تابعونا

تاريخ

الطريق الي الأندلس .. مجد الإمبراطوريات إتبني علي التعيينات الصح (الجزء التاسع).

ده معناه ان حكومة المرابطين في الأندلس بقي ماسكها ناس من المرابطين ميعرفوش حاجة عن الحكم و ميعرفوش حاجة عن الإقتصاد ولا عن جغرافيا و الطبيعة الإجتماعية لأهل الأندلس .. ده معناه إن ماسورة هبد و إتكسرت و غرقت الأندلس كلها.

24 يناير، 2021 2.8 ألف

لينك التسجيل الصوتي للمقالة علي ساوند كلاود:
https://on.soundcloud.com/i6t1g

في سبتمبر 1086 و بمجرد وصول (يوسف بن تاشفين) و معاه 12,000 مقاتل للجزيرة الخضراء اللي هي مدينة Algeciras  في أقصي جنوب إسبانيا و بقي واضح للكل هو جاي يعمل إيه .. معلش يعني 12,000 مقاتل أكيد مش جايين يقضوا أجازة سعيدة .. هم أكيد جايين يعملوا حاجة جديدة مفيدة .. (ألفونسو السادس) هو كمان بمجرد ما جاله الخبر بقي عارف إن خير البر عاجله .. (يوسف) خد رجالته و إتقدم بإتجاه إشبيلية Seville و هنا قابل جيش الطوائف و بدأ يتحرك للشمال .. (ألفونسو) وقتها كان بيحاصر مدينة سرقسطة Zaragoza في شمال إسبانيا و سحب قواته و بدأ يروح عشان يقابل قوات (يوسف) .. المواجهة اللي الناس كلها مستنياها حصلت يوم 23 أكتوبر 1086 في قرية إسمها ساجراهاس Sagrajas يدوبك علي بعد ساعة بالعربية من مدينة باداهوز Badajoz .. المعركة دي الغرب بيسميها معركة ساجراهاس Battle of Sagrajas بس المصادر العربية بتسميها معركة الزلاقة اللي هي الإسم العربي الفصيح لكلمة زحليقة .. معركة الزحليقة دي اتسمت كده عشان الدم كان مطرطش في كل حته لدرجة إن العساكر كانوا بيتزحلقوا .. المعركة دي تستحق إننا نقف قدامها شوية لإنها رسمت ملامح الأندلس لسنين قدام.

في سبتمبر 1086 (يوسف بن تاشفين) و معاه 12,000 مقاتل وصلوا مدينة الجزيرة الخضراء أو Algeciras أقصي جنوب إسبانيا و إتحركوا بعدها علي مدينة إشبيلية Seville .. وقتها (ألفونسو السادس) كان بيحاصر مدينة سرقسطة Zaragoza في شمال شرق إسبانيا فكسر حصاره و جري علي مدينة باداخوز Badajoz عشان تحصل معركة الزلاقة أو معركة ساجراهاس Sagrajas واتسمت كده علي اسم قرية ساجراهاس اللي حصلت فيها المعركة.

معركة الزلاقة .. مش عايز فدان حظ .. أنا عايز قيراط مفهومية:

الجيشين قابلوا بعض علي ضفتي نهر .. علي إيدك الشمال كانت قوات (ألفونسو السادس) اللي قسم رجالته لصفين .. الصف الأول هو الصف اللي عدداً أقل و دول فرسان مرتزقة جابهم من إقليم أراجون Aragon في شمال إسبانيا .. الصف الثاني و دول الأكثر عدداً كانوا رجالة (ألفونسو) من مملكة قشتالة ليون Castille Leon Kingdom .. تقريباً (يوسف) فرش قواته بنفس الإسلوب .. الصف الأول كانت قوات ممالك الطوائف بما فيهم جيش مملكة إشبيلية اللي هو شخصياً كان معتمد عليه .. الصف الثاني كنت قوات المرابطين اللي جت معاه من المغرب .. المعركة أحداثها مشيت كالأتي:

  • المرحلة الأولي إن قوات الفرسان المرتزقة بتاعة (ألفونسو) بدأت هجوم كاسح بقيادة أهم جنرال تحت إيده اسمه (ألفار فانيز Alvar Fanez) .. الهجوم كان كاسح لدرجة إن أغلب قوات الطوائف إنسحبت باستثناء قوات مملكة إشبيلية بقيادة ملك إشبيلية (المُعتمد) .. (ألفار فانيز) بدأ يجري ورا قوات الطوائف المنسحبة و بالتالي هو ساب المعركة أصلاً.
  • (ألفونسو) قال لنفسه ما هي سهلة أهي .. أنا أعمل زي ما الواد (ألفار) عمل و أكنس قوات المرابطين بالفرسان بتوعي .. فعلاً هجومه كان قوي لدرجة إنه خلق ثغرات في خط دفاع (يوسف) اللي ساعتها قرر يعمل مناورتين في وقت واحد.
  • المناورة الأولي إنه أمر قوات الإحتياط بتاعته إنها تطلع تهاجم الجناح بتاع جيش (ألفونسو) هي و قوات مملكة إشبيلية اللي كانت لسه في الميدان منسحبتش .. المناورة الثانية إنه خلي فرقة فرسان تسيب المعركة و تجري علي معسكر قوات (ألفونسو) اللي لما شاف ده أمر رجالته بالإنسحاب العشوائي لحد المعسكر بتاعهم و دي الغلطة اللي كلفته المعركة.
تقسيمة معركة الزلاقة إن (ألفونسو السادس) رص قواته علي صفين .. الصف الأول كان المرتزقة اللي جابهم من إقليم أراجون و الصف الثاني هم الخيالة بتوعه هو من مملكة قشتالة ليون .. علي الناحية الثانية (يوسف بن تاشفين) برده رص قواته نفس الرصة بحيث الخط الأمامي كانت قوات ممالك الطوائف ومنهم قوات مملكة إشبيلية و الخط الخلفي كان الخيالة بتوعه هو من المغاربة.
المرحلة الأولي من المعركة إن قوات المرتزقة بتاعة أراجون بقيادة الجنرال (ألفار فانييز) بدأت هجوم كاسح أجبر قوات الطوائف علي الإنسحاب باستثناء قوات إشبيلية اللي فضلت صامدة .. الغريبة إن (ألفار فانييز) ساب المعركة و ساب (يوسف بن تاشفين) وراح يجري ورا قوات الطوائف المنسحبة.
(ألفونسو السادس) عمل نفس الخطوة إنه بدأ هجوم كاسح بالخيالة خلق مشاكل كتير لدفاعات المرابطين بس (يوسف بن تاشفين) عمل مناورتين مهمين أوي .. هو أمر قوات الإحتياط بتاعته و قوات إشبيلية بقيادة ملك إشبيلية (المعتمد) إنهم يضربوا جناح قوات (ألفونسو) .. وفي نفس الوقت بعت وحدة خيالة عشان تروح تهاجم معسكر المسيحيين .. بمجرد ما (ألفونسو) شاف ده أمر بانسحاب عشوائي كان هو السبب في إن خسايره تزيد لدرجة إن جيشه مبقاش فاضل فيه غير 500 فارس بس.

خساير قوات (ألفونسو) كانت كبيرة لدرجة إن لما (ألفار) رجع ينقذ الوضع لقي إن الإنسحاب اللي مش منظم خلي مفاضلش في جيش (ألفونسو) إلا حوالي 500 فارس و ده خلاه هو شخصياً ينسحب و يسيب الملك بتاعه لمصيره .. (ألفونسو) قدر يهرب بشوية الفرسان اللي معاه بعد ما خسر أغلب جيشه و هي دي النقطة اللي أنا الحقيقة وقفت قدامها جداً لما جيت أفكر شوية في المرحلة دي من تاريخنا مش بس كمسلمين و كعرب إنما كبشر عموماً .. فيه مصطلحات في حياتنا إحنا بنقولها بس مش بنبقي فاهمين أوي هي معناها إيه؟ .. مصطلح بيعجبني أوي هو دولة المؤسسات و مصطلح تاني بيعجبني أكتر اللي هو الدولة المدنية .. اللي حصل إن بعد ما (يوسف بن تاشفين) إنتصر في معركة الزلاقة و في الوقت اللي كان المفروض يدوس جامد في الأندلس و يخلص من الممالك المسيحية خالص جاله خبر إن المغرب ولعت .. القبائل الأمازيغية ما صدقت إن الكبير مش موجود و ثاروا و من ضحايا الثورات دي كان ابن (يوسف بن تاشفين) اللي إضطر يسيب الأندلس و يرجع تاني المغرب و هنا أنا دايماً بقول لنفسي قد ايه إحنا كبشر و كبني أدمين عايشين في نعمة أجدادنا كان نفسهم يجربوها و هي دولة المؤسسات.

