فلاد الثالث .. بين أسطورة (دراكولا) و اللي حصل فعلاً في التاريخ

لينك التسجيل الصوتي للجزء الأول من المقالة علي ساوند كلاود:
https://on.soundcloud.com/DK9Hh

لينك التسجيل الصوتي للجزء الثاني من المقالة علي ساوند كلاود:
https://soundcloud.com/user-112011687-312727988/iq8yxvp1w39i?si=e703fdb2e3b74b818e0c4f22fc4db609&utm_source=clipboard&utm_medium=text&utm_campaign=social_sharing

(فلاد الثالث Vlad III) فعلياً ده من أصعب الشخصيات اللي ممكن تتكلم عنها و ده لسبب بسيط جداً و هو إن فيه شخصيات في تاريخ البشر إسمها إرتبط بكتير من الأساطير لدرجة إنك لما تيجي تدرس و تتكلم عن الشخصيات دي حيبقي صعب عليك إنك تفرق بين الحقيقة و الخيال .. دي أول نقطة .. ثاني نقطة إن (فلاد الثالث) من الشخصيات اللي الناس رأيها فيها إتقسم نصين عكس بعض خالص .. هو عامل زي الأكل الأسيوي Sweet & Sour كده اللي هو فيه ناس بتعشقه و فيه ناس لو كلته بالغلط بتتفه من بقها علي طول .. جوه رومانيا هم بيعتبروه بطل قومي و الدكر الوحيد في أوروبا اللي عرف يقف قصاد عظمة الدولة العثمانية .. بره رومانيا هو بيتشاف علي إنه قتال قتله و مجرم حرب و هو اللي إخترع طريقة الإعدام بالخزوقة و مكنش بيفرق معاه يعدم رجاله أو ستات أو أطفال لدرجة إن بعد كده في التاريخ إسم (فلاد الثالث) بقي مربوط بكلمة المخزوق أو The Impaler .. رجل متوحش لدرجة إنه كان بيغمس العيش في دم ضحاياه .. القصص بتاعة دمويته كانت هي اللي إستوحي منها الأديب الأيرلندي (برام ستوكر Bram Stoker) روايته الشهيرة (دراكولا Dracula) .. ده بيحط (دراكولا) مع (جورج هاجي George Hagi) كأهم شخصيتين طلعوا من البلد اللي إسمها رومانيا.

النهاردة هي محاولة لفهم الحقيقة ورا الأسطورة و عشان تبدأ تفهم إيه هي قصة (فلاد الثالث) فإنت لازم ترجع بالزمن شوية لأبوه (فلاد الثاني) لإن زي ما كلنا رجالة و ستات عندنا بدرجات متفاوته ما يسمي بDaddy Issue فبرده (فلاد الثالث) هو حقاً و صدقاُ نتاج لكل المصايب أو بلاش مصايب خلينا نقول القرارات اللي أخدها أبوه.

فلاد الثاني .. الأسير اللي بقي التنين اللي باع عياله عشان الكرسي :

زمان كانت الدولة العثمانية صداع في دماغ أوروبا و يمكن أكتر ناس كانوا مش بيطيقوا العثمانيين هم المجريين .. تقدر تقول إن وقتها كان فيه مادة عازلة بين العثمانيين و بين المجريين هي الحتة اللي إسمها إقليم والاشيا Wallachia .. والاشيا كانت طبقة الزيت اللي بتمنع إحتكاك العثمانيين مع المجريين بس ده كان معناه إن يا إما العثمانيين أو المجريين لازم يسيطروا علي الإقليم ده .. مش عسكرياً خلي بالك .. إنت بس محتاج اللي يحكم الإقليم يبقي زي العروسة الماريونيت في إيدك .. السؤال هو إزاي ده يحصل خصوصاً لما تعرف إن كرسي الحكم بتاع الإقليم الصغير بس يحير ده الناس كانت بتتعامل معاه زي ما يكونوا بيلعبوا الكراسي الموسيقية .. دي معلومة رقم واحد .. معلومة رقم إثنين بقي إن حاكم المجر وقتها و كان إسمه (سيجيسموند Sigismund) اللي بعد كده بقي بابا الفاتيكان و ده يوريك قد إيه إنه كان رجل فاجر وسط الأوروبيين عرف يخلي إقليم والاشيا زي ما بيتسمي Vassal State يعني بلد تابعة للمجر .. حتيجي تسألني طب إيه اللي يخلي (سيجيسموند) يضمن ولاء حاكم والاشيا؟ .. حقولك .. الإتفاق إن إبن حاكم والاشيا اللي هو (فلاد الثاني) حيسيب الإقليم و يروح يقعد في بودابيشت عاصمة مملكة المجر تحت عين (سيجيسموند) اللي هي فكرة لو فكرت تخوني حتشوف إبنك في الأخرة.

شكلك بتقول إن كده المجريين سبقوا العثمانيين في اللعبة بتاعة مين يسيطر علي عرش والاشيا بس عايزك متستعجلش .. فاكر أبو (فلاد الثاني) اللي كان وافق إن بلده تبقي خاتم في صباع المجر؟ الرجل ده أساساً (سيجيسموند) كان بيعاني عشان يخليه قاعد علي الكرسي لإنه إتشال مرتين و رجع بتدخل عسكري من المجر لحد ما مات سنة 1418 .. لسه (سيجيسموند) حيقول دي فرصتي إن (فلاد الثاني) يقعد علي الكرسي و خطتي تكمل فإذا من سنة 1418 لحد سنة 1436 يعني لمدة 18 سنة ولعت حرب أهلية في والاشيا جابت للعرش 5 حكام مختلفين بيبدلوا مع بعض زي ما يكنوا فعلياً بيلعبوا الكراسي الموسيقية بمعدل إن الحاكم الواحد بيقعد علي الكرسي مدة ما بين 2-3 سنين كحد أقصي .. 18 سنة و (فلاد الثاني) بيتعلم و تحت عين (سيجيسموند) و دي الحقيقة علاقة غريبة أوي بين الإثنين دول.

