عادة مسلسلات الأكشن بتبقي صنعة الأمريكان .. بداية من 24 لحد Daredevil و The Punisher و أخيراً بJack Ryan .. بس إنت إمتي أخر مرة سمعت عن مسلسل بريطاني أكشن كسر الدنيا؟ .. سؤال غبي صح لإن مفيش حد فينا يفتكر إن في حياته كلها إتفرج علي مسلسل بريطاني .. الحقيقة إن قناة BBC أنتجت مسلسل كسر الدنيا إسمه Bodyguard لدرجة إن الحلقة الأخيرة من المسلسل شافها 11 مليون بني أدم علي مستوي العالم و ده رقم محققتوش قناة BBC من سنة 2008.
المسلسل فعلاً حلو و أنصحك إنك تتفرج عليه و هو قصته كلها بتدور حول ضابط شرطة إسمه (ديفيد باد David Budd) شغال حارس خاص لوزيرة الداخلية البريطانية بيجسده الممثل (ريتشارد مادين Richard Madden) اللي يمكن الناس اللي بتحب مسلسل Game of Thrones عارفينه أوي في دور (روب ستارك Rob Stark) .. (ريتشارد مادين) أبدع في الدور الحقيقة لدرجة إنه خد عنه جايزة جولدن جلوب كأحسن ممثل في مسلسل درامي و من ساعتها و الإشاعات نازلة زي المطر إن المنتجين بتوع سلسلة James Bond إتكلموا معاه عشان يكمل هو الشخصية بعد الممثل (دانييل كريج Daniel Craig) اللي حيبقي أخر مرة يجسد فيها شخصية (جيمس بوند James Bond) في الجزء الجديد اللي حينزل السنة الجاية .. اللي أنا حابب أتكلم عنه النهاردة مش هل (ريتشارد مادين) ينفع يبقي (جيمس بوند) أو لا؟ .. اللي حتكلم عنه النهاردة هو إيه اللي ممكن (جيمس بوند) يتعلمه من (ديفيد باد)؟
علي الورق إزاي أصلاً سؤال زي ده يتسأل .. إزاي شخصية إسطورية زي (جيمس بوند) أجيال إتربت عليها عايزها تتعلم حاجة من شخصية ظهرت في مسلسل يدوبك فيه كام مليون واحد شافوه؟ .. إيش جاب لجاب .. أنا فاهم النقطة دي كويس و عشان كده إنت محتاج تفهم قد إيه شخصية (ديفيد باد) دي شخصية عبقرية اللي كتبها إيده تتلف في حرير و لو إنت شاب سيناريست أو نفسك تبقي سيناريست ركز أوي في الكلمتين اللي حقولهم دول .. (ديفيد باد) ده شاب إتخدع زيه زي شباب كتير بإن لازم البريطانيين يروحوا يحاربوا في أفغانستان مع إنها لا هي قضيتهم ولا هي حربهم .. راح و إكتشف إنه إتضحك عليه و شاف زمايله و هم بيموتوا و يتصابوا و يتشوهوا و هو شخصياً إتصاب و جسمه إتشوه .. رجع بلده إشتغل ظابط شرطة و شاف إزاي المسئولين و السياسيين اللي ودوه هو و زمايله يموتوا في أفغانستان و العراق بيترقوا و يمسكوا مناصب كبيرة .. لا و إيه .. بقي مطالب إنه يحمي واحدة منهم ..الناس كلها عارفه إن (ديفيد باد) عنده حاجة إسمها Post-Traumatic Stress Disorder أو PTSD و ده إضطراب نفسي بيتعرض له أي حد عاش مأساة كبيرة و مبقاش عارف يستوعبها ولا يتعايش مع أثارها عليه.