إحنا في مصر جربنا إن رأس الدولة يمشي فجأة .. جربنا إن المؤسسة الأمنية كلها تنهار .. جربنا إننا نصحي الصبح منلاقيش عسكري بوليس في الشارع .. بس رغم كل ده الدولة موقعتش .. تفتكر ليه؟ .. ليه بعد ثورة يناير مثلاً مطلعش محافظ الإسكندرية أعلن استقلالها؟ .. ليه محافظات الصعيد مقالتش إحنا زهقنا من تريقة أهل بحري علينا و جه الوقت إننا نحكم نفسنا بنفسنا؟ .. ليه مصر مدخلتش مرحلة الحرب الأهلية بمجرد ما الراس الكبيرة مبقاش موجود؟ .. عشان البلد دي بلد مؤسسات .. صحيح هي مش بنفس قوة دولة تانية زي ألمانيا أو بريطانيا بس أهو .. مصر دولة فيها مؤسسات تقدر تقف علي رجلها .. لو بكره الصبح الرئيس المصري جاتله وعكة صحية و الدكاترة حطوه في العناية المركزة مفيش حد حيقلق من فكرة إن البلد تحصل فيها ثورات و كل محافظ يقولك أنا عايز استقل بالمحافظة بتاعتي .. ده يوريك قد إيه الدول و الممالك و الإمبراطوريات زمان مكنتش بالقوة اللي إنت متخيلها لو حتقيسها بمعيار دولة المؤسسات اللي أنا لسه شارحه من شوية .. صحيح دولة المرابطين زيها زي دول كتير في التاريخ عسكرياً كانت قوية جداً بس كدولة هي كانت زي التراب شوية هوا جامد شوية حيطيرها.

من سنة 1086 لحد سنة 1088 زي ما تكون كده قعدت تشتغل كتير علي AutoCAD و تقريباً خلصت المشروع اللي إنت شغال عليه و عشان نسيت تعمل Save أول ما النور قطع شغلك كله طار .. في سنتين بس كل الدم و كل التضحيات اللي عملها المرابطين في الأندلس ولا كأنها حصلت .. إنت متخيل حرقة الدم؟ .. في سنتين كانت ممالك الطوائف رجعت تاني تمسك في خناق بعض .. في سنتين بس كان نظام الجزية اللي ممالك الطوائف بتدفعها ل(ألفونسو السادس) رجع تاني و في سنة 1088 كان (ألفونسو السادس) قدر يجمع جيش جديد و استولي علي مدينة أليدو Aledo و هنا ملوك الطوائف ملقوش حل غير إنهم يبعتوا جواب ل(يوسف بن تاشفين) يقولوله تعالي إلحقنا .. (يوسف) خد جيش و عمل عملية إنزال بري علي شواطيء مدينة ألميريا و جري بجيشه عشان يلحق مدينة أليدو.

الفكرة إن المرابطين عشان زي ما قلتلك دي ناس عايشة في الصحراء و مش متعودين علي حصار المدن مكنش عندهم تكنولوجيا الحصار .. أنا عارف إن تكنولوجيا دي كلمة حديثة بس زي ما الطيارات بدون طيار و الطيارات اللي ليها القدرة علي التخفي من الرادار تكنولوجيا عسكرية حديثة فبرده حصار المدن كان بيحتاج تكنولوجيا مكنتش موجودة تحت إيد المرابطين ..  المرابطين معندهمش منجنيق .. معندهمش أبراج حصار .. فيه أسلحة كتير إنت بتحتاجها في حالة إنك حاصرت مدينة و عايز تدخلها بتكون محتاجها و الأسلحة أو التكنولوجيا دي مكنتش في إيد المرابطين .. المفروض إن ملوك الطوائف يوفروا ده و ده محصلش .. ملوك الطوائف بعد ما جابوا المرابطين باعوهم .. حصار أليدو كان كارثة عسكرية إضطر بعدها (يوسف) إنه ينسحب تاني للمغرب و هو بيلعن سلسفين اليوم اللي فكر فيه إنه يجي يلحق الأندلس .. الرجل كان محروق دمه لدرجة إنه فعلياً قال لنفسه خليها تولع .. إياكش (ألفونسو) ياخد قرطبة حتي و أنا مالي.

