لينك التسجيل الصوتي علي ساوند كلاود:
https://on.soundcloud.com/vnv3b
مفيش حد تشوفه في الشارع اليومين دول إلا ويسألك عن رأيك في الحرب اللي بين روسيا وأوكرانيا وده الحقيقة مفهوم جداً .. لما واحدة ست تروح تشتري خضار من السوق وتلاقي سعر الكرنب زاد فتسأل البياع عن السبب يرد يقولها عشان الحرب اللي مولعة بين روسيا وأوكرانيا فطبيعي إن لما تأثير حرب زي دي بعيد أوي عننا جغرافياً يأثر علي هل الست والدتك حتعملك محشي كرنب النهاردة علي الغدا أو لا يبقي لازم نتكلم عنها .. مشكلة الكلام عن الحرب دي أو أي حاجة بتحصل اليومين دول إن الهري فيها حيبقي كتير وده برده مفهوم بما إننا عايشين في عصر السوشيال ميديا و ده حيخلينا النهاردة و إحنا بنتكلم عن الحرب دي نحاول سوا نجاوب علي كذا سؤال:
- هي الحرب دي قامت ليه؟ وهل كان ليها سبب أصلاً؟
- ليه الحرب دي مختلفة عن أي حرب تانية في تاريخ البني أدمين؟
- هي الحرب دي إن شاء الله حتخلص علي إيه؟
الغزو الروسي لأوكرانيا .. مين ظلم ومين إتظلم؟
خليني أحطلك تشبيه بسيط يصل لدرجة التفاهة بس صدقني حيكون هو أول خطوة علي طريق إنك تفهم هي المشكلة فين .. تخيل معايا رجل صعيدي شديد شوية بس مخلف بنت شايفالها شوفة وبتحب شاب أبوها مش موافق عليه وهو عرف إنها بتخطط تهرب من البيت عشان تروح تتجوز الشاب ده .. يقوم أبوها حابسها في أوضتها ولو فكرت تطلع بره أوضتها حتاخد فوق دماغها .. واضح يعني في التشبيه ده إن الأب الصعيدي يبقي روسيا والبنت تبقي أوكرانيا والشاب يبقي حلف شمال الأطلسي NATO .. مش كده وبس .. الناس لما جت تسأل الأب/روسيا إنت ليه بتعمل كده بس يا عم الحاج طلع في خطاب إتذاع يوم 21 فبراير 2022 إن أساساً يعني أوكرانيا مش بلد مستقلة وإنها جزء من الدولة الروسية وإن شعبها مربوط بالشعب الروسي برباط من الدم .. بمعني أخر .. دي بنتي وأنا أبوها وهي ملهاش رأي وكلمتي هي اللي حتتسمع .. مفيش حاجة إسمها إنضمام لحلف شمال الأطلسي ولا للإتحاد الأوروبي وبصوت (الكبير أوي) ختم كلامه بجزرة وقطمها جحش.
طبيعي إنك تسأل نفسك طب هو كل ده ليه؟ .. الحقيقة إن تفسير ده راجع لحاجتين مربوطين ببعض:
- الحاجة الأولانية هو القرار الغير مفهوم والغير مدروس واللي ملوش أي ستين لازمة اللي طلع في التسعينات بتوسيع حلف شمال الأطلنطي مع إن السبب الأساسي ورا إنشاء الحلف أصلاً اللي هو الإتحاد السوفيتي كان إنهار.
- الحاجة الثانية هي إزاي الرئيس الروسي (فلاديمير بوتين) إستغل القرار ده والنتايج بتاعته إن حلف شمال الأطلنطي بقي فعلياً علي عتبة باب روسيا إنه يبص لشعبه ويقولهم شايفين .. شايفين الشيطان الأمريكاني بيعمل إيه .. أنا الوحيد اللي أقدر أحميكوا وأحمي سيادة روسيا وأرجع مجد الإتحاد السوفيتي تاني وكل ده عشان يداري علي المشاكل اللي بيعيشها الإقتصاد الروسي بعد إنهيار سعر برميل البترول سنة 2014.
