تابعونا

تاريخ

دي داي .. لا تحسبن المجد سوبيا بالمانجا أنت شاربها .. الجزء الأول.

الحقيقة إن المشكلة كانت واضحة للكل .. المشكلة بمنتهي البساطة إن أوروبا كلها ما عدا الدول اللي متحالفة مع ألمانيا فعلياً تحت سيطرتهم .. مفيش حد بيضرب نار علي النازيين غير السوفييت و الإنجليز .. الإنجليز قاعدين في جزيرتهم و الألمان من بدري مقررين إنهم مش عايزين يغزوهم .. ده مخلي مفيش حد قدام النازيين يلطشوا فيهم غير السوفييت .. لسنين و النازيين دايسين علي وش السوفييت .. لسنين و (ستالين) حيبوس إيد الحلفاء إن لازم يفتحوا جبهة جديدة عشان النازيين يتلهوا فيها شوية و كان دايماً بيقول إن أنسب حل هو فرنسا.

20 ديسمبر، 2022 906

لينك التسجيل الصوتي للمقالة علي ساوند كلاود:
https://on.soundcloud.com/gRcwH

فيه أيام في تاريخ البني أدمين مينفعش تعدي علينا بالساهل كده .. فيه أيام تستاهل إننا نقضي وقت نتكلم عنها و نتناقش فيها لإن اللي حصل في الأيام دي غيًر شكل حياتنا كبشر .. اليوم اللي (نييل أرمسترونج Neil Armstrong) مشي فيه علي القمر من الأيام دي .. إنت ممكن تسأل نفسك هو معلش يعني حياتي إتغيرت إزاي عشان واحد إتمشاله شوية علي القمر؟ .. عايزك تعرف إن الببرونة اللي إبنك أو بينتك بترضع بيها .. الحلة التيفال اللي مراتك بتعملك بيها الأكل .. تيل الفرامل اللي متركب في عربيتك .. كل دي إختراعات بقت في حياتك بسبب مشروع الفضاء الأميريكي و بسبب زي ما إنت قلت إن فيه واحد إتمشاله شوية علي القمر .. من ضمن الأيام دي برده اللي نستحق إننا نقف قدامها هو يوم 6 يونيو 1944 .. ده اليوم اللي قوات الحلفاء قدرت تعبر بحر المانش أو القنال الإنجليزي عشان تبدأ غزوها لفرنسا خلال الحرب العالمية الثانية .. ده اليوم اللي بسببه ألمانيا خسرت الحرب .. بسبب اليوم ده بقي عندك حاجة إسمها حرب باردة .. بقي عندك كيان اسمه إسرائيل .. و أميركا بقت القوة العظمي الأولي في العالم .. بإختصار شديد حياتك اللي إنت عايشها دلوقتي بقت بالشكل اللي إنت بتشوفه كل يوم ده بسبب اللي حصل في اليوم ده .. يوم 6 يونيو 1944 هو اللي حنتكلم عنه النهاردة.

يهمني أوي قبل ما نخش في التفاصيل إنك تبقي مستوعب حجم الحاجات اللي حصلت في اليوم ده .. تعالي نتخيل إنك بتحاول تضبط خروجة لصحابك من أيام الكلية .. يا سيدي مش حقول إنك جامد زحليقة عشان تجمع الدفعة كلها .. خلينا نتكلم عن شلتك القريبة اللي هم يدوبك عشر رجاله .. كل واحد فيهم ليه حياته و شغله و مشغولياته .. لازم تلاقي طريقة إنك تكلمهم كلهم تعرض عليهم الفكرة .. تخليهم كلهم يوافقوا .. تتفق علي اليوم و ده حيبقي قصة حزينة إنك تلاقي يوم مناسب لمواعيدهم كلهم .. السواد و النكد كله إنك تتفق معاهم علي المكان .. تاني أنا بكلمك عن خروجة لعشر بني أدمين .. تخيل نفسك بتضبط عملية عسكرية بيشارك فيها 500,000 عسكري .. مش بس كده .. العساكر دول مش من بلد واحدة ليهم نفس اللغة و الديانة و العادات و التقاليد و التدريب و التسليح .. لا خالص .. دي عملية حيشارك فيها عساكر من أميركا و بريطانيا و كندا و أستراليا و بلجيكا و تشيكوسلوفاكيا و فرنسا و اليونان و هولندا و نيوزيلندا و النرويج و بولندا .. عملية أوفرلورد Operation Overloard أو عملية دي داي D-Day أو الإنزال البري لنورماندي ده يوم متكررش تاني في تاريخ البشر و خلينا نشرحلك هو اليوم ده بدأ إزاي و حصل فيه إيه؟

