لينك التسجيل الصوتي للمقالة علي Sound Cloud:
https://soundcloud.com/user-112011687-312727988/viking-m4a
الفايكينج دول أكتر شعوب الأرض اللي تقف قدامهم و تضرب كف علي كف .. دي حضارة مش زي حضارة المصريين القدماء كده مفضلوش طول حياتهم قاعدين في حتة واحدة جنب نهر وعمالين يتجوزوا و يخلفوا و يبنوا في معابد .. الفايكينج دول ناس كانوا عايشين في حتة في شمال أوروبا اللي انت دلوقتي عارفها بإسم الدول الإسكندنافية اللي هي الدانمرك و النرويج و السويد و فنلندا و أيسلندا .. خلال 300 سنة كانوا خدوا الدنيا دي كعب داير .. خلال 300 سنة كانوا عملوا علاقات إقتصادية مع الدولة البيزنطية .. خلال 300 سنة كانوا بنوا مدينة دبلن اللي هي دلوقتي عاصمة أيرلندا .. عملوا دولة ليهم في فرنسا .. كان ليهم مملكة في إنجلترا .. وكانوا هم السبب إن روسيا بقي إسمها روسيا .. خلال 300 سنة كان بقي ليهم مستعمرات في أيسلندا و جرينلاند و أميركا الشمالية.
كل ده من غير ما يبقوا متوحدين ورا حد .. ودي أغرب حقيقة وأهم معلومة لازم تبقي في دماغك .. الفايكينج مكنش عندهم حاجة إسمها إمبراطور أو فرعون أو كسري أو أمير المؤمنين .. فكرة الحاكم اللي بيوحد كل شعوب الدول الإسكندنافية ده مش موجود عندهم .. الناس دي حققت كل ده وكان كل شعب ماشي بدماغه .. اللي ححاول أشرحه في مقالة دي بشيء من التفصيل هي محاولة فهم لإزاي الفايكينج صحيوا الصبح قرروا إن جه الوقت يركبوا المراكب بتاعتهم و يروحوا يبلطجوا علي خلق الله و يسرقوهم؟ .. مجرد إنك تفهم ده لازم يبدأ باني أخدك من إيدك و أوريك هو يعني إيه فايكينج؟ .. مين دول؟ .. عايشين إزاي؟ .. و إيه اللي خلاهم يفكروا يطلعوا بره بلدهم؟
معلومة رقم واحد .. الفايكينج بيعشقوا حاجة إسمها بحر:
علاقة الفايكينج بالبحر هي زي علاقة المصريين بالأكل .. زي ما إحنا كمصريين حياتنا كلها أكل فحياة الفايكينج كلها بحر .. بيوتهم من الخشب و سقفها هو عبارة عن جسم سفينة مقلوبة .. لو أي إتنين متجوزين خلفوا طفل فسرير الطفل بيكون من الخشب و برده معمول علي شكل مركب .. لما الطفل بيكبر و بيبقي عنده 13 سنة بيكون مؤهل إنه يبقي فاهم يعني إيه ملاحة بحرية؟ و يعني إيه قراية النجوم؟ و يعني إيه شراع؟ و يعني إيه مباديء تصميم السفن؟ .. مجرد بصة للطبيعة الجغرافية للدول الإسكندنافية و حتفهم إن الناس دي كان لازم تتعلم يعني إيه بحر؟ .. لنفترض إنك إتولدت في قرية علي ساحل النرويج .. حتلاقي علي إيدك الشمال بحر الشمال و علي إيدك اليمين الجبال اللي بتفصل بين النرويج و السويد اللي هم بيسموها الكيل .. مفيش حاجة قدامك غير البحر.
نرجع تاني لمثال الشاب اللي بقي عنده 13 سنة و إتولد في قرية علي ساحل النرويج علي بحر الشمال .. وانت صغير انت مامتك كانت شغالة في الأرض الزراعية اللي عندكوا فانت من صغرك واخد علي الشقا .. المجتمع الإسكندنافي مجتمع بيعشق الرياضة .. انت إتعلمت مصارعة و بوكس .. كل صيف القرية بتاعتك بتنظم مسابقة جري مسافات طويلة .. مينفعش تتولد هناك و متبقاش عارف إزاي تعوم .. حتي تعليمك مش وحش برده .. انت بتتعلم تعزف علي ألة موسيقية لإن مينفعش تبقي من الفايكينج و مبتعرفش لا تغني ولا تقول شعر ولا تعزف .. في الشتاء القرية كلها بتفضل قاعده في بيوتها في الدفا .. بيتعلم إزاي يفضل قاعد بالشهور في بيت مقفول مع ناس من سنه من غير ما كل شوية يتعاركوا مع بعض .. لما بيبقي عندك 13 سنة بتكون عارف كويس إزاي تبني مركب من الصفر؟ .. إيه نوع الخشب المناسب؟ .. إيه زوايا تركيب الخشب؟ .. هو علم مش مكتوب .. الطفل مش بيدوله منهج كيف تبني مركب للمبتدئين .. العلم ده أغلبه بيتعلمه من ناس حافظاه و هو ذات نفسه بيحفظه بس مش بيسجله في كتب لإن الفايكينج مبيعرفوش لا يقروا ولا يكتبوا .. بإختصار لو انت اتسبت مع شلة صحابك في جزيرة مقطوعة زي فيلم Cast Away كده فانتوا تقدروا إنكوا تبنوا مركب و ترجعوا بيها بلدكوا.