خلينا نبدأ بأول نقطة إن حلف شمال الأطلنطي قرر يبقي زي محلات الفرايد تشيكن اللي بقت في كل حتة في مصر ونبقي متفقين إن مينفعش بأي حال من الأحوال نلوم دول زي بولندا والمجر وجمهورية التشيك ولاتفيا وليتوانيا وأستونيا إنها تحلم تنضم لحلف بيقولها لو حصل وروسيا رفعت إيدها عليكي فتاني يوم الصبح حتلاقي القوات المسلحة الأميريكية بتدافع عنك .. الإغراء بتاع الفكرة لوحدة كفيل إنه يخلي أي دولة من اللي كانوا زمان جزء من الإتحاد السوفيتي أو تحت سيطرته بتحلم باليوم ده زي ما أي بنت بتحلم إن (عمرو دياب) يجي يغني في فرحها .. اللي المفروض يتلام فعلاً هم الناس اللي ماسكة حلف شمال الأطلنطي ويمكن ده القرار اللي محتاج نتكلم عنه شوية وإزاي طلع.
مبدأياً ده مكنش قرار عسكري طالع من القيادة بتاعة حلف شمال الأطلنطي إنما ده قرار طلع من الكونجرس الأميريكي بضغط من لوبي شركات تصنيع السلاح الأميريكية اللي كانت خايفة إن بعد إنهيار الإتحاد السوفيتي أميركا تقول لنفسها مش لازم بقي خلاص نصرف علي السلاح زي زمان وده حيكون معناه إن الفلوس اللي بتخش للشركات دي مش حتبقي زي الأول .. الفكرة في حاجتين .. الحاجة الأولانية إن علاقة الكونجرس الأميريكي بالسياسة الخارجية وتفاصيلها عامل زي علاقة الرجل بأنواع وماركات الماكياج اللي هي مش لعبتهم ولا عمرهم حيبقوا شاطرين فيها .. الحاجة الثانية إن من ضمن اللي إعترضوا علي القرار ده كان الناس اللي جوه المؤسسة العسكرية الأميريكية .. ده حقيقي .. من ضمن اللي إتنبح صوتهم إن توسيع حلف شلف الأطلنطي ده حيبوظ الدنيا مش يعدلها كان وزير الدفاع وقتها (بيل بيري Bill Perry) واللي كان بيحكم أميركا وقتها كان الرئيس (بيل كلينتون Bill Clinton) .. المنطق بتاع الرجل إن من بعد إنهيار الإتحاد السوفيتي وقيادة حلف شمال الأطلنطي إشتغلت كتير أوي علي فكرة إنهم يقنعوا القيادة العسكرية الروسية إن مفيش داعي نفضل أعداء وخلينا نبقي صحاب فمينفعش دلوقتي الروس يلاقونا عمالين نضم دول علي عتبة بابهم للحلف لإن منظرنا قدامهم حيبقي وحش.
شوف يا إبني .. أهم حاجة في الدنيا إنك زي ما بنقول كده متهبدتش اللي هو بمعني أخر إدي العيش لخبازه .. لو حاجة مش شغلتك مش عيب تتعلمها بس متفتيش فيها وإنت مش فاهمها كويس .. أنا ليه بقولك الكلام ده؟ .. عشان يوم 2 مايو 1998 بمجرد ما طلع قرار الكونجرس بتفعيل توسعة حلف شمال الأطلنطي اللي طلع ردحلهم في الإعلام كان واحد إسمه (جورج كينان George Kennan) .. الرجل ده كان شغال في وزارة الخارجية الأميريكية من سنة 1926 وسنة 1952 إتعين سفير أميركا في موسكو وناس كتير بتبصله إنه كان هو المهندس بتاع تفكيك الإتحاد السوفيتي فده رجل عارف روسيا شبر شبر ولما يطلع حد زي ده هو اللي قتل الإتحاد السوفيتي و هو اللي مشي في جنازته يقول إن ده من أغبي القرارات اللي طلعت من الكونجرس اللي هي أساساً مش شغلته إنه يفتح بقه في قضايا السياسة الخارجية .. ولما يكون رأيه إن دي بداية حرب باردة جديدة عشان أكيد الروس عاجلاً أم أجلاً حيتطبق عليهم الجملة اللي بتقول يستفزوك حتي يخرجوا أسوأ ما فيك وبعد كده يقولولك هذا أنت .. تلف الأيام وتدور الأيام وتلاقي إن نبوءة (جورج كينان) حصلت هي هي بعد 24 سنة.
