أجيال الطيارات المقاتلة .. من الطيارة أم مروحة للطيارة اللي بتختفي من الرادارات.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/hrhsf1d2hita

موضوعنا النهاردة اللي حنتكلم عنه هو المقاتلات النفاثة .. الموضوع ده كبير ومعقد وإتكتب فيه كتب ولو دخلنا فيه وسبنا نفسنا للدنيا مش حنطلع منه .. اللي حنكلمك عنه النهاردة هو التطور الطبيعي للمقاتلات النفاثة من المقاتلة الألمانية هينكل Heinkel 178 اللي تعتبر أول مقاتلة نفاثة يصنعها البشر وكانت أول رحلة ليها يوم 27  أغسطس 1939  لحد ما وصلنا للمقاتلات F-35 Lightening II و F-22 Raptor .. إزاي وصلنا من مرحلة إن لما الألمان صنعوا الHeinkel 178 كانت أقصي سرعة ليها 608 كيلومتر في الساعة يعني يدوبك أسرع بنسبة 10% بس من المقاتلة ميسيرشميت Messerschmitt 109E اللي كانت في الخدمة في القوات الجوية الألمانية وقتها واللي كانت شغالة بمحرك إحتراق داخلي عادي جداً لحد ما بقينا دلوقتي في عصر إن مقاتلات الجيل الرابع والخامس بتقدر تطير بسرعات بتوصل 2250 كيلومتر في الساعة؟ .. حنكلمك يعني هو إيه أصلاً كلمة مقاتلات الجيل الرابع والخامس؟

مقاتلات الجيل الأول .. البشر لسه بتفهم هو يعني إيه محرك نفاث؟

مبدأياً فكرة المحرك النفاث أو Turbojet Engine سهلة وبسيطة جداً .. إنت عشان تخلي الطيارة تتحرك لقدام فإنت محتاج تولد قوة دفع أو Thrust وعشان تولد القوة دي فالمحرك بيشفط الهواء اللي قدام الطيارة ويضغطه في Compressor ويبدأ يمزج الهواء المضغوط ده مع الوقود ويحرقهم سوا .. نواتج الإحتراق بتعدي بعد كده علي تربينة Turbine وهي دي اللي بتولد قوة الدفع Thrust .. إحنا بدأنا نفكر في المحركات النفاثة خلال الحرب العالمية الثانية والحقيقة إن الألمان والبريطانيين والأمريكان إشتغلوا تقريباً في وقت واحد كل واحد لوحده علي تطوير المفهوم ده .. كل دولة فيهم طلعت نموذج أولي Prototype .. الأمريكان عملوا P-59 والبريطانيين عملوا الE.28/39 والألمان عملوا الHeinkel 178 .. المشكلة إن الثلاثة إكتشفوا إن أقصي سرعة للPrototypes بتاعتهم مش بتزيد كتير عن السرعات اللي بتقدر المقاتلات العادية اللي في الخدمة وقتها واللي بتشتغل علي محركات إحتراق داخلي تطير بيها .. اللي هو ببساطة كده بتسأل نفسك هو إحنا بالصلاة علي النبي جيبنا إيه جديد؟

اواخر سنة 1944 يعني لما الحرب العالمية الثانية خلاص كانت بتشطب الألمان صدموا العالم لما ورونا المقاتلة Messerschmitt Me-262 .. دي كانت مقاتلة نفاثة بمحركين نفاث وأقصي سرعة ليها 864 كيلومتر في الساعة وده بيخليها بسهولة أوي تسبق أي مقاتلة من مقاتلات الحلفاء .. المشكلة إن زي ما قلتلك الوقت ده كانت ألمانيا إستنفذت كل إمكانياتها في الحرب ومبقاش عندها القدرة إنها تصنع عدد يكفي من المقاتلات دي عشان تقلب موازين الحرب .. بعد الحرب العالمية الثانية ما خلصت الأمريكان والسوفييت ركزوا أوي علي سباق مين فيهم يصنع مقاتلات نفاثة أحسن من الثاني .. الأمريكان عملوا مقاتلات P-80 و F-84 والمشكلة إن كان لسه الأمريكان مقتنعين إن التصميم اللي عمله الألمان في Messerschmitt Me-262 هو بس اللي ينفع .. فضلوا مقتنعين إن اللي المفروض الطيارة النفاثة تتصمم علي أساسه هو إنك تعمل مقاتلة من الصلب والجناحين بتوعها ثابتين مبيتحركوش ويبقوا عموديين علي جسم الطيارة .. المشكلة في التصميم ده بتظهر كل ما سرعة الطيارة بتزيد وبتقرب من حاجز الصوت ساعتها الDrag Force أو قوة مقاومة الهواء بتخلق موجات تضاغطية Shockwaves بتخلي جسم الطيارة يترج لدرجة إنها ممكن تفك من بعضها.

