خير الدين بارباروسا .. لما بابا الفاتيكان يقول إنت لازم تموت يبقي إنت أكيد عديت.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/m4a

موضوعنا النهاردة اللي حنتكلم عنه هو (خير الدين بارباروسا) .. إنت ممكن متعرفش مين هو (خير الدين بارباروسا) وعمرك ما سمعت إسمه قبل كده بس إنت شفته كتير علي فكرة .. شفته في سلسلة أفلام Pirates of The Caribbean في شخصية القبطان (هيكتور باربوسا Captain Hector Barbossa) اللي قدمها الممثل القدير (جيفيري راش Geoffrey Rush) .. شفته في كتب التاريخ كإسم كودي لعملية غزو الإتحاد السوفيتي اللي نفذتها القوات الألمانية خلال الحرب العالمية الثانية و(أدولف هتلر Adolf Hitler) شخصياً هو اللي سمي العملية دي بارباروسا Barbarossa .. بس اللي إنت مكنتش تعرفه إن إسم بارباروسا Barbarossa ده يبقي إسم بني أدم مسلم وإسمه (خير الدين) واللي قصة حياته مذهلة لدرجة إنت مش حتصدقها حتي لما أحكيهالك دلوقتي .. عايزك وإنت بتقرأ القصة دي تفتح مخك شوية لإن إحنا حنتكلم عن عصر غريب بالنسبة لك .. عصر إنت قريت عنه في كتب المدرسة بس محدش شرحولك ومشفتوش في أفلام وأغلب اللي تعرفه عنه إنت قريت عنه بوستات قصيرة علي Facebook وطبعاً مكنتش بتوريك الصورة كلها .. عشان مطولش عليك خلينا نخش في الموضوع علي طول.

زمان اللي هو ما بين 1479 لحد 1480 ومحدش عارف السنة بالضبط إتولد طفل أبوه وأمه سموه (خير الدين) في قرية بسيطة أوي إسمها بالايكيبوس Palaiokipos ودي قرية في جزيرة ضمن مجموعة جزر إسمها ميديلي Midilli ودي دلوقتي تابعة لليونان بس في الوقت اللي (خير الدين) إتولد فيه كانت تحت حكم الدولة العثمانية  .. المهم .. أم (خير الدين) كان إسمها (كاترينا Katrina) ودي أغلب الأقاويل بتقول إنها يونانية مسيحية وأبوه إسمه (يعقوب) بس محدش عارف جنس ملته إيه وفيه ناس بتقول إنه تركي وناس بتقول إنه يوناني برده بس أسلم وفيه ناس بتقول إنه ألباني .. ده كان طبيعي ومقبول وقتها إن إتنين من ديانات وعرقيات مختلفة يتجوزوا بعض تحت حكم العثمانيين مش زي حالنا دلوقتي بس ما علينا مش دي القضية .. المهم إن (يعقوب) و(كاترينا) خلفوا 4 أولاد و(خير الدين) كان الثالث .. الإبن الكبير كان إسمه (إلياس) والثاني إسمه (عروج) ومش عارفين إسم الأخ الرابع إيه .. (يعقوب) كان شغال بتاع فخار وإشتري قارب صغير عشان يستخدمه إنه يبيع منتجاته سواء علي الجزيرة أو في الجزر اللي حولهم .. أولاد (يعقوب) إتعلموا الملاحة البحرية عشان يقدروا يبحروا بالقارب ده لإن خلاص بيع الفخار بقي شغل العيلة أو Family Business .. (إلياس) و(عروج) إشتغلوا علي القارب اللي أبوهم إشتراه بس (خير الدين) إشتري قارب خاص به وبقوا شغالين تجار بيجروا ورا أكل عيشهم في البحر المتوسط .. لحد دلوقتي القصة مملة ومفيهاش جديد أنا عارف.

