لينك التسجيل الصوتي علي ساوند كلاود:
https://on.soundcloud.com/DRrSE
هل تعلم سيدي القاريء إن الكام سنة اللي فاتوا هم أكتر فترة البشر عاشوا فيها في سلام طوال تاريخنا من ساعة ما ربنا خلقنا .. إحنا لأول مرة في التاريخ عدد البشر اللي بيموتوا بسبب العنف أقل من الناس اللي بتموت من حوادث الطرق أو السمنة المفرطة أو حتي الإنتحار .. فكر فيها كده .. في مرحلة ما قبل الثورة الصناعية كان العنف سواء بقي حروب أو صراعات أهلية مسئول عن موت 15% من البشر سنوياً و في القرن العشرين الرقم ده قل ل5% و دلوقتي الصراعات المسلحة في العالم مسئولة عن مقتل 1% بس من البشر .. حط ده علي جنب و إبدأ بص علي نشرة الأخبار و حتلاقي نفسك بتبص للعالم و تقول أسمع كلامك أصدقك أشوف أمورك استعجب .. مفيش حتة في العالم إلا و فيها ناس بتحارب ناس .. الإنفاق العسكري وصل لمرحلة السفه لدرجة إن فيه ناس بقت بتبص لسنة 2018 مثلاً و بتلاقي حاجات كتير شبه اللي حصلت سنة 1914 و اللي بس بفكرك إن دي السنة اللي حصلت فيها الحرب العالمية الأولي.
لما الحرب العالمية الأولي حصلت محدش كان متخيل إن اليوم ده ممكن يجي و إن الدول العظمي كلها تحارب بعضها .. و زي ما الحرب العالمية الأولي قامت بسبب حادثة إغتيال واحد من العائلة المالكة النمساوية أيام ما كانت النمسا قوة عظمي فبرده في 2023 ممكن حادثة إسقاط طيارة إسرائيلية فوق سوريا أو تجربة فاشلة لصاروخ نووي في كوريا الشمالية تبقي هي الشرارة اللي تولع الحرب العالمية الثالثة .. ده السيناريو اللي الإخوة المتشائمين بيحطوه لنهاية الكون .. أنا فاهم ده كويس .. بس فيه كذا حاجة لازم تكون مستوعبها:
- زمان اللي هو سنة 1914 الناس اللي بتحكم كانوا شايفين إن الحرب حاجة كويسة .. وقتها الحكام كانوا مقتنعين إن الحروب بتعمل طفرة في الإقتصاد و بتبقي رصيد كويس للسياسيين و الحكام .. تقدر تقول إن وقتها زي ما يكون حكام ممالك و إمبراطوريات العالم بيلعبوا مع بعض Age of Empire بس بحق و حقيقي .. دلوقتي إحنا بقينا نلعب Call of Duty اللي هو إحنا وصلنا لمرحلة إننا كبشر مبقيناش عارفين نجاوب علي سؤال هو إزاي نكسب حرب؟
- فكر فيها كده .. إنت قريت في كتب التاريخ إن إزاي بداية من حضارة المصريين القدماء للإمبراطورية الرومانية لحد الدولة العثمانية إن المجد بتصنعه الحرب .. كل حكام العالم سنة 1914 سواء في فرنسا أو بريطانيا أو ألمانيا أو الدولة العثمانية كانوا صغيرين لما شافوا بنفسهم إزاي الحروب بتصنع نجاح إقتصادي و إجتماعي للدول .. خليني أديلك مثال بسيط حيموتك من الضحك .. في الفترة من 1846لحد 1848 يعني خلال سنتين بس أميركا إجتاحت المكسيك و خلال السنتين دول أميركا خسرت 13,000 عسكري في مقابل إنها إحتلت ولايات كاليفورنيا و نيفادا و يوتاه و أريزونا و نيوميكسيكو و أجزاء من ولايات كولورادو و كنساس و وايومينج و أوكلاهوما و دي كانت فعلاً صفقة القرن .. حكام العالم بصوا للحرب الأميريكية المكسيكية و قالوا لنفسهم طب ما الحروب حلوة و بتجيب فلوس زي الفل أهي .. حوالي نص مساحة أميركا دلوقتي دفع ثمنها 13,000 عسكري أميريكي بأرواحهم بس .. يا بلاش.
