لينك التسجيل الصوتي للمقالة علي Sound Cloud:
https://soundcloud.com/user-112011687-312727988/rgnyildiee0k
إحنا كمصريين علاقتنا بأفريقيا زي علاقتك بعمامك كده .. لسبب ما علاقة أي حد فينا بخيلانه وخالاته أحسن بكتير من علاقته بعمامه و عماته .. فعلياً مفيش حد عنده تفسير للظاهرة دي بس كلنا عارفين إن ده حقيقي .. الأفارقة هم أهل أبوك .. المفروض إن فيه بينكوا صلة رحم ومش حقول إنك لو شفت حد فيهم في الشارع حتبص الناحية الثانية ولا كأنك شايفه .. مش للدرجة دي يعني .. بس علي قلبك زي العسل إن خالتك تيجي تزوركوا ولا إن عمتك تسلم عليك في الشارع حتي .. زي ما علاقتك بأهل أبوك بتنحصر في المناسبات الإجتماعية والأعياد فبرده علاقتنا كمصريين بأفريقيا مش بتخرج بره ماتشات الكورة .. خد عندك دولة زي كينيا مثلاً .. مفتكرش إنك كمصري مهتم أوي تعرف هي كينيا دي فين في أفريقيا أو عاصمتها إيه حتي .. مش عيب .. بس لو قلتلك إن من فترة فيه ناس مسلحين كانوا أفراد سابقين في القوات المسلحة الكينية وتم إختيارهم علي الفرازة علي إيد ضباط مخابرات أمريكان وبريطانيين عشان ينفذوا عمليات إغتيال غير شرعية ضد تجار مخدرات وإرهابيين تفتكر لسه برده حتقول لنفسك وأنا مالي باللي بيحصل في كينيا؟ .. البرنامج اللي بتكلم عنه ده شغال من 2004 وبيحصل بالتعاون بين وكالة المخابرات المركزية الأميريكية CIA و المخابرات البريطانية للعمليات الخارجية MI6 .. تقدر تقول إن ده شبه إنك تجيب سلسلة The Bourne و سلسلة James Bond تضربهم في الخلاط مع بعض .. لسه برده مش مهتم؟
مش بس كينيا ومش بس أميركا و بريطانيا .. حاول متنساش إن ليبيا بلد في أفريقيا ودي نفس ليبيا اللي الروس بعتوا ليها طيارات مقاتلة MiG-29 وSu-24 عشان تسند (خليفه حفتر) .. و حضرتك بتقرأ المقالة دي فيه 13 دولة علي مستوي العالم ليها قوات عسكرية في أفريقيا أهمهم أميركا وفرنسا .. وحتي مش بس دول .. فيه شركات قطاع خاص بتأجر مسلحين أجانب عشان يشتغلوا في أفريقيا زي ما بيحصل في دولة اسمها موزمبيق .. الحقيقة إن الأرقام فعلاً مرعبة وتخليك تهرش في شعرك وتسأل نفسك السؤال المهم .. هو إحنا فين من كل ده؟
الأمريكان ليهم 7,000 عسكري في أفريقيا .. حاول تستوعب إني بقولك إن لو إنت خدمت في الجيش فبما إن الكتيبة المقاتلة عدد أفرادها ما بين 300-1000 فأنا بقولك دلوقتي إن الأمريكان ليهم ما يعادل 7 كتائب مقاتلة في أفريقيا .. دي عساكر لابسه يونيفوم عليه العلم الأمريكاني وقاعدين في قواعد عسكرية مرفوع عليها العلم الأمريكاني وصل عددهم 34 قاعدة .. الوجود العسكري الأميريكي في أفريقيا متوزع علي دول أوغندا وجنوب السودان والسنغال والنيجر والكاميرون وبوركينا فاسو والكونغو الديموقراطية .. شفت أهي دول كلها لاعبناها في أمم أفريقيا .. دول العساكر اللي معاهم سلاح وبيضربوا نار .. فيه بقي فوقيهم 2,000 عسكري بس في مهام تدريب للقوات الأفريقية متوزعين علي 40 دولة .. كل دول بقي غير عناصر القوات الخاصة .. القوات الخاصة الأميريكية في أفريقيا ليها قواعد عسكرية خاصة بيها في كينيا والصومال .. فرنسا برده ليها حوالي 7,500 عسكري في أفريقيا تقريباً كلهم متركزين في المنطقة بين دول مالي وبوركينا فاسو والنيجر.
