من الحاجات اللي أنا إتعلمتها في الحياة إن الدنيا دي أوضة وصالة .. فيه ناس بتحب تسمي الحكاية دي The Butterfly Effect بس أنا عشان إتربيت علي مبدأ إن النبي عربي فأنا بقول إن الدنيا أوضة وصالة .. إن حضرتك تقوم الصبح تقرر إنك مكسل تنزل الشغل فده معناه إن مش بس اليوم ده حيتخصم من رصيد أجازتك .. لا .. ده فيه سواق ميكروباص إنت مش حتديله أجرته .. فيه ساندوتشين فول بالفلفل متعود تشتريهم من عربية الفول اللي جنب شغلك مش حتجيبهم .. وغيره وغيره من الحاجات اللي كانت حتحصل ومحصلتش عشان حضرتك كسلت تنزل شغلك .. في السياسة برده نفس المبدأ بيتطبق .. عندك كيس الشيتوس الحجم العائلي اللي كان بيحكم أميركا مثلاً .. الرجل ده خلي الإمارات والبحرين يمضوا إتفاقية سلام مع إسرائيل علي أساس إن ده يزود من رصيده عند اللوبي اليهودي ويخلوه يكسب الإنتخابات .. هوبا خسر الإنتخابات .. قام عامل الحاجة اللي الإسرائيليين مكانوش عايزينها.
هو حيبيع طيارات F-35 Lightening II للإمارات .. ومش حيبيعلهم طيارة ولا إتنين .. حيديهم 50 طيارة مرة واحدة اللي هو تقريباً نفس العدد بتاع الطيارات دي اللي تحت إيد إسرائيل وبيشكلوا السرب الذهبي Golden Squadron بتاعهم .. ومش بس كده .. حيديهم طيارات بدون طيار طراز Reaper بتقدر تشيل صواريخ وكمان حيديهم طيارة حرب أليكترونية EA-18G Growler .. تفتكر لو كان (دونالد ترامب Donald Trump) كسب الإنتخابات كان عطي السلاح ده كله للإمارات؟ .. أنا في رأيي لا وإنت من حقك تختلف معايا .. وحتي ده مش معناه إن السلاح ده بكره الصبح حيروح للإماراتيين .. إحتمال (جو بايدن Joe Biden) يعترض ويلغي الصفقة كلها .. وحتي لو (بايدن) معترضش تحت ضغط شركات السلاح الأمريكاني فالسلاح ده كله عشان يوصل للإماراتيين إنت بتتكلم عن ولا سبع سنين قدام.
بس تعالوا سوا نسأل السؤال بالعكس .. هل الإمارات فعلاً محتاجة الطيارات دي؟ .. زي ما حكيتلكوا علي المبدأ اللي أنا مؤمن بيه في السياسة اللي هو إن الدنيا أوضة وصالة فأنا برده مؤمن بمبدأ ثاني في شرا السلاح .. اللي يعوزه البيت يحرم علي الجامع .. مينفعش تبقي بتتكلم عن دولة سلاح البحرية بتاعها غلبان وعلي قد حاله وتيجي تقولي أنا عايز أشتري طيارات F-35 .. برده ده رأيي الشخصي ومن حقك تختلف معايا بس عشان أوضحلك رأيي وتفهمه لازم أخدك من إيدك ونحاول مع بعض نفهم هو بالصلاة علي سيدنا النبي ليه فيه فرق السما والأرض بين إمكانيات سلاح الجو وإمكانيات البحرية الإماراتية؟ واللي أقدر أقولك إن السبب ده يتلخص في بني أدم واحد .. (محمد بن زايد ال ناهيان).