في الفترة من 1504 لحد 1510 كان (عروج) بيستخدم القارب بتاع أبوه عشان ينقل المسلمين الموريسكيين اللي بيهربوا من الغزو الإسباني للأندلس وسقوط غرناطة بحيث يهربهم من جوه إسبانيا لحد المغرب أو تونس أو الجزائر دلوقتي .. سُمعة (عروج) سمّعت أوي مع اللاجئين المسلمين وطلعوا عليه إسم (بابا عروج) .. المسيحيين الإسبان مكانوش بيفهموا عربي كويس فسمعوا الإسم بدل (بابا عروج) (بارباروسا Barbarossa) اللي هي في اللغة الإيطالية معناها الأصهب اللي هو أبو شعر أحمر .. صادف لأجل الحظ يعني إن (خير الدين) و(عروج) الإتنين أصهبين يعني شعرهم ودقنهم لونها أحمر فياعيني الإسم لزق فيهم وفجأة العالم كله والتاريخ والناس كلها بقت بتقول علي (عروج يعقوب) إنه (بارباروسا Barbarossa).

سنة 1516 يعني لما (خير الدين) كان في أواخر الثلاثينات من عمره قول مثلاً 37 سنة حصل إن الإسبان شنوا غارة جريئة أوي من الأندلس ونزلوا بسفنهم علي شواطيء مدينة الجزائر اللي هي عاصمة دولة الجزائر دلوقتي وإحتلوها وطردوا منها الأمير بتاعها (سليم التومي) .. (سليم التومي) عرض علي (عروج) و(خير الدين) إنهم يجوا يحرروا الجزائر تاني بمساعدة إضافية من الأسطول العثماني .. الأخوين قدروا فعلاً إنهم يحرروا الجزائر ويطردوا الإسبان منها وبعد كده تأمروا علي (سليم التومي) وقتلوه .. (عروج) نصب نفسه سلطان الجزائر بس هو كان عارف إن حكمه مش مبني علي أرض صلبة وعشان كده هو قبل عرض السلطان العثماني (سليم الأول) إنه يضم الجزائر للدولة العثمانية وده معناه إن (عروج) بقي إسمه (عروج بك يعقوب) وبك دي اللي هي بيه عندنا في العامية المصرية .. تقدر تقول إن (عروج) كده خد البكاوية وتحول إبن بياع الفخار اللي إتعلم الملاحة علي قارب لحاكم الجزائر .. شوف الزمن يا أخي.

سنة 1518 الإسبان شنوا غارة علي مدينة تلمسان الجزائرية ودي مدينة علي البحر المتوسط علي الحدود بين الجزائر والمغرب وقدروا يسيطروا عليها وخلال المعركة دي قتلوا (عروج) .. (خيرالدين) بعد وفاة أخوه ورث منه ولاية الجزائر وكمان ورث منه البكاوية وبقي إسمه (فخر الدين بك يعقوب) بس الأهم إنه ورث منه إسم (بارباروسا Barbarossa) .. ودي إشكالية بتلخبط ناس كتير .. الغرب سمي (عروج) بإسم بارباروسا بس بعد وفاته الإسم ده بقي يتقال علي أخوه (خير الدين) برده.

سنة 1520 توفي السلطان العثماني (سليم الأول) وجه وراه المعلم الكبير أوي (سليمان القانوني) اللي من كتر ما كان معدي في العظمة الأوروبيين سموه The Magnificent يعني العظيم .. (خير الدين) عرض علي (سليمان القانوني) إن الدولة العثمانية تحمي الجزائر من الإسبان وفي مقابل ده فالعثمانيين يقدروا يعتمدوا علي أسطول القراصنة اللي تحت إيد (خير الدين) .. (خير الدين) هو اللي حط المنهج بتاع القرصنة البحرية .. خلال فترة قليلة أوي قدر إنه يخلي الجزائر قاعدة بحرية قوية جداً ولاءها للعثمانيين وليها أسطول بحري قوي وجيش بري إلي حد ما محترم جداً .. (خير الدين بارباروسا) كان صداع في رأس الأوروبيين .. الحقيقة إن الCV بتاعه في الفترة دي يخليك تضرب كف علي كف وتقول لنفسك هو إزاي الرجل ده عمل كل ده؟

• السفن بتاعته هاجمت سفن إسبانية راجعة من أميركا وخلي بالك إن الأحداث دي كلها في الوقت اللي (كريستوفر كولومبوس Christopher Columbus) إكتشف قارة أميركا والسفن الإسبانية دي كانت راجعة من أميركا متحملة بالذهب وخير ربنا كله.