ولإن أينما ذُكرت أميركا وجدت الصين فبرده الصين ليها وجود عسكري في أفريقيا .. الحكاية بدأت في 2008 لما الصين حطت مناخيرها في العملية الدولية لمكافحة القرصنة علي السفن التجارية في خليج عدن علي إيد الصوماليين .. اللي منكوا شاف فيلم Captain Philips عارف الحكاية دي كويس .. المهم إن بداية من 2008 لحد 2018 الصين بعتت حوالي 26,000 عسكري لمنطقة القرن الأفريقي وخليج عدن .. وطبعاً إنت بتسأل نفسك هو معلش العساكر دول كلهم حيقعدوا فين بالصلاة علي النبي؟ .. شطور سؤالك مهم جداً وعشان كده سنة 2017 الصين إفتتحت أول قاعدة عسكرية ليها بره أرضها والقاعدة العسكرية دي كانت في جيبوتي .. وده إحنا محتاجين نتكلم عنه شوية.
جيبوتي .. إحنا مش بنحب الفلوس .. إحنا بنعبدها:
فيه مثل شعبي قديم بيقول مصائب قوم عند قوم فوائد .. اللي ترجمته للعامية هو إن الدنيا دي جمعية ودايرة يابا .. قبل سنة 2001 مكنش فيه حد يعرف فين جيبوتي دي اللي بالمناسبة دولة عربية وعضوة في جامعة الدول العربية ودي معلومة مش عارف ليه ناس كتير متعرفهاش .. بعد اللي حصل يوم 11 سبتمبر 2001 ودخول أميركا الحرب علي الإرهاب فجأة الناس كلها بقت بتتكلم عن جيبوتي واللي إتقال اسمها بالبنط العريض في تقرير معهد أستكهولم لأبحاث السلام الدولي SIPRI واللي يُعتبر واحد من أهم المؤسسات البحثية في العالم والناس دي بتقول إن جيبوتي بداية من 2001 و هي عاملة عروض ولا عروض كارفور في عيد الأم وطبعاً مش محتاج أقولك إن كله بثمنه والزباين جاهزين وفلوسهم حاضره.
زبون رقم واحد .. الصين:
الصين بدأت تفوق لأهمية جيبوتي بداية من سنة 2008 .. في السنة دي بدأت العملية الدولية لمكافحة القرصنة قدام سواحل الصومال بحيث إن الهدف هو تأمين خطوط الملاحة البحرية اللي بتعدي من مضيق باب المندب من وإلي قناة السويس .. الصين جت قالت أنا جايه أحط مناخيري معاكوا في العملية دي وأتمني أبقي مبسوطة هنا .. زي ما قلت بداية من 2008 لحد 2018 الصين بعتت 26,000 عسكري .. طول السنين دي كلها والصين مُعتمدة بشكل شبه كلي علي ميناء جيبوتي .. الميناء ده هو اللي الصين استخدمته عشان تجلي 35,000 صيني من ليبيا سنة 2011 وقت الثورة الليبية لو تفتكر .. الميناء ده برده هو اللي الصين أجلت منه 800 مواطن صيني من اليمن سنة 2015 .. ميناء جيبوتي هو اللي كانت القوات الصينية اللي بتشارك في مهمات حفظ السلام اللي تبع الأمم المتحدة بتروحله وبتتوزع منه علي باقي دول أفريقيا .. من ميناء جيبوتي الصين بعتت 1000 عسكري لجنوب السودان وبعتت قوات تانية للكونغو الديموقراطية وليبيريا ومالي والسودان .. طول السنين دي والصين واخدة ميناء جيبوتي إيجار لحد ما قالت لنفسها طب ما أخده تمليك .. في أغسطس 2017 الصين إفتتحت أول قاعدة عسكرية ليها بره أرضها وهنا الموضوع حيحلو أوي.
