اليمن .. لما بلد يبقي حالها إن الكل جاي عليها.

موضوعنا النهاردة اللي حنتكلم عنه هو اليمن .. إبن عمك في العيلة اللي دايماً بيسقط و كلكوا عارفين إنه بيشرب حشيش و مستقبله ضايع بس برده محدش في العيلة كلها بيحاول يتكلم معاه و يساعده بالعكس كلكوا بتشتموه و بتحرموه من المصروف متخيلين إنه كده حيتأدب .. هي دي اليمن بإختصار .. اليمن لو حبيت تلخصها في جملة حتبقي هي أسوأ كارثة إنسانية في العالم دلوقتي .. أكثر من 80% من شعب اليمن مش ضامن قوت يومه و ملايين اليمنيين علي حافة المجاعة .. الكارثة دي مش بقالها يومين ثلاثة لا دي بقالها سنتين و الأمم المتحدة بتصوت إن اللي بيحصل في اليمن مينفعش يتسكت عليه بس إحنا ولا إحنا هنا .. اللي يقرفك إن العرب بيتصرفوا تصرفات بتخلي الكارثة تشتد يوم عن يوم زي الإخوة السعوديين كده .. السعوديين من شهر نوفمبر 2017 قفلوا تقريباً كل منافذهم الحدودية مع اليمن و ده معناه إن مفيش أي تاجر يمني يقدر يستورد أي أكل أو شرب أو أدوية من السعودية .. ده بالضبط زي قصة الست اللي حبست القطة لا أكلتها ولا سابتها تاكل من خشاش الأرض .. ده يحطك قدام سؤال أظن لازم نسأله لنفسنا: هو إزاي كل ده حصل؟

اليمن من بره تحس إنها مشكلة سهلة .. دولة فيها ناس جعانة زيها زي الصومال فإيه المشكلة إننا نوديلهم أكل و شرب و أدوية .. ما الفلوس كتير و خير ربنا كتير .. من بره تحس إن الموضوع مش مستاهل كل ده بس كل ما تغوص شوية تلاقي إن الموضوع بيعقد أكثر و أكثر لدرجة إنك بتلاقي نفسك مش لاقي مخرج للأزمة و ده الوضع اللي إحنا فيه دلوقتي .. اليمن مصيبتها أكثر من مجرد شعب جعان .. اليمن مشكلتها عبارة عن عصير مضروب في الخلاط مقاديره الإرهاب علي الحرب الباردة بين إيران و السعودية علي البترول علي ظاهرة الإحتباس الحراري و التغييرات المناخية .. عشان تبدأ تفهم هو مين عمل إيه؟ إمتي؟ و إزاي؟ خلينا نشرحلك الوضع عن طريق إننا نسأل شوية أسئلة مهمة:

• إزاي مشكلة اليمن السياسية دي بدأت؟
• إزاي السعودية إتدخلت في اليمن من البداية؟
• هو إيه اللي خلي السعودية تفرض حصار خانق علي اليمن؟
• هل فيه أمل إن الأزمة دي تتحل؟

خلينا نبدأ بالسؤال الأول: هو إزاي أزمة اليمن السياسية دي بدأت؟

القصة الحزينة دي بدأت في نوفمبر 2011 أيام ثورات الربيع العربي لو تفتكر .. بعد ثورات و مليونيات و مصادمات و إعتصامات و خناقات قرر الديكتاتور اليمني (علي عبدالله صالح) الله يرحمه إنه يسيب الحكم خالص و يتنحي و اللي يمسك مكانه هو النائب بتاعه (عبدربه منصور هادي) .. حركة كده زي حركة تنحي الرئيس (محمد حسني مبارك) الله يرحمه بس بدل ما (مبارك) إتحاكم في مصر ف(علي عبدالله صالح) قعد في السعودية مأنتخ و مفخد و ساب (عبدربه منصور هادي) يشيل الليلة .. خلال السنتين من 2011 لحد 2013 قعد (عبدربه منصور هادي) يحاول يحل مشاكل اليمن و بدل ما يحلها يعكها أكثر .. الرجل ده كان عنده 3 مشاكل مكنش عارف يتعامل معاهم إزاي اللي هم البطالة و الأمن الغذائي و الفساد اللي هم ثلاثي أضواء المسرح اللي كفيلين يوقعوا أي نظام .. زود علي كده التهديد اللي كان بيشكله تنظيم القاعدة في شبه الجزيرة العربية.

