لينك التسجيل الصوتي للمقالة علي Sound Cloud:
https://soundcloud.com/user-112011687-312727988/m5im9ylurp6q?si=1e463b6767ae4be3be2df4702b2e4917&utm_source=clipboard&utm_medium=text&utm_campaign=social_sharing
كان يا مكان كان فيه حاجة زمان إسمها الإتحاد السوفيتي .. جيل الألفينات بتوع اليومين دول فيه كتير منكوا ميعرفوش حاجة عن البتاعة دي وأنا عاذركوا الحقيقة .. إزاي في عصر PUBG و TikTok أكلمك عن الحرب الباردة؟ .. إنت غالباً لو إتقالك تعرف إيه عن الحرب الباردة مخك حيوديك إن أكيد ليها علاقة بإنك تاخد شاور بارد في الشتاء .. المهم إن زمان روسيا كانت دولة فشيخة وكانت ضامة ليها كذا دولة حوليها والدول دي كلها مع بعضها مسميين نفسهم الإتحاد السوفيتي .. الإتحاد السوفيتي كان بينه وبين أميركا خناقة كبيرة أوي علي مين يفرض سيطرته علي أكتر عدد من الدول علي مستوي العالم .. تقدر تقول إن السوفييت والأمريكان كانوا بيلعبوا مع بعض بنك الحظ أو مونوبولي بس علي مستوي العالم .. فعلياً السوفييت والأمريكان مدخلوش مع بعض حرب .. هم قدام الناس مشالوش السلاح ضد بعض .. بس من تحت لتحت كانوا فاشخين بعض وعشان كده الحرب بينهم إتسمت الحرب الباردة أو Cold War.
دي كانت حرب مخابراتية وإقتصادية وسياسية وجزء مهم من الحرب دي كان تطوير الأسلحة النووية وإزاي كل دولة فيهم تخطط تضرب التانية بالنووي عن طريق الصواريخ بعيدة المدي .. مع الوقت سواء السوفييت أو الأمريكان لقوا إن الدنيا بسهولة أوي ممكن تخرج عن السيطرة .. الإتنين فارشين لبعض كم ضخم أوي من الصواريخ بعيدة المدي اللي تقدر تشيل صواريخ نووية خصوصاً في أوروبا .. ده خلي السوفييت والأمريكان يقعدوا مع بعض في عز ما الحرب الباردة كانت مولعة عشان يمضوا إتفاقيتين مهمين أوي عشان يضمنوا إن ميجيش اليوم اللي تحصل فيه الحرب النووية بينهم و لإتفاقيتين دول كانوا INF و New START وخليني أفهمك مين دول:
- إتفاقية INF دي إختصار Intermediate-Range Nuclear Forces ودي بإختصار شديد منعت السوفييت والأمريكان إن أي حد فيهم يطور صواريخ متوسطة المدي تقدر تشيل صواريخ نووية .. كلمة متوسطة المدي بتتقال علي الصواريخ اللي بتقدر تطير مسافات ما بين 500-5,500 كيلومتر .. الإتفاقية دي إتمضت سنة 1987.
- إتفاقية New START دي قبلها كان فيه إتفاقية START-1 ودي إختصار Strategic Arms Reduction Treaty ودي إتفاقية إتمضت يوم 31 يوليو 1991 وبدأ تنفيذها يوم 5 ديسمبر 1994 وبتقول إن مينفعش سواء أميركا أو روسيا يبقي أي واحدة فيهم تحت إيدها أكتر من 6000 رأس نووي ومينفعش سواء أميركا أو روسيا يبقي تحت إيدها أكثر من 1,600 صاروخ عابر للقارات ICBM وقاذفة قنابل نووية .. الإتفاقيه دي إنتهي العمل بيها في 5 ديسمبر 2009 وإتجددت تاني يوم 8 إبريل 2010 تحت مسماها الجديد New START.