لما جت سنة 1950 وحصلت الحرب الكورية كانت أول مواجهة فعلياً بين المقاتلات النفاثة .. الأمريكان كان عندهم F-86 Sabre والقوات الجوية الكورية الشمالية والقوات الجوية الصينية كان عندها مقاتلات MiG-15 السوفيتية والإتنين أقصي سرعة ليهم كانت حوالي 1088 كيلومتر في الساعة .. المشكلة إن إسلوب الطيران وطبيعة الإشتباكات الجوية في الحرب الكورية مفرقتش كتير عن اللي كان بيحصل في الحرب العالمية الثانية بس يمكن بيتم بسرعات أعلي شوية.

مقاتلات الجيل الثاني .. بتقدر تكسر حاجز الصوت وكل مقاتلة ليها الهدف اللي إتصممت علشانه:

يوم 14 أكتوبر 1947 فيه طيار إسمه (تشاك ييجر Chuck Yeager) قدر إنه يكسر حاجز الصوت بطيارة موديل Bell X-1 .. مهندسي الطيران خدوا التعديل اللي إتعمل في المحرك النفاث في الطيارة دي وبدأوا يطبقوه في المقاتلات النفاثة والتعديل ده هو حاجة إسمها Afterburner إن حضرتك بعد ما نواتج الإحتراق تطلع من التربينة أحقن فيها وقود وخليهم يعملوا حريق تاني بعد التربينة .. إنت تقدر تقسم مقاتلات الجيل الثاني لمجموعتين وسبب التقسيمة دي هو الوضع الجديد إن بقي عندك قوتين عظميتين اللي هم أميركا والإتحاد السوفيتي كل واحدة فيهم عندها أسلحة نووية تقدر تنهي بيها وجود الدولة الثانية:

• المجموعة الأولي هي المقاتلات الإعتراضية أو Interceptors زي المقاتلات السوفيتية سوخوي Su-9 والأميريكية F-104 Starfighter من تصنيع شركة Lockheed Martin والفرنسية ميراج Mirage III .. سبب إن المقاتلات دي إتسمت مقاتلات إعتراضية Interceptors هو إن المقاتلات دي سريعة جداً بس معندهاش قدرة عالية علي المناورة .. وظيفتها إن لو مثلاً الإتحاد السوفيتي حب يوجه ضربة نووية لأميركا فهو حيبعت سرب من القاذفات كل واحدة فيهم بتقدر تشيل قنابل نووية .. الأمريكان ساعتها يبعتوا سرب من مقاتلات F-104 Starfighters اللي بتطير بسرعة عالية أوي عشان يصطادوا القاذفات دي قبل ما توصل فوق الأراضي الأميريكية.
• المجموعة الثانية هي المقاتلات/القاذفات قصيرة المدي اللي إتصممت عشان تقصف الأهداف الأرضية وتشتبك مع مقاتلات العدو .. المقاتلات دي كانت بتطير بسرعات أعلي من سرعة الصوت وعشان كده بيتقال عليها Supersonic وأشهر أمثلة ليها F-100 Super Sabre الأميريكية و MiG-19 السوفيتية .

مقاتلات الجيل الثالث .. مقاتلات تقيلة و سريعة ومعقدة وملهاش لازمة:

لما جت الستينات مهندسي الطيران إكتشفوا إنهم قدام واقع جديد والواقع ده حطهم قدام 3 حقايق مهمين أوي:

• الحقيقة الأولي إن مبقاش ليها أي معني إني أصرف مليارات عشان أصنع قاذفات قنابل إستراتيجية بتقدر تشيل قنابل نووية وبسهولة أوي منظومات الدفاع الجوي المعادية تقدر توقعها بصواريخ أرض-جو بعيدة المدي.
• الحقيقة الثانية إن بما إن القاذفات مبقاش ليها معني فكمان المقاتلات الإعتراضية اللي هي المجموعة الأولي من الجيل الثاني مبقاش ليها لازمة إننا نصنعها .. يمكن لإن السوفييت دماغهم ناشفه فهم برده كملوا يدفعوا دم قلبهم علي تصنيع وتطوير طائرات إعتراضية زي Su-15 و Tu-128.
• مستقبل المقاتلات هو إنك تجيب 3 حاجات ظهروا مع بعض في وقت واحد اللي هم: ظهور تكنولوجيا Analog Computers مع ظهور فكرة التزود بالوقود في الجو مع ظهور فكرة صواريخ جو-جو وتضرب ال3 حاجات دول في الخلاط مع بعض عشان يطلعلك جيل جديد من المقاتلات اللي هو مقاتلات الجيل الثالث.