طبيعي برده إنك تهرش في شعرك وتسأل طب إشمعني دلوقتي .. قرار توسيع حلف شمال الأطلنطي طلع سنة 1998 فليه الدنيا باظت دلوقتي؟ .. أقولك .. في الفترة من 1990 لحد سنة 2000 يعني في العشر سنين دول روسيا كانت بتلم ورا بقايا النظام السوفيتي فمحدش كان فاضي يسأل نفسه هو إيه اللي ممكن يحصل لو دولة زي بولندا علي عتبة باب روسيا إنضمت لNATO .. مش عايز أبان إني بقلش وبهزر علي الفاضية والمليانة لما أقولك متنساش كمان إن اللي كان بيحكم روسيا وقتها كان (بوريس يلتسن) وده كان رجل أساساً خمورجي .. (يلتسن) كان فعلاً خمورجي بس في نفس الوقت مشاكل روسيا في العشر سنين دول كانوا أكبر بكتير من إنها تشغل بالها هو مين حينضم لحلف شمال الأطلنطي اللي هو يتحرق NATO باللي فيه .. (بوتين) جه الحكم سنة 2000 وأيوه أنا عارف إنك مستغرب إنه بقاله كتير أوي كده في الكرسي بس ده حقيقي هو بيحكم من سنة 2000 وخلال أول فترتين رئاسيتين ليه يعني لحد سنة 2008 كان سعر برميل البترول ضارب في السما فكان فعلياً الناس كلها مش في دماغها .. الفلوس اللي بتخش البلد كتير .. الجيش بيتصرف عليه .. المواطن الروسي البسيط حاسس إنه عايش كويس خصوصاً بعد العشر سنين العجاف اللي عدوا عليه مع إنهيار الإتحاد السوفيتي .. الفلوس زيها زي مزيل العرق كده .. إنت ممكن متكونش إستحميت بقالك شهر ومعفن وريحتك وحشة بس تحط رشة مزيل عرق فكل ده بيروح .. إنت صحيح لسه معفن من جوه بس من بره ريحتك حلوة فمحدش كان مركز أوي.
من أول سنة 2012 وإنت طالع وبدأت ريحة الإقتصاد الروسي تطلع مع إنخفاض سعر بيع برميل البترول وبالتالي أسعار الغاز الطبيعي هي كمان بقت أرخص .. هنا (بوتين) كان قدامه إختيارين .. إما إنه يبدأ يشتغل علي إصلاحات إقتصادية تخلي الإقتصاد الروسي مش معتمد بالشكل المبالغ فيه ده علي عائدات النفط اللي هي تقريباً نفس الإصلاحات اللي بتعملها دول الخليج دلوقتي وخصوصاً المملكة العربية السعودية .. أو إنه يروح للسكة السهلة وهي إنه يكلم المواطن الروسي ويقوله أنا عارف إن التضخم عمال ياكل في مرتبك .. أنا عارف إنك مش لاقي شغل .. أنا عارف إن الدنيا مش زبادي خلاط زي زمان بس إنت عارف إيه السبب .. قام مشاورله علي أوكرانيا وقاله عشان هي عايزة تنضم لحلف شمال الأطلنطي مع إن لحد سنة 2014 مكنش فيه حد أصلاً بيتكلم علي إن أوكرانيا تنضم للحلف .. (بوتين) إستراتيجيته بمنتهي البساطة إنه قال لشعبه إتفرجوا عليا وأنا بكسب الغرب في لعبتهم .. هم مش دخلوا العراق وأفغانستان وضربوا ليبيا والصومال واليمن ومحدش عارف يفتح بقه .. طب أنا بقي حاخد منهم أوكرانيا ومحدش حيقولي تلت التلاتة كام.