في الأول العلاقة بين (سيجيسموند) و (فلاد الثاني) كان منطقي تبقي زي أي علاقة بين مسجون و سجان بس مع الوقت العلاقة بينهم إختلفت .. مع الوقت (سيجيسموند) بقي شايف (فلاد الثاني) زي إبنه .. علمه كل حاجة هو يعرفها .. شوية و (سيجيسموند) سمي (فلاد الثاني) بإسم (دراكول Dracul) و دي كلمة معناها التنين و ده معناه إن رسمياً (فلاد الثاني) بقي عضو في تنظيم التنين Order of the Dragon و ده تقدر تقول عليه تنظيم بيضم أهم الفرسان المسيحيين و اللي شغلتهم هي إزاي يمنعوا العثمانيين إنهم ياخدوا متر زيادة من أوروبا .. بمناسبة العثمانيين .. سنة 1434 كانت السنة اللي (سيجيسموند) قرر فيها إن الوضع في والاشيا مينفعش يتسكت عليه لما جاله خبر إن حاكم الإقليم و اللي كان واحد من أخوات (فلاد الثاني) بعت رسول للسلطان العثماني (مراد الثاني) يقوله إنه مستعد يغير سياسة الإقليم اللي كان حطها أبوه و إن والاشيا بدل ما كانت راميه نفسها في حضن المجر إن جه الوقت تجرب حضن دافي تاني و إتمضت فعلاً إتفاقية سلام بين والاشيا و الدولة العثمانية بإن الإقليم يبقي تحت أمر الأتراك وقت ما يطلبوا .. سنة 1436 (فلاد الثاني) و معاه جيش مدعوم من المجر قدر يسيطر علي الحكم في والاشيا و معاها لغي العمل بالإتفاقية اللي إتمضت مع العثمانيين .. لسه (فلاد الثاني) حيقول هيييييييه فيه مصيبتين حلوا فوق دماغه:

• أول حاجة إن (مراد الثاني) أمر بغزو إقليم والاشيا لإنه شاف قرار (فلاد الثاني) إلغاء إتفاقية السلام بينه و بين أخوه اللي كان بيحكم الإقليم من قبله إن ده إعلان حرب علي الدولة العثمانية.
• ثاني حاجة إن بعد بداية الغزو العثماني لوالاشيا بأقل من شهر (سيجيسموند) مات و المجر دخلت في أزمة سياسية عشان تلاقي حد يقعد علي الكرسي من بعده و بالتالي محدش كان فاضي إنه يبعت مساعدات عسكرية تساعد والاشيا ضد العثمانيين.

(فلاد الثاني) يسكت؟ .. طب يتضايق؟ .. الرجل بنفسه راح قدام (مراد الثاني) قاله أنا خدامك و تحت أمرك و سمح للجيش العثماني إنه يعدي من أراض والاشيا جوه مملكة المجر .. لكن .. و زي ما فيه حد مرة قالي إن مشكلة كلمة لكن إنها بتخلي أي حاجة إتقالت قبلها تترمي في الزبالة الجيش العثماني اللي دخل المجر ده إتهزم و بالتالي المجريين بصوا ل(فلاد الثاني) نفس بصة جوز شخصية (رشا الورداني) اللي قدمتها الممثلة (داليا البحيري) في فيلم محامي خلع لشخصية المحامي (بدر النواساني) اللي قدمها الممثل (هاني رمزي) لما ضربه بالألم و هو بيقوله حد قالك إنك رجل مش متربي و مبتعرفش .. ده خلي (فلاد الثاني) يرجع يقول للمجريين أنا أسف و صدقوني ده مش حيحصل تاني.

(فلاد الثاني) يسكت؟ .. طب يتضايق؟ .. الرجل سنة 1442 حصل قعدة بينه و بين واحد إسمه (جون هونيادي John Hunyadi) وده يبقي حاكم إقليم إسمه ترانسلفانيا Transylvania و مشكلة الإقليم ده في حاجتين .. أولاً إنه زيه زي والاشيا كان إقليم المفروض إنه Vassal State تحت سيطرة المجر .. ثانياً إنه زيه زي والاشيا برده العثمانيين حاطين عينهم عليه و ده خلي العثمانيين يجهزوا جيش عشان يروح ياخد ترانسلفانيا غصب .. الفكرة إن عشان القوات العثمانية توصل لترانسلفانيا فهم كانوا متفقين إن والاشيا تخش معاهم في الهجوم ده بقوات من عندها .. هنا (فلاد الثاني) قال ل(مراد الثاني) لا يا عم عايز تعدي من أرضي عشان توصل ترانسلفانيا أهلاً و سهلاً بس أنا مش حبعت عسكري واحد يحارب معاك.

واضح من الكلام ده إن (فلاد الثاني) ده رجل مش حقول مهزق بس هو فعلاً كان محتار إزاي يمشي أموره .. حاول متنساش إن مشكلة والاشيا إنها إقليم صغير محشور بين دولتين أقوي منه بكتير اللي هم الدولة العثمانية و المجر و بناء عليه مجرد إنه يرمي نفسه في حضن واحدة منهم فده بيخلي الثانية تعتبره عدو .. إنك تلعب علي الوينجين موضوع فعلاً مكنش سهل و (فلاد الثاني) مكنش عارف يلعبها صح .. بعد قرار (فلاد الثاني) إنه يقف علي الحياد في الخناقة بين العثمانيين و بين ترانسلفانيا ف(مراد الثاني) إستدعاه هو عياله الإثنين الصغيرين .. (مراد الثاني) مكنش عنده مشكلة مش بس يحبس (فلاد الثاني) إنما كان ممكن يطير رقبته عادي جداً بس هو وافق يرجع (فلاد الثاني) يحكم والاشيا تاني بعد ما هو عمل 3 حاجات:

• أول حاجة إنه عمره ما بعد كده حيقف ضد مصلحة العثمانيين في شرق أوروبا.
• ثاني حاجة إنه كل سنة حيبعت 500 طفل من العائلات الكبيرة في والاشيا عشان ينضموا لقوات الإنكشارية و اللي تقدر تقول إنها القوات الخاصة بتاعة العثمانيين.
• ثالث حاجة إن زي ما أبوه بعته ل(سيجيسموند) عشان يبقي أسير و يضمن ولاءه للمجر فبرده (مراد الثاني) قال (فلاد الثاني) إنت تسيب عيالك الإثنين اللي هم الكبير (فلاد الثالث) اللي كان وقتها كان عنده 11 سنة عندي في أسطنبول .. ودي كانت بداية أسطورة (دراكولا) .. (فلاد الثالث) كان بيتقال عليه (دراكولا Dracula) يعني إبن الثنين عشان أبوه (فلاد الثاني) كان بيتقال عليه (دراكول) يعني الثنين و الصغير اللي كان عنده 7 سنين وكان إسمه (رادو Radu).