خريطة أوروبا سنة 1942 وسط ما الحرب العالمية الثانية كانت مولعة .. فرنسا مقسومة نصين بحيث نصها الشمالي تحت الإحتلال النازي و نصها الجنوبي علي الورق حكومة مستقلة إسمها حكومة فيشي بس الناس كلها عارفه إنها عروسة في إيد النازيين.

البداية .. مينفعش نسيبها فاضية للسوفييت:

حاول تتخيل إن فيه مشروع و ليكن مثلاً مدرسة أو مستشفي حتتبني .. شغل الأساسات و الإنشاءات واخداه شركة .. شغل المعماري و الديكور واخداه شركة تانية .. شغل التكييفات واخداه شركة تالتة .. شغل الصحي واخداه شركة رابعة .. شغل الكهرباء واخداه شركة خامسة .. المشكلة إن الشركات دي كلها مقعدتش مع بعض من أول المشروع .. ولا واحد فيهم يعرف هو التاني شغال في إيه .. طبيعي إن في مرحلة من المراحل حتلاقي كله دخل في كله و فيه كمية عك و مصايب محدش عارف يعالجها ولا حتي يفهمها لحد ما حتلاقي فيه حد بيقول باااااااااااس إحنا لازم كلنا نقعد مع بعض في إجتماع عشان نفك السلك الهيدفون اللي داخل في بعضه ده .. لما الحرب العالمية الثانية بدأت سنة 1939 محدش فكر إنه يخلي دول الحلفاء يقعدوا مع بعض .. الإنجليز و الفرنساويين و الهولنديين و البلجيك و الروس و البولنديين و اليونانيين كل واحد فيهم بيضرب في النازيين لوحده و من غير أي تنسيق بينهم و بين بعض .. حتي بعد سنة 1940 لما النازيين مضوا مع الفرنساويين إتفاق إن فرنسا حتتقسم نصين: نص شمالي و ده تحت الإحتلال النازي .. نص جنوبي حيبقي صحيح فرنساوي بس حتبقي حكومة مش بتفطر الصبح غير لما ياخدوا التمام من (أدولف هتلر) .. حكومة جنوب فرنسا دي إتسمت حكومة فيشي و معاها إتولدت المقاومة الفرنساوية.

إنت مش متخيل إزاي فرنسا كانت مهمة بالنسبة للنازيين .. كنا إتكلمنا قبل كده عن إزاي الحرب العالمية الثانية هي كانت في حقيقتها حرب موارد .. فكر فيها كده .. إنت عشان تبعت عسكري للجبهة الشرقية في روسيا بيكون شايل إيه؟ .. هدوم تقيلة معمولة من القطن و الصوف يعني عايز أراضي زراعية تزرع قطن و عايز ثروة حيوانية عشان تدبح الخرفان و المعيز تعمل من جلودهم زي عسكري .. عايز بنزين و فحم و بارود يعني عايز مصانع و مناجم .. عايز طرق و خطوط سكة حديد عشان تنقل كل ده للجبهة .. كل اللي أنا قلته ده وفرته فرنسا .. حرفياً شعب فرنسا جاع عشان القوات النازية تعيش و ده خلي المقاومة الفرنساوية تبقي فاهمة إنك عشان تعور النازيين مش لازم تخطف و تقتل في عساكرهم .. لا خالص .. فرقعلهم خط سكة حديد .. فجرلهم مصنع .. الفلوس حتوجعهم أكتر من موت رجالتهم .. لما الأمريكان دخلوا الحرب بعد غارة بيرل هاربور و بصوا للعك اللي بيحصل قالوا إيه المجتمع ده أوقف يا إبني هنا بقي عشان مينفعش نكمل علي العك ده .. يمكن من أهم مراحل العك هو اللي حصل في أغسطس 1942 لما الحلفاء حاولوا يعبروا بحر المانش عشان يهاجموا و لو ربنا سهلها يعني يحتلوا ميناء دييب Dieppe الفرنساوي .. الهجوم كان كارثي بكل المقاييس .. كارثي لدرجة إنه محققش حاجة غير موت 4,000 عسكري كندي من غير أي داعي.

