الكوميديان الأميريكي الراحل (جورج كارلن George Carlin) كان له حفلة مشهورة أوي إتكلم فيها عن هوس الأمريكان كشعب وكحكومة بفكرة الحرب .. وجهة نظره إن الأمريكان شاطرين في الحروب عشان بيعملوها كتير .. فكر فيها كده .. أميركا بلد عمرها حوالي 200 سنة بس لما تبص علي تاريخها تلاقيها دخلت فوق العشر حروب وحروب من العيار التقيل يعني .. إنت بتتكلم عن بلد بتخش حرب تجيب عاليها واطيها بمعدل حرب كل عشرين سنة وده يمكن سر الهيمنة الأميريكية إن إقتصادهم أساساً هو قائم علي فكرة بيع الأفكار اللي بيتصرف عليها من تمويل الحروب أو من برنامج الفضاء .. حالياً في الوقت اللي إحنا فيه أميركا مش في حالة حرب مع حد لإنهم إنسحبوا من أفغانستان بس ده لا يمنع إن ليهم 2500 عسكري في العراق لحد دلوقتي .. لسبب ما لا يعلمه إلا الله ليهم فوق 900 عسكري في سوريا .. القوات المسلحة الأميريكية بتفكرني بالنادي الأهلي أوي اللي هو مش مشكلة الأهلي يخسرله كام ماتش لإنه في الأخر حياخد الدوري كله .. الدور والباقي علي الزمالك وبيراميدز .. بمعني أخر المشكلة في روسيا والصين وده للي عايزين نتكلم عنه النهاردة وهو محاولة الإجابة عن سؤال واحد بسيط وتافه جداً .. هو ياتري لو بكره الصبح الصين دخلت حرب مع حد وخصوصاً أميركا حتعرف تكسبها؟
حاول تتخيل إن الحروب زيها زي لما تيجي تلعب كورة خماسي مع صحابك .. لو إنت بتلعب كتير لياقتك حتبقي حلوة وبالتالي حتبقي قادر تلعب .. لو بتلعب كل فين وفين إنت حتشحر في أول عشر دقايق .. لما تيجي تسأل نفسك هو ياتري السجل التهديفي للقوات المسلحة الصينية عامل إزاي فإنت حتكتشف إنهم حرفياً وبدون أدني مبالغة هم ملهمش فيها .. أخر حرب كبيرة تخشها الصين كانت الحرب الكورية اللي خلصت سنة 1952 .. أخر حرب في المطلق تخشها الصين كانت عركة بسيطة كده مع فيتنام خلصت سنة 1979 .. عشان ترجع لأخر مرة القوات البحرية الصينية شاركت في معركة عليها القيمة إنت لازم ترجع بالزمن لأيام ما (أحمد عرابي) الله يرحمه كان بيهق الخديوي (توفيق) الله يرحمه في نص الشارع .. تاني نرجع ونسأل .. هو لو الصين دخلت حرب بكره الصبح حتعرف تكسبها؟
اللي بتعمله المؤسسة العسكرية الصينية دلوقتي إنها بتنشر نفوذها علي مستوي العالم براحة وبشويش ومن غير شوشرة .. هل تعلم إن ليهم قاعدة عسكرية في جيبوتي ولمن لا يعلم برده جيبوتي هي دولة عربية بتطل علي مضيق باب المندب؟ .. هل تعلم إن القوات البحرية الصينية ليها قاعدة بحرية في مدينة جوادر الباكستانية؟ .. هل تعلم إن القوات المسلحة الصينية ليها قاعدة عسكرية في طاجيكستان وليهم قاعدة تجسس في العاصمة الكوبية هافانا؟ .. وهي دي الفكرة .. الصين عايزة تبقي دحلاب مش عايزة تبقي بلدوزر ودي نقطة مهم تبقي فاهمها .. عشان أي بلد شايفة نفسها قوة عظمي تفرض نفسها علي العالم ففيه طريقتين متجربين .. الطريقة الأولانية هي الدراع .. الطريقة الثانية هي اللي بتعمله الصين وهي إننا نبقي موجودين من غير ما نعمل مشاكل .. السؤال دلوقتي هو ليه الصين مقررتش تمشي بالطريقة الأولانية؟ .. هو الدراع قصر معاهم في حاجة لا سمح الله؟
بص علي الدول اللي مشيت بالدراع .. فرنسا لما الحرب العالمية الثانية خلصت كانت عايشة دور القوة العظمي .. خلال الفترة من 1945 اللي هي السنة اللي إنتهت فيها الحرب العالمية الثانية لحد سنة 1956 اللي هي سنة العدوان الثلاثي علي مصر يعني بتتكلم خلال عشر سنين بس القوات المسلحة الفرنساوية بعزقتلها فوق الثلاثة مليار فرانك اللي هو لو حتحولها بفلوس اليومين دول فإنت بتتكلم عن حوالي 6.8 مليار دولار .. خراب بيوت مستعجل .. راحت فين الفلوس دي كلها؟ .. إتصرفت وفوقيهم مقتل حوالي 100,000 عسكري فرنسي في حروب لا قدمت ولا أخرت من أول مصر لحد فيتنام و أندونيسيا .. ومش لوحدهم خلي بالك .. خلال نفس العشر سنين دول بريطانيا وهولندا والبرتغال خسروا كل مستعمراتهم حول العالم وصحيح أنا ضد فكرة تحميل إنهيار الإتحاد السوفيتي علي شماعة غزوهم لأفغانستان بس خلينا نتفق إن لولا الفلوس المتلتلة اللي إتصرفت في الحرب اللي ملهاش لازمة دي كان ممكن الإتحاد السوفيتي كان عاش كام سنة زيادة .. دي الدروس اللي الصين إتعلمت منها والمطبات اللي مش عايزة تلبسها بس ده مش معناه إن اللي هم بيعملوه ده سكته سالكة مفيهوش مشاكل لإن الحقيقة الخازوق اللي ممكن يهد فلسفة الصين دي كلها هي خوفها الأزلي من الإسلام.