جاهز تتصدم؟ .. كلمة فايكينج Viking دي مش إسم .. ده فعل .. فايكينج معناه إنك تغير يعني تنفذ غارة علي حد أو to Raid بالإنجليزي .. الفاعل أو اللي بيقوم بالإغارة إسمه فايكينجر Vikinger يعني Raider بالإنجليزي .. ده معناه إن مش كل الإسكندافيين ينفع يتقال عليهم فايكينجر .. الفايكينجر ده الشخص اللي بيركب مركب و معاه سيف ورايح ينهب و يسرق .. اللي بيسافر علي مركب بنية التجارة مينفعش تقول عليه فايكينجر .. مش بس ده الفرق الوحيد .. الفايكينجر اللي بيسافروا بنيه النهب و الإغارة بيكونوا راكبين سفن بيتقال عليها Long Ships أو السفن الطويلة .. الإسكندنافيين اللي بيسافروا بنية التجارة بيركبوا مراكب صغيرة إسمها كنار Knarr .. حتي الكنار دي تعتبر معجزة هندسية برده في بناء السفن .. هي صحيح مركب إتعملت للتجارة بس مبنيه من أدوار و بتقدر تشيل بضايع وزنها 30-40 طن .. كمان الغاطس بتاعها بعمق 1.5 متر فده معناه إنها تقدر تمشي في المياه الضحلة زي الترع .. لو الكنار دي ماشية في بحر و الريح مساعدة فممكن تجري بسرعة 7.5 كيلومتر في الساعة .. لو متخيل إن ده رقم حلو فالسفن الطويلة اللي الفايكينجر بيركبوها بتوصل سرعتها 22 كيلومتر في الساعة.
الفايكينج مكانوش شعوب غنية .. صحيح التجارة بتجيب فلوس حلوة بس كمان البحر بيخسرك فلوس .. المركب بفلوس .. تصليحها بفلوس .. متضمنش انك وانت راجع تتسرق انت شخصياً أو المركب بتاعتك تغرق .. فوق ده كله إن المجتمع الإسكندنافي كان غريب جداً في موضوع الجواز و الطلاق .. الرجل يتجوز مرة واحدة و لو طلق مراته تاخد نص ثروته .. حياة الفايكينج سواء بتتكلم عن بني أدم شريف بياكل من عرق جبينه بما يرضي الله و شغال في التجارة أو راجل ماشي في السكة البطالة بتاعة النهب و السرقة فالإتنين حياتهم مش مستقرة .. انت بتفضل بالشهور و أحياناً بالسنين بعيد عن بيتك و مراتك .. ده كان السبب إن معدلات الطلاق في المجتمع الإسكندنافي كانت عالية جداً .. كل ست تتطلق تاخد نص ثروة جوزها .. ده كان السبب إن فعلياً ده مجتمع مكنش غني زي ما انت متخيل.
معلومة رقم إتنين .. محدش عارف بالضبط هو ليه الفايكينج قرروا يطلعوا بره بلدهم؟
دي من أكتر الحاجات اللي محدش عارف سببها .. فيه نظريات بس محدش معاه إجابة .. ناس تقولك إن بسبب الزيادة السكانية و التقلبات المناخية فالأكل و الموارد بدأت تقل لدرجة إن الفايكينج يقولوا لنفسهم أرض الله واسعه .. ناس تانيه تقولك إن كل شوية يطلع مثلاً في الدانمرك ملك يطرد كل معارضيه بره البلد فالمعارضين دول مش لاقيين حتة يروحوها فبرده يقولوا لنفسهم طب ما أرض الله واسعة .. ناس تالتة تقولك إن المشكلة كلها في التوقيت لإن الوقت اللي الفايكينج قرروا يطلعوا فيه بره بلدهم كان نفس الوقت اللي ممالك أوروبا بدأت تلغي نظام المقايضة و بدأت تمشي بنظام العملات الذهبية و الفضية .. ده معناه إن بلد زي فرنسا مثلاً لما يسرقوها فهم مش بس حيسرقوا أكل و مواشي إنما كمان حيسرقوا ذهب و فضة.