ليه الغزو الروسي لأوكرانيا حاجة تانية خالص؟
مبدأيا دي أول حرب تتذاع بث مباشر كأنها ماتش كرة قدم .. دي حرب صحيح يبان من بره زيها زي حروب العصور الوسطي إن بلد قوية راحت إحتلت بلد أضعف منها بس ده حصل في عصر العولمة والإقتصاد المربوط ببعضه .. دي أول حرب بيجيلك Notification عن تطوراتها علي التيك توك .. دي أول حرب لو أرتكبت فيها جرائم ضد الإنسانية مش حتلاقي حد يشكك في هل ده حصل أو لا لإن الجريمة بتتذاع Live علي السوشيال ميديا .. متهيألي إن محصلتش قبل كده حرب الناس عرفت إنها قامت لما جوجل مابس كان مبين تحركات المدرعات الروسية وإن الطرق مقفولة .. ليه كل ده مهم؟ .. الفكرة إن البشر بيحبوا إحساس الأمان .. بمعني .. من بعد الحرب العالمية الثانية والنظام العالمي شبه قايم علي فكرة إن خلاص عصر إن بلد تروح تحتل بلد تانية إنتهي وإن مفيش إستعمار تاني خلاص .. اللي عمله (بوتين) مع أوكرانيا بعت رسالة للعالم كله إن النظام العالمي اللي أنتوا متعودين بح خلاص .. دلوقتي فيه قواعد جديدة بتتكتب .. قد يقول قائل بس يا عم الأمريكان هم اللي بدأوا ده لما دخلوا أفغانستان سنة 2001 والعراق سنة 2003 بس هي الفكرة إن علي الأقل الأمريكان كانوا بايعين كدبة إن غزوهم للعراق وأفغانستان هو إنتقام للي حصلهم في هجمات 11 سبتمبر والناس صدقت .. لكن أوكرانيا مش هي اللي هاجمت روسيا .. مفيش أي مبرر للحرب دي بحيث مثلاً يتقال إن أوكرانيا داست لروسيا علي طرف أو إن أوكرانيا بدأت هي الخناقة بأي شكل.
مشكلة (بوتين) إنه مش مستوعب أوي طبيعة العصر المهبب بستين نيلة اللي إحنا عايشين فيه ده .. تخيل معايا حضرتك مغنية زي (سيلينا جوميز Selena Gomez) .. مجرد مغنية وممثلة بيسمعها المراهقين وحتي اللي في سني اللي كسروا حاجز الثلاثين سنة مش بيسمعوها .. الست الفاضلة دي عندها 298 مليون فولور علي أنستجرام ودول أكتر من إجمالي عدد سكان روسيا .. لو أنا قلت الكلام ده في وش (بوتين) فحلاقيه بيضحك عليا ويسألني طب هي الست (سيلينا) عندها كام دبابة وكام طيارة وكام رأس نووي والحقيقة إن عنده حق .. بس في عصر السوشيال ميديا والتيك توك فلو (سيلينا جوميز) راحت البريميير بتاع أي فيلم ولبست علي الريد كاربيت تي شيرت مكتوب عليه بلاش تركبوا أوبر وأركبوا ديدي فصدقني حتلاقي سهم أوبر في البورصة وقع علي بوزه .. هو العصر ده كده .. فيديو واحد علي التيك توك يقدر يعمل نفس الضرر اللي عمله القوات المسلحة النازية الألمانية (فيرماخت) في ستالينجراد خلال الحرب العالمية الثانية.
أي محاولة منك إنك تفهم هو يا تري إيه مبرر روسيا لغزوها لأوكرانيا حتلاقي نفسك غصب عنك بتلف وترجع لقرار توسعة حلف شمال الأطلنطي .. كنوع من التقريب حاول تتخيل إن إحساس روسيا هو هو إحساس ألمانيا بعد الحرب العالمية الأولي .. بعد الحرب دي إتمضت إتفاقية فيرساي اللي زي ما حكينا في قصة إتفاقية سايكس- بيكو قسمت تورتة الدولة العثمانية بين فرنسا وبريطانيا بس فيه جزء مهم من الإتفاقية دي ناس كتير مش بتجيب سيرته وهو الظلم اللي إتعرضتله ألمانيا واللي فيه ناس رأيها وأنا منهم إن الظلم ده كان هو البذرة اللي لما كبرت طرحت الفكر النازي .. فكرة إن ألمانيا تدفع تعويضات قسمت ظهر إقتصادها .. فكرة إن ألمانيا تسرح قواتها المسلحة .. فكرة إن ألمانيا تتنازل عن كل مستعمراتها .. طبيعي إن الألمان يحسوا بالإهانة وإن من جواهم يكون دمهم بيغلي ويحلفوا مية يمين إنهم ينيموا أوروبا كلها من المغرب .. بالنسبة للروس فالميكس بين قرار توسعة NATO بحيث يشمل مش بس دول علي حدود الإتحاد السوفيتي زي بولندا إنما دول كانت جزء من الإتحاد السوفيتي زي أوكرانيا مع فكرة إن سبوبة فلوس عائدات بيع الغاز الطبيعي مبقتش زي الأول فمن وجهة نظر (بوتين) دي حاجة مينفعش يتسكت عليها.