• سواحل إسبانيا وإيطاليا وفرنسا المطلة علي البحر المتوسط بقت في أي لحظة معرضه إنها تتعرض لغارة من سفن القراصنة التابعة ليه وبيتم نهب المدن والقري الساحلية دي وكمان بيتم أسر عدد من المسيحيين اللي عايشين فيها وبيتباعوا كعبيد .. متنساش إن الفترة دي من التاريخ كانت متوترة أوي لإن وقتها الأندلس كانت بتعيش فترة محاكم التفتيش الإسبانية .. في الفتره دي (خير الدين) بنفسه أشرف علي إجلاء أكثر من 70,000 مسلم بس من الأندلس لدول شمال أفريقيا سواء المغرب أو الجزائر أو تونس .. هو نقل 70,000 مسلم إتهجروا من بيوتهم عشان يهربوا من جحيم محاكم التفتيش .. من وجهة نظر (خيرالدين) فالمسيحيين الكاثوليك دول شياطين الجن في الأرض .. الكراهية المشتركة بين المسلمين والكاثوليك في الوقت ده خلت إن لما سفن (خير الدين) راحت تبحر في نهر التيبر اللي هو النهر اللي بيقسم العاصمة الإيطالية روما نصين سنة 1534 فسكان المدينة جاتلهم حالة من الذعر لدرجة إنهم أجلوا المدينة في وقت قياسي خوفاً من البحارة المسلمين اللي هم شايفينهم قراصنة حرامية وقاتلين قتلة.

• سنة 1522 سفن القراصنة بتاعة (خير الدين) ساعدت الأسطول العثماني في إنه يفتح جزيرة رودس في البحر المتوسط اللي كانت معقل للفرسان الهوسبيتاليين اللي كانوا صداع في رأس الدولة العثمانية والمعركة دي كانت نهاية الفرسان دول اللي بدأوا يظهروا أيام الحملات الصليبية.

(خير الدين بارباروسا) كان عامل صداع في رأس الأوروبيين الكاثوليك لدرجة إن الإمبراطور (تشارلز الخامس) إمبراطور الإمبراطورية الرومانية المقدسة اللي هي ألمانيا دلوقتي قرر إن مينفعش الرجل ده يعيش وسطنا كده ويسببلهم كل الرعب ده .. هو قرر إنه يجيب أدميرال إيطالي من مدينة جينوة اللي كانت زمان جمهورية مستقلة بذاتها إسمه (أندريا دوريا Andrea Doria) ويكلفه بالمهمة دي إن لازم (خير الدين بارباروسا) يموت .. الأخ (أندريا دوريا) كان عارف إن مفيش حل إلا إن أسطول (خير الدين) يتعرض لهزيمة بحرية ساحقة ومينفعش إنهم مجرد يغتالوه .. (خير الدين) كان رمز وقتها زيه زي باتمان كده أو سوبرمان مينفعش تقتله عشان حيجي غيره وغيره وغيره .. إنت محتاج تدمر الرمز ده قدام كل الناس عشان محدش يفكر يحل محله.

خطة (أندريا دوريا) إنه يخدع (خير الدين) لفخ بإنه يجبره إنه هو اللي يجيله مش إن (أندريا دوريا) هو اللي يروحله .. الخطة كانت إن (أندريا دوريا) يبدأ يحتل القري علي الساحل اليوناني الجنوبي علي البحر المتوسط .. القري دي كلها كانت تحت سيطرة العثمانيين .. لإن (خير الدين) ثعلب هو كمان فرده مكانش إنه يروح يحرر القري دي زي ما كان (أندريا دوريا) عايز .. هو رد بإنه راح فوق لحد إيطاليا سيطر علي مجموعة جزر كانت تحت سيطرة مدينة البندقية اللي وقتها كانت جمهورية مستقلة بذاتها برده والكلام ده كان سنة 1537 .. الجديد إن (خير الدين) لما سيطر علي الجزر دي مرفعش عليهم علم إمارة الجزائر اللي هو والي عليها إنما رفع علم الدولة العثمانية.