عارف إنت لما يبقي ليك أخ إنت و هو طبيعتكوا و شكلكوا و تصرفاتكوا ملهمش علاقة ببعض .. (فلاد الثالث) و (رادو) كانوا كده برده .. واحد كان بيحب العثمانيين اللي هو (رادو) و الثاني كان بيسب و يلعن فيهم اللي هو (فلاد الثالث) .. (رادو) كان أمور و رجاله و ستات كانوا معجبين بيه قصاد إن (فلاد) كانت ملامحه جافة جداً وعلاقته بالوسامة زي علاقتك بالقهوة بالبيض اللي بيشربوها في فييتنام اللي هي حاجة عمرك ما حتقربلها ولا حتفكر تشربها أصلاً .. الإثنين كانوا صحاب (محمد الثاني) إبن (مراد الثاني) و اللي كان ولي عهد الدولة العثمانية بس الإثنين صاحبوه لأسباب مختلفة .. (رادو) فعلاً كان عاجبه دماغ الأتراك .. إتعلم لغتهم و كان بيحب يتعلم و يقراً في الأدب و الفلسفة و الرياضيات اللي بمعني أخر كان عايز يعيش جوه فكرة إنه بينتمي للعثمانيين .. إذا كان (رادو) هو المخ ف(فلاد) كان العضلات .. سنين و هو بيتعلم اللغة التركية و التكتيكات العسكرية بتاعة العثمانيين .. إزاي بيحكموا الشعوب اللي تحت سيطرتهم .. (فلاد) مكنش قريب من (محمد) عشان هو شايفه صاحبه .. هو كان قريب منه عشان يذاكره لإنه عارف إن عاجلاً أم أجلاً الإثنين حيرفعوا السلاح علي بعض فدي فرصة كويسة إنه يدرس عدوه .. بس كل ده إتغير لما ابوهم (فلاد الثاني) مارس هوايته المفضلة في الهبد.

اللي حصل إن (فلاد الثاني) حط إيده في إيد (جون هونيادي) و أعلنوا حملة صليبية ضد الوجود العثماني في شرق أوروبا .. طبعاً مش محتاج أقولك إن الإثنين إتداس علي وشهم .. الهزيمة خلت (فلاد الثاني) ميلاقيش حل غير إنه يروح ل(مراد الثاني) يقوله أنا أسف للمرة اللي أنا الحقيقة مش عارف كام عشان يقوله أنا الرجل بتاعك و خليني أشوف عيالي تاني .. بمجرد ما (فلاد الثاني) رجع للإيكس ف(جون هونيادي) إعتبر ده مبرر إنه يعلن الحرب علي والاشيا .. جري الشريط كام شهر و كان التنين إتقتل .. عرش والاشيا بقي لواحد إسمه (فلاديسلاف) بحيث (جون هونيادي) هو اللي عينه .. (فلاد الثالث) و أخوه (رادو) رجعوا تاني للعثمانيين .. حياة التنين إنتهت بسبب قرار غلط واحد خده.

فلاد الثالث .. دي خوازيق البدايات مش حلاوتها:

عارف لما تبقي بلطجي و تربي كلب بولدوج و تشرسه و في أول خناقة تطلقه علي اللي إنت بتتخانق معاهم؟ .. أهو ده اللي العثمانيين عملوه سنة 1448 لما إدوا (فلاد الثالث) اللي كان عنده يدوبك 17 سنة شوية عساكر و شوية فلوس و قالوله روح خد العرش بتاعك .. (مراد الثاني) مكنش سالك برده .. (مراد) زيه زي (سيجيسموند) كان شايف والاشيا هي العتبة بتاعة المجر و بالتالي لازم اللي يحكم والاشيا يبقي عروسة في إيدي .. (مراد) كان قدامه (رادو) و (فلاد) بس الإختيار كان واضح يعني مش محتاج تفكير .. (رادو) صحيح بيحب الأتراك و هم كمان بيحبوه بس مش ده اللي يقود جيوش في معارك .. (فلاد) هو اللي من و هو صغير باين إنه قتال قتلة و هو يعني الحكم إيه (من وجهة نظر (مراد) علي الاقل)  يعني غير مجرد إنك تقتل أي حد يقف قدامك من غير ما تفكر هو القتل ده حرام ولا حلال .. (مراد) بنفسه هو اللي خد (فلاد) علي جنب عشان يقوله خبر إن والده و أخوه إتقتلوا علي إيد (جون هونيادي) و رجالته .. هو تعمد يشرحله الطريقة البشعة اللي أهله إتقتلوا بيها عشان يضمن حاجة واحدة و هي إن (فلاد) يبقي عارف إنه ملوش ظهر غير الأتراك و إنه مش حيهدي غير لما يشرب من دم (جون هونيادي).

خطة (مراد) كانت متخرش المياه .. القوات بتاعته حتتقسم نصين .. النص الأولاني بقيادة (مراد) شخصياً دوره إنه يصد قوات (جون هونيادي) اللي خد حبوب الشجاعة و دخل جوه أراضي الدولة العثمانية و كان في طريقه لمدينة كوسوفو .. النص الثاني كان بقيادة (فلاد) اللي حيبقي تحت إيده قوات دورها إنها تفضل تتقدم جوه والاشيا لحد ما يسيطروا علي العاصمة و ميسكتوش إلا لما بنفسهم يقعدوا (فلاد) علي العرش .. الخطة مشيت زي السكينة في الجاتوه .. قوات (جون هونيادي) و (فلاديسلاف) إتداس علي وشها في معركة كوسوفو اللي كانت خساير قواتهم كتير فشخ لدرجة إن الأتراك مبقوش عارفين هم الإثنين دول ماتوا في المعركة دي ولا قدروا يهربوا .. في نفس الوقت اللي (فلاد) فعلاً دخل والاشيا و قعد علي الكرسي .. لسه (مراد) حيقول هييييييييييه لقي فيه خازوق طلعله .. (فلاديسلاف) مماتش .. الرجل خد جيش متفهمش جابه منين و دخل والاشيا وطرد (فلاد) بره البلد اللي ملقاش حتة يبات فيها غير إنه يرجع تاني للعثمانيين .. هي المشكلة بس في نقطة .. (فلاديسلاف) لقي نفسه في نفس الوضع اللي زي الزفت اللي (فلاد الثاني) إتحط فيه و هو إنه بيحكم أقليم محشور بين دولتين أقوي منه بكتير .. علي إيدك اليمين العثمانيين و علي إيدك الشمال المجريين .. المنطق بيقول إن بلاش تتصاحب علي المسلمين اللي علي إعتبار إن (فلاديسلاف) مسيحي فهو شايفهم هم و إبليس زمايل تختة .. إذن هو لازم يترمي في حضن المجريين اللي هم برده مش أحسن حاجة في الدنيا يعني و ممكن يبيعوه بكيس شيبسي .. طب و الحل؟