المشكلة إن إذا كان سنة 1939 الإقتصاد العالمي مكنش مربوط ببعضه وده عطي لفرصة لألمانيا إنها تدوس علي وش أوروبا فدلوقتي الوضع إختلف .. كونك متعاطف مع مبرر روسيا ده شيء يرجعلك وإنت حر في رأيك بس في نفس الوقت لازم تبقي فاهم إن في عصر الإنترنت والتجارة العالمية اللي إحنا فيه فاللي بيعمله (بوتين) مش بس حيكون له تأثير علي بلده وعلي أوكرانيا إنما علي العالم كله وبما إننا جبنا سيرة الفترة النازية فخليني أستعير واحدة من الحاجات اللي قالها (أدولف هتلر) واللي الحقيقة بتعبر جداً عن اللي بيحصل دلوقتي لما قال إن دخول حرب عامل بالضبط زي لما تفتح باب أوضة ظلمة وتخش فيها .. إنت مش شايف قدامك وبالتالي متعرفش إيه اللي ممكن يحصلك في الظلام الدامس اللي إنت فيه ده وخليني أديلك لمحة بس عن الظلام اللي (هتلر) كان بيتكلم عنه:
- أوكرانيا بلد مش صغيرة .. بلد عايش فيها 44 مليون بني أدم يعني تقريباً تلت تعداد سكان روسيا .. الناس دي صحيح مش أعضاء لا في حلف شمال الأطلنطي ولا الإتحاد الأوروبي بس بقالهم 30 سنة علاقتهم بيهم عمالة تزيد يوم عن يوم .. يكفي إني أقولك إن (هانتر بايدن) إبن الرئيس الأميريكي (جو بايدن) كان رئيس مجلس إدارة شركة أوكرانية .. بمعني أخر .. غالبية أهل أوكرانيا عايز يترمي في حضن الغرب مش روسيا.
- خدامك أنا والعربية إن القوات المسلحة الروسية تعتبر من ضمن الأفضل علي مستوي العالم .. أيوه عارف إن القدرة التدميرية للقوات المسلحة الروسية تقدر تجيب عاليها واطيها في أوكرانيا .. بس هو السؤال هل القوات دي تقدر تهزم ال44 مليون بني أدم اللي عايزين يترموا في حضن الغرب؟ .. هل الجبروت العسكري الأميريكي كان كافي إنه يخضع الشعب الافغاني أو العراقي؟
- زود علي كده نقطة الفلوس .. هل إقتصادك حيقدر يصرف علي حرب بالتكاليف دي؟ مع العلم إن الإقتصاد الروسي كحجم يعتبر أصغر من حجم إقتصاد ولاية أميريكية زي تكساس .. بما إننا بنتكلم عن الإقتصاد ففكر في النقطة دي برده .. سنة 2012 لو جيت تشوف هي أوكرانيا بتصدر لمين حتلاقي إن 25.7% من إجمالي البضايع اللي بتصدرها أوكرانيا بتروح لروسيا قصاد 24.9% بيروحوا لدول الإتحاد الأوروبي .. جري الشريط 6 سنين وبعد إحتلال روسيا لشبه جزيرة القرم تلاقي إن 7.7% بس من صادرات أوكرانيا بقي بيروح لروسيا قصاد 42.6% بيروح للإتحاد الأوروبي .. ده معناه زي ما (هتلر) قال إن كل كيلومتر روسيا بتاخده من أوكرانيا هي حتدفع ثمنه فلوس كتير قدام لإن ساعتها الإتحاد الأوروبي حيقاطع الحتة دي من أوكرانيا اللي بقت تحت سيطرة روسيا.
- طب حط نفسك قصاد الفكرة السودا دي إن بولندا اللي هي تبقي جارة روسيا و هي الكوبري اللي بتوصلها لألمانيا وللإتحاد الأوروبي وعضوة في حلف شمال الأطلنطي وبتستقبل ملايين اللاجئين الأوكرانيين قررت إنها تقفل أبوابها قصاد التجارة الروسية وفيه دول كتير بتضغط علي بولندا إنها تعمل ده .. لو ده حصل فإقتصاد روسيا حيلبس أسود.