(محمد بن زايد) .. متلازمة (مبارك) والضربة الجوية:
جيل الثمانينات وأوائل التسعينات اللي لحق فترة إن التليفيزيون المصري مفيهوش غير القناة الأولي والثانية ومكنش فيه إنترنت في كل بيت ولا موبايلات فاكر كويس إزاي الإعلام المصري أكل دماغنا بفكرة (مبارك) قائد الضربة الجوية .. علي فكرة .. سلاح الجو بتاعنا أكل الشهد بسبب الحكاية دي .. كون إن رئيس الدولة يكون إبن المؤسسة العسكرية ويكون إتربي علي إيد سلاح معين من الأفرع الرئيسية بتخلي الفرع ده شادد حيله علي الباقي .. ده نفس اللي بنعيشه حالياً في مصر مع المخابرات الحربية اللي عشان الرئيس جاي منها فهي بتستقوي علي خلق الله جوه المؤسسة العسكرية .. الفكرة دي هي هي حصلت في الإمارات .. سنة 1991 كان قائد سلاح الجو الإماراتي هو (محمد بن زايد) اللي هو دلوقتي ولي عهد الإمارات العربية المتحدة والحاكم الفعلي للإمارات .. بغض النظر إن (محمد) إستلم قيادة سلاح الجو وهو عنده 29 سنة وإن ده سن ميخليش حد مؤهل إنه يمسك فرع ماكدونالدز اللي قدام القرية الذكية علي طريق مصر إسكندرية الصحراوي وإنه مش محتاجة فكاكة إنك تبقي فاهم إنه إتعين واسطة بس الرجل ده عمل حاجة فضلت مسمعة في المؤسسة العسكرية الإماراتية لحد دلوقتي.
سنة 1991 كانت دول الخليج بتحاول تفوق من صدمة الغزو العراقي للكويت .. دولة زي الإمارات مثلاً كانت زمان بتقول إن العراق حتحميني لو إيران مدت إيدها عليا .. دلوقتي بقوا بيقولوا لنفسهم إن إحتمال إيران والعراق يمدوا إيدهم عليا وعشان كده أنا لازم أشوف حد تاني يحميني ومكنش قدامهم إلا أميركا .. (محمد) كان الإبن الكبير للشيخ (زايد ال ناهيان) الله يرحمه .. هو خريج زي ما تقول كده الكلية الجوية البريطانية .. أبوه كان بيثق فيه جداً ويمكن عشان كده هو سمع بنصيحته لما قاله إن إحنا لازم نحط 4 مليار دولار وديعة في الخزانة الأميريكية كمصاريف القوات الأميريكية اللي كانت بتطرد القوات العراقية من الكويت .. في السنة دي (محمد) زي ما قلتلك إتعين قائد لسلاح الجو الإماراتي وسافر أميركا ومعاه في إيده لستة طلبات .. كان عايز طيارات F-16 Block 60 وطيارات هليكوبتر اباتشي Apache وصواريخ هيل فاير Hellfire وإتدفع وقتها في الصفقة دي فوق 8 مليار دولار أيام الرخص .. زي ما يكون مانشستر سيتي داخل ميركاتو الصيف يشتري لاعيبه .. الصفقات دي كلها خلت ناس كتير تستغرب أوي لإنها كانت أول مرة أميركا توافق تبيع سلاح يكون أحدث من السلاح اللي قواتها المسلحة نفسها بتستخدمه .. طيارة F-16 Block 60 وقتها مكنتش دخلت الخدمة في سلاح الجو الأمريكاني .. غير كده (محمد بن زايد) راح إشتري فوق 60 طيارة Mirage 2000 فرنساوي من تصنيع شركة داسولت Dassault.
من ضمن الناس اللي إستغربت كان الكونجرس الأميريكي .. وقتها الكونجرس كانت وجهة نظره إن معلش يعني إنتي يا وزارة الدفاع قلتي وافقوا ندي سلاح ل(صدام حسين) الله يرحمه عشان ده حليف لينا وداخل حرب ضد إيران اللي إحنا شايفينها عدو .. (صدام) خد السلاح ده ودخل بيه الكويت .. إيش ضمني إن لما أنا أوافق أدي (محمد بن زايد) السلاح ده كله مش حيقلب علي (صدام حسين) جديد؟ .. للإجابة علي السؤال ده الكونجرس استدعي واحد اسمه (ريتشارد كلارك Richard A. Clarke) كان وقتها مساعد وزير الخارجية لجلسة استماع واللي في الجلسة كان ناقص يحلف علي الإنجيل إن يا جدعان مستحيل (محمد بن زايد) يقلب علي (صدام حسين) جديد لإن الإماراتيين دول ناس طيبين أوي يتحطوا علي الجرح يطيب .. وعشان استعير كلامه بالضبط .. الرجل ده قال للكونجرس إن الإمارات حتبقي A force for peace يعني قوة تدافع عن السلام .. علي فكرة (ريتشارد كلارك) بقي من مستشاري (محمد بن زايد) المقربين بعد كده.