بغض النظر عن إن يا تري الحلفاء حينسقوا شغلهم مع بعض ولا لا مش دي القضية بالنسبة للألمان .. بالنسبة للألمان الدنيا كده مش نافعة .. مش كل يوم حصحي علي خبر إن قوات من الحلفاء عبرت بحر المانش (اللي هو الممر المائي اللي بيفصل بين إنجلترا و فرنسا و فيه ناس بتسميه القنال الإنجليزي) و ضربت حتة من ساحل فرنسا .. الحل كان النسخة النازي من خط بارليف .. هم سموه حائط الأطلنطي Atlantic Wall و ده عبارة عن سلسلة من التحصينات الدفاعية إمتدت من أول حدود فرنسا مع إسبانيا لحد النرويج .. خط دفاعي بناه أكتر من مليون عامل بالسُخرة من فرنسا .. عامل بالسُخرة يعني ناس بتشتغل ليل نهار و من غير مقابل .. الدفاعات الألمانية كانت فكرتها جديدة في نقطة .. المدافع الميدانية اللي حتترص مش حيبقي هدفها إنها تضرب نار علي السفن اللي حينزل منها المراكب اللي العساكر بتوع الحلفاء حيعبروا فيها .. لا خالص .. الخطة أساساً كانت إن لو العبور حصل فالنازيين حيسيبوا الحلفاء ينزلوا علي الشط بس لو ده حصل حيلاقوا باب جهنم إتفتحت في وشهم .. المدافع الميدانية حتضرب الشط بالعساكر اللي حينزلوا فيها.

حائط الأطلنطي أو خط بارليف بتاع النازيين ده كان سلسلة من الدفاعات الحصينة ماسكة ساحل الأراضي اللي تحت الإحتلال النازي من أول إسبانيا تحت لحد النرويج فوق.

سنة 1943 يعني بعد بداية الحرب بأربع سنين بيحصل أول إجتماع بين الدول اللي المفروض إنهم في فريق واحد اللي هم أميركا و بريطانيا و الإتحاد السوفيتي و الإجتماع ده تم في العاصمة الإيرانية طهران يوم 28 نوفمبر 1943 .. الإجتماع حضره الرئيس الأمريكاني (فرانكلين رووزفيلت Franklin Roosevelt) .. الزعيم السوفيتي (جوزيف ستالين Joseph Stalin) .. رئيس وزراء بريطانيا (وينستون تشرشل Winston Churchill).

الحقيقة إن المشكلة كانت واضحة للكل .. المشكلة بمنتهي البساطة إن أوروبا كلها ما عدا الدول اللي متحالفة مع ألمانيا فعلياً تحت سيطرتهم .. مفيش حد بيضرب نار علي النازيين غير السوفييت و الإنجليز .. الإنجليز قاعدين في جزيرتهم و الألمان من بدري مقررين إنهم مش عايزين يغزوهم .. ده مخلي مفيش حد قدام النازيين يلطشوا فيهم غير السوفييت .. لسنين و النازيين دايسين علي وش السوفييت .. لسنين و (ستالين) حيبوس إيد الحلفاء إن لازم يفتحوا جبهة جديدة عشان النازيين يتلهوا فيها شوية و كان دايماً بيقول إن أنسب حل هو فرنسا .. لسنين برده و رد الإنجليز هو لا فرنسا مش هي الحل .. الحل هو شمال أفريقيا و بعد ما الجيش الألماني في شمال أفريقيا يتهزم يجي دور إيطاليا .. الأمريكان من ناحيتهم مكنش فارق معاهم بس ياريت يا (ستالين) إنت و (تشرشل) تتفقوا .. بس ستالينجراد غيرت كل حاجة.

مؤتمر طهران يوم 28 نوفمبر 1943 و اللي قدامك علي اليمين يبقي رئيس وزراء بريطانيا (وينستون تشرشل) .. اللي في النص يبقي الرئيس الأميريكي (فرانكلين روزفيلت) .. علي الشمال الزعيم السوفيتي (جوزيف ستالين).

