لينك التسجيل الصوتي علي ساوند كلاود:
https://on.soundcloud.com/Svamu
صحيح إن أميركا بتعتبر إسرائيل ابنها اللي هي مخلفتوش وصحيح إن إسرائيل بتاخد أي سلاح أميريكي هي عايزاه وكلنا عارفين ده كويس .. اللي حتكلم عنه النهاردة هو السلاح الأمريكاني اللي إسرائيل مش من حقها تاخده أو أغلي من إنها تاخده .. المساعدات العسكرية الأميريكية لإسرائيل موضوع لو دخلت فيه مش حطلع بس خليني أديلك شوية ملامح عنه عشان بس تستوعب أنا بتكلم عن إيه؟
فيه إختراع اسمه إيباك AIPAC وده الاسم بتاع اللوبي الصهيوني في أميركا .. الناس دول يهود أمريكان معاهم فلوس كتير بيصرفوها في تمويل حملات إنتخابية لسياسيين أمريكان سواء لو إنت مرشح نفسك للرئاسة أو حتي للبرلمان فإنت بتبقي محتاج كل مليم تقدر تجيبه لإن كل حاجة بقت بفلوس فالناس بتوع AIPAC دول بيدوك اللي إنت عايزه في مقابل إنك إن شاء الله لما تكسب الإنتخابات تبقي واقف في ظهر إسرائيل .. ده الموضوع ببساطة شديدة .. سنة 2016 لما الرئيس الأميريكي (باراك أوباما) كان خلاص بيلم ورقه وشنطته وبيسيب البيت الأبيض طلع فجأة كده قال إنه حيزود المعونة العسكرية الأميريكية لإسرائيل يخليها 35 مليار دولار علي مدي 10 سنين .. ليه يا عم الحاج كده بس؟ ما الفلوس دي كان ممكن تتصرف في حاجه أحسن .. رده كان 3 حاجات:
- أول حاجة إنه عايز الفلوس دي تبقي حافز لرئيس الوزراء الإسرائيلي (بنيامين نتنياهو) إنه يشد حيله شوية ويخلص بقي مفاوضات السلام بينه وبين الفلسطينيين.
- ثاني حاجة إنه كان عايز يسيب البيت الأبيض علي سمعة إنه شايفين إزاي أنا بحب إسرائيل موت وإني أكتر رئيس أميريكي صرف فلوس علي ضمان أمن إسرائيل.
- ثالث حاجة إنه كان عايز يقول لإسرائيل زي ما (عمرو دياب) كان بيغني متخافيش أنا مش ناسيكي بسبب إن (أوباما) مضي الإتفاق النووي مع إيران.
طبعاً الليلة كلها فرقعت في وش (أوباما) لإن لا (نتنياهو) هز طوله ولا حتي رفع سماعة التليفون يحجز قاعة أفراح في فندق عشان يبقي اسمه سعي إن مفاوضات السلام تشتغل تاني .. وحتي الناس بتوع AIPAC شتموه لما قالوله يااااه 35 مليار دولار بس قال إيه هو في رأيهم طلع منوفي .. هم شايفينه كان بخيل أوي و إنه يا عيني استخصر يدي إسرائيل فلوس زيادة .. حتي الإتفاق النووي مع إيران باظ لإن (دونالد ترامب) لغاه .. طبعاً تفاصيل كل ده مش معادها ولا مكانها دلوقتي .. ناس كتير بتنسي إن كم السلاح اللي إسرائيل بتاخده من أميركا محكوم بسقف المعونة العسكرية الأميريكية اللي بتقدمها لإسرائيل .. خليني أخش في الموضوع علي طول ونتكلم عن الخمس أسلحة اللي إسرائيل يا مينفعش يا متقدرش تاخدهم من أميركا:
السفن الحربية طراز Littoral Combat Ships أو السفن الحربية السطحية LCS:
عشان أشبهلك الدنيا وتبقي فاهم أنا بتكلم عن إيه ففيه إختراع اسمه فرقاطة ودي سفينة حربية صغيرة شوية وأشهر نوع فيها اسمه كورفيت Corvette .. لو حتشبه الفرقاطات دول بحاجة فهم شبه العربيات النص نقل بحيث إنهم بيشيلوا حمولة ومهمين بس دورهم إلي حد كبير محدود سواء في كمية التسليح اللي هي بتشيله أو في عدد الكيلومترات اللي هي بتقدر تمشيهم .. يجي بعد كده الحاجة الجامدة زحليقة اللي اسمها مدمرة Destroyer ودي أقرب ما تكون للترلة بحيث إنها بتشيل تسليح محترم وفي نفس الوقت بتقدر تمشي مسافات كبيرة .. بس أحياناً بتحتاج حاجة وسط .. حاجة تملا الفراغ الكبير بين النص نقل والترلة .. هنا يجي دور العربيات التلت إربع نقل اللي هي الLittoral Combat Ships .. حط نفسك مكان إسرائيل .. إنت عايز حاجة تنفع تستخدمها لتأمين حقول الغاز الطبيعي بتاعتك في البحر المتوسط اللي هي إلي حد ما بعيدة عن الساحل وعايز حاجة تنفع إنها تحاصر بيها قطاع غزة .. إنت عايز حاجة أكبر من الفرقاطة بس أصغر من المدمرة.
