لينك التسجيل الصوتي للمقالة علي ساوند كلاود:
https://on.soundcloud.com/51S7o
عمرك سألت نفسك و إنت بتتفرج علي فيلم زي The Dark Knight إيه اللي يحصل لو شخصية باتمان حقيقية؟ .. هل تخيلت قبل كده إن إحنا في العالم بتاعنا وسط حالة الإكتئاب و الإحباط العامة اللي بين جيلنا إن يا سلام لو لقينا رجل أعمال عربي معاه فلوس كتير فشخ إخترع بدلة زي بتاعة Iron Man و بقي يحارب بيها الإرهابيين و المجرمين؟ .. كلنا أكيد تخيلنا نفسنا Superhero له قدرات خارقة معينة عشان نصلح غلط شايفينه أو نرجع حق حد إتظلم قدام عنينا و عجزنا إننا ننصره أو حتي عشان نلفت نظر البنت اللي بنكراش عليها و ده خلانا نتخيل نفسنا Spider-Man أو حتي Dr. Strange .. لو إنت من الناس دي اللي بتجيلها أحلام يقظة و هي ماشية في الشارع إنه يشوف علامة باتمان منورة في السما يقوم جاري راجع بيته عشان يلبس البدلة بتاعته و يروح يحارب الجريمة فأحب أرجعك لواحد من أحلي المشاهد اللي إتعملت في سلسلة افلام Marvel كلها .. المشهد ده كان في فيلم Captain America: Civil War لما وزير الخارجية الأميريكي كان مقعد طقم الAvengers كلهم زي الطلبة قدامه و بيديهم محاضرة إن إزاي حضراتهم خربوا الدنيا أكتر ما صلحوها.
كلام وزير الخارجية خلي السوبرهيروز اللي قاعدين يبصوا لبعض و يكتشفوا إن كونك Superhero ده مش معناه إنك حتحل حاجة .. بالعكس الناس دي لما إتسابلها الحبل علي الغارب خربوا الدنيا .. في المشهد اللي وراه علي طول شخصية فيجين Vision إتكلم مع شلة الAvengers و قالهم إن خلال 8 سنين من ساعة ما (توني ستارك Tony Stark) طلع قال للناس إنه هو Iron Man عدد المصايب في العالم زاد بشكل فشيخ .. ده يخليك تسأل نفسك .. هو إحنا في العالم بتاعنا الواقعي محتاجين حد زي Avengers؟
أنا شبه متؤكد إني لو عديت علي واحد واحد سألته عن رأيه حطلع في الأخر بوجهتين نظر .. ناس حتقول اه إحنا محتاجينهم و ناس حتقول لا .. اللي محتاجين نتكلم عنه هو ليه الناس قالت كده؟ .. إيه اللي يخليك تقول اه إحنا محتاجين ناس زي Avengers ؟ و إيه اللي يخليك تقول لا أخر حاجة إحنا عايزينها هي ناس شايفة نفسها فوق القانون عماله تقتل و تدمر من غير ما تتحاسب؟ .. لإن الموضوع مسلي أوي بالنسبة لي علي الأقل فخلينا نتكلم شوية عن وجهة النظر الأولانية: هي الناس اللي شايفة إننا محتاجين Superheroes في حياتنا عايزينهم ليه؟
إحنا إتربينا علي إن الSuperheroes بيجيبوا حق المظلوم .. هم إتكتبوا كده في الروايات و القصص المصورة اللي كنا بنقراها و إحنا صغيرين .. خد عندك شخصية زي Superman مثلاً .. دي شخصية إتكتبت بعد فترة الكساد اللي ضرب أميركا في الثلاثينات و خلت فيه حالة إحباط عام بين الناس .. في القصص المصورة Superman كان واقف في صف المواطن الغلبان و بيحارب الفساد اللي استشري في المجتمع .. و مش لوحده .. شخصية زي Batman حالف لينتقم لأبوه و أمه بإنه يخلص من كل المجرمين و تجار المخدرات .. شخصية تالتة زي Wonder Woman كانت ماشية تحب علي نفسها و تكراش علي أي حد شكله حلو .. تحس إن الشخصيات دي كانت إنعكاس لوجهات نظر سياسية و إجتماعية في المجتمع .. يعني إيه الكلام الكبير اللي ميتفهمش ده؟
يعني لو إنت بني أدم إشتراكي شايف إن الحكومة لازم تنصر المواطن الغلبان و تقف في صفه قدام طبقة رجال الأعمال فإنت غالباً معجب أوي بشخصية Superman .. لو إنت شخص يميني شايف إن الأغنياء لازم يتسابوا علي راحتهم لإنهم هم اللي بيقوموا البلد علي رجلها فإنت غالباً حتبقي من المعجبين بشخصية Batman .. أما لو إنت أو إنتي شخصية رومانسية بتحلم باليوم اللي الحب و السلام ينتشروا في الأرض فأنتوا ملكوش غير Wonder Woman .. المهم إن الSuperheroes دول واقفين في صفنا مش مع الحكومة ولا مع الفساد ولا مع المجرمين و تجار المخدرات و عشان كده إنت قلت إنك محتاجلهم و ياريت لو يبقوا موجودين في حياتنا.