وده الحقيقة حيخليني أتكلم شوية عن البدعة اللي منتشرة اليومين دول علي السوشيال ميديا إن الصين واقفة في ظهر روسيا .. اللي عمله (بوتين) إنه بص للصينيين وسألهم سؤال واحد وبسيط: أنتوا معانا ولا مع الناس التانيين؟ .. هنا إنت محتاج تاخد نفس عميق وتفكر كأنك (جي جينبينج Xi Jinping) اللي ماسك الحزب الشيوعي الصيني اللي هو بمعني أخر (بوتين) بتاع الصين:
- الصين وروسيا مش عايزين نفس الحاجة خلي بالك .. الصين عايزة تبقي قوة عظمي تنافس الغرب في التكنولوجيا والتسليح وهي مقتنعة إنها تقدر تحقق ده .. روسيا عايزة تهد المعبد علي اللي فيه .. لو الصين والغرب هما ليفربول ومانشستر سيتي بيلاعبوا بعض في نهائي Champions League فروسيا عايزة تفجر الإستاد باللي جواه.
- الصين بقالها سنين وهي بتحاول تشتغل في جو في الأول كان صعب بس دلوقتي بقت بتعرف تتعامل معاه .. الصين بلد ديكتاتورية بيحكمها حزب واحد متحكم في كل صغيرة وكبيرة قصاد إن الغرب زي ما إنت عارف الدنيا معاه سداح مداح .. دلوقتي روسيا بتحاول تخلق واقع جديد فالصينيين بيقولوا لنفسهم زي ما أي رجل متجوز بس زهق من عيشته إن اللي نعرفه أحسن من اللي منعرفوش.
- من جواه أنا متؤكد إن (جي جينبيج) أمنية حياته يصحي الصبح يلاقي روسيا إحتلت أوكرانيا زي ما هي عايزه .. ليه؟ .. عشان ده حيخليه يبقي عنده السابقة التاريخية اللي تسمحله ياخد تايوان وضع يد بس فيه نقطة أظن مش ناس كتير تعرفها وهي إن أوكرانيا كانت بتدخل للصين فلوس زي الفل .. بناء علي كلام وكالة أنباء رويترز سنة 2019 الصين كانت أكبر شريك تجاري لأوكرانيا .. سنة 2021 حجم التجارة بين البلدين وصلت 18.98 مليار دولار بزيادة وصلت 80% عن حجم التجارة بين أوكرانيا والصين سنة 2013 .. أكتر من 30% من إحتياجات الصين من الذرة بتستوردها من أوكرانيا.
- بلاش دي .. سنة 2020 الصين بقت هي الشريك التجاري الأهم للإتحاد الأوروبي فلو الصين أعلنت قدام الناس إنها في ظهر (بوتين) والغرب فرض عليها نفس العقوبات الإقتصادية اللي إنت بتشوفها دلوقتي بتتوقع علي روسيا فالإقتصاد الصيني حيشيل أوبح .. مش لسبب غير إن شرعية بقاء الحزب الشيوعي في الحكم إنه يفضل محافظ علي معدلات النمو الخزعبلية للإقتصاد بتاعه ولو الصين خسرت البيزنس اللي هي بقالها سنين بتعمله مع أوكرانيا ومع الإتحاد الأوروبي فمش حقولك إن الإقتصاد الصيني حيقع بس علي الأقل حيخلي المواطن الصيني يبص لمرتبه ويبص للأسعار في السوق ويسأل نفسه هو أنا اللي يخليني أصير علي الحزب الشيوعي أكتر من كده؟
الصين مش حتشوفها حتفرض عقوبات علي روسيا زي ما الغرب عمل .. أكتر حاجة حتشوفها منهم إنهم يقولوا والله إحنا مكناش عايزين نشوف ده بيحصل بس صدقني لو قلتلك إن لو فيه دولة في العالم تقدر تقنع روسيا إنها ترجع عن اللي هي بتعمله في أوكرانيا فالدولة دي هي الصين وده حيودينا للسؤال الثالث.
هي الحرب دي بالصلاة علي سيدنا النبي حتخلص علي إيه؟
شوف .. عشان مطولش عليك أنا شايف إن فيه 3 سيناريوهات ممكن الحرب دي تخلص علي واحد فيهم .. السيناريو الأول أنا بسميه سيناريو يا ساتر يا رب .. السيناريو الثاني أنا بسميه لف وإرجع تاني .. السيناريو الثالث أنا بسميه ربك قدر ولطف.