أهم وأشهر مثال لمقاتلات الجيل الثالث كانت المقاتلة الأميريكية فانتوم F-4 Phantom اللي كانت العمود الفقري للقوات المسلحة الإسرائيلية خلال حرب 6 أكتوبر 1973 .. المقاتلات دي كانت تقيلة فعلاً وبكرسيين واحد للطيار والثاني للملاح .. إتصممت علي إنها تستخدم محركين نفاث J79 بيدولها سرعة قصوي 2.25 ضعف سرعة الصوت يعني بتتكلم عن 2357 كيلومتر في الساعة .. بتقدر تشيل حمولة 40,000 كيلوجرام من القنابل والصواريخ .. الطيار كان بيقدر إنه يشتبك مع مقاتلات العدو وهو بعيد عنها بمسافة 35 كيلومتر بسبب إن كان فيها صواريخ جديدة لانج هي AIM-7E Sparrow .. كانت أول مرة البشر يعملوا مقاتلة بتقدر تشيل قنابل وصواريخ جو-أرض موجهة بالليزر .. كان طبيعي وسط الإمكانيات دي كلها إن الطيار الإسرائيلي يحس إن معاه أحسن مقاتلة في العالم .. بإختصار لما الF-4 Phantom ظهرت هي كانت الiPhone بتاع المقاتلات النفاثة.

بس مشاكل مقاتلات الجيل الثالث بدأت تظهر لما دخلت ساحات المعارك في حربي فيتنام وأكتوبر .. هي صحيح مقاتلات سريعة بس معندهاش قدرة علي المناورة .. صحيح فيها صواريخ جو-جو بعيدة المدي بتقدر تصطاد مقاتلات العدو من مسافات بعيدة بس الرادار بتاع التوجيه كان مبني علي تكنولوجيا لسه بتتولد فمكنش فعال أوي .. فجأة إكتشفنا إن لما F-4 Phantom إتحطت في مواجهة مع مقاتلات MiG-17 و MiG-21 السوفيتية اللي يعتبروا مقاتلات جيل ثاني فهي مكانتش المقاتلة المذهلة اللي كلنا كنا متخييلنها .. ولإن تاني السوفييت دماغهم ناشفة ومبيتعلموش بسهولة فهم شافوا مشاكل الF-4 Phantom وقالوا لنفسهم إحنا لازم نقع في نفس الأخطاء بتاعة الأمريكان وعملوا المقاتلة MiG-25 Foxbat اللي صحيح بتوصل لسرعة طيران Mach3 يعني 3 أضعاف سرعة الصوت بس إذا كانت F-4 Phantom ملهاش لازمة فMiG-25 Foxbat مكنش ليها أي ستين لازمة.

مقاتلات الجيل الرابع .. مقاتلات متعددة المهام وليها قدرة عالية علي المناورة وبتكنولوجيا جديدة إسمها Fly-by-Wire:

حربي فيتنام وأكتوبر خلت مهندسي الطيران يقولوا لنفسهم إن لازم يدمجوا ما بين السرعة والقدرة العالية علي المناورة وده خلاهم يفكروا في حاجة إسمها Fly-by-wire ودي عشان تفهمها فهي أقرب ما تكون لفكرة الPower Steering في عربيتك إنك بدل ما كنت لما بتسوق عربية Lada أو Fiat 128 كأنك بتشيل حديد وإنت بتحود بالدريكسيون فإحنا عملنالك فكرة الPower Steering عشان بسهولة حركة الدريكسيون تتنقل للعجل .. نفس الفكرة إحنا عايزين حركة إيد الطيار علي الJoy Stick تترجم بسرعة لمناورة تقوم بيها المقاتلة .. الحقيقة إن في الفترة دي حصل 3 نقلات مهمة في الهندسة لما حصلوا مع بعض هم اللي خلقولنا مقاتلات الجيل الرابع:

• حصلت نطة جامدة في هندسة تصنيع المحركات النفاثة لما عملنا حاجة إسمها Compressor-bypassing Turbofans ودي تكنولوجيا جديدة خلت المحرك النفاث يبقي مستقر Stable في السرعات العالية أوي.
• حصلت نطات جبارة في علم إسمه Avionics وده بإختصار أي حاجة شغالة علي دائرة كهرباء في الطيارة .. الرادرات الجديدة بقت Doppler Radar وده عطي للطيار حاجة إسمها Look Down Shoot Down بحيث إنك لو إنت بتطير علي إرتفاع أعلي من إرتفاع الطيارة المعادية فإنت مبقتش محتاج تنزل بمقاتلتك لتحت عشان تقدر تنشن صواريخك عليها .. كمان فكرة إن خوذة الطيار بقي فيها شاشة عرض Heads-up Display خلت إن كل المعلومات المهمة بتتعرض قدام عينه وده خلاه يركز أكثر علي المناورة بدل ما كان زمان محتاج يفضل باصص علي كذا عداد وكذا شاشه قدامة وفي نفس الوقت يفضل مركز وهو طاير.
• عيوب صواريخ جو-جو بعيدة المدي أخيراً بدأت تتعالج وبقي عندنا صواريخ زي AIM-7F و AIM-120 اللي خلت الطيار مبقاش محتاج يكون شايف الطيارة المعادية عشان يسقطها.