جري الشريط 30 سنة و(محمد) بقي عنده 58 سنة وبقي ولي عهد أبوظبي والحاكم الفعلي للإمارات العربية المتحدة وغالبا ومش حبقي ببالغ لو قلت إنه أهم حاكم عربي حالياً علي الإطلاق .. مش بس لإن تحت إيده أكبر صندوق ثروة سيادية أو Sovereign Wealth Fund في العالم محطوط فيه 1.3 ترليون دولار .. كمان هو تحت إيده قوات مسلحة تعتبر من أقوي القوات المسلحة تسليحاً علي مستوي العالم .. القوات المسلحة الإماراتية الحقيقة أثبتت نفسها لدرجة إن وزير الدفاع الأميريكي السابق (جيمس ماتيس James Mattis) واللي عينه (ترامب) وهو اللي مشاه برده وصفها بإنها سبارطة الصغيرة أو Little Sparta.
ده مش معناه إن الإمارات كانت بتشتري الطيارات دي كلها عشان تتصور بيها .. لا .. الإمارات من الدول القليلة اللي مش ماشية بمبدأ حط الحاجة في النيش عشان متتكسرش .. الإمارات بتستخدم اللي هي بتشتريه .. الطيارين الإماراتيين نفذوا طلعات جوية فوق سوريا واليمن وليبيا وأفغانستان كمان .. خلال الغارات الجوية اللي عملها التحالف الغربي ضد تنظيم الدولة الإسلامية في العراق والشام اللي إحنا عارفينه بإسم داعش والكلام ده كان بين 2014 لحد 2016 فعايزك تعرف إن أكتر الطلعات الجوية اللي عملتها الطيارات الأميريكية فوق سوريا والعراق طلعت من قاعدة الظفرة الجوية في الإمارات .. عايزك برده تعرف إن تاني أكتر بلد طياراتها نفذت غارات جوية في سوريا والعراق بعد أميركا كانت الإمارات .. قاعدة الظفرة الجوية دي شغال فيها 3,500 عسكري أمريكاني .. دي القاعدة الجوية الوحيدة بره أميركا اللي فيها طيارات F-22 Raptor .. وشوف يا أخي رغم كل ده قدام الناس الحكومة الإماراتية بتحلف بأيمانات المسلمين كلها إن قاعدة الظفرة الجوية دي مفيهاش أمريكان .. إنت صعب تلاقي دولة ليها تعاون عسكري مع الأمريكان زي الإمارات يمكن بإستثناء إسرائيل .. مفيش حرب دخلها الأمريكان إلا والإماراتييين كانوا في ديلهم .. كانوا معاهم في حرب تحرير الكويت أو حرب الخليج الثانية سنة 1991 .. كانوا معاهم في حرب الصومال سنة 1993 .. كانوا وراهم في كوسوفو وليبيا وحتي أفغانستان سنة 2001.
سلاح البحرية الامارتي .. تعرف مسلسل قيراط إلا ربع؟
زي ما شفنا سوا سلاح الجو الإماراتي فشيخ .. سلاح المدرعات الإماراتي فعلاً حاجة محترمة جداً .. الناس دي عندها فوق 400 دبابة فرنساوي ليكليرك Leclerc .. عندهم فوق 3,000 مدرعة M1224 MaxxPro ودي مدرعات يبان إسمها إنه Password موبايل راجل متجوز خايف مراته تدعبس وراه بس هي بتتصنف علي إنها Mine-Resistant Ambush-Protected وإختصاراً بتتسمي MRAP ودي مدرعات لو فرقعت تحتيها لغم أرضي فالعساكر اللي فيها مش حيتأثروا .. عندهم كمان فوق 600 مدرعة روسي BMP-3 وده غير مدرعات نمر Nimr اللي هم بيصنعوها بنفسهم .. بس إذا كان سلاح الجو الإماراتي شادد حيله وسلاح المدرعات بتاعهم إلي حد كبير محترم فالبحرية الإماراتية غلبانة غلب (ريهام عبدالغفور) في مسلسل قيراط إلا ربع.