فجأة النازيين مبقوش بيدوسوا علي وش السوفييت .. السوفييت اللي بقوا بيكنسوا النازيين زي ما الست والدتك بتكنس التراب و هي بتروق البيت .. هنا السؤال اللي بقي في دماغ الإنجليز و الأمريكان هو مش إزاي نهزم (أدولف هتلر Adolf Hitler) .. لا خالص .. السؤال بقي هو بالصلاة علي النبي بعد ما (هتلر) يغور في داهية حنعمل إيه مع (ستالين)؟ .. خليني أفهمك أكتر .. تعالي يا سيدي نفترض إن الأمريكان سمعوا كلام الإنجليز و ركزوا ضربتهم علي شمال أفريقيا .. و تعالي نفترض إن مبقاش فاضل عسكري ألماني عايش في شمال أفريقيا و تعالي نفترض كمان إن إيطاليا بقت برتقالية مقشرة و الإنجليز و الأمريكان سيطروا عليها .. بس ده معناه إن (ستالين) إتساب يطرد النازيين بره أرضه .. و حيخش بولندا يضمها كلها ليه .. حياخد شرق أوروبا كلها بتشيكوسلوفاكيا و المجر و رومانيا .. حيخش ألمانيا كلها .. مش بعيد ياخد فرنسا كمان .. ده معناه إن لما الحرب تخلص إن شاء الله الأمريكان كل اللي حيكونوا عملوه إنهم شالوا (هتلر) و جابوا مكانه (ستالين) .. إنت مستوعب اللي حصل .. بعد ستالينجراد (ستالين) بقي ندمان إنه نصح الأمريكان يخشوا فرنسا و بقي بيحاول يقنعهم بإنهم خليكوا في شمال أفريقيا .. و في نفس الوقت الإنجليز بعد ما بقوا شايفين إن شمال أفريقيا هي الحل بقوا مختارين فرنسا .. إجتماع طهران خلص علي إتفاق إن الجبهة الجديدة حتبقي فرنسا .. و مش بس كده .. معاد التسليم هو كمان إتحدد و بقي مايو 1944.

التحضير .. قصة حزينة أقسم بالله:

فاكر أول مرة طبخت فيها .. أو أول يوم شغل ليك .. أو حتي ليلة دخلتك .. الفكرة إني عايزك تفتكر تفاصيل يوم إنت عملت فيه حاجة أول مرة تعملها في حياتك .. فيه حاجات كتير عملتها غلط .. حاجات كتير كنت فاكر إنها صح و طلعت غلط .. ده طبيعي .. نفس الكلام علي التحضير لعملية D-Day .. محصلتش قبل كده إن حد فكر يعمل  حاجة بالشكل ده .. إنت محتاج تنقل نص مليون عسكري من حتت مختلفة و توديهم بريطانيا و توفرلهم أكلهم و شربهم و تسليحهم و علاجهم .. إزاي حتخلي العساكر دي تعدي بحر المانش؟ .. بس كل ده كوم .. كل ده حمادة .. و الخناقة بتاعة هو إحنا حنعبر لأنهي حتة من ساحل فرنسا علي بحر المانش دي كوم تاني .. كان فيه إتنين هم اللي شغلتهم إنهم يلاقوا إجابة للسؤال ده .. (دوايت أيزنهاور Dwight Eisenhower) قائد القوات الأميريكية في أوروبا و (بيرنارد مونتجومري Bernard Montgomery) رئيس أركان حرب القوات المسلحة البريطانية.