ممكن ميبقاش سبب واحد إنما الأسباب كلها حصلت مع بعضها .. الله أعلم .. بس اللي إحنا متؤكدين منه إن شعوب الفايكينج قرروا في يوم إنهم صحيوا الصبح و قالوا يلا نروح نسرق و ننهب دول أوروبا .. أول تجربة ناجحة للفايكينج إنهم يبنوا مستعمرة بره بلدهم كانت سنة 837 لما واحد نرويجي إسمه (ثورجاست Thorgast) والفايكينج بيحبوا يسموه ملك البحر The Sea King إستولي علي أيرلندا .. سيطرة الفايكينج علي أيرلندا محصلتش من يوم و ليلة .. صحيح زي ما قلتلك إن الغزو بدأ سنة 837 بس الحكاية بدأت سنة 830 لما الفايكينج إكتشفوا أيرلندا و بدأوا الأول ينهبوها علي طريقة إسرق و إجري .. أيرلندا كانت أول حضارة يشوفها الفايكينج .. كانوا أول مرة يشوفوا ناس بتبيع و تشتري بالفلوس مش بالمقايضة .. كانوا أول مرة يشوفوا مجتمع فيه حدادين و صنايعية بيشتغلوا في الذهب و الفضة .. الأديرة المسيحية الأيرلندية كانت مراكز قوة سياسية وده خلاها تدوس جامد في إنتاج الكتب و إعادة انتاج الكتب .. من أول كتب شرح الدين المسيحي لحد كتب المنطق و الرياضيات بتاعة الإغريق و المسلمين .. الرهبان الأيرلنديين اللي قضوا حياتهم كلها بيكتبوا الكتب دي كانوا بيغلفوها بالذهب و يرصعوها بالأحجار الكريمة مش لسبب غير إنهم حاسين إن الكتب دي هي ثروة أيرلندا الحقيقية .. كل ده إتغير مع غارات الفايكينج .. الفايكينج كانوا يخشوا دير ينهبوه و يلاقوا الكتب دي يقطعوا ورقها و ياخدوا الغلاف المعمول من الذهب .. شوية والفايكينج إكتشفوا إن الأيرلنديين الكتب دي عندهم غالية أوي .. انت ممكن تلاقي أسقف دير بيعرض علي الفايكينج اللي بينهبوا الدير إنهم ياخدوا الفلوس اللي فيه بس يسيبوا الكتب و ميسرقوهاش .. شوية و الفايكينج بقوا ينهبوا الأديرة مش عشان حاجة غير إنهم يخطفوا الرهبان اللي بتكتب الكتب و يسرقوا الكتب و يطلبوا فدية عشان يرجعوهم.
وقتها أيرلندا كانت بتعيش حرب أهلية .. (ثورجاست) ومعاه أسطول من 120 سفينة من السفن الطويلة أو Long Ships وفي سنتين كان إستولي علي أيرلندا .. مسابش دير ولا كنيسة إلا وكان نهبها .. مفيش كتاب في أيرلندا كلها إلا و إتحرق .. (ثورجاست) فعلياً لوحده رجع أيرلندا بالزمن للعصر الحجري لما دمر كل ما له علاقة بتاريخهم و ثقافتهم .. ياريته وقف لحد كده إنما ده أعلن نفسه إله و بدل ما المسيحيين الأيرلنديين بيدفعوا تبرعات للكنيسة تقرباً لله فخلاهم يدفعوله هو الفلوس علي أساس إنه بقي إلههم الجديد.
(ثورجاست) كان النسخة الإسكندنافية من فرعون سيدنا (موسي) عليه السلام لما قال للمصريين انا ربكم الأعلي .. في كل حضارة و كل ثقافة علي إختلاف أنواعها و لغاتها دايماً حتلاقي حد زي فرعون سيدنا (موسي) عليه السلام .. سنة 841 (ثورجاست) بيأسس مدينة دبلن عشان تبقي عاصمة مملكته في أيرلندا .. التجار الإسكندنافيين كانوا بيعملوا فلوس حلوة أوي إنهم يبيعوا العبيد الأيرلنديين لمملكة قرطبة الإسبانية في الأندلس .. التجار بياخدوا الذهب و الفضة من إسبانيا و يروحوا يشتروا بيها بضايع في ألمانيا و فرنسا .. فكرة إن سفن الكنار بتقدر تبحر في الأنهار و لإن أغلب مدن أوروبا الكبيرة إتبنت علي أنهار فده خلي التجارة فعلاً أساس الحياة بالنسبة للفايكينج.
فعلياً رغم إن الفايكينج مش حاجة واحدة .. هم فيهم السويدين و النرويجين و الدانمركيين بس أمة محمد كلها شايفينهم حاجة واحدة .. الأيرلنديين بيعتبروهم محتلين أجانب .. الفرنساويين بيسموهم North Men أو أهل الشمال وفي قول أخر النرويجيين لإن النرويج Norway معناها أرض الشمال فالفرنساويين بقدرة قادر شافوا الفايكينج كلهم علي إنهم نرويجين بس .. الإنجليز كانوا بيقولوا عليهم الدانمركيين Danes .. زي ما قلت الفايكينج مش حاجة واحدة و أحياناً كتير بيمسكوا في خناق بعض .. النرويجيين دايماً يتعاركوا مع الدانمركيين .. السويديين عشان مسيطرين علي التجارة مع شرق أوروبا فهم مش عايزين حد يقرب من أكل عيشهم.
عشان تفهم الفايكينج و توسعاتهم كويس انت محتاج تفصل كويس بين تجربتين .. التجربة الأولانية هي وجود الفايكينج في أيرلندا و إنجلترا .. التجربة الثانية هي وجود الفايكينج في فرنسا .. تجربتين عكس بعض بشكل انت لا تتخيله .. هم صحيح في الأخر حيبقوا حاجة واحدة زي ما حنشوف بس اللي عمله الفايكينج في أيرلندا ده حماده و اللي عمله الفايكينج في فرنسا ده حماده تاني خالص .. الأحداث الي حد كبير مشيت مع بعضها في نفس التوقيت عشان كده انا حقف قدام كذا موقف علي حسب الترتيب الزمني للأحداث بس حتلاقي الأحداث دي بتنط شوية في فرنسا و شوية نروح أيرلندا.