كل ده إترجم في مقاتلات الجيل الرابع زي F-15 Strike Eagle و F-16 Fighting Falcon و F-14 Tomcat الأميريكية و MiG-29 و MiG-31 و Su-27 السوفيتية و Mirage 2000 الفرنسية .. زي أي سلاح جديد إنت لازم تجربه في ساحة معركة عشان فعلاً تختبره وفي نفس الوقت إنت بتبقي عامل حسابك إن ممكن ساعة الإختبار الحقيقي يظهرلك مشاكل إنت مكنتش عامل حسابها .. أول إختبار حقيقي لمقاتلات الجيل الرابع كانت أيام حرب لبنان 1982 لما إسرائيل غزت لبنان وخلال الحرب دي دارت معركة وادي البقاع الجوية بين القوات الجوية الإسرائيلية والسورية .. الإسرائيليين كان معاهم مقاتلات F-15 Strike Eagle و F-16 Fighting Falcon وقدروا يسقطوا مئات المقاتلات السورية اللي كانت معظمها مقاتلات جيل ثاني وثالث بدون أي خسائر في المقاتلات الإسرائيلية.

مقاتلات الجيل الخامس .. المقاتلات اللي ليها القدرة علي التخفي من الرادارات Stealth:

رغم النجاح الكبير لمقاتلات الجيل الرابع بس شركات الطيران الأميريكية بدأت تروح لفكرة التخفي من الرادار Stealth إنك تعمل مقاتلة ليها Radar Cross-Section قليل فبيبقي صعب أوي انها تتلقط بالرادارات .. أول مقاتلتين يخشوا الخدمة بالإمكانية دي كانوا F-117 Nighthawk و B-2 Spirit ودي قاذفات دورها إنها تطير فوق أرض العدو من غير ما تتلقط وترمي قنابلها فوقه .. في التسعينات بدأ الأمريكان يشتغلوا علي مقاتلة إشتباك جوي ليها القدرة علي التخفي من الرادار وإتولدت هنا المقاتلة F-22 Raptor واللي كانت فعلاً مقاتلة ملهاش مثيل في العالم .. كانت سريعة وليها قدرة علي المناورة يمكن أعلي من مقاتلات الجيل الرابع وفي نفس الوقت ليها Radar Cross-Section بيخليها تقريباً مش بتتلقط ومش بتتعرض لنيران العدو إلا في الإشتباكات المباشرة .. مشكلة الF-22 Raptor إنها كانت غالية بشكل مستفز وده خلي الأمريكان يفكروا في F-35 Lightening II اللي بردوا إكتشفوا إنها غالية أوي رغم إن فكرتها أساساً كانت إنها توفر شوية فلوس.

نقطة مهمة وهي إن محدش قال إن مقاتلات الجيل الخامس مش بتتلقط .. إنت لو الدفاعات الأرضية بتاعتك فيها رادارات Low-Bandwidth فإنت حتقدر تلقطها هي بس المشكلة إنك إزاي تستهدفها بصواريخ أرض-جو لإن الصواريخ صعب أوي يتركب عليها الرادارات دي .. في العالم دلوقتي معندكش غير 4 مقاتلات بس تقدر تقول عليهم Stealth اللي هم F-22 Raptor و F-35 Lightening II الأميريكية و Su-57 الروسية اللي ليها قدرات مناورة أعلي بكتير من F-22 Raptor بس قدرتها علي التخفي من الرادارات مش عالية أوي وكمان عندك Chengdu J-20 الصينية.

نقطة أخيرة وهي إن مقاتلات الجيل الخامس مكلفة أوي وصعبة في تصنيعها وصيانتها وتشغيلها .. عشان كده فيه شوية مقاتلات بيتقال عليهم مجازاً مقاتلات الجيل أربعة ونص Generation 4.5 زي Su-35 الروسية و Rafale الفرنسية وTyphoon الأوروبية و FA-18E/F Super Hornet الأميريكية .. دي مقاتلات قدراتها تكاد تكون هي هي قدرات مقاتلات الجيل الخامس بس الفرق الوحيد إن مفيهاش القدرة علي التخفي من الرادارات.

المصدر:

• مقالة بعنوان The Forgotten Story of How the F-22 and F-35 Were Born نشرت في مجلة The National Interest وده لينك المقالة الأصلية:
  http://nationalinterest.org/blog/the-buzz/the-forgotten-story-how-the-f-22-f-35-were-born-23468