الحل كان إختيار من إختيارين ملهمش تالت:

  • حتة إسمها كاليه أو بار دي كاليه .. ميزتها إنها أقرب حتة من ساحل فرنسا لساحل بريطانيا .. و ده خلاها الحل المنطقي السهل اللي بيطلع من بق الناس العاقلين .. عيبها إنها أولاً طبيعتها الجغرافية صعبة حبتين و ثانياً إنها زي ما قلت الحل المنطقي السهل اللي بيطلع من بق الناس العاقلين.
  • حتة تانية إسمها نورماندي .. عيبها إنها أبعد نقطة عن ساحل بريطانيا .. ميزتها إن طبيعتها الجغرافية سهلة شوية و الأهم إن مفيش حد عاقل أهله صارفين علي تعليمه حيفكر إنه لما يجي يعدي بحر المانش في عملية عسكرية  يروحلها .. ده المكان اللي عمر ما الألمان حيتوقعوه .. ده المكان اللي حيضمن للحلفاء عنصر المفاجأة.
الخريطة دي توريك الفرق اللي مش طبيعي بين الإختيارين .. الإختيار الأول كان مدينة كاليه Pas de Calais اللي يدوبك فردة كعب بينها و بين مدينة دوفر الإنجليزية و كانت أقرب مدينة فرنساوي لساحل إنجلترا بس ده كان حيبقي إختيار الناس العاقلين اللي مش بس الإنجليز ممكن يفكروا فيه ده أكيد كمان الألمان توقعوه .. قصاد نورماندي Normandy اللي فعلاً كانت في اخر بلاد المسلمين بالنسبة للجنرالات اللي بيخططوا لعمليات الإنزال البري علي ساحل فرنسا و يمكن عشان هي بعيدة تم إختيارها لإن مفيش حد عاقل ممكن يفكر يختارها.

فكرة عنصر المفاجأة دي بالذات إحتاجت شغل كتير من المخابرات العامة البريطانية MI5 .. المطلوب سهل .. حضرتك عايز لما العبور يبدأ النازيين يتفجعوا .. بس كده .. هي بس المشكلة في نقطة .. عارف الممثلة (ويزو) بتاعة مسرح مصر؟ .. تخيل إنك عايز تهربها بره مصر .. أنا مش عايز أبقي عنصري أو متنمر علي البني أدمين اللي بيعانوا من زيادة الوزن بس إنت فاهم الفكرة؟ .. بعد مرحلة معينة حجم الشيء بيبقي أكبر من أي محاولة لإخفاءه .. إنت بتتكلم عن إن الأمريكان كانوا بيفكروا إن القوات اللي حتعبر بحر المانش خلال أول شهر من العبور حوالي 1.2 مليون عسكري .. 1.2 مليون عسكري بسلاحهم و أكلهم و شربهم و ذخيرتهم و خيامهم و سلطاتهم و باباغنوجهم .. لو إنت مكان المخابرات البريطانية حتخبي تحركات المولد ده كله إزاي؟  .. هنا يجي دوري إني أعرفك علي الأصل بتاع خطة الخداع الإستراتيجي اللي عملناها عشان خاطر نخبي علي الإسرائيليين إننا حنعبر القناة يوم 6 أكتوبر 1973 .. هنا يجي دور إننا نتكلم شوية عن العملية ثبات أو Operation Fortitude .. العملية اللي عمرك ما حتفهمها غير لما أقولك إنها إتبنت علي جملة واحدة بس .. بص العصفورة.

أول حاجة تتعلمها إنك دايماً إفتكر إن عدوك مهما كان هو مين عنده إختراع إسمه المخابرات .. دي ناس دورها إنها تعرف إنت بتفكر في إيه و بالتالي منطقي إن المخابرات الألمانية تكون عارفه و متوقعة إن الحلفاء بيفكروا يغزوا أوروبا بإنهم يعبروا بحر المانش .. مفيش أي منطق إنك تحاول تقنع الألمان إنك مش حتعبر لإن الكلام ده مبيدخلش دماغ ناس عاقلين .. التارجيت اللي المخابرات البريطانية كانت عايزة توصله إنهم يوصلوا للألمان 3 معلومات غلط:

  • عدد القوات اللي حتعبر.
  • معاد العبور.
  • مكان العبور.