صحيح إن إيران تعتبر أهم تهديد للأمن القومي الخليجي كله مش الإماراتي بس .. وصحيح إن سلاح الجو الإماراتي تسليحاً هو يقدر يدوس علي وش سلاح الجو الإيراني في أي مواجهة إلا إن لو جيت تقارن بين إمكانيات البحرية الإماراتية والإيرانية فالحق يتقال يعني لولا وجود الأسطول الخامس الأميريكي في الخليج العربي لا كانت البحرية الإيرانية كلت عيش علي قفا الإماراتيين والسعوديين .. الحل للمشكلة دي بدأ الإماراتيين يسعوا فيه من نوفمبر 2017 لما الرئيس الفرنساوي (إيمانويل ماكرون Emmanuel Macron) راح زار أبوظبي وفي وسط القعدة إتفق هو و(محمد بن زايد) علي إن الإمارات حتشتري سفن كورفيت من طراز Gowind-Class بحيث العقد حيكون بين شركة Naval Group الفرنسية اللي بتصنع السفن دي وبين شركة ترسانة أبوظبي Abu Dhabi Ship Building Company أو ADSB إختصاراً .. 17 شهر من المفاوضات لحد ما في 25 مارس 2019 إتمضي العقد واللي بيقول إن الإمارات حتشتري سفينتين وفيه Option إنهم يشتروا إتنين كمان بحيث حيجي معاهم صواريخ إيكسوسيت Exocet المضادة للسفن .. حيجي معاهم برده صواريخ مضادة للطيارات إسمها RIM-162 Evolved SeaSparrow .. الصفقة دي شاكب راكب حتكلف الإماراتيين 850 مليون دولار.
ده مش معناه إن الصفقة حتمشي زي السكينة في الجاتوه لإن فيه خازوق محدش عارف حيتعاملوا معاه إزاي؟ .. الخازوق إن سفن Gowind-Class بيتركب عليها محركات من تصنيع شركة MTU الألمانية .. المشكلة إن ألمانيا طلعت قرار وقف تصدير أسلحة للسعودية والإمارات بسبب الفشخة اللي هم فشخوها لليمن والكارثة الإنسانية اللي هناك .. هل الإماراتيين حيتكلموا مع الألمان ويراضوهم؟ .. الله أعلم .. هل لو الألمان نشفوا دماغهم ممكن السفن يتركب عليهم محركات تانية من تصنيع شركة تانية؟ .. برده الله أعلم.
قطر .. أنا عزمت نفسي عندكوا وأتمني أبقي مبسوطة معاكوا:
الخازوق اللي فعلياً الإمارات مكنتش عاملة حسابها عليه هو قطر .. بص للموضوع من وجهة نظر الإماراتيين وإنت حتفهم .. دلوقتي إحنا ماضيين إتفاقية السلام مع إسرائيل اللي محدش لحد دلوقتي قرأ بنودها دي عشان في الأخر لما نيجي نطلب من (ترامب) يدينا طيارات F-35 يبقي محرج يقولنا لا .. وكان فيه كلام علي إن الإسرائيليين موافقين علي إن أميركا تدي الإمارات طيارات F-35 في مقابل إن أميركا تدي إسرائيل طيارات F-22 Raptor .. دلوقتي القطريين عزموا نفسهم وقدموا طلب رسمي بإنهم عايزين يشتروا طيارات F-35 .. قطر اللي إتقالها إن إنتي بقيتي حليف استثنائي لحلف شمال الأطلسي NATO رغم إن إنتي يا قطر مش عضوة فيه .. قطر اللي علي أرضها فيه مقر عمليات القوات الخاصة للقيادة المركزية الأميريكية .. قطر اللي القوات المسلحة الأميريكية متقدرش تستغني عنها .. قطر دي طلبت من أميركا تديها طيارات F-35 وهنا الحقيقة الأمريكان إتحطوا في خانة اليك .. طب لو وافقوا يدوا الإماراتيين الطيارات ورفضوا يدوها للقطريين شكلهم حيبقي إيه؟ .. طب لو رجعوا في كلامهم وقالوا لا الإماراتيين ولا القطريين حياخدوا الطيارات دول الخليج حتقول إيه علي أميركا؟ .. طب لو الأمريكان قالوا يلا ياض من هنا مفيش F-35 ممكن القطريين والإماراتيين يروحوا للصينيين أو الروس يطلبوا منهم طيارات خيل خامس فهل دي حتكون حاجة حلوة بالنسبة للأمريكان؟ .. طب لو الأمريكان قالوا ماشي حندي القطريين والإماراتيين طيارات F-35 وحندي الإسرائيليين طيارات F-22 وكله بثمنه مش ده ممكن يخلي دول عربية تانية من اللي بتتحسب علي إنها حليفة لأميركا زي السعودية ومصر والأردن هم كمان يطلبوا يبقي عندهم F-35؟ .. هل ساعتها إسرائيل حتوافق؟
عشان كل الأسئلة اللي ملهاش إجابة دي فأنا متوقع إن الأيام الأولي من رئاسة (جو بايدن) حتبقي مسلية فشخ .. (بايدن) ممكن يعمل زي الفنان (عادل إمام) لما إتقاله في عزا أبوه إنه كان مديون بفلوس فقالهم روحوا خدوها منه .. (بايدن) مش هو اللي ضرب الإماراتيين علي إيدهم عشان يمضوا إتفاقية سلام في التوقيت ده بالذات مع إسرائيل .. لو كان (ترامب) وعد الإماراتيين بطيارات F-35 ف(بايدن) حيقولهم روحوا خدوها منه .. أو يمكن القطريين حطوا مناخيرهم في الموضوع عشان يبوظوا الصفقة أصلاً .. بس لو فعلاً الإماراتيين مش حياخدوا F-35 ففعلياً زي ما ربنا قال .. وعسي أن تكرههوا شيئا وهو خير لكم .. مش يمكن أحسنلهم إنهم مياخدوش الطيارات دي والفلوس بتاعتها تروح لتطوير البحرية بتاعتهم؟
المصادر:
- مقالة بعنوان Even without F-35s the UAE’s military packs a big punch for its small size نشرت في مجلة Forbes وده لينك المقالة الأصلية:
https://www.forbes.com/sites/pauliddon/2020/11/09/even-without-f-35s-the-uaes-military-packs-a-big-punch-for-its-small-size/?sh=57a776334667 - مقالة بعنوان UAE, Naval Group quietly cut $850 million deal for Gowind ships نشرت في مجلة Defense News وده لينك المقالة الأصلية:
https://www.defensenews.com/naval/2019/06/10/uae-naval-group-quietly-cut-850-million-deal-for-gowind-ships/ - مقالة بعنوان The coming F-35 fiasco نشرت في مجلة Defense One وده لينك المقالة الأصلية:
https://www.defenseone.com/ideas/2020/10/coming-f-35-fiasco/169135/ - مقالة بعنوان The most powerful Arab leader isn’t M.B.S. It’s M.B.Z نشرت في جريدة The New York Times وده لينك المقالة الأصلية:
https://www.nytimes.com/2019/06/02/world/middleeast/crown-prince-mohammed-bin-zayed.html - دراسة بعنوان Sizing up little Sparta: Understanding UAE military effectiveness نشرها مركز American Enterprise Institute وده لينك الدراسة:
https://www.aei.org/wp-content/uploads/2020/10/Sizing-up-Little-Sparta-Understanding-UAE-military-effectiveness-3.pdf - مقالة بعنوان In the UAE, the United States has a quiet, potent ally nicknamed ‘Little Sparta’ نشرت في جريدة The Washington Post وده لينك المقالة الأصلية:
https://www.washingtonpost.com/world/national-security/in-the-uae-the-united-states-has-a-quiet-potent-ally-nicknamed-little-sparta/2014/11/08/3fc6a50c-643a-11e4-836c-83bc4f26eb67_story.html