كان المفروض إن أهم سلاح في إيد (عبدربه منصور هادي) هو الجيش .. أي ديكتاور من اللي كانوا بيحكموا العالم العربي كان معتمد علي الجيش بتاعه عشان يفضل في الحكم .. شوف أي ديكتاتور من اللي كانوا أو لازالوا بيحكموا الدول العربية حتلاقي إن المؤسسة العسكرية هي أقوي مؤسسة في الدولة .. المشكلة إن قادة الجيش اليمني ولاءهم كان ل(علي عبدالله صالح) و مكانوش واثقين أوي في (عبدربه منصور هادي) و شايفينه رجل مهزأ .. ده خلق حالة من العجز عند المؤسسة العسكرية اليمنية إنها مبقتش عارفه تواجه تهديد تنظيم القاعدة في شبه الجزيرة العربية ولا عارفه تواجه بداية التمرد المفتوح اللي كانت بتقوم به جماعة الحوثيين في شمال اليمن.

من غير ما أدخلك في حوارات طائفية و مين هم الحوثيين دول فخلينا نتفق إنهم أه منتمين للمذهب الشيعي و أه الأقلية الشيعية اليمنية واقفة معاهم و أه هم بياخدوا دعم من إيران و أه سامعك ياللي بتشتم في الشيعة و نفسك بكره الصبح يموتوا كلهم .. بس فيه نقطة .. الشعب اليمني كله في المرحلة دي كان عنده إحباط من (عبدربه منصور هادي) .. الناس كان عندها أمل إن بعد ما (علي عبدالله صالح) مشي إن الدنيا حالها يتعدل بس الأمور كانت بتسوء .. الحوثيين إستغلوا ضعف (عبدربه منصور هادي) و إنه مش عارف يحكم و عملوا إنقلاب عسكري عليه و تقريباً فرضوا سيطرتهم علي شمال اليمن .. في البداية اليمنيين العاديين حتي من أهل السُنة و الجماعة منهم كانوا بيشجعوا الحوثيين .. وجهة نظرهم إن الحوثيين يعتبروا تغيير عن الوضع الحالي اللي زي الزفت أصل مستحيل حيبقوا أسوأ من المهزأ (عبدربه منصور هادي) .. أظن بيفكرك بحاجة الوضع ده .. المشكلة إن الطمع خد الحوثيين شوية و حاولوا يشنوا هجوم مسلح علي العاصمة صنعاء عشان يسيطروا علي الحكم بشكل نهائي .. هنا اليمنيين السُنة اللي بفكرك إنهم أغلبية بدأوا يحسوا بالخطر و قرروا و متفهمش القرار ده جه إزاي و منين إنهم حيمنعوا الحوثيين من دخول صنعاء .. الكلام ده كان علي أواخر 2014.

علي فبراير 2015 كان الحوثيين دخلوا صنعاء فعلاً و ده يوريك قد إيه حجم الفشل اللي كان فيه الجيش اليمني إنه كان مجرد نافخ عضلات و إنه ساعة الجد كل الجيش اللي إتصرف عليه مليارات ده كان زي ما يكون فص ملح و داب في كوباية مياه .. المهم إن لما الحوثيين سيطروا علي صنعاء هرب (عبدربه منصور هادي) لمدينة عدن الساحلية .. و هنا يجي دور السعودية.

نيجي للسؤال الثاني: هي السعودية إتدخلت إزاي؟

من نوفمبر 2011 لما قامت الثورة اليمنية لحد فبراير 2015 و السعوديين بيتفرجوا و مش عارفين يعملوا إيه .. هم قلقانين و ليهم حق يقلقوا بس معملوش حاجة .. أكثر من 3 سنين و هم بيقدموا رجل و بيأخروا رجل و دي كانت غلطة كبيرة منهم و أخيراً إتدخلوا لما حسوا بالخطر من إن الحوثيين سيطروا علي صنعاء .. ساعتها بس السعوديين إتدخلوا .. لما لقوا نفسهم قدام واقع إن الحوثيين الشيعة سيطروا علي اليمن جارتهم الجنوبية و كأن الطائفية هي الحاجة الوحيدة اللي بتحرك الدول العربية عشان تتصرف .. كل اللي السعوديين فكروا فيه إن مينفعش الحوثيين (الشيعة) اللي بياخدوا دعم من إيران يسيطروا علي صنعاء .. ده كل اللي كان هاممهم و كل اللي بيفكروا فيه و غير كده كلها شكليات .. من هنا بدأت السعودية إنها تجمع تحالف عربي من الدول السُنية عشان تبدأ حملة عسكرية هدفها حاجتين: أولاً طرد الحوثيين من صنعاء و ثانياً إعادة (عبدربه هادي منصور) للحكم .. لحد دلوقتي المفروض إن الموضوع سهل .. إنت قدامك هدف واضح عايز تحققه صحيح إن تدخلك متأخر بس مشكلة المهم إنك بدأت و إتكلت علي الله .. من هنا بدأت الأخطاء الكارثية اللي السعوديين وقعوا فيها واحدة ورا الثانية.