طب ده رأي الناس اللي نفسها ان Superheroes يبقوا حقيقيين .. بس فيه ناس حيبقي رأيها لا إحنا مش محتاجينهم و الحقيقة إن الناس دي منطقها حيبقي غريب بس تقدر تفهمه بسهولة:
اللي منكوا شاف فيلم Watchmen مع إنه فيلم ميتشافش و بسم الله ما شاء الله (زاك سنايدر Zack Snyder) المخرج بتاعه طلعلنا فيلم زي الزفت بس في الفيلم ده إتقالت جملة حلوة اوي .. قالك إن الناس اللي بتلبس أطقم غريبة و طايحين ضرب في خلق الله باسم مكافحة الجريمة محتاجين يا يتعالجوا نفسيا يا يتحاكموا .. إنك تبقي Vigilante أو واحد بيجيب حقه و حق الناس بدراعه فإنت فعلياً متفرقش كتير عن شخصية زي أمين الشرطة (حاتم) في فيلم هي فوضي و اللي جسده ببراعة الله يرحمه (خالد صالح) .. معلش هو واحد زي Batman اللي عمال يقتل في خلق الله باسم العدالة يفرق إيه عن أي ديكتاتور؟ .. فكر فيها كده .. الإتنين بيقفوا قدام المراية و بيبرروا لنفسهم اللي هم بيعملوه باسم مكافحة الجريمة و حماية الوطن من الإرهاب بس أنهي جريمة؟ و أنهي إرهاب؟ و أنهي وطن؟ .. إنت لو في إيدك السلطة و القوة بتصدق نفسك حتي لو إنت ابن كلب .. في فيلم Batman V Superman: Dawn of Justice اللي برده أخرجه طيب الذكر (زاك سنايدر) في مشهد من مشاهده (كلارك كينت Clark Kent) اللي هو Superman متضايق أوي من شخصية Batman إنه بيخرق حقوق الإنسان و معيش الناس في حالة خوف .. Superman اللي قتل نص سكان المدينة اللي هو عايش فيها في خناقته مع (زود Zod) متضايق من Batman عشان بيعذب تجار المخدرات عشان ياخد منهم معلومات .. لا و الواد مقتنع و مؤمن أوي باللي هو بيقوله .. هل إنت محتاج حد زي ده يحميك؟
الأفلام سلاح مهم أوي بيقدر يقنع الناس بأفكار معينة و بتقدر تغير مفاهيمهم أو ترفع روحهم المعنوية بعد ما ثقتهم في نفسهم و في بلدهم إتهزت بسبب كارثة معينة .. يمكن لإننا عرب فمش فاهمين أوي إيه تأثير هجمات 11 سبتمبر سنة 2001 علي الأمريكان .. حاول تتخيل إن اللي حصل في الأمريكان في اليوم ده شبه اللي حصل فينا بعد نكسة يونيو 1967 .. بعد ما البلد إتعرضت لكارثة زي دي إحتاجت إن روحها المعنوية تاخد دفعة و الدفعة دي كانت فيلم Spiderman اللي نزل سنة 2002 و أخرجه (سام رايمي Sam Raimi) .. الفيلم إتصور في مدينة نيويورك اللي حصلت فيها هجمات 11 سبتمبر اللي وقعت برجي التجارة العالمي بس فيه مشهد في الفيلم ده ياريت لو تفتكره لما واحد من الناس اللي ماشية في الشارع دافع عن Spiderman و قال لشخصية Green Goblin اللي هو الشرير اللي في الفيلم لو إتعاركت معاه يبقي إنت بتتعارك معانا كلنا .. مشهد زي ده معمول بالذات عشان يرفع الروح المعنوية لجيل كامل ثقته في نفسه إتهزت .. نفس الموضوع كان سنة 2008 لما نزل فيلم Iron Man .. في الوقت ده أميركا كان طالع عين اللي خلفوها في العراق و أفغانستان .. اللي منكوا يفتكر كانت وقتها الحرب الأهلية العراقية مولعة و كنت كل يوم بتصحي علي خبر تفجير إرهابي قتل أرقام بتوصل بالميات و ده خلق حالة إنعدام ثقة في قدرات القوات المسلحة الأميريكية .. يقوم طالعلك شخصية زي (توني ستارك) عشان يحارب الإرهابيين الوحشين و يرجع الثقة لبلد كاملة في قواتها المسلحة.