القاعدة العسكرية الصينية اللي إتبنت علي مساحة 36 فدان تبقي لازقة في ظهر القاعدة العسكرية الأميريكية في جيبوتي برده اللي إسمها كامب ليمونير Camp Lemonnier واللي الأمريكان خدوها سنة 2003 .. عارف إنك مستغرب فأنا حفهمك … كامب ليمونير دي أساساً كانت قاعدة عسكرية فرنسية في جيبوتي ومن 2003 والأمريكان بيستخدموها كجزء من الحرب ضد الإرهاب .. بص عارف إنك بدأت تتوه فخليني أفهمك بالراحة.
زبون رقم إتنين .. فرنسا:
ناس كتير ممكن متكونش عارفه إن جيبوتي أساساً كانت تحت الإحتلال الفرنساوي لحد ما خدت استقلالها سنة 1977 وحتي بعد الإستقلال فرنسا إحتفظت بقوة عسكرية سموها FFDJ ودي إختصار الحامية العسكرية الفرنسية في جيبوتي بس بالفرنساوي .. في ديسمبر 2011 فرنسا وجيبوتي مضوا مع بعض إتفاقية بدأت تتنفذ فعلاً علي الأرض يوم 1 مايو 2014 والإتفاقية دي بتقول صراحة كده إن القاعدة العسكرية الفرنسية في جيبوتي اللي هي كامب ليمونير دي تبقي تبع فرنسا وفرنسا من حقها تعمل فيها اللي هي عايزاه وجيبوتي لو مش عاجبها تروح تشرب من أي خرارة .. لكن وخلي بالك من لكن الجاية دي .. الإتفاقية قالت إن أقصي عدد للعساكر بتوع FFDJ مش حيزيدوا عن 1,450 مع العلم إن عدد العساكر الفرنساويين في جيبوتي سنة 1978 اللي هي السنة اللي بعد استقلالها علي طول كانوا 4,300 .. ركز بقي في الجملة الجاية دي .. كل الهري ده في مقابل إن كل سنة فرنسا بتدي جيبوتي 36 مليون دولار .. اللي هو علي رأي الجيبوتيين .. إبعت يا اللي بتبعت .. نقطة بس علي الماشي كده إن القاعدة العسكرية الفرنساوية دي بيشتغل منها كمان قوات ألمانية ضمن العملية العسكرية الأوروبية لمكافحة القرصنة .. من 2008 والألمان ليهم ما بين 30-80 عسكري شغالين من القاعدة دي والإنجليز كمان ليهم قوات في كامب ليمونير.
زبون رقم تلاتة و يمكن أهم زبون .. أميركا:
بداية إن الأمريكان يبصوا لأفريقيا علي إن لازم يبقي ليهم وجود عسكري فيها كانت بعد هجمات 11 سبتمبر 2001 .. إذا كان الأمريكان سموا غزوهم للعراق في 2003 بإسم عملية الحرية اللي بتقدر تستحمل أي حاجة أو Operation Enduring Freedom فـأحب أقولك إن من أكتوبر 2002 يعني من قبل حتي غزو العراق ما يبدأ والأمريكان زي ما تقول كده عملوا الجزء الأول من السلسلة و اللي سموه Operation Enduring Freedom-Horn of Africa و إختصاراً OEF-HOA .. من 2002 والأمريكان حاطين عنيهم علي حتة القرن الأفريقي اللي هي بإختصار تبقي جيبوتي والصومال وأريتريا وأثيوبيا وكينيا والسودان وكله تحت مسمي الحرب ضد الإرهاب الإسلامي .. وهنا بيجي جيبوتي بتظهر .. سنة 2001 حكومة جيبوتي مضت عقد مع الأمريكان إنهم حيأجرولهم قاعدة كامب ليمونير .. يوم 13 مايو 2003 القوات الأميريكية اللي حتبدأ تشتغل في عملية OEF-HOA بدأت تروح كامب ليمونير اللي بقت فعلياً أول قاعدة عسكرية أميريكية في أفريقيا .. في يناير 2007 الأمريكان خدوا القرار إن كامب ليمونير مبقتش مكفية بوضعها الحالي فأجبروا حكومة جيبوتي إنها تقبل إن الأمريكان يكبروا القاعدة بدل ما كانت علي مساحة 97 فدان بقت 500 فدان.
