لينك التسجيل الصوتي للمقالة علي Sound Cloud:
https://soundcloud.com/user-112011687-312727988/m34utq7opkc3
في أي حرب في الدنيا دايماً بيبقي فيه صورة لجندي أو مجموعة جنود بيرفعوا علم الدولة المنتصرة فوق مكان كان بيعتبر رمز لقوة و عظمة الدولة المنهزمة .. يعني مثلاً فيه صورة شهيرة أوي لجندي مصري بيرفع العلم فوق خط برليف في حرب أكتوبر 1973 .. مثال تاني هي صورة رفع العلم الأميريكي فوق جزيرة إيوجيما اليابانية في الحرب العالمية الثانية .. الإتحاد السوفيتي بقي ليهم الصورة اللي حنتكلم عنها النهاردة دي:
الصورة دي إتصورت يوم 2 مايو 1945 و صورها المصور الفوتوغرافي السوفيتي (يفجيني خالداي Yevgeny Khaldei) لإتنين عساكر سوفييت بيرفعوا العلم السوفيتي فوق مبني البرلمان الألماني الرايخشتاج Reichstag .. السؤال بقي دلوقتي اللي حنحاول نجاوب عنه في المقالة دي هو: مين هم الإتنين العساكر دول؟
لسنين الكريملين أو الحكومة السوفيتية فضلت تقول إن الإتنين العساكر المتصورين في الصورة دول هما واحد عسكري إتولد في جيورجيا إسمه (ميليتون كانتاريا Meliton Kantaria) و عسكري إتولد في روسيا إسمه (ميخائيل ييجوروف Mikhail Yegorov) و الإتنين دول إعتبروهم في الإتحاد السوفيتي أبطال و عاشوا طول حياتهم في غني فاحش سببه إن الإعلام السوفيتي الرسمي صورهم بإنهم نموذج مشرف للعسكرية السوفيتية .. فضل المواطن السوفيتي مصدق الكلام ده من سنة 1945 لحد سنة 1991 لما إنهار الإتحاد السوفيتي و صحي المواطن الروسي علي خبر إنه لمدة 46 سنة كان عايش مضحوك عليه لإن الحقيقة المرة إن الإتنين العساكر دول مش هما اللي متصورين في الصورة .. بعد 46 سنة إكتشف المواطن الروسي إن الحقيقة إن الإتنين العساكر اللي رفعوا العلم السوفيتي فوق مبني الرايخشتاج في الصورة الشهيرة دي هما (أليوشا كوفاليوف Alyshoa Kovalyov) و (عبدالحكيم إسماعيلوف Abdulkhakim Ismailov)
اللي حنحاول نعمله في المقالة إننا نجاوب علي سؤالين مهمين:
- هو إيه اللي حصل في يوم 2 مايو 1945؟ و إيه هي الحقيقة ورا مين فعلاً اللي رفع العلم السوفيتي فوق مبني الرايخشتاج؟
- ليه الحكومة السوفيتية كذبت و قالت للعالم إن اللي رفع العلم إتنين عساكر واحد روسي و التاني جيورجي؟
القيادة السوفيتية كانت بدأت تضغط علي الجنود السوفييت اللي كانوا بيحاربوا الألمان من بيت لبيت في قلب العاصمة برلين إنهم لازموا ينجحوا إنهم يسيطروا علي مبني الرايخشتاج قبل يوم 1 مايو اللي هو عيد العمال العالمي .. قال يعني بيتزامن اليوم اللي يقع فيه البرلمان الألماني نفس اليوم المجيد اللي بيحتفل فيه كل الشيوعيين بالعامل البسيط .. عارفين أنتوا كلام الإنشاء اللي ميأكلش عيش ده .. لما جه يوم 1 مايو 1945 و مكنش لسه مبني البرلمان وقع في يد السوفييت حاولوا إنهم ياعيني يرموا أعلام الإتحاد السوفيتي بالطائرات فوق المبني علي أمل إن علم فيهم نصيبه يجي إنه ينزل واقف علي أي راية كأنه علم مرفوع و يصوروه و ياخدوا اللقطة قال يعني كده المبني سقط في إيدهم بس طبعاً الطريقة دي مجابتش نتيجة.
لحد يوم 30 إبريل كان الألمان مسيطرين علي مبني الرايخشتاج علي أساس إن (أدولف هتلر) كان شايف إن المبني ده رمز صمود النازية فمينفعش بأي حال إنه يسقط في إيد السوفييت و عشان كده المبني ده لوحده كان بيدافع عنه 1000 جندي ألماني .. ده في الوقت اللي السوفييت كانوا مصرين علي إن لازم المبني ده يقع في إيدهم كرمز لسقوط النازية .. بداية من يوم 1 مايو صدرت الأوامر ل9 فرق سوفيتية كاملة إن ميبقاش وراها حاجة غير إن مبني الرايخشتاج ده يقع .. القتال كان عنيف و من أوضة لأوضة لحد ما أخيراً الجنود السوفييت وصلوا للسطوح و الكلام ده كان الساعة 10:30 مساء يوم 1 مايو 1942.