سنة 1088 سقوط مدينة أليدو Aledo في إيد (ألفونسو السادس) خلي ملوك الطوائف يبعتوا تاني ل(يوسف بن تاشفين) يجي يلحقهم .. (يوسف) جه تاني و كان المفروض إن ممالك الطوائف توفرله تكنولوجيا عسكرية هو محتاجها بس بمجرد ما هو جه كلهم باعوه و حصار أليدو كان كارثة عسكرية أجبرت (يوسف) إنه يرج تاني المغرب.

أهم سلاح في إيد أي حاكم في الدنيا مش الجيش .. الشرعية:

سنة 1090 (يوسف بن تاشفين) جاله نداء استغاثة تاني من الأندلس .. الوضع عمال يسوء بس المرة دي الدنيا مختلفة سيكا و هي إن الطبقة المثقفة في الأندلس بقت شايفه اللي (يوسف) شايفه .. الخناقة بين ملوك الطوائف بتبوظ أي محاولات لإنقاذ الوضع في الأندلس .. هنا (يوسف) جاتله فكرة و الفكرة دي هي إنك كحاكم تبص في المراية و تسأل هو أنا ليه بحكم؟ .. إيه اللي يخلي الناس تسمع كلامي؟ .. الإجابة مش الجيش .. ولا الشرطة .. ولا العنف ولا الدم .. الإجابة هي الشرعية .. أنا بحكم عشان أنا من حقي إني أحكم .. طب تعالي نطبق نفس الفكرة علي الأندلس .. إزاي يبقي ليك الحق إنك تحكم الأندلس؟ .. عندك حل من إتنين .. يا تعلن إنت الخلافة زي ما (عبدالرحمن الناصر لدين الله) عمل إنه أعلن نفسه خليفة علي الأندلس بس ده مشروط إنك تسيطر علي الوضع عسكرياً .. أو إن يتقالك إن إنت ممثل الخليفة في الأندلس و بالتالي بقت معاك شرعية الحكم .. (يوسف) بعت جواب للخليفة العباسي في بغداد طلب منه الإذن إنه يبقي هو والي المغرب و الأندلس و بالتالي شرعاً و قانوناً (يوسف) بقي من حقه إنه يحكم الأندلس .. بمجرد ما موافقة الخليفة العباسي جت فتح الأندلس الجزء الثاني بدأ.

سنة 1090 المرابطون خدوا مدينة غرناطة و مالاجا في جنوب إسبانيا .. سنة 1091 خدوا قرطبة العاصمة و أليدو و مورسيا .. في نفس السنة جه دور إشبيلية .. علي فكرة إشبيلية كان لسه ماسكها (المُعتمد) لو فاكره .. ده نفس الملك اللي حارب جنب (يوسف) في معركة الزلاقة و اللي دلوقتي بقي عدوه .. سنة 1094 باداخوز Badajoz بقت في إيد المرابطين و اللي الحاكم بتاعها إتعدم .. بس (ألفونسو) كان شايف ده بعنيه و بقي عارف إن لازم يعمل حاجة عشان يوقف التسونامي بتاع المرابطين ده .. سنة 1097 (ألفونسو) بعت جيش عشان يواجه المرابطين و الجيش ده إتداس علي وشه في معركة اسمها كونسويجرا Battle of Consuegra .. السنة اللي وراها جيش تاني بعته (ألفونسو) و إتهزق علي إيد المرابطين في معركة أوكليس Battle of Ugles و في المعركة دي الإبن الوحيد ل(ألفونسو) و كان اسمه (سانشو) مات .. حتي بعد وفاة (يوسف بن تاشفين) سنة 1106 الإكتساح بتاع المرابطين للأندلس كمل .. سنة 1108 مدينة فالنسيا بقت تحت إيدهم .. سنة 1110 مدينة سرقسطة بقت بتاعتهم .. فضلت مدينة طليلطية Toldeo هي الشوكة في زورهم .. صحيح هم حاصروا المدينة سنة 1109 بس فضلت مشكلة إن المرابطين مكنش عندهم تكنولوجيا حصار المدن.

سنة 1090 غرناطة Granada و مالاجا Malaga جنوب إسبانيا بقوا تحت إيد المرابطين .. سنة 1091 خدوا العاصمة قرطبة Cordoba و أليدو Aledo و مورسيا Murcia وفي نفس السنة خدوا إشبيلية Seville .. سنة 1094 خدوا مدينة باداخوز Badajoz.