لمعلوماتك العامة .. اليمن دولة طبيعتها الجغرافية جبلية .. عارف سيناء .. شايف قد إيه هي طبيعتها جبلية و صعبة و بتخلي السيطرة العسكرية عليها شبه مستحيلة .. أهي اليمن كلها زي سيناء كده .. معلومة تانية برده تكون عارفها إن اليمن نسبة الأمية فيها عالية شوية .. دي ناس أيام حرب اليمن اللي دخلتها مصر هناك (جمال عبدالناصر) الله يرحمه بعت ناس من شركة المقاولين العرب عشان يسفلتوا الشوارع الرئيسية فاليمنيين جروا ورا المهندسين والعمال بالخناجر و هم بيصرخوا فيهم أنتوا بتسودوا أرض الله .. فإنت بتتعامل مع شعب أُمي بيصرف كل فلوسه علي القات اللي هو النسخة الPure من الحشيش و طبيعة أرضه جبلية وعرة .. يعني اليمنيين دول ناس بدو عاملين دماغ طول اليوم و مبيعرفوش يقروا ولا يكتبوا .. صحيح كانت ليهم حضارة قديمة كبيرة و عريقة بس خلاص الحضارة دي إتدفنت تحت سنين من القمع و الجهل و المرض .. إضرب الثلاثة مع بعض يطلعلك النسخة العربية من أفغانستان .. دي دولة مينفعش تتعامل معاها بقوه السلاح .. السوفييت جربوا الحل ده في أفغانستان و فشلوا .. الأمريكان جربوا الحل ده في أفغانستان و فشلوا .. العثمانيين جربوا الحل ده في اليمن و فشلوا .. دي بلد محتاجة تصرف عليها دم قلبك عشان تبنيها من الصفر مش إنك تصرف مليارات عشان تفرض سيطرتك عليها عسكرياً .. بس تفتكر السعوديين يتعلموا من دروس اللي قبلهم .. يبقي إنت متعرفش السعوديين كويس.

من فبراير 2015 لحد فبراير 2017 .. سنتين يا مؤمنين و السعوديين عمالين يقصفوا في اليمن بالطيران .. السعوديين ضربوا اليمن بالالاف من القنابل من الجو و كتير أوي منها نزلوا علي مدنيين .. عشان بس نتكلم بالأرقام .. السعودين خلال سنتين نفذوا 8600 غارة جوية في اليمن يعني بمعدل 12 غارة جوية في اليوم .. من ضمن ال8600 غارة دول فيه منهم 3577 غارة أستهدفوا فعلاً أهداف عسكرية تبع الحوثيين و أكثر من 1510 غارة أصابت أماكن مدنية منها مدارس و مستشفيات .. نسبة نجاح في إستهداف العدو معدتش ال42% .. لو ده مش حتسميه فشل ذريع لمنظومة القوات الجوية السعودية كلها يبقي أنا معرفش إنت حتسميه إيه .. بناء علي تقارير الأمم المتحدة الغارات الجوية السعودية أدت لمقتل 10,000 مدني و إصابة 40,000 خلال سنتين بس و كأن السعوديين كانوا محتاجين يثبتوا بنفسهم إن الغارات الجوية مش بتجيب نتيجة .. أقصي نجاح عسكري السعوديين حققوه هو إن القوات الحكومية قدرت تسيطر علي مدينة عدن بعد معارك ضارية إستمرت 4 شهور كاملة قُتل فيها مئات الأشخاص .. و بعدها بدأت القوات الحكومية تفرض سيطرتها علي جنوب اليمن بس شمال اليمن فضل زي ما هو تحت سيطرة الحوثيين ده غير إن فيه مناطق من اليمن تبع تنظيم القاعدة أساساً .. وسط فشل الحل العسكري لجأت السعودية لحل جديد هو الحصار وده حيودينا للسؤال الثالث:

هو مين العبقري إبن العبقري اللي فكر في حل الحصار البري و البحري ده؟

مش عارف إنت قريت الخبر ده ولا لا بس وسط الأخبار عن الإعتقالات اللي عملها (محمد بن سلمان) ولي العهد السعودي لأفراد العيلة المالكة كان فيه خبر إن الدفاع الجوي السعودي إعترض صاروخ باليستي أُطلق من اليمن .. السعوديين قالوا إن والله الصاروخ ده أطلقه الحوثيين و خدوه من إيران و إعتبروا ده إعلان حرب .. السعوديين قالوا إنهم عشان يحموا نفسهم من إن إيران تدي الحوثيين أي صواريخ باليستية تانية فهم فرضوا حصار بري و بحري و جوي علي اليمن .. النقطة دي مربوطة بالسؤال اللي بعد كده.