المستشارين بتوع (فلاديسلاف) أقنعوه هو إيه اللي يحصل يعني لو بعت رسول للعثمانيين يسألهم سؤال سهل و بسيط .. طلباتكوا؟ .. بمجرد ما (فلاد) شم خبر إن (فلاديسلاف) بدأ يتكلم مع العثمانيين هرب بره البلد .. ليه؟ إنت ممكن يكون السؤال ده جه في دماغك .. دلوقتي السياسة نجاسة زي ما بنقول و العثمانيين هدفهم هو السيطرة علي والاشيا فلما يجي حاكم والاشيا يقولهم شبيكوا لبيكوا فالطبيعي إن ساعتها (فلاد) حيبقي كارت و إتحرق و مش بعيد (فلاديسلاف) يطلب من العثمانيين في مقابل إنه ينضم ليهم هو إنهم يقتلوا (فلاد) .. عشان كده العثمانيين صحيوا الصبح لقوا (فلاد) فص ملح و داب .. بعد كده إتعرف إنه هرب لعمه اللي كان لسه مسيطر علي حكم دولة مولدوفا.

دول فعلياً كانوا أسعد 3 سنين في حياته و يمكن أهدأ 3 سنين في حياة (فلاد) .. تقدر تقول دي كانت إستراحة ما بين الشوطين لإن الشوط التاني بدأ من يوم ما أهم شخصيتين في حياة (فلاد) وقتها ماتوا .. الأولاني يبقي عمه اللي زي ما قلتلك حاكم مولدوفا في إنقلاب عسكري نظمه أخوه الغير شقيق .. الثاني كان السلطان (مراد الثاني) اللي جه وراه إبنه (محمد) بس هي فيه معلومة أنا خبيتها عليك .. فاكر (محمد) ده اللي وهو صغير إتربي مع (فلاد) و أخوه (رادو)؟ .. فاكره؟ .. أهو ده بعد كده يبقي السلطان (محمد الفاتح) اللي فتح القسطنطينية.

حاول تبصلها من منظور الناس اللي كانت عايشه في شرق أوروبا وقتها .. فتح القسطنطينية سنة 1453 كان صدمة و أنا مش بهزر و مش ببالغ .. خليني أبقي واضح معاك إن القسطنطينية كان بيتبصلها زمان علي إنها الأمل الوحيد إن زحف العثمانيين لأوروبا ممكن يقف .. موت الأمل ده خلي الأوروبيين و أخص بالذكر هنا شرق أوروبا و خليني أبقي دقيق جداً و أقول إن المجريين بالذات دونا عن باقي خلق ربنا إترعبوا من اللي حصل .. الرعب بيقتل المنطق أو زي ما (فرانك هيربيرت Frank Herbert) قال في روايته Dune إن Fear is the Mind Killer .. الخوف بيخليك تلغي مخك و دي أكتر غلطة بيقع فيها الناس اللي ربنا حط في إيديهم السلطة.

• علي إيدك اليمين (فلاديسلاف) حاكم والاشيا .. حط نفسك مكانه و إسأل نفسك السؤال ده: مين يقدر يقف قصاد العثمانيين دلوقتي؟ .. مين؟ .. (جون هونيادي)؟ إذا كان (مراد الثاني) داس علي وشه في معركة كوسوفو ف(محمد الفاتح) لو شافه حيعصره ينزل منه مجريين صغيرين .. يبقي إيه اللي يخليني أخاطر و ألعب بكارت خسران؟
• علي إيدك الشمال (جون هونيادي) أمير المجر .. خدت بالك إني قلت عليه أمير المجر مش ملك المجر؟ الرجل ده خد علي قفاه علقة موت في معركة كوسوفو خلت الناس كل ما تشوفه تضحك عليه .. سمعته إتهزت جامد في الشارع و دلوقتي العثمانيين دخلوا القسطنطينية و هو مش عبيط عشان ميبقاش شاكك إن (فلاديسلاف) أكيد دلوقتي بيعيد حساباته و بيفكر يجري ل(محمد الفاتح) يركع تحت رجليه و يقوله أنا خدامك يا مولاي السلطان .. طب و الحل؟

 أرجع و أقولك أوعي تنسي إن السياسة نجاسة .. (جون هونيادي) قعد مع (فلاد الثالث) عشان يحطوا إيديهم في إيد بعض .. أيوه زي ما سمعت .. (فلاد) حضن و باس الرجل اللي قتل أبوه و أخوه .. الرجل اللي هو وعد (مراد الثاني) إنه مش حيهدي إلا لما يشرب من دمه .. بس تاني قبل ما تستغرب حاول تبصلها من وجهة نظر الإثنين .. (جون هونيادي) شاف (فلاد) البديل المثالي ل(فلاديسلاف) .. حد يقدر يقود المواجهة الجاية أكيد ضد العثمانيين .. حد عارف العثمانيين كويس لإنه إتدرب و إتربي معاهم .. قصاد إن (جون هونيادي) يقدر يقعد (فلاد) علي عرش والاشيا و دي أهم حاجة بالنسبة ل(فلاد) .. الكرسي .. الإتفاق إتمضي .. (فلاد) قعد علي العرش .. (جون هونيادي) رجعت الناس تهتف بإسمه في الشوارع .. هوبا جت سنة 1456 يعني بعد 3 سنين بس من فتح القسطنطينية جه وقت الماتش اللي الناس كلها مستنياه .. (محمد الفاتح) قصاد (جون هونيادي) و (فلاد الثالث) .. الماتش إتلعب قصاد أسوار مدينة بلجراد.

