تاريخ

لأكتر من 200 سنة والإنكشارية دي تعتبر رأس الحربة بتاعة القوات المسلحة العثمانية .. فتوحات العثمانيين كلهم إتبنت علي كتاف القوات دي وده في حد ذاته شيء غريب بالنظر إلي أن كل أفراد القوات دي كانوا أولاً مش أتراك إنما كانوا عبيد من دول فتحها العثمانيين وثانياً إنهم مكانوش مولودين مسلمين أساساً وعشان كده أنا قلتلك إن الإنشكارية دول الميكس بتاع المماليك مع فرسان المعبد خصوصاً لو بدأت تشوف إزاي الإنكشارية بقي ليهم وضعهم ونفوذهم جوه الدولة .. مهم تكون فاهم إن النفوذ بيجي من لما يبقي معاك فلوس وسلاح.

بعد معركة حطين (صلاح الدين) مضيعش وقته .. خلال إسبوعين كان مسيطر علي كل موانيء الصليبيين علي البحر المتوسط يمكن بإستثناء ميناء مدينة صور اللبنانية دلوقتي .. شهر سبتمبر (صلاح الدين) وصل القدس وحاصرها وكانت وقتها المدينة تحت قيادة (باليين) اللي بفكرك بس إنه قدر يهرب من حطين .. يوم 2 أكتوبر (صلاح الدين) فتح القدس ودي كانت نهاية مملكة القدس.

هو إتولد سنة 1138 بإسم (يوسف) أبوه كان (نجم الدين أيوب) .. عيلته كانوا من الأكراد اللي من أصول أرمنية بس لما هو إتولد كانوا عايشين في مدينة تكريت العراقية.

(السادات) الله يرحمه مكنش في نيته ولا في خطته إنه يدمر إسرائيل .. هو كان عارف إن أولاً القوات المسلحة الإسرائيلية أقوي من إنها تتدمر كلها و ثانياً إن أميركا عمرها ما حتسمح بحاجة زي دي .. الهدف من الحرب كان إنه يلوي دراع إسرائيل عشان يقعدها غصب عنها علي طاولة المفاوضات.

يوم 3 سبتمبر 1260 الجيشين قابلوا بعض في عين جالوت في فلسطين .. علي إيدك الشمال المغول كانت نقطة قوتهم إن عندهم سلاح خيالة فاجر مخسرش معركة قبل كده وبالتالي ثقتهم في نفسهم عالية لدرجة إنك ممكن تقول إنهم كانوا واخدين قلم في نفسهم وبفكرك إن عددهم كان 20,000 فارس.

(شارل مارتل) عرف يختار الطرق الجانبية اللي تخليه يقدر ينقل جيش مكون من 30,000 جندي من غير ما حد من بتوع الإستطلاع من جيش المسلمين يقدر يلقطهم .. الموضوع مش سهل علي فكرة بس هو قدر يعمله .. و لإن (شارل مارتل) هو اللي إختار توقيت و مكان المعركة فهو قدر يحط رجله علي أول سلم النصر.