معلومة رقم تلاتة .. (راجنار لوثبروك Ragnar Lothbrok) كان بني أدم مهم أوي أوي بالنسبة للفايكينج:
البداية كانت مع واحد إسمه (شارلمان Charlemagne) .. انا جبت سيرته لما إتكلمت عن معركة بلاط الشهداء .. الرجل ده بقدرة قادر عرف يعمل مملكة إمتدت من نص إيطاليا لحد فرنسا و ألمانيا .. المملكة دي إتعرفت بعد كده بإسم الإمبراطورية الرومانية المقدسة Holy Roman Empire .. بداية إن العلاقة بين الفايكينج و أوروبا تخش في سكة الحروب و الدم و النهب و السرقة كانت سنة 804 .. دي السنة اللي ألمانيا بقت تحت حكم (شارلمان) .. ده معناه إن مملكة (شارلمان) بقت ليها حدود مشتركة مع مملكة الدانمرك .. في الأول إتمضت إتفاقية سلام و ترسيم حدود .. في الأول الناس إفتكرت إن الدنيا حتهدي لحد ما إتعرف إن (شارلمان) شغال علي إنشاء أسطول بحري .. الدانمركيين خدوا المعلومة دي علي إنها إعلان حرب .. هو (شارلمان) أكيد يعني مش حيعمل أسطول عشان يصطاد سمك .. ملك الدانمرك خد أسطول من 200 سفينة و شن هجوم مفاجيء علي سواحل فرنسا .. (شارلمان) رد هو كمان بغارة علي سواحل الدانمرك .. الإمبراطوريه الرومانية المقدسة و الدانمرك كانوا رافعين المطاوي علي بعض لحد ما فجأة وبدون أي مقدمات (شارلمان) و ملك الدانمرك ماتوا في نفس السنة.
كان المفروض الموضوع يهدي و ترجع العلاقات لطبيعتها لولا حاجة واحدة .. إبن (شارلمان) .. (لويس) إبن (شارلمان) اللي إستلم الحكم بعد موت أبوه قرر إنه يعدم إبن أخته اللي ثار ضده علي أمل إنه يسيطر علي الحكم .. ده خلي (لويس) يدخل في حالة إكتئاب حاد خلته فعلياً مبيحكمش البلد إنما عايش في حالة تأنيب ضمير .. في أواخر أيامه (لويس) قرر إنه يقسم مملكته بين عياله الثلاثة وده كان من أسوأ القرارات اللي إتاخدت في تاريخ أوروبا .. العيال الثلاثة مسكوا في خناق بعض بس مش دي المشكلة .. المشكلة إنهم بقوا يأجروا الفايكينج عشان يخزوقوا بعض .. شوية بشوية و الفايكينج بقوا عارفين الطبيعة الجغرافية لفرنسا و ألمانيا يمكن أكتر من الفرنساويين و الألمان نفسهم.
سنة 845 لما الفايكينجر الدانمركيين اللي تحت قيادة (راجنار لوثبروك) نهبوا العاصمة الفرنسية باريس كانت نقلة نوعية في العلاقة بين الفايكينج و بين أوروبا .. ليه ده كان مهم؟ .. لما ملك فرنسا (تشارلز الأقرع Charles the Bald) وأيوه هو إسمه كده مش بتريق و ده كان واحد من عيال (لويس) مبقاش عارف يعمل إيه عشان يطلع (راجنار) بره عاصمته عرض عليه إنه يديله 2700 كيلوجرام من الذهب كرشوة عشان يمشي و يرجع مطرح ما راح .. دي كانت أول مرة تحصل حاجة زي كده و اللي بقي إسمها داين- جيلد Danegeld أو رهن الدانمركيين لإن (راجنار) كان دانمركي .. اللي عمله (راجنار لوثبروك) إنه فتح باب جهنم علي أوروبا .. (راجنار) قال للفايكينج لو عايزين فلوس كتير كل اللي عليكوا تعملوه تنقوا مدينة في فرنسا و سيطروا عليها و أنهبوها لحد ما ملك فرنسا يعرض عليكوا فدية عشان تمشوا .. 40 سنة من النهب .. شوية بشوية و المدن الساحلية الفرنسية و الألمانية بدأ سكانها يسيبوها و يمشوا .. خلال العشر سنين من 860 لحد 870 الفايكينج نهبوا باريس 3 مرات .. سنة 880 الفايكينج نهبوا مدينة أخن اللي كانت عاصمة إمبراطورية (شارلمان) وعشان يمشوا منها الملك (تشارلز التخين Charles the Fat) و أيوه أقسملك بالله ده إسمه الحقيقي و برده واحد من عيال (لويس) إضطر يدفعلهم فلوس عشان يمشوا.