سنة 2007 برده بيقرر الرئيس الأميريكي (جورج بوش الإبن) إنه يعمل ما يسمي قيادة القوات المسلحة في أفريقيا AFRICOM .. زي ما في مصر عندنا حاجة إسمها قيادة المنطقة الشمالية والجنوبية والشرقية والغربية فالأمريكان عندهم حاجة إسمها قيادة أفريقيا ومقرها في مدينة شتوتجارت الألمانية وحاول متستغربش دلوقتي لإن لسه السواد جاي .. في أكتوبر 2008 قيادة AFRICOM بقت هي المسئولة عن كل حاجة في عملية OEF-HOA .. سنة 2012 وزارة الدفاع الأميريكية قررت تصرف 14 مليار دولار وحاول بس تستوعب الرقم علي تطوير شامل لكامب ليمونير .. الأمريكان لقوا إنهم محتاجين يرموا فلوس تاني في جيبوتي ففي سنة 2014 إدارة الرئيس (باراك أوباما) مضت عقد تأجير لكامب ليمونير لمدة 30 سنة بحيث كل سنة أميركا حتدفع لجيبوتي 63 مليون دولار وده تقريباً أغلي عقد إيجار لشاليه علي البحر شفته في حياتي .. سنة 2018 الأمريكان رموا فلوس تاني في جيبوتي لما قالوا إنهم حيصرفوا 240 مليون دولار عشان يطوروا كامب ليمونير تاني.
مش حكدب عليك وأقولك إن كامب ليمونير مش مهمة بالنسبة للأمريكان وإنهم طول السنين اللي فاتت دي كانوا بيرموا فلوسهم في الأرض لإن ده مش حقيقي .. سنة 2017 عدد العساكر الأمريكان في جيبوتي وصلوا 4000 .. في أكتوبر 2011 الأمريكان بعتوا سرب طيارات F-15E وفي 2016 إتبعت سرب كمان طيارات F-16 Falcon .. فوق ده كله إن كامب ليمونير هي مركز عمليات الطيارات بدون طيار Drones اللي بتضرب اليمن .. المهم إن ساحل جيبوتي علي البحر الأحمر بقي عامل زي بورتو السخنة كده كله كباين .. فيه كابينة تبع الصين .. لازق فيها كابينة بتاعة أميركا .. وجنبهم صف كباين للقوات الفرنسية والإيطالية والإسبانية والألمانية واليابانية اللي كلهم ليهم وجود في جيبوتي .. وزي أي سمسار مبيعملش حاجة في حياته غير إنه يأجر شقق فجيبوتي بيخشلها كل سنة من تأجير أرضها للأجانب 300 مليون دولار .. محدش يقول كده للحكومة بتاعتنا لأحسن بكره الصبح نلاقي البلد كلها إتباعت.
كل من هب و دب بقي له قوات في أفريقيا:
مش بس جيبوتي اللي الأمريكان عملوا فيها قواعد عسكرية .. عندك أثيوبيا مثلاً .. سنة 2003 الأمريكان كانوا واخدين حتة من قاعدة جوية في أربا مينش علي بعد 400 كيلومتر من العاصمة الأثيوبية أديس أبابا عشان يطلعوا منها طيارات بدون طيار .. سنة 2015 الأمريكان سابوا القاعدة دي بس إتفقوا مع الأثيوبيين إنهم حيعملوا كذا قاعدة صغيرة الواحدة بتساع 130 عسكري بس متوزعين في كذا حتة في البلد .. من 2009 والأمريكان بيطيروا طيارات بدون طيار من مطار سيشل الدولي .. ده غير القوات الأميريكية في كينيا .. ده غير الصومال.