لو حبيت تقيم دولة المرابطين في الأندلس فإنت محتاج تفهم حاجة و هي إن حكم المرابطين للأندلس عامل بالضبط زي ما واحدة من عيلة إلي حد ما منفتحة شوية تتجوز شاب ملتزم دينياً .. البنت بتكون إتربت علي فكرة إن عادي إنها تخرج مع صحباتها و مفيش مانع يبقي ليها صحاب ولاد .. مش بتبقي شايفة إن الحجاب ده حاجة ضرورية إلا لو هي مقتنعة بيه .. علي الناحية الثانية الرجل شايف إن القوامة حق شرعي للزوج علي الزوجة .. أنا الرجل يبقي تسمعي كلامي .. في الأول الحب و الرومانسية بيخلوا كتير من إختلاف وجهات النظر في قضايا مهمة في العلاقة بين أي زوجين متظهرش علي السطح بس مع الوقت الإختلافات دي بتشرخ العلاقة الزوجية .. في الأول المرابطين لغوا كتير من الضرائب الغير قانونية من وجهة نظر الإسلام علي أهل الأندلس و ده خلي الأندلسيين يبقوا علي الأقل في البداية مبسوطين من حكم المرابطين .. في نفس الوقت لما بتعيش فترة طويلة في حالة فوضي فإنت لما بتصحي الصبح تلاقي نفسك عايش في درجة أمن و أمان بيبقي بالنسبة ليك الموضوع برده في الأول لطيف و جميل .. زي ما قلتلك الحب و الرومانسية ده بيكونوا في الأول بس .. بعد شوية الوضع بيختلف.

فجأة المرابطين بقي مطلوب منهم يحكموا دولة متقدمة إقتصادياً و سياسياً و إجتماعياً بسنين ضوئية عن اللي هم متعودين عليه .. في القبيلة أخرك يبقي فيه شيخ قبيلة و ليه حد يساعده .. لكن هنا الدنيا واسعة أوفر .. فاكر لما قلتلك إن (عبدالرحمن الناصر لدين الله) كان ليه 16 مستشار ده غير الوزراء و الحكام بتوعه؟ .. المرابطين لقوا نفسهم مطالبين يعينوا ناس كتير أوي في مناصب عالية أوي .. المنطق بيقول إن أهل البلد اللي عارفين أسرارها هم اللي يمسكوا المناصب دي لإنهم أدري ببلدهم بس ده حط المرابطين قدام سؤالين: السؤال الأول إزاي أثق في الأندلسيين و هم أصلاً السبب في المصيبة اللي هم فيها دلوقتي؟ .. السؤال الثاني هو معلش يعني إزاي أعين وزير مالية يهودي و رئيس وزراء مسيحي؟ .. إنت شفت بنفسك القضية دي في مصر وقت ثورة يناير لما ظهر حزب النور السلفي .. أيا كان رأيك هي الناس دي عندها حق أو لا بس خلينا نتفق بإن السلفيين شايفين إن مينفعش دولة مسلمة يبقي فيها محافظ أو وزير أو مسئول رفيع المستوي يكون من أهل الذمة سواء مسيحي أو يهودي .. ده خلي الأندلس تحت إيد المرابطين تعيش فترة بتتسمي Purge أو تطهير لكل المناصب الكبيرة من الأندلسيين المسيحيين و اليهود.

أقصي توسع قدرت دولة المرابطين في الأندلس توصله و زي ما إنت شايف فضلت طليلطلة Toledo هي الشوكة في زورهم اللي محدش عارف يسيطر عليها.