- مش أميركا لوحدها .. الإمبراطورية اليابانية بنت مجدها علي غزوها العسكري للصين و روسيا .. ألمانيا قدرت تصمد خلال الحرب العالمية الثانية بسبب إنها استغلت موارد فرنسا بعد ما إحتلتها عسكرياً .. حتي بعد الحرب العالمية الأولي ما خلصت دول فرنسا و بريطانيا و إيطاليا بقوا بيتخانقوا و يتسابقوا مع بعض علي مين يحتل أكتر دول في العالم .. يعني معلش إيه اللي يخلي إيطاليا تروح تحتل ليبيا و إيه اللي يخلي بريطانيا تروح تحتل نيجيريا و إيه اللي يخلي فرنسا تروح تحتل فيتنام إلا إذا كان فعلاً الدول العظمي في العالم كانوا بيلعبوا مع بعض Age of Empire بس بحق و حقيقي؟
دلوقتي في 2023 الوضع إختلف يا برايز .. الدول العظمي مبقوش عارفين يكسبوا أي حرب .. من بعد الحرب العالمية الثانية العالم مشافش صراع أكبر من الحرب الباردة بين أميركا و الإتحاد السوفيتي اللي استمرت من 1945 لحد 1989 يعني 44 سنة من غير ما العساكر السوفييت و الأمريكان يضربوا طلقة واحد علي بعض .. سيدنا (عمرو بن العاص) رضي الله عنه دخل مصر و فتحها كلها ب3000 مقاتل و فضلت لحد دلوقتي دولة إسلامية و إذا بالأمريكان ماتلهم أضعاف الرقم ده و صرفوا ترليون دولار في حربهم في العراق و أفغانستان ولسه يا مولاي كما خلقتني .. إنت أكيد شايف الصين قوة عسكرية جبارة بس هل تعلم إن القوات المسلحة الصينية مضربتش طلقة علي حد من سنة 1979 و طول السنين اللي فاتوا الصين مستغليه قوتها الإقتصادية لفرض سيطرتها علي جيرانها ..الصين بنت إمبراطوريتها اللي إنت شايفها دلوقتي مش لإنها قلدت الإمبراطورية اليابانية ولا إنها قلدت الدولة العثمانية إنها توسعت بقوة السلاح .. لا خالص .. الصين بقت الصين لإنها إعتمدت علي إقتصادها زيها زي اليابان و ألمانيا بعد الحرب العالمية الثانية .. ده يخليني أسأل هو لو الصين دخلت حرب مع أميركا حتعرف تحارب أصلاً فمابالك إنها تكسب و متنساش إن زي ما قلتلك العساكر الصينيين مضربوش طلقة من سنة 1979.