بناء علي كلام فيلم وثائقي إسمه الوطن ينادي The Motherland Calls بيحكي تضحيات الجنود الكازاخستانيين اللي خدموا في الجيش السوفيتي خلال الحرب العالمية الثانية اللي السوفييت كانوا بيسموها الحرب الوطنية العظمي Great Patriotic War فاللي حصل إن الفصيلة 674 من الجيش الأحمر السوفيتي كانت من أوائل القوات اللي إقتحموا مبني الرايخشتاج و كان فيه مصور سينمائي حربي إسمه (رومان كارمين Roman Karmen) و صورته عندك ماسك كاميرا في الصور .. الرجل ده كانت وظيفته إنه يشيل كاميرا فيديو عشان يصور فيلم حي لعملية إقتحام المبني .. الأخ (رومان كارمين) قال في شهادته في الفيلم الوثائقي إن جاتله تعليمات بإن اللي لازم يرفع العلم السوفيتي فوق مبني الرايخشتاج يكونوا إتنين عساكر واحد روسي و التاني جيورجي و لو حصل إن أي إتنين عساكر غير كده هم اللي رفعوا العلم فمطلوب منه إنه يوقف تصوير.
عشان أقربلك الصورة تخيل كده إن القيادة العسكرية المصرية قالت للمراسلين الحربيين اللي كانوا بيصوورا حرب أكتوبر لو أول عسكري مصري رفع العلم فوق خط بارليف كان مسيحي مثلاً متصوروهوش .. الفكرة إن السوفييت كانوا مقتنعين بإن الروس و الجيورجيين هم السوفييت اللي بحق و حقيقي و أي حد تاني ده كان عايش في دولة والروس سيطروا عليها فده بيخليه بشكل أو بأخر مواطن سوفيتي درجة ثانية مسيتحقش إنه ينول شرف رفع العلم السوفيتي فوق مبني الرايخشتاج .. لكن (رومان كارمين) بيقول إنه وسط الحماس و القتال نسي إنه يبطل تصوير و فعلاً هو بيقول إنه مصور فيديو محفوظ في الأرشيف العسكري و باين فيه أول إتنين عساكر رفعوا العلم السوفيتي فوق المبني كانوا (راخمزهان كوشكارباييف Rakhimzhan Koshkarbaev) و (جيورجيج بولاتوف Georgij Bulatov).
اللي حصل إن الإتنين العساكر دول (راخمزهان كوشكارباييف) و (جيورجيج بولاتوف) كانوا ضمن فريق مكون من 5 أفراد بقيادة واحد إسمه (ميخائيل مينين Mikhail Menin) رتبته رقيب في الجيش السوفيتي و ال5 دول كانوا أول ناس تقدر توصل لسطح الرايخشتاج و فعلاً قدروا يوصلوا للسطوح يوم 1 مايو الساعة 10:30 بليل بس مش هما دول الإتنين عساكر اللي المصور (يفجيني خالداي) صورهم في صورته الشهيرة و دي معلومة أكدها سنة 2007 معهد التاريخ العسكري الروسي في بيان رسمي .. تاني يوم بقي اللي هو يوم 2 مايو لما الصبح طلع .. (يفجيني خالداي) صور الصورة الشهيرة بتاعته و كان وقتها الإتنين عساكر اللي رافعين العلم كانوا (أليوشا كوفاليوف) و (عبدالحكيم إسماعيلوف).
(أليوشا كوفاليوف) و (عبدالحكيم إسماعيلوف) إتعرضوا لضغوط رهيبة من المخابرات السوفيتية KGB عشان يفضلوا ساكتين و ميقولوش لحد الحقيقة و مش هم بس اللي إتعرضوا لتهديدات لإن كمان (راخمزهان كوشكارباييف) و (جيورجيج بولاتوف) إتهددوا و لما (جيورجيج بولاتوف) مقدرش يمسك نفسه و حس إنه لازم يقول الحقيقة سنة 1955 الجيران لقوه مشنوق في شقته .. ده كان المستوي اللي كانت ممكن المخابرات السوفيتية توصله من التدني عشان تحمي الكذبة اللي هم رسموها وهي إن المجد السوفيتي صنعه أبناء روسيا مش ولاد كازاخستان أو أرمينيا أو أي دولة مسلمة إنضمت للإتحاد السوفيتي .. بشكل أو بأخر السوفييت ميفرقوش في عنصريتهم عن النازيين ودي الحقيقة اللي ياريت تكون في دماغك.
المصدر:
مقالة بعنوان This is The Story Behind The Red Army’s Most Iconic WWII Photo نشرت في Website إسمه Business Insider و ده لينك المقالة الأصلية:
http://www.businessinsider.com/story-behind-the-red-armys-most-iconic-wwii-photo-2017-5