ده معناه إن حكومة المرابطين في الأندلس بقي ماسكها ناس من المرابطين ميعرفوش حاجة عن الحكم و ميعرفوش حاجة عن الإقتصاد ولا عن جغرافيا و الطبيعة الإجتماعية لأهل الأندلس .. ده معناه إن ماسورة هبد و إتكسرت و غرقت الأندلس كلها .. المرابطين فعلياً إحتاسوا حوسة ما يعلم بيها إلا ربنا بمجرد ما جت سنة 1112 و دي كانت السنة اللي المرابطين عملوا أخر غارة ليهم بره حدود الأندلس علي مدينة هويسكا و برده دي كانت السنة اللي بدأ فيها شكل الأندلس يتغير بشكل كبير .. سنة 1095 دي كانت السنة اللي بابا الفاتيكان (أوربان الثاني Urban II) أعلن الحملة الصليبية الأولي و حاول هنا تستوعب معني الجملة دي .. زمان كان المسلمين هم اللي الفعل و المسيحيين الأوروبيين هم رد الفعل .. دلوقتي بابا الفاتيكان شخصياً خد المبادرة و ده لوحده غير العقلية بتاعة الأوروبيين عموماً و الممالك المسيحية في الأندلس بالذات .. معلش يعني لو مسيحيي أوروبا يقدروا يعملوا حملة صليبية ترجع القدس من المسلمين فإيه اللي يخلينا منعرفش نطرد المسلمين من الأندلس؟ .. خلال الفترة من 1112 لحد 1115 الممالك المسيحية في الأندلس زي ما تكون خدت حباية فياجرا .. لا الحقيقة هم مش حبايتين .. دول 3 حبايات:

  • علي إيدك اليمين فيه مملكة أراجون Aragon و اللي الحقيقة إسمها حيسمع في التاريخ لدرجة إن الكاتب البريطاني المشهور أوي (جيه أر أر تولكين J.R.R. Tolkien) سمي أهم شخصية في سلسلة The Lord of The Rings باسم (أراجورن Aragorn) عشان كان متأثر أوي بالدور اللي لعبته مملكة أراجون في سقوط الأندلس و حنتكلم عنه في الأجزاء الجاية .. المهم إن مملكة أراجون كان ماسكها واحد اسمه (ألفونسو الأول) والرجل ده قدر ياخد مدينة سرقسطة سنة 1118 .. سنة 1120 قدر يهزم جيش للمرابطين في معركة اسمها معركة كوتاندا Battle of Cutanda و من بعدها و نهر إيبرو Ebro River بقي الحدود اللي بتفصل دولة المرابطين في الأندلس عن مملكة أراجون.
  • في النص حتلاقي مملكة قشتالة ليون اللي سنة 1109 الملك بتاعها (ألفونسو السادس) مات من غير ما يكون سايب ولي عهد لإن زي ما قلنا ابنه (سانشو) مات في معركة أوكليس سنة 1098.
  • علي إيدك الشمال فيه مملكة البرتغال اللي إتأسست سنة 1128 و سنة 1147 المملكة دي عرفت تاخد مدينة لشبونة اللي دلوقتي بقت عاصمة البرتغال من إيد المرابطين.
الممالك المسيحية في الأندلس في ثوبها الجديد .. علي إيدك اليمين مملكة أراجون Aragon .. في النص حتلاقي مملكة قشتالة .. علي إيدك الشمال مملكة البرتغال.

سقوط المرابطون .. تاني .. أهم سلاح في إيد الحاكم هو الشرعية:

سقوط دولة المرابطين في الأندلس عشان تفهمه إنت محتاج تستوعب نقطتين .. النقطة الأولانية أنا قلتها من شوية و هي الشرعية .. إيه اللي خلي أهل الأندلس يقبلوا بحكم المرابطين؟ .. أنا قلت إن حكم المرابطين للأندلس كان عامل زي شاب ملتزم دينياً مش حقول سلفي يتجوز بنت إلي حد ما من عيلة منفتحة شوية .. إيه اللي يخلي البنت ترضي إن جوزها يقولها متخرجيش إلا بإذني؟ .. بالنسبة للأندلسيين شرعية حكم المرابطين هي إنكوا تحمونا من الممالك المسيحية .. صحيح إنتوا شلتوا كتير من الضرائب اللي كانت بتتفرض علينا بس في نفس الوقت إنتوا استوليتوا علي الحكم ليكوا لوحدكوا .. بقي مش مسموح لأي حد أندلسي يمسك أي منصب كبير .. كل اليهود و المسيحيين اللي كانوا بيشتغلوا في الحكومة مشتوهم .. و رغم كل ده صبرنا .. تدري ليش؟ .. عشان شرعية الحكم بتاعتكوا هي إن مسئوليتكوا هي الدفاع عن حدود دولة الأندلس .. بس بداية من سنة 1112 و إنتوا مش عارفين تعملوا ده .. سرقسطة وقعت .. لشبونة وقعت .. مشفناكوش يعني جمعتوا جيش و رحتوا ترجعوهم .. مع كل يوم بيعدي و مع كل خبر إن مدينة أندلسية وقعت في إيد الممالك المسيحية و الشارع الأندلسي بيغلي.