مع الوقت أبواب فرنسا بدأت تقفل في وش (راجنار) و الفلوس مبقتش تجري في إيده زي الأول وده في الوقت اللي كانت الدنيا ماشية زي الزبادي خلاط مع (ثورجاست) .. الفايكينج الدانمركيين اللي كانوا تحت قيادة (راجنار) سابوه و بدأوا يروحوا أيرلندا عشان سمعوا إن فيها فلوس وده لوحده حاجة غريبة .. زي ما قلتلك إن (ثورجاست) نرويجي بس (راجنار) دانمركي لكن (ثورجاست) كان من الناس اللي عندها القدرة إنه يقود تحالف من الفايكينج لإن حلم (ثورجاست) كان مختلف شوية عن حلم (راجنار) .. (ثورجاست) تفكيره أكبر من الغيرة بين النرويجين و الدانمركيين .. حلم (ثورجاست) إن أيرلندا تبقي ولاية إسكندنافية بس يمكن اللي هو مكنش عامل حسابه هو المقاومة .. إزاي شعب لما بيتحط في موقف إن كل ثقافته و كل مبادئه بتتاخد منه ممكن يعمل المستحيل عشان يحمي مستقبل عياله .. الأيرلنديين إتوحدوا بعد ما كانوا مش طايقين بعض ضد عدوهم المشترك .. (ثورجاست) .. ثورة ولعت بشكل مفاجيء خلت الفايكينج نفسهم يجروا زي العيال الصغيرة للبحر .. (ثورجاست) إتقبض عليه و أعدم بطريقة غريبة أوي إنه إتكتف من رجليه و ربطوه بحجر تقيل و رموه في المياه.
لا الأيرلنديين ولا الفايكينج سألوا نفسهم أهم سؤال لازم تسأله لما تقرر تعمل ثورة .. حنعمل إيه لما ننجح؟ .. ده السؤال اللي ثورة يناير مسألتوش لنفسها و بالتالي الثورة فشلت .. ده نفس السؤال اللي الأيرلنديين مسألوهوش لنفسهم و بالتالي برده ثورتهم فشلت .. حتي الفايكينج .. (ثورجاست) قدر إنه يقنع رجالته النرويجيين و رجاله (راجنار) الدانمركيين اللي جم يحاربوا معاه إنهم يشتغلوا مع بعض .. بس بعد موت (ثورجاست) مين حيحافظ علي الوحدة دي؟ .. بمجرد موته الحرب الأهلية بين الفايكينج ولعت .. النرويجيين تحت قيادة (أولاف الأبيض Olaf the White) أو النسخة الفايكينج من (إبراهيم الأبيض) .. الدانمركيين تحت قيادة (إيفار اللي مفيهوش عظم Ivar the Boneless) إبن (راجنار لوثبروك) شخصياً .. حرب أهلية لسنين محدش كسبها لحد ما أخيراً (إيفار) و (أولاف) قعدوا مع بعض .. الحقيقة اللي كانت واضحة قدامهم زي الشمس إن مفيش حد فيهم حيقدر يخلص من الثاني .. حربهم اللي ملهاش أي لازمة دي بتكلفهم ثروة ممكن يستفيدوا بيها من أيرلندا .. و بعدين غير أيرلندا فيه إنجلترا .. إحنا ممكن نتوحد و نقسم إيرلندا و إنجلترا بينا.
كلاكيت تاني مرة .. يمكن عشان الفايكينج مكنش ليهم ريس و مكنش ليهم قائد كلمته تمشي علي الكل فكل واحد مشي بدماغه .. (أولاف الأبيض) خد رجالته و طلع علي أسكتلندا في شمال إنجلترا .. (إيفار) خد رجالته و طلع علي يورك في وسط إنجلترا .. طبعاً واضح إن فيه مشكلة و المشكلة دي هي أومال مين اللي حيقعد في أيرلندا؟ .. شوية بشوية و الفايكينج بطلوا يروحوا أيرلندا .. أيرلندا بقت الزوجة الأولانية اللي خلاص الفايكينج زهقوا منها .. سنة 980 بعد هزيمة ملك الفايكينج في أيرلندا (أولاف الأحمر Olaf the Red) مبقاش للفايكينج أي وجود في أيرلندا بإستثناء دبلن .. سنة 1014 وجود الفايكينج في أيرلندا إنتهي علي إيد ملك أيرلندي إسمه (برايان بورو Brian Boru) .. حلم (ثورجاست) بإنه يحول أيرلندا لولاية للفايكينج خلص علي مفيش .. الأيرلنديين عملوا اللي يقدروا عليه عشان يمحوا اي أثر للفايكينج علي بلدهم .. ده انت ممكن تشوفه بنفسك لما تعرف إن رمز دولة أيرلندا هو ألة موسيقية إسمها الهارب وهم إختاروا الرمز ده لمجرد إن دي الألة الموسيقية المفضلة للملك (برايان بورو) اللي زي ما قلتلك هو اللي طرد الفايكينج من أيرلندا.