بعد كده الحرب علي الإرهاب بوخت .. السينما في أميركا بقت شايفاها حرب ملهاش لازمة .. العراق و أفغانستان مش عارفين نعمل فيهم حاجة .. فضايح عمليات التعذيب المنظمة اللي قامت بيها المخابرات الأميريكية حول العالم بقت مخلية الأمريكان مكسوفين و هم ماشيين في شوارع أي حتة في العالم .. لا و طلعت موضة جديدة اسمها إن الحكومة بقت بتتجسس علي مواطنيها .. ده إترجم في أفلام Superheroes .. بقيت تشوف الSuperhero بيسأل نفسه سؤال يبان غبي أوي: هو أنا واقف في صف مين الحكومة ولا المواطن؟
في الوقت اللي إحنا في العالم بتاعنا طلعلنا ناس زي (إيدوارد سنودين Edward Snowden) المبرمج الأميريكي اللي كان شغال لحساب وكالة الأمن القومي الأميركية NSA عشان يطور برامج كومبيوتر للتجسس علي الأمريكان طلع فضح كل اللي بيحصل و دلوقتي هربان في روسيا مش عارف يرجع بلده تلاقي إن في فيلم Captain America: The Winter Soldier نفس الموقف إتكرر .. زي ما (إيدوارد سنودين) لقي نفسه بيعمل حاجة ضميره مش مخليه يوافق عليها و شايفها جريمة في حق الشعب فقرر إنه يفضح كل حاجة حتي لو كان الثمن حريته الشخصية فبرده Captain America عمل نفس الحركة لما لقي نفسه ضميره ناقح عليه و قرر إنه يوقع تنظيم S.H.I.E.L.D. كله بسبب الجرايم اللي هم إرتكبوها في حق الشعب خصوصاً لما إكتشف إن التنظيم الإرهابي هايدرا Hydra قدر إنه يخترق S.H.I.E.L.D. زي ما شفنا في الفيلم .. الأكتر من كده إن حتي في فيلم Captain America: Civil War تلاقي إن Captain America شن حرب أهلية علي باقي الAvengers لإنه مكنش موافق علي فكرة إن الحكومة تبقي هي المسيطرة علي Avengers .. هو خاطر بكل حاجة لمجرد إنه ميخليش سلاح مدمر زي Avengers يبقي في إيد الحكومة.
حتي قضية حريه الإعلام و إزاي تضمن إن البني أدمين اللي عايشين في مجتمع واحد بيتخانقوش مع بعض و يقتلوا في بعض بسبب إن الإعلام مالي ودانهم بأخبار كذب كلها غلط في غلط لمجرد إنهم عايزين الناس اللي في المجتمع يفضلوا كده متخانقين و بيدمروا بعض إتناقشت في أفلام Superheroes .. قول اللي إنت عايز تقوله علي فيلم Batman V Superman: Dawn of Justice .. قول عليه فيلم أهبل .. قول عليه فيلم ميستحقش يتشاف .. بس خلينا نقول إن إسلوب شخصية (ليكس لوثر Lex Luther) إنه يخلي أكبر إتنين Superheroes في العالم اللي هم Batman و Superman يتخانقوا مع بعض عن طريق إنه يزرع شوية معلومات غلط في النص فكل واحد يتخيل إن التاني هو شيطان ماشي علي الأرض و يبقي كل واحد متخيل إنه بيخدم العدالة الإلهية لمجرد إنه عايز يدمر الثاني دي هي الفكرة اللي مجتمعنا نفسه بيتدمر بيها .. إحنا فيه أطراف عماله تزرع فينا أفكار غلط بحيث نفضل كارهين بعض و بنتخانق مع بعض .. ده حيرجعنا للسؤال اللي سألناه في أول المقالة: هو إحنا فعلاً محتاجين Superheroes في حياتنا؟
عشان تجاوب علي السؤال ده خدلك بصه علي الأشرار اللي في أفلام Superheroes و إنت حتعرف الإجابة لوحدك:
عندك واحد زي (كيلمونجر Killmonger) الشرير في فيلم Black Panther و اللي قدمه الممثل (مايكل بي جوردان Michael B Jordan) .. ده رجل بيتكلم بمنطق لما تفكر فيه تلاقيه الصراحة عداه العيب .. المفروض إن واكاندا الإمبراطورية اللي في الفيلم و المتقدمة علمياً بشكل مبالغ فيه عن باقي العالم عملت نفسها زي شخصية (بركات) اللي قدمها (سعيد صالح) الله يرحمه في فيلم سلام يا صاحبي في المشهد بتاع قسم البوليس قال يعني ميعرفش حاجة و مش شايف اللي بيحصل .. إزاي واكاندا سابت العبودية و الاستعمار و الحروب تدمر أفريقيا و معملتش حاجة .. زيها زي إمبراطورية ثيماسكيرا Themiscyra في فيلم Wonder Woman .. في أخر الفيلم (كيلمونجر) بيموت بس لو فكرت فيها هو اللي إنتصر لإن Black Panther إقتنع إن خلاص مينفعش واكاندا تفضل مستخبية كده .. هو إقتنع إن فعلياً Black Panther مكنش هو البطل ولا حاجة .. مفيش بطل بسيب ملايين تموت لمجرد إنه خايف علي ثروته تضيع.