النقطة الثانية و هي إن كل حاجة في الدنيا محتاجة صيانة .. سواء بتتكلم عن مكنة عايزة تغيرلها زيت و فلاتر .. أو شقة عايزة تتروق عشان التراب ميتراكمش فيها .. أو حتي فكر زي الفكر السلفي اللي دولة المرابطين إتبنت علي نسخة منه .. فيه مثل أنا مقتنع بيه جداً إن الكلام معليهوش ضرايب .. سهل إنك تقول إني ححكم بما قال الله و رسوله بس بمجرد ما بتقعد علي الكرسي بتلاقي نفسك بتتنازل عن حاجة و الثانية ورا الثالثة .. و لإن الفكر بتاعك إنت مش بتعمله صيانة و مش  بتشرح للناس إنت ليه عملت كده و بيبقي فيه حوار مجتمعي عشان الناس يا تقتنع يا إنت نفسك تقول أنتوا عندكوا حق مينفعش أتنازل في الحتة دي ففيه ناس جوه البلد خصوصاً في المغرب بقوا شايفين إن المرابطين بقوا عشان نستخدم مصطلحات قريبة بالنسبة ليك تنازلوا عن كتير من المباديء اللي الفكر السلفي إتبني عليها لدرجة إنهم بقوا أقرب للعلمانية من السلفية .. هو صحيح إتهام قاسي أوي بس في السياسة إنت دايماً بتلعب في Two Extremes .. يا حتلاقي حد يقول علي نفسه سلفي أوي أو ليبرالي أوي .. لكن خير الأمور الوسط دي تلاقيها في الدايت مش في السياسة.

اللي أنا ححكية دلوقتي إنت حتحس إنك سمعته مني قبل كده .. الحقيقة إن اللي أنا ححكيه دلوقتي هو يعتبر قصة المرابطون كلاكيت تاني مرة .. (أبوعبدالله محمد بن تومرت) رجل بسيط إتولد في بيت بسيط سنة 1080 وقت ما (يوسف بن تاشفين) كان ماسك دولة المرابطين و عمال يتوسع في المغرب .. من و هو صغير و هو عايز يتعلم .. الواد ده حطه في ملعب كورة تلاقية متضايق بس قعده في مكتبة وسط كتب حتلاقيه سعيد سعادة الفيل اللي بيلبطبط في الطين .. من يومه و هو دحيح و عشان كده هو سافر قرطبة عاصمة الأندلس عشان يتعلم .. و مش بس قرطبة .. (محمد بن تومرت) سافر بغداد عشان يتعلم .. حاول بس تتخيل إن الرجل ده قطع إسبانيا و المغرب و الجزائر و تونس و ليبيا و مصر و سوريا لحد العراق علي جمل عشان يتعلم كلمتين اللي إنت أساساً بتكسل تحضر المحاضرة علي زووم من علي سريرك .. و هو في بغداد حصله زي ما حصل ل(يحيي بن إبراهيم) لو تفتكره .. (يحيي بن إبراهيم) كان قائد قبيلة الجُدالة اللي لما راح يحج لقي نفسه بيقول عليا الطلاق ما إحنا عايشين و هو راجع خد معاه إمام اللي هو (عبدالله بن ياسين) و (عبدالله) هو اللي أسس دولة المرابطين.

برده (محمد بن تومرت) لما راح بغداد هو مكنش زي (يحيي بن ابراهيم) مسلم إسماً بس ميعرفش حاجة عن تعاليم الإسلام و كتير من المفاهيم اللي عنده غلط .. وضع (محمد بن تومرت) مختلف .. (محمد) راح بغداد بعد ما إتعلم يعني إيه إسلام و يعني إيه فقه و يعني إيه فلسفة علي إيد الناس بتاعة قرطبة .. بمعني أخر .. (محمد) خريج المدرسة اللي خليني مجازاً يعني أشبهها بإنها المدرسة الليبرالية شوية للإسلام .. (محمد) لما راح بغداد لقي نفسه بيقول برده عليا الطلاق ما إحنا عايشين خصوصاً لما عرف المدرسة الأشعرية اللي أسسها الإمام (أبي الحسن الأشعري) .. (محمد) لما قعد مع الإمام (أبوحامد الغزالي) فعلياً لقي نفسه بيقول وه.