معلومة رقم أربعة .. نهاية الفايكينج كانت علي إيد واحد منهم:
إذا كان (راجنار لوثبروك) يعتبر شخصية مهمة في تاريخ الفايكينج ففيه شخصية تانية عايزين نقف قدامها وهي (رولف Rolf) .. (رولف) ده كان رجل ضخم حبتين .. ضخم لدرجة إنه مكنش ينفع يركب حصان وعشان كده إتسمي اللي بيمشي The Walker .. علي فكرة إحتمال تلاقي كتب غربية كتير مسمياه (رولو Rollo) فالإسمين صح سواء (رولف) أو (رولو) .. سنة 885 الرجل ده كان بيقود حملة لنهب باريس بس الحملة باظت منه .. لما الملك (تشارلز التخين) عرض عليه برده Danegeld عشان يمشي و يسيب باريس ف(رولف) قبل .. 26 سنة و (رولف) و رجالته مسابوش حتة في فرنسا مسرقوهاش .. ده في الوقت اللي ملك فرنسا (تشارلز البسيط Charles the Simple) اللي جه بعد (تشارلز التخين) كان بيفكر في حل لمشكلة الفايكينج و اللي كانت الحقيقة مشكلة معقدة فعلاً .. دلوقتي فكرة Danegeld دي مش نافعة .. أولاً هي بتطمع الفايكينج أكتر و إستنفذت ميزانية البلد .. ثانياً أهل المملكة بقوا بيروحوا للأمراء إنهم يحموهم مش الملك .. طب إيه اللي يمنع أمير من الأمراء دول إنه يعلن نفسه ملك و ساعتها الناس حتقف وراه؟ .. ثالثاً وده المهم إن مفيش فرصة لأي جيش نظامي إنه يوقف الفايكينج دول عند حدهم .. دي ناس ماشية بمبدأ إضرب و إجري .. طب إيه الحل؟
الحل اللي وصله (تشارلز البسيط) هو يجري حاجه لو عرضت علي (رولف) عرض زي ما طيب الذكر (دون كورليون) في فيلم The Godfather كان دايماً بيقول عرض مينفعش يترفض؟ .. لو (رولف) وافق إنه أولاً يعتنق المسيحية .. ثانياً يحافظ علي حالة السلام مع فرنسا .. ثالثاً يقف جنب ملك فرنسا في حالة دخوله أي حرب .. لو الشروط دي كلها إتحققت ف(تشارلز البسيط) حيدي (رولف) حتة أرض في شمال فرنسا .. (رولف) وافق .. علي فكرة الحل ده إتجرب قبل كده و فشل .. ملوك كتير سواء من فرنسا أو ألمانيا عرضوا علي حد من الفايكينج إنه يبطل نهب في مقابل إنهم يدوله حتة أرض يقعد فيها بس كان دايماً الحل ده بيفشل لإنهم بيختاروا الشخص الغلط .. في 26 سنة اللي (رولف) قضاها في فرنسا هو أولاً كبر في السن و بقي عنده فوق الخمسين سنة و ثانياً بقي غني ومش محتاج فلوس .. هو محتاج يعمل حاجة الناس تفتكره بيها .. و إيه حيكون أكبر من إنك تبني مملكة للفايكينج في فرنسا؟ .. ده يوريك إن أحياناً أفكار حلوة جداً بتبوظ مش لسبب غير إنك بتختار الشخص الغلط إنه يطبقها.
فاكر لما قلتلك إن الفرنساويين كانوا بيقولوا علي الفايكينج North Men أو أهل النرويج؟ .. أهو الحتة اللي خدوها من فرنسا إتسمت نورماندي Normandy يعني الأرض اللي بقت تحت إيد أهل النرويج .. (رولف) كان عكس كل حاجة (راجنار لوثبروك) مؤمن بيها .. إذا كان (راجنار) عايز فلوس ف(رولف) عايز مُللك .. إذا كان (راجنار) شخص وثني بكل ما تحمله الكلمة من معني لدرجة إنه لما دخل باريس ضحي بحياة مواطن فرنساوي في كنيسة كقربان للإله أودين ف(رولف) إتجوز واحدة مسيحية مش لسبب غير إنه ميزعلش حد .. (رولف) كان عارف إن الحكم جزء مهم منه المظاهر .. هو مكنش عايز يزعل منه المسيحين الفرنساويين فقبل ما يموت تبرع بجزء من ثروته للكنيسة الكاثوليكية .. و عشان ميزعلش الفايكينج قبل ما يموت برده ضحي بحياة 100 أسير كقربان للإله أودين .. خلال خمسين سنة كان إقليم نورماندي كله إعتنق المسيحية .. مملكة مستقلة للفايكينج في فرنسا بس علي علاقات كويسة معاها .. أحفاد و أحفاد أحفاد (رولف) هم اللي غزوا إيطاليا و أسسوا مدينة باليرمو .. هم أول ناس يشاركوا في الحملات الصليبية .. مملكة القدس اللي إتعملت في فلسطين و اللي (صلاح الدين) الله يرحمه حاربها أسسها ناس من نورماندي و أحفاد (رولف) .. سنة 1066 واحد من أحفاده (وليام الغازي William the Conqueror) بيغزوا إنجلترا .. طب خد دي .. عارف الملكة (إليزابيث) ملكة إنجلترا؟ أهي تبقي حفيدة (رولف).