(فلاد الثالث) كان دوره هو إنه يمنع قوات (فلاديسلاف) إنها تيجي تلحق قوات (محمد الفاتح) في حين إن (جون هونيادي) دوره كان إنه يكسر الحصار اللي كان فارضه العثمانيين حول المدينة و يخشها عشان يعزز شوية من دفاعتها .. مهمة (جون هونيادي) كانت في نظر ناس كتير إنتحارية بس في صدفة مش بتكرر كتير عملها .. قوات (محمد الفاتح) إضطرت إنها تكسر حصارها لبلجراد و تنسحب .. لسه (فلاد) حيقول هييييييه لقي إن بسبب الحصار العثماني و بسبب سوء التغذية و التعفن بتاع الجثث فالطاعون ضرب بلجراد و كان من ضمن ضحاياه (جون هونيادي) .. السند مات.

هنا السرعة في إتخاذ القرار كانت أهم حاجة .. لو كان (فلاد) رجع  بلجراد كان بسهولة أوي (محمد الفاتح) بمجرد ما يجيله خبر إن (جون هونيادي) مات يقوم زاحف برجالته تاني علي بلجراد عشان مش بس ياخدها ده حيخلص علي (فلاد) كمان .. دي كانت فرصة (فلاد) إنه ياخد والاشيا .. هو خد قواته اللي فاضلين و زحف علي العاصمة .. فيه ناس بتقول إن قواته إشتبكت مع قوات (فلاديسلاف) و فيه ناس بتقول إنه تحداه لمبارزة حتي الموت علي مين يقعد علي الكرسي .. مش حتفرق أنهي رواية صح لإن في الأخر (فلاديسلاف) إتقتل و (فلاد) قعد علي العرش مش فاكر و الله للمرة الكام بس المرة دي بمجرد ما رجع ظهره علي الكرسي قام تاني .. قام تاني عشان يكنس البلد من أي حد يتجرأ علي معارضته .. اللي عمله (فلاد) في الوقت ده هو اللي بدأ يزرع سمعته اللي إتعرفت في التاريخ .. الرجل ده عشان يعدم معارضيه و أعداءه مكنش بيشنقهم ولا بيقطع رؤوسهم بالمقصلة .. لا خالص .. هو كان بيجيب حربه من الخشب و يحط شوية زيت علي الطرف المدبب بتاعها و يقوم ضاربه في جسم اللي عايز يقتله بس الضربة بتكون في مكان ميقتلش في لحظتها .. لا .. هو بيضربه عشان يطلع السن المدبب ده من الناحية الثانية من جسم اللي حيتعدم و يرفع الحربه بشكل مستقيم عشان يفضل اللي بيتعدم يا عيني متعلق في منتهي الألم اللي ممكن تتخيله في حياتك و بيتساب كده لحد ما ينزف حتي الموت .. الطريقة دي في الإعدام إتسمت الخزوقة و بسببها سمعة (فلاد الثالث) في التاريخ بقت (فلاد المخوزق Vlad the Impaler).

خليك فاهم بس إن (فلاد) اللي شافه في الدنيا مكنش شوية و بالتالي هو محاولش يقع في نفس أخطاء أبوه .. بمجرد ما قعد علي العرش سنة 1457 هو بعت جواب ل(محمد الفاتح) قاله إنه موافق إنه يعمل هدنة مع العثمانيين في مقابل إنه يدفع 2000 قطعة ذهبية كجزية سنوية و يسمح للجيوش العثمانية إنها تعبر أرضه في أي وقت .. بس ده مكنش خضوع قد ما كان إنه كان عايز يكسب وقت للمعجنة اللي كان بيعملها في والاشيا .. الدم فعلياً مش بقي للركب ده بقي فوق الركب بشوية .. أي حد (فلاد) يشك بس إنه بيتأمر ضده كان بيتخزوق هو و عيلته كلها .. تطبيق القانون كان مرعب .. لو حد أتهم بجريمة قتل كان بيتقطع رقبته .. لو واحدة متجوزة خانت جوزها كانت بتتسلخ وهي حية .. لو إنت فلاح بس خدت أجازة يوم بتتخزوق .. بإختصار حياة أهل والاشيا تحت حكم (فلاد) كانت حاجة شبه إن اللي يحكمك هو الرجل بتاع فيلم SAW .. يقال إنه في مرة شاف يعني إن أصحاب البنوك دول بقوا صداع في دماغه و كل شوية يقولوله إن البلد عليها ديون وهو مش عايز وجع دماغ .. يقوم عازمهم علي الغدا و هم بياكلوا يقوم يقولهم إنه رايح الحمام و يقفل عليهم باب القصر و يولع في القصر كله .. يقال في مرة إن فيه وفد من الكنيسة جه زار والاشيا و القساوسة بتوع الوفد لمحوا بس إن الكنيسة زعلانة من الطريقة اللي هو بيعدم بيها الناس قام بمنتهي الهدوء شاور للحرس بتوعه خدوا القساوسة دول خزوقوهم قدام الناس.

قصص الرعب بتاعة فترة حكم (فلاد) فيه منها اللي مبالغ فيه و فيه منها اللي بيمجده و فيه منها اللي بيسب و يلعن في سلسفين أهله .. أيا كان موقفك من الرجل ده فإنت لازم تفهم إنه ديكتاتور دموي زي ما الكتاب بيقول .. خليني شوية أبقي محامي الشيطان و أفهمك هي دماغه ماشية إزاي .. فاكر لما قلتلك إن الحكم في والاشيا كانت مشكلته إنها بلد محشورة بين دولتين أقوي منها بكتير؟ .. ناس كتير كانت شايفه مشكلة والاشيا في التدخل الخارجي في الشئون الداخلية للبلد سواء من المجر أو الدولة العثمانية اللي لسنين و هم بيحاولوا يحطوا علي عرش والاشيا الشخص اللي يخدم مصالحهم .. بس وسط كل ده فيه حاجة بتتنسي إن فساد الطبقة الحاكمة نفسه هو اللي سمح بإن ده يحصل .. ما هو لو اللي بيحكم البلد رجاله مكنش فيه حد من بره إستجرا يقربلها .. ده معناه إن عمر ما (فلاد) حيدوق طعم النوم طول ما الطبقة الحاكمة اللي معاها فلوس في إيدها مصير البلد .. الناس مش بس لازم تموت .. دي لازم تتخزوق عشان الناس كلها تخاف .. عشان الكل يعرف إن أنا بابا يلا.