السؤال الرابع: هو الحصار السعودي ده بيشكل خطر علي حياه اليمنيين؟

فيه حاجة إنت المفروض تكون عارفها بس محدش في الإعلام بيتكلم عنها خالص و هي إن حنفترض جدلاً إن اليمن دي هي سويسرا العالم العربي .. لنفترض إن اليمن عايشة في سلام و الناس بتحب بعض و مفيش حرب ولا عنف ولا أي حاجة .. حتي لو ده حقيقي فاليمن عندها مصيبة سودا سببها التغيرات المناخية الناتجة عن الإحتباس الحراري لإن 90% من مساحة اليمن مصنفة علي إنها أرض صحراوية .. بمعني أخر .. اليمن مفيهاش مياه .. اليمن هي أقل دولة في العالم من حيث توفر المياه للسكان .. ده معناه إن مفيش مياه للناس تشرب و مفيش مياه للزراعة .. يعني لا فيه أكل ولا فيه شرب و حتي الأرض اللي ينفع تتزرع فاليمنيين بيزرعوها قات اللي حوالي 70% من إجمالي رجال اليمن مدمنينه.

قبل الحرب الأهلية دي ما تحصل يعني الكلام ده قبل سنة 2011 كانت اليمن فعلياً بتستورد 90% من أكلها عن طريق البحر .. فيه أكثر من 7 مليون مواطن يمني كانوا عايشين علي الأكل اللي الحكومة بتستورده من بره .. لما قامت الحرب الأهلية مبقاش فيه حد بيستورد أكل و الكلام ده قبل الحصار السعودي فلما الحصار ده إتفرض عليهم فعلياً مبقاش فيه أي أكل بيدخل اليمن .. لما الأمم المتحدة صوتت إن اللي بيحصل ده حيؤدي لكارثة إنسانية السعوديين قالوا إنهم حيخففوا الحصار شوية و حيسمحوا بدخول المساعدات الغذائية لموانيء المدن الثلاثة اللي تحت سيطرة الحكومة بس حتي ده مش كفاية .. عشان برده يبقي كلامنا بالأرقام .. بناء علي تقارير برنامج الغذاء العالمي و منظمة يونيسيف UNICEF و منظمة الصحة العالمية WHO إنت عندك أكثر من 3.2 مليون مواطن يمني معرضين في أي لحظة إنهم يقعوا في خطر المجاعة .. حالياً و إنت بتقرأ المقالة دي فيه أكثر من 150,000 طفل يمني بيعانوا من سوء التغذية .. و إنت بتقرأ المقالة دي بناء علي كلام منظمة أنقذوا الأطفال Save the Children فيه 130 طفل بيموتوا يومياً في اليمن.

اليمن فعلاً بتنهار و بسرعة .. 17 مليون بني أدم منهم 11 مليون طفل محتاجين مساعدات غذائية و طبية عاجلة .. نقص المياه الصالحة للشرب لوحده عامل مصيبة و هي إنتشار الأمراض و حالياً اليمن بتشهد أكبر موجة تزايد في الإصابة بمرض الكوليرا تحصل في تاريخ البشر و بناء علي أرقام الأمم المتحدة فيه أكثر من 900,000 مواطن يمني أصيبوا فعلاً بالمرض.

أظن لازم نختم المقالة دي السؤال الأهم: هل فيه أمل إن الأزمة دي تتحل؟

حالياً أشك .. الأمم المتحدة حاولت تعمل 3 جلسات تفاوض و الجلسات الثلاثة كلهم فشلوا .. الأطراف كلها مش عايزه تتكلم مع بعض .. حكومة (عبدربه هادي منصور) بتقول إنها مش حتقعد تتكلم مع الحوثيين إلا لما ينسحبوا من كل المناطق اللي هم مسيطرين عليها و طبعاً ده مش حيحصل .. أنا عارف إن ما باليد حيلة .. و عارف إن كتير مننا معندوش كتير يقدمه بس علي الأقل إدعولهم .. و إنت بتصلي و إنت بتسجد إدعي لليمن ربنا يفك كربها.

المصدر:

مقالة بعنوان Yemen is on the brink of a horrible famine. Here’s how thing got so bad نشرت في جريدة The Washington Post الأميريكية و ده لينك المقالة الأصلية:
https://www.washingtonpost.com/news/worldviews/wp/2017/11/19/yemen-is-on-the-brink-of-a-horrible-famine-heres-how-things-got-so-bad/?tid=hybrid_collaborative_1_na&utm_term=.002067a52d57