الكلام ده مش قاصر علي الدول العظمي بس .. يعني مش بس أميركا اللي مش عارفه تكسب حربها في العراق و أفغانستان و مش بس فرنسا اللي مش عارفة تسيطر علي مالي .. حتي دول الشرق الأوسط مبقتش عارفة إزاي تكسب حروب .. دولة زي إيران قعدت 8 سنين تحارب في العراق و موصلتش لحاجة و من ساعتها و إيران مدخلتش حرب مع حد تاني .. إسرائيل نفس الكلام .. أخر حرب كسبتها إسرائيل كانت النكسة في 1967 .. إسرائيل و إيران دول قوية إقتصادياً دلوقتي بس هم مبنوش قوتهم الإقتصادية علي حروب إنما بنوها بإنهم تفادوا الدخول في حروب .. إسرائيل تفادت إنها تتدخل عسكرياً في سوريا و إيران تفادت إنها تتدخل عسكرياً في العراق .. اللي أنا عايز أوصله ليك إن العالم دلوقتي وصل لمرحلة إننا مبقيناش عارفين الوصفة السحرية لإزاي تكسب حرب و الأهم إننا مبقيناش عارفين هو يعني إيه تكسب حرب؟
لو فعلاً عايز تفهم أنا قصدي إيه بص للي بيحصل في أوكرانيا .. بشكل مختصر أوي أوكرانيا جاره لروسيا و روسيا حاطة عينها علي إنها تحتل أوكرانيا بالكامل بس هم بدأوا بإنهم قطّعوا أسهل حتة في التورتة و هي شبه جزيرة القرم و سبب إني قلت إنها أسهل حتة في التورتة إن شبه جزيرة القرم أغلب اللي عايشين فيها روس هاجروا لأوكرانيا و قعدوا فيها و بالتالي لما صحيوا من النوم الصبح لقوا القوات الروسية في الشوارع مكنش عندهم مشكلة إنهم يقبلوا الوضع الجديد .. حتي الأوكرانيين نفسهم كانوا عارفين إن الدفاع عن القرم معركة خسرانة فإنسحبوا من غير ما يضربوا طلقة .. بس لما الروس جربوا يخشوا أجزاء تانية من أوكرانيا بقوة السلاح زي دونيتسك مثلاً لقوا نفسهم قدام مقاومة عنيفة و إكتشفوا إن الخسائر البشرية و المادية اللي هم حيتعرضولها مش جايبه همها .. ده خلي إن الوضع الجديد دلوقتي إن دول العالم مبقتش تحارب بعضها .. ليه أبعت رجالتي للتهلكة لما ممكن بشوية فلوس أأجر ناس تحارب بالنيابة عني .. الإيرانيين مقضيينها كده في العراق و سوريا و لبنان .. السعوديين مقضيينها كده في اليمن .. الروس مقضيينها كده في أوكرانيا لحد ما إتخبطوا في راسهم و قرروا يغزوها في فبراير 2022 .. و ده بيخليني قدام سؤال هو إحنا إزاي بقينا كده؟ إزاي دولة زي أميركا بكامل قوتها العسكرية دي مش عارفة تكسب حرب؟
- واحد من التفسيرات هو إن إقتصاد الحروب إتغير .. زمان مثلاً في الفتوحات الإسلامية لما سيدنا (خالد بن الوليد) رضي الله عنه إنتصر في معركة اليرموك كان تحت إيده 36,000 مقاتل و كل واحد فيهم بأكله بشربه بتسليحه بمرتبه واقف علي الميزانية بتاعة الدولة بفلوس فلما سيدنا (خالد بن الوليد) إنتصر في المعركة و فتح دمشق غنائم الفتح دي هي اللي عوضت المصاريف اللي إتدفعت .. بس في القرن العشرين مفيش الكلام ده .. أنا لو بكره الصبح الجيش المصري دخل ليبيا عشان يحتلها فأنا مش حستفيد حاجة تذكر .. الإقتصاد دلوقتي مبني علي التكنولوجيا و العلم و مشكلة العلم إنك مينفعش تسيطر عليه عسكرياً .. يعني دلوقتي اليابان متقدمة علمياً فهل الأحسن إن الصين تحتل اليابان عشان تستفيد من العلم ده ولا توقع معاها إتفاقية تجارية و خلاص؟
- تنظيم زي داعش ممكن يستفيد من إقتصاديات الحروب بتاعة زمان إنه يخش مدينة أو قرية يسرقوها و ينهبوها و يحطوا الفلوس في جيبهم .. سنة 2014 لما داعش دخلت مدينة الموصل العراقية سرقوا 500 مليون دولار كانوا محططوين ودايع في البنوك و خلال سنة 2015 جالهم برده 500 مليون دولار من بيع النفط اللي هم سارقينه بس دولة زي الصين أو أميركا مش حتخش حرب عشان تحط في جيبها كام مليار دولار .. إنت متخيل إن أميركا دخلت العراق عشان البترول بس حتي لو كلامك صح فالحرب دي وقفت عليهم بخسارة لإن عمر ما البترول اللي هم خدوه من العراق حيعوض الترليون دولار اللي هم صرفوها في سنين الحرب اللي ملهاش لازمة دي.