خلال الفترة من 1457 لحد 1461 يعني بتتكلم عن 4 سنين بس كان من الطبقة الحاكمة اللي كانت بيتبصلها علي إنهم المستشارين و البلاط الملكي  حول حاكم والاشيا و أعيان البلد يعني بشكل عام مبقاش فاضل منهم غير إتنين بس .. الباقي إتخزوق .. يمكن عشان تستوعب اللي حصل حاول تتخيل للحظة إن الرئيس (عبدالفتاح السيسي) حس إن قيادات الجيش بتتأمر عليه قام أمر بضربة جوية نسفت الكيان العسكري كله باللي فيه عشان يخلص منهم مرة واحدة .. قصاد المستشارين اللي كانوا بيتقتلوا لازم يحل محلهم ناس جديدة .. الناس الجديدة دي كانت يا إما من الطبقات الفقيرة أو ناس من بره البلد و (فلاد) جابهم يساعدوه .. في الحالتين إنت مش بتبقي شايف قدامك غير إن (فلاد) رجل صح الصح و اللي يقول عليه يبقي صح الصح.

(محمد الفاتح) قصاد (فلاد الثالث) .. لقاء السحاب:

 فاكر لما قلتلك إن (فلاد) أول ما قعد علي الكرسي بعت جواب ل(محمد الفاتح) قاله فيها خلينا نفتح صفحة جديدة و حدفعلك جزية سنوية 2000 قطعة ذهبية؟ .. الكلام ده كان سنة 1457 و دلوقتي إحنا بقينا في 1461 و متدفعش غيرهم .. 3 سنين عدوا من غير ما والاشيا تدفع الجزية اللي عليها .. طب و بعدين بقي .. (محمد الفاتح) بعت قوة عسكرية بقيادة واحد من جنرالاته و معاه إتنين سفراء منهم واحد يوناني بالمناسبة .. الهدف من القوة العسكرية دي هي إستدعاء (فلاد) قدام البلاط الملكي ل(محمد الخامس) زي ما أبوه (مراد الثاني) إستدعي أبو (فلاد) لو تفتكر .. القوة دي و هي رايحة والاشيا إتعملها كمين و إتقتل كل العساكر اللي فيها ما عدا ثلاثة .. القائد و الإثنين سفرا .. الثلاثة راحوا لحد (فلاد) اللي بنفسه إتفرج عليهم و هم بيتخزوقوا .. اللي حصل بعد كده أقل حاجة تتقال عليه إنه هي إعلان حرب ضد الدولة العثمانية بس اللي حصل فعلاً  لو عايز تستوعبه كان سلسلة من المجازر و جرائم الحرب اللي إرتكبها (فلاد) ضد القري العثمانية اللي علي الحدود مع والاشيا.

السؤال اللي لازم يكون بيشغل بالك دايماً هو ليه؟ .. ليه ده حصل؟ .. إيه اللي يخلي (فلاد) يقرر يخش خناقة مفتوحة بالشكل ده مع العثمانيين؟ مع إن إحتمالات إنه يكسب الخناقة دي ضعيفة فشخ يعني .. الحقيقة إن السبب بمنتهي البساطة هو حاجتين الفلوس و الخوف و دي نقطة محتاجة تتشرحلك شوية:

(محمد الفاتح) الأوروبيين كانوا شايفينه زي ما الغرب كان شايف (أسامة بن لادن) كده اللي هو ده رجل بيمثل تهديد واضح و صريح للأمن القومي بتاعنا .. أرجع و أفكرك إن فتح القسطنطينية كان صدمة للكل .. إذا كانت القسطنطينية وقعت إيه اللي يمنع إن في يوم من الأيام روما تقع .. و لو روما وقعت يبقي المسيحية الكاثوليكية إنتهت .. مجرد إحتمالية إن ده يحصل خلي بابا الفاتيكان وقتها (بايوس الثاني) عرض علي ملوك أوروبا إنه يمول حملة صليبية ضد العثمانيين .. من ضمن ملوك أوروبا اللي خدوا فلوس كانوا (ماتياس كورفاينوس) ملك المجر و (فريدريك الثالث) إمبراطور الإمبراطورية الرومانية المقدسة .. المشكلة إن الملوك دول خدوا الفلوس صرفوها علي نفسهم و محدش فيهم فكر حتي يضرب طلقة مدفع واحدة علي العثمانيين .. البابا (بايوس الثاني) كان يائس لدرجة إنه جرب يتكلم مع دول إسلامية ثانية كانت متخانقة مع العثمانيين علي أمل إنهم يوافقوا يضربوهم لمجرد إن لو (محمد الفاتح) كان بيفكر فعلاً يخش روما فالضربات اللي ورا بعضها دي تعطله شوية .. ده كانت أول نقطة و هي إن (فلاد) قال لنفسه إشمعني يعني الدول الأوروبية دي تاخد فلوس من البابا و متعملش حاجة .. طب ما أنا لو ضربت العثمانيين و عورتهم جامد فبابا الفاتيكان حيشوفني رجل جامد زحليقة و يديني فلوس .. أصل فلوس يعني ممكن أصرف علي جيوشي .. فلوس يعني إني أفضل قاعد علي الكرسي و هو أنا عايز إيه غير إني أفضل قاعد علي الكرسي.

السبب الثاني هو الخوف .. فاكر لما قلتلك إن (فلاد) قضي أهدي 3 سنين من عمره في مولدوفا وقت ما كان قاعد مع عمه؟ .. أهو إبن عمه و كان إسمه (ستيفن) قدر يوصل للحكم و أول حاجة عملها إنه أعلن ولاءه ل(محمد الفاتح) .. طب ما هو أجلاً أم عاجلاً (محمد الخامس) حيحاول يخش والاشيا و لو ده حصل (فلاد) حيلاقي نفسه بيحارب علي جبهتين لإن أكيد إبن عمه حيقف جنب (محمد الفاتح) ضده .. طب ليه أستني لما العثمانيين يتعشوا بيا؟ طب ما أتغدي بيهم الأول.