طب أنا ليه بصدعك بكل ده؟ .. الحقيقة إن السبب هو إن في 2 أغسطس 2019 إتفاقية INF بين أميركا والإتحاد السوفيتي إتلغت .. في اليوم ده أميركا لغت العمل بالإتفاقية من طرف واحد ولو جيت سألت الأمريكان خير كفا الله الشر حيقولوا إن السبب هو إن روسيا هي اللي خرقت الإتفاقية دي لما إشتغلت علي تطوير صواريخ Novator 9M729 بس هو إسمه عند الغرب SSC-8 Screwdriver .. ناس تانية قالتلك لا يا جماعة أنتوا فاهمين غلط هو بس المشكلة إن مستشار الأمن القومي بتاع (دونالد ترامب Donald Trump) أو كيس الشيتوس الحجم العائلي اللي هو (جون بولتون John Bolton) واللي بالمناسبة قدم إستقالته أصل كيس الشيتوس ده بيغير في طقم المساعدين بتوعه زي ما إنت بتغير طقم البوكسرات بتوعك كده مكنش عاجبه بنود الإتفاقية وفضل يزن فوق دماغ كيس الشيتوس عشان يلغيها .. الروس علي الناحية التانية قالك لا بقي ده الأمريكان هم السبب لما عملوا قاعدة صواريخ إسمها إيجيس أشور Aegis Ashore في رومانيا وحاطين فيها صواريخ تقدر تضرب العاصمة موسكو .. إنت لو دخلت نفسك في ساقية إسأل روحك مين إستني ومين إستغني وباع ببلاش فإنت حتفضل تلف حول نفسك زي الجاموسة ومش حتوصل لحاجة .. إنت أساساً لما بتسأل نفسك هو مين الغلطان فإنت بتسأل السؤال الغلط .. السؤال اللي إنت محتاج تسأله هو ليه الأمريكان والروس مقعدوش مع بعض وحلوا الموضوع ودي بينهم؟ .. لو عايز تعرف الإجابة بص علي التاريخ اللي إتفاقية INF وإتفاقية START-1 إتمضوا فيه .. خدت بالك من حاجة؟
إتفاقية INF إتمضت لما كان إسم الإتحاد السوفيتي لسه فيه الروح .. أيام ما كان ماسك أميركا (رونالد ريجان Ronald Reagan) اللي مكنش عنده لبانة في بقه غير سيرة الإتحاد السوفيتي وإن الأمريكان ممكن يصحوا الصبح يلاقوا العساكر الروس ماشيين في شوارع أميركا يقتلوا في الناس .. عكس إتفاقية START-1 اللي إتمضت أيام ما كان اللي ماسك الإتحاد السوفيتي واحد إسمه (ميخائيل جورباتشوف Mikhail Gorbachev) اللي مسك الحكم سنة 1985 وإكتشف أول ما مسك إن اللي قبله واللي قبل اللي قبله زي ما تقول كده مسكوا شاكوش وأزميل وقعدوا يهدوا طوبة طوبة في الإتحاد السوفيتي ويمكن مصيبة غزوهم لأفغانستان واللي إتكلمت عنها قبل كده أكبر دليل .. إتفاقية START-1 إتمضت لما خلاص الطب الشرعي قال إن الإتحاد السوفيتي مات والناس مشيت في جنازته ودفنته .. بس يمكن أهم نقطة تفرق التوقيت اللي إتمضت فيها INF عن التوقيت اللي إتمضت فيه START-1 هو إن مكنش فيه وقتها الصين.
صرف الأمريكان علي السلاح أحياناً بيوصل لمرحلة السفه .. الناس دي الميزانية العسكرية بتاعتهم 649 مليار دولار في السنة .. عشان بس أحطك في الصورة فيه عندك رسم بياني بيوريك مين أكتر 10 دول في العالم بتصرف علي جيوشها .. لو جيت تجمع الفلوس اللي التسع دول التانيين بيصرفوها علي جيوشهم حتلاقي إن مجموعهم 699 مليار دولار .. يدوبك أعلي من الإنفاق الأميريكي علي السلاح بحاجه بسيطة .. بس فيه نقطة .. في ال30 سنة اللي فاتوا حجم الإنفاق العسكري الصيني نط من 20 مليار دولار في السنة عشان يبقي 250 مليار دولار دلوقتي .. أظن السؤال هو هل ده معناه إن أميركا مش حقول دلوقتي بس خلال السنين الجاية مش حتبقي هي القوة العسكرية الأعظم في العالم؟
الحقيقة إن الإجابة هي قطعاً لا .. الحاجة الوحيدة اللي القوات المسلحة الصينية بتتفوق فيها علي القوات المسلحة الأميريكية هو عدد أفراد القوات المسلحة اللي في الخدمة مش اللي في الإحتياط وده اللي بيورهولك الرسم البياني اللي عندك .. غير كده القوات المسلحة الأميريكية بتتفوق في كل حاجة .. سنين الصرف علي التسليح خلت عندهم عدد طيارات ودبابات وأقمار صناعية وقطع بحرية أكتر بكتير من أي قوات مسلحة تانية علي الأرض .. فوق ده كله إن مفيش قوات مسلحة في العالم متوزعة علي مستوي الكرة الأرضية زي القوات المسلحة الأميريكية .. الوجود العسكري الأميريكي متوزع علي ما بين 50-80 دولة عن طريق 800 قاعدة عسكرية يعني بتتكلم عن شاكب راكب حوالي 200,000 عسكري أميريكي بيخدموا بره حدود أميركا .. علي الناحية الثانية الصين ملهاش إلا 3 قواعد عسكرية بره أرضها .. واحدة في جيبوتي ودي إتكلمنا عنها قبل كده في مقالة وواحدة في طاجيكستان وواحدة في كمبوديا .. ده غير إن ليهم قوات بتخدم ضمن قوات حفظ السلام التابعة للأمم المتحدة في دول أفريقية كتير زي جمهورية الكونجو الديموقراطية ومالي والسودان وجنوب السودان .. القوات المسلحة الأميريكية فيها ميزة وعيب .. الميزة إن تفوقها العسكري بيخليها تقدر تبعت قواتها لبلد بعيد فشخ عن حدود أميركا وتفضل تحارب فيها لسنين .. حربهم في أفغانستان واللي برده غطيناها في مقالة قديمة تثبتلك ده .. بس العيب هو إن التفوق العسكري ده مش معناه بالضرورة إنهم ضامنين النصر في كل حرب يدخلوها .. تاني حربهم في أفغانستان هي أكبر دليل علي ده.