إنت مش عايز المخابرات الألمانية لما تيجي تراقب تحركاتك تقول باااااس الحلفاء حيعبروا في المكان الفلاني .. إنت عايزهم دايما حيرانين .. ده معناه إن القوات المسلحة للحلفاء كان مطلوب منها إنها تتقسم لحتتين:

  • الحتة الأولانية و دي كانت الجيش الرابع البريطاني و ده جاتله تعليمات إنه يفضل قاعد فوق خالص في أسكتلندا .. ليه؟ .. عشان لما المخابرات الألمانية تشوفه قاعد فوق كده يقولوا بااااس يبقي البريطانيين بيفكروا ينقلوا الجيش ده للنرويج بحيث يفتحوا جبهة جديدة فوق في شمال أوروبا و لأجل الصدف يعني الجبهة دي حتكون قريبة جداً من الجبهة السوفيتية.
  • الحتة الثانية تبقي الجيش الأول الأميريكي بقيادة الجنرال (جورج باتون George Patton) حتفضل قاعدة قدام كاليه اللي بفكرك إنها كانت واحدة من الإختيارين اللي كانوا قدام الحلفاء عشان يعبروها عندها .. ليه الجيش الأول الأميريكي قعد هناك؟ .. عشان يفضل الألمان مقتنعين إن الحلفاء عايزين يعبروا من كاليه بإعتبارها زي ما قلتلك أقرب نقطة ليهم لساحل فرنسا علي بحر المانش.

بس هو فيه نقطة إنت محتاج تفهمها .. الجيش الرابع البريطاني و الجيش الأول الأميريكي دول مجرد هواء .. مجرد كذبة .. الجيشين دول هم نتاج عبقرية مخرجي السينما الأمريكان .. المخابرات البريطانية جابت مخرجين سينما عشان يصوروا جيش من العرايس الخشب و لبسوهم لبس العساكر و طيارات فاضية و مدرعات عبارة عن هياكل بس فاضية من جوه بحيث زاوية تصوير الكاميرا كانت تقنعك إن دول عساكر بحق و حقيقي .. يا مؤمن دول بنوا مبنيين كاملين كل مبني كمقر لقيادة جيش من الجيشين و كانوا مباني فاضية مفيهاش حد .. طب إيه رأيك إن مخرجين السينما دول صوروا ملك بريطانيا (جورج السادس) في زيارة ميدانية للجيشين و أرجع و أقولك إن زاوية تصوير الكاميرا كانت بتخليك تحلف بأيمانات المسلمين إن دول عساكر بحق و حقيقي و إن الملك بيسلم عليهم بنفسه .. الإعلام لعب دور مهم فوق ما تتصور إنه يفضل يعيد و يزيد في حتة إن الجيش الأول الأميريكي حيكون هو رأس الحربة في الغزو اللي جاي لفرنسا .. أومال إحنا جايبين الجنرال (جورج باتون) بجلالة قدره ليه؟ .. إنت محتاج مش بس إن المخابرات الألمانية تحس إن كاليه هي مكان العبور ده إنت محتاجهم يبقوا متؤكدين من ده .. و هنا يجي دور الناس اللي كانت ورا إن الحلفاء يكسبوا الحرب .. لجنة العشرين.

لجنة العشرين أو Twenty Committee كانت فريق من المخابرات البريطانية دورة زي ما قلت إنهم يخلوا الألمان حيبصموا بالعشرة إن كاليه هي الحل .. إنت عايز ضباط المخابرات الألمان يبقوا متؤكدين لدرجة إن لما حد فيهم يقف قدام الزعيم النازي (أدولف هتلر) شخصياً يقوله بكل ثقة العريس الجديد إنه حيشرف معشر الرجالة ليلة الدخلة بإن أيوه يا ريس .. الحلفاء حيعبروا من بار دي كاليه .. الحقيقة إن إسم لجنة العشرين ده لوحده يضحك أوي .. رقم عشرين لما بيتكب باللغة اللاتينية بيبقي XX و في اللغة الإنجليزية لما بيتحطلك XX جنب بعض إنت بتنطقهم Double Cross .. أساساً كلمة Double Cross دي بتتقال لما تيجي تعمل مقلب في حد بس بيكون مقلب معلمين لدرجة إنك بتضحك عليه مرتين .. و ركز أوي في النقطة دي .. لجنة العشرين عشان تحقق هدفها لازم تضحك علي المخابرات الألمانية مرتين بإنها تعمل ده:

  • أولاً إنت حتدي للمخابرات الألمانية معلومات فشنك بس من مصادر موثوق منها بما لا يدع مجال للشك إن العبور حيتم عند كاليه .. لو حد جابلكوا سيرة نورماندي متصدقهوش .. كاليه ها .. تمام.
  • ثانياً حتدي للمخابرات الألمانية معلومات برده بس تتاقل بالذهب لكن حتديهم المعلومات دي متأخر .. ليه؟ .. عشان تفضل المخابرات الألمانية مقتنعة بإن الجواسيس اللي بيملوا دماغها بالمعلومات الفشنك عن إن العبور حيتم عند كاليه دي ناس بتقول الحقيقة فعلاً بس هم اللي محتاجين يتلححوا شوية و يسمعوا كلامهم بدري.