علاقة الإسلام بالفايكينج تقريباً إنحصرت في قصة واحدة وهي قصة (أحمد بن فضلان) ودي القصة اللي إتحكت في رواية مشهورة أوي إسمها Eaters of the Dead و إتحولت لفيلم إسمه The 13th Warrior كان من بطولة (أنتونيو بانديراس) و (عمر الشريف) الله يرحمه .. القصة دي بدأت سنة 921 لما حاكم الحتة اللي إحنا عارفينها دلوقتي بإسم بلغاريا بعت رسوله لخليفة الدولة العباسية في بغداد عشان يطلب منه مساعدات عسكرية و مالية في مقابل إن أهل بلغاريا يعتنقوا الإسلام .. الخليفة وافق و بعت مع رسول حاكم بلغاريا واحد من فقهاء الدين الإسلامي عشان يبقي دوره إنه يعلم البلغاريين يعني إيه إسلام و الفقيه ده كان (أحمد بن فضلان) .. (أحمد) زي ما إتعلم من صغره كان بيكتب كل صغيرة و كبيرة عن ثقافة و حضارة الشعوب اللي أي مسلم بيروح يزورها .. بياكلوا إيه؟ .. بيتكلموا إزاي؟ .. بيتجوزوا إزاي؟ .. بيحكموا إزاي؟ .. (أحمد) كتب كل حاجة عن أهل بلغاريا لحد ما في يوم لقي إن فيه ناس راكبين سفن غريبة شوية .. سفن طويلة (اللي هي Long Ships) علي مقدمتها فيه تمثال من الخشب لتنين .. ناس كانت ماشية في نهر الفولجا اللي قاسم أوروبا نصين و جم بلغاريا عشان يتاجروا .. لما (أحمد) سأل مين دول؟ كانت الإجابة إن دول يبقوا الروس .. بااااااس أقفلي هنا بقي شوية.
في قصة الفايكينج إحنا إتكلمنا عن النرويجيين و الدانمركيين بس مجبناش سيره السويديين .. إحنا قلنا إن السويديين كانوا مسيطرين علي التجارة مع دول شرق أوروبا ومكانوش عايزين حد يقطع أكل عيشهم .. السويديين الأول خدوا الحتة اللي دلوقتي إسمها فنلندا .. شوية و نطوا علي لاتفيا و ليثوانيا .. في كل مرة السويديين بيخشوا أكتر جوه أوروبا كانوا بياخدوا معاهم مترجمين فنلنديين .. الفنلنديين عارفين اللغة السويدي و كمان عارفين شوية لغات من جوه أوروبا فكانوا دايماً لما بيعرفوا أي حد سويدي بأي حد من شرق أوروبا بيسموهم بالإسم اللي الفنلنديين عارفين بيه السويديين .. الروس Rus .. الإسم لزق في السويديين .. سنين و السويديين بيتوسعوا و بينتشروا في كل حتة في شرق أوروبا و محدش عارفهم لا بإسم الفايكينج ولا بإسم السويد .. الناس كلها عارفاهم بإسم الروس.
الفايكينج السويديين أو الروس مكانوش ناس غريبة علي البلغاريين بس بالنسبة ل(أحمد) هو كان أول مره يشوف حد كده .. عشان تفهم اللي هو كتبه عنهم حاول تتخيل إن كل الروس اللي (أحمد) شافهم كانوا نسخ من شخصية (ثور Thor) اللي انت شفتها في سلسلة أفلام Avengers .. ناس طول بعرض بسم الله ما شاء الله حيطة ماشية .. كلهم تقريباً طالعين من خط إنتاج واحد .. كلهم عينهم زرقا و شعرهم أصفر .. كلهم شايلين سيف و فاس و خنجر .. كلهم راسمين علي جسمهم وشم .. كتابات (أحمد) عن الروس كمان ورتلنا إزاي علاقة الرجالة و الستات هناك كانت مختلفة شوية عن الإسلام .. بمجرد ما الرجل المتجوز يبقي معاها 10,000 قطعة فضية يقوم رايح مشتري بيهم عقد من الذهب لمراته .. لما تشوف ستات الروس تلاقيهم لابسين كمية سلاسل دهب مشافاهش علي ستات قبل كده .. بس يمكن أكتر حاجة صدمت (أحمد) عن الروس كانوا حاجتين: النظافة الشخصية و الجنازات.
النظافة من الإيمان ده مكنش مجرد شعار بيتكتب علي جدران المدارس الحكومية زي عندنا دلوقتي .. في عصر الدولة العباسية كان ده الطبيعي مع أي مسلم .. أي مسلم لازم يغسل إيده كتير .. لازم يغسل سنانه بالسواك بعد كل أكلة .. لازم يستحمي مرة علي الأقل يومياً .. الروس مكانوش كده .. حسب كتابات (أحمد) هم كانوا عايشين في بيوت طويلة شوية قاعد فيها 20-30 بني أدم .. كل يوم الصبح بيعدي علي سكان البيت طشت فيه مياه وكلهم بيغسلوا وشهم و و يتفوا و ينفوا في نفس الطشت من غير ما يغيروا المياه .. المتجوزين ممكن يمارسوا الجنس قدام الناس عادي أهو علي رأي الإعلان بتاع (أحمد حلمي) .. اللي بيخش الحمام بيلبي نداء الطبيعة برده قدام الناس عادي أهو .. مش بيغسلوا إيدهم لا قبل الأكل ولا بعده .. كل ده كوم ولما بيغنوا كوم تاني .. (أحمد) كان بيقول إن الناس دي صوتها وحش .. وحش أوي في الغناء و رغم كده محدش قالهم ما تباس بقي الصداع ده.