الصين دولة بيحكمها حاجة إسمها الحزب الشيوعي الصيني وده معناه إن فلسفة الحكم في البلد الغريبة دي هي إن الدين في المجمل ده حاجة ملهاش أي معني وملهاش لازمة وأساساً يعني مفيش حاجة إسمها ربنا .. كنت إتكلمت قبل كده عن قمع الحكومة الصينية لأقلية الإيغور ومن ضمن اللي قلته إنك لما تيجي تبص علي الورق بتاع المؤسسات الحكومية الصينية حتلاقيهم بيقولوا حاجة غريبة جداً وهي إنهم شايفين التدين إنه مرض عقلي أو Mental Illness .. الناس دي مقتنعة إنك معني إنك تبقي مسلم بتصلي الفروض الخمسة بتاعتك وبتصوم شهر رمضان ولو معاك فلوس وصحتك مساعداك تروح تحج فده ملوش غير معني واحد وهو إنك شخص مريض نفسي مكانك هو مستشفي المجانين .. ده معناه إيه؟ .. معناه إن لو أنا لو مثلاً شغال في السلك الدبلوماسي المصري ورحت في زيارة رسمية للصين فلو قلتلهم إني رايح أصلي الظهر فتخيل للحظة كده إن الدبلوماسي الصيني اللي أنا رايح أمضي معاه إتفاقية إقتصادية إياكش حتي عشان الصين تستورد مننا حرنكش هو شايف إني بني أدم مريض نفسي رايح أصلي اللي هي أساساً حاجة هو شايف إن مبيلعمهاش غير المجانين .. عند مرحلة معينة العلاقة مع بلد شايفاك مريض نفسي حتوصل للخناق .. فيه مرحلة محدش عارف حتيجي إمتي وإزاي فكرة إن محدش بيقول للرزق لا مش حتبقي كافية إن الصين تحافظ علي علاقاتها الإقتصادية مع الدول الإسلامية.
الصين دلوقتي بتحاول وليها فعلاً وجود تقيل في مناطق عايش فيها مسلمين سواء كنت بتتكلم عن أفريقيا أو إيران أو الخليج أو أفغانستان .. الناس دي لسه مراعية إتفاق إقتصادي غريب الشكل بين السعودية وإيران.. توقعي الشخصي اللي معرفش حيتحقق إمتي عاجلاً أم أجلاً فيه حد حيغلط .. حيحصل موقف يعمل خناقة وساعتها الوجه الحقيقي للصين حيبان .. لحظتها بس إحنا كمسلمين حنشوف بعنينا إن الصينيين مش عايزين لينا الخير وساعتها القوات المسلحة الصينية حتتحط في أهم إختبار ليها .. إختبار فشلت فيه الإمبراطورية البريطانية السوفيتية والأميريكية ومن قبلهم الإمبراطورية البيزنطية وبعدها أوروبا العصور الوسطي والإمبراطورية المغولية .. إختبار هل نقدر نخلص علي الإسلام؟ .. في رأيي الشخصي شهر العسل بين المسلمين وبين الصينيين القائم علي إن الفلوس بتعمي عين أي حد حينتهي وحنبدأ نجرجر بعض في محاكم الأسرة.
المصدر:
- مقالة بعنوان Why China Doesn’t Fight Wars نشرت في موقع MSN وده لينك المقالة الأصلية:
https://www.msn.com/en-us/news/world/china-doesn-t-fight-wars/ar-AA1dGC0l