السيناريو الأول .. يا ساتر يا رب:
ده السيناريو اللي إحنا عايشينه لحد دلوقتي إن العقوبات الإقتصادية مش جايبه همها والمقاومة الأوكرانية مش حتمنع (بوتين) إنه يقتل ويدمر أي حد وأي حاجة عشان يوصل للي هو عايزه وهو إنه يمحي من الوجود حاجة إسمها دولة أوكرانيا المستقلة .. ده معناه إن كل ما مقاومة الأوكرانيين حتزيد كل ما عنف الروس حيعلي .. مش بعيد تسمع كمان شوية لو الحرب دي كملت عن قصف جوي لأحياء سكنية .. أرجع تاني وأقولك إن النظام العالمي عمره ما شاف حاجة زي دي قبل كده .. محصلش إن بلد في حجم روسيا بتمتلك واحدة من أقوي القوات المسلحة في العالم وعندها ترسانة نووية تعمل فيها (وائل) في فيلم الناظر صلاح الدين وتضرب زمايلها وهي بتزعق مفيش حد حيتعلم هنا أو بلغة روسيا مفيش حد حينضم للإتحاد الأوروبي هنا .. مع كل يوم الحرب حتستمر فيه حتلاقي نفسك بتقرب أكتر وأكتر إن أوكرانيا تبقي فييتنام أو أفغانستان بتاعة روسيا ودي نقطة محتاجة تتفهم.
الروس مينفعش يخشوا كييف يحطوا حكومة موالية ليهم ويمشوا لإن بمجرد ما يمشوا الحكومة دي الناس حتثور عليها .. إفتكر إن أوكرانيا عايش فيها 44 مليون بني أدم بقالهم 30 سنة بيحلموا باليوم اللي ينضموا فيه للإتحاد الأوروبي .. طب والحل؟ .. لازم روسيا تحتفظ بقوة عسكرية محترمة ممكن توصل 50,000 مقاتل بتسليحهم وأكلهم وشربهم ومتتخيلش إن (بوتين) مش حيقدر يقدم التضحيات دي لإن ده رجل مقتنع بفكرة إسمها العالم الروسي أو Russky-Mir ودي فكرة بتقول بمنتهي البساطة إن اللغة الروسية والهوية الروسية هي الرباط اللي بيربط بين أي إتنين بيتكلموا روسي .. ده معناه إن روسيا وأوكرانيا وكل الدول اللي كانت زمان جزء من الإتحاد السوفيتي هم في الأخر دولة واحدة وشعب واحد .. كل الإشارات بتقول إننا لحد دلوقتي رايحين في السكة دي .. (بوتين) دايس بنزين ومش حيهدي وده يفسرلك الأخبار اللي بتطلع إنه أعلن رفع درجة الإستعداد للقوات النووية بتاعته ولسه حتشوف قرارات تانية من اللي كنت بتعملها وإنت بتلعب Red Alert.
السيناريو الثاني .. لف وإرجع تاني:
السيناريو ده معتمد علي الميكس بتاع إن المقاومة الأوكرانية تخلي تقدم القوات الروسية بقي بيتقاس بالمتر مش بالكيلومتر وإن العقوبات الإقتصادية اللي فرضها الغرب علي روسيا خلتهم مش عارفين يتنفسوا .. لو ده حصل فممكن الروس يقبلوا يخشوا في مفاوضات مع أوكرانيا بحيث مطالب الروس حتبقي إلي حد كبير واضحة .. هم حيوافقوا إنهم يسحبوا كل قواتهم من أوكرانيا بشرط إن أوكرانيا تقبل بإن إقليمي لوهانسك ودونتسك ينضموا لشبه جزيرة القرم ويبقوا جزء من التراب الروسي وكمان أوكرانيا تتعهد بإنها عمرها ما حتنضم لحلف شمال الأطلنطي .. قصاد عدم نزع سلاح القوات المسلحة الأوكرانية فالغرب حيشيل العقوبات الإقتصادية علي روسيا.