يمكن أكبر نقطة خلافية بتتقال لما تيجي تقارن بين قوة الجيشين الأميريكي و الصيني هي حاملات الطائرات .. ناس تقولك إن أميركا متقدرش تستخدم حاملات الطائرات بتاعتها ضد الصين عشان الصين مطورة صواريخ بعيدة المدي مضادة للسفن .. ناس تانية تقولك إن أساساً عشان تصطاد حاملة طائرات فإنت محتاج أولاً تفضل متابع تحركات السفينة ثانية بثانية وحتي لو قدرت تعمل كده فحاملات الطائرات تقدر تدافع عن نفسها .. خناقة كبيرة ولإن مفيش طريقة إننا نحسم الخناقة دي فخلينا نتفق إن لو حصلت حرب بين الصين وأميركا فخليني أقولك إن الصين أكتر من قادرة إنها تحمي نفسها .. إذا كانت أميركا عندها حاملات طائرات فالصين بنت مجموعة جزر صناعية جوه بحر الصين الجنوبي والجزر الصناعية دي فيها مطارات عسكرية ففعلياً الجزر دي تقدر تقول عليها حاملات طائرات ثابتة .. في نفس الوقت الصين عندها أسطول غواصات محترم .. صحيح عدد الغواصات النووية بتاعتها يتعد علي الصوابع بس عندهم أسطول من الغواصات التقليدية وده بيخلي فعلياً إن لو أميركا حبت تشتبك مع الصين برياً فأميركا مش حتلاقي مكان ينفع مثلاً تعمل إنزال بري لقوات المارينز .. بس أيا كان رأيك في القوات المسلحة الصينية لازم تفهم إن أميركا بقالها أكتر من 50 سنة بتصرف أرقام خزعبلية علي القوات المسلحة.
أنا بس عايز أوريك يعني إيه دولة تصرف 699 مليار دولار خلال سنة واحدة اللي هي سنة 2018 علي الدفاع .. سنة 2018 فاتورة شركة لوكهيد مارتن Lockheed Martin أكبر شركة أسلحة في أميركا اللي وزارة الدفاع دفعتها ليها كانت 40.5 مليار دولار .. دي فاتورة شركة واحدة في سنة واحدة .. عارف ال40.5 مليار دولار دول قد إيه؟ .. دول أكبر من الميزانية العسكرية لدولة بحجم البرازيل اللي يدوبك بتصرف 30.7 مليار دولار علي قواتها المسلحة .. من 699 مليار دولار وفق القانون الأميريكي فمن حق وزارة الدفاع تاخد منهم 81 مليار دولار تصرفهم في مشاريع سرية مش من حق حد يعرف هي إيه .. عارف ال81 مليار دولار دول قد إيه؟ دول أكبر من الميزانية العسكرية الروسية اللي بتوصل في السنة 61 مليار دولار .. يا مؤمن ده لما وزارة الدفاع طلبت من شركة ماكينزي McKinsey للإستشارات المالية إنهم يراجعوا الميزانية العسكرية عشان يعرفوا إيه هي المصاريف اللي بتترمي علي الأرض وممكن بشوية إجراءات تتوفر فالشركة لقت إن كل سنة وزارة الدفاع بترمي 25 مليار دولار .. 25 مليار دولار بيترموا زي الزبالة كل سنة مع إن الميزانية العسكرية لبلد زي إيطاليا اللي تعتبر ثامن أقوي إقتصاد في العالم 26 مليون دولار.
