مشكلة التاريخ السياسي عموماً اللي في رأيي بسببها ناس كتير بتبلم قدامه وبتلاقي نفسها عندها أزمة حقيقية في فهمه إننا كبني ادمين لما بنيجي نفهم التاريخ السياسي بننسي أهم حاجة فيه .. وهو إن التاريخ السياسي هو تاريخ للصراع بين البني أدمين وبناء عليه إنت قصاد دراسة علمية لدراما اجتماعية بين ناس عندها القدرة إنها تعور غيرها .. يمكن بسبب ده الناس اللي بتقرر تدرس التاريخ السياسي بيبقي عندها صعوبة في استيعاب إن أحداث تاريخية غيرت مسار البني أدمين نتجت عن تصرفات أقرب تشبيه ليها هو إنها تصرفات طفولية من ناس المفروض إن يبقي عندها حكمة أكتر من كده .. بمعني اخر .. تصرفات بتطلع من شخصيات درامية مكانها يبقي مسلسل أو فيلم أو مسرحية مش الواقع .. وللأسف احنا بننسي إن الدراما ما هي الا تجسيد لواقع البشر .. قصة النهاردة هي مثال حي لده .. قصة الغزو العراقي للكويت واللي الحقيقة مليانة بتفاصيل ملهاش مكان الا مسلسل درامي من تأليف حد زي الاستاذ (أسامة أنور عكاشة) الله يرحمه وفي حالة إنك من جيل الألفينات متعرفش مين هو (أسامة أنور عكاشة) فتخيل حد زي (أحمد عاطف فياض) مؤلف مسلسل بالطو ومسلسل كارثة طبيعية بعد ما يكون كتب فوق ال50 مسلسل .. قصة غزو الكويت بيحركها شخصيات مش ببالغ لو قلتلك إنك وانت معايا بحكيلك تفاصيلها حتحس إن ده فعلاً مسلسل أصل مينفعش يكون فيه ناس عادية بتتصرف التصرفات دي وهي علي كتفاها مسئولية ملايين من الناس .. بس نقول ايه .. حسبي الله ونعم الوكيل.
مشكلة تانية في قصة غزو الكويت إنها مشكلة صراع ملوش أصل تاريخي .. يعني ايه الكلام ده .. خد مثلاً عندك الصراع العربي الإسرائيلي أو خليني أبقي دقيق أكتر واسميه الصراع المصري الصهيوني .. ده صراع متولدش امبارح ولا اتولد مع حرب أكتوبر 1973 ولا حتي اتولد مع اعلان قيام دولة اسرائيل سنة 1948 .. ده صراع اصوله بترجع لأيام سيدنا (موسي) عليه السلام واتحكت قصته في القران كتير لدرجة إن اليهود وقت بعثة سيدنا النبي (عليه الصلاة و السلام) كانوا بيقولوا لولا إننا عارفين إن الوحي نزل علي سيدنا محمد لكنا قولنا إن القران ده نزل لينا من كتر ما اتكلم عن بني إسرائيل وعن الصراع بين سيدنا (موسي) وفرعون مصر والهم اللي شافه سيدنا (موسي) مع بني إسرائيل .. نفس الكلام مثلاً عن الصراع بين المملكة العربية السعودية وإيران اللي هو امتداد للصراع بين أهل السُنة والجماعة والشيعة .. بس مشكلة غزو العراق للكويت إن سواء العراق أو الكويت دي دول حديثة الولادة .. العراق والكويت زيها زي سوريا زيها زي الأردن زيها زي لبنان دول انسلخت من جسد الدولة العثمانية فالتاريخ مكنش يعرف حاجة اسمها العراق .. التاريخ يعرف حاجة اسمها ولاية البصرة .. التاريخ يعرف حاجة اسمها ولاية بغداد .. التاريخ يعرف حاجة اسمها حضارة بلاد ما بين النهرين .. التاريخ يعرف ولاية الموصل .. التاريخ يعرف الكوفة .. بس انك تفتح قوس تحط فيه الحاجات دي كلها مع بعض وتقفل القوس وتسميه العراق فهذا ما لم نسمع به من قبل .. الكويت نفس الكلام .. فانا عشان اجي افسرلك ليه العراق مسكت في رقبة الكويت فانت لازم الحكاية تتحكالك من بدري شوية .. مش من سنة 1990 لما الغزو حصل .. لا خالص .. من سنة 1890.