السؤال دلوقتي .. حتعمل ده إزاي؟

سنة 1939 المخابرات البريطانية مسكت جاسوس بريطاني النازيين زرعوه في إنجلترا بس الإنجليز عرفوا يحولوه لعميل مزدوج يعني الألمان مش عارفين إن الإنجليز قفشوه و إنه بقي شغال لحساب الإنجليز دلوقتي .. المهم إن الجاسوس ده كان علي الله حكايته بس يمكن الحسنة الوحيدة اللي المخابرات البريطانية خدتها منه إنه علمهم الطريقة اللي المخابرات الألمانية بتتواصل مع الجواسيس بتوعها في أوروبا .. حلو بدأت تندع أهي .. تعالي إنت علي كل العملاء المزدوجين أو Double Agents اللي شغالين لحسابك يعني جواسيس نازيين إنت قفشتهم بس النازيين ميعرفوش إنهم إتقفشوا و خليهم يهروا ودان المخابرات الألمانية بالمعلومات الغلط .. اللي زي ماقلتلك بتيجي من مصادر موثوق منها .. واحد من العملاء المزدوجين دول كان إسمه (خوان بوجول جارسيا Juan Pujol Garcia) و إسمه الكودي اللي الإنجليز بيستخدموه ليه هو (جاربو Garbo) .. ده كان إسباني عايش في إقليم كاتالونيا اللي أشهر مدينة فيه هي برشلونة .. الرجل ده لوحده إخترع من دماغه 27 شخصية علي إنهم جواسيس هو جندهم لحساب المخابرات الألمانية و بقي بيكتب جوابات من ال27  شخصية دول و يبعتها للسفارة الألمانية في العاصمة الإسبانية مدريد ولا أجدعها سيناريست مسلسلات … رسايل من 27 جاسوس بتقول إن العبور حيتم من كاليه .. فككوا من نورماندي دي خالص .. ركزوا في كاليه .. الحقيقة إن (جاربو) كان شاطر في شغلته لدرجة إن المخابرات الألمانية إدته وسام الصليب الحديدي Iron Cross تقديراً لخدماته و شغله لحساب الرايخ الثالث.

وسط ما لجنة العشرين شغالين في خطتهم بيكتشفوا حاجة مهمة .. هو معلش لنفترض جدلاً إن النازيين صدقوا إن العبور حيتم في كاليه .. و لنفترض برده إن عبور نورماندي تم زي السكينة في الجاتوه .. طب ما كده بمنتهي البساطة المخابرات الألمانية حتكتشف إنه إتضحك عليها و بكل بساطة كل عسكري و دبابة و بندقية و طيارة ألمانية حتجري علي نورماندي لصد الغزو بتاع الحلفاء .. طب معلش هو إحنا كده إستفدنا إيه؟ .. إنت مش بس محتاج تقنع النازيين إن العبور حيتم عند كاليه .. ده إنت محتاج تقنعهم إن حيبقي فيه عبور تاني عند كذا نقطة علي ساحل فرنسا علي بحر المانش عشان لما عبور نورماندي يحصل ميجروش بسرعة يصدوه .. اللي هو في قول أخر بص العصفورة.

المصادر:

مهندس ميكانيكا بحب الصحافه و الكتابه .. مؤمن بان من حق كل بني ادم انه يعرف الحقيقه ورا الخبر .. رسالتي انك تفهم حقيقه اللي بيحصل عشان لما تقرر رايك تكون فاهم انت بتقرر علي اي اساس

اترك تعليق

بريدك الالكتروني لن ينشر. يجب ملئ الخانات بعلامة *

من فضلك ادخل التعليق!

من فضلك ادخل الأسم!

من فضلك ادخل البريد الالكتروني!من فضلك ادخل بريد الكتروني صحيح!