هجوم (فلاد) علي القري العثمانية خلي (محمد الفاتح) سنة 1462 بنفسه يقود جيش و حزر فزر كان معاه مين؟ .. أخو (فلاد) اللي هو (رادو) لو تفتكره .. (محمد الفاتح) كان جاي والاشيا عشان يدوس علي وش (فلاد) .. معلش يعني هل عندك تفسير تاني إنه ياخد معاه جيش من 60,000-70,000 مقاتل و معاه 120 مدفع ميداني .. جيش زي ده مينفعش تواجهه في ميدان مفتوح .. جيش زي ده لازم تاخده علي حجرك الأول .. (فلاد) أمر بإخلاء المدن بتاعة والاشيا و خلي سكانها يروحوا للجبال يستخبوا فيها و كل قرية و كل مدينة أهلها يسيبوها هو يحرقها و يسمم الأبار و الأنهار بتاعتها عشان العثمانيين ميستفيدوش بيها اللي هو إحنا بنسميه دلوقتي سياسة الأرض المحروقة و دي نفس الإستراتيجية اللي السوفييت عملوها عشان يعطلوا شوية الغزو النازي لأرضهم في الحرب العالمية الثانية .. ثاني حاجة (فلاد) إعتمد عليها إنه يخرج (محمد الفاتح) عن شعوره .. كل شوية و الجيش العثماني بيزحف يحصل هجوم متفهمش حصل إزاي و رجاله (فلاد) يأسرولهم شوية عساكر عثمانيين و يهربوا .. كذا مرة الحكاية دي تحصل لحد ما الجيش العثماني وصل لعاصمة والاشيا اللي بعد كده بقت مدينة بوخاريست اللي هي دلوقتي تبقي عاصمة رومانيا.

يقال إن (فلاد) اللي كان بيعرف يتكلم تركي كويس جداً فهو خد شوية من رجالته و لبسوا الزي بتاع العساكر الأتراك و إتسلل لجوه المعسكر .. (فلاد) كان بيدور علي حاجة واحدة بس .. خيمة (محمد الفاتح) .. بمجرد ما لقاها في وسط المعسكر راح سرق شوية حصنة من المعسكر و جري علي الخيمة و هو عمال يقتل أي عسكري عثماني يلاقيه في سكته .. لسه حيقول هيييييييييييه لقي الخيمة فاضية .. حرفياً (محمد الفاتح) زي ما تقول كده قاله عليك واحد .. (فلاد) ملقاش حل غير إنه مش بس ينسحب من المعسكر ده إنسحب من بوخاريست و هرب للجبال عشان محدش يعرف يوصله .. (محمد الفاتح) دخل بوخاريست و بمجرد ما دخلها شاف منظر إتحفر مش بس في ذاكرته إنما في ذاكرة كل العساكر العثمانيين اللي كانوا معاه .. فاكر العساكر العثمانيين اللي كان رجاله (فلاد) بيأسروهم؟ .. طب فاكر لما كانت رجاله (فلاد) بتهاجم القري العثمانية و ده السبب في غزو (محمد الفاتح) لوالاشيا؟ .. أكتر من 20,000 جثة متخزوقة و متعلقه و متسابه عشان (محمد الخامس) يشوفها بنفسه .. واحدة من أبشع جرايم الحرب اللي إتعملت في تاريخ البشر .. جريمة إبليس شخصياً يمكن ميفكرش يعملها بنفسه .. بس إذا كنا إحنا شايفينا جريمة حرب ف(فلاد) شافها نقطة حلوة تتحط في CV بتاعه عشان بابا الفاتيكان يقوله الله ينور عليك أعطوله شكارة ذهب.

هروب (فلاد) خلي الدنيا تهدي في والاشيا .. جرايمه اللي إرتكبها ضد الطبقة الحاكمة خلت الناس تقول لنفسها بمجرد ما إتهزم يلا كلب و غار في ستين داهية .. العثمانيين حطوا أخوه (رادو) يمسك مكانه و يمكن لأول مرة من سنين الناس في والاشيا نامت ليلة هادية من غير ما يكونوا خايفين إن حد يتخزوق .. وسط كل ده (فلاد) كان بيغلي .. بس هو جاله خبر إن ملك المجر (ماتياس كورفاينوس) بيزحف بجيشه بإتجاه والاشيا عشان يضمها لبلده و ده خلاه يبعتله جواب يقوله فيه رجعني تاني أحكم والاشيا و أنا أبقي خدامك .. (ماتياس) رد عليه قاله و ماله يا حبيبي و فعلاً الإتنين إتقابلوا عشان (فلاد) يلاقي نفسه مقبوض عليه و هنا حقاً و صدقاً يعني تتجسد مقولة من حفر حفرة لأخيه وقع فيها.

فاكر لما قلتلك إن سبب هجوم (فلاد) علي العثمانيين كان إنه يرسم نفسه قصاد بابا الفاتيكان إنه رجل جاحد مبيخفش يرفع السلاح علي العثمانيين؟ و إن هدفه من الدنيا إنه ينوله من نافورة الفلوس اللي عمالة تنزل علي حكام أوروبا جانب؟ .. اللي حصل إن (ماتياس) زور جوابات إتقال فيها إن (فلاد) تأمر علي مش بس المجر إنما المسيحية الكاثوليكية كلها عشان بعت ل(محمد الفاتح) قاله رجعني أحكم والاشيا تاني و أنا حسيبك تعدي من أرضي للمجر عشان تاخدها و لو ده حصل فسكتك سالكة لحد روما .. الغريبة إن بابا الفاتيكان صدق و (فلاد) إتحبس .. 14 سنة محبوس .. إنت متخيل؟