الفصل الأول .. بريطانيا عايزه بترول:
العالم اتشقلب حاله سنة 1861 لما الأمريكان اكتشفوا النفط في ترعة في ولاية بنسلفانيا ولما النفط طلع من الترعة دي اتسمت بعد كده ترعة النفط Oil Creek .. مع اكتشاف النفط اتعملت كذا شركة بترول صغيرة فضلوا يتجمعوا مع بعض ويتحدوا في شركات أكبر لحد ما لما جت سنة 1890 كان العالم بيسيطر عليه 3 شركات بترول .. شركة شيل Shell البريطانية .. شركة رويال داتش Royal Dutch الهولندية .. شركة ستاندارد اويل Standard Oil الأمريكية .. المشكلة بدأت تظهر لما شركة رويال داتش الهولندية استحوذت علي شركة شيل البريطانية بحيث الشركة اللي اتولدت من هذا الاستحواذ اللي هي رويال شيل Royal Shell كانت متقسمة 49% تحت ايد الانجليز و 51% تحت ايد الهولنديين .. ليه ده كان مشكلة .. الناس كلها كانت عارفه ان مستقبل الاقتصاد العالمي كان البترول .. اللي معاه بترول حيبقي قوة عظمي .. ده معناه ان رغم ان هولندا هي حليف استراتيجي لبريطانيا بس في نفس الوقت بريطانيا مش بتملك مصيرها بايدها .. السؤال دلوقتي .. انت فين يا بترول وانا اشتريك.
الانجليز بما انهم كانوا في الوقت ده قوة استعمارية كبيرة فبدأوا يفتحوا كتب التاريخ يدوروا علي أي ذكر لكلمة بترول او نفط فهم الحقيقة لقوا حاجات كتير لإن أحلي حاجة في التاريخ لما بتقراه إنك بتنبهر ازاي البشر زمان كانوا بيفكروا زينا بالضبط ويمكن احسن كمان فاكتشفوا إن مثلاً الدولة العباسية زمان كانت عندها نظام ضخ متكامل للبترول بمضخات يدوية عشان يوصلوا البترول لعمدان متوزعة في شوارع العاصمة بغداد وكل عمود بتولع بليل بشعلة ويفضل مولع زي السبرتاية كده وسبحان الله العباسيين كانوا عندهم اضاءة شوارع Street Lighting.. قبلها الدولة الأموية في عهد سيدنا (معاوية بن أبي سفيان) رضي الله عنه حاولت تدخل القسطنطينية عاصمة الدولة البزنطية بس الاسطول الاسلامي اتحرق بسبب اختراع اسمه النار الاغريقية Greek Fire اللي ما هي الا بترول مغلي بحيث بخار النفط ده بيتوجه للسفن المعادية وبتولعه بشعلة برده زي السبرتاية كده وهوبا بقي عندك قاذف لهب في العصور الوسطي.
ده معناه ان التاريخ بيقول ان فيه بترول في الحتة اللي ما بين القسطنطينية وبغداد .. المشكلة ان سواء القسطنطينية أو بغداد في الوقت ده كانوا تحت سيطرة العثمانيين .. بس فيه أمل .. في الوقت ده الانجليز كانوا حطوا ايدهم علي البحرين وقطر وحتة هم سموها ساحل الهدنة واللي انت عارفها دلوقتي باسم الامارات العربية المتحدة والسبب ان الانجليز حطوا ايدهم علي الحتة دي ان كان بيطلع منها قراصنة كانوا بيهاجموا السفن التجارية اللي طالعة من الهند ورايحه علي انجلترا واحب افكرك إن في الوقت ده الهند كانت مستعمرة انجليزية .. سنة 1900 الكويت بتنضم للجزء من شبه الجزيرة العربية اللي بيتاكل من الدولة العثمانية وبيبقي تحت ايد الانجليز عشان تبقي الكويت هي مقر عمليات القوات المسلحة البريطانية في منطقة الخليج العربي مع العلم ان الكويت لحد سنة 1900 كانت جزء من ولاية البصرة اللي هي بالتبعية جزء من الدولة العثمانية.
في الوقت ده الانجليز فتحوا كلام مع الايرانيين اللي كان في الوقت ده تحت حكم الدولة القاجارية واللي كان بيحكم ايران سنة 1900 بالذات كان واحد اسمه (مظفر الدين شاه) .. الفكرة إن (مظفر الدين شاه) وحاشيته وعيلته المالكة كلها وتقريباً فئة الحكم كلها في ايران كانوا مدمنين أفيون .. الطبقة الحاكمة من ايران كانت بتسف افيون ومش داريانيين بالدنيا .. في الوقت ده بريطانيا كانت هي اكبر تاجر افيون في العالم .. الديلر اللي هو انجلترا راح للمدمن اللي هو (مظفر الدين شاه) وقاله ايه رايك حغرقك افيون وكل ما تحتاج جرعة حديك في مقابل انك تسيبني ادور علي البترول علي ارضك ولو لقيت انا بترول حنقسم ارباحه قسمة العدل .. 95% من عائدات النفط حتبقي ليا و الباقي ليك .. والغريبة غن (مظفر الدين شاه) بيوافق .. الرجل كانت دماغة سايحه لدرجة إنه ساب الانجليز ياخدوا بترول بلده ويعملوا الشركة اللي اتسمت وقتها شركة البترول الانجليزية الفارسية اللي بعد كده حتتسمي بريتيش بيتروليوم British Petroleum اللي انت عارفها باسم BP دلوقتي وبضربة حظ الانجليز بيلاقوا بترول في حتة اسمها خوزستان علي الحدود الايرانية العراقية دلوقتي ودي الحتة من ايران اللي عايش فيها اغلبية عربية والكلام ده كان سنة 1905.
في نفس السنة تقريباً العثمانيين بيكتشفوا البترول في العراق في ولاية الموصل و ولاية كركوك في شمال العراق بس الاكتشاف ده تم عن طريق الشركات الألمانية اللي كانت بتشتغل في العراق بالتنسيق مع الدولة العثمانية .. في الاول الانجليز كانوا متضايقين لإنهم كان نفسهم هم اللي يحطوا ايدهم علي البترول ده بس مش مهم .. خلي الالمان يفرحوا ببترول الموصل .. كده كده لو حصل حاجة واتعاركنا مع الالمان فاحنا معانا بترول ايران ومعانا الكويت .. طب فرقت في ايه يعني .. ما هو لو الألمان طلعوا بترول من الموصل في شمال العراق فهم لازم يضخوه في أنابيب لحد شط العرب اللي هي نقطة تلاقي نهري دجلة والفرات علي الخليج العربي .. بعد كده السفن حتاخده وتطلع بيه من الخليج العربي فاحنا قافلين مضيق هرمز والالمان مش حيعرفوا ينقلوا البترول اللي هم لقوه في الموصل لألمانيا .. وسبحان الله سنة 1914 بتولع الحرب العالمية الأولي .. زي ما الانجليز كانوا عايزين بالضبط.
الفصل الثاني .. يلا نقطع الدولة العثمانية:
خليني أكون صريح معاك جداً في رأيي .. انجلترا كانت عايزة الحرب العالمية الأولي تحصل بس مش معني كده انها هي اللي خططت لاغتيال الأرشيدوق (فرانز فيرديناند) ولي عهد الإمبراطورية النمساوية المجرية اللي بسبب موته الحرب قامت .. بس في نفس الوقت مع اعلان خبر وفاته وتقريبا قصر باكينجهام في لندن صوت الزغاريط والدي جي فيه كان جايب اخر لندن .. السبب في رأيي برده ورا حماس انجلترا للحرب هو انها كانت شايفه ان دي فرصة كويسة انها تخلص من اهم تهديد ليها اللي هو المانيا وفي نفس الوقت تحط ايدها علي ثروات الدولة العثمانية .. الانجليز كانوا متخيلين انهم عشان يخلصوا من الدولة العثمانية فالموضوع حيبقي سهل .. عملية انزل برمائي علي سواحل تركيا وراها عملية عسكرية جريئة ضد العاصمة اسطنبول وبمجرد سقوط السلطان العثماني فالدولة العثمانية كلها حتطلع بره اللعبة .. بمجرد ما انجلترا تحط ايدها علي بترول الموصل فكده خلاص هي تقدر تخلص من خطر ألمانيا بسهولة .. علي الأقل هم كانوا شايفين الدنيا كده من شباك بيتهم.
تنفيذ الخطة دي كان حماده تاني خالص .. عملية الانزال البرمائية اللي كانوا عايزين يعملوها علي ساحل تركيا علي البحر المتوسط في منطقة جاليبولي اللي بالمناسبة حط خطتها واشرف علي تنفيذها (وينستون تشرشل) شخصياً كانت كارثة عسكرية بكل المقاييس .. هوس الانجليز بتقطيع تورتة الدولة العثمانية خلاهم بعد كارثة جاليبولي يروحوا يمولوا ويسلحوا التمرد العربي في الحجاز ضد الدولة العثمانية اللي بعد كده تحولت قصته للفيلم اللي كسر الدنيا لورانس العرب Laurance of Arabia .. التمرد العربي كان يمكن انجح من توقعات الانجليز نفسهم لان القوات العربية قدرت انها تسبق القوات المسلحة الانجليزية في دخول القدس و دخول دمشق .. هنا بيبان أوي صراع وجهات النظر .. المتمردين العرب في دماغهم كان احنا بالصلاة علي النبي عايزين نعمل مملكة عربية شاملة الحجاز والشام والعراق وفلسطين بحيث المملكة دي تكون مستقلة مش بس عن العثمانيين انما كمان عن الانجليز مع ان الانجليز هم اللي مولوا التمرد ده وفضلوا يطبطبوا عليه لحد ما كبر ونجح ما شاء الله .. طبعا اللي المتمردين العرب مكانوش يعرفوه إن الانجليز والفرنساويين قعدوا مع بعض وكتبوا اتفاقية سايكس-بيكو اللي تقدر تقول عليها القايمة بتاعة الجواز اللي تم الاتفاق عليها بين الانجليز والفرنساويين لتقطيع تورتة الدولة العثمانية بعد ما تكون خسرت الحرب العالمية الأولي .. اللي انت يمكن مكنتش تعرفه إن اتفاقية سايكس بيكو هي اتفاق بين 3 اطراف مش اتنين بس .. انا يمكن متؤكد ان اللي سمعوا منكوا اسم سايكس بيكو في دماغهم رابطينها بانجلترا وفرنسا بس الجديد بقي ان فيه طرف ثالث اللي هو روسيا القيصرية بحيث ان التركة حتتقسم كالاتي:
- القسطنطينية وما حولها حيروح للروس.
- منطقة ازمير حتروح لليونانيين.
- منطقة كونيا حتروح للطليان.
- ولايات الموصل وبغداد والبصرة حتروح للفرنساويين ومعاهم كمان بالمرة لبنان وسوريا.
- الأردن وفلسطين حيروحوا للانجليز وقبل ما تقول لنفسك ايه ده هو الانجليز مضحيين ليه كده حقولك ان الاتفاق كان إن إيران اللي فضلت علي الحياد طول فترة الحرب العالمية الاولي ومكنتش جزء من الدولة العثمانية حيتغدر بيها والروس والانجليز حيهاجموها سواء بحيث يقسموا ما بينهم ايران لنصين .. نص شمالي يبقي تحت ايد روسيا .. نص جنوبي بما فيها منطقة خوزستان اللي مليانة بترول حيروح للانجليز.
الخطة دي اترمت في الزبالة لما الثورة البلشفية ولعت في روسيا وبناء عليه الحتة بتاعة غزو إيران دي اتلغت فالانجليز راحوا للفرنساويين قالولهم معلش بقي احنا رجعنا في كلامنا وحناخد منكوا الولايات الثلاثة بتوع الموصل وبغداد والبصرة .. الجزء الباقي من الخطة بتاع تقسيم تركيا نفسها هو كمان اترمي في الزبالة لما الحرب التركية اليونانية ولعت والاتراك كسبوها .. بس هو طبعاً فيه مشكلة بسيطة في الخطة او علي الاقل الجزء اللي فاضل منها وهو ان العرب مكانوش يعرفوا عنها حاجة .. الولايات الثلاثة بتوع الموصل وبغداد والبصرة كانوا اصلا مملكة عربية ماسكها الملك (فيصل) الله يرحمه .. إذن الانجليز والفرنساويين عايزين يخلصوا من (فيصل) .. السؤال هو ازاي؟
انك تحتل بلد ده الجزء السهل .. الجزء الصعب هو اللي بعد كده .. الجزء الصعب هو محاولة الإجابة علي السؤال بتاع طب ها وبعدين .. هل انت جاهز انك تقمع اي ثورات لاهل البلد بعد ما تطير الحاكم اللي هو يعتبر واحد منهم وباع ليهم فكرة انهم يعيشوا في مملكة عربية مستقلة .. انت بالنسبة ليهم حتبقي محتل معتدي .. معاك ان فيه منهم حتقدر تكسبه بالفلوس اصل مفيش حد ملوش ثمن .. طب والباقي .. انت مش بس محتاج تشتري ولاء ناس انما كمان محتاج تكسر ولاء الناس للحاكم وده عن طريق سلسلة مش بتخلص من الهجمات الإرهابية والتخربية اللي كانت في كل حتة وكل يوم .. قدام الناس بقي باين اوي ان (فيصل) بيحكم بلد هو مش قادر يسيطر عليها وبمجرد ما الاحساس ده اترسخ عند الناس فالغزو بدأ .. الحرب العالمية الاولي خلصت سنة 1918 .. بعد سنتين من الفوضي المفتعلة القوات الفرنساوية بدأت غزو سوريا من لبنان عشان تحصل معركة ميسلون في يوليو 1920 ودي مدينة علي الطريق السريع اللي بيربط بين دمشق وبيروت .. قائد القوات الفرنساوية وكان جنرال اسمه (ماريانو غوابيه) بعد ما عساكره دخلوا دمشق راح زار مقبرة (صلاح الدين الأيوبي) الله يرحمه وضرب الضريح برجله وهو بيقول احنا رجعنا تاني يا (صلاح الدين) .. خليني اقولهالك بمنتهي الصراحة .. الاستعمار الاوروبي للوطن العربي هم الناس بيسموه استعمار اوروبي بس خليك شايفه علي حقيقته وهو حملة صليبية جديدة .. مش حتلاقي حد بيقول عليها حملة صليبية بس هي دي الحقيقة .. الانجليز علي الناحية الثانية بدأوا غزوهم للولايات الثلاثة اللي بيشكلوا العراق دلوقتي اللي هم الموصل وبغداد والبصرة .. الغزو بدأ بسلسلة مش بتخلص من الغارات الجوية اللي كانت شوية وحتمحي بغداد من الوجود لحد ما (فيصل) اعلن استسلامه.
الفصل الثالث .. ميلاد العراق:
الانجليز قعدوا مع (فيصل) قالوله بص ياسطي .. انت كان معاك ولايات الموصل وبغداد والبصرة ومعاهم سوريا ولبنان والأردن .. سوريا ولبنان خلاص بح راحوا للفرنساويين .. واحنا حناخد الاردن وفلسطين .. ايه رايك تفضل انت ملك علي ولايات الموصل وبغداد والبصرة وحنسميهالك اسم جديد وسيكسي اوي اللي هو العراق .. صدقني لو قلتلك ان محدش لحد دلوقتي متؤكد هم الانجليز جابوا اسم العراق ده منين .. فيه ناس بتقول انهم سمعوا ان كان فيه مدينة مستقلة ايام حضارة الرافدين اسمها اوروك بس تقريباً الاسم كان تقيل علي لسانهم فنطقوه Iraq إيراك اللي هو بقي بعد كده العراق .. وفيه ناس بتقول ان العراق كلمة عربية معناها ضفة النهر وزي ما انت عارف العراق فيها نهري دجلة والفرات عشان كده الاسم القديم ليها كان بلاد ما بين النهرين فاتسمت العراق .. للعلم بالشيء .. كان المفروض ان ولاية البصرة كلها تبقي تبع العراق بس ده محصلش .. جزء من ولاية البصرة خدته السعودية وجزء تاني بقي للكويت .. ليه ده مهم .. عشان لما العراق اتولدت هوبا اكتشفنا ان مش بس الموصل اللي فيها بترول ده حتي البصرة فيها بترول .. ومش بس الجزء العراقي من البصرة انما كمان الجزء السعودي والجزء الكويتي .. من وجهة نظر العراقيين الكويت حتة منهم ومش بس كده .. جزء من السعودية كمان.
العراق من بعد 1920 بتبقي نسخة من مصر تحت حكم أسرة (محمد علي باشا الكبير) الله يرحمه .. مملكة العرش بتاعها بينتقل بالوراثة ليها حق الحكم الذاتي بس في نفس الوقت تحت الاستعمار أو الحماية البريطانية .. العرش بينتقل من (فيصل الأول) ل(فيصل الثاني) وكمان (فيصل الثالث) اللي في سنة 1958 زي ما حكينا قبل كده بيحصل ضده انقلاب عسكري دموي بقيادة ضابط في القوات المسلحة العراقية اسمه (عبدالحكيم قاسم) و بيتم الاعلان بعده عن الجمهورية العراقية .. اقف بقي هنا.
للناس اللي مش شاطرة في التواريخ فسنة 1958 هي نفس السنة اللي تم فيها اعلان الوحدة بين مصر وسوريا فكان المنطقي إن العراق تبصلهم وتقولهم طب ما تخدوني معاكوا .. الدول الثلاثة بيحكمها عساكر في الجيش وصلوا للحكم بانقلابات عسكرية .. الدول الثلاثة علاقتها كويسة مع الاتحاد السوفيتي ولو انت من جيل الالفينات ومش مستوعب يعني كلمة اتحاد سوفيتي فتخيل ان روسيا دلوقتي زيها زي أمريكا كده والاتنين بيلعبوا بنك الحظ علي مين يسيطر علي العالم .. طبعاً مش عايز اقولك ان فكرة وحدة بين مصر وسوريا والعراق ده كابوس اسود بالنسبة للصهاينة وللامريكان والانجليز لان خليني افكرك بجملة انا قلتها لما كنا بنحكي قصة النكبة ان المنطق ورا سعي الانجليز انهم يزرعوا السرطان اللي اسمه إسرائيل في العالم العربي هو انهم يمنعوا ان يجي اليوم ان الدول الثلاثة تقف مع بعضها ايد واحدة .. طب والحل؟
الحل الحقيقة كان فكرة بنت ستين كلب من واحد اسمه (كيرميت روزفيلت) اللي الحقيقة يبقي من عيلة تقيلة اوي .. جده يبقي (ثيودور روزفيلت) الرئيس رقم 26 لأمريكا وبعد الحرب العالمية الثانية اتجند في وكالة المخابرات المركزية اللي انت عارفها باسم CIA وكان هو مدير مكتبها في القاهرة .. (كيرمت روزفيلت) فهم حاجة يمكن مش كتير خدوا بالهم منها في العراق وهي ان العراق بالذات دونا عن مصر وسوريا فيها خناقة بين القوميين والشيوعيين .. القوميين هم الناس اللي مع فكرة الوحدة العربية وشايفين (جمال عبدالناصر) الله يرحمه ده رجل صح الصح .. الشيوعيين مش عارف ابسطهالك بطريقة غير اني اقولك ان دي ناس كفرة مش مقتنعين بوجود ربنا وعايزين العراق تترمي في حضن الاتحاد السوفيتي وتفكها خالص من حوار الوحدة العربية ده .. صحيح إن مصر وسوريا بقوا دولة واحدة ماسكها زعيم القوميين (جمال عبدالناصر) اللي علاقته بالسوفييت كويسه بس متنساش إن ده هو نفسه (جمال عبدالناصر) اللي أسس حركة دول عدم الانحياز .. فهو صديق للسوفييت بس مش لعبة في ايدهم .. الشيوعيين مش عايزين كده .. الشيوعيين لو عليهم يخلوا الناس كلها تبطل تصلي وتتعلم تتكلم روسي ويصطبحوا الصبح بكوباية فودكا بدل الشاي والقهوة .. صحيح إن في الأول العراق خدت نفس العلم بتاع مصر وسوريا اللي هو احمر وابيض واسود وبدل ما يبقي فيه نجمتين خضر فالعراق كان عندها 3 نجوم خضر علي اساس انها تبقي الطرف الثالث في الثريسوم القومي مع مصر وسوريا.
سنة 1963 وكالة المخابرات المركزية بتدبر عملية اغتيال (عبدالحكيم قاسم) عشان تبدأ 13 سنة من لعبة الكراسي الموسيقية علي مين يحكم العراق بسلسلة من الانقلابات العسكرية اللي ورا بعضها لحد مع الوقت الدنيا بتهدي مش بس في العراق انما في سوريا كمان لما بيظهر علي الساحة كيان جديد اسمه حزب البعث .. حزب البعث ده عامل زي الحزب الوطني الديموقراطي كده عندنا في مصر اللي كان بيحكم وقت الرئيس (محمد حسني مبارك) الله يرحمه بس يمكن الفرق إن بدل ما الحزب الوطني ماسكه رجال اعمال معاهم فلوس فحزب البعث ماسكه جنرالات جيش معاهم فلوس .. حزب البعث له نسختين واحدة في سوريا والثانية في العراق .. لحد ما بتيجي سنة 1975 عشان يظهر في الصورة اتنين لاعيبه جداد ويمكن أهم شخصيتين في قصة النهاردة .. (صدام حسين) و (روح الله الخوميني).
الفصل الثالث .. (صدام حسين) و (الخوميني):
خليني اجيبهالك علي بلاطة .. (صدام حسين) الله يرحمه كان من رجاله CIA في العراق .. مش مصدقني صح .. عايز احكيلك موقف حصل سنة 1978 يوريك لمحة عن دماغ الرجل ده وهو إنه في السبعينات هو مكنش الرئيس انما كان من حاشية الرئيس وفي الوقت ده كانت علاقته بCIA زي الفل .. بس في نفس الوقت الناس بتاعة CIA كانت عايزه تختبر مش بس مدي ولاءه ليهم إنما كمان يعرفوا هو (صدام) اخره فين فعشان يعرفوا ده اللي حصل إنهم بعتوله ورقة فيها حوالي 600 اسم من مواطنين عراقيين اللي كانوا علي كل لون يا بطاطس .. رجال اعمال .. دكاترة جامعة .. مثقفين .. بس المشترك بينهم كلهم هي انهم ضد فكرة النفوذ الأمريكاني في بلدهم .. بمعني اخر .. العراقيين دول مكانوش علي هوي الناس بتاعة CIA والغريبة إنهم مدوش (صدام حسين) تعليمات محددة يعمل ايه .. هم بس ادوله الورقة وقالوله الناس دي عاملالنا مشاكل .. تاني يوم كان الفوق ال600 عراقي دول اتقبض عليهم واتوجه ليهم تهم خيانة عظمي واتحاكموا في محاكمات مسرحية الحقيقة والفكرة ان كلهم اتحاكموا في وقت واحد وخلال كام يوم كان صدر حكم الاعدام ليهم كلهم والحكم اتذاع Live علي الهواء عشان الناس كلها تتفرج والأهم إن الأمريكان يتفرجوا .. الموقف ده خلي الأمريكان يقتنعوا إن (صدام) هو حقاً وصدقاً الرجل بتاعهم في العراق.
علي الناحية الثانية حنلاقي الوش التاني من الشريط .. (روح الله الخوميني) .. للناس اللي متعرفش حاجة عن التاريخ الإيراني الحديث خليني افهمك مين هو (الخوميني) بالضبط .. حاول تتخيل إن ثورة 30 يونيو أو انقلاب 30 يونيو علي حسب انت قاعد في مدرجات مين لما قامت الرئيس (محمد مرسي) الله يرحمه قدر يهرب بره البلد وراح مثلاً يعني كلاجيء سياسي في فرنسا .. دلوقتي في الوضع التخيلي ده ايه اللي حيحصل .. البلد بيحكمها نظام عسكري علماني و(محمد مرسي) بيمثل المقاومة السياسية الإسلامية في المنفي .. أهو نفس الوضع ده هو هو كان في إيران .. إيران في الوقت ده اللي هو 1975 كان بيحكمها الشاه (محمد رضا بهلوي) وكان (الخوميني) في المنفي في باريس .. الشاه بيحكم بعصاية فرعون وهو لابس بدلته العسكرية وال(الخوميني) في المنفي لابس عمته ومربي دقنه وبيعتبر نفسه الأمل الوحيد لانقاذ إيران .. الحقيقة إن وجود (الخوميني) في فرنسا كان عامل مشاكل كبيرة بين الحكومتين الإيرانية والفرنسية لدرجة إن الفرنساويين رفعوا سماعة التليفون كلموا الأمريكان قالولهم شوفولكوا صرفة في (الخوميني) احنا مش عايزينه يفضل قاعد عندنا.
لما المشكلة دي اتعرضت علي قيادة CIA عشان يشوفوا حيودوا (الخوميني) في أي داهية اتقالت فكرة إن ليه لا نوديه العراق .. ايه الفكرة؟ .. أولاً زي ما حكيتلك من شوية (صدام) بقي الرجل بتاع CIA في العراق .. ثانيا وده المهم إن الأمريكان لانهم معندوهمش لا عزيز ولا غالي مكنش عندهم مشكلة يمولوا الحركات الإسلامية لو كان ده فيه مصلحتهم وده حصل في مصر مثلاً .. الناس كلها كانت عارفه إن الأمريكان مكانوش طايقين النظام الاشتراكي القومي بتاع (جمال عبدالناصر) فكانت CIA بتمول جماعة الأخوان المسلمين ضده .. نفس الكلام في إيران .. صحيح الشاه هو صديق مقرب جداً من أمريكا بس هل فيه حد يقدر يضمن المستقبل .. هل فيه حد يقدر يضمن إن ميجيش اليوم والاشتراكيين أو الشيوعيين يوصلوا للكرسي أو إن السوفييت يزغللوا عين الشاه .. ساعتها ايه اللي حيحصل .. ساعتها وجود (الخوميني) في العراق حيبقي ورقة مهمة ودي في حد ذاتها من الحاجات الغريبة لإنك بتتكلم عن إيران في السبعينات وانت ممكن متبقاش مستوعب قد ايه الشاه (محمد رضا بهلوي) حاول بكل اللي يقدر عليه إنه يحود ببلده ناحيه الغرب وان إيران يبقي منظرها قدام العالم كله إنها مرميه في حضن أمريكا.
أي نظام حكم عسكري هو بالتبعية علماني وكلمة علماني هنا أنا أقصد بيها نظام حكم شايف إن الدين حدوده بتنتهي عند باب الجامع .. النظام العسكري بيحاول يرسم المجتمع بفرشة العلمانية وغالباً اللوحة اللي بتطلع بتكون زي الزفت .. ده انت بتشوفه حالياً في الذوق العام من الفن مثلاً .. مش حتلاقي أغاني هادفه .. مش حتلاقي سينما ليها معني .. بس الأهم وده بيكون نتيجة مش مقصودة إن التوجه العام للبنات بيكون لأظهار جمالهم بالعافية في الشارع .. أنا مستعد أراهنك بالخمسين الجنيه اللي في جيبي إن خلال الفترة من 2013 لحد 2025 يعني بتتكلم خلال 12 سنة عدد البنات اللي قلعت الحجاب في مصر هو أكبر من عدد البنات اللي قلعت الحجاب في تاريخ مصر الحديث كله .. ليه انا بقول ده .. لان الظاهرة دي بتحصل غصب عن اي حد بيحاول يفرض علي المجتمع توجه غريب عنه بالعافية .. في ايران مثلا في السبعينات حتلاقي ان البلد كانت اكبر مستهلك لصبغة الشعر في العالم .. عدد البنات اللي كانت بتصبغ شعرها اصفر في ايران كان اكبر من عدد الشقراوات في الدول الاسكندافية مجتمعة .. عدد البنات اللي كانت بتعمل عمليات تجميل في مناخيرها عشان تبان شبه ممثلات هوليوود كان الاعلي علي مستوي العالم .. هذا الانحلال الاخلاقي الملحوظ جداً كانت نتيجة طبيعية لفكرة إن مقر السفارة الأمريكية في العاصمة الايرانية طهران كان فيه مطبعة فلوس عشان تطبع دولارات لإن مقر السفارة الأمريكية كان مقر عمليات CIA في اسيا كلها .. تسليح القوات المسلحة الإيرانية كله كان أمريكاني .. الشاه كان دايما بيقول علي بلده انها امريكا الصغيرة .. علي الناحية الثانية الشارع الايراني نفسه كان بيغلي .. سكة اللي يروح ميرجعش اللي الشاه كان ممشي البلد فيها كانت فيه ناس كتير مرعوبة منها .. الشارع شايف إن الأمريكان بيبوظوا اخلاق بناتهم .. الأمريكان مقعدين الشاه علي الكرسي بالعافية .. الشارع الإيراني كان خلاص وصل لمرحلة الرفض المطلق لأي حاجة عليها اسم أو علم أمريكا.
لما بلد زي ايران توصل للمرحلة دي أن بيحكمها حاكم مدعوم من امريكا وقاعد بالعافية وماسك العصاية لشعبه فلما العيار بيفلت والشعب بيثور حتلاقي الشعب بيبقي عايز يروح في سكة من اتنين .. الشيوعية أو الإسلام .. حاجة شبه اللي حصل في مصر بعد ثورة يناير .. الشارع كان مقسوم بين إن مصر تبقي دولة مدنية أو دولة اسلامية .. فاكر انت الايام دي .. بالنسبة للأمريكان فكانت مبلوعة فكرة إن إيران تبقي بلد إسلامية ولا إنها تبقي بلد شيوعية فلما CIA حست إن الشارع الإيراني خلاص حينفجر قاموا رافعين سماعة التليفون مكلمين (صدام) وقالوله ارمي (الخوميني) علي الإيرانيين .. لو خلاص جه الوقت إن أمريكا تخسر إيران فعلي الاقل ايران متروحش لحضن السوفييت علي اساس ان الشيوعيين كفرة شايفين إن الدين هو أفيون الشعوب فمش حيجي اليوم اللي نظام اسلامي يترمي في حضن نظام شيوعي .. وسبحان الله اللي عايزه الأمريكان حصل والثورة في إيران بقت الثورة الإسلامية سنة 1978 .. للعلم بالشيء بمجرد ما الثورة الإسلامية نجحت فالإسلاميين بقوا بيججروا ورا الشيوعيين في الشوارع يسيحوا دمهم بعد ما الاتنين كانوا في ظهر بعض ضد الشاه .. غدارة السياسة دي والله.
المصادر:
- محاضرة القاها الدكتور (روي كاساجراندا) في جامعة اوستن بعنوان Iraq: Genocide and Dreams يعني العراق: الإبادة العرقية والأحلام وده لينك المحاضرة علي YouTube:
(2527) Genocide and Dreams: Iraq – YouTube - محاضرة القاها الدكتور (روي كاساجراندا) في جامعة اوستن Roy Cassagranda on The U S & Iraq – A Lecture by The Austin School وده لينك المحاضرة علي YouTube:
(2554) Roy Cassagranda on The U S & Iraq – A Lecture by The Austin School – YouTube - مقالة بعنوان Why did Iraq invade Kuwait in 1990? نشرت في موقع WorldAtlas وده لينك المقالة الأصلية:
Why Did Iraq Invade Kuwait In 1990? - مقالة بعنوان The 1990/1 Gulf War نشرت في موقع ThoughtCo وده لينك المقالة الأصلية:
Operation Desert Storm – Gulf War Summary
السلام عليكم ورحمة الله وبركاته….نرجوا من الاخ المصري احمد فؤاد عدم الخوض في أي موضوع يخص العراق رجاءا رجاءا (بلاش فتي من حضرتك ) كما تقولون عندكم أنت لا تعرف ما تقول حقا وكفاك استخدامك لهجتك الدارجة في تحليلاتك وسخريتك من ما وقع من مصائب ومحن على بلدنا من قبل ما يفترض انهم اخوة لنا في الدين والاصل سواء اهل الخليج او دولة مصر التي لم يقصر معها الرئيس السابق صدام حسين غفر الله له …فقد جوزي من قبل رئيس مصر في حينها حسني مبارك بالغدر والطعن في الظهر وسبحان الله دارت الدوائر وخلع من ملكه االبائد بتحريض من اهل الخليج وتخلي أمريكا عنه …..نصيحة منا لك لا ينفع هذا الملق ( التملق والتسلف والتوود السمج ) مع اهل الخليح كويتيه وسعوديته واماراتاهه كلهم ينظرون بعين الدونية والأحتقار للاخرين واولهم انتم وشاهد اليوتيوب وستعرف قيمتكم عند اهل الكويت ……ومن كلامكم واسمك انت مسلم فاحذر البهتان ورمي المسلمين بغير ماهم فيه فلا تستطيع طلب الأستحلال منهم نقزل عندنا ( لا محالل ولا موهوب) تبقى في ذمتك الي يوم العرض على الله سبحانه وتعالى ويأخد حقنا منكم…….الحذر الحذر الكلمة التي تخرج من اللسان والأسوء منها من تكتب باليد يحاسب عليها المسلم أشد ما يكون ..وكفى بالله شاهدا ورقيبا…سلام