حتي الهند .. الهند يا موحدين بالله عايزه تعمل 32 محطة رادار و استطلاع علي سواحل دول سيشل وموريشيوس ومدغشقر .. هي الفكرة بس إن الهند أولاً مقلقة من اللي بتعمله الصين في أفريقيا وثانياً عايزة تحمي طرق التجارة بتاعتها في المحيط الهندي .. كده إحنا جبنا سيرة أميركا وفرنسا والصين والهند .. فاضل مين؟ .. أها فاضل تركيا والإمارات .. سنة 2009 تركيا هي كمان ركبت قطر العملية الدولية لمكافحة القراصنة الصوماليين وفي سبتمبر 2017 الأتراك فتحوا قاعدة عسكرية ليهم في عاصمة الصومال مقديشيو علي مساحة 4 كيلومتر مربع وتقدر تستوعب 200 عسكري تركي زود عليهم 1500 عسكري صومالي لإن الأتراك بيقولوا إن القاعدة العسكرية دي معمولة أساساً عشان تدريب العساكر الصوماليين بتكلفة 50 مليون دولار .. الإماراتيين من ناحيتهم في سبتمبر 2015 فتحوا قاعدة عسكرية ليهم في أريتريا في حتة إسمها أصعب بس هم بيستخدموها عشان يضربوا بيها اليمن اللي هو لا تخرج قبل أن تقول سبحان الله .. القاعدة الإماراتية في أريتريا فيها تقريباً كتيبة كاملة وفيها كام طيارة Mirage 2000-9 وكام طيارة F-16 Falcon .. مش بس كده .. في 2016 الإمارات مضت عقد مع بلد إسمها صومالي-لاند لسه لحد دلوقتي الأمم المتحدة مش معترفة بيها عشان تأجر منها قاعدة عسكرية سوفيتية قديمة محدش بيستخدمها علي مساحة 42 كيلومتر مربع .. الإتفاق إن الإمارات حتصرف 90 مليون دولار عشان تعمل عمرة كاملة للقاعدة دي والمفروض إن القاعدة بدأت تشتغل في 2019.
زي ما إنت شايف إن الدول الأفريقية اللي بتسمح إن يبقي فيه وجود عسكري أجنبي علي أرضها ليها دوافع وأسباب مختلفة عن بعض .. فيه الدول اللي زي كينيا اللي عندها سلام نفسي وإعترفت إن والله أنا مش حقدر أقف قصاد التهديدات الإرهابية اللي بتحصل و أنا مش عارفة أحمي شعبي من اللي بتعمله جماعة شباب المجاهدين وعشان كده أنا حطيت إيدي في إيد الأمريكان .. دول تانية زي جيبوتي ليها دوافع تانية خالص وهي الفلوس .. نقطة تانية برده إن الوجود العسكري الأجنبي في أفريقيا مركز أوي علي منطقة القرن الأفريقي لإن المنطقة دي لوحدها فيها 11 قاعدة عسكرية كلهم زي ما قلتلك شبه الكباين اللي علي البحر .. كل دولة واخده حتة أرض علي ساحل البحر الأحمر والمحيط الهندي و بانيه عليها قاعدة عسكرية ليها .. كل ده بيخليني أرجع أسأل السؤال اللي أنا سألته في البداية خالص .. إحنا فين من كل ده؟
المصادر:
- مقالة بعنوان Why foreign countries are scrambling to set up bases in Africa نشرت في مجلة The Conversation و ده لينك المقالة الأصلية:
https://theconversation.com/why-foreign-countries-are-scrambling-to-set-up-bases-in-africa-146032#:~:text=But%20there%20are%20other%20motivations,focus%20of%20rising%20global%20competition. - مقالة بعنوان Proceed with caution: Africa’s growing foreign military presence نشرت في موقع معهد الدراسات الأمنية Institute for Security Studies و ده لينك المقالة الأصلية:
https://issafrica.org/iss-today/proceed-with-caution-africas-growing-foreign-military-presence - مقالة بعنوان Foreign military activity increasing in the horn of Africa نشرت في موقع Defense Web و ده لينك المقالة الأصلية:
https://www.defenceweb.co.za/featured/foreign-military-activity-increasing-in-the-horn-of-africa/#:%7E:text=The%20presence%20of%20foreign%20militaries,security%20environment%2C%20new%20research%20finds.