مشكلة الحل ده إن محدش حيقبله .. أصل لو (بوتين) قبله فهو كده بيعترف إن قواته المسلحة فشلت في إحتلال أوكرانيا وإنه معرفش يفتح روسيا وأوكرانيا علي بعض ويبقوا شقة واحدة .. ساعتها الناس كلها مش حتقول عليه غير اللي مبيعرفش أهو .. في نفس الوقت التنازلات اللي حتقدمها أوكرانيا حتبقي صعبة أوي .. إنت بتقولهم سيبوا حتة من أرضكوا وتبقوا مجرد طبقة عازلة بين روسيا و NATO بس يمكن أهم نقطة إن معلش يعني هو إزاي الأوكرانيين يثقوا في (بوتين) تاني؟
السيناريو الثالث .. ربك قدر ولطف:
يمكن ده أقل السيناريوهات إحتمالاً إنه يحصل وإن روسيا تعيش ثورة ربيع .. أيوه زي ما سمعت كده .. إن المواطن الروسي يقول لنفسه الرجل ده حيلبسنا كلنا في الحيط ولازم يمشي .. حاول تحط نفسك ولو للحظة مكان مواطن روسي ولنفترض إنه مواطن روسي شايف إن فعلاً من مصلحة بلده إنها تضم أوكرانيا .. لكن وخلي بالك من اللي جاي بعد لكن دي .. إنت شايف بعنيك والعالم كله بيعمل بلوك لروسيا .. إتمنعت إنك تلعب في كاس العالم .. دول الإتحاد الأوروبي كلها قفلت المجال الجوي بتاعها في وشك .. يا مؤمن حتي IKEA اللي معندهمش مشكلة يبيعوا عفش للجن الأزرق قرروا يقفلوا فروعهم عندك .. بعد فترة إنت كمواطن روسي حتقول لنفسك الثمن اللي بيتدفع غالي أوي ويمكن مقدرش عليه كمان.
تاني حاول تغمض عنيك وتحس بالمواطن الروسي لإنك صدقني عشت إنت نفس ظروفه وقت ثورة يناير .. إنت في وقتها إتقطع عنك الإنترنت .. لو تفتكر البنوك قفلت والبنك المركزي خد شوية إجراءات عشان الناس تبطل تسحب فلوسها وده اللي عمله البنك المركزي الروسي إنه رفع سعر الفايدة من 9.5% خلاه 20% عشان يغري الروس يسيبوا فلوسهم في البنوك وميسحبوهاش .. لحد دلوقتي البورصة الروسية قافلة عشان خايفين لو إتفتح التداول البورصة تقع .. ورغم كل الإجراءات دي كلها سعر الروبل اللي هو عملة روسيا خسر 30% من قيمته .. لك أن تتخيل إن الروبل دلوقتي بسنت أميركاني.
يمكن الخطوة متجيش من الشعب وتيجي من جوه الجيش .. يمكن يبقي فيه ناس جوه المؤسسة العسكرية بقت مقتنعة بإن يا (بوتين) يكمل يا روسيا تكمل بس الإتنين مع بعض مينفعش يكملوا سوا .. يمكن دايرة رجال الأعمال اللي حوليه يبصوا لنفسهم ويفهموا حقيقة إن لو (بوتين) نجح إنه يخلي أوكرانيا تركع فالباشوات دول مش حيعرفوا يعتبوا باب أوروبا وأميركا تاني .. الثمن الغالي اللي حيتدفع مش بس حيشيله المواطن الروسي البسيط إنما الشعب كله بكل طبقاته كبير وصغير غني وفقير.
اللي أنا عايز أختم بيه إننا قدام حاجة محصلتش قبل كده في تاريخنا كبني أدمين .. تجربة جديدة ملهاش سابقة تاريخية .. حرب لسنين وسنين فيه طلبة حتحضر فيها ماجستير ودكتوراه .. أو علي رأي دكتور سترينج في فيلم Avengers: Infinity War لما قال .. We are at the Endgame Now.
المصادر:
- مقالة بعنوان This is Putin’s War. But America and NATO Aren’t Innocent Bystanders نشرت في جريدة The New York Times وده لينك المقالة الأصلية:
https://www.nytimes.com/2022/02/21/opinion/putin-ukraine-nato.html - مقالة بعنوان We Have Never Been Here Before نشرت في جريدة The New York Times وده لينك المقالة الأصلية:
https://www.nytimes.com/2022/02/25/opinion/putin-russia-ukraine.html - مقالة بعنوان I See Three Scenarios for How This War Ends نشرت في جريدة The New York Times وده لينك المقالة الأصلية:
https://www.nytimes.com/2022/03/01/opinion/ukraine-russia-putin.html