رحلة (محمد بن تومرت) لبغداد حطته قدام حقيقة واضحة زي الشمس .. المرابطين نسيوا كل المباديء اللي حطها (عبدالله بن ياسين) .. قعدتهم الكتير في قصور الأندلس نستهم أصلهم .. سنة 1117 (محمد) رجع تاني المغرب و هنا حتلاحظ إن حياته قلبت علي حياة حد تاني بالنسبة لي شبهه أوي .. (حسن الصباح) .. (حسن الصباح) للي ميعرفش هو مؤسس الطائفة النذارية الشيعية اللي إنت عارفهم باسمهم السيكسي أكتر .. الحشاشين .. (محمد) زيه زي (حسن) كان مقتنع بفكرة إقتناع شبه كلي .. هو بقي عامل زي فيلم Venom كده إن الفكرة كأنها كائن حي مسيطر عليه و الفكرة دي إن المرابطين لازم يمشوا .. سنة 1120 (محمد) راح مدينة فاس المغربية و هو هناك بدأ يمشي في الشوارع يحاول يقنع خلق الله بفكرته و ده خلاه يخش في خناقة مع واحدة اسمها (علياء بنت يوسف) و دي تبقي أخت أمير المغرب .. الخناقة حميت و كلمة منه علي كلمة منها قام ضاربها بالألم .. (محمد) كان عايز يخش في مناظرة مع أخوها الأمير بس هي تقريباً حست إنه عايز يشتم أخوها فإنت عارف الستات المغاربة دمهم حامي شوية .. (محمد) عرف إن الأمير موجود في مدينة مراكش فراحله و طلب يناظره و في المناظرة تقريباً (محمد بن تومرت) كفّر المرابطين كلهم من أولهم لأخرهم .. الأمير رغم إصرار مستشاريه إن (محمد) ده لازم يتعدم بس هو قرر يكتفي بانه ينفيه بره مراكش .. منطق الأمير وقتها إن (محمد) حتي ميستاهلش أجرة السياف اللي حيقطع رقبته .. وجهة نظره إن (محمد) ده رجل مجنون فيوزات مخه لسعت وحيروح يعيش في كهف من الكهوف لحد ما يموت.

الغريبة إن فعلاً (محمد) راح قعد في كهف بس زيه زي (حسن الصباح) أفكاره و تعاليمه دخلت دماغ ناس .. أتباعه و تلاميذه زادوا .. فيه ناس أغنياء كانوا شايفينه صح و بدأوا يتبرعوله بفلوس ..  زي (حسن الصباح) برده اللي حط عينه علي قلعة الموت عشان تبقي مركز عملياته ف(محمد بن تومرت) خد قلعة اسمها تنمل علي قمة جبل من جبال أطلس في المغرب سنة 1124 و في السنة دي (محمد بن تومرت) سمي أتباعه الموحدون .. شوية و (محمد بن تومرت) بدأ يحط هيكل تنظيمي للجماعة بتاعته حتكتشف إنه شبه التقسيمه اللي عملها (حسن الصباح) في الطائفة النزارية .. (محمد بن تومرت) كان هو الزعيم و الراس الكبيرة بس تحت منه فيه مجلس اسمه مجلس العشرة و تحت منهم فيه حاجة اسمها مجلس الخمستاشر بحيث المجلسين دول بيتحط فيهم ممثلين عن كل القبائل الأمازيغية اللي واقفه مع (محمد) .. سنة 1130 (محمد بن تومرت) إتوفي و مجلس العشرة اللي تحتيه أخفي خبر وفاته لأكتر من سنة و نص مش لسبب غير إنهم كانوا عايزين يتفقوا مين اللي يمسك الليلة بعد كده .. سنة 1132 إتعرف ان اللي حيقود الموحدين هو واحد اسمه (أبومحمد عبدالمؤمن) و ده الرجل اللي حنكمل معاه الجزء الجاي من القصة.

المصادر:

الوسوم

مهندس ميكانيكا بحب الصحافه و الكتابه .. مؤمن بان من حق كل بني ادم انه يعرف الحقيقه ورا الخبر .. رسالتي انك تفهم حقيقه اللي بيحصل عشان لما تقرر رايك تكون فاهم انت بتقرر علي اي اساس

اترك تعليق

بريدك الالكتروني لن ينشر. يجب ملئ الخانات بعلامة *

من فضلك ادخل التعليق!

من فضلك ادخل الأسم!

من فضلك ادخل البريد الالكتروني!من فضلك ادخل بريد الكتروني صحيح!