14 سنة و هو صابر و ساكت لحد ما الفرصة جت .. في نوفمبر 1476 الدنيا إتشقلب حالها .. أخوه (رادو) خسر الحكم في والاشيا في إنقلاب عسكري .. إبن عمه (ستيفن) اللي ماسك مولدوفا إتخانق مع (محمد الفاتح) .. ده خلق الفرصة المثالية إن (ماتياس كورفاينوس) يستغل الكارت اللي معاه .. ليه لا نرجع تاني (فلاد) اللي بقي عنده حاجة و أربعين سنة للحكم بحيث هو و إبن عمه (ستيفن) يقفوا قصاد العثمانيين .. فكرة مش كده؟

لك أن تتخيل إن القصة الطويلة العريضة دي خلصت في يوم واحد سنة 1476 لما قوات (فلاد) إتهزمت من العثمانيين و في المعركة دي (فلاد) إتقتل .. لحد هنا كان المفروض إن الملف يتقفل .. زي ما تقول كده كان كلب و راح .. المشكلة في حاجة .. الإعلام .. وقتها في أوروبا كانوا لسه مكتشفين الطباعة .. الطباعة يعني جرايد .. جرايد يعني صحافة صفرا يعني مش مشكلة نزور و نبالغ شوية و نحرف في حقايق عشان خاطر نبيع .. ده إنت ممكن تفهمه دلوقتي لما تلاقي جرنان منزل خبر علي الصفحة بتاعته علي فيسبوك خبر ملوش أي معني عن ممثل طلق ممثلة عشان خاطر هو مبيغسلش سنانه و ريحة بقه وحشة .. فعلياً إنت الخبر ده مش حيفرق معاك ولا حيؤثر في يومك بس هي دي فكرة الصحافة من أول ما إتعملت .. الفضايح بتبيع .. الفكرة إن زمان وقت ما (فلاد) كان عايش كان الدم كان هو اللي بيبيع .. الجرايد كانت بتتعمد تبالغ في وصف جرايم (فلاد) و بتتعمد تطبع صور شنيعة لجرايمه عشان هم عارفين إن الناس كانت بتحب تقرأ القصص دي.

ده معناه إيه؟ .. معناه إن سواء و (فلاد) عايش أو بعد ما مات الناس كلها كانت يا شايفاه قتال قتلة يا إما بطل قومي عشان بيحارب المسلمين ده علي حسب إنت قاعد في مدرجات مين بس محدش في أي لحظة من اللحظات هبد الهبداية العابرة للقارات بتاعة إن (فلاد) كان مصاص دماء أو فامباير .. دي فكرة إتزرعت في نفوخنا بسبب رواية Dracula اللي كتبها الروائي الأيرلندي (برام ستوكر Bram Stoker) .. اللي أنا عايز أوصله ليك إن (فلاد) مش فامباير .. إتفقنا .. هو مجرد شخصية تاريخية إرتكب جرايم حرب شنيعة بس ده اللي الناس بره رومانيا شايفاه .. جوه رومانيا الموضوع مختلف سيكا.

عشان بس مطولش عليك فخليك فاكر إن رومانيا كبلد يعني هي عبارة عن 3 حتت .. مولدوفا و والاشيا و ترانسلفانيا .. خلال ال100 سنة اللي بعد موت (فلاد الثالث) فتلاقي إن مولدوفا و والاشيا بقوا ولايات عثمانية في حين إن ترانسلفانيا فضلت مستقلة لحد ما لقت نفسها تحت حكم الإمبراطورية النمساوية المجرية .. الثلاث حتت فضلوا يفركوا عشان يستقلوا لحد ما في سنة 1878 مولدوفا و والاشيا إستقلوا عن الدولة العثمانية و بقي إسمهم رومانيا .. بعد ما الحرب العالمية الأولي إنتهت و الدولة العثمانية ماتت ترانسلفانيا إنضمت لرومانيا .. السؤال دلوقتي .. إيه اللي يخلي ناس فضلت عايشة أكتر من 100 سنة لسه بتفرك عشان تستقل؟ .. مفيش غير إنك تفضل تفكرهم بشخصيات تاريخية حاربت و ماتت عشان تستقل عن نفس المحتل و خلي بالك إني دلوقتي بحاول أتكلم من وجهة نظر الرومانيين .. الرومانيين شافوا (فلاد) كنموذج يحتذي بيه .. بالنسبة ليهم هو بطل قومي لمجرد إنه وقف قصاد العثمانيين .. فكك من جرايمه محدش في رومانيا بيتكلم عن ده .. محدش بيتكلم عن إنه مجرد ديكتاتور ميقدرش يعيش من غير سلطة.

أنا شخصيا مقتنع بفكرة إن محدش عارف هو إيه ممكن يحصله بكره .. مش ممكن تموت يا أخي يبقي متفكرش في بكره و إيه اللي ممكن يحصل .. بس يمكن فصة (فلاد) دي خلتني أقول لنفسي حتي لما تموت محدش عارف إيه اللي ممكن يحصل و إزاي الناس تحكي قصتك .. يعني هو (فلاد الثالث) كان عارف إن فيه بلد حيبقي إسمها رومانيا كان نفسها تستقل عن حكم العثمانيين و هو حب يبقي مثل أعلي ليهم؟ .. بالتأكيد لا .. هل هو كان عارف إن سيرته حتبقي علي كل لسان بإنه مصاص دماء؟ .. أظن برده لا .. بس الله أعلم الناس حتحكي قصتك إزاي لما تموت.

المصادر:

• فيديو بعنوان Vlad the Impaler-Son of the Dragon-Extra History #1 نشر علي YouTube وده لينك الفيديو:
  https://www.youtube.com/watch?v=A38EIkIzgM8&t=285s
• فيديو بعنوان Vlad the Impaler: Blood Oaths-Extra History-#2 نشر علي YouTube وده لينك الفيديو:
  https://www.youtube.com/watch?v=XjCKdhQ_QXE
• فيديو بعنوان Vlad the Impaler-Raising the Stakes-Extra History-#3 نشر علي YouTube و ده لينك الفيديو:
• https://www.youtube.com/watch?v=hbRcAHMG_l4
• فيديو بعنوان Vlad the Impaler-War in the Dark-Extra History-#4 نشر علي YouTube وده لينك الفيديو:
• https://www.youtube.com/watch?v=OnDHjdX1aQE
• مقالة بعنوان Vlad the Impaler-The Living Dead-Extra History-#5 نشر علي YouTube وده لينك الفيديو:
• https://www.youtube.com/watch?v=C-emJnmI5XU