من الحلقة الأولي للمسلسل و إنت بتشوف (ديفيد باد) بيواجه وحش في دماغه هو مش عارف يواجهه ولا عارف يتعامل معاه .. بتشوفه و هو بيرفض كل أنواع المساعدة اللي بتتعرض عليه .. من وجهة نظره أنا راجل جامد زحليقة و أقدر أحل أي حاجة و أنا مش واحدة ست عشان أروح لدكتور أقعد أعيط و أشتكي .. بتفضل حالته تسوء لحد ما في واحد من أكتر مشاهد المسلسل كأبه بتشوفه و هو بيحاول ينتحر .. الدنيا بتشيل و تحط في (ديفيد باد) عشان محرقش أحداث المسلسل في حالة إنك لسه متفرجتش عليه لحد ما في الأخر خالص بتشوفه بيروح يزور دكتور نفسي و بمجرد ما بيفتح بقه يتكلم بيبقي عامل زي الطفل الصغير مش عارف يبطل عياط .. و ده اللي أنا محتاج أتكلم عنه .. هو إنت إمتي أخر مرة شفت (جيمس بوند) كبني أدم بيزعل و بيكتئب و بيعيط؟
لو تفتكر في فيلم Skyfall لما (دانييل كريج) حب يعني يورينا (جيمس بوند) و هو مكتئب يا عيني كان مقضيها شرب خمرة و عقرب علي إيده و حاجات قليلة الأدب مع بنت زي القمر متفهمش جابوها منين علي جزيرة متفهمش فين .. لا و لما حب يرجع للخدمة حطوه في شوية إختبارات نفسية فشل فيها كلها و رغم كده برده رجع للميدان تاني ولا كأن الرجل ده نفسياً مش متزن و لازم يتعالج .. محدش قال إننا نفضل نتفرج علي (جيمس بوند) و هو قاعد علي الشازلونج عمال يعيط بس علي الأقل نشوفه بيتكلم عن اللي هو حاسه .. اللي بنشوفه إن (جيمس بوند) أرجل من إنه يعيط و أرجل من إنه يتعالج نفسياً .. الدكاترة النفسيين دول للعيال التوتو إنما (جيمس بوند) بيطلع شظايا الطلقة من كتفه بملقاط و سكينة.
أخر مرة شفنا فيها (جيمس بوند) كبني أدم طبيعي كان في فيلم On Her Majesty’s Secret Service اللي إتعرض سنة 1969 .. في الفيلم ده اللي جسد شخصية (جيمس بوند) كان (جورج لازينبي George Lazenby) و اللي شفناه بيعيط بعد إغتيال مراته (ترايسي Tracey) و دي كانت المرة الأولي و الأخيرة اللي نشوف (جيمس بوند) بيعيط .. وقتها يا عيني محدش كان قادر يستوعب اللي حصل .. الناس كرهت الفيلم و لحد النهاردة يعتبر من أفشل الأجزاء اللي إتعملت في تاريخ السلسلة .. النقاد هروا الفيلم تهزيق .. و دي كانت أول و أخر مرة (جورج لازينبي) يجسد الشخصية .. كل ده ليه؟ .. عشان زي ما قلتلك العياط ده للعيال التوتو .. (جيمس بوند) أسد يلا في إيه؟
ده حيرجعنا تاني لمسلسل Bodyguard .. المسلسل ده ورانا إننا نقدر نتفرج علي عمل فني البطل بتاعه ممثل شكله حلو بيعرف يضرب و طايح تلطيش في خلق الله و في نفس الوقت بيعاني زينا و بيزعل زينا و بيعيط زينا .. بإختصار بني أدم زيه زينا .. محدش قال إن (جيمس بوند) يبطل ينط من مبني بيقع و في الأخر بدلته متتوسخش بس في نفس الوقت أنا محتاج أحس إن اللي أنا بتفرج عليه ده بني أدم له مشاعر حتي لو كان لابس بدلة ثمنها قد مرتبي في سنة.
المصدر:
مقالة بعنوان The lessons James Bond should learn from ‘Bodyguard’ .. الدروس اللي لازم سلسلة (جيمس بوند) تتعلمها من مسلسل Bodyguard .. نشرت في مجلة Esquire و ده لينك المقالة الأصلية:
https://www.esquire.com/uk/culture/tv/a23449068/the-lesson-james-bond-should-learn-from-bodyguard/