زي ما قلتلك الLittoral Combat Ships دي إختراع أميريكي بس الفرنساويين شرخوا فيها جامد وإحنا شخصياً إشترينا منها إتنين السنة اللي فاتت .. والقوات البحرية الإسرائيلية درست إنها تشتري منهم بس إكتشفوا إنهم عشان يشتروها حيطلبوا يتعمل عليها تعديلات كتير أوي .. عادة السفن دي الأمريكان بيستخدموها ضمن Strike Group أو مجموعة قتال مع حاملة طائرات ومدمرات فهي بتقوم بدور محدد ضمن فريق كبير .. الإسرائيليين لو إشتروها حيطلبوا إنه يتضاف عليها تسليح إضافي كتير لإنها غالباً حتشتغل لوحدها .. لما الإسرائيليين جم حسبوا هي السفينة الواحدة حتكلف كام بعد التعديلات دي كلها إكتشفوا إن سعرها ضرب منهم جامد فقرروا إن مفيش داعي وخلينا شغالين بالفرقطات الCorvette اللي عندنا.
الطيارة المقاتلة F-22 Raptor:
سنة 1997 طلع عضو في البرلمان الأميريكي اسمه (ديفيد أوبي David Obey) عمل مشروع قانون اسمه تعديل أوبي Obey Amendment قال نصاً إن الطيارة F-22 Raptor اللي وقتها كانت درة تاج القوات الجوية الأميريكية متتبعش لأي حد بره أميركا أيا كان هو مين .. وقتها الناس قالت حلو قانون عام لحماية الصناعة العسكرية الأميريكية بس اللي ناس كتير مكانوش يعرفوه إن القانون ده كان معمول تفصيل عشان إسرائيل بس لإن القوانين مينفعش تتعمل لحالات خاصة فهم كتبوا القانون بصيغة عامة شوية .. الأمريكان كانوا زعلانين أوي لما الإسرائيليين باعوا للصينيين التصميمات بتاعة الطيارة F-16 Fighting Flacon ومكانوش ناويين يعملوا نفس الغلطة مع الF-22 Raptor .. الإسرائيليين من ناحيتهم مكانوش حابين يعترفوا إن القانون ده معمول مخصوص عشانهم فتلاقيهم كل ما تتجاب سيرة الF-22 Raptor يقولوا إحنا أساساً مكناش عايزينها.
لما تسمع كلام الإسرائيليين تلاقيهم بيقولوا إحنا أساساً بنحب الطيارات الإتنين في واحد يعني الطيارات اللي تنفع تشيل قنابل عشان تنفذ غارات جوية وفي نفس ذات الوقت ليها قدرة عالية علي المناورة عشان لما تخش في مواجهة جوية أو Dogfighting ضد أي طيارة تانية تقدر تتفوق عليها .. في الثمانينات إسرائيل فعلياً إستلمت من أميركا طيارات F-15 Strike Eagle وبعدها طلبوا يتعمل عليها شوية تعديلات بحيث بقي اسمها F-15I وكانت طيارة ممتازة جداً وتنفع تقضي المهمتين فمن وجهة نظرهم خلو الF-22 Raptor تنفعكوا إحنا كده كده معانا F-15I وكمان خدنا الF-35I Adir.