السنة اللي وراها اللي هي 1538 بابا الفاتيكان (بول الثالث Paul III) شخصياً إتدخل وقرر إنه مفيش حل غير إن دول أوروبا تعمل حاجة إسمها التحالف المقدس Holy League مكون من 5 دول هم الفاتيكان وإسبانيا وإمارة فرسان مالطة وجمهورية جنوة وجمهورية فينسيا اللي هي البندقية .. الخمس دول مع بعض شكلوا أسطول مشترك مكون من 157 سفينة بيسموها القادس Galleys اللي صورتها عندك وعينوا الأخ (أندريا دوريا) عشان يبقي هو قائد الأسطول ده ومهمة الأسطول ده كانت هزيمة أسطول (خير الدين بارباروسا) هزيمة ساحقة بحيث إنه ميقدرش يكون أسطول تاني يشكل أي تهديد مستقبلي لأوروبا .. لما بابا الفاتيكان شخصياً يقرر إنك بقيت بني أدم لا تطاق يبقي إنت كده أكيد عديت خلاص .. (خير الدين) مكنش تحت إيده غير 122 سفينة بس برده من نفس الطراز اللي القادس Galleys والأسطولين إشتبكوا مع بعض قدام سواحل مدينة بيرفيزا Perveza اليونانية يوم 28  سبتمبر 1538.

المعركة دي كانت نصر ساحق ل(خير الدين) .. الرجل مع إن قواته كانت أصغر بس خطته كانت هجوم في منتهي الشجاعة قبل ما الأسطول الاوروبي يقدر يحاصره .. خسائر الأسطول المقدس ده كانت إغراق 10 سفن وأسر 36 سفينة وتدمير 3 سفن في المقابل العثمانيين مخسروش ولا سفينة .. خسائر الأسطول المقدس البشرية كانت عدد مش محدد بالضبط من القتلي بس تم أسر 3000 بحار في حين العثمانيين أستشهد منهم 400 بحار وأصيب 800 .. تاني يوم كل القادة الأوروبيين نصحوا (أندريا دوريا) إنه يكمل القتال وإن مينفعش إنهم ينسحبوا بس (أندريا دوريا) اللي شافه مكنش شوية وفعلاً أمر أسطوله بالإنسحاب لإنه كان عارف إن (خير الدين) مش من مصلحته إنه يطارد الأسطول المنسحب وده فعلاً اللي حصل .. بمجرد ما الأسطول الأوروبي المقدس ده إنسحب ف(خير الدين) خد أسطوله وراح علي أسطنبول.

السلطان (سليمان القانوني) إستقبل (خير الدين) بنفسه في قصر طوب قابي اللي هو مقر حكم السلطان العثماني ورقاه لرتبة قبطان باشا اللي هي أرفع رتبة في القوات البحرية العثمانية وكمان رقاه لمقام بيك لربكي ودي كلمة تركية معناها بيك البكاوات أو بيه الباهاوات يعني حاكم كل حكام إمارات شمال أفريقيا .. يعني إنت لو متعين والي ليبيا مثلاً فالمفروض إن اللي فوقك علي طول هو السلطان العثماني .. لا هو خلي والي ليبيا اللي فوقه هو (خير الدين) وفوق (خير الدين) السلطان العثماني .. مش كده وبس .. مكفاءات السلطان (سليمان القانوني) ل(خير الدين) كانت كمان إنه عطاله حكم جزيرة رودس.