- لو بكره الصبح الصين دخلت حرب مع أميركا تفتكر الحرب دي حتخلص إزاي؟ .. هل مثلاً الصين حتحتل أميركا؟ .. طب لو ده حصل هل إنت متخيل مثلاً إن الترليونات اللي الصين دفعتها في الحرب دي حتتعوض لما مثلاً القوات الصينية تخش تحتل مبني Facebook أو Apple ؟ .. صحيح شركة زي Apple قيمتها في السوق مليارات الدولارات بس الفلوس دي مش متخزنة في البدروم بتاع مقر الشركة زي ما كده الخليفة العباسي المستنصر بالله كان حاطط كنوزه في بدروم قصره فلما التتار دخلوا بغداد سرقوا الكنوز دي كلها عشان يمولوا حربهم.
- إنت محتاج تسأل نفسك هو أنا حستفيد إيه لما أدخل حرب مع دولة تانية؟ .. أميركا دفعت فلوس لا يمكن إنك تتخيلها في الحرب العالمية الثانية بس قدرت تعوض خسائرها بإنها لما الحرب خلصت بدأت تحط قواعد و قوانين للتجارة العالمية بحيث يبقي المستفيد الأكبر هو الشركات الأميريكية بس حاجة زي دي مستحيلة دلوقتي .. خليني أفهمك قصدي إيه بشكل مختلف .. إنت عشان دول عظمي تحارب بعضها فإنت بتتكلم عن حرب نووية و عشان كده من بعد الحرب العالمية الثانية لما العالم شاف بنفسه القنبلة النووية بتعمل إيه مفيش دولتين عظمتين دخلوا حرب مع بعض .. حتي الحرب الباردة زي ما قلتلك قعدت 44 سنة من غير ما روسيا و أميركا يضربوا طلقة علي بعض.
ده حيحطك قدام واقع جديد و هو إن الحرب الجاية مش حتبقي حرب بالقنابل و الصواريخ إنما حتبقي علي Keyboards بتاعه الكومبيوترات أو زي ما بتتسمي Cyber Warfare .. خليني أديلك مثال صغير .. زمان في 2006 لما الأمريكان كانوا نازلين قصف في مدينة الفالوجا العراقية لو تفتكر كانت وقتها المقاومة العراقية معندهاش القدرة إنها تدافع عن نفسها فمابالك إنها توجه ضربة إنتقامية لأميركا علي أرضها .. دلوقتي لو Hacker عراقي علي Laptop معاه وصلة إنترنت ممكن يضرب مطار نيويورك الدولي بفيروس يعطل حركة الطيران أو يضرب شركة الكهرباء بتاعة العاصمة واشنطن بفيروس كومبيوتر يخلي عاصمة أقوي دولة في العالم تبات في الظلمة.
بإختصار شديد الحرب زمان كانت بتتحسب بكام عسكري حيموتوا في مقابل أنا حيخش جيبي قد إيه فلوس .. زي ما قلتلك سيدنا (خالد بن الوليد) دخل معركة اليرموك و تحت إيده 36,000 مقاتل استشهد منهم 4,000 مقاتل في مقابل إنه قدر يسيطر علي الشام كلها و دخّل لبيت مال المسلمين فلوس لو جيت تحسبها بإقتصاد دلوقتي حتلاقيها ترليونات الدولارات في حين إن الأسلحة النووية و الCyber Warfare خلت الحروب دلوقتي تتحسب هو أنا أقدر أسبب لعدوي أقصي ضرر قد إيه بأقل فلوس ممكن أدفعها اللي هو إنت ممكن تضرب عدوك بفيروس يرجعه للعصر الحجري بس في نفس الوقت إنت مش حيخش جيبك ملايين .. ده بيخليني أسأل هو إحنا ليه بنصرف مليارات علي الأسلحة إحنا مش محتاجينها؟ .. لو حد عنده إجابة غير الغباء يقولي لإني إحترت الصراحة.
المصدر:
مقاله بعنوان Why It’s No Longer Possible for Any Country to Win a War نشرت في مجله TIME وده لينك المقاله الاصليه:
http://time.com/4826856/russia-trump-north-korea-china-war/