مثال تاني هو (هيلا Hela) اللي قدمتها الممثلة (كيت بلانشيت Kate Blanchett) في فيلم Thor: Ragnarok .. هو فيلم أهبل أقرب ما يكون لفيلم كوميدي معاك في دي .. بس فكرة الفيلم مبنية كلها علي الكذب .. إزاي إن مجد إمبراطورية أسجارد Asgard إتبني كله علي الاستعمار .. لما (هيلا) دخلت قاعة البلاط الملكي و بصت في الجدارية اللي في السقف و إزاي إن أبوها (أودين Odin) فرحان أوي بالثروة و الإمبراطورية اللي عملها بس مكسوف و خجلان يقول هو جابها إزاي .. بعد كده (هيلا) وقعت الجدارية عشان تكشف عن الجدارية الحقيقية اللي تحتها .. إزاي إن أبوها كان أبسط حاجة بيعملها لما بيلاقي نفسه قدام مشكلة إنه بيخفي المشكلة و خلاص.
مثال تالت هو شخصية الصقر Vulture الشرير في فيلم Spider-Man: Homecoming اللي قدمها الممثل (مايكل كيتون Michael Keaton) .. المشكلة كلها إن بعد معركة نيويورك اللي في فيلم Avengers الحكومة كانت بتدور علي شركات قطاع خاص تنظف المدينة بعد الدمار اللي حصل فيها وكانت شركته ناوية تخش المناقصة و تسترزق بقرشين حلوين بس شركته فلست لما خسرت المناقصة عشان الحكومة عملت صفقة مع (توني ستارك) اللي هو Iron Man اللي هو السبب في كل اللي حصل عشان هو ياخد فلوس و ينظف المدينة .. شخصية Vulture طلعت بسبب الفساد .. الفساد اللي خلي سوبرهيرو/رجل أعمال عشان يضمن إنه يستفيد بكل التكنولوجيا بتاعة المخلوقات الفضائية اللي حاولت تغزو الأرض يقوم مخلي شركات صغيرة تانية تفلس .. الفساد اللي كان هو المحور اللي فيلم The Dark Knight Rises إتبني عليه .. حاول تفتكر إن الشرير اللي في الفيلم (باين Bane) عمل خطة جهنمية عشان يخلي (بروس واين Bruce Wayne) يفلس و يخسر كل أملاكه .. فكرة (باين) إنه يدمر النظام القائم لإنه بقي فاسد و مينفعش يكمل و لازم الفوضي اللي عايزها تحصل تبقي زي النار اللي تاكل كل حاجة لحد ما كل حاجة تدمر و الناس يبدأول يبنوا تاني علي نظافة.
ده حيودينا للكلام عن (ثانوس Thanos) أخطر و أكبر شرير إتعمل في كل أفلام مارفل و شفناه في فيلم Avengers: Infinity War .. ده رجل حسبها بالورقة و القلم .. هو شايف إن الكون سكانه عمالين يزيدوا و الموارد عماله تقل لحد ما في لحظة الميزان كله حيقع .. الحل إننا نضحي بالنص عشان النص يعيش .. (ثانوس) مش زي (هيلا) كل همه الإنتقام .. ولا هو زي (كيلمونجر) عايز يحكم إمبراطورية كبيرة عشان يسيطر بيها علي العالم ولا هو حتي زي (باين) شايف إن البشر دول ميسووش يعيشوا فلازم نخلص منهم كلهم .. ده رجل زي ما قلتلك حسبها بالورقة و القلم .. هل تفتكر بقي إحنا محتاجين Superheroes؟ .. الحقيقة إن رأيي هو لا .. إحنا مش محتاجينهم لإنهم مبيعملوش حاجة غير إنهم بيخربوا الدنيا .. اللي إحنا محتاجينه إننا نبقي كلنا متحدين مع بعض و ننسي خلافاتنا لإننا مع بعض كلنا حنبقي أقوي من أي Superhero إنت ممكن تكون قريت عنه أو شفته في أي فيلم.
المصدر:
مقالة بعنوان What if superheroes aren’t really the good guys?يعني طب إفرض لو الأبطال الخارقين مش هم الطيبيين؟ .. نشرت في جريدة The Guardian البريطانية و ده لينك المقالة الأصلية:
https://www.theguardian.com/film/2018/apr/27/what-if-superheroes-arent-really-the-good-guys