بعد معركة بيرفيزا Perveza العثمانيين فعلياً سيطروا علي كل البحر المتوسط ومفيش دولة من دول أوروبا قدرت تفتح بقها قدام سيطرة العثمانيين علي البحر المتوسط لمدة 30 سنة كاملة .. خلال الفترة دي (خير الدين) طهر كل حتة من بحر إيجه اللي بيفصل بين تركيا واليونان والبحر الأيوني اللي بيفصل بين اليونان وإيطاليا من أي تحصينات أو قلاع كاثوليكية .. جمهورية فينيسيا وصل بيها الحال سنة 1540 إنها تقبل بالهدنة وإنها تتنازل للعثمانيين عن كل جزرها في بحر إيجه والبحر الأيوني وكمان تدفع جزية سنوية للعثمانيين .. في السنة دي برده الإمبراطور (تشارلز الخامس) اللي بفكرك إنه إمبراطور الإمبراطورية الرومانية المقدسة حاول إنه يقدم عرض مغري جداً ل(خير الدين) عشان يجي يعيش في ألمانيا ويعينه قائد عام لأسطول الإمبراطورية بس (خير الدين) رفض .. بعدها بسنة علي طول الإمبراطور (تشارلز الخامس) قاد بنفسه أسطول ضخم عشان يسيطر علي مدينة الجزائر بس حظه بقي إن قامت عاصفة قوية أوي ساعدت (خير الدين) إنه يعمل هجوم مضاد Counterattack ساحق دمر أسطول (تشارلز الخامس) وأجبره إنه ينسحب تاني لألمانيا.

محاولة (تشارلز الخامس) إنه يسيطر علي الجزائر حطت (خير الدين) قدام واقع جديد .. هو لقي نفسه عشان يحمي بلده من أي محاولات زي دي إنه يبقي عنيف أكثر ومفتري أكثر مع الأوروبيين  .. في الوقت ده الدولة العثمانية عملت مناورة سياسية إنها تحالفت مع فرنسا .. أيوه زي ما سمعت .. فرنسا خانت أوروبا وخرجت بره التحالف اللي كان بيجمعها مع إسبانيا والإمبراطورية الرومانية المقدسة .. رد الإسبان إنهم حاولوا يسيطروا علي سواحل فرنسا اللي بتطل علي البحر المتوسط بس أسطول (خير الدين) قدر إنه يحمي السواحل الفرنسية من كذا محاولة إسبانية في الفترة من 1540 لحد 1544 .. في السنة دي اللي هي 1544 أسطول (خير الدين) شن سلسلة غارات في منتهي الجرأة علي ساحل جمهورية البندقية اللي هي فينسيا لدرجة إن الإمبراطور (تشارلز الخامس) ملقاش حل غير إنه يعلن الهدنة مع السلطان (سليمان القانوني).

سنة 1545 شهدت أخر غارة يعملها (خير الدين) كانت علي سواحل إسبانيا وبعدها قرر إنه يسيب الحكم خالص .. ده حقيقي .. (خير الدين) قرر إنه يسيب حكم الجزائر ويسيب الأسطول ويسيب القيادة ويسيب كل حاجة ويروح يتقاعد ويطلع علي المعاش في أسطنبول وقرر ينهي حياته بمشروع نهائي إنه يكتب كل حاجة إتعلمها عن الملاحة البحرية والحروب والحكم في كتاب من 5 أجزاء وتوفي سنة 1546 ودفن في مقبرة دلوقتي بتقع في الجانب الأوروبي من مضيق البوسفور .. جنب قبره فيه تمثال له مكتوب عليه النص التالي واللي خليني أترجمهولك بالعامية عشان تكون فاهمه أكثر:

“هو الزئير اللي جاي من البحر ده جاي منين؟ ممكن يكون (بارباروسا) رجع تاني؟  .. هو جه من تونس و لا من الجزائر ولا من المضيق؟  .. متين سفينة بتبحر مع الأمواج .. جايين من البر رافعين أعلام عليها الهلال .. أيتها السفن المباركة يا تري جيتوا من أي بحار؟”

المصدر:

•  مقالة بعنوان Admiral Hayreddin Barbarossa نشرت علي Website إسمه Thought Co وده لينك المقالة الأصلية:
  https://www.thoughtco.com/admiral-hayreddin-barbarossa-195756