نيجي بقي للجنازات .. (أحمد) حضر جنازة واحد من كبارات الروس فكان اللي بيحصل الأتي .. أول ما الرجل يموت بيتدفن في حفرة بس مش عميقة و بيتدفن معاه أكل و خمرة لمدة 10 أيام .. في 10 أيام دول بيحصل كذا حاجة .. الأول إن بيتخيط هدوم الميت .. كمان بيتم إستدعاء كل أهل الميت و العبيد بتوعه .. العبيد بيتسألوا مين فيكوا عنده إستعداد يضحي بنفسه/بنفسها عشان تبقي قربان لسيدها .. الجنازة اللي حضرها (أحمد) واحدة من العبيد بتوع الميت تطوعت وقالت انا .. بمجرد ما بتتطوع بيتعين إتنين ستات عشان يفضلوا جنبها ليل نهار مش لسبب غير إنهم يمنعوها تغير رأيها .. بمجرد ما الهدوم اللي حيلبسها الميت تتفصل و تخلص فالمركب بتاعة الميت بتتحط علي الشط و معاها بتيجي واحدة ست عجوزة بتتسمي ملاك الموت Angel of Death .. الست العجوزة دي تقدر تقول إنها الشيخة بتاعتهم و هي اللي بتبقي مسئولة عن إنها ترتب السرير اللي حيتحط فيه الميت في المركب .. هي بتبقي المسئولة عن مراسم إستخراج جثة الميت من الحفرة اللي هو فضل محطوط فيها الأيام دي كلها .. هي اللي بتتولي تلبيس الميت هدومه الجديدة المتفصلة مخصوص عشانه وهي اللي بترص القرابين من الأكل و الشرب و المجوهرات في المركب.
القرابين كمان بتشمل ذبح فراخ و حصان و حتي كلب متفهمش ليه كلب و جثث الحيوانات دي كلها بتترص في المركب .. خلال الفترة دي فاكر العبدة اللي تطوعت تضحي بحياتها عشان خاطر سيدها؟ .. خلال الفترة دي بيشربوها كميات ضخمة من الخمور لدرجة إنها تقريباً مش بتبقي حاسة بأي حاجة .. العبدة دي بتلف علي بيت بيت و يتم إغتصابها من كل رجل .. بعد كده الرجاله بيشيلوها و بيمشوا بيها لحد المركب .. بيرفعوها للسما 3 مرات .. مرة تكريماً لأبوها و أمها .. مرة تكريماً لأجدادها .. و مرة تكريماً لسيدها اللي هي بتضحي بحياتها عشانه .. الست بتطلع المركب و اللي يقدر يموتها بأي طريقة يموتها .. اللي معاه سكينة يطعنها .. اللي معاه حبل يخنقها .. بعد كل ده المركب بيولعوا فيها .. كل ده و (أحمد) بيتفرج و من جواه بيقول هاااااار أسود.
للي كتبه (أحمد بن فضلان) عن الروس هو كتبه عن السويديين مش عن الفايكينج ككل .. مش شرط إن مثلاً عاداتهم المتعلقة بالنظافة الشخصية تبقي هي هي اللي كان النرويجيين و الدانمركيين ماشيين عليها .. شوية بشوية و الفايكينج السويديين علاقاتهم بأهلهم إتقطعت .. شوية بشوية و إتحولوا من سويديين لناس عايشة في وسط أوروبا و بقوا هم أجداد اللي انت دلوقتي عارفهم باسم الروس في روسيا ..الفايكينج أحفاد (راجنار) و إبنه (إيفار) وحتي أحفاد (أولاف الأبيض) اللي إستعمروا إنجلترا فضلوا عايشين فيها لحد ما (وليام الغازي) حفيد (رولف) اللي برده من الفايكينج غزا إنجلترا .. الفايكينج كانوا من أغرب الحضارات اللي انت ممكن تدرسها .. حضارة بدأت و توسعت و إنتهت منهم فيهم.
المصادر:
فيديو بعنوان Viking Expansion-The Serpent Riders-Extra History-Part 1 نشر علي YouTube وده لينك الفيديو:
https://www.youtube.com/watch?v=sxItyrp55g8
فيديو بعنوان Viking Expansion-Rollo the Walker-Extra History-Part 2 نشر علي YouTube وده لينك الفيديو:
https://www.youtube.com/watch?v=IOnjG7ocZmI
فيديو بعنوان Viking Expansion-Ireland-Extra History-Part 3 نشر علي YouTube وده لينك الفيديو:
https://www.youtube.com/watch?v=ms3-rhnbw9U
فيديو بعنوانIbn Fadlan-A Viking Funeral-Extra History نشر علي YouTube وده لينك الفيديو:
https://www.youtube.com/watch?v=RSURd15qfWQ
الله على المعلومات الغنية الكثيرة والشرح البسيط الوافي.. أشكرك جدا..