حالياً القوات المسلحة الصينية بقت فعلياً أكبر تهديد للأمن القومي الأميريكي لدرجة إن الأمريكان نفسهم بقوا بيقولوا إن إحنا محتاجين يبقي عندنا قاعدة عسكرية في أسيا حاطين فيها صواريخ متوسطة المدي اللي هي نفس فئة الصواريخ اللي معاهدة INF بتمنع أميركا من تطويرها .. الأمريكان بصوا للوضع دلوقتي وقالوا لنفسهم تولع إتفاقية INF .. الإتفاقية دي إتعملت لما كان السوفييت والأمريكان بينشروا صواريخهم قصاد بعض في أوروبا .. دلوقتي الوضع إختلف .. دلوقتي أميركا محتاجة تنشر صواريخها في أسيا عشان توقف الصين عند حدها.
علي فكرة الأمريكان حاولوا يقنعوا الصين إنهم ينضموا لإتفاقية INF .. ولو حطيت نفسك مكان الصينيين حتلاقي إن الناس دي عندها حق فشخ الصراحة .. معلش يعني إحنا كصينيين معندناش نفس عدد الرؤوس النووية سواء اللي تحت إيد الروس أو الأمريكان فإيه اللي يخليني أمضي علي إتفاقية حتخلي روسيا عندها عدد رؤوس نووية وصواريخ متوسطة المدي أكتر مني؟ .. اللي يخض فعلياً ويخليك تقلق هو إن الروس ولا كأنهم مهتمين إن إتفاقية INF تتلغي .. الروس محاولوش يقنعوا لا الأمريكان ولا الأوروبيين إن إحنا مظلومين وإن صاروخ 9M729 ده غلبان والله ومش زي ما أنتوا فاكرين .. الروس شافوا INF بتموت وسابوها تموت .. ليه؟ .. عشان الروس هم كمان قلقانين من الصين .. ميغركش إن قدام الناس كل ما (فلاديمير بوتين Vladimir Putin) يشوف (جي جينبينج Xi Jinping) ياخدوا بعض بالحضن .. لا خالص .. إنت دلوقتي في سباق تسلح جديد بين الروس والصينيين .. الإتنين دلوقتي شغالين علي جيل جديد من الصواريخ اللي هو Hypersonic Missiles ودي صواريخ مداها متوسط بس بتطير بسرعات بتوصل أضعاف سرعة الصوت .. ركب رأس نووي علي الصواريخ دي وحيبقي عندك صاروخ بيقدر يضرب عدوك برأس نووي قبل ما إنت تفتح عينك وتغمضها .. هو صحيح يبان سباق بين تلاتة اللي هم روسيا وأميركا والصين بس توقعي الشخصي إن الروس حيشحروا بدري بدري .. أيام ما كان الإتحاد السوفيتي في عزه لما دخل في سباق تسلح مع أميركا خسره .. روسيا دلوقتي مواردها متجيش نص موارد الإتحاد السوفيتي .. إحنا داخلين علي أيام سودا بس مسلية .. فشارك وبيبسيك وإتفرج معايا.
المصادر:
- مقالة بعنوان The Limits of Chinese military power نشرت في مجلة MIT Technology Review وده لينك المقالة الأصلية:
ps://www.technologyreview.com/s/614561/the-limits-of-chinese-military-power/ - مقالة بعنوان The INF treaty is dead, and Russia is the biggest loser نشرت في مجلة Foreign Policy وده لينك المقالة الأصلية:
ps://foreignpolicy.com/2019/08/02/the-inf-treaty-is-dead-and-russia-is-the-biggest-loser/ - مقالة بعنوان In Central Asia’s forbidding highlands, a quiet newcomer: Chinese troops نشرت في جريدة The Washington Post وده لينك المقالة الأصلية:
https://www.washingtonpost.com/world/asia_pacific/in-central-asias-forbidding-highlands-a-quiet-newcomer-chinese-troops/2019/02/18/78d4a8d0-1e62-11e9-a759-2b8541bbbe20_story.html - مقالة بعنوان Why China can’t target US aircraft carriers نشرت في مجلة Forbes وده لينك المقالة الأصلية:
https://www.forbes.com/sites/lorenthompson/2019/08/09/why-china-cant-target-u-s-aircraft-carriers/#266b3f40716a - مقالة بعنوان Revealed: US intelligence chief clarifies the nature of Russia’s INF treaty violations نشرت في مجلة The Diplomat وده لينك المقالة الأصلية:
http://thediplomat.com/2018/12/revealed-us-intelligence-chief-clarifies-the-nature-of-russias-inf-treaty-violation/
مواضيعك كلها جبارة ومفيهاش الهبد الكتير اللى الواحد بيشوفه فى النت ولا فيها شغل العواطف والمجاملات وانا بقرأ المواضيع بتاعتك ببقى مش عايز الموضوع يخلص اقسم بالله ان الموقع بتاعك ده مش واخد حقه خااااالص