القاذفات بعيدة المدي:
من نقاط ضعف القوات الجوية الإسرائيلية إن معندهاش نوعية الطيارات اللي بتتسمي قاذفات Bombers ودي عبارة عن طيارات بتقدر تشيل كمية ضخمة من القنابل وتطير بيهم مسافات طويلة عشان ترميهم فوق أرض العدو .. الأمريكان عندهم قاذفة بيعشقوها أوي اللي هي B-52 Stratofortress بس المشكلة إن النوع ده من الطيارات الأمريكان بطلوا يصنعوه وبالتالي معندهمش غير عدد محدود منها ومستحيل يدوا منها لإسرائيل .. غير كده زي ما قلتلك وجهة نظر الإسرائيليين في قواتهم الجوية إنهم عايزين يبقي عندهم طيارات اتنين في واحد .. طيارة تنفع قاذفة وطيارة تنفع لDogfighting وهما فعلياً عندهم أسطول محترم من F-16 و F-15 ودلوقتي F-35 .. بس إفرض الفاس وقعت في الراس وإسرائيل حبت توجه ضربة جوية لإيران؟
معاك إن الF-16 و الF-15 وكمان F-35 لو إتفولوا بنزين في الجو يقدروا يوصلوا لجوه العمق الإيراني بس السؤال إنت حتفولهم فين؟ .. فيه ناس حتقول طب ما إسرائيل تاخد قاذفات من أميركا زي مثلاً B-21 بس أخر مرة إسرائيل إتعاملت مع قاذفات كانت من طراز B-17 Flying Fortress اللي كان الأمريكان بيستخدموها في الحرب العالمية الثانية والإسرائيليين نفسهم طلعوها بره الخدمة في الخمسينات .. ده معناه إن القاذفات الجديدة لسه حتمرن عليها طيارين ومهندسين وفنيين وليلة كبيرة أوي سعادتك.
القذائف الخارقة للدروع Massive Ordnance Penetrator أو MOP:
الطيارة المقاتلة من غير القنبلة المناسبة عشان تدمر الهدف بتاعها ملهاش لازمة .. من حوالي 10 سنين بدأ الكلام يتقال علي إن الإسرائيليين عايزين ياخدوا القنابل من طراز MOP من أميركا .. القنابل دي وزن الواحدة فيهم 13,500 كيلوجرام وبتتوجه بالليزر أو بالGPS وأهم ميزة فيها إنها بتقدر تدمر الدشم أو Bunker Buster .. طبعاً بمجرد ما بدأ الكلام يكتر أعضاء البرلمان الأميريكي مكانوش عبط عشان يفهموا إن بما إن الإسرائيليين عايزين القنابل دي فهم قرروا إنهم يضربوا إيران .. بعد كده إدارة الرئيس الأميريكي وقتها (باراك أوباما) قررت إن إسرائيل مش حتستلم القنابل دي نهائي عشان هو خاف لو إسرائيل استلمتهم تضرب إيران من غير علم أميركا.
الغواصات النووية اللي ليها القدرة إنها تضرب صواريخ باليستية:
حالياً سلاح الغواصات الإسرائيلي عنده 6 غواصات Dolphin-Class ألماني بس بتشتغل بموتور ديزل وبطاريات كهرباء بحيث إن طول ما الغواصة تحت المياه بتشتغل بالبطاريات ولما شحن البطاريات بيخلص الغواصة بتطلع للسطح بحيث تشتغل بموتور الديزل اللي بيشحن البطاريات .. الغواصات دي شغاله زي الفل والإسرائيليين مركبين عليها صواريخ كروز بعيدة المدي .. لكن .. طبيعي إن الغواصة النووية اللي بتشتغل بمفاعل نووي ومش محتاجه تطلع للسطح عشان تتشحن بتبقي أحسن وبتشتغل فترات أطول وبتشيل صواريخ مداها أبعد .. مبدأياً كده إسرائيل عمرها ما حيبقي عندها الإمكانية إنها تشغل غواصة نووية أميريكية كبيرة زي مثلاً غواصات طراز أوهايو Ohio-Class مش بس بسبب سعرها الغالي إنما كمان تكلفة التدريب والتشغيل والصيانة وقطع الغيار حتبقي عبء رهيب علي الميزانية العسكرية الأسرائيلية.
أنا بس عايز أختم بإني أحاول أوصلك معلومة إن فعلياً إسرائيل دلوقتي مش محتاجه أي مساعدات عسكرية أميريكية .. لو بكره الصبح أميركا بطلت تدي إسرائيل سلاح فحيفضل التفوق العسكري الإسرائيلي علي الدول العربية موجود لإن ببساطة أوي إسرائيل عندها سلاح مش عند العرب .. ولو بكره الصبح أميركا قررت إن والله يا إسرائيل إحنا مش حنديكي حاجة ببلاش بعد كده وكل سلاح تاخديه حتدفعي ثمنه فبرده مش مشكلة لإن إسرائيل بتتصنف إنها ضمن ال15% من دول العالم الأكثر غني لإنك لو جيت حسبت الدخل القومي الإسرائيلي قسمته علي عدد السكان حتلاقي إن متوسط دخل المواطن الإسرائيلي عالي أوي .. معني كده إن إسرائيل تقدر لو حبت تشتري أي سلاح هي عايزاه بفلوسها وده وضع مينفعش يتقال علي مصر مثلاً .. نقطة ثانية وهي إن الفلوس بتاعة المساعدات العسكرية الأميريكية اللي بتاخدها إسرائيل كل سنة محدش في إسرائيل بيدفع منها حاجة من جيبه .. اللي بيشيل الليلة كلها هي جيوب المواطنين الأمريكان اللي بياخدوا من مصروف بيوتهم عشان يدوه لإسرائيل تشتري بيها سلاح.
طبعاً محدش قال إن المواطن الأمريكاني بمزاجه بيعمل كده لإن السياسيين الأمريكان هم السبب بس اللي أنا عايز أقوله إن لحد سنة 2016 إسرائيل كانت بتاخد من أميركا في السنة 3 مليار دولار .. فكر فيها كده .. إنت بالميت خالص بتقول إن إسرائيل إستلمت من أميركا سلاح ثمنه 120 مليار دولار من ساعة ما مشروع المساعدات العسكرية ده بدأ لحد سنة 2016 .. طب إنت تعرف إن ميزانية الحكومة الإسرائيلية شاكب راكب بسلاطتها ببابا غنوجها 75 مليون دولار بس؟ .. النقطة دي بالذات هي سبب المرارة اللي أنا بحسها كل ما بتيجي سيرة المساعدات العسكرية الأميريكية لإسرائيل وخليني أفهمك ليه؟
دلوقتي قانوناً أميركا متقدرش تقول لإسرائيل تعمل إيه ومتعملش إيه بفلوس المساعدات العسكرية .. إياكش حتي الحكومة الإسرائيلية تجيب بلالين وترميها بطيارات .. بس الفلوس دي كان ممكن الحكومة الأميريكية تصرفها علي ترميم البنية التحتية اللي طلع ميتينها من كتر الإهمال .. أو كان ممكن تاخد الفلوس دي تحطها في مشروع التأمين الصحي .. بس الحكومة الأميريكية إختارت إنها تاخد الفلوس اللي كان ممكن تتصرف علي المواطن الأمريكاني وإدتها للحكومة الإسرائيلية اللي مش بس صرفتها علي السلاح إنما عملت بيها مثلاً مشروع الطريق السريع اللي بيربط الضفة الغربية بإسرائيل واللي علي فكرة مش مسموح لأي حد فلسطيني إنه يسوق عليه ومعمول بس للمستوطنين الإسرائيليين .. كل ده بسبب إن السياسيين الأمريكان مرعوبين من فكرة إن يتقال عليهم Anti-Semitic أو معادي للسامية.
المصادر:
- مقالة بعنوان F-22s, Stealth Bombers and Submarines: How America Could Make Israel a Military Superpower .. نشرت في مجلة The National Interest وده لينك المقالة الأصلية:
https://nationalinterest.org/blog/buzz/f-22s-stealth-bombers-and-submarines-how-america-could-make-israel-military-superpower - مقالة بعنوان The False Impasse Over Aid to Israel .. نشرت في مجلة The National Interest وده لينك المقالة الأصلية:
https://nationalinterest.org/blog/paul-pillar/the-false-impasse-over-aid-israel-15999 - مقالة بعنوان F-22s, Stealth Bombers and Submarines: How America Could Make Israel a Military Superpower .. نشرت في مجلة The National Interest وده لينك المقالة الأصلية:
https://nationalinterest.org/blog/buzz/f-22s-stealth-bombers-and-submarines-how-america-could-make-israel-military-superpower
