايك) هو اللي رجعلنا (راسل كرو) بتاع زمان في فيلم The Nice Guys .. مخرج تاني زي (كوينتين تارانتينو Quentin Tarantino) اللي ممكن يرجعك نجم شباك في يوم و ليلة بس الأهم إن (جيرارد  باتلر) هو اللي يعوز يرجع تاني .. هو محتاج يفهم إنه خلاص بقي نجم و مش مطلوب منه يوافق علي أي فيلم يجيله لمجرد إنه محتاج يتشاف .. هو وصل لمرحلة إنه بقي لازم ينقي أدواره صح و اللي وحش يقول إنه وحش و مش حيعمله.

المصادر:

الوسوم

مهندس ميكانيكا بحب الصحافه و الكتابه .. مؤمن بان من حق كل بني ادم انه يعرف الحقيقه ورا الخبر .. رسالتي انك تفهم حقيقه اللي بيحصل عشان لما تقرر رايك تكون فاهم انت بتقرر علي اي اساس

اترك تعليق

بريدك الالكتروني لن ينشر. يجب ملئ الخانات بعلامة *

من فضلك ادخل التعليق!

من فضلك ادخل الأسم!

من فضلك ادخل البريد الالكتروني!من فضلك ادخل بريد